Matio

2 Saŋa na baŋ da dɔge Yezu Bɛtelɛhɛm naŋ be Gyudiya paaloŋ poɔŋ Hɛrɔde naaloŋ diibu bebie na puoreŋ, nyɛ! ŋmarbi-kaareba da yi la Sapare sɛŋ a wa Gyɛruzɛlɛm, 2 a yele ka: “Yenee baŋ dɔge neɛ na naŋ waana ka o e a Gyuumine naa na? Bonso te nyɛɛ o ŋmarbiri saŋa na teŋ be Sapare sɛŋ na, azuŋ te waaɛŋ ka te wa gbi-dumo o nimitɔɔreŋ.” 3 Saŋa na Naa Hɛrɔde naŋ wa woŋ a yɛlɛ ŋa na, dabeɛ̃ da kpɛ oŋ yaga ane a Gyɛruzɛlɛm noba zaa. 4 O da boɔlɛɛ a ŋmenpuore wedeɛreba ane a sɛgsɛgreba zaa lantaa, a soore ba ka yenee baŋ na dɔge a Krista. 5 Ka ba yelkoo ka: “Bɛtelɛhɛm naŋ be Gyudiya paaloŋ poɔŋ, bonso ŋaa la ka ba tu a daŋyele zie a sɛge: 6 ‘Hooŋ, Oo Bɛtelɛhɛm naŋ be Gyudiya paaloŋ, ho eɛ teŋɛ naŋ e fẽẽ yaga a yi Gyuuda wedeɛreba na poɔŋ, ho poɔŋ la ka a wedeɛrɛ na yi wa, ona la na kyeenɛ N noba naŋ e a Izerayɛl biiri.’” 7 Beŋ la ka Hɛrɔde da sɔgle boɔle a ŋmarbi-kaareba lantaa a mãã o meŋɛ a soorɔ ba nimizeɛ̃ a boɔrɔ ka o baŋ saŋa na a ŋmarbiri naŋ yi. 8 Saŋa na oŋ da toŋ ba ka ba gaa Bɛtelɛhɛm na, o da yelko baŋ ka: “Yɛ gaa te mãã yɛ menne bɔ a bie zie soŋ, ka yɛneeŋ wa nyɛ o, yɛ vɛŋ ka a duoro ta ma ka N meŋ gaa te gbi-dumo o nimitɔɔreŋ.” 9 Saŋa na baŋ da kyɛlle woŋ a naa yɛlɛ baare na, ba da yi la be a gaa, nyɛ! a ŋmarbiri na baŋ da nyɛ saŋa na baŋ da be a Sapare sɛŋ na da de la ba weɛ a te are die na a bie naŋ be na sazuŋ. 10 Saŋa na baŋ da nyɛ a ŋmarbiri na, ba poore zaaŋ da pɛle yaga zaa. 11 Saŋa na baŋ da te kpɛ a die poɔŋ na, ba da nyɛɛ a bie ne o ma Mareya, baŋ da le vɔgle teŋɛŋ, a gbi-dumo o nimitɔɔreŋ. Ba da yuoree ba bonnanɛɛ wuore a de kyɔɔtaare a koo—salema ane frankinsɛnse ane mɛɛ. 12 Kyɛ, Naaŋmen da ko baŋ kpããmo gaŋ-zannoo poɔŋ ka ba ta wa leɛ gɛrɛ Hɛrɔde zie, azuŋ ba da leɛ tu la so-yuo a gaa ba teŋɛ. 13 Saŋa na baŋ da wa gaa baare na, nyɛ! Jehoova maleke da wa la Gyoosɛf zie gaŋ-zannoo poɔŋ, a yelkoo ka: “Vaa iri, de a bie ne o ma a zo gaa Igyipiti paaloŋ, kpeɛrɛ beŋ a te ta saŋa na maŋ na yeli yɛlɛ ko bo, bonso Hɛrɔde naraŋ ka o bɔ a bie zie a iri o nyɔvore.” 14 Azuŋ Gyoosɛf da ireeŋ a de a bie ne o ma a gaaneŋ Igyipiti paaloŋ zisoɔree saŋa. 15 O da te kpeɛrɛɛ be a te ta saŋa na Hɛrɔde naŋ wa kpi. Lɛ vɛŋɛɛŋ ka yɛlɛ na Jehoova naŋ tu o daŋyele zie kyɛ yeli na nyɛ eebo, o da yeleeŋ ka: “A yi Igyipiti paaloŋ poɔŋ maŋ boɔle N bidɔɔ.” 16 Saŋa na Hɛrɔde naŋ wa nyɛ ka a ŋmarbi-kaareba bɛnloo na, o suuri da ireeŋ yaga zaa, azuŋ o da toŋɛɛŋ ka ba te ko bidɔɔ-bilii na zaa naŋ da ta yuomo ayi kyɛ sigre naŋ be Bɛtelɛhɛm ane o teŋ-bilii na zaa pooreŋ, aŋa wagre na oŋ da mãã o meŋɛ kyɛ peɛre yi a ŋmarbi-kaareba zieŋ na. 17 Lɛ da vɛŋɛɛŋ ka yɛlɛ na baŋ da tu daŋyele Gyeremaiya zie kyɛ yeli na nyɛ eebo, o da yeleeŋ ka: 18 “Ba woŋ la kɔkɔre kaŋa Reema poɔŋ, o da ŋmeɛrɛɛ kpɛle a kono hiine. Reekyel la kono o bibiiri zuŋ, a ba sagra ka ba dii o sukyiri, bonso ba ba lɛ kyebe.” 19 Saŋa na Hɛrɔde naŋ wa kpi na, nyɛ! Jehoova maleke da iree o meŋɛ wuli Gyoosɛf gaŋ-zannoo poɔŋ saŋa na oŋ da naŋ be Igyipiti paaloŋ poɔŋ 20 a yelka: “Vaa iri, de a bie ne o ma a gaaneŋ Izerayɛl teŋɛ poɔ, bonso noba naŋ boɔrɔ ka ba ko a bie na kpieŋ.” 21 Azuŋ o da iri de la a bie ne o ma gaaneŋ a Izerayɛl teŋɛ poɔ. 22 Kyɛ saŋa na oŋ da woŋ ka Akeeliyus la leɛre o saa Hɛrɔde gbɛbɔgriŋ a kaara Gyudiya na, o da zoree dabeɛ̃ ka o gaa be. Ane meŋ, Naaŋmen naŋ da koo kpããmo gaŋ-zannoo poɔŋ zuŋ, o da leɛ gaa la Galili teŋɛ poɔ. 23 O da wa zeŋ la teŋɛ kaŋa baŋ boɔlɔ ka Naazɛrɛ, ka lɛ na vɛŋ ka yɛlɛ na a daŋyele naŋ da yeli na na nyɛ eebo: “Ba na boɔlooŋ ka Naazɛrɛ neɛ.”