Luka

15 A zuyɔɔderebɛ ane a toŋfatonneba da ŋmaa gyeerɛɛ Yezu a na kyɛlle woŋ yɛlɛ na oŋ yele. 2 Ka a Faraziimine ane a bege wulwuliba da ŋmoonɔ a yele: “A dɔɔ ŋa terɛɛ sori ka toŋfatonneba maŋ wa o zie, ka o ne ba maŋ laŋ di bondirii meŋ.” 3 Beŋ la ka Yezu da manne yelmannaa kaŋa ko ba, ŋaaŋ oŋ da yel: 4 “Nembuo la be yɛ poɔŋ a na taa peere 100, ka bonyeni bɔre ka o koŋ bare a peere 99 a wɛgyɛŋ poɔŋ a kyɛ gaa te bɔ a pere bonyeni naŋ bɔre na a te ta saŋa na oŋ na nyɛ o? 5 Ka o naŋ wa nyɛ o, o maŋ de oŋ pare o bɔge zuŋ a kyɛ taa popeɛloŋ yaga zaa. 6 Ka o naŋ ta die, o maŋ boɔlɛɛ o zɔmenne ane noba naŋ kpeɛrɛ peɛloo lantaa a yelko ba ka, ‘Yɛ e ka te zaa laŋ kyillɛ, bonso N nyɛɛ N pere na naŋ bɔre na.’ 7 N yele korɔ yɛŋ ka, lɛ neŋ o zu ka popeɛloŋ maŋ be sazuŋ saŋa na neŋfaa bonyeni naŋ wa leɛre o eebo a gaŋ noba naŋ e sontuuribo 99 a naŋ ba ferɛ ka ba leɛre ba eebo.