Yelbebe Sudi Da Bebeŋ Sɛre Kyɛ Ka A Yɔɔdeɛbo Wa

Yezu yɔɔdeɛbo sareka na yoŋ eŋɛŋ teŋ na baŋ tu kyɛ nyɛ te yelbebe sudi. (Efe. 1:7) Kyɛ a Baabole yeleeŋ ka: “[Naaŋmen] kannyiri zuŋ la ka O da di suuri ko nensaaleba yelbebe zaa ba naŋ da e,” sɛre kyɛ ka Yezu wa kpi a ko te a yɔɔdeɛbo. (Uro. 3:25) Ananso la wala teŋ na baŋ yelka Jehoova di la suuri ko noba sɛre ka a yɔɔdeɛbo wa, kyɛ naŋ e dantorii Naaŋmen?

Jehoova da eŋɛɛ noɔre ka o na vɛŋeŋ ka neɛ kaŋa wa faa nensaaleba zaa naŋ na sagoo ane o nɔ-ennee zaa di. Azuŋ saŋa na Naaŋmen naŋ da eŋ a lɛ noɔre ŋa na, a da waa ŋa oŋ de a yɔɔdeɛbo ko nensaaleba. (Mun. 3:15; 22:18) Naaŋmen da baŋɛɛ peɛlaaŋ ka a wagre naŋ seŋ neŋ poɔŋ, o Bidɔɔ yeni na yi la o poɔ zaa a wa kpi a ko nensaaleba a yɔɔdeɛbo. (Gal. 4:4; Hib. 10:7-10) Saŋa na Yezu naŋ da be a donɛɛ zuŋ aŋa Naaŋmen gbɛbogi-ara na, Naaŋmen da kooŋ kpeɛ̃o ka o maŋ di suuri ko noba sɛre kyɛ oŋ pãã kpi a yɔɔ a yɔɔdeɛbo. Yezu da maŋ di la suuri ko noba naŋ taa sagediibu bonso, o da baŋɛɛŋ ka o sareka na oŋ waana ka o iri na na pɔgɛɛ ba yelbebe zaa.​—Mat. 9:2-6.