Yieme
10 Oo Jehoova, bonso hoŋ te are tɔɔre zaa? Bonso hoŋ de ho meŋɛ sɔgle saŋa na maŋ wa be awonaa poɔŋ? 2 Neŋfaare maŋ wulee ba menne, azuŋ ba maŋ digree noba naŋ ba taa sonnɔ zaa, Kyɛ ba na nyɔgooŋ o meŋɛ daware yɛlɛ poɔŋ. 3 Neŋfaa maŋ de la o meŋɛ vɔlfaare erɛ neŋ pɔloo A de maaloo ko bombɔ-gaŋne soba; O ba korɔ Jehoova gyeremɛ. 4 O taŋkaŋyɛlɛ zuŋ, neŋfaa ba maŋ peɛre yɛlɛ gaa tɔɔre; O teɛroŋ zaa la ka: “Naaŋmen ba kyebe.” 5 O so-kyenee zaa maŋ nyɛrɛɛ nimitɔɔre gaabo, Kyɛ ho sɛrɛɛ ŋmaabo zuo la o yɛlɛ bammo; O maŋ eɛ o dɔndɔnne zaa la. 6 O maŋ yelee o sukyiriŋ ka: “N daaŋ koŋ zigri zaa; A yi dɔge-tutaa zaa naŋ waana kyɛ gɛrɛ poɔŋ N daaŋ koŋ tuore dɔgroŋ zaa.” 7 O noɔre zaaŋ paale ne pɔre, zirii, ane fuubo; Yeltuo ane yɛlɛ naŋ na baŋ pere neɛ be la o zele poɔŋ. 8 O maŋ sɔgle peɛlɛɛ noba kpɛ-ziiriŋ a kyɛnlɛ; O maŋ be la o sɔglezie naŋ a ko neɛ naŋ ba taa sããna zaa. O nimie maŋ kaara boɔrɛɛ neɛ naŋ ba boɔrɔ yɛlɛ. 9 O maŋ be la o sɔglezie na a kyɛnlɛ aŋa gbegni naŋ be o bɔge poɔŋ. O maŋ kyɛnlɛŋ ka o nyɔge noba naŋ ba taa sonnɔ zaa. Ka o naŋ wa tage o zon-kyɔgi, o maŋ nyɔgɛɛ noba naŋ ba taa sonnɔ zaa. 10 O maŋ ŋmorɛɛ o soba, a vɛŋ oŋ le gbi-dumo; O maŋ nyɔgɛɛ neɛ naŋ ba boɔrɔ yɛlɛ na kpeɛŋaakpeɛŋaa. 11 O maŋ yelee o sukyiriŋ ka: “Naaŋmen innee a yɛlɛ. O leɛ la o nimie yi a eŋɛŋ. O daaŋ koŋ nyɛ a zaa.” 12 Vaa iri, Oo Jehoova. Oo Naaŋmen, zɛge ho nu. Ta inni noba naŋ ba taa sonnɔ na yɛlɛ. 13 Bonso ka neŋfaa ba korɔ Naaŋmen gyeremɛ? O maŋ yelee o sukyiriŋ ka: “Ho koŋ kaa a yɛlɛ ŋa zuŋ a di N sɛrɛɛ.” 14 Kyɛ ho maŋ nyɛrɛɛ yeltuore ane yelwonii. Ho maŋ nyɛ aŋ a e yelkaŋa kyaaraa. Hooŋ la ka noba naŋ ba boɔrɔ yɛlɛ maŋ kaara ka ho soŋ ba; Hooŋ la bikpeeba sonnɔ. 15 Kɔɔre neŋfaare ane tonfatonneba kpaŋkpama, Ka lɛ vɛŋ ka hooŋ wa boɔrɔ o faaloŋ na, Ho koŋ lɛ nyɛ a. 16 Jehoova eɛ Naa a gɛrɛ wagre naŋ ba taa baaroo. A paalonne bɔrɛɛŋ a teŋgane zuŋ. 17 Oo Jehoova, kyɛ ho na kyɛlle woŋee noba naŋ sigri ba menne sɔroo. Ho na vɛmeŋ ka ba sukyie e kpeɛne, a kyɛ kaara ba zieŋ velaa zaa. 18 Ho na deɛ la bikpeere ane noba baŋ ŋmore yɛlɛ a di sɛrɛɛ ko ba, Ka lɛ vɛŋ ka nensaalaa naŋ na baŋ kpi koŋ lɛ e ka dabeɛ̃ kpɛ ba.