ZANNOO 22
Sobuo Hoŋ Na Baŋ Tu Kyɛ Moɔle A Duorisoŋ Ko Noba?
Saŋa na hoŋ zanna yelmenne naŋ be a Baabole poɔŋ na, aminekaŋaŋ ho na teɛreŋ ka, ‘Neɛzaa seŋ ka o baŋ a yɛlɛ ŋa!’ Yelmeŋɛ la, neɛzaa seŋ ka o baŋ a yɛlɛ ŋa! Kyɛ, dabeɛ̃ na baŋ erɛ boŋ ka ho manne yɛlɛ na hoŋ zanna na korɔ noba. Yɛ vɛŋ ka te nyɛ yɛlɛ naŋ na toɔ̃ soŋ bo ka ho zɔɔtoɔ̃ ho dabeɛ̃ na, a kyɛ piili moɔlɔ a duorisoŋ naŋ be a Baabole poɔŋ na korɔ noba.
1. Sobuo hoŋ na baŋ tu kyɛ manne yɛlɛ na hoŋ zanna na ko noba hoŋ baŋ?
Yezu potuuribo na da yeleeŋ ka: “Tenee eŋ kontoɔ̃ bare bon na te naŋ nyɛ bee a woŋ yeluu.” (Toma 4:20) Ba da de la yɛlɛ na Yezu naŋ da wuli ba na tegroŋ yaga zaa, azuŋ baŋ da boɔrɔ ka ba mannaa ko neɛzaa ba naŋ pɔge. Lɛ hoŋ meŋ teɛre bee? Ka hooŋ boɔrɔ ka ho meŋ e lɛ, aseŋ ka ho maŋ bɔ sori hoŋ na baŋ tu a yi gyeremɛ poɔŋ a kyɛ manne yɛlɛ na hoŋ zanna na ko ho yideme ane ho zɔmenne.—Kanne Kolosi 4:6.
Soe mine hoŋ na baŋ tu kyɛ piili manna a yɛlɛ korɔ noba
Ka ho neŋ ho booree neɛ kaŋaŋ wa dire dama, ho na baŋ yelee ŋaaŋ a piili manna a Baabole yɛlɛ koroo: “N zannɛɛ yelkaŋa naŋ soma yaga a daagbuli ŋa poɔŋ.”
Ho na baŋ mannɛɛ a Baabole poɔ yelkaŋa naŋ eŋnɛ faŋa ko ho zɔmeŋɛ kaŋa naŋ beɛrɛ bee a tuoro yelkpeɛne.
Ka ho tontoŋtaabaŋ wa soore bo yɛlɛ ho naŋ e a daagbuli poɔŋ, ho na baŋ mannɛɛ yɛlɛ na hoŋ zanne ho Baabole zannoo na saŋa, bee yɛlɛ hoŋ zanne a lantaapuoruu lammo saŋa a ko ba.
Ho na baŋ wulee ho zɔmenne na a jw.org wɛbsait.
Ho na baŋ toŋboɔlɛɛ ho taaba ka ba poɔ ho eŋɛŋ saŋa na hoŋ zanna a Baabole na, kyɛbee ho na baŋ wuli baŋ lɛ baŋ na toɔ̃ fiili a Baabole zannoo fɔɔm jw.org zuŋ.
2. Bonso aŋ na soma yaga ka ho de ho meŋɛ poɔ a lantaapuoruu noba poɔŋ, ka yɛ moɔlɔ a duorisoŋ?
Yezu potuuribo na da maŋ moɔlɛɛ a duorisoŋ ko neɛzaa ba naŋ baŋ. Kyɛ lɛ yoŋ naane baŋ da maŋ e, Yezu da toŋ la o potuuribo na “bayi bayi ka ba daŋ gaa a tenne” a te moɔle a duorisoŋ. (Luka 10:1) Lɛ na baŋ da sɛgre yɛlɛ soŋ zaa a moɔlɔ a duorisoŋ na da soŋ baŋ baŋ toɔ̃ moɔle a duorisoŋ ko noba yaga. Yezu potuuribo naŋ da lantaa moɔlɔ a duorisoŋ na da vɛŋɛɛŋ baŋ taa popeɛloŋ yaga. (Luka 10:17) Ka lɛ ho meŋ na toɔ̃ de biŋee ho nimitɔɔreŋ ka ho de ho meŋɛ poɔ a lantaapuoruu noba poɔŋ ka yɛ zaa laŋ moɔlɔ a duorisoŋ bee?
ZANNE YƐLƐ YAGA POƆ
Zanne nyɛ lɛ hoŋ na baŋ e a taa nyaa a moɔlɔ a duorisoŋ, a kyɛ lɛ nyɛ lɛ aŋ na soŋ bo ka ho taa popeɛloŋ yaga.
3. Jehoova na be la ho zieŋ
Noba mine maŋ boɔrɔŋ ka ba moɔle a duorisoŋ, kyɛ dabeɛ̃ maŋ erɛ baŋ bonso, ba maŋ teɛreŋ ka a noba koŋ kyɛlle woŋ.
Dabeɛ̃ erɛ boŋ ka ho manne yɛlɛ na hoŋ zanna na korɔ noba bee? Bonso hoŋ yel lɛ?
Ŋmɛ a VIDIO, a kyɛ gyieli a soorebiri naŋ tu na yɛlɛ.
Wala ka a baapaalba ŋa da e a toɔ̃ zɔɔtoɔ̃ ba dabeɛ̃ na?
Kanne Aizeeya 41:10, a kyɛ gyieli a soorebiri naŋ tu na yɛlɛ:
Ka dabeɛ̃ wa erɛ bo ka ho moɔle a duorisoŋ, sobuo ka puoro na baŋ soŋ bo?
Ho da baŋɛɛŋ?
Jehoova Sieree Deme yaga da teɛre ka ba koŋ toɔ̃ moɔle a duorisoŋ ko noba. Aŋa mannoo poɔŋ, Sergey da eɛ neɛ naŋ ba taa nyaa, azuŋ a da maŋ e la kpeɛŋaa koo ka o neŋ noba di dama. Kyɛ, saŋa na oŋ da wa zanne a Baabole na. O yeleeŋ ka: “Aneazaa ka dabeɛ̃ da maŋ erɛ maŋ, kyɛ N da piili mannɛɛ yɛlɛ na maŋ zanna na korɔ noba. N noɔre zaaŋ da mãã saŋa na maŋ piili moɔlɔ a duorisoŋ na, bonso lɛ eebo da soŋ maŋ maŋ maaleŋ taa nyaa kpoŋ. A da lɛ vɛŋɛɛŋ maŋ sage yɛlɛ na maŋ da zanna na di yaga zaa.”
4. Wulo ho taaba gyeremɛ
Ka hooŋ wa boɔrɔ ka ho moɔle a duorisoŋ ko neɛ kaŋa, maŋ teɛre yɛlɛ na hoŋ boɔrɔ ka ho yelkoo na yɛlɛ gaa tɔɔre, a kyɛ lɛ tu sori meŋ naŋ seŋ poɔŋ kyɛ yele a yɛlɛ koroo. Kanne 2 Timoti 2:24 ane 1 Piita 3:15, a kyɛ gyieli a soorebie naŋ tu na yɛlɛ:
Sobuo hoŋ na baŋ de a sɛgre ŋa toŋ neŋ toma saŋa na ho neŋ noba naŋ dire dama a kyaare a Baabole na?
Ho yideme neŋ ho zɔmenne mine ne bo teɛroŋ koŋ kyaare taa. Ka lɛŋ wa e, wala hoŋ na e? Boŋ aŋ ba seŋ ka ho e?
Bonso aŋ soma yaga ka ho maŋ yi gyeremɛ poɔŋ a soore o soba soorebie a gaŋ hoŋ na yelko o soba yɛlɛ naŋ seŋ ka o e daadaalɛ?
5. Ka hooŋ moɔlɔ a duorisoŋ korɔ noba, ho na taaɛ popeɛloŋ yaga
Jehoova la de a duorisoŋ moɔloo toma eŋ Yezu nuureŋ. Bo teɛroŋ ka Yezu da taa kyaare a toma? Kanne Gyɔɔn 4:34, a kyɛ gyieli a soorebie naŋ tu na yɛlɛ:
Ka teneeŋ dire bondirii naŋ soma, a maŋ vɛmeŋ teŋ taa laafeeloŋ naŋ soma, a kyɛ lɛ vɛŋ teŋ taa popeɛloŋ meŋ. Bonso ka Yezu da de Naaŋmen boɔbo eebo ane a duorisoŋ moɔloo manne neŋ bondirii?
Ka hooŋ moɔlɔ a duorisoŋ korɔ noba, sobuo aŋ na toɔ̃ vɛŋ ka ho taa popeɛloŋ?
Yɛlɛ mine naŋ na toɔ̃ soŋ bo
A daagbuli poɔ lammo na saŋa, mɔɔ kyɛ bɔ soe hoŋ na baŋ tu ka ho neŋ noba mine piili dama diibu.
Yelko ho wulwulo na ka ho boɔrɔŋ ka ba ko bo sakuubiiri toma ka ho toŋ a daagbuli poɔ lammo na saŋa. A sakuubiiri toma ŋa na soŋ boŋ ka ho toɔ̃ nare ho meŋɛ soŋ zaa a piili moɔlɔ a duorisoŋ korɔ noba.
De a “Noba Mine Maŋ Yeleŋ Ka” bee “Aminekaŋaŋ Neɛ Kaŋa Na Sooreŋ Ka” ziiri naŋ be a gane ŋa poɔŋ na, a zanne nyɛ lɛ hoŋ na toɔ̃ iri soorebie mine noba naŋ maŋ soorɔ nɔɛ ko ba.
AMINEKAŊAŊ NEƐ KAŊA NA SOOREŊ KA: “Nyɛ te beraayi, wala ka yɛlɛ kyɛnɛ?”
Sobuo hoŋ na baŋ tu kyɛ de a vuo ŋa manne yɛlɛ na hoŋ zanna yire a Baabole poɔŋ na ko o soba?
A ZANNOO YELNIMIZEERE
Ka hooŋ moɔlɔ a duorisoŋ korɔ noba, ho na taaɛ popeɛloŋ yaga. A ba e kpeɛŋaa meŋ ka te moɔle a duorisoŋ ko noba.
Bo Hoŋ Zanne
Bonso aŋ seŋ ka ho moɔlɔ a duorisoŋ korɔ noba?
Sobuo hoŋ na baŋ tu gyeremɛ soriŋ kyɛ moɔle a duorisoŋ ko noba?
Wala hoŋ na toɔ̃ e a de nyaa moɔlɔ neŋ a duorisoŋ?
YƐLƐ MINE NAŊ LƐ BEBE
Kaa a vidio ŋa a nyɛ soe anaare mine hoŋ na baŋ tu kyɛ de jw.org wɛbsait gambile na moɔle a duorisoŋ ko noba.
Lɛ Hoŋ Na Toɔ̃ Tu Kyɛ De A JW.ORG Wɛbsait Gambile Na Ko Neɛ Kaŋa (1:43)
Kanne nyɛ gyogri anaare mine naŋ na toɔ̃ soŋ bo ka ho moɔle a duorisoŋ ko noba.
“Ho Eɛ Siri Ka Ho Nyɔgrɔ Noba Aŋa Zoma Bee?” (A Watchtower, September 2020)
Kaa a vidio ŋa a nyɛ lɛ pɔgelee kaŋa yɛlɛ naŋ be a Baabole poɔŋ naŋ na baŋ soŋ bo ka ho de nyaa moɔlɔ a duorisoŋ, haali ka hooŋ e baapaalaa gba.
Zanne a nyɛ sori hoŋ na baŋ tu kyɛ manne a Baabole poɔ yɛlɛ ko ho yideme naŋ ba baŋ Jehoova yɛlɛ.
“Lɛ Hoŋ Na Toɔ̃ E A Tɔ Ho Yideme Naŋ Ba Baŋ Jehoova Sukyie” (A Watchtower, March 15, 2014)