Yɛlɛ Noba Naŋ Kanna Te Gama Naŋ Maŋ Soorɔ
Nembobo la “a malekere ba naŋ kaa-iri” ka 1 Timoti 5:21 yel ba yɛlɛ na?
A bitontona Pɔɔl da sɛgɛɛ lɛtɛ ko Timoti a yelka: “N Kpããna ho la a Naaŋmen ane a Krista Yezu ane a malekere ba naŋ kaa-iri niŋesogɔŋ, ka ho tuuro a wuluu ama a ta [wɛlɛ taa], a ta erɛ yelzaa ne nɔnne.”—1 Tim. 5:21.
Ka teneeŋ na toɔ̃ baŋ a malekere ŋa yɛŋ aseŋ ka te baŋ malekere na naŋ ba poɔ a malekere ŋa poɔŋ. Nɔkpeɛne zaa kyebe ka a noba 144,000 na ba poɔ a malekere ŋa poɔŋ. Saŋa na Pɔɔl naŋ da sɛgrɛ a lɛtɛ korɔ Timoti na, noba na baŋ sɔ ba naaloŋ kãã na kaŋa zaa da naŋ ba gaa sazu sɛre. A bitontonee ane bana na zaa baŋ da sɔ ba naaloŋ kãã na da naŋ eɛ nensaaleba ba da naŋ ba e vooroŋ poɔ noba, azuŋ ba da koŋ baŋ e “a malekere ba naŋ kaa-iri” na.—1 Kor. 15:50-54; 1 Tɛs. 4:13-17; 1 Gyn. 3:2.
Ane meŋ, “a malekere ba naŋ kaa-iri” na koŋ baŋ e a malekere na naŋ da e tokpeɛne a Kɔmpiiri saŋa na. A malekere ŋa da arɛɛ Setaana puoriŋ ka lɛ vɛŋ baŋ wa leɛ malekefaare, a leɛ Yezu dɔndɔnne meŋ. (Mun. 6:2; Luk. 8:30, 31; 2 Pit. 2:4) Nendaarekaŋa naŋ waana poɔŋ, ba na nyɔge baŋ eŋ a bogi zuluŋ naŋ ba taa baaraa poɔŋ yuomo 1,000. Lɛ puoriŋ ba neŋ a Dɛɛvul zaaŋ na nyɛ saammo.—Gyud. 6; Yel. 20:1-3, 10.
Azuŋ “a malekere ba naŋ kaa-iri” ka Pɔɔl yel ba yɛlɛ na eɛ malekere naŋ be sazuŋ a tonɔ toma sonnɔ “Naaŋmen ane . . . Krista Yezu,” a lɛ sɛgre na boɔlɛɛ Naaŋmen ane Krista Yezu meŋ.
Malekere turi yaga yaga la bebe a dire yelmennoŋ korɔ Jehoova. (Hib. 12:22, 23) A waa ŋa a malekere kaŋa zaa maŋ taa la toma na Jehoova naŋ koo ka o tonɔ. (Yel. 14:17, 18) Aŋa mannoo poɔŋ, Jehoova daŋ toŋ la maleke bonyeni ka o gaa te ko Asiiriya sogyare naŋ ta 185,000. (2 Nam. 19:35) Kyɛ aminekaŋaŋ, malekere yaga ka Jehoova na toŋ ka ba “wa gbaale banaŋ zaa naŋ erɛ ka noba erɛ yelbebe ane yelbe-erebɛ zaa yi ne a [Yezu] Naaloŋ poɔ.” (Mat. 13:39-41) Kaapɔge o na toŋ la ba mine meŋ ka ba wa “boɔle a o neŋkaa-iri zaa lantaa” a do neŋ sazu. (Mat. 24:31) O maŋ toŋ la ba mine meŋ ka ba ‘kaara te zu te soe zaa poɔŋ.’—Yiem. 91:11; Mat. 18:10; de manne Matio 4:11; Luka 22:43.
“A malekere ba naŋ kaa-iri” ka 1 Timoti 5:21 yel ba yɛlɛ na, aminekaŋaŋ ba eɛ malekere Jehoova naŋ toŋ ka ba soŋ a kaara a lantaapuoruu zu. A sɛgre poɔŋ, Pɔɔl da terɛɛ kawane a kyaare lɛ a nembɛrɛ naŋ seŋ ka ba tonɔ ba ferebo toma na, a kyɛ yelka a lantaapuoruu deme taa gyeremɛ ko a lantaapuoruu nembɛrɛ. Pɔɔl da yeleeŋ ka a ba seŋ ka a nembɛrɛ taa ‘wɛltaa’ gyogo bee a erɛ “nɔnne,” a maŋ teɛre yɛlɛ meŋ soŋ sɛre kyɛ derɛ gbɛre zaa. Ananso a naŋ e nimizeɛ ka ba de Pɔɔl kawane na toŋ neŋ toma la ka, ba tonɛɛ ba toma na “Naaŋmen ane a Krista Yezu ane a malekere ba naŋ kaa-iri niŋesogɔŋ.” Azuŋ a pɛlɛɛŋ ka a malekere mine bebeŋ ka Naaŋmen toŋaa ka ba sonnɔ kaara a lantaapuoruu zu. Toma na mine ba naŋ maŋ tonɔ la ka, ba maŋ go la a lantaapuoruu, a kaara a naaŋ moɔloo toma zu, a kyɛ maŋ te manne yɛlɛ na ba naŋ nyɛ na ko Jehoova.—Mat. 18:10; Yel. 14:6.