Yieme

21 Oo Jehoova, a naa kyillɛŋ neŋ popeɛloŋ ho kpeɛ̃o poɔŋ; Nyɛ lɛ o naŋ kyillɛ neŋ popeɛloŋ naŋ e kpoŋ ho faabo toma zuŋ! 2 Ho ko oŋ o sukyiri bon boɔraa, Ho ba de yɛlɛ o naŋ de o nɔ-gbama sɔre yi ho zieŋ mɔŋoo. (Selah) 3 Ho de la maaloo yaga zaa a tuore ne o; Ho deɛ na-zupil ba naŋ de salema maale neŋ a kyigi o zuŋ. 4 O sɔrɛɛ nyɔvore yi ho zieŋ, hoŋ de koo, A koo nyɔvo-tɔɔre naŋ ba taa baaraa. 5 Ho faabo toma maŋ vɛŋeŋ oŋ nyɛrɛ gyeremɛ naŋ e kpoŋ. Ho vɛŋɛɛŋ oŋ nyɛ gyeremɛ ane pugibo naŋ e kpoŋ. 6 Ho ko oŋ maaloo naŋ bebe tegitegilɛ; Ho vɛŋɛɛŋ ka o eŋɛ yuoro neŋ popeɛloŋ naŋ be ho nimitɔɔreŋ na. 7 Bonso a naa de la o meŋɛ dɛle Jehoova; A Soba na naŋ Do Saa Yaga Zaa yelmeŋɛ nɔmmo na zuŋ, o daŋ koŋ gbigri zaa. 8 Ho nu na kpɛɛ ho dɔndɔnne zaa; Ho nuduluŋ na kpɛɛ noba na zaa naŋ ha bo na. 9 Ka saŋa na hoŋ nare biŋ ka ho wa ba eŋɛŋ naŋ wa ta, ho na vɛŋeŋ ka ba waa ŋa vũũ zele ba naŋ maale aŋ dire yaga zaa. Jehoova na yi la o suuri poɔŋ a de ba vɔle, vũũ na di baŋ baare kpɛlɛŋkpɛlɛŋ. 10 Ho na sãã la ba biiri zaa yi a teŋɛzuŋ, A sãã ba biiri zaa yi nensaaleba poɔŋ. 11 Bonso a eɛ ba poteɛrɛ ka ba e bo yelfaa; Ba narɛɛ nyaammo yɛlɛ naŋ koŋ toɔ̃ nyɛ eebo. 12 Bonso ho na teɛ la ho tammo tori ba Ka lɛ vɛŋ ka ba leɛ puori. 13 Oo Jehoova, vaa iri, a wuli ho kpeɛ̃o. Te na yielee pugibo yiele ho kpeɛ̃o na zuŋ.