Matio

6 Saŋa na Yezu naŋ da be Bɛtane, Saamɔn a kɔŋkɔŋɔ die na, 7 pɔge kaŋa naŋ da taa kãã nyunoɔ̃ne mine daa naŋ e tuo yaga a be alabasita yuori poɔŋ da wa la o zie, oŋ da piili kyire a kãã nyunoɔ̃ne waara o zu saŋa na oŋ da dire a bondirii na. 8 Saŋa na o potuuribo naŋ da wa nyɛ lɛ na, ba suuri da ireeŋ yaga zaa, baŋ yelka: “Bonso oŋ sããna a boma bara lɛ? 9 Bonso te da na toɔ̃ de aŋ koɔre a nyɛ libie yaga a de ko nandaaneba.” 10 Yezu naŋ da baŋ a yɛlɛ ŋa zuŋ na, o da yelko baŋ ka: “Bonso yɛŋ boɔrɔ ka yɛ ŋmaa yɛlɛ tuo a pɔge? Yelsoŋ la oŋ e a ko ma. 11 Bonso yɛ maŋ taaɛ nandaaneba yɛ poɔŋ wagre zaa, kyɛ wagre zaa naane yɛŋ na maŋ taa ma yɛ poɔŋ. 12 Saŋa na oŋ kyiri a kãã nyunoɔ̃ waare N eŋdaa na, o eɛ lɛ a de nara ma korɔ N uumu. 13 Yelmeŋɛ ka N yele korɔ yɛ, zie zaa baŋ na moɔle a duorisoŋ a donɛɛ lombori zaa, ba na maŋ yelee yɛlɛ na a pɔge ŋa naŋ e na a maŋ de teɛrɛ o yɛlɛ.” 17 A Boroboro Naŋ Ba Taa Bilɛ bebi-dɛndɛŋ daare, a potuuribo da wa la Yezu zie, a wa sooroo ka: “Yeŋ hoŋ boɔrɔ ka te gaa te nare a ko bo ka ho di a Parebare?” 18 Ka Yezu yelko ba ka: “Yɛ kpɛ a teŋkpɛŋ poɔ, yɛ na te nyɛɛ neɛ kaŋa, yɛ yelkoo ka, ‘A wulwulo yeleeŋ ka: “N wagre taabo peɛlɛɛŋ; N neŋ N potuuribo na di la a Parebare tigri ho dieŋ.”’” 19 A potuuribo da eɛ lɛ na zaa Yezu naŋ da yelko ba ka ba e na, a da nare a Parebare. 20 Saŋa na zimaanee naŋ wa ta, Yezu neŋ o potuuribo 12 na da zeŋɛɛŋ ka ba di bondirii tabule zuŋ. 21 Saŋa na baŋ da dire a bondirii na, o da yeleeŋ ka: “Yelmeŋɛ ka N yele korɔ yɛ, yɛ kaŋa na iri maŋ tere.” 22 A yɛlɛ ŋa da dɔŋ baŋ yaga zaa, azuŋ ba kaŋa zaa da yele korɛɛ Yezu ka: “Daana, maaŋ naane, kyɛbee?” 23 Ka Yezu deɛ yelko ba ka: “Soba na naŋ tu ma a de o nu eŋ a laa poɔŋ la na iri ma tere. 24 Yelmeŋɛ la, a nensaalaa Bidɔɔ gɛrɛ la, aŋa lɛ na ba naŋ sɛge a kyaaroo na, kyɛ neɛ na zie ba naŋ na tu kyɛ iruu tere na yuori la wɛ! A gba da naŋ somaŋ ka ba naŋ da ba dɔge o soba.” 25 Gyudase, onaŋ da yɛŋ iruu tere na da deɛ yeleeŋ ka: “Rabbi maaŋ naane, kyɛbee?” Ka Yezu yelkoo ka: “Hooŋ meŋɛ la yele lɛ.” 26 Saŋa na baŋ da naŋ dire a bondirii na, Yezu da de la a boroboro, saŋa na oŋ wa puore sɔre Naaŋmen maaloo baare na, o da kɔɔ la a boroboro, a de korɔ o potuuribo na, a yelko ba ka: “Yɛ deɛ ɔɔ. A boroboro ŋa are ko la N eŋdaa.” 27 O da de la a ŋmanlee, a puore Naaŋmen bareka a kyɛ de ko ba, O da yeleeŋ ka: “Yɛ zaa yɛ deɛ a ŋmanlee ŋa a nyu dãã naŋ be o poɔŋ na, 28 bonso a dãã ŋa are ko la N ‘nɔlaŋ zĩĩ na,’ ana baŋ na kyiri bare a na maŋ tu a eŋɛ a di noba yaga yelbebe suuri a ko ba na. 29 Kyɛ maaŋ yele korɔ yɛ: N daŋ koŋ lɛ nyu a tewɔmɔ dãã ŋa zaa a te ta bebiri na maaŋ ne yɛ naŋ na la nyu a dããpaalaa N Saa Naaloŋ na poɔŋ.” 30 Saŋa na baŋ da wa baare na, ba da yielee pugibu yiele, ba da yi la be a gaa Oolif Taŋa na zu. 31 Beŋ la ka Yezu yelko ba ka: “A zisoɔree ŋa, yɛ zaa na ŋmɛɛ gbɛre N zuŋ, bonso ba sɛgɛɛŋ ka: ‘N na ŋmɛɛ a pekyeenɛ, ka a peere zaa zo yaare.’ 32 Kyɛ ka ba naŋ wa seŋ ma ka N iri yi kũũni poɔŋ, N na de la yɛ weɛ a gaa Galili.” 33 Kyɛ ka Piita deɛ yelko Yezu ka: “Aneazaa ka N taaba na yɛŋ na ŋmɛɛ gbɛre ho zuŋ, kyɛ maaŋ yɛŋ daaŋ koŋ ŋmɛ gbɛre zaa!” 34 Ka Yezu yelkoo ka: “Yelmeŋɛ ka N yele korɔ bo, a zisoɔree ŋa, sɛre ka nɔdaa na koŋ, ho na zagre maŋ gbɛre bota.” 35 Ka Piita yelko Yezu ka: “Haali ka N ne boŋ na laŋ kpi, kyɛ N daaŋ koŋ zagre bo bare zaa.” Lɛ ka a potuuribo zaa meŋ da yeli. 36 Beŋ la ka Yezu ne ba da wa ta zie na baŋ boɔlɔ Gɛsamane na, ka Yezu yelko o potuuribo na ka: “Yɛ zeŋ kyɛ ka N gaa a zie ŋa a te puore.” 37 O da de la Piita ane Zɛbɛdii bidɔbɔ bayi na poɔ o eŋɛŋ a gɛrɛ, beŋ la oŋ da piili kyerɛ yaga zaa ka yɛlɛ meŋ da dɔɔnoo yaga zaa. 38 Azuŋ, o da yelko baŋ ka: “Yɛlɛ dɔɔnɔ maŋ yaga zaa a te ta kũũ gba. Yɛ be zie ŋaŋ ka N ne yɛ kaara velaa.” 39 Saŋa na oŋ da wa sɛre yi ba zieŋ fẽẽ, o da le vɔgle la teŋɛŋ, a puoro ka: “N Saa, yelzaa na baŋ nyɛɛ eebo ho zieŋ, vɛŋ ka a ŋmanlee ŋa pare ma bare. Kyɛ, a ba e ka a e lɛ na maŋ boɔrɔ, kyɛ vɛŋ ka hooŋ yɛŋ boɔbo nyɛ eebo.” 40 O da leɛ gaa la a potuuribo zie a te nyɛ ba ka ba gbire, oŋ yelko Piita ka: “Ka lɛ ho koŋ baŋ nyɔge ho meŋɛ aŋa awa gbuli a kaara velaa ne ma bee? 41 Yɛ kaara velaa a puoro nimizeɛ̃, ka lɛ vɛŋ ka yɛ ta wa kpeɛrɛ pigrinyɛ poɔ. Ɛɛ, a vooroŋ boɔrɔŋ yaga zaa, kyɛ ka a eŋgane waa bambaala.” 42 Lɛ la ka o da lɛ gaa a boyi soba, a te puoro a yele ka: “N Saa, ka a ŋmanlee ŋaŋ koŋ baŋ pare ma bare, kyɛ ka a fɛre ka N nyu o, lɛ yɛŋ vɛŋ ka ho boɔbo nyɛ eebo.” 43 Oŋ da leɛ wa be a wa nyɛ ba ka ba gbire, bonso ba nimie da paale neŋ la goɔŋ. 44 Azuŋ o da bare baŋ, a kyɛ leɛ gaa ka o te puore a bota soba, o da puoreeŋ a yeli a yelbie na neŋ a zu. 45 Beŋ la oŋ da leɛ wa a potuuribo zie a wa yelko ba ka: “A wagre ŋa tɔ poɔŋ, yɛŋ gbire a pɛnnɛ! Nyɛ! A wagre peɛlɛɛŋ ka ba iri a nensaalaa Bidɔɔ eŋ toŋfatonneba nuureŋ. 46 Yɛ iri ka te gaa. Nyɛ! Neɛ naŋ na iri ma tere na peɛlɛɛŋ.” 47 O da naŋ ba yeli a yɛlɛ baare, nyɛ! ka Gyudase naŋ da e a Pie Neŋ Bayi na kaŋa la a te taa nembeɛoŋ naŋ taa zɔɔzɔɔsɔre ane dabɔlɔ a waana Yezu zie, a ŋmenpuore wedeɛreba ane a nembɛrɛ la da toŋ ba. 48 Neɛ na naŋ na iruu tere na da ko baŋ yelwulaa kaŋa, a yelko ba ka: “Neɛ na zaa maŋ wa mugre, ona la lɛ; yɛ nyɔgoo gɛrɛ neŋ.” 49 Lɛ la ka o da kyɛŋ gaa Yezu zie, a yelkoo ka: “Rabbi! N puoro boŋ” a kyɛ pãã da mugroo. 50 Kyɛ ka Yezu yelkoo ka: “N dɔɔ, bo yɛlɛ hoŋ wa kyɛ?” Beŋ la ka a noba da tage ta a nyɔge Yezu a taa o gɛrɛ neŋ. 51 Kyɛ nyɛ! neɛ na kaŋa naŋ da be Yezu zieŋ na da tagɛɛ o zɔɔzɔɔsoɔ voɔ a de kyɛ neŋ a ŋmenpuore wedeɛrɛ gbaŋgbaa na toori kpɛlle. 52 Ka Yezu yelkoo ka: “Leɛ de ho zɔɔzɔɔsoɔ na eŋ a sɔteɛ poɔŋ, bonso noba na zaa naŋ zɔɔrɔ neŋ zɔɔzɔɔsoɔ, zɔɔzɔɔsoɔ la na ko ba. 53 Kyɛbee ho teɛre ka N koŋ baŋ sɔre N Saa ka o ko ma pampana ŋa malekere sugu sugu gyamaa naŋ pare 12 bee? 54 Ka lɛŋ wa e, sobuo ka a Sɛge-forifori naŋ yelka a yɛlɛ ama zaa na nyɛ la eebo na tu kyɛ nyɛ eebo?” 55 Ana wagre na, Yezu da yelko la a nembeɛoŋ ka: “Yɛ de la zɔɔzɔɔsɔre ane dabɔlɔ waana ka yɛ nyɔge ma aŋa N naŋ waa naŋnyig-kpeɛŋaa bee? Bebiri la bebiri zaa N da maŋ zeŋ la a ŋmenpuoredieŋ a wulo noba, kyɛ yɛ daaŋ ba wa ka yɛ nyɔge ma zaa. 56 Kyɛ a yɛlɛ ŋa zaa nyɛɛ eebo ka lɛ na vɛŋ ka yɛlɛ na a daŋyelba naŋ sɛge biŋ na na nyɛ eebo.” Beŋ la ka a potuuribo zaa da gyɛ o bare kyɛ zo. 57 Noba na naŋ da nyɔge Yezu a le o na da taa o la gaaneŋ Kayefa a ŋmenpuore wedeɛrekpoŋ zie, beŋ ka a sɛgsɛgreba ane a nembɛrɛ da lantaa na. 58 Kyɛ Piita da tagɛɛ o meŋɛ yi fẽẽ a tuuro o puore a te ta a ŋmenpuore wedeɛrekpoŋ davoro na, saŋa na oŋ da te kpɛ a zie poɔ na, o da te zeŋɛɛ zie na a yiri tontonneba naŋ da zeŋ na, a na nyɛ lɛ a yɛlɛ naŋ na te baare. 59 A ŋmenpuore wedeɛreba ane a Sɛrɛɛdiibu Zikpoŋ na noba zaa da boɔrɛɛ zirii sieree a kyaare Yezu, ka lɛ na vɛŋ ka ba toɔ̃ ko o. 60 Kyɛ ba da ba nyɛ kaŋa zaa, aneazaa ka zirii sieree deme yaga da waɛ la a wa yeli yɛlɛ naŋ ba e yelmeŋɛ kyaaroo. A puoreŋ ba bayi mine meŋ da waɛ la 61 ba da yeleeŋ ka: “A dɔɔ ŋa yeleeŋ ka, ‘N na toɔ̃ daa la a Naaŋmen ŋmenpuoredie ŋa lɔɔ, a kyɛ leɛ mɛ o bebie ata poɔŋ.’” 62 Beŋ la ka a ŋmenpuore wedeɛrekpoŋ da iri are a yelkoo ka: “Ho ba taa yelzaa ka o yeli iri a noɔre bee? Azuŋ a yɛlɛ ŋa zaa a noba ŋa naŋ yele kyaara bo ŋa, ho ba wonaa bee?” 63 Kyɛ ka Yezu taŋ o noɔre. Azuŋ ka a ŋmenpuore wedeɛrekpoŋ yelkoo ka: “N de boŋ biŋ pɔre puliŋ a yelmeŋɛ Naaŋmen nimitɔɔreŋ ka ho yelko te, ka hooŋ la a Krista, Naaŋmen Bidɔɔ na, bee hooŋ naane!” 64 Ka Yezu yelkoo ka: “Hooŋ meŋɛ la yele lɛ. Kyɛ maaŋ yele korɔ bo: A yi ŋaaŋ a gɛrɛ, ho na nyɛɛ a Nensaalaa Bidɔɔ naŋ be o kpeɛ̃o nuduluŋ na zieŋ a waana neŋ gyeremɛ a sazu zuŋzugri poɔŋ.” 65 Beŋ la ka a ŋmenpuore wedeɛrekpoŋ da kyeɛre o bonsuurii, a yelka: “O to la Naaŋmen zoma! Bonso aŋ seŋ ka te lɛ zeŋ kyɛnlɛ sieree deme? Yɛ nyɛ! Ma yɛ zaa woŋee lɛ na oŋ to Naaŋmen zoma wɛ. 66 Wala yɛŋ teɛre?” Ba da iree a noɔre ka: “O seŋ nɛɛŋ ka o kpi.” 67 Beŋ la baŋ da tuure nentaare waara o niŋesogɔ, a da maŋ gbuli ba nuure a ŋmɛ o. Ka mine meŋ da maŋ fale o niŋesogɔ, 68 a yele ka: “Ma hooŋ la a Krista wɛ, daŋyele yɛlɛ. Nembuoŋ ŋmɛ bo?” 69 Piita da zeŋ la a yeŋe davoro na poɔŋ, ka pɔgelee kaŋa naŋ da e tontonɔ wa o zie a wa yelka: “Ho meŋ da be la Yezu a Galili neɛ na zie!” 70 Kyɛ oŋ da kyiiri ba zaa nimitɔɔreŋ, a yele ka: “N ba baŋ yɛlɛ na ho naŋ yele.” 71 Saŋa na oŋ da yi gaa a die denoɔre na, pɔgelee kaŋa meŋ da lɛ nyɛ oŋ, a yelko noba naŋ da bebe na ka: “A dɔɔ ŋa da be la Yezu a Naazɛrɛ neɛ na zieŋ.” 72 Beŋ la oŋ da lɛ kyiiri, a pɔrɔ a yelka: “N ba baŋ a dɔɔ ŋa!” 73 A da ba kɔɔre, ka noba naŋ da are be na da wa yelko Piita ka: “Yelmeŋɛ zaa, ho meŋ eɛ ba kaŋa, bonso lɛ na hoŋ yele yɛlɛ na vɛŋɛɛŋ teŋ baŋ lɛ peɛlaaŋ.” 74 Beŋ la oŋ da piili pɔrɔ a yele ka: “N ba baŋ a dɔɔ ŋa!” A tɔntɔbaalɛ ka nɔdaa da koŋ. 75 Ka Piita da leɛteɛre yɛlɛ na Yezu naŋ yelkoo ka: “Sɛre ka nɔdaa na koŋ, ho na zagre maŋ gbɛre bota.” Oŋ daaŋ yi yeŋe a te koŋ haali.