Yieme
5 Kyɛlle woŋ N yelbie, Oo Jehoova; Kyɛlle woŋ lɛ na maŋ kono hiine na. 2 Kyɛlle woŋ lɛ na maŋ kono sɔrɔ bo ka ho soŋ ma na, Oo N Naa ane N Naaŋmen, bonso hooŋ la maŋ puoro sɔrɔ. 3 Oo Jehoova, ho na woŋee N kɔkɔre beguo saŋa; Beguo saŋa N na maŋ yelee yɛlɛ naŋ dɔɔnɔ ma a ko bo, a kyɛ pãã mãã N meŋɛ a kyɛnlɛ bo. 4 Bonso ho ba e Naaŋmen naŋ nɔŋ toŋfatoŋ; Neŋfaa zaa koŋ baŋ be ho zieŋ. 5 Neɛ naŋ zɛgrɛ o meŋɛ koŋ baŋ are ho nimitɔɔreŋ. Ho kyiiree noba na zaa naŋ tonɔ faaloŋ; 6 Ho na sããŋɛɛ noba na zaa naŋ ŋmaara zirii. Jehoova kyiiree noba naŋ tonɔ kpaŋkpaŋkpeɛ̃o toma a kyɛ bɛnlɛ noba meŋ. 7 Kyɛ N na kpɛɛ ho die na poɔ bonso ho yelmeŋɛ nɔmmo na eɛ kpoŋ; N na de la gyeremɛ naŋ e zuluŋ a kyuli N zu tori ho ŋmenpuoredie naŋ e forifori na. 8 Oo Jehoova, wuli ma sori ho sontuubo poɔŋ N dɔndɔnne zuŋ; Vɛŋ ka ho sori na kyaane ko ma. 9 Bonso yelzaa ba naŋ yele ba kye dɛlebo; Bonzaa ba kye ba eŋɛŋ ka faaloŋ yoŋ naane; Ba kɔkɔ-poore waa ŋa yaa naŋ yuo gaŋ; Ba maŋ de la ba zele yele yelbie naŋ bɛnlɛ. 10 Kyɛ Naaŋmen na vɛmeŋ ka ba baŋ ka ba ba erɛ yɛlɛ naŋ soma; Ba menne daware yɛlɛ la na vɛŋ ka ba le. Ba yelfaare na ba naŋ erɛ yaga zaa na zuŋ, ba na kare baŋ bare, Bonso ba iree taawae ho eŋɛŋ. 11 Kyɛ noba na zaa naŋ bɔ lirizie ho zieŋ na na taaɛ popeɛloŋ; Ba na maŋ kyeerɛŋ neŋ popeɛloŋ. Ho koŋ tere sori ka ba ta ba, Noba naŋ nɔŋ ho yuori na na taaɛ popeɛloŋ yaga. 12 Oo Jehoova, ho na ko la neɛzaa naŋ e sontuuro maaloo; Ho na de la ho maaloo na ŋmaa gyeere ba aŋa kuri bonlɛgraa naŋ e kpoŋ.