˗Dhikodhɛ ˈö ˗zlanwokɔdhi ˈgü ˗kwaa ˈkun ˈˈgbɩɩ˗

Kwaa kwa ꞊dhegblü ˗nu ˈkwa kë kwa ˈko ꞊bhaa, kwa ˗kë kwa ˗de ˈgü ˗së ꞊dhɛ ˗kɔ ˈö Davi ˗ya pö ˗a ˈka bhë ˗a ˈdhö. ˗Ya ˗pö: «꞊Dhegblüzë ˗nu ˗bha ˗kë wo ˈkwëëdhö ˗sü ˈö ˗dhɛ do ˈgü ˗dhikodhɛ ˈgü bhë, ˈaa ˗yö ˗së, ˈö ˈˈdhiaasü ꞊dedewo!» (Psaume 133:1) Kwa ˗kɔ ˗bha ˗kë ˈwɔn do ˗bha ˗sü ˈö bhë, pë ˈö ˗kë ö ˗de ˈka ˈˈwɛɛwɛ ˈyaa ˗mü. Mɛn ꞊gban ˈˈpɛpɛ kwa dua ˗mü ˈkwa kwa ˈgü dɔ ˈˈgbɩɩ˗ kö ˗yö ˈto kwa ꞊zinŋgü ˗kplawo.

1. ˈMën ˈwo˗ ˈsuaan˗ bho ˗Zlan ˗dhɔkëmɛn ˗nu ꞊zinŋgü?

Kö ˈü ˈdho ˗bhɔkwëë ˗nu ˗ta ˈˈsɛ ˈˈwɛɛ ˈgü, ˗a ˈbhaa ˗ya kë ˗wo ˈwo˗ pö mü ˈbhaa ꞊mɔɔn˗ ˗bha ˈü˗ man. ˈˈKɛɛ ü ˗dho kë ü ˗de ˈgü ˗së ꞊dhɛ ˈpë ˈü ü ˗de ˗gɔ ˈˈsɛ ˈgü ˗a ˈdhö. ˈMën ˗kë? ˗A ˗gɛn ˗mü ꞊dhɛ kwa ˗bha ˈsëëdhɛ ˗nu ˈö ˈkwa Biblö ꞊draan ˗an ˈgü ˗wo do ˗dhɛ ꞊gban ˈˈpɛpɛ ˈgü ˈˈkpɔnŋ ꞊taa. ꞊Ya ˈgo mü ˈzü ˗dhɔkaadhe ꞊dede ˗yö kwa ꞊zinŋgü. Kwa ˗kë ˈˈsɛ suu ˈˈoo ˗su ˈgü, ‹kwa Zoova ˈtɔ ˗bhɔ ˈö kwa ˗wo ˈdhö do ˗a ˗dhɔkësü ˈgü.›—Sophonie 3:9, ˗zoto ˗a ˈˈpiʋ̈ ˗wɔn.

2. Ü ˗dho ˗a kë ꞊dhɛ kö ˗dhikodhɛ ˗yö kë kaa ü ꞊dhegblü ˗nu ka ꞊zinŋgü?

«Ka ˗dhɔ ˗yö ka ˈko kë ꞊dedewo ka zuëˈˈ ꞊gban ˈka.» (1 Piɛdhö 1:22) Ü ˗dho ˗dhioo ˈö bhë ˗a ˗ya ꞊bhlëë ˈgü ˗kɔ ˗kë ꞊dhɛ? ˈBha ˗dho ü ˈˈɲan ˗klu mɛn ˈˈwɛɛ ˗nu zaadhɛ ˗bha, ˈˈkɛɛ ˗an ˗bha ˈˈklʋʋsë ˗nu ˗ga. ˈBha ˗dho ꞊nënŋ˗ mɛn ˗nu ˈö kaa˗ ˗nu ka ˗bha ˈwɔn yö ˗kɔ ˈdhö do wo dosɛnŋ ˗an ˗bha, ˈˈkɛɛ ˗a ˈˈslö mɛɛnˈˈ kö ˈü ꞊nënŋ ˈpö kwa ꞊dhegblü ˗nu ˈö kaa˗ ˗nu ˗ka ˈgodhɛ ˈyaa do ˗an ˗bha. ˗Bhö ü ˈgü ˗dɔ ˈˈgbɩɩ˗ ˈpö kö ˈü ˈˈkan mɛn ˈˈwɛɛ ˗nu yö ˗kɔ yaa suu ˈˈpɛpɛ ˗bha.—1 Piɛdhö 2:17 ˗wo pö.a

3. ˗Zuöödhe ˗ya ˗da kaa ü ꞊dhegblü kletiɛn ka ꞊zinŋgü, ü ˗dho ˗a kë ꞊dhɛ?

Kwa ˗kɔ ˗yö ˈwɔn do ˗bha ˈˈkɛɛ ˈwɔn yaa ˗dhii ˗yö kwa kwi ˈgü. ꞊Ya kë ꞊shiö kwa kwa ˈko ˗nu ˈgü ga ˗wɔn ˗nu ˗kë ˈö ˈkwa ˈwɔn ˗shiö kwa ˈko ˗dhɛ ˗ʒiaanwo. ˈˈKɛɛ ˗Zlan ˗Wo ˗ya ˗pö: «˗Ka ka ˈko ˗nu ˗mawɔn ˈto ka ˈko ꞊zinng ˈgü.» ˈÖ go mü ˈzü ˈö˗ pö: «˗Ka ka ˈko ˗nu ˗mawɔn ˈto ꞊dhɛ ˗kɔ do ˈö kwa Dëmɛ ˗yö ka ˗mawɔn to˗ ˈka bha˗ ˈdhö.» (Kodhɔsö 3:13 ˗wo pö.) Kwa Zoova ˈgü ga ˗wɔn ˗nu ˗kë ˗kplawo, ˈˈkɛɛ ˗yö kwa ˗bhawɔn ˗to. ˗Ya ˈˈpiʋ̈ ˈpö kö ˈkwa kwa ꞊dhegblü ˗nu ˗bhawɔn ˈto. ˈBha˗ yö ꞊dhɛ ˈbha ˈwɔn yaa kë mɛn ˈbhaa ˈka, ˗bhö ˈgën nu ˗a ˗dhɛ kö ˗dhikodhɛ ˗yö ˈto ka ꞊zinŋgü.—Matiö 5:23, 24 ˗wo pö.b

˗KAA ˈˈPIƲ̈ ˈPƆN

4. ˗Bhö ˈˈkan mɛn ˈˈwɛɛ ˗nu ˗san kë ˗sü ˗bha.

Kwa˗ ˈˈpiʋ̈ kö kwa ꞊dhegblü ˗nu ˈˈpɛpɛ ˗dhɔ ˗yö kwa kë. ˈˈKɛɛ ꞊ya kë ꞊shiö mɛn ˈö kwaa˗ ˗nu ˈkwaa do, ˗a ˗dhɔ ˗bha kwa kë ˗sü kë kwa ˗gɔ ˈˈgbɩɩ˗. ˈMën ˈö ꞊mɔɔn˗ ˗bha ˈö kwa ˗takun? ˗Ka Këwɔn ˗nu 10:34, 35 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:

• Mɛn suu ˈˈpɛpɛ ˈwo˗ ˈˈpiʋ̈ ˈwo Zoova ˗dhɔkë, ˗yö ö ˗kɔ ˗kpɔ ˗an ˗gɔ. Ü ˗dho ˗gleŋ ˈsü ˗a ˗bha kö mɛn ˗nu ˈö kaa˗ ˗nu ka ˈgodhɛ ˈyaa do ˈü ˗an ˈsü ˗kɔ ˗kë ꞊dhɛ?

• Mɛn ˈˈwɛɛ ˗nu ˗sü yaa ˗kɔ ˗mɛɛn ˈö ˗dhɛ ˈü˗ ˗bha ˗a ˈgü ˈü˗ ˈˈpiʋ̈ ˈü ˈˈkan ˗a ˗bha?

˗Ka 2 Kodhɛngtö 6:11-13 ˗an ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:

• Ü ꞊dhegblü ˗nu ˈö ˈwo ˗zlanwokɔɔdhö ˈö kaa˗ ˗nu ka ˈgodhɛ ˈyaa do, ü ˗dho ˗a kë ꞊dhɛ kö ka ˗bha ˈˈtɔŋdhɛ ˗yö kë ˈˈgbɩɩ˗.

5. ˗Ka ka ˈko ˗nu ˗bhawɔn ˈto zuʋ̈ˈˈ ˈˈpuu ˗bha, ˈka ˗dhikodhɛ mɛɛnˈˈ.

ˈKö ˗kë ꞊dhɛ Zoova ˈyaa ˈwɔn yaa kë kwa ˈka kö ˗yö ˗bhawɔntodhe ˗dhɛ kwa ˗gɔ, ˗yö kwa ˗bhawɔn ˗to ˗kplawo. ˗Ka Psaume 86:5 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:

• ˈMën ˈö Biblö ˈˈɲan bhë ˈö˗ ˗zɔn kwa ˗dhɛ ˈö ˗gban Zoova ˗bha mɛn ˗nu ˗bhawɔn ˈto ˗sü ˗bha?

• ˈMën ˗kë ˈö Zoova ˗bha ü ˗bhawɔn ˈto ˗sü ˗yö ü zuʋ̈ˈˈ ꞊nii ˗da?

• ˈWɔn ˗mɛɛn ˗nu ˈö kwaa mɛn ˈˈwɛɛ ˗nu kwa ˗wo ˈyaa ˗mɔn ˗an ˈgü ꞊shiöŋ?

Kwa ˗dho ˈto Zoova ˗bha ˈwɔnzuan ˈˈpiʋ̈ ˗kɔ ˗kë ꞊dhɛ kö ˗dhikodhɛ ˗yö ˈto kwaa kwa ꞊dhegblü ˗nu kwa ꞊zinŋgü? ˗Ka Proverbes 19:11 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:

• Mɛn ˈbhaa ˗ya ü ˗shiödhɛwɔn ɛɛnˈˈ ü ˈgü ga ˗wɔn kë, ü ˗dho ˗a kë ꞊dhɛ kö ˗a ˈwɔn ˗yö baaˈˈ?

ˈˈTʋ̈ŋ ˈbhaa ˗nu ˈka, kwa kwa ꞊dhegblü ˗nu ˗shiödhɛwɔn ˗kë. ꞊Ya kë ˈˈdhʋ̈ ˈmën kwa dua ˈdhö ˗mü kö ˈkwa˗ kë? ˗Kaa VIDEO ˗ga, kö dhɛɛˈˈ ˈö ˈˈshia bhë ˈka˗ ˗yɔ mɛɛnˈˈ.

VIDEO: ˗Dhikodhɛ mɛɛnˈˈ ˗sü ˗yö ˈwɔn ˗së ꞊va ˗kë mɛn ˗dhɛ (6:01)

• Video ˈö bhë ˗a ˈgü, kwa ꞊dhegblü dhebɔ ˈö bhë ˗yö ˗dhikodhɛ ˗mɛɛn ˗kɔ ˗kë ꞊dhɛ?

6. ˗Bhö ü ꞊dhegblü ˗nu ˗bha ˈˈklʋʋsë ˗nu ˈsuaan˗ bho.

ˈKwa ꞊nënŋ kwa ꞊dhegblü ˗nu ˗bha, ˈyö pë ˈwo˗ ˈgü ˈˈgbɩɩ˗ waa˗ ˗dhɛ ˈö ˈwaa˗ ˈgü ˈˈgbɩɩ˗ ˈkwa ˗an dɔ. Kwa ˗dho ˗a kë ꞊dhɛ kö ˈkwa kwa ˈˈɲan ˗klu pë ˈwo˗ ˈgü ˈˈgbɩɩ˗ ˗a ˗bha? ˗Kaa VIDEO ˗ga, kö dhɛɛˈˈ ˈö ˈˈshia bhë ˈka˗ ˗yɔ mɛɛnˈˈ.

VIDEO: -Kwa kë mɛn -tiaandhö ˈka -kpɛɛwo! (5:10)

• ˗Mën ˈö ˗dho ü ˗takun kö ˈü ü ˈˈɲan kë ü ꞊dhegblü ˗nu ˗bha ˈˈklʋʋsë ˗nu ˗bha?

Kwa ˗bha ˈˈklʋʋsë ˗nu ˈnën Zoova ˗yö ˗an ˗ga. ˗Ka 2 Chroniques 16:9 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:

• ˗A ˈwɔn dɔ ˗sü ˈö ꞊dhɛ Zoova ˗yö ö ˈˈɲan ˗klu ü ˗bha ˈˈklʋʋsë ˗nu ˗bha bhë, ˗yö ˗pa ü zuʋ̈ˈˈ ˈka ˗kɔ ˗kë ꞊dhɛ?

˗A ˈDHƐ TO KWA ˈˈƝAAN

Kwa ꞊dhegblü ˗nu ˈˈpɛpɛ ˗dhɔ ˗ya kwa kë, ˈkwa ˗an ˗bhawɔn ˈto zuʋ̈ˈˈ ˈˈpuu ˈka, ˈyö ˗dhikodhɛ ˗yö ˗kë kwa ꞊zinŋgü ˗zlanwokɔɔdhö.

˗Zobuödhe

• Ü ˗dho ˈˈkan mɛn ˈˈwɛɛ ˗nu ˗sü yaa ˗sü ˗bha ˗kɔ ˗kë ꞊dhɛ?

• ˗Zuöödhe ˗ya ˗da kaa ü ꞊dhegblü kletiɛn ka ꞊zinŋgü, ü ˗dho ˗a kë ˗dhɛ?

• ˈMën ˗kë ˈö ü dua ˈdhö ˗mü kö ˈü ˈto Zoova ˗bha ˈwɔnzuan ˈˈpiʋ̈ mɛn ˈˈwɛɛ ˗nu ˗bhawɔn ˈto ˗sü ˈgü?

˗AN ˗GA ˈPÖ

Yesu ˗bha ˈwɔnzuan do ˈö ˗dho kwa ˗takun kö ˈkwa ˗dho zadɔ mɛn ˈˈwɛɛ ˗nu ˗bha, ˗a ˗ga.

˗Bhö ˈˈdhü ˗blün bho ü ˈˈɲan ˗bha (6:56)

ˈKö ˗kë kwa ˈgü ꞊dhɛ kwa ˈti pë yaa kë mɛn ˈbhaa ˈka, kwa dua ˗mü kö ˈkwa ˈgën nu ˗a ˗dhɛ ˗ee? Dhɛɛˈˈ ˈö bhë ˗a ˗yɔ ˗ga.

«ˈGën nu ˗sü ˈyaa ˗dhikodhɛ shiʋ̈ˈˈ» (˗Kwɛ 2002 Novanblö 1 ˗bha ˈˈGlaadhiʋ̈ ˗tɔn)

˗Kɔ ˈö mɛn ˈbhaa ˗nu ˗wo mɛn ˈˈwɛɛ ˗nu ˗sü ˗së ˗sü ꞊draan ˗a ˈka, ˗bhö ˗a ˗ga.

Ne jugeons pas d’après l’apparence (5:06)

ˈWɔn ˗ya ˗da kwaa mɛn ˈbhaa kwa ꞊zinŋgü, ˗kɔ ˈö ˈkwa ˗dho ˗a ˈˈɲanbhɔ ˗a ˈka kö ˈya ˗dho ˗dhikodhɛ ˈö ˗zlanwokɔɔdhö ˗a shiʋ̈ˈˈ bhë, ˗a ˗ga.

«ˈWɔn ˗nu ˈˈɲanbhɔ ˗dhɔkaa ˈgü» (˗Kwɛ 2016 ˈMɛn ˗bha ˈˈGlaadhiʋ̈ ˗tɔn)