Aŋ Mine La Ho Zɔmenne Intanɛt Zuŋ?

Zɔmeŋɛ la “neɛ naŋ yi nɔmmo poɔŋ a de o meŋɛ mare bo bee a de bo tegroŋ yaga zaa.” Aŋa mannoo poɔŋ, saŋa na Deevid naŋ da ko Golaiyat baare na, Joonataŋ neŋ Deevid da nyɔgɛɛ taa zɔmennoŋ naŋ e kpeɛŋaa yaga zaa. (1Sa 18:1) Ba zaa da taaɛ gyogri naŋ vɛŋ baŋ nɔnɔ taa. Azuŋ, zɔmennoŋ naŋ e kpeɛŋaa maŋ arɛɛ yelmeŋɛ bammo eŋɛŋ. A maŋ de la wagre neŋ mɔɔbo yaga sɛre hoŋ na wa baŋ neɛ kaŋa soŋ. Kyɛ, intanɛt zuŋ yɛŋ, ka hooŋ kliki zie kaŋa dayeni yoŋ, ho neŋ neɛ kaŋa na toɔ̃ eɛ “zɔmenne.” Intanɛt zuŋ, noba maŋ kaa iree yɛlɛ ba naŋ boɔrɔ ka ba yele, ba maŋ tu la sori kaŋa meŋ poɔŋ a wuli teɛroŋ naŋ seŋ ka noba taa kyaare ba. Lɛ maŋ vɛmeŋ aŋ e mɔlɔ ka ba sɔgle ba gyogo meŋɛmeŋɛ. Azuŋ, aseŋ ka ho maŋ teɛre yɛlɛ gaa tɔɔre sɛre kyɛ nyɔge neɛ kaŋa zɔmennoŋ intanɛt zuŋ. Ka neɛ kaŋa hoŋ ba baŋ wa boɔrɔ ka yɛ e zɔmenne intanɛt zuŋ, ta zoro dabeɛ̃ ka ka hooŋ zagre o zɔmmenoŋ na o poɔ na saameŋ. Noba mine naŋ baŋ ka ba na toɔ̃ nyɛɛ zɔmeŋ faare intanɛt zuŋ na, ba ba de a intanɛt zɔmennoŋ ziiri ŋa tonɔ neŋ toma. Kyɛ, ka hooŋ de a intanɛt toma ziiri ŋa tonɔ neŋ toma, bo yɛlɛŋ seŋ ka a be ho teɛroŋ poɔŋ?

KAA A VIDIO ŊA, DE INTANƐT TONA TOMA YƐŊ POƆŊ, KYƐ PÃÃ IRI A SOOREBIE ŊA NƆƐ:

• 

  Bo yɛlɛŋ seŋ ka ho teɛre gaa tɔɔre sɛre kyɛ sɛge yɛlɛ bee a de ho fotori eŋ intanɛt zuŋ?

• 

  Bonso aŋ fɛre ka ho maŋ kaa iri ho intanɛt zu zɔmenne soŋ?

• 

  Bonso aŋ seŋ ka ho kaara wagre na hoŋ maŋ de intanɛt tonɔ toma na soŋ?​—Ef 5:15, 16