1 Saamiuel

26 Wagre naŋ gɛrɛ poɔŋ na, dɔbɔ naŋ yi Zeef da wa la Sɔɔl zie saŋa na oŋ da be Giibiya a wa yelkoo ka: “Ma Deevid sɔglɛɛ Hakyila taŋa na naŋ tori Gyɛsimɔn na poɔŋ wɛ?” 2 Azuŋ, Sɔɔl da vaa ireeŋ a sigi gaa Zeef wɛgyɛŋ na poɔŋ. O da de la Izerayɛl dɔbɔ naŋ kyile 3,000 a poɔ o eŋɛŋ a gɛrɛ ka o bɔ Deevid Zeef wɛgyɛŋ poɔŋ. 3 Sɔɔl da wa maalɛɛ o kampu Hakyila taŋa na zuŋ, beŋ daaŋ tori Gyɛsimɔn na, a be a sori noɔreŋ na. Deevid da kpeɛrɛɛ a wɛgyɛŋ poɔŋ, o da woŋeeŋ ka Sɔɔl wa la a wɛgyɛŋ poɔŋ a boɔroo. 4 Azuŋ Deevid da toŋɛɛ pig-pigriba ka ba te nyɛ ka Sɔɔl sereŋ wa la a wɛgyɛŋ poɔ bee. 5 A puoreŋ, Deevid da gaa la zie na Sɔɔl naŋ maale o kampu na, ka Deevid da nyɛ zie na Sɔɔl ane Abina Nɛɛ bidɔɔ na naŋ da gaŋ a gbire; Sɔɔl da gaŋ gbireŋ a kampu poɔŋ, ka o sogyare na zaa da ŋmaa gyeeroo. 6 Ka Deevid da yelko Ahimɛlɛk a Hiit neɛ na ane Abishai Zɛruuriya bidɔɔ, Gyooab yɔɔ na ka: “Nembuoŋ na poɔ N eŋɛŋ ka te gaa Sɔɔl kampu na poɔŋ?” Ka Abishai deɛ yelka: “N ne bo na sigi gaa la be.” 7 Azuŋ, zisoɔree saŋa Deevid neŋ Abishai da sɔglɛɛŋ a te kpɛ Sɔɔl sogyare na poɔŋ, ba da nyɛɛ Sɔɔl naŋ gaŋ a kampu seŋsooreŋ kyɛ ka o kpane ba teŋɛŋ a peɛle o zu; Abina ane a sogyare zaaŋ da gaŋ a gyeere Sɔɔl. 8 Beŋ la ka Abishai da yelko Deevid ka: “Zenɛ ŋa, Naaŋmen de la ho dɔndɔmɔ eŋ ho nuuriŋ. Sɔrebo la, ko ma sori pampana ŋa ka N de a kpane ŋa a kyɔgoo mare teŋɛ dayeni, N koŋ kyɔgoo gbɛre buyi gba.” 9 Kyɛ ka Deevid yelko Abishai ka: “Ta wa erɛ yelzaa naŋ na peroo, nembuoŋ na toɔ̃ de o nu seene neɛ Jehoova naŋ sɔ naaloŋ kãã a kyɛ naŋ e neɛ naŋ ba taa saanaa Jehoova nimitɔɔreŋ?” 10 Deevid da lɛ yeleeŋ ka: “Aŋa Jehoova naŋ sereŋ voorɔ yɛŋ, Jehoova meŋɛ na ŋmɛ oŋ ka o le, kyɛbee o bebiri na taŋ ka o kpi, kyɛbee ka o sigi gaa zɔɔre poɔ a te kɔŋ o nyɔvore. 11 A ba soma fẽẽ zaa Jehoova nimitɔɔreŋ ka N zɛge N nu a seene neɛ na Jehoova naŋ sɔ naaloŋ kãã! Azuŋ, sɔrebo la, de a kpane na naŋ peɛle o zu sɛŋ na ane a koɔ̃ yuori ka te yi a zie ŋa gaa.” 12 Azuŋ, Deevid da de la a kpane ane a koɔ̃ yuori naŋ da biŋ peɛle Sɔɔl zu sɛŋ na, ka o neŋ Abishai yi be a gaa. Neɛzaa da ba nyɛ ba, kyɛbee a baŋ ka ba wa la be. Ba kaŋa zaa meŋ da ba iri, bonso gɔɔn-kpoŋ naŋ yi Jehoova zie da wa la ba zaa eŋɛŋ. 13 Ka Deevid daaŋ ŋmaa gaa a taŋa lombo-zaala na, a te are a taŋa zuŋ tɔɔre zaa, ka vuo naŋ e kpɛŋ daaŋ be o neŋ ba kpakyagaŋ.