Yiibu

32 A lɛ saŋa na, a noba da wa nyɛɛŋ ka Moosis kɔɔrɛɛŋ yaga zaa a taŋazuŋ. Azuŋ a noba da ŋmaa gyeerɛɛ Eeroŋ a yelkoo ka: “Iri, a maale ŋmene a ko te ka o derɛ te weɛ, bonso te ba baŋ bon naŋ pɔge Moosis, a dɔɔ na naŋ de te weɛ a yineŋ Igyipiti paaloŋ na.” 2 Beŋ la ka Eeroŋ yelko ba ka: “Yɛ iri salema to-kpama naŋ be yɛ pɔgeba toboŋ, a de salema yi yɛ bidɔba ane yɛ pɔgeyaare zieŋ a wa ko ma.” 3 Azuŋ a noba daaŋ piili iree a salema to-kpama a yi ba toboŋ a de a wa ko Eeroŋ. 4 Oŋ daaŋ deɛ a salema yi ba zieŋ a nyɛlaa, a de tontoŋ bon maale nalee bonmeɛraa kaŋa. Beŋ la baŋ piili yele ka: “Yɛ Naaŋmen la ŋa, Oo Izerayɛl, onaŋ de yɛ weɛ a yineŋ Igyipiti na.” 5 Saŋa na Eeroŋ naŋ wa nyɛ lɛ na, o da maalɛɛ sareka irizie o nimitɔɔreŋ. Ka Eeroŋ da piili yele korɔ a noba ka: “Bieu eɛ tigri a ko Jehoova.” 6 Azuŋ, zie naŋ da wa nyaa, ba da iree beguu-pipi a piili ire sareka nyegruu ane maaroŋ sarekare. A lɛ puoreŋ a noba da zeŋɛɛŋ a di bondirii a kyɛ nyu. Beŋ la baŋ daaŋ iri pɛle ba niŋe. 7 Beŋ la ka Jehoova da yelko Moosis: “Sigi gaa, bonso ho noba na, bana hoŋ de neŋ weɛ yineŋ Igyipiti na, sããŋɛɛ ba menne. 8 Ba lonnee wieoŋ a zagre sori na maŋ wuli ba ka ba tuuro na. Ba maalɛɛ nalee bonmeɛraa kaŋa ko ba menne, ba maŋ gbi la dumo a puoruu, a kyɛ ire sarekare meŋ koroo, a yele, ‘Yɛ Naaŋmen la ŋa, Oo Izerayɛl, onaŋ de yɛ weɛ a yineŋ Igyipiti na.’”