ˈWƆN ˗GƆ 44
ˈWlaan˗ suu ˈˈpɛpɛ ˗Zlan ˗dhɛ ˗së ˗ee?
Zoova ˗ya ˈˈpiʋ̈ kö kwa zuʋ̈ˈˈ ꞊nii ˗yö ˗da kö ˈkwa ˈwlaan˗ ˗nu kë ꞊shöŋ. ˈˈKɛɛ ˈwlaan˗ suu ˈˈpɛpɛ ˗wa ˗dhɛ ˗së ˗ee? Kwa ˗dho ˗a ˗zɔn ˗kɔ ˗kë ꞊dhɛ ꞊dhɛ Zoova ˗dhɔ ˗yö kwa ˗kë ˈwɔn ˈö ˗gban ˈwlaan˗ kë ˗sü ˗bha ˗a ˈgü?
1. ˈMën ˗kë ˈö ˈwlaan˗ ꞊vadhɛ ˈwaa Zoova ˗dhɛ ˗së?
Kö ˈü˗ yö ꞊dhɛ ˈwlaan˗ ꞊vadhɛ ˗gɛn ˈyaa ˈgo Biblö ˈgü, ˗yö ˗go paɛn ˗nu ꞊kwɛɛ˗, ˗a ˈwɔn ꞊mɔɔn˗ ˗bha ˈö ü kun. ˗An ˈbhaa ˗nu ˗wo ˗gban dükësü waa ö ˗zota ˗sü ˈö ꞊dhɛ mɛn ˈnii˗ ˈyaa ga bhë, ˗an ˗bha. ˗An ˈbhaa ˗nu ˗wo ˗gban ˈpö ꞊suawɔn ˗nu ɛɛnˈˈ ö ˗zota ˗sü ˈö ꞊dhɛ kwa ˈti wɔkɔ ˈbhaa ˗nu kë ˈwɔn yaa ꞊mɔɔn˗ ˗bha ˈö kwa ꞊slɔɔ bhë, ˗an ˗ta. Yö ˈnën ˗wɔn ˈgü ˈö Zoova ˗ya pö ö ˗dhɔkëmɛn ˗nu ˗dhɛ: «˗Ka ˈˈkan˗ ˗nu ˗bha, ˈpë ˈö˗ ˗dhɔ ˈyaa n kë, ˈka ˈdho ka ˗kɔ zun˗ ˗bha tongtongdhö.»—2 Kodhɛngtö 6:17.a
2. ˈWlaan˗ ˗nu ˈwo mɛnbhɩɩdhe ˗nu ˈtɔ bhɔ bhë, Zoova ˗yö ˗an ˗yö ˗kɔ ˗kë ꞊dhɛ?
Zoova ˗ya ˗pö kwa ˗dhɛ ꞊dhɛ ˈyaa ˗së kö ˈkwa kwa «˗zo yö mɛnbhɩɩdhe ˈˈkpaan ˗dhɛ.» (Jérémie 17:5 ˗wo pö.) ˈWlaan˗ ˈbhaa ˗nu ˗wo ˈˈsɛgɔdhiʋ̈mɛn ˗nu ɛɛnˈˈ ˈˈsɔdha ˈˈgbɩɩ˗ ˗nu ˈtɔ ˗bhɔ. Mɛn ˈbhaa ˗nu ˗wo ˈˈsɛ ˗bha ˗ya ö ˗de ˈflëëgü ˗sü waa ˈˈsɛ ˗dɔ ˗a ˗bha ˗pë ˗nu ˈwo ˗kë ꞊dhɛ ꞊drapo ˗nu ˈdhö bhë, ˗an ˗dhɔkë ˈwlaan˗ ˗nu ˗kë. (1 Zan 5:21) Mɛn ˈbhaa ˗nu ˗de ˈpö, ˗wo ˈˈsɛkɔɔmɛn ˗nu ɛɛnˈˈ ˈwɔn ˈbhaa këmɛn ˗nu ˗bha ˗kɔlokota ˗nu ˈtɔ ˗bhɔ. Kö ˈkwa mɛn ˈbhaa ɛɛnˈˈ ˗kɔlokota ˈbhaa ˈtɔ bhɔ ˈˈkɛɛ kö ˈpë ˈyaa Zoova ˗dhɛ ˗së ˗ʒiaanwo ˗yö mɛn ˗nu ꞊faanmën ˗a kë ˗sü ˗bha, ˗yö ˗dho kë Zoova ˈgü ˗kɔ ˗kë ꞊dhɛ?
3. ˗Mën ˗nu ˈwo ꞊mɔɔn˗ ˗bha ˗wo ˈwlaan˗ ˈbhaa kë ˈya˗?
‹We ˈˈgblʋ̈gblʋ̈ mü ˗sü ˗nu, ˈö ˈwo˗ mü ˗yi ˗nu ˗da ˈö ˈwo˗ mü, waa ˈˈgblʋ̈ʋ̈dhɛ ˈˈgbɛadhɛ ˗nu ɛɛnˈˈ ˗bhöpë ˈˈgblʋ̈gblʋ̈ ˗nu ˗bhö ˗sü› bhë, Biblö ˗ya ˗pö ˈyaa ˗së. (1 Piɛdhö 4:3) ˈWlaan˗ ˈbhaa ˗nu kë ˗sü ˗yö mɛn ꞊faanmën ˈwɔn ˗ʒiö ꞊gɔɔ ˗sü waa ˈˈɲangüyaa ˗nu kë ˗sü ˗bha. ˈKwa˗ pö ˈkwa ˈto Zoova ˈˈtɔŋdë ˈka ˗kplawo, kwa dua ˗mü ˈkwa kë ˗dhiiwɔn ˗nu ˈwo bhë ˗an ˈka ꞊gblɛɛn.
˗KAA ˈˈPIƲ̈ ˈPƆN
Pë ˗nu ˈwo Zoova ˗dhɛ ˗së ˈö kwa dua ˈdhö ˗mü kö ˈkwa ˗an kë ˈwɔn ˗nu ˈwo ˗gban ˈwlaan˗ ˗nu ˗bha ˗an ˈgü, ˗kwa ˗an ˗ga.
4. Ü ˗kɔ bho ˈwlaan˗ ˗nu ˈö ˈwaa Zoova ˗dhɛ ˗së ˗an ˈgü.
˗Ka Efɛzö 5:10 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
ˈKwa˗ pö ˈkwa kwa ˗kɔ ˗da ˈwlaan˗ ˈbhaa ˈgü ɛɛnˈˈ kö ˈkwa ˗kɔ ˗a ˈka, ˈmën kwa dua ˈdhö ˗mü ˈkwa kwa ˗zota ˗a ˈgü ˗be?
ˈWlaan˗ ˗mɛɛn ˈö mɛn ˗nu ˗wa ˗kë ˈdhɛ ˈü˗ ˗bha ˗a ˈgü?
Ü ˗bha ˈgü ˈwlaan˗ ˗nu ˈwo ˈˈdhʋ̈ ˗wo Zoova ˗dhɛ ˗së ˗ee?
ˈBha ü ˗zota do ˗kɔ ˈö Zoova ˗yö mɛn bhɔ ˗yi ˈwlaan˗ kë ˗sü yö ˗a ˈka ˗a ˈgü ˗ee? ˗Kwɛzlan ˈbha ˈö ˗dho kë Biblö ˈgü ˈö˗ ˗zɔn ꞊dhɛ ˗Zlan ˗dhɔkëmɛn ˗nu ˗wo wo bhɔ ˗yi ˈwlaan˗ ˗kë, ˈyaa ˈdhö. ˈˈKɛɛ Biblö ˗yö mɛn ꞊plɛ ˈö ˈwaa kun Zoova ˗dhɔkëmɛn ˗nu ˈka ˗an bhɔ ˗yi ˈwlaan˗ ˗wɔn ˗blɛɛ. ˗Ka ˈWunzüdɔdhɛ 40:20-22 waa Matiö 14:6-10 ˗an ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
Mɛn bhɔ ˗yi ˈwlaan˗ ꞊plɛ ˈwo bhë ˗wo ˗bhɔ wo ˈkwëë˗ ˗kɔ ˗kë ꞊dhɛ?
Ü ˗bha ˈka ˗kwɛzlan ˗nu ˈwo bhë ˗wa ˗zɔn ꞊dhɛ mɛn bhɔ ˗yi ˈwlaan˗ ˗yö Zoova ˗dhɛ ˗së ˗ee?
ˈKö ˗kë ˈˈdhʋ̈ ü ꞊mɔɔn˗ ˗bha ˈü˗ pö ü ˗de ˗dhɛ ‹ö ˗kɔ ˗da mɛn bhɔ ˗yi ˈwlaan˗ ˈgü ˗sü ɛɛnˈˈ ˈwlaan˗ ˈbhaa ˈö ˈyaa Biblö ˗dhɛ ˗së ˗a ˈgü ˗sü ˈö bhë, ˗yö Zoova ˗dhɛ ˈya˗ ꞊dedewo ˗ee?› ˗Ka Exode 32:1-8 ˗an ˗wo pö. ˈKa ka bo, kö ˈka˗ VIDEO ˗ga kö ˈka dhɛɛˈˈ ˗nu ˈwo ˈˈshia bhë, ˗an ˗yɔ mɛɛnˈˈ.
ˈMën ˗kë ˈö kwa dua ˈdhö ˗mü kö ˈkwa ˈwlaan˗ ˈbhaa ˗gɛn ˈgodhɛ ˈˈpiʋ̈ ˈpɔn ˗së ˈka kö ꞊ya kë ꞊dhɛ ˗yö Zoova ˗dhɛ ˗së ˈkwa˗ ˈwɔn dɔ?
Kwa ˗dho ˗a kë ˈˈdhʋ̈ ˗kɔ ˗kë ꞊dhɛ?
ˈWlaan˗ ˈö ˈyaa Zoova ˗dhɛ ˗së, kwa ˗dho ˗a dɔ ˗kɔ ˗kë ꞊dhɛ?
˗A ˗gɛn ˗yö ˗gban ˈpë ˈö Biblö ˗ya pö ˈyaa ˗së ˗a ˗ta ˗ee? Dhɛɛˈˈ ˈö bhë ˈkwa˗ pö ˈkwa˗ ˗yɔ dɔ, ˗kwaa ˈwlaan˗ ˗gɛngodhɛ ˈˈpiʋ̈ ˈpɔn.
˗Yö mɛnbhɩɩdhe, ˗kɔlokota ɛɛnˈˈ ˈˈsɛ ˗dɔ ˗a ˗bha ˗pë ˗nu ˈtɔ ˗bhɔ ꞊dhɛ ˗Zlan ˈdhö ˗ee? Zoova yö dosɛnŋ ˈnën kwa dua ˈdhö ˗mü kö ˈkwa ˗a ˗dhɔkë, kö ˈkwa kwa ˗zoyö ˗a ˗dhɛ ꞊dhɛ yö ˈnën ˈö ˗dho kpɔnŋtaadhɛ ˈwɔn ˈgbɩɩ˗ ˗nu ˈˈɲanbhɔ.
ˈWɔn ˗nu ˈö ˈwaa ˗Zlan ˗bha ˈtɔŋ˗ ˗dhɛ ˗së ˗wo ˗an ˗kë ˗a ˗ta ˗ee? Kwa dua ˗mü kö kwa ˈˈtakɔ ˗yö kë ˈˈslʋ̈ʋ̈slʋ̈.
5. ˗Bhö ˗a kë kö mɛn ˈˈwɛɛ ˗nu ˗wo ü ˗bha ˗zoyödhe ꞊bhlëë ˗ya.
Mɛn ˗nu ˈwo kwa ˗züzü ˗wo ꞊mɔɔn˗ ˗bha ˈwo kwa ˗blü kö ˈkwa kwa ˗kɔ ˗da ˈwlaan˗ ˗nu ˈö ˈwaa Zoova ˗dhɛ ˗së ˗an ˈgü. ꞊Ya kë ˈˈdhʋ̈, ˗bhö ü zuʋ̈ˈˈ kë ˗saa kö ˈü ü ˗zopiʋ̈wɔn ˗nu blɛɛˈˈ ˈˈnɛɛnnɛn ˈka, ˗gleŋ ˈka. ˗A ˈwɔnzuan do ˈö ˈdhö, ˗kaa VIDEO ˗ga.
˗Ka Matiö 7:12 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
ˈBha ü ˗zota Biblö ˈˈɲan ˈö bhë ˗a ˈgü, ü dua ˗mü kö ˈü˗ pö ü ˗bha ˈkɔdhigümɛn ˗nu ˈö ˈwaa Zoova ˗bha ꞊Gbɛkiö ˈka ˗an ˗dhɛ ꞊dhɛ ˈwa ˗dho ˈwlaan˗ ˈbhaa kë ˗ee?
ˈKö ˗kë ꞊dhɛ ˈbhaa ˈwlaan˗ ˈbhaa ˗nu kë ü ˗bha ˈkɔdhigümɛn ˗nu ˈˈpiʋ̈ ˈzüdho, ü ˗dho ˗a ˗zɔn ˗an ˗dhɛ ˗kɔ ˗kë ꞊dhɛ ꞊dhɛ ˗an ˗wɔn ˗yö ü ˗gɔ ˈˈgbɩɩ˗ ˈö ˗an ˗dhɔ ˗yö ü ˗kë?
6. Zoova ˗ya ˈˈpiʋ̈ kö kwa zuʋ̈ˈˈ ˈˈgblü ˗yö dhi.
Zoova ˗ya ˈˈpiʋ̈ kö kwaa kwa ˗bha ˈkɔdhigümɛn ˗nu waa kwa ˈˈtɔŋdë ˗nu ˈkwa zuʋ̈gblüdhi kë kwa ˈkwëë˗. ˗Ka Ecclésiaste 8:15 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
Biblö ˈˈɲan ˈö bhë ˗ya ˗zɔn ˗kɔ ˗kë ꞊dhɛ ꞊dhɛ Zoova ˗ya ˈˈpiʋ̈ kö kwa zuʋ̈ˈˈ ꞊nii ˗yö ˗da?
Zoova ˗ya ˈˈpiʋ̈ kö ö ˗dhɔkëmɛn ˗nu ˗wo trʋʋˈˈ ˗nu kë wo ˈkwëë˗ kö ˗an zuʋ̈ˈˈ ꞊nii ˗yö ˗da. ˗Kɔ ˈö zuʋ̈gblüdhi bhë ˈö ˗kë ˗a ˈka kwa ˗bha ˗bhɔkwëë ˈˈgblʋ̈gblʋ̈ ˗nu ˗ta, ˗kaa VIDEO ˗ga.
˗Ka Gadhatö 6:10 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
ˈˈGbɩɩdhɛ ˗mü kö ˈkwa kwa ˗kɔ ˗da ˈwlaan˗ ˈö mɛn ˈˈpɛpɛ ˗wa ˗kë ˗an ˈgü kö ˈkwa ꞊kun ˈwɔn ˗së kë mɛn ˈˈwɛɛ ˗nu ˗dhɛ ˗ee?
Gbɔɔdhe kë ˗kɔ ˗mɛɛn ˈö kwa zuʋ̈ˈˈ ˈˈgblü ˗dhi? ˗A ˈdhɛ ˈkwa˗ sü kwa ˗de ˈgü ˈö ˈkwa˗ ˗kë yö ˗mü ˗ee ɛɛnˈˈ ˗a ˈdhɛ ˈwlaan˗ ˗yö ˈˈgbɩɩdhɛ ˗wɔ kwa ˗ta ˈö ˈkwa ˗kë yö ˗mü ˗ee?
Zoova ˗bha ꞊Gbɛkiö ꞊vadhɛ ˗wo ˈwlaan˗ ˈnën ˗nu ˗ya ˈö waa wo ˗bha ˈnën ˗nu ˈwo˗ ˗kë ˈwo ˈkwëë˗ ˈö ˈwo gbɔɔdhe ˗nu ˗kë ˗an ˗gɔ ꞊shiöŋ ꞊shiöŋ. ꞊Ya kë ꞊dhɛ ˈnën ˗nu ˗wo ü ˗gɔ, ˈmën ˈü ˗dho ˗a kë ˗an ˗dhɛ kö ˗an zuʋ̈ˈˈ ꞊nii ˗yö ˗da?
MƐN ˈBHAA ˗NU ˗WA ˗PÖ: «ˈPë ˗wɔn ˈdhö ˈˈgbɩɩ˗ ˈwlaan˗ ˈˈtʋ̈ŋ ˈka, yö ˈnën ˗tɔ zuʋ̈gblüdhi ˗kë ö ˗bha ˈkɔdhigümɛn ˗nu ˈˈpiʋ̈ ˗sü. ˗A ˈwlaan˗ ˗gɛn ˈgodhɛ ˈyaa ˗mü.»
ˈMɛn ˈö˗ pö ˈˈdhʋ̈, ü ˗dho ˗a pö ˗a ˗dhɛ ꞊dhɛ?
˗A ˈDHƐ TO KWA ˈˈƝAAN
Zoova ˗ya ˈˈpiʋ̈ kö kwaa kwa ˗bha ˈkɔdhigümɛn ˗nu waa kwa ˈˈtɔŋdë ˗nu ˈkwa zuʋ̈gblüdhi kë kwa ˈkwëë˗. ˈˈKɛɛ ˗ya ˈˈpiʋ̈ ˈpö kö ˈwlaan˗ ˗nu ˈö ˈwaa ö ˗dhɛ ˗së ˈkwa ˈˈkan ˗an ˗bha.
˗Zobuödhe
Dhɛɛˈˈ ˗nu ˗mɛɛn ˈwo ˗dho kwa ˗takun kö ˈwlaan˗ ˗nu ˈö ˈwaa Zoova ˗dhɛ ˗së ˈkwa ˗an dɔ?
Kwa ˗dho ˗a kë ꞊dhɛ kö kwa ˗bha ˈkɔdhigümɛn ˗nu waa kwa ˈˈtɔŋdë ˗nu ˗wo ˈpë ˗kë ˈö ˈkwaa ˈwlaan˗ ˈbhaa ˗nu kë, ˗wa ˈgüman kwa ˗gɔ?
Kwa˗ ˈwɔn ˗dɔ ˗kɔ ˗kë ꞊dhɛ ꞊dhɛ Zoova ˗ya ˈˈpiʋ̈ kö kwa zuʋ̈ ꞊nii ˗yö ˗da kö ˈkwa trʋʋˈˈ ˗nu kë?
˗AN ˗GA ˈPÖ
ˈWlaan˗ ˈbhaa ˗nu ˈö kletiɛn ꞊dede ˗nu ˈwaa ˗an kë, ˗an ˗ga.
«ˈMën ˗kë ˈö Zoova ˗bha ꞊Gbɛkiö ˗nu ˈwaa ˈwlaan˗ ˈbhaa ˗nu kë?» (ˈWɔn ˗gɔ ˈö jw.org ˗ta)
Pë ˗yiishiö ˈö ˗an ˗wɔn ˈgü ˈö mɛn bhɔ ˗yi ˈwlaan˗ kë ˗sü ˈyaa ˗Zlan ˗dhɛ ˗së, ˗an ˗ga.
«ˈMën ˗kë ˈö Zoova ˗bha ꞊Gbɛkiö ˗nu ˈwaa mɛn bhɔ ˗yi ˈwlaan˗ kë?» (ˈWɔn ˗gɔ ˈö jw.org ˗ta)
ˈNën ˗nu ˈö Zoova ˗dhɔ ˗yö ˗an ˗kë, ˗kɔ ˈwo ꞊mɔɔn˗ ˗bha ˈwo˗ dhɔɔbhaawɔn kë ˗a ˈka ꞊kɔnʒe ˗nu ˈˈtʋ̈ŋ ˈka, ˗bhö ˗a ˗ga.
Kletiɛn ˈˈmliɲɔn ꞊va ꞊dede ˈwaa nowɛ ˈwlaan˗ kë. ˗Kɔ ˈwo ˈwɔn ˗nu kë ˗a ˈka, ˗a ˗ga.
«ˈWɔn kë ˗kɔ ˈdhɛ ˈö ˗së ꞊dedewo ꞊waa˗ dɔ» (˗Kwɛ 2012 Desanblö 1 ˗bha ˈˈGlaadhiʋ̈ ˗tɔn)
a ˈBha˗ pö ˈpë ˈü ˗dho ˗a kë ˈwɔn ˈbha ˈgü ˈwlaan˗ ˗nu ˈˈtʋ̈ŋ ˈka ˈü˗ dɔ, ˗bhö kpɔɔˈˈ ˗Zoto ˗a ˈˈpiʋ̈ ˗wɔn 5 ˗bha.