Taa Sagediibu Ka Ho Na Nyɛɛ Faabo A Donɛɛ Baaroo Saŋa

A koŋ kɔɔre Jehoova kannyiri na baareŋ ka o sãã neŋfaare zaa. Ba na sãã la zirii puoruu, a paalonne noba na laŋɛɛ noɔre a wa ka ba zɔɔ neŋ Naaŋmen noba. Beŋ la ka Jehoova na sãã neŋfaare zaa kpɛlɛŋkpɛlɛŋ Hammagedon zɔɔre na poɔŋ. Kristabiiri kaarɛɛ soriŋ ka ba na nyɛɛ a yelnimizeere ŋa naŋ na nyɛ eebo nendaare kaŋa na.

Yelmeŋɛ la, te ba baŋ yɛlɛ na zaa naŋ na e a dɔgroŋ kpoŋ saŋa. Aŋa mannoo poɔŋ, te ba baŋ bebiri na meŋɛ a dɔgroŋ kpoŋ naŋ na piili. Te ba baŋ bon naŋso a donɛɛ namine naŋ na teɛre ka a na somaŋ ka ba wa zɔɔ neŋ Naaŋmen noba. Te ba baŋ lɛ a zɔɔre naŋ na kɔɔre seŋ, ane lɛ baŋ na e te a zɔɔre saŋa. Te ba baŋ sori na meŋɛ Jehoova naŋ na tu kyɛ sãã a neŋfaare Hammagedon zɔɔre na saŋa.

Kyɛ, a Baabole wuli teŋ yelzaa naŋ na toɔ̃ vɛŋ ka te taa nyaa ane sagediibu ka te na nyɛɛ faabo ana saŋa na. Aŋa mannoo poɔŋ, te baŋɛɛŋ peɛlaaŋ ka te be la a donɛɛ baaroo “bebi-baare saŋa.” (2Ti 3:1) Te baŋɛɛŋ ka ba na “ŋmaa” la zɔɔre na a paalonne namine naŋ na wa ka ba zɔɔ neŋ Naaŋmen noba na ŋmaaŋmaa, ka lɛ vɛŋ ka ba ta toɔ̃ sãã yelmeŋɛ puoruu. (Mt 24:22) Te baŋɛɛŋ ka Jehoova na faa la o puorebiiri. (2Pi 2:9) Te baŋɛɛŋ meŋ ka Neɛ na Jehoova naŋ kaa iri ka o sãã a neŋfaare a kyɛ go a nembeɛoŋ na e la neɛ naŋ taa kpeɛ̃o yaga a kyɛ nɔŋ mennoŋ meŋ.​—Yel 19:11, 15, 16.

Nendaare kaŋa, yɛlɛ naŋ na e a teŋɛzuŋ na vɛmeŋ ka noba ‘yĩĩe ne dabeɛ̃.’ Kyɛ, ka teneeŋ kanne a Baabole a nyɛ lɛ Jehoova naŋ da faa o puorebiiri, ane yɛlɛ na zaa o naŋ wuli te na, a teɛre a yɛlɛ gaa tɔɔre, a na soŋ teŋ ka “[te] iri are, a zɛge [te] zuri,” bonso, a te faabo saŋa peɛlɛɛ la.​—Lk 21:26, 28.