Nembuo La Yezu Krista?

1. Wala ka Yezu nyɔvore piili?

Yezu nyɔvore ba piili aŋa lɛ na nensaaleba zaa nyɔvore naŋ maŋ piili na. Yezu da eɛ maleke a be sazuŋ sɛre baŋ wa dɔgoo a teŋɛzuŋ. (Gyɔɔn 8:23) Yezu la a neŋ-dɛndɛŋ na Naaŋmen naŋ da maale. Yezu pãã da leɛ soŋɛɛ Naaŋmen baŋ maale boma zaa. Yezu la neɛ na Jehoova meŋɛ naŋ de o nuuri maale neŋ, azuŋ ka a Baabole boɔloo ka Naaŋmen “Bidɔɔ yeni.” (Gyɔɔn 1:14) Yezu da maŋ arɛɛ Naaŋmen gbɛbɔgriŋ a manna o yɛlɛ korɔ noba, azuŋ a Baabole lɛ boɔlɛɛ Yezu ka “a Yelbiri.”​—Kanne Yeng Yelibie 8:22, 23, 30; Kolosi 1:15, 16.

2. Bonso ka Yezu wa a teŋɛzu?

Saŋa na Naaŋmen naŋ da boɔrɔ ka o toŋ Yezu ka o wa a teŋɛzu na, o da leɛrɛɛ Yezu nyɔvore yi neŋ sazu a wa eŋ Gyuu pɔge kaŋa naŋ ba baŋ dɔɔ baŋ boɔlɔ Mareya poɔŋ. Azuŋ, dɔɔ naaneŋ eŋ Yezu ma poɔ kyɛ oŋ dɔgoo. Lɛ wuleeŋ ka dɔɔ zaa koŋ baŋ yelka o bidɔɔ la Yezu. (Luka 1:30-35) Yezu wa la a teŋɛzu (1) ka o wa wuli te a yelmeŋɛ a kyaare Naaŋmen, (2) ka o wa e ewuli soŋ a ko te a kyaare lɛ teŋ na baŋ puoro Naaŋmen haali saŋa na teŋ wa tuoro yelkpeɛne, ane (3) ka o wa de o nyɔvore naŋ e forifori na a “yɔɔ de ne neŋyaga.””​—Kanne Matio 20:28.

3. Bonso aŋ fɛre ka ba yɔɔdeɛ te?

Ka ba naŋ yelka ba na ko la neɛ kaŋa ka ho te yɔɔ sããmmo na zaa o soba naŋ sãã na sane, ka lɛ vɛŋ baŋ bare o soba, lɛ wuleeŋ ka ho yɔɔdeɛ la o soba. (Yiibu 21:29, 30) Kũũ ane nyaammo ba poɔ poboɔbo na Naaŋmen naŋ de maale neŋ nensaaleba na. Wala teŋ e baŋ lɛ? Naaŋmen da yelko la a dɛndɛŋ nensaalaa na baŋ boɔlɔ Adama ka, ka o naŋ e yelkaŋa a Baabole naŋ boɔlɔ ka ‘faaloŋ,’ o na kpiŋ. Azuŋ, ka Adamaŋ da ba toŋ faaloŋ, o da naaŋ koŋ kpi. (Munpiilee 2:16, 17; 5:5) A Baabole yeleeŋ ka, kũũ tu la Adama zie a “yaare” ta nensaaleba zaa. Adama da de la o faaloŋ na lɔŋ o biiri zaa. A lɛ zuŋ ka Adama biiri zaa kpiire na. A fɛrɛɛŋ ka ba yɔɔdeɛ te yi neŋ kũũ na te naŋ nyɛ yi Adama zieŋ na.”​—Kanne Urom 5:12; 6:23.

Nembuoŋ na baŋ yɔɔdeɛ te ka lɛ vɛŋ ka te koŋ lɛ kpiire? Ka teneeŋ wa kpi, te maŋ yɔɔ la te yelfaare zaa sane. Kyɛ te naŋ e noba naŋ ba pɛgeyi na zuŋ, te koŋ baŋ yɔɔ te tɔsoba sane koo.”​—Kanne Yieme 49:7-9.

4. Bonso ka Yezu kpi?

Yezu ba waa ŋa teneeŋ naŋ e noba naŋ ba pɛgeyi na, bonso Yezu yɛŋ da pɛgeyieŋ ka faaloŋ zaa ba kye o eŋɛŋ. Azuŋ, a da ba seŋ ka Yezu kpi, bonso Yezu daaŋ ba e yelfaa zaa. Kyɛ, te yelfaare zuŋ ka Yezu kpi. Naaŋmen wulee nensaaleba zaa nɔmmo naŋ e zuluŋ, saŋa na oŋ toŋ o Bidɔɔ ka o wa kpi ko te na. Yezu meŋ wuleeŋ ka o taaɛ nɔmmo naŋ e zuluŋ a ko nensaaleba, saŋa na oŋ da sage o Saa noɔre a wa a teŋɛzu, a wa de o nyɔvore iri neŋ sareka ko te na.”​—Kanne Gyɔɔn 3:16; Urom 5:18, 19.

Kaa a vidio, Bonso Ka Yezu Kpi?

5. Bo ka Yezu erɛ pampana?

Saŋa na Yezu naŋ da be a teŋɛzuŋ na, o da maŋ saŋ la noba baaloŋ, a vɛŋ ka kũũni iri a voorɔ, a da maŋ sonnɔ noba naŋ be awonaa poɔŋ meŋ. Yɛlɛ na zaa oŋ da e na wulee yɛlɛ na oŋ na e ko nensaaleba zaa naŋ sagra Naaŋmen noɔre nendaare kaŋa. (Matio 15:30, 31; Gyɔɔn 5:28) Saŋa na Yezu naŋ wa kpi na, Naaŋmen da seŋooŋ oŋ iri yi kũũni poɔŋ a leɛ maleke. (1 Piita 3:18) Yezu pãã da te zeŋ la Jehoova nuduloŋ a kyɛnlɛ wagre na oŋ na koo kpeɛ̃o ka o dire naaŋ a kaara a teŋɛzu zaa. (Hiburu 10:12, 13) Pampana ŋa, Yezu eɛ Naa a be sazuŋ. Yezu potuuribo moɔlɛɛ a duorisoŋ ŋa korɔ noba naŋ be a donɛɛ lombori zaa.”​—Kanne Daaniel 7:13, 14; Matio 24:14.

A koŋ kɔɔre Yezu na de la kpeɛ̃o na oŋ taa aŋa Naa na a wa iri te dɔgɛɛ ŋa zaa, ane noba naŋ vɛŋ teŋ dire dɔgɛɛ na zaa bare. Noba na zaa naŋ de ba zemmo yɛlɛ wulo ka ba taaɛ sagediibu Yezu eŋɛŋ, a lɛ sagra o nɔɛ meŋ na wono la noɔ̃ paradiisi poɔŋ a teŋɛ ŋa zuŋ.”​—Kanne Yieme 37:9-11.