-
˗Mën ˈö ˗tɔ ˗Zlan ˗bha ˗Gblüdëdhɛ?Zuʋ̈gblüdhi ꞊slɔɔ ˗toëpö ˈka! (˗Bhö Biblö draanˈˈ)
-
-
ˈWƆN ˗GƆ 31
˗Mën ˈö ˗tɔ ˗Zlan ˗bha ˗Gblüdëdhɛ?
ˈWɔn ˗nu ˈö Biblö ˗yö ˗an ꞊blɛɛ ˗wo ˗gban ˗Zlan ˗bha ˗Gblüdëdhɛ ˗bha. Zoova ˗dhö bɔ ö ˗bha ˗Gblüdëdhɛ ˗ta ˈö pë ˈö kun ˗a ˗zo ˈˈpiʋ̈ ˗be ˈˈkpɔnŋtaadhɛ ˗da ˈˈtʋ̈ŋ ˈka bhë ˗a ˗kë. ˈˈKɛɛ ˗mën ˈö ˗tɔ ˗a ˗bha ˗Gblüdëdhɛ? Kwa˗ ˈwɔn ˗dɔ ˗kɔ ˗kë ꞊dhɛ ꞊dhɛ ˗ya yö züdɔ? ˗Mën ˈö ꞊yaa˗ kë ˈsaadhö? ˗Mën ˈö ˗dho ˗a kë ˗dhɛkpaɔ dhiʋ̈ˈˈ ˈgü? Dhɛɛˈˈ ˗nu ˈwo bhë ˗an ˗yɔ ˗nu ˗wo ˈwɔn ˗gɔ ˈö yö waa- ꞊plɛ ˈwo dɔ ˗a ˈˈpiʋ̈, ˗an ˈgü.
1. ˗Mën ˈö ˗tɔ ˗Zlan ˗bha ˗Gblüdëdhɛ, de ˈö ˗tɔ ˗a ˗Gblüdë?
˗Zlan ˗bha ˗Gblüdëdhɛ ˈnën ˈö ˗tɔ mɛnkɔɔnsü ˈö Zoova ˗Zlan ˗ya ˗ya. ˗A ˗Gblüdë ˈnën ˈö ˗tɔ Yesu Klito. ˗Yö ˗dho ˗ya dhaŋ˗ ˈgü ˈö ˈˈkpɔnŋtaadhɛ ꞊kɔɔn. (Matiö 4:17; Zan 18:36) Biblö ˗ya ˗pö: «˗Yö ˗dho mɛdhɛ kë [...] ˗todhʋ̈ ˈka.» (Dhukö 1:32, 33) -Yö ˗dho mɛnbhɩɩdhe ˗todhʋ̈sü ꞊kɔɔn˗.
2. De ˈö waa Yesu ˗nu ˈwo ˗dho ˗gblüdëdhɛ kë?
Yesu ˗kɔ ꞊löö ˗nu ˗wo ˗dhö. Biblö ˗ya ˗pö: ‹Mɛn ˗nu ˈwo go ˈgunng ˈsaadhö, ˗wo ꞊suuˈ˗ ˈsaadhö, ˈsɛ ˈsaadhö ˈgü, [...] ˗wo ˗dho ˗gludëdhɛ kë ˈkpongtaa.› (˗Dhɛkpaɔ dhiaˈˈ ˈsëëdhɛ 5:9, 10, NTBL) Mɛn ꞊dhɛ ˗mü? ˈÖ go Yesu ˗bha ˗nu ˈˈkpɔnŋ ꞊taa ˗sü ˗bha ˈö yö ˗a ˈka ꞊dɛɛ ˗bha, mɛn ˈˈmliɲɔn ꞊va ꞊dede ˗wa kë ˗a ˗bha gwëëˈˈ ˗nu ˈka. ˈˈKɛɛ ˗a mɛn 144.000 ˈˈkpaan ˈnën waa Yesu ˗nu ˈwo ˗dho ˗gblüdëdhɛ kë dhaŋ˗ ˈgü. (˗Dhɛkpaɔ dhiaˈˈ ˈsëëdhɛ 14:1˗4 ˗an ˗wo pö.) ˗A mɛn ˈˈpɛpɛ ˈwo to ˗wo ˗dho ˈto ˈˈkpɔnŋ ꞊taa kö ˗Zlan ˗bha ˗Gblüdëdhɛ ˗yö ˗an ꞊kɔɔn.—Psaume 37:29.
3. ˈMën ˗kë ˈö ˗Zlan ˗bha ˗Gblüdëdhɛ ˈdhö ꞊bhlëësü ꞊dedewo ˈö ˗ʒiö ˗a ˈka mɛnbhɩɩdhe ˗nu ˗bha ˗ta?
ˈKö ˗kë ꞊dhɛ ˈˈsɛkɔɔnmɛn ˈbhaa ˗nu zuʋ̈piʋ̈dhɛ ˗yö ˗së, pë ˈwo˗ ˈˈpiʋ̈ kö ˈwo˗ kë, ˗an ˗kɔ ˈyaa ˗mɔn ˗an ꞊gban kë ˗sü ˗bha. ˈˈTʋ̈ŋ ˈbhaa ˗ya ˗wo ˈzü ˈyö mɛn ˈˈwɛɛ ˈbhaa ˗nu ˈö ˗an zuʋ̈piʋ̈dhɛ ˈyaa ˗së ˈwo yö ˗an ꞊ʒiaandhö. ˈˈKɛɛ Yesu ˈö ˗Zlan ˗bha ˗Gblüdëdhɛ ˗gɔ ˈˈdhiʋ̈ bhë, mɛn ˈˈwɛɛ yö ˈti ˗dho yö ˗a ꞊ʒiaandhö. Biblö ˗ya ˗pö ˗Zlan ˗ya «˗gblüdëdhɛ do ˈö yö ˈti ˗dho ˈwü toŋtoŋdhö ˗a ˗ya.» (Daniel 2:44) ˗Ya ˈgo mü ˈzü, Yesu ˈö ˗dho ˈˈkpɔnŋtaadhɛ ˗todhʋ̈sü ꞊kɔɔn˗ bhë, yö ˈti ˗dho bɔ mɛn ˈbhaa ˈka ꞊flüü ˗ta. ˗Gblüdë ˈö mɛn ˗nu ˗dhɔ ˗ya ˗kë, ˈö˗ ˈˈgblü ˈdhö ˗së, ˈö kpɛnŋdhö yö ˗mü. Mɛn ˗nu ˈö ˗dhö ˗an ꞊kɔɔn˗, ˗yö -dho ˗an ˗takun kö ˈˈklʋʋsë ˗nu ˈwo bhë ˗wo kë ˗an ˗gɔ.—Isaïe 11:9 ˗wo pö.
˗KAA ˈˈPIƲ̈ ˈPƆN
ˈPë ˗kë ˈö ˗Zlan ˗bha ˗Gblüdëdhɛ ˈdhö ꞊bhlëësü ˈö ˗ʒiö ˗a ˈka mɛnbhɩɩdhe ˗nu ˗bha mɛnkɔɔnsü suu ˈˈoo ˗su ˗ta bhë, ˗kwaa ˗ga.
4. ˗Zlan ˗bha ˗Gblüdëdhɛ ˗dho ˈˈkpɔnŋtaadhɛ ˗todhʋ̈sü ꞊kɔɔn˗.
Yesu Klito ˈˈpii ˗yö ˈˈgbɩɩ˗ ˈö ˗ʒiö ˗a ˈka mɛnkɔɔnmɛn ˗nu ˈˈpɛpɛ ˈwo kun ꞊kwɛŋzü ɛɛnˈˈ ˈwo ꞊dɛɛ ˗an ˗ta. ˗Ka Matiö 28:18 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
˗Kɔmɔnwɔnbhasü ˈö Yesu ˗gɔ waa˗ ˈdhɛ ˈö mɛnbhɩɩdhe ˗nu ˈwo ˈˈsɛ ꞊kɔɔn ˗an ˗gɔ, ˗an ˗gokopiʋ̈dhɛ ˈnën ˗tɔ ˗mën?
Mɛn ˗nu ˈwo ˈˈsɛ ꞊kɔɔn, ˗a mɛn ˈö ˈdhö ˈˈsɛ ˈˈpian pë ˈˈtɩtɩ ˈnën ˈö˗ ꞊kɔɔn, ˈö ꞊ya kë ꞊shiö ˈö mɛn ˈˈwɛɛ ˗nu ˗wo yö ˗an ꞊ʒiaandhö. ˈˈKɛɛ ˗Zlan ˗bha ˗Gblüdëdhɛ ˗zë ꞊wɛ? ˗Ka Daniel 7:14 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
˗Zlan ˗bha ˗Gblüdëdhɛ «yö ˈti ˗dho ˈwü toŋtoŋdhö.» ˈMën ˗kë ˈö ˗së kwa ˗bha ˈka?
˗Zlan ˗bha ˗Gblüdëdhɛ ˗dho ˈˈkpɔnŋtaadhɛ ˗todhʋ̈sü ꞊kɔɔn˗. ˈWɔn ˗së ˗mü kwa ˗bha ˈka ˗kɔ ˗kë ꞊dhɛ?
5. Mɛnbhɩɩdhe ˗nu ˗bha mɛnkɔɔnsü ˈˈpɛpɛ dua ˗mü kö ˗wo ˈgo ˈˈshia˗.
ˈMën ˗kë ˈö ˗Zlan ˗bha ˗Gblüdëdhɛ dua ˈdhö ˗mü kö ˗yö yö mɛnbhɩɩdhe ˗nu ˗bha mɛnkɔɔnsü ꞊ʒiaandhö? ˗Kaa VIDEO ˗ga, kö dhɛɛˈˈ ˈö ˈˈshia bhë ˈka˗ ˗yɔ mɛɛnˈˈ.
ˈMën ˗kë ˈö ˈkwa˗ pö ꞊dhɛ mɛnbhɩɩdhe ˗nu ˗bha mɛnkɔɔnsü yö ˈti kwa ˗bhawɔn ˗nu ˈˈɲanbhɔ?
˗Ka Ecclésiaste 8:9 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
Ü ˗bha ˈgü, ˗Zlan ˗bha ˗Gblüdëdhɛ dua ˗mü kö ˗yö yö mɛnbhɩɩdhe ˗nu ˗bha mɛnkɔɔnsü ꞊ʒiaandhö ˗ee? ˈMën ˗kë ˈü˗ pö ˈˈdhʋ̈?
6. ˗Gblüdë ˗nu ˈö ˈwɔn ˗nu ˈwo kwa ˗bha ˈwo ˗an dɔ
Yesu ˈö ˗Zlan ˗bha ˗Gblüdëdhɛ ˗gɔ ˈˈdhiʋ̈ bhë, ˗yö ˗kë ˈˈkpɔnŋ ꞊taa ˈyö ꞊dhɛ mɛnbhɩɩdhe ˈdhö. ˗A ˗wɔn ˈgü ˗ya ˈwɔn ˗dɔ ꞊dhɛ «ˈˈsɩ yaa kwa ˗dhɛ.» (Eblö 4:15) ˗Ya ˈgo mü ˈzü mɛn 144.000 ˈö Zoova ö ˗kɔ ˗yɛ ˗an ˗bha kö waa Yesu ˗nu ˗wo ˗gblüdëdhɛ kë bhë, gɔɔn˗ ˗nu waa dhoŋ ˗nu ˈö ˈwo ‹go ˈgunng ˈsaadhö, ˗wo ꞊suuˈ˗ ˈsaadhö [waa] ˈsɛ ˈsaadhö ˈgü› wo ˗mü.—˗Dhɛkpaɔ dhiaˈˈ ˈsëëdhɛ 5:9, NTBL.
˗A ˈwɔn dɔ ˗sü ˈö ꞊dhɛ Yesu waa mɛn 144.000 ˈö ˈwo bhë ˗wo kwa zuʋ̈piʋ̈wɔn waa ˈwɔn ˗nu ˈwo kwa ˗bha ˗an ˗dɔ ˗së ˈka bhë, ˗yö ü zuʋ̈ˈˈ ˗kë ˗saa ˗ee? ˈMën ˗kë ˈü˗ pö ˈˈdhʋ̈?
Zoova ˗yö ö ˗kɔ ˗yɛ dhebɔ waaa gɔɔn˗ ˗nu ˈwo go ˈˈsɛ ˈˈpɛpɛ ˈgü ˗an ˗bha kö waa Yesu ˗nu ˗wo ˗gblüdëdhɛ kë
7. ˗Zlan ˗bha ˗Gblüdëdhɛ ˈtɔŋ˗ ˗nu ˗wo ˗së ꞊dedewo mɛnbhɩɩdhe ˗nu ˗bha ˈtɔŋ˗ ˗nu ˗bha.
ˈˈSɛkɔɔnmɛn ˗nu ˗wo ˈtɔŋ˗ ˗nu ˗dɔ kö ˈwo wo ˗zokë ˗wo ˗bha ˈˈsɛ ˈgümɛn ˗nu ˈˈpiʋ̈. ˗Zlan ˗bha ˗Gblüdëdhɛ ˗de ˈpö ˗a ˈtɔŋ˗ ˗nu ˗wo ˗dhö, kö ˗yö ˈwɔn ˗së kë mɛn ˗nu ˈö ˗dho ˗an ꞊kɔɔn˗ ˗an ˗dhɛ. ˗Ka 1 Kodhɛngtö 6:9˗11 ˗an ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
Ü ˗bha ˈgü, ˈˈkpɔnŋtaamɛn ˗nu ˈˈpɛpɛ ˗wa ˈto ˗Zlan ˗bha ˈtɔŋ˗ ˗nu ˈˈpiʋ̈, ˗tosɛta ˗dho kë ˗kɔ ˗kë ꞊dhɛ?a
Ü ˗bha ˈgü Zoova dua ˗mü kö ˗yö ˈtɔŋ˗ dɔ mɛn ˗nu ˈwo ˗dho kë ˗a ˗bha ˗Gblüdëdhɛ ˗kɔ ꞊löö ˗an ˗ta ˗ee? ˈMën ˗kë ˈü˗ pö ˈˈdhʋ̈?
˗Mën ˈö˗ ˗zɔn ꞊dhɛ mɛn ˗nu ˈö ˈwaa ˈtɔŋ˗ ˗nu ˈwo ˈˈdhʋ̈ ˗an ˈkun ˗ni ˈgü ꞊köŋ, ˗an ˈˈta ˗kɔ ꞊mɔɔn˗ ˗bha ˈö ˗kë ˗së? (˗Kaa ˈˈɲan ˈsɛɛn˗ 11 ˗ga.)
ˈˈSɛ ˗gɔdhiʋ̈mɛn ˗nu ˗wo ˈtɔŋ˗ ˗nu ˗dɔ, kö ˗wo wo ˗zoto wo ˗bha ˈˈsɛ ˈgümɛn ˗nu ˈˈpiʋ̈. ˗Zlan ˗bha ˗Gblüdëdhɛ ˈtɔŋ˗ ꞊bhlëësü ˗nu ˈwo bhë ˗wo kwa ˗bha ˈwɔn ˗së ˈka ˈpö
MƐN ˈBHA ꞊MƆƆN˗ ˗BHA ˈÖ Ü DHƐƐˈˈ KPƆ ꞊DHƐ: «˗Mën ˈö ˗tɔ ˗Zlan ˗bha ˗Gblüdëdhɛ?»
Ü ˗dho ˗a ˗yɔ bɔ ˗kɔ ˗kë ꞊dhɛ?
˗A ˈDHƐ TO KWA ˈˈƝAAN
˗Zlan ˗bha ˗Gblüdëdhɛ ˈnën ˈö ˗tɔ Yesu waa mɛn kpönën ˈö ˗Zlan ˗yö ö ˗kɔ ˗yɛ ˗an ˗bha kö ˗wo ˗gblüdëdhɛ kë dhaŋ˗ ˈgü. ˗A ˈˈtʋ̈ŋ ˗ya ˈto ꞊klöö˗ kö ˗wo ˈˈkpɔnŋtaadhɛ ˗todhʋ̈sü ꞊kɔɔn.
˗Zobuödhe
De ˗nu ˈwo ˗dho ˗gblüdëdhɛ kë ˗Zlan ˗bha ˗Gblüdëdhɛ ˈgü?
ˈMën ˗kë ˈö ˗Zlan ˗bha ˗Gblüdëdhɛ ˈdhö ꞊bhlëësü ˈö ˗ʒiö ˗a ˈka ˈˈsɛkɔɔnmɛn ˗nu ꞊gban ˈˈpɛpɛ ˗bha ˗ta?
ˈTɔŋ˗ ˗nu ˈö Zoova ˈdhö˗ ˈˈpiʋ̈ kö mɛn ˗nu ˈwo ö ˗bha ˗Gblüdëdhɛ ˗kɔ ꞊löö ˗wo ˗an ˈkun, ü ˗an ˈbhaa ˗dɔ ˗ee?
˗AN ˗GA ˈPÖ
Yesu ˗ya ˗pö ˗Zlan ˗bha ˗Gblüdëdhɛ ˗yö ˈˈmɛn? ˗A ˗yɔ ˗ga.
«˗Zlan ˗bha ˗Gblüdëdhɛ ˗yö kwa zuʋ̈ˈˈ ˈgü ˗ee?» (ˈWɔn ˗gɔ ˈö jw.org ˗ta)
ˈMën ˗kë ˈö Zoova ˗bha ꞊Gbɛkiö ˗nu ˗wo ˗klu ˗Zlan ˗bha ˗Gblüdëdhɛ ˗bha ˈö ˈwaa wo ˗zo yö mɛnbhɩɩdhe ˗nu ˗bha mɛnkɔɔnsü ˗dhɛ? ˗A ˗yɔ ˗ga.
Mɛn 144.000 ˈö Zoova ˗yö ö ˗kɔ ˗yɛ ˗an ˗bha kö waa Yesu ˗nu ˗wo ˗gblüdëdhɛ kë bhë, pë ˈö Biblö ˗ya pö ˈö ˗gban ˗an ˗bha ˗a ˗ga.
Dhebɔnën do ˗yö ˗kun pë ˈˈpɛpɛ kë ˗ni ˈgü kö ˈwɔn yaa ˗yö ˈgo ˈˈshia˗. ˈˈKɛɛ ˗kɔ ˈö˗ yö ˗a ˈka ꞊taabha ꞊dhɛ ˗Zlan dosɛnŋ ˈnën ˈö ꞊mɔɔn˗ ˗bha ˈö ˈˈkpɔnŋtaawɔn ˗nu ˈˈɲanbhɔ bhë, ˗a ˗ga.
«Mɛn ˈö ˗dho ˈwɔn yaa bho ˈˈshia˗ ˈman˗ dɔ» (˗Kwɛ 2011 Novanblö ˗bha ˗Ka ˗ya ka ˈˈɲaan!)
a ˈKwa yö ˗kɔ ˈˈpian 3 ˗naan ˗ta, ˈtɔŋ˗ ˗nu bhë kwa ˗dho ˗an ˈbhaa ˗nu ˗wɔn blɛɛˈˈ.
-
-
˗Zlan ˗bha ˗Gblüdëdhɛ ˗ya yö züdɔ!Zuʋ̈gblüdhi ꞊slɔɔ ˗toëpö ˈka! (˗Bhö Biblö draanˈˈ)
-
-
ˈWƆN ˗GƆ 32
˗Zlan ˗bha ˗Gblüdëdhɛ ˗ya yö züdɔ!
˗Zlan ˗bha ˗Gblüdëdhɛ ˗yö yö züdɔ dhaŋ˗ ˈgü ˗kwɛ 1914 ˈka. Mɛnbhɩɩdhe ˗nu ˗bha ˈˈsɛkɔɔnsü ˈˈdhiʋ̈to ˈˈtʋ̈ŋ zü ˗yö ˗dɔ ˗kwɛ ˈö bhë ˗a ˈka. Kwa˗ ˈwɔn ˗dɔ ˗kɔ ˗kë ꞊dhɛ? Pë ˈö Biblö ˗ya to ˈˈdhiʋ̈ ˈö˗ pö, ˈwɔn ˗nu ˈwo kë ˗ni ˈgü ˈˈkpɔnŋ ꞊taa ꞊dɛɛ waa mɛnbhɩɩdhe ˗nu ˈˈta ˗kɔ ˗nu ˈö ˗an zü ˗yö dɔ ˗kwɛ 1914 ˈka bhë, ˗kwa ˗an ˗ga.
1. ˗Mën ˗nu ˈö Biblö ˗yö ˗an to ˈˈdhiʋ̈ ˈö ˗an pö?
ˈSëëdhɛ ˗be ˈö Biblö ˈgü ˈwo˗ ˗dhɛ Daniel bhë, ˗ya ˗zɔn ꞊dhɛ ˗Zlan ˗bha ˗Gblüdëdhɛ ˗dho ˗ya mɛn ꞊kɔɔnsü ˗bha ˈˈtʋ̈ŋ ˈwo˗ ˗dhɛ «ˈˈtʋ̈ŋ ˈˈsɔɔplɛ» bhë ˗a ˈˈdhiʋ̈todhɛ ˈgü. (Daniel 4:16, 17) ˈDhɛ ˗kwɛ këŋ ꞊va ˗wo ˗ʒiö ˈö Yesu ˗yö nu ˈˈkpɔnŋ ꞊taa, ˗yö ˈˈtʋ̈ŋ do ˈö ˈˈdhʋ̈ ˗a ˗wɔn ˗blɛɛ ˈö˗ ˗dhɛ ‹ˈˈsɛ ˈˈwɛɛ ˈgü ˗mɛ ˗nu [...] ˗bha ˈˈtʋ̈ng ˈö ˗Zlan ˗ya ˗ya.› (Dhukö 21:24) Kwa ˗dho ˗a yö ꞊dhɛ ˈˈtʋ̈ŋ ˈˈsɔɔplɛ ˈö ˈˈdhʋ̈ ˗a ˈˈdhiʋ̈ ˗yö ˗to ˗kwɛ 1914 ˗ta.
2. ˈÖ go ˗kwɛ 1914 ˗bha ˈö yö ˗a ˈka ꞊dɛɛ ˗bha, ˗mën ˗nu ˈwo kë ˗ni ˈgü ˈˈkpɔnŋ ꞊taa?
Yesu ˗bha gwëëˈˈ ˗nu ˗wa dhɛɛˈˈ ˗kpɔ ˈwo˗ pö «꞊duakëpë ˗mlë ˈyö dho kë kö ˗yaan ü bha nu ˗yi waa˗ ˈkpongtaadhɛ ˈdhiötoyi ˗an ˗zɔn?» (Matiö 24:3 NTBL) Yesu ˗ya ˗daa ˗kë ˈö˗ pö ˈya ˗ya ˗gblüdëdhɛ kë ˗sü ˗bha dhaŋ˗ ˈgü, ˈwɔn ˈgbɩɩ˗ ꞊va ˗dho kë ˈˈkpɔnŋ ꞊taa. ˗A ˈbhaa ˗nu ˈnën ˈwo ˗tɔ ˗gblü ˗nu, din˗ ˗nu waa ˈˈsɛ ˗bha ꞊ziisü ˗nu. (Matiö 24:7 ˗wo pö.) Biblö ˗ya ˗pö ˈzü ꞊dhɛ «ˈˈkpʋŋtaadhɛ yën ˈˈtʋ̈ŋ ˈgü» mɛnbhɩɩdhe ˗nu ˈˈta ˗kɔ ˗dho ˗tosɛta kë «ˈgbɩɩ˗». (2 Timote 3:1˗5) ˈÖ go ˗kwɛ 1914 ˗bha ˈö yö ˗a ˈka ꞊dɛɛ ˗bha, ˗kɔ ˈö ˈˈkpɔnŋtaadhɛ ˗ya kë ˗a ˈka ˈyö bhë.
3. ˈDhɛ ˗Zlan ˗bha ˗Gblüdëdhɛ ˗yö yö züdɔ dhaŋ˗ ˈgü, ˈmën ˗kë ˈö ˗tosɛta ˗yö ˗kë ˈˈgbɩɩ˗ ˈˈkpɔnŋ ꞊taa?
ˈDhɛ ˈö Yesu ˗yö ˗ya ˗Zlan ˗bha ˗Gblüdëdhɛ ˗gɔdhiʋ̈ dhaŋ˗ ˈgü, ˗a ˗dhɛ yö ˈti ꞊gɔɔ ˈyö ˗gblü ˗da Sɔtraan waa ˗zuu yaa ˗nu ˗an ˗ta. ˗A ˗gblü yö ˈti dhi Sɔtraan ˗gɔ. Biblö ˗ya ˗pö ˈyö «ˈwo waa˗ ˗bha ˗mɛ ˗nu ˗a ˗nu ˗zuö ˈˈkpʋng ꞊taa.» (˗Dhɛkpaɔ dhiaˈˈ ˈsëëdhɛ 12:9, 10, 12) Sɔtraan ˗ya ˈwɔn ˗dɔ ꞊dhɛ ö ˈgü ˗dho shiʋ̈ˈˈ. ˗A ˈwɔn ˗yö ˗shiö ˗sü ˈka ˗a ꞊dhɛ ꞊dedewo. ˗A ˗wɔn ˈgü ˗yö ˈwɔn yaa ꞊va ꞊dede kë ˗ni ˈgü ˈˈkpɔnŋ ꞊taa. ˈPë ˗kë ˈö ˈˈkpɔnŋtaadhɛ ˗ya kë ˈyaa˗ ˈyö bhë. ˈˈKɛɛ ˗Zlan ˗bha ˗Gblüdëdhɛ ˗dho ˈwɔn ˗nu bhë ˗an ꞊gban ˈˈɲanbhɔ.
˗KAA ˈˈPIƲ̈ ˈPƆN
Pë ˗nu ˈwo˗ ˗zɔn ꞊dhɛ ˗Zlan ˗bha ˗Gblüdëdhɛ ˗ya yö züdɔ ˗kwɛ 1914 ˈka waa ˗kɔ ˈö ˗gban ˗a ˈka kwa ˗bha, ˗kwaa ˗ga.
4. ˈˈTʋ̈ŋ ˈö Biblö ˗ya to ˈˈdhiʋ̈ ˈö˗ ˗wɔn pö, ˗a dhʋʋŋˈˈ ˗kɔ ˈö ˗puö ˗kwɛ 1914 ˗ta.
Nabukodonozɔ ˈö ˗kë Babidhɔnö ˗Gblüdë ˈka ꞊kwɛŋzü bhë, ˗Zlan ˗yö ˈwɔn ˈö ˗dho kë ˈˈdhiʋ̈ ˗a ˗zɔn ˗a ˗dhɛ ˈˈɲɛɛn ˈgü. ˗A ˈˈɲɛɛn ˈö bhë waa- ˗gɛn ˈö Daniɛdhö ˗ya pö, ˗wa ˗zɔn ꞊dhɛ ˗yö ˗gban Nabukodonozɔ yö ꞊dede waa ˗Zlan ˗bha ˗Gblüdëdhɛ ˗an ˗bha.—˗Ka Daniel 4:17 ˗wo pö.a
˗Ka Daniel 4:20˗26 ˗an ˗wo pö, kö ˈka ˗gban tablo bhë ˗a ˗ta kö dhɛɛˈˈ ˗nu ˈwo yö ˈka ˗an ˗yɔ mɛɛnˈˈ:
(1) ˗Mën ˈö Nabukodonozɔ ˗ya yö ˈˈɲɛɛn ˈö bhë ˗a ˈgü?—˗Kaa ˈˈɲan ˈsɛɛn˗ 20 waa˗ 21 ˗ga.
(2) ˗Mën ˈwo˗ ˗kë ˈˈdhü ˈö bhë ˗a ˈka?—˗Kaa ˈˈɲan ˈsɛɛn˗ 23 ˗ga.
(3) ˗Mën ˈö ˗kë ˈˈtʋ̈ŋ ˈˈsɔɔplɛ ˈwo bhë ˗an ˈˈdhiʋ̈todhɛ ˈgü?—˗Kaa ˈˈɲan ˈsɛɛn˗ 26 ˗ga.
ˈˈDhü ˈö ˈˈɲɛɛn ˈö bhë ˗a ˈgü waa ˗Zlan ˗bha ˗Gblüdëdhɛ ˗an ˗gbankwëëdhɛ.
ˈPË ˗ZLAN ˗YA TO ˈˈDHIƲ̈ ˈÖ˗ PÖ (Daniel 4:20˗36)
˗Gblüdëdhɛ
(1) ˈˈDhü ˈkpikikpiki
˗Gblüdëdhɛ ˈˈdhiʋ̈tosü
(2) «˗Ka ˈˈdhü ˈö bhë ˗a bɔ» kö «ˈˈtʋ̈ŋ ˈˈsɔɔplɛ» ˗wo ʒiö.
˗Gblüdëdhɛ ˗bha ˗yö ö pin˗ ˈgü ˗sü
(3) «Ü ˗bha ˗gblüdëdhɛ ˗dhö ˗lo ü ꞊kwɛɛ˗.»
˗Zlan ˗Wo ˈö˗ to ˈˈdhiʋ̈ ˈö˗ pö bhë ˗a ˗bha ˗yokodhiʋ̈sü ˗blɛɛsü ˈgü . . .
(4) De ˈö ˗tɔ ˈˈdhü ˈö bhë?—˗Kaa ˈˈɲan ˈsɛɛn˗ 22 ˗ga.
(5) ˗A ˗bha ˗gblüdëdhɛ ˈˈdhiʋ̈ ˗yö ˗to ˈˈtʋ̈ŋ ˈnën ˈbhaa ˈˈpiʋ̈ ˗kɔ ˗kë ꞊dhɛ?—˗Ka Daniel 4:29˗33 ˗an ˗wo pö.
(6) ˗Mën ˈö ˗kë Nabukodonozɔ ˈka «ˈˈtʋ̈ŋ ˈˈsɔɔplɛ» ˈˈdhiʋ̈todhɛ ˈgü?—˗Ka Daniel 4:34˗36 ˗an ˗wo pö.
˗A ˗YÖKODHIƲ̈SÜ ˗BLƐƐSÜ
˗Gblüdëdhɛ
(4) Nabukodonozɔ, Babidhɔnö ˗gblüdë
˗Gblüdëdhɛ ˈˈdhiʋ̈tosü
(5) ˗Dhɛ ˈö ˗kwɛ 606 ˗wo ˗ʒiö K.Y.B. ˈyö so ˗yö Nabukodonozɔ kun ˈö yö ˈti ˗mɔn ˗gblüdëdhɛ kë ˗sü ˗bha ˗kwɛ ˈˈsɔɔplɛ ˈˈpiʋ̈.
˗Gblüdëdhɛ ˗bha ˗yö ö pin˗ ˈgü ˗sü
(6) Nabukodonozɔ ˗bha so ˗yö ˗bo ˈö ˗ya ˗gblüdëdhɛ kë ˗sü ˗bha ˈzü.
˗Zlan ˗Wo ˈö˗ to ˈˈdhiʋ̈ ˈö˗ pö bhë, ˗a ˗bha ˗yökodhiʋ̈sü ꞊plɛ ˗naan ˈgü . . .
(7) ˗Mën ˈö ˗tɔ ˈˈdhü ˈö bhë?—˗Ka 1 Chroniques 29:23 ˗wo pö.
(8) ˗Gblüdëdhɛ ˈö bhë ˗a ˈˈdhiʋ̈ ˗yö ˗to ˈˈtʋ̈ŋ ˈnën ˈbhaa ˈˈpiʋ̈ ˗kɔ ˗kë ꞊dhɛ? Kwa˗ ˈwɔn ˗dɔ ˗kɔ ˗kë ꞊dhɛ ꞊dhɛ ˈˈtʋ̈ŋ ˈö Yesu kun ˗a ˈka ˈˈsɛ ˗ta bhë kö ˗gblüdëdhɛ ˈö bhë ˗yö ꞊kun ˈwü ˗sü ˈka?—˗Ka Dhukö 21:24 ˗wo pö.
(9) ˗Gblüdëdhɛ ˈö bhë ˗a zü ˗yö ˗dɔ ˈzü ˈˈmɛn? ˈˈTʋ̈ŋ ˗mɛɛn ˈka?
˗A ˗YÖKODHIƲ̈SÜ ꞊PLƐ ˗NAAN
˗Gblüdëdhɛ
(7) ˗Gblüdë ˗nu ˈwo kun Izraɛdhö, ˈö ˈwo ˗kë ˗Zlan ˗bha ˗Gblüdëdhɛ blɛɛnˈˈ ˈka ˈˈkpɔnŋ ꞊taa
˗Gblüdëdhɛ ˈˈdhiʋ̈tosü
(8) Zedhizadhɛmö ˗dhɛ ˈgü ˗yö ˗shiʋ̈, ˈö ˗gblüdë ˈˈwɛɛ bha ˈyii kë mü ˗kwɛ 2.520 ˈˈpiʋ̈.
˗Gblüdëdhɛ ˗bha ˗yö ö pin˗ ˈgü ˗sü
(9) Yesu ˗yö ˗ya ˗Zlan ˗bha ˗Gblüdëdhɛ ˗gɔdhiʋ̈ dhaŋ˗ ˈgü.
ˈˈTʋ̈ŋ ˈˈsɔɔplɛ ˈö bhë ˗kwɛ ꞊dhɛ ˗mü?
Biblö ˈˈɲan ˈbhaa ˗nu ˗wo kwa ˗takun kö ˈkwa˗ ˈˈɲan ˈˈwɛɛ ˈbhaa ˗nu ˈgüman. ˗A ˈwɔnzuan ˈnën ˗tɔ ˗Dhɛkpaɔ dhiaˈˈ ˈsëëdhɛ ˗ya ˗pö ˗kwɛ ˗yaaga waa ö ˈgbu [ɛɛnˈˈ ˈˈtʋ̈ŋ ˗yaaga waa ö ˈgbü] ˈnën ˗tɔ ˗dhɛkpaɔyi 1.260. (˗Dhɛkpaɔ dhiaˈˈ ˈsëëdhɛ 12:6, 14) ˈˈTʋ̈ŋ ˈˈsɔɔplɛ ˈö bhë ˈyö ˗tɔ ˗dhɛkpaɔyi 1.260 ˗gwaa ꞊plɛ ɛɛnˈˈ ˗dhɛkpaɔyi 2.520. Biblö ˈgü, ꞊ya kë ꞊shiö ˗wo ˗kwɛ do ˗dhɛ ˗dhɛkpaɔyi do. (Ézéchiel 4:6) ˗A ˗wɔnzuan do ˈnën ˈö ˗tɔ ˈˈtʋ̈ŋ ˈˈsɔɔplɛ ˈö Daniel ˈsëëdhɛ ˈgü bhë. ˗Dhɛ ˈö ˈˈdhʋ̈ ˈˈtʋ̈ŋ ˈˈsɔɔplɛ ˈö bhë ˈyö ˗tɔ ˗kwɛ 2.520.
5. ˈÖ go ˗kwɛ 1914 ˗bha ˈö yö ˗a ˈka ꞊dɛɛ ˗bha, ˈˈkpɔnŋtaadhɛ ˗ya ˈgo ˈˈgblʋʋ.
ˈWɔn ˗nu ˈö ˈkwa ˗dho ˗a ˈˈsuanbho ˗an ˗bha ˈˈkpɔnŋ ꞊taa ꞊dhɛ Yesu ꞊ya kë ˗Gblüdë ˈka dhaŋ˗ ˈgü, ˗yö ˗an ˗to ˈˈdhiʋ̈ ˈö ˗an ꞊blɛɛ. ˗Ka Dhukö 21:9˗11 ˗an ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
Pë ˗nu ˈö Biblö ˗yö ˗we ˗an ˈka bhë, ˗a ˗mɛɛn ˈü˗ yö ˗ni ˈgü ꞊dɛɛ?
Mɛn ˗nu ˈˈtakɔ ˈö ˗dho kë mɛnbhɩɩdhe ˗nu ˗bha mɛnkɔɔnsü ˈˈdhiʋ̈to ˈˈtʋ̈ŋ ˈka, bɔmɛn Pɔdhö ˗ya ˗blɛɛ. ˗Ka 2 Timote 3:1˗5 ˗an ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
Mɛn ˗nu ˈˈtakɔ ˈö Biblö ˗yö ˗an ˗wɔn ꞊blɛɛ bhë, ˗a ˗mɛɛn ˈö ü ˈˈɲan ˈdhö˗ ˗bha?
6. ˗Zlan ˗bha ˗Gblüdëdhɛ ˗bha ˈˈsɛkɔɔnsü ˗yö kwa ꞊faan ˗dɔ ˈwɔn ˗nu kë ˗sü ˗bha.
˗Ka Matiö 24:3, 14 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
Yö ꞊bhlëësü ˗mɛɛn ˈö˗ ˗zɔn ꞊dhɛ ˗Zlan ˗bha ˗Gblüdëdhɛ ˗ya yö züdɔ?
Yö ꞊bhlëësü ˈö bhë ü ˗dho ü ˗kɔ ˗da ˗a ˈgü ˗kɔ ˗kë ꞊dhɛ?
˗Zlan ˗bha ˗Gblüdëdhɛ ˗ya yö züdɔ ˈsaadhö. ˗A ˈˈtʋ̈ŋ ꞊ya ˈto ꞊klöö˗ kö ˗yö ˈˈkpɔnŋtaadhɛ ˗todhʋ̈sü ꞊kɔɔn. ˗Ka Eblö 10:24, 25 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
ˈDhɛ ˈö ˗kë ꞊dhɛ «ˈˈtʋ̈ng ꞊ya ꞊tëng ꞊dedewo» bhë, ˈmën mɛn ˈö ˈdhö ˗a dua ˈdhö ˗mü kö ˗ya kë?
Pë ˈö ˗dho mɛn ˈˈwɛɛ ˗nu ˗takun kö ˗wo dha ˈbha˗ dɔ, ˗mën ˈö ˗dho ü ꞊faanmën ˗a kë ˗sü ˗bha?
MƐN ˈBHA˗ ꞊MƆƆN˗ ˗BHA ˈÖ Ü DHƐƐˈˈ KPƆ ꞊DHƐ: «ˈMën ˗kë ˈö Zoova ˗bha ꞊Gbɛkiö ˗nu ˗wo ˗kwɛ 1914 ˗wɔn ꞊blɛɛ ˈgbɛ?»
ˈMën ˈü ˗dho ˗a pö ˗a ˗dhɛ?
˗A ˈDHƐ TO KWA ˈˈƝAAN
Pë ˗nu ˈö Biblö ˗yö ˗an to ˈˈdhiʋ̈ ˈö ˗an ꞊blɛɛ waa ˈwɔn ˗nu ˈwo kë ˗ni ˈgü ˈˈkpɔnŋ ꞊taa, ˗wa ˗zɔn ꞊dhɛ ˗Zlan ˗bha ˗Gblüdëdhɛ ˗ya yö züdɔ. Kwa ˗dho ˗a ˗zɔn ꞊dhɛ kwa kwa ˗zo ˗yö ˗a ˗dhɛ ˗a ˗wɔn ˗blɛɛ mɛn ˗nu ˗dhɛ ˗sü waa ˗nu ˗bhɔkwëë ˗nu ˗ta ˗sü ˈka.
˗Zobuödhe
ˈˈTʋ̈ŋ ˈˈsɔɔplɛ ˈö ˗Zlan ˗wodhiʋ̈lomɛn Daniɛdhö ˗ya ˈto ˈˈdhiʋ̈ ˈö˗ ˗wɔn ꞊blɛɛ bhë, ˗mën ˈö ˗kë ˗a ˈˈdhiʋ̈todhɛ ˈgü?
ˈMën ˗kë ˈü dhaŋ˗ bho ˗a ˈˈdhiʋ̈ ꞊dedewo ꞊dhɛ ˗Zlan ˗bha ˗Gblüdëdhɛ ˗yö yö züdɔ ˗kwɛ 1914 ˈka?
Ü ˗dho ˗a ˗zɔn ˗kɔ ˗kë ꞊dhɛ ꞊dhɛ ü ˈdhaŋ˗ ˗bho ˗a ˈˈdhiʋ̈ ˈkpakpadhö ꞊dhɛ ˗Zlan ˗bha ˗Gblüdëdhɛ ˗ya yö züdɔ?
˗AN ˗GA ˈPÖ
ˈÖ go ˗kwɛ 1914 ˗bha ˈö yö ˗a ˈka ꞊dɛɛ ˗bha, ˗kɔ ˈö ˈˈkpɔnŋtaadhɛ ˗yö ˈgo ˗a ˈka ˈˈgblʋʋ, ˗kwɛzlanbhomɛn ˗nu waa ꞊klaŋ ˈˈgblʋ̈gblʋ̈ ˗nu ˗wa ˗blɛɛ. Pë ˈwo˗ pö ˗a ˗ga.
Pë ˈö Matiö 24:14 ˗ya to ˈˈdhiʋ̈ ˈö˗ pö bhë, ˗kɔ ˈö gɔndë do ˗bha ˗tosɛta bho ˗a ˈka ˈˈgblʋʋ, ˗a ˗ga.
Kwa˗ ˈwɔn ˗dɔ ˗kɔ ˗kë ꞊dhɛ ꞊dhɛ pë ˈö Daniel ˈˈɲan ˈˈgblʋ̈gblʋ̈ 4 ˗ya to ˈˈdhiʋ̈ ˈö pö bhë, ˗yö ˗gban ˗Zlan ˗bha ˗Gblüdëdhɛ ˗bha? ˗A ˗yɔ ˗ga.
˗Mën ˈö˗ ˗zɔn ꞊dhɛ «ˈˈtʋ̈ŋ ˈˈsɔɔplɛ» ˈö Daniel ˈˈɲan ˈˈgblʋ̈gblʋ̈ 4 ˗ya ˗wɔn ꞊blɛɛ bhë, ˗a ˈˈdhiʋ̈ ˗yö ˗ta ˗kwɛ 1914 ˈka? ˗A ˗yɔ ˗ga.
-
-
ˈWɔn ˗së ˗nu ˈö ˗Zlan ˗bha ˗Gblüdëdhɛ dho ˗an këZuʋ̈gblüdhi ꞊slɔɔ ˗toëpö ˈka! (˗Bhö Biblö draanˈˈ)
-
-
ˈWƆN ˗GƆ 33
ˈWɔn ˗së ˗nu ˈö ˗Zlan ˗bha ˗Gblüdëdhɛ dho ˗an kë
˗Zlan ˗bha ˗Gblüdëdhɛ ˗ya yö zudɔ dhaŋ˗ ˈgü ˈsaadhö. ˗A ˈˈtʋ̈ŋ ˗ya ˈto ꞊klöö˗ kö ˗yö ˈwɔn ꞊gban ˈˈpɛpɛ ˈˈɲaanbhɔ ˈˈkpɔnŋ ꞊taa. ˈWɔn ˗së ˗nu ˈö ˗dho ˗an kë kwa ˗dhɛ, ˗kwa ˗an ˈbhaa ˗nu ˗ga.
1. ˗Zlan ˗bha ˗Gblüdëdhɛ ˗dho ˗nu ˗yadeflëëgüsü waa ˗këkpɛnŋdhösü ˗an ˈka ˈˈkpɔnŋ ꞊taa ˗kɔ ˗kë ꞊dhɛ?
Yesu ˈö ˗Zlan ˗bha ˗Gblüdëdhɛ ˗gɔ ˈˈdhiʋ̈ bhë, ˗yö ˗dho suuyaamɛn ˗nu waa mɛnbhɩɩdhe ˗nu ˗bha ˈˈsɛkɔɔnsü ˗nu bho ˈˈkpɔnŋ ꞊taa Aamagedɔn ˗gblü ˈˈtʋ̈ŋ ˈka. (˗Dhɛkpaɔ dhiaˈˈ ˈsëëdhɛ 16:14, 16) ˗A ˈˈtʋ̈ŋ ˈö bhë ˗a ˈka, pë ˈö ˗Zlan ˗ya to ˈˈdhiʋ̈ ˈö˗ pö, ˗yö ˗dho ˗yöködhiʋ̈. ˗Ya ˗pö: «˗A ˈˈtʋ̈ŋ ꞊ya ˈto ꞊klöö˗ kö ˈwɔnyaakëmɛn ˗nu ˈwaa ˈdhö ˈzüdɔ.» (Psaume 37:10) Yesu ˗dho bɔ ˗Zlan ˗bha ˗Gblüdëdhɛ ˗ta ˈö nu ˗yadeflëëgüsü waa ˗këkpɛnŋdhösü ˗an ˈka ˈˈkpɔnŋ ꞊taa.—Isaïe 11:4 ˗wo pö.
2. ˗Zlan dhɔɔbhaawɔn ˗ya ˗ya kë ˗sü ˗bha ˈˈkpɔnŋ ꞊taa, ˗tosɛta ˗dho kë ˗kɔ ˗kë ꞊dhɛ?
˗Zlan ˗bha ˗Gblüdëdhɛ ˗ya ˗ya ˈˈkpɔnŋtaadhɛ ꞊kɔɔn ˗sü ˗bha «ˈˈsɛ ˗dho ˈto mɛn kpɛnŋdhö ˗nu ˗gɔ ˈö ˈwo ˈto ˗a ˗ta yi ꞊gban ˈˈpɛpɛ ˈka.» (Psaume 37:29) Ü ˗zota ˈwɔn ˗së ˈö bhë ˗a ˈgü, mɛn ꞊gban ˈˈpɛpɛ ˗dho kë kpɛnŋdhö ˈö Zoova waa wo ˗yayɔɔ ˗nu ˗dhɔ ˗yö ˗an ˗kë. ˈˈYua ˗dho ˈgo ˈˈshia˗ ˈö ˈkwa ˗tosɛta ˗kë ˗toëpö ˈka.
3. ˗Zlan ˗bha ˗Gblüdëdhɛ ˗ya ˈwɔnyaakëmɛn ˗nu ˗bho ˈˈshia˗ ˗mën ˈö ˗dho ˗a kë?
Suuyaamɛn ˗nu ˗wa ˈgo ˈˈshia˗, Yesu ˗dho ˗gblüdëdhɛ kë ˗kwɛ 1.000 ˈka. ˗A ˈˈtʋ̈ŋ ˈö bhë ˗a ˈka waa mɛn 144.000 ˈwo ˗dho ˗gblüdëdhɛ kë bhë, ˗wo ˗dho mɛnbhɩɩdhe ˗nu ˗takun ˈö ˈwo ˗kë ˈˈslʋ̈ʋ̈slʋ̈. ˗Kwɛ 1.000 ˈwo bhë ˗wa yöködhiʋ̈, ˈˈsɛ ˗todhʋ̈sü ˗dho kë ꞊bhɔɔ ˈˈsɛ ꞊dede ˈka ˈö mɛnbhɩɩdhe ˗nu ˗wo kë mü zuʋ̈gblüdhi ˈgü, ˈyö ˗tɔ ꞊dhɛ ˗wo Zoova ˗bha ˈtɔŋ˗ ˗nu ꞊bhlëë ˗ya. ˗Ya ö bo ˗kë ˈˈdhʋ̈ ˗sü ˈka ˈyö Yesu ˗yö ˗gblüdëdhɛ ˈˈklɔɔnbho ˈö Dë Zoova ˗bha. ˈYö Zoova ‹ˈtɔ ˈˈslʋ̈ʋ̈slʋ̈ ˗yö bhɔ› ˈö ˗ʒiö ˗a ˈka ˈˈdhiʋ̈ ˗be ˗ta. (Matiö 6:9, 10) ˗Yö ˗dho ˗a ˗zɔn ꞊dhɛ Zoova ˈnën ˗tɔ mɛnkɔɔnmɛn ˗tiaandhö ˈö ö ˗zo ˗kë ö ˗bha mɛn ˗nu ˈˈpiʋ̈. ꞊Ya ˈgo mü Zoova ˗dhö Sɔtraan waa ˗zuu yaa ˗nu waa mɛn ˈˈpɛpɛ ˗wo ˗gban ˗a ˗bha mɛnkɔɔnsü ˗gɔ ˗an ˈgüshiʋ̈ˈˈ. (˗Dhɛkpaɔ dhiaˈˈ ˈsëëdhɛ 20:7˗10) ˈWɔn ˗së ˗nu ˈö ˗Zlan ˗bha ˗Gblüdëdhɛ dho nu ˗an ˈka ˈˈkpɔnŋ ꞊taa bhë, ˗wo ˗dho ˗to ˗toëpö ˈka.
˗KAA ˈˈPIƲ̈ ˈPƆN
ˈPë ˗kë ˈö ˈkwa˗ ˈwɔn dɔ ꞊dedewo ꞊dhɛ ˗Zlan ˗dho bɔ ˈö ˗bha ˗Gblüdëdhɛ ˗ta kö pë ˗nu ˈö ˗an ˈˈplüün bho ˈö ˈwo Biblö ˈgü ˗yö ˗an ꞊gban kë bhë, ˗kwaa ˗ga.
4. ˗Zlan ˗dho bɔ ö ˗bha ˗Gblüdëdhɛ ˗ta ˈö mɛnbhɩɩdhe ˗nu ˗bha mɛnkɔɔnsü bho ˈˈshia˗.
‹Mɛn ˗yö mɛn ˈˈwɛɛ ꞊kɔɔn kö ˈö˗ ˈˈklʋʋbhɔ.› (Ecclésiaste 8:9) ˈWɔn yaa ˈˈpɛpɛ ˈö ꞊flüüwɔn kë ˗sü ˗yö nu ˗an ˈka, Zoova ˗dho bɔ ö ˗bha ˗Gblüdëdhɛ ˗ta ˈö ˗an ˈˈɲanbhɔ.
˗Ka Daniel 2:44 waa 2 Tesadhonikö 1:6˗8 ˗an ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
˗Mën ˈö Zoova waa Yesu ˈwo ˗dho ˗a kë mɛnbhɩɩdhe ˗nu ˗bha ˗gblüdëdhɛ waa mɛn ˗nu ˈwo wo ˗kɔ ˗ya ˗an ˗gɔ ˗an ˈka?
ˈWɔn ˗nu ˈü ˗an ꞊draan ˈö ˈwo ˗gban Zoova waa Yesu ˗an ˗bha bhë, ˗wa ˗zɔn ü ˗dhɛ ˗kɔ ˗kë ꞊dhɛ ꞊dhɛ ˈwɔn ˗nu ˈwo ˗dho ˗an kë ˗dhɛkpaɔ dhiʋ̈ˈˈ ˈgü bhë ˗wo ˗dho kë kpɛnŋdhö?
5. ˗Gblüdë ˈö ˗dho kë ˗së ꞊dhɛ Yesu ˈdhö ˈyaa ˈdhö.
Yesu ˗dho ˈwɔn ˗së ꞊va ꞊dede kë mɛn ˗nu ˈwo ˈˈkpɔnŋ ꞊taa ˗an ˗dhɛ. ˗Kaa VIDEO ˗ga kö ˈka˗ yö ꞊dhɛ Yesu ꞊yaa˗ ˗zɔn ˈsaadhö ꞊dhɛ mɛn ˗nu ˗takun ˗sü ˗dhɔ ˗ya ˗kë, ˈö ˗Zlan ꞊yaa˗ kë ˗sü ꞊faan nu ˗a ˗dhɛ.
ˈDhɛ ˈö Yesu kun ˈˈkpɔnŋ ꞊taa, pë ˗nu ˈö ˗Zlan ˗bha ˗Gblüdëdhɛ dho ˗an kë ˗yö ˗an ˈbhaa ˗nu ˗zɔn. Pë ˗së ˗nu ˈö ˗Zlan ˗yö ˗an ˈˈplüün bho ˈö ˈwo ˈˈshia bhë, ˗a ˗mɛɛn ˈü˗ ˈˈpiʋ̈ ˗yö kë ü ˗dhɛ? Biblö ˈˈɲan ˗nu ˈwo ˗gban ˈwɔn ˈdhɛ ˈö ˈdhö ˗a ˗bha, ˗bhö ˗an ˗wo pö.
ˈDHƐ ˈÖ YESU ˗YÖ KUN ˈˈKPƆNŊ ꞊TAA . . .
YESU ˗DHO ˗YA DHAŊ˗ ˈGÜ ˈÖ . . .
˗a ˗kɔ ˗yö ˗ʒiö ˈwɔn ˈˈgbɩɩ˗ ˗nu ˈwo ˗kë ꞊dhɛ ˈˈtee ˈˈgbɩɩ˗ ˗nu ˈdhö bhë ˗an ˗gɔ.—Makö 4:36˗41.
pë yaa ˗nu ˈwo ˈˈsɛ ˗dhiikun ˗an bho ˈˈshia˗.—Isaïe 35:1, 2.
˗yö ˗dhidha ˗kë ˈö mɛn ˈˈgblü ꞊va ꞊dede ˈˈdhi gba.—Matiö 14:17˗21.
din˗ bho ˈˈshia˗.—Psaume 72:16.
˗yö mɛn ꞊va ˈˈdhɛkë.—Dhukö 18:35˗43.
˗këflëëgüsü ꞊dede nu mɛn ꞊gban ˈˈpɛpɛ ˗dhɛ.—Isaïe 33:24.
˗yö mɛn ˗nu ˗bho ga ˈgü.—Dhukö 8:49˗55.
saanˈˈ ˈö ga ˗yö nu ˗an ˈka ˗an ꞊gban ˈˈɲanbhɔ.—˗Dhɛkpaɔ dhiaˈˈ ˈsëëdhɛ 21:3, 4.
6. ˗Zlan ˗bha ˗Gblüdëdhɛ ˗dho kwa ˗bha ˗dhɛkpaɔ dhiʋ̈ˈˈ kë ˗së.
˗Tosɛta ˗së ˈö ˗Zlan ˈdhö˗ ˈˈpiʋ̈ ˗kplawo kö mɛnbhɩɩdhe ˈkwa˗ kë bhë, ˗a ˗bha ˗Gblüdëdhɛ ˗dho ˗a kë ˈö ˈkwa˗ ꞊slɔɔ. Kwa ˗dho ˗tosɛta kë ꞊bhɔɔ ˈˈsɛ ˗ta ˗toëpö ˈka. ˗Kaa VIDEO ˗ga kö ˗kɔ ˈö Zoova ˗yö bɔ ˗a ˈka ö Gbö Yesu ˗ta kö ö ˗zopiʋ̈wɔn kë bhë, kö ˈka˗ dɔ.
˗Ka Psaume 145:16 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
˗A ˈwɔn dɔ ˗sü ˈö ꞊dhɛ Zoova ˗dho ö ‹˗kɔ ˈˈdhiʋ̈ ˈˈpʋ, ˈö pë ˈˈbhɩɩ˗ ˈˈpɛpɛ ˈwo ˗dhö, ˗an zuʋ̈bhɔbhapë nu ˗an ˗dhɛ› bhë, ˗yö ü ˈgü ˗kɔ ˗kë ꞊dhɛ?
MƐN ˈBHAA ˗NU ˗WA ˗PÖ: «Kö mɛnbhɩɩdhe ˗nu ˈkwa ˈˈdhʋ kwa ˈko ˗dhɛ kö kwa zü ˗yö kë do, kwa ꞊mɔɔn˗ ˗bha ˈkwa ˈˈkpɔnŋtaawɔn ˈˈgbɩɩ˗ ˗nu ˈˈɲanbhɔ.»
ˈWɔn ˈˈgbɩɩ˗ ˗nu ˗mɛɛn ˈö ˗Zlan ˗bha ˗Gblüdëdhɛ dosɛnŋ ˈnën ꞊mɔɔn˗ ˗bha kö ˗yö ˗an ˈˈɲanbhɔ?
˗A ˈDHƐ TO KWA ˈˈƝAAN
˗Zlan ˗bha ˗Gblüdëdhɛ ˗dho ˗Zlan ˗zopiʋ̈wɔn ꞊gban ˈˈpɛpɛ kë. ˗Yö ˗dho ˈˈkpɔnŋtaadhɛ ˗todhʋ̈sü kë ꞊bhɔɔ ˈˈsɛ ˈka, ˈö Zoova ˗dhɔkëmɛn ˗nu ˗wo ˗tosɛta ˗kë mü ˗toëpö ˈka.
˗Zobuödhe
˗Zlan ˗bha ˗Gblüdëdhɛ ˗dho ˗a ˈtɔ kë ˈˈslʋ̈ʋ̈slʋ̈ ˗kɔ ˗kë ꞊dhɛ?
ˈMën ˗kë ˈö ˈkwa kwa ˗zo yö ꞊dedewo ꞊dhɛ pë ˗nu ˈö Biblö ˗yö ˗an to ˈˈdhiʋ̈ ˈö ˗an pö, ˗Zlan ˗bha ˗Gblüdëdhɛ ˗dhö ˗an kë?
Pë ˗nu ˈö ˗Zlan ˗bha ˗Gblüdëdhɛ dho ˗an kë, ˗a ˗mɛɛn ˈö ü ˈˈɲan ˈdhö ˗a ˗gɔ?
˗AN ˗GA ˈPÖ
꞊Waa˗ pö Aamagedɔn ˗gblü, ˗a ˗gɛn ˈnën ˗tɔ ˗mën? ˗A ˗yɔ ˗ga.
ˈˈTʋ̈ŋ ˈö Yesu ˗ya ˗dhɛ «ˈˈklʋʋbhɔdhe ˈkpii˗,» ˈwɔn ˗nu ˈwo ˗dho kë ˗a ˈgü, ˗bhö ˗a ga.—Matiö 24:21.
« Quˈest˗ce que la grande tribulation ? » (ˈWɔn ˗gɔ ˈö jw.org ˗ta)
ˈKɔdhi do ˈgümɛn ˗nu ˗wo wo ˗zota kö ˗wo ˈˈkpɔnŋtaadhɛ ˗dɛɛ ˈgü. ˗Kɔ ˈwo˗ ˗kë ˗a ˈka ˗a ˗ga.
ˈWɔn ˗gɔ ˈö ˗kë: «A ˗kun dhɛɛˈˈ ꞊va ˈkpɔ ˗ni ˈgü n ˗de ˗gɔ» ˈka bhë ˗a ˈgü, ˗kɔ ˈö mɛn ˈö kun ˗gban ˗ni ˈgü ˈˈsɛgɔdhiʋ̈mɛn ˗nu ˗gɔ ˈö ö ˗bha dhɛɛˈˈ ˗nu ˗yɔ ꞊slɔɔ ˗a ˈka, ˗a ˗ga.
«Biblö ˗yö mɛn ˗bha ˗tosɛta ˗bho ˈˈgblʋʋ» (˗Kwɛ 2012 Zanvie 1 ˗bha ˈˈGlaadhiʋ̈ ˗tɔn)
-