Bo Teɛretɔ La Bebe A Ko Noba Naŋ Kpi Na?

1. Bo duorisoŋ la bebe a kyaare kũũni?

Yezu zɔmeŋɛ Laazoro da kpieŋ bebie anaare, azuŋ Yezu da tu la sori a kyɛŋ wa ta Bɛtani teŋɛ naŋ peɛle Gyɛruzɛlɛm. Laazoro yɔɔpɔgeba na baŋ boɔlɔ Maata neŋ Mareya da poɔ la Yezu eŋɛŋ baŋ zaa gaa zie na baŋ uumoo na. A da ba kɔɔre ka noba yaga da laŋ ana zie na. Saŋa na Yezu naŋ wa seŋ Laazoro a yi kũũni poɔŋ na, Maata neŋ Mareya poore zaaŋ da pɛle.​—Kanne Gyɔɔn 11:21-24, 38-44.

Maata da baŋɛɛ a duorisoŋ naŋ kyaare a kũũ leɛ-iruu yɛlɛ na. O da baŋɛɛŋ ka Jehoova na seŋɛɛ kũũni ka ba iri a voorɔ a teŋgane ŋa zuŋ.​—Kanne Joob 14:14, 15.

2. Ka neɛŋ wa kpi, bo yɛlɛŋ maŋ pɔgoo?

Tɛne la baŋ de maale neŋ nensaaleba. (Munpiilee 2:7; 3:19) Azuŋ, nensaaleba ba taa seɛ. Ka teneeŋ wa kpi, bonzaa ba maŋ yi te enneŋ a te be zie kaŋaŋ a voorɔ. Ka teneeŋ wa kpi, te kyaporo bee te zupore meŋ maŋ kpiŋ, azuŋ te teɛrɛ zaaŋ maŋ bɔre. Saŋa na Yezu naŋ seŋ Laazoro oŋ iri yi kũũni poɔŋ na, Laazoro da ba manna yɛlɛ na oŋ da nyɛrɛ saŋa na oŋ kpi na korɔ noba, bonso ka neɛŋ wa kpi o ba lɛ baŋ yelzaa.​—Kanne Yieme 146:4; Ikilisiasitiz 9:5, 6, 10.

Ka nobaŋ wa kpi, Naaŋmen maŋ de baŋ te eŋ vũũ poɔŋ baŋ dire dɔgɛɛ bee? A Baabole yeleeŋ ka ka neɛŋ wa kpi, o ba lɛ baŋ yelzaa. Azuŋ wuluu na noba naŋ maŋ wulo ka Naaŋmen na dɔgrɛɛ noba dazugovũũ poɔŋ na eɛ zirii. A wuluu ŋa maŋ dɛgrɛɛ Naaŋmen yuori. Naaŋmen poɔ ba pɛle neŋ teɛroŋ na noba naŋ taa ka o na dɔgrɛɛ noba dazugovũũ poɔŋ na fẽẽ zaa.​—Kanne Jeremaiya 7:31.

Kaa a vidio, Yeŋ Ka Kũũni Be?

3. Kũũni na baŋ yelee yɛlɛ ko te bee?

Kũũni koŋ baŋ yeli yɛlɛ bee a woŋ yɛlɛ. (Yieme 115:17) Kyɛ malekere mine eɛ maleke-faare, azuŋ ba maŋ tu la nyaammo ane daware sori a yele yɛlɛ korɔ noba, ka lɛ vɛŋ ka noba maŋ teɛre ka neɛ naŋ kpi na la yele a yɛlɛ. (2 Piita 2:4) Jehoova yelko teŋ ka te ta wa erɛ yelzaa naŋ na vɛŋ ka te neŋ kũũni yele yɛlɛ.​—Kanne Duturoonomi 18:10, 11.

4. Nembobo la baŋ na seŋ ka ba iri yi kũũni poɔŋ?

Noba turituri yaga naŋ kpi a gaŋ ba yaare pooreŋ na iri yi la kũũni poɔŋ a voorɔ a teŋgane ŋa zuŋ. Haali noba mine naŋ ba baŋ Naaŋmen, a da erɛ yelfaare kyɛ kpi meŋ na nyɛɛ kũũni leɛ-iruu.​—Kanne Luka 23:43; Toma 24:15.

Noba na baŋ seŋ baŋ iri yi kũũni poɔŋ na na nyɛɛ vuo ka ba zanne Naaŋmen yɛlɛ, a lɛ wuli ka ba taaɛ sagediibu Yezu eŋɛŋ saŋa na baŋ sagra o nɔɛ na. (Yel-iriwulaa 20:11-13) Noba na naŋ iri yi kũũni poɔŋ a erɛ yɛlɛ naŋ soma na wono la noɔ̃ a teŋɛzuŋ tegitegilɛ.​—Kanne Gyɔɔn 5:28, 29.

5. Bo ka a kũũni leɛ-iruu yɛlɛ wulo te a kyaare Jehoova?

Naaŋmen la toŋ o Bidɔɔ oŋ wa kpi a de o nyɔvore iri neŋ sareka a yuo a kũũni leɛ-iruu teɛretɔ ŋa ko te. Azuŋ, a kũũni leɛ-iruu wulo teŋ Jehoova nɔmmo, ane o nimimaaroŋ na te naŋ ba seŋ neŋ na yɛlɛ. Ka ba naŋ wa piili seŋnɛ noba naŋ kpi na, nembuo hoŋ na boɔrɔ ka ho nyɛ?.​—Kanne Gyɔɔn 3:16; Urom 6:23.