Matio

3 A lɛ bebie na poɔŋ Gyɔɔn naŋ korɔ noba Suobu da gaa la Gyudiya wɛgyɛŋ na poɔŋ a te moɔlɔ duoro korɔ noba, 2 a yele ka: “Yɛ leɛre yɛ eebo, bonso a sazu Naaloŋ na peɛlɛɛŋ.” 3 Yelmeŋɛ zaa, o yɛlɛ ka daŋyele Aizeeya da yeli saŋa na oŋ da sɛge a yelbie ŋa na: “Neɛ kaŋa be la a wɛgyɛŋ poɔŋ a de kɔkɔkpeɛŋaa a boɔlɔ: ‘Nare Jehoova sori na! Vɛŋ ka o soe zaa tori.’” 4 Gyɔɔn da su la kparoo ba naŋ de boŋtaŋ kɔɔloŋ maale ne a kyɛ seɛ bɛlɛŋte ba naŋ de duŋo gane maale ne. O bondirii da eɛ sɛllensobo ane seere. 5 Ka Gyɛruzɛlɛm noba ane noba na zaa naŋ da be Gyudiya ane a teŋbilii na zaa naŋ ŋmaa gyeere a Gyɔɔdan da waana o zie, 6 o da korɔ baŋ suobu a Gyɔɔdan Baa koɔ̃ na poɔŋ, ba da maŋ yi la ba sukyie pooreŋ a kyiiree ba yelfaare. 7 Saŋa na oŋ da wa nyɛ a Faraziimine ane a Sadusiimine yaga zie zaa naŋ waana a suobu deebo zie, o da yelko baŋ ka: “Yɛnee duŋ-kuuree biiri, nembuo la kpãã yɛ ka yɛ zo yi a sutuloŋ naŋ waana yɛ zuŋ na? 8 Azuŋ yɛ wɔŋ wɔn-veɛle naŋ wuli ka yɛ eɛ kandabaŋkalɛ. 9 Yɛ daŋ ta wa teɛre a yele korɔ yɛ menne ka, ‘Aboraham la te sããkoma.’ Maaŋ yele korɔ yɛ, Naaŋmen na baŋ iree biiri yi a kubo ŋa poɔŋ a ko Aboraham. 10 A lare biŋee a teere nyagaŋ. Azuŋ teɛ zaa naŋ ba wɔnɔ wɔn-veɛle, ba na ŋmaa o la a de lɔɔ eŋ vũũ poɔ. 11 Maaŋ yɛŋ, N korɔ yɛ suobu yɛ naŋ e kandabaŋlɛ zuŋ, kyɛ soba na naŋ na tu N poureŋ wa na taaɛ kpeɛ̃o gaŋ ma, N gba ba seŋ neŋ ka N fo o nɔɔteɛ. Ona la na de a vooroŋ soŋ ane vũũ ko yɛ suobu. 12 O kayeɛl-sɔbule be la o nu poɔ, o na peerɛɛ o kayeɛle zie na velaa zaa a kyɛ wore o kyi na te eŋ o bugo poɔŋ, kyɛ o na nyegɛɛ a ka-uri neŋ vũũ naŋ daŋ koŋ baŋ kpinni poɔŋ.” 13 Ka Yezu da yi Galili a gaa Gyɔɔn zie a Gyɔɔdan baa naŋ, o da gaaɛ be ka Gyɔɔn te koo suobu. 14 Kyɛ Gyɔɔn da ba sage ka o koo a suobu, kyɛ yelka: “Hooŋ la seŋ ka ho ko ma suobu, kyɛ ka ho leɛ waana N zie ka N ko bo suobu?” 15 Ka Yezu yelkoo ka: “Vɛŋ ka a e a lɛ a wagre ŋaŋ, bonso a tuuro a sori ŋa poɔŋ la ka te na tu kyɛ vɛŋ ka yelzaa nyɛ eebo sontuubu soriŋ.” Beŋ la ka Gyɔɔn da sage ka o koo a suobu. 16 Saŋa na oŋ da de Yezu muŋli a koɔ̃ poɔŋ a koo a suobu baare na, ka Yezu da wa yi a koɔ̃ muniŋ; nyɛ! ka sazu daaŋ yuo, oŋ da nyɛ Naaŋmen vooroŋ soŋ naŋ sigre waana aŋa na-ŋmanee a wa are o zuŋ. 17 Nyɛ! Kɔkɔre kaŋa meŋ da yi la sazu a yele: “N Bidɔɔ la ŋa, N nɔnɛɛ o yɛlɛ soŋ, N poɔ pɛle neŋ o la yaga.”