ZANNOO 51
Wala Hoŋ Na Toɔ̃ E A Vɛŋ Ka Ho Yelyelii Pɛlɛ Jehoova Poɔ?
Saŋa na Jehoova naŋ maale te na, o ko teŋ kyɔɔtaa kaŋa naŋ soma yaga zaa. Bo kyɔɔtaa la lɛ? O na la sori na teŋ taa ka te maŋ toɔ̃ yele yɛlɛ na. Lɛ na teŋ maŋ de a kyɔɔtaa ŋa tonɔ neŋ toma na yɛlɛ fɛrɛɛ Jehoova bee? Ɛɛ! A yɛlɛ fɛrɛɛ Jehoova yaga zaa. (Kanne Gyimisi 1:26.) Azuŋ, wala teŋ na toɔ̃ e a yele yɛlɛ naŋ soma ka lɛ vɛŋ ka Jehoova poɔ pɛle?
1. Wala teŋ na baŋ e a de a kyɔɔtaa na Jehoova naŋ ko te na tonɔ neŋ toma soŋ?
A Baabole yeleeŋ ka, “yɛ yele yɛlɛ teɛrɛ taa kyɛ soŋnɔ taa ka yɛ baara duoro.” (1 Tɛsalonika 5:11) Ho baŋɛɛ neɛ kaŋa naŋ boɔrɔ faŋa emmo bee? Wala hoŋ na toɔ̃ e a soŋ o soba? Vɛŋ ka ba baŋ peɛlaaŋ ka ho taaɛ ba yɛlɛŋ yaga zaa. Aminekaŋaŋ, ho na baŋ yelko la o soba ka ho nɔŋ la o yɛlɛ yaga. Ho baŋɛɛ Baabole sɛgre kaŋa hoŋ na toɔ̃ kanne ko neɛ kaŋa ka a emoo faŋa bee? Baabole sɛgre yaga bebeŋ hoŋ na toɔ̃ de eŋ neɛ faŋa. Aseŋ ka ho baŋ ka, sori na hoŋ maŋ tu kyɛ yele yɛlɛ na meŋ na toɔ̃ eŋ la noba faŋa. Azuŋ, ka hooŋ wa yele yɛlɛ, maŋ de kɔkɔbaaloŋ yele a yɛlɛ, a kyɛ lɛ wuli ho yelyaga meŋ poɔŋ ka ho taaɛ ho taaba yɛlɛŋ.—Yeng Yelibie 15:1.
2. Bo yɛlɛ aŋ ba seŋ ka te maŋ yele?
A Baabole yeleeŋ ka: “Yɛ ta vɛŋ ka yelfaare yire yɛ nɔɛ poore.” (Kanne Efesu 4:29.) Lɛ wuleeŋ ka a ba seŋ ka te maŋ yele yɛlɛ naŋ ba soma, bee a yele potu-yɛlɛ, kyɛbee a yele yɛlɛ naŋ na dɔɔnɔ noba mine. A ba seŋ ka te yele noba yelfaare meŋ, bee a dɛgrɛ ba yoe.—Kanne Yeng Yelibie 16:28.
3. Boŋ na toɔ̃ soŋ te ka te maŋ yele yɛlɛ naŋ eŋnɛ noba faŋa?
Gbɛɛ yaga, te yelyelii maŋ wulee yɛlɛ naŋ be te sukyieŋ ane te teɛroŋ poɔŋ. (Luka 6:45) Azuŋ, aseŋ ka te mɔɔ te mɔɔbo zaa a maŋ teɛrɛ yɛlɛ naŋ soma yoŋ. Aseŋ ka te maŋ teɛrɛ yɛlɛ naŋ taa mennoŋ, yɛlɛ naŋ pɛgeyi fanana, yɛlɛ naŋ waana neŋ nɔmmo, ane yɛlɛ naŋ seŋ neŋ puubu. (Filipae 4:8) Ka teneeŋ boɔrɔ ka te teɛrɛ a yɛlɛ ŋa taa yoŋ, aseŋ ka te maŋ kaa iri yɛlɛ naŋ soma a maŋ de pɛlɛ te niŋe, aseŋ ka te lɛ kaara te zɔmenne nyɔgebo zieŋ meŋ soŋ. (Yeng Yelibie 13:20) Yel na kaŋa naŋ na toɔ̃ lɛ soŋ la ŋa, aseŋ ka te maŋ teɛre yɛlɛ gaa tɔɔre sɛre kyɛ yele yɛlɛ. Soore ho meŋɛ ka, ‘Yel ŋa maŋ boɔrɔ ka N yel ŋa na eŋɛɛ N kyɛllekyɛlleba na faŋa, kyɛbee a na vɛmeŋ ka ba poɔ sãã?’ A Baabole yeleeŋ ka: “Neɛ kaŋa bebeŋ ka o yelyaga waa ŋa zɔɔzɔɔsoɔ naŋ kyɔgrɔ, kyɛ yɛŋbanna zele waana neŋ la laafeɛ.”—Yeng Yelibie 12:18.
ZANNE YƐLƐ YAGA POƆ
Ho na zanne nyɛɛ lɛ hoŋ na toɔ̃ yele yɛlɛ naŋ pɛlɛ Jehoova poɔ a kyɛ lɛ eŋnɛ noba meŋ faŋa.
4. Kaara ho yelyaga zieŋ soŋ
Saŋa kaŋa, te maŋ yelee yɛlɛ mine, a puoreŋ teŋ leɛ e kaŋdabaŋkalɛ. (Gyimisi 3:2) Kanne Galesiya 5:22, 23, a kyɛ gyieli a soorebie naŋ tu na yɛlɛ:
A gyogri ŋa buo soba la hoŋ boɔrɔ ka ho puore sɔre Jehoova ka o ko bo, ka lɛ vɛŋ ka ho toɔ̃ yele yɛlɛ naŋ soma? Sobuo ka a gyogri ŋa na toɔ̃ soŋ bo?
Kanne 1 Korinti 15:33, a kyɛ gyieli a soorebiri ŋa yɛlɛ:
Te zɔmenne ane yɛlɛ na teŋ maŋ de pɛlɛ te niŋe na toɔ̃ leɛrɛɛ te yel yelee. Sobuoŋ ka lɛ na toɔ̃ e?
Bo yɛlɛŋ na baŋ leɛre ho yelyaga yeluu?
Kanne Ikilisiasitiz 3:1, 7, a kyɛ gyieli a soorebiri naŋ tu na yɛlɛ:
Bo saŋa aŋ maŋ soma yaga zaa ka te pɔge te noɔre, bee a kyɛnle ka wagre soŋ ta kyɛ ka te yel yelkaŋa?
5. Maŋ yele ho taaba yelsonne
Wala teŋ na toɔ̃ e a ta yele yɛlɛ naŋ na dɔɔnɔ noba, bee a yele yɛlɛ naŋ wuli ka te ba taa ba yɛlɛŋ? Ŋmɛ a VIDIO, a kyɛ gyieli a soorebie naŋ tu na yɛlɛ.
A vidio poɔŋ, bonso ka te yɔɔdɔɔ na da boɔrɔ ka o leɛre lɛ na oŋ maŋ yele o taaba yɛlɛ na?
Wala oŋ da e a toɔ̃ leɛre o eebo?
Kanne Ikilisiasitiz 7:16, a kyɛ gyieli a soorebiri naŋ tu na yɛlɛ:
Ka a naŋ wa wa ka te yel neɛ kaŋa yelfaare, bo yɛlɛ aŋ seŋ ka te leɛteɛre?
Kanne Ikilisiasitiz 7:21, 22, a kyɛ gyieli a soorebiri naŋ tu na yɛlɛ:
Ka neɛ kaŋaŋ wa yeli ho yelfaare, sobuo ka a Baabole sɛgre ŋa na toɔ̃ soŋ bo ka ho ta vɛŋ ka ho suuri iri yaga zaa?
6. De nimimaaroŋ yele yɛlɛ korɔ ho booree deme
Jehoova boɔrɔŋ ka te maŋ yi nimimaaroŋ poɔŋ ane nɔmmo poɔŋ kyɛ yele yɛlɛ korɔ te booree deme. Ŋmɛ a VIDIO, a kyɛ gyieli a soorebiri naŋ tu na yɛlɛ.
Boŋ na toɔ̃ soŋ bo ka ho maŋ yi nimimaaroŋ poɔŋ a yele yɛlɛ korɔ ho booree deme?
Kanne Efesu 4:31, 32, a kyɛ gyieli a soorebiri ŋa yɛlɛ:
Wala teŋ na baŋ e a de te yelyaga wuli te booree deme ka te de baŋ tegroŋ yaga?
Jehoova da yelko la o Bidɔɔ Yezu ka o nɔmooŋ a kyɛ de o tegroŋ yaga zaa. Kanne Matio 17:5, a kyɛ gyieli a soorebiri naŋ tu na yɛlɛ:
Wala hoŋ na toɔ̃ e a tɔgle Jehoova saŋa na hoŋ yele yɛlɛ korɔ ho booree deme na?
Maŋ boɔrɔ soe hoŋ na baŋ tu a de puubu ko ho taaba
NOBA MINE MAŊ YELEŊ KA: “N e la neŋ peɛlaa oo, azuŋ, yɛlɛ naŋ be N teɛroŋ poɔŋ la maŋ maŋ yeli. N baga ba kyebe ka noba mine poɔŋ ba pɛle neŋ N yelyelii.”
Lɛ hoŋ meŋ teɛre bee? Bonso hoŋ yel lɛ?
A ZANNOO YELNIMIZEERE
Te yelyaga na toɔ̃ eŋɛɛ noba faŋa bee ka a pere ba yaga zaa. Azuŋ, aseŋ ka te maŋ teɛre yɛlɛ gaa tɔɔre kyɛ yele yɛlɛ, a maŋ kyɛnle ka wagre soŋ ta sɛre kyɛ ka te yele a yɛlɛ. Aseŋ ka te maŋ tu sori naŋ seŋ neŋ poɔŋ kyɛ yele a yɛlɛ meŋ.
Bo Hoŋ Zanne
Sobobo hoŋ na baŋ tu kyɛ de ho yelyaga eŋnɛ ho taaba faŋa?
Bo yɛlɛ aŋ ba seŋ ka ho maŋ yele?
Bo yɛlɛŋ na baŋ soŋ te ka te maŋ yele yɛlɛ naŋ eŋnɛ noba faŋa a kyɛ lɛ wuli ka te taaɛ ba yɛlɛŋ meŋ?
YƐLƐ MINE NAŊ LƐ BEBE
Boŋ na baŋ soŋ te ka te maŋ yele yɛlɛ naŋ eŋnɛ te taaba faŋa?
Bo yɛlɛŋ na baŋ soŋ bo ka ho ta yele yelfaare? Kanne a yɛlɛ ŋa a nyɛ a noɔre iribo.
“Ka Neɛŋ Maŋ Yele Yɛlɛ A Pɔrɔ, A E La Yelfaa Bee?” (Intanɛt zu gane)
Bo yɛlɛŋ na toɔ̃ soŋ bo ka ho tage ho meŋɛ yi noba yelfaare yeluu eŋɛŋ? Kaa a vidio ŋa a nyɛ a noɔre iribo.
Dɔɔ kaŋa da nɔŋɛɛŋ ka o maŋ yele yɛlɛ a pɔrɔ, kanne a nyɛ bon naŋ da somoo oŋ leɛre o eebo.