Joob

1 Dɔɔ kaŋa da be la Uz paaloŋ baŋ boɔloo Gyoob. O da eɛ dɔɔ yelmeŋɛ soba naŋ maŋ erɛ yɛlɛ naŋ tori; o da zoree Naaŋmen kyɛ kyiire yelfaare. 2 O da taaɛ bidɔba bayɔpoi ane pɔgeyaare bata. 3 O dunni da eɛ peere 7,000, bontaŋne 3,000, nii 1,000, ane bonne 500, o da taaɛ tontonneba yaga zaa, ka lɛ da vɛŋ oŋ da e neŋtegroŋ yaga zaa a donɛɛ Sapare sɛŋ noba na zaa poɔŋ. 4 O biiri na kaŋa zaa da maŋ taaɛ bebiri oŋ da maŋ maale bondirii o dieŋ. Ba da maŋ toŋboɔlɛɛ ba yɔɔpɔgeba bata na baŋ wa ba zie a wa di a bondirii kyɛ nyu. 5 Saŋa na a bidɔba zaa naŋ da maŋ maale a bondirii diibu zaa baare, Gyoob da maŋ toŋboɔle baŋ ka lɛ na vɛŋ ka o pɛge ba ka ba yi. O da maŋ iree beguu-pipi a iri sareka nyegruu a ko ba kaŋa zaa. Bonso Gyoob da maŋ yeliŋ ka: “Aminekaŋaŋ N bidɔba na eɛ yelfaa kaŋa a kyɛ lɛ yeli yelfaare kyaare Naaŋmen ba sukyie pooreŋ.” Lɛ ka Gyoob da maŋ erɛ wagre zaa. 6 Bebiri na a yelmeŋɛ Naaŋmen bidɔba naŋ maŋ kpɛ te are Jehoova nimitɔɔreŋ na da taɛ la, beŋ la ka Setaana meŋ da poɔ ba eŋɛŋ a kpɛ be. 7 Ka Jehoova soore Setaana ka: “Yeŋ ka ho yi wa?” Ka Setaana meŋ deɛ yelko Jehoova ka: “N da yuoɔrɛɛ a tendaa zu, a kyɛnɛ o poɔŋ meŋ, beŋ la ka N yi wa.” 8 Ka Jehoova leɛ soore Setaana ka: “Ho nyɛɛ N toŋtonɔ Gyoob bee? Neɛzaa kye a teŋɛzuŋ a waa lɛ na oŋ waa na. O eɛ dɔɔ naŋ e yelmeŋɛ soba, a zoro Naaŋmen a kyɛ kyiire yelfaare meŋ.” 9 Beŋ la ka Setaana yelko Jehoova ka: “Ho teɛre ka Gyoob zoree Naaŋmen weɛ lɛ bee? 10 Ma hooŋ la go o, a go o yiri ane bonzaa oŋ taa wa? Ho maalɛɛ o nu toma zaa, ka o dunni meŋ e yaga zaa teŋganeŋ. 11 Kyɛ hooŋ leɛre yɛlɛ nyɛ, a teɛ ho nu a ŋmɛ bonzaa o naŋ taa, ka hooŋ e lɛ o na yelee yelfaare kyaare bo ho niŋesogɔŋ.” 12 Beŋ la ka Jehoova yelko Setaana ka: “Nyɛ! Bonzaa oŋ taa be la ho nuuriŋ. Kyɛ ta wa derɛ ho nu seenɛ a dɔɔ meŋɛ yɛŋ!” Beŋ la ka Setaana da yi Jehoova nimitɔɔreŋ a gaa. 13 Beŋ la ka Gyoob bidɔba ane o pɔgeyaare da te dire bondirii a kyɛ nyuuro waiŋ ba zaa beɛre dieŋ, 14 ka toŋtonɔ kaŋa da wa Gyoob zie a wa yelkoo ka: “A nii da koɔrɔŋ ka a bonne meŋ da ɔɔrɔ moɔ peɛlaa 15 beŋ la ka a Siibiya noba wa zɔɔ ne te kyɛ fa a boma zaa, ho tontonneba na zaa baŋ ko neŋ zɔɔzɔɔsoɔ. Maaŋ yoŋ la toɔ̃ zo yi a wa ka N yelko bo.” 16 O da naŋ ba yel a yɛlɛ baare kyɛ ka tontonɔ kaŋa meŋ wa kpɛ a yelka: “Vũũ naŋ yi Naaŋmen zie yi la sazuŋ a wa di a peere ane ho tontonneba na zaa! Maaŋ yoŋ la toɔ̃ zo yi a wa ka N yelko bo.” 17 O da naŋ ba yel a yɛlɛ baare kyɛ ka a toŋtonɔ kaŋa meŋ wa kpɛ, a yelka: “A Kalidiiya noba po la ba menne eŋ ziiri ata a wa nyɔge a bontaŋne zaa gaa, ba ko la ho tontonneba na zaa ne zɔɔzɔɔsoɔ. Maaŋ yoŋ la toɔ̃ zo yi a wa ka N yelko bo.” 18 O da naŋ ba yel a yɛlɛ baare kyɛ ka a toŋtonɔ kaŋa meŋ la lɛ a wa kpɛ, a yelka: “Ho bidɔba ane ho pɔgeyaare da diree bondirii a kyɛ nyuuro waiŋ ba beɛre dieŋ. 19 A tɔntɔbaalɛ ka sasekpeɛŋaa kaŋa naŋ yi a wɛgyɛŋ poɔ wa ŋmɛ a die lomboe anaare zaa, ka lɛ vɛŋ ka a die le a noba zuŋ baŋ zaa kpi. Maaŋ yoŋ la toɔ̃ zo yi a wa ka N yelko bo.” 20 Beŋ la ka Gyoob iri a kyeɛre o bonsuurii zaa bare, a kyɛ o zukɔɔloŋ meŋ zaa bare; beŋ la oŋ le pu teŋɛŋ a kyuli o zu 21 a kyɛ yelka: “Eŋkpoli maŋ de yi N ma poɔŋ wa, Lɛ neŋ o zu maŋ na leɛ gaa. Jehoova la tere, Jehoova la a lɛ deɛrɛ o boma. Yɛ naŋ kyɛnɛ pugiro Jehoova yuori na.” 22 A yi a yɛlɛ ŋa zaa poɔŋ, Gyoob da ba e yelfaa zaa kyɛbee a yelka Naaŋmen eɛ yelfaa kaŋa.