Ba Iree Te Yɔɔdɔba Bayi Baŋ Wa Poɔ A Lantaa Zukaareba Poɔŋ

OCTOBER 5, 2024, ba da terɛɛ moɔlɔ kaŋa naŋ e o yoŋ te yuoni zaa Lantaa Zukaareba lammo na zieŋ. Ba da yeleeŋ ka ba kaa iree te Yɔɔdɔba Jody Jedele ane Jacob Rumph ka ba wa poɔ Jehoova Sieree Deme Lantaa Zukaareba na poɔŋ. Te yɔɔdɔba ŋa de la yuomo yaga a puore neŋ Jehoova yelmennoŋ poɔŋ.

Missouri teŋkpɛŋ naŋ be U.S.A. paaloŋ baŋ dɔge te Yɔɔdɔɔ Jedele. A yelmeŋɛ poɔŋ ka o dɔgreba guoluu. Jehoova Sieree Deme yaga da ba kye zie na o neŋ o booree deme naŋ da kpeɛrɛ na. Azuŋ, te yɔɔmine naŋ yi ziiri tɛɛtɛɛ da maŋ waɛ be ka ba wa soŋ a naaŋ moɔloo toma. Lɛ na baŋ da taa nɔmmo neŋ noɔreyeni na da emooŋ faŋa yaga zaa. Azuŋ, saŋa na oŋ da naŋ e baapaalaa na, o da deɛ suobu October 15, 1983. O da nɔŋɛɛ a naaŋ moɔloo toma soŋ, azuŋ saŋa na oŋ wa baare sakuu na, o da piilee a regular paaneɛ toma September 1989.

Te Yɔɔdɔɔ Jedele baapaaloŋ saŋa, o dɔgreba da maŋ de la o neŋ o yɔɔpɔge poɔ ba eŋɛŋ a gaaneŋ Bɛɛtil baŋ te nyɛ be. Lɛ da vɛŋɛɛŋ ka ba biiri na de biŋ ba nimitɔɔreŋ ka ba boɔrɔŋ ka ba te tonɔ toma Bɛɛtiliŋ. Ba zaa bayi da nyɛɛ apoɔsori a gaa te tonɔ toma Bɛɛtiliŋ. September 1990 baŋ toŋboɔle te Yɔɔdɔɔ Jedele ka o wa tonɔ toma Bɛɛtil naŋ be Wallkill na. O da piili tonɛɛ a Zie Meeloo Tomazie, kyɛ a puoriŋ o da leɛ tonɛɛ a Laafeeloŋ Yɛlɛ Tomazie.

Ana saŋa na, lantaapuoree mine da bebeŋ baŋ yele Spain kɔkɔre. Noba yaga da waanɛɛ a lantaapuoree ŋa poɔŋ, azuŋ ba da boɔrɔŋ ka te yɔɔdɔba na mine wa soŋ ba. Te Yɔɔdɔɔ Jedele da gaaɛ a lantaapuoruu kaŋa ka o te soŋ ba. O da piili zannɛɛ a Spain kɔkɔre. A da ba kɔɔre kyɛ oŋ nyɛ te yɔɔpɔge kaŋa naŋ e paaneɛ a be o gbandige na poɔŋ. O yuori la Damaris. Ba da kulee taa, ka Damaris wa poɔ o eŋɛŋ baŋ tonɔ toma Bɛɛtiliŋ.

Yuoni 2005 ba da yi la Bɛɛtil ka ba te kaa ba dɔgreba naŋ puoro Jehoova. Ana saŋa na, ba da tonɛɛ a regular paaneɛ toma. Te Yɔɔdɔɔ Jedele da maŋ soŋeŋ baŋ de wuluu ko paaneere a Paaneɛ Toma Sakuu poɔŋ. O da tonɛɛ a Hospital Liaison Committee naŋ da be o gbandige na, ane a Regional Building Committee toma.

Yuoni 2013, ba da lɛ toŋboɔlɛɛ te Yɔɔdɔɔ ane te Yɔɔpɔge Jedele ka ba wa Bɛɛtil a wa soŋ a Warwick meɛbo toma na. Ba lɛ toŋɛɛ toma Patterson ane Wallkill zaa. Te Yɔɔdɔɔ Jedele lɛ toŋɛɛ toma a Local Design/Construction Tomazie ane a Hospital Information Services. March 2023, ba da kaa iruuŋ ka o e a Sɛvis Komitii sonnɔ kaŋa. Saŋa na te Yɔɔdɔɔ Jedele naŋ wa teɛre toma na zaa oŋ toŋ Jehoova puoruu poɔŋ na, o yeleeŋ ka: “Ka ba naŋ wa de toŋpaala eŋ ho nuuriŋ, a na baŋ vɛŋeŋ ka dabeɛ̃ kpɛ bo. A saŋa aŋ seŋ ka ho maŋ leɛteɛre ho meŋɛ ka aseŋ ka ho dɛle Jehoova, bonso o na baŋ vɛŋeŋ ka yɛlɛ zaa o naŋ boɔrɔ nyɛ eebo.”

California teŋkpɛŋ naŋ be U.S.A. paaloŋ baŋ dɔge te Yɔɔdɔɔ Rumph. Saŋa na oŋ da naŋ e bibile na, o ma da ba lɛ gɛrɛ a lammore neŋ a naaŋ moɔloo. Kyɛ, o da maŋ mɔɔŋ a wulo te Yɔɔdɔɔ Rumph a Baabole poɔ yɛlɛ fẽẽfẽẽ. Yuoni zaa, o da maŋ te puoree o makoma naŋ da puoro Jehoova yelmennoŋ poɔŋ. O makoma na da somooŋ oŋ boɔrɔ a Baabole poɔ yɛlɛ yaga. Saŋa na oŋ wa nyɛ yuomo 13 na, o da piili zannɛɛ a Baabole. September 27, 1992, saŋa na oŋ da naŋ e baapaalaa na, o da deɛ suobu. A yɛlɛ noɔ̃ zie la ka, o ma da leɛ piili gɛrɛɛ a lammore ane a naaŋ moɔloo. O dɔgreba ane o yɔɔmine meŋ da piili zannɛɛ a Baabole a nyɛ nimitɔɔre gaabo a te de suobu.

Saŋa na te Yɔɔdɔɔ Rumph naŋ da e baapaalaa na, o da nyɛɛ lɛ na paaneere naŋ da taa popeɛloŋ ba toma na poɔŋ. Azuŋ, saŋa na oŋ wa baare sakuu na, o da piili tonɛɛ a paaneɛ toma September 1995. Yuoni 2000, o da gaaɛ Ecuador paaloŋ ka o te soŋ a naaŋ moɔloo toma. Beŋ la oŋ da pɔge te yɔɔpɔge kaŋa naŋ yi Canada a tonɔ a paaneɛ toma. Ba da kulee taa. Saŋa na baŋ wa kultaa baare na, ba da laŋ tonɛɛ a paaneɛ toma Ecuador teŋbile kaŋa naŋ taa naaŋ moɔleba bawala mine. Zenɛ ŋa, a na zie na taaɛ lantaapuoruu naŋ taa naaŋ moɔleba yaga.

Wagre naŋ gɛrɛ poɔŋ na, ba da kaa iree te Yɔɔdɔɔ neŋ te Yɔɔpɔge Rumph ka ba e special paaneere. A puoriŋ ba da toŋɛɛ a gbandige zukaabo toma meŋ. Yuoni 2011, ba da nyɛɛ apoɔsori a gaa Giiliyad Sakuu naŋ tɔre 132. Saŋa na baŋ wa baare a sakuu na, ba da nyɛɛ apoɔsori a gaa ziiri yaga a te toŋ Jehoova toma a donɛɛ lombori zaa. Ba da toŋɛɛ a Bɛɛtil toma, misinaare toma, ane a gbandige zukaabo toma. Te Yɔɔdɔɔ Rumph da nyɛɛ apoɔsori ka o de wuluu ko te yɔɔmine naŋ maŋ wa a Naaloŋ Duori-enneba Sakuu na.

A COVID-19 baaloŋ zuŋ, Te Yɔɔdɔɔ ane te Yɔɔpɔge Rumph da leɛ gaaɛ United States paaloŋ. Ba da toŋboɔle baŋ ka ba wa tonɔ toma Bɛɛtil naŋ be Wallkill na. A Sɛvis Tomazie noba da de la wuluu ko te Yɔɔdɔɔ Rumph. Ba da leɛ ko baŋ toma ka ba leɛ gaa Ecuador paaloŋ Bɛɛtil a te tonɔ toma beŋ. Te Yɔɔdɔɔ Rumph da poɔ la a Bɛɛtil Zukaareba poɔŋ. Yuoni 2023, ba da leɛ toŋboɔle baŋ ka ba wa Warwick. January 2024, ba da kaa iree te Yɔɔdɔɔ Rumph ka o e a Sɛvis Komitii sonnɔ kaŋa. Saŋa na te Yɔɔdɔɔ Rumph naŋ wa teɛre ziiri na zaa o neŋ o pɔge naŋ toŋ Jehoova puoruu toma na, o yeleeŋ ka, “Zie na hoŋ maŋ tonɔ a toma naaneŋ maŋ vɛŋ ka toma na baŋ ko bo na e o yoŋ, kyɛ ho yɔɔmine na ho ne ba naŋ maŋ laŋ tonɔ a toma na la maŋ vɛŋ ka a toma e o yoŋ.”

Te niŋe paalɛɛ tonkpeɛne na te yɔɔmine ŋa naŋ tonɔ na, te maŋ “eŋnɛɛ a noba bama taaba.”—Fil. 2:29.