Lɛ Jehoova Naŋ Maŋ Tu Kyɛ Wono Te Puoro

1-2. Bo yɛlɛŋ na baŋ dɔnnɔ te teɛroŋ a kyaare te puoro yɛlɛ?

HO DAŊ soorɛɛ ho meŋɛ ka, ka lɛ Jehoova kyɛllɛ wonee N puoro yɛŋ? Ka lɛ na, ho yoŋ naane. Te yɔɔdɔbɔ ane te yɔɔpɔgeba yaga zaa maŋ soorɛɛ a soorebiri ŋa, saŋa na baŋ meŋ wa tuoro yelkpeɛne na. Ka teneeŋ wa tuoro yelkpeɛne mine, a na baŋ eɛ kpeɛŋaa ko te ka te baŋ ka Jehoova kyɛllɛ wono la te puoro.

² Te na nyɛɛ ananso teŋ na baŋ sagedi ka Jehoova maŋ kyɛllɛ wonee o puorebiiri puoro. (1 Gyn. 5:15) Te na lɛ zannɛɛ a soorebie ŋa meŋ yɛlɛ: Ananso la wala ka saŋa kaŋa aŋ maŋ waa ŋa Jehoova ba wono te puoro? Sobobo ka Jehoova maŋ tu kyɛ iri puoro nɔɛ zenɛ?

AMINEKAŊAŊ JEHOOVA KOŊ IRI TE PUORO NOƆRE LƐ TEŊ KAARA SORIŊ NA

3. Ananso la wala ka Jehoova boɔrɔ ka te maŋ puoro sɔroo?

³ A Baabole vɛmeŋ teŋ baŋ peɛlaaŋ ka Jehoova nɔŋ teŋ yaga zaa, ane meŋ ka te eɛ nanee yaga a koo. (Haag. 2:7; 1 Gyn. 4:10) Azuŋ oŋ tonɔ boɔlɔ te ka te maŋ puoro sɔrɔ o sommo. (1 Pit. 5:6, 7) O boɔrɔŋ ka o soŋ te ka te naŋ kyɛnɛ peɛloo, a kyɛ toɔ̃ are te yelkpeɛne zaa noɔre.

4. Wala teŋ e baŋ ka Jehoova maŋ kyɛlle woŋee o puorebiiri puoro? (Kaa a foto meŋ.)

⁴ Gbɛɛ yaga te maŋ kanne nyɛɛ a Baabole poɔŋ ka, Jehoova maŋ kyɛlle woŋee o puorebiiri mine puoro. Ba buo soba yɛlɛ hoŋ teɛre? Te nyɛ Naa Deevid zemmo yɛlɛ. O da tuoree dɔndɔn faare yaga o zemmo poɔŋ, kyɛ o da maŋ puore sɔrɛɛ Jehoova sommo wagre zaa. Saŋa kaŋa o da puore sɔrɛɛ Jehoova ka: “O Jehoova, woŋ N puoro. Kyɛlle woŋ N sɔrebo. Deɛ N puoro ho [yelmennoŋ] ane ho sontuubu poɔŋ.” (Yiem. 143:1) Jehoova da kyɛlle woŋee Deevid puoro na a faa o yi o dɔndɔnne nuuriŋ. (1 Saa. 19:10, 18-20; 2 Saa. 5:17-25) Deevid da toɔ̃ yeleeŋ ane sagediibu ka: “Jehoova peɛlɛɛ bana na zaa naŋ boɔloo.” Te meŋ na baŋ taa la ana sagediibu ŋa tɔ.​—Yiem. 145:18.

5. Takoreŋ saŋa na, Jehoova da maŋ iree o puorebiiri zaa puoro noɔre ko ba a ŋa lɛ baŋ da kaara soriŋ na bee? Tere yelmannaa. (Kaa a foto meŋ.)

⁵ Aminekaŋaŋ Jehoova koŋ maŋ iri te puoro noɔre ko te lɛ te naŋ kaara soriŋ na. Lɛŋ da pɔge a bitontona Pɔɔl. O da sɔrɛɛ Naaŋmen ka o iri “goɔ a [o] eŋgane poɔ” bare. Gbɛre bota ka Pɔɔl da puore sɔre ana yelkpeɛŋaa ŋa. Jehoova da iree a puoro ŋa noɔre koo bee? Ɛɛ, kyɛ lɛ na Pɔɔl naŋ da kaara soriŋ naane. Jehoova da ba iri o yelkpeɛne na bare, kyɛ O da kooŋ kpeɛ̃o naŋ seŋ neŋ ka o na baŋ puoruu yelmennoŋ poɔŋ a te ta a baaraa.​—2 Kor. 12:7-10.

6. Saŋa kaŋa ananso la wala aŋ na maŋ waa ŋa Jehoova ba wono te puoro?

⁶ Aminekaŋaŋ ka teneeŋ wa puore sɔre Jehoova, o koŋ maŋ iri a puoro noɔre ko te aŋa lɛ teŋ da kaara soriŋ na. Te na baŋ sagediŋ peɛlaaŋ ka, Jehoova baŋɛɛ sori na meŋɛ naŋ seŋ neŋ oŋ na baŋ tu a kyɛ soŋ te. O gba na maŋ eɛ “yɛlɛ zaa a gaŋ bonna zaa te naŋ sɔrɔ bee a teɛrɛ.” (Efe. 3:20) A lɛ zuŋ, o na baŋ iree te puoro nɔɛ ko te saŋa, bee lɛ na te naŋ da ba kaara soriŋ.

7. Ananso la wala saŋa kaŋa aŋ maŋ seŋ ka te leɛre yɛlɛ na te naŋ puoro sɔrɔ Jehoova na? Tere yelmannaa kaŋa.

⁷ Saŋa kaŋa ka teneeŋ wa baŋ Jehoova boɔbo soŋ, te na maŋ leɛrɛɛ te puoro ka ane Jehoova boɔbo a kyaare taa. Te nyɛ Martin Poetzinger zemmo yɛlɛ. Ba da nyɔgɛɛ te Yɔɔdɔɔ Poetzinger gaaneŋ Nazi kampore na kaŋa saŋa na oŋ da de o pɔge aŋ ba kɔɔre na. A piilee na o da puore sɔrɛɛ Jehoova ka o faa o yi a kampo poɔŋ ka o baŋ kaa o pɔge a kyɛ tɔnne o naaŋ moɔloo toma na. Kyɛ daarayi puoriŋ, o da nyɛɛŋ ka bonzaa ba wuli ka Jehoova na faa o la yi ana zie naŋ. Azuŋ o da piili puoroŋ ka: “Jehoova, sɔrebo la, wuli ma bon ho naŋ boɔrɔ ka N e.” A lɛ puoriŋ o da piileeŋ a teɛrɛ yɛlɛ na o taaba Kristabiiri naŋ tuoro a kampo poɔŋ. Ba yaga zie zaa meŋ da maŋ teɛrɛ ba meŋ pɔgeba ane ba biiri yɛlɛ. Azuŋ te Yɔɔdɔɔ Poetzinger da leɛ puoreeŋ ka: “Jehoova, bareka yaga zaa ane N toŋ paalaa ŋa. Soŋ ma ka N baŋ eŋ N yɔɔdɔba ŋa faŋa.” O da deɛ yuomo awae a eŋnɛ o yɔɔdɔbɔ faŋa a kampo poɔŋ.

8. Bo yelnimizeɛŋ seŋ ka o be te teɛroŋ ka teneeŋ wa puoro?

⁸ Aseŋ ka te teɛre baŋ ka Jehoova taaɛ poboɔbo, ka o poboɔbo na na nyɛɛ eebo wagre naŋ seŋ neŋ poɔŋ. O poboɔbo la ka o iri bonzaa naŋ vɛŋ teŋ dire dɔgɛɛ zenɛ ŋa, aŋa saammo bɛrɛ, baaloŋ ane kũũ a bare kpɛlɛŋkpɛlɛŋ. Jehoova na tu la o Naaloŋ na eŋɛŋ kyɛ vɛŋ ka o poboɔbo na nyɛ eebo. (Daan. 2:44; Yel. 21:3, 4) Kyɛ pampana ŋa yɛŋ, Jehoova naŋ terɛɛ sori ka Setaana dire a donɛɛ ŋa naaloŋ.b (Gyn. 12:31; Yel. 12:9) Jehoova daŋ koŋ iri nensaaleba yelwonee bare pampana, bonso, ka onaŋ e lɛ, a na waa ŋa Setaana kaarɛɛ nensaaleba zu soŋ. Aneazaa ka te kyɛnlɛŋ ka Jehoova paale o nɔ-ennee na, kyɛ lɛ ba wuli ka o ba korɔ te sommo pampana. Te nyɛ yɛlɛ na mine Jehoova naŋ maŋ erɛ a sonnɔ te.

SOE NA JEHOOVA NAŊ MAŊ IRI TE PUORO NƆƐ ZENƐ ŊA

9. Sobuo ka Jehoova na baŋ soŋ te ka teneeŋ wa boɔrɔ ka te de gbɛre? Manne wuli.

⁹ O maŋ ko teŋ yɛŋ. Jehoova eŋɛɛ noɔre ka o na ko teŋ yɛŋ ka te maŋ toɔ̃ de gbɛ sonne. Agaŋaazaa ka teneeŋ wa derɛ gbɛre naŋ na baŋ sãã te zemmo yɛlɛ zaa bee a soŋ te te zemmo zaa poɔŋ, a fɛrɛɛŋ ka te nyɛ yɛŋ naŋ yi Naaŋmen zie. Aŋa mannoo poɔŋ, ka teneeŋ wa derɛ gbɛre kyaare kultaa yɛlɛ. (Gyi. 1:5) Te yɔɔpɔge Maria naŋ ba kpɛ kultaa poɔ, te nyɛ o zemmo yɛlɛ ŋa.c O da taa popeɛloŋ a tonɔ o regular paaneɛ toma, kyɛ ka o neŋ te yɔɔdɔɔ kaŋa da wa nyɛ taa. O yeleeŋ ka: “Saŋa na te zɔmennoŋ naŋ da erɛ kpeɛŋaa na, lɛ meŋ teŋ da boɔrɔ taa yaga zaa. N da baŋɛɛŋ ka aseŋ ka N de gbɛre. N da puore sɔrɛɛ Jehoova yaga zaa. A da fɛrɛɛŋ ka N nyɛ Jehoova sowuli, kyɛ N da baŋɛɛ meŋ ka Jehoova koŋ baŋ de a gbɛre ŋa ko ma.” O da nyɛŋ ka Jehoova iree o puoro na noɔre, a koo yɛŋ. Sobuoŋ? O da peɛrɛɛ yɛlɛ yaga te gama na poɔŋ a da nyɛ zannoo yɛlɛ yaga naŋ somoo oŋ nyɛ o soorebie na zaa oŋ da taa na noɔre iribo. O da kyɛlle woŋee o ma naŋ kyile meŋ kawane. A lɛ kawane na da somooŋ oŋ teɛre a yɛlɛ gaa tɔɔre. A baaraa zaa o da de la gbɛre naŋ soma.

10. Aŋa lɛ Filipae 4:13 naŋ yel na, boŋ ka Jehoova na e a soŋ o puorebiiri? Tere yelmannaa kaŋa. (Kaa a foto meŋ.)

¹⁰ O maŋ ko teŋ faŋa teŋ toɔ̃ are te yelkpeɛne noɔreŋ. Aŋa lɛ na Jehoova naŋ da ko a bitontona Pɔɔl faŋa na, o na ko la te meŋ a faŋa ka te baŋ are te yelkpeɛne noɔreŋ. (Kanne Filipae 4:13.) Te nyɛ lɛ Jehoova naŋ da soŋ te yɔɔdɔɔ Benjamin oŋ are o yelkpeɛne noɔreŋ. Ayi o baapaaloŋ saŋa zaa o neŋ o yideme da kpeɛrɛɛ refugee kampo kaŋa Africa paaloŋ. Benjamin yeleeŋ ka: “Gbɛɛ yaga N da maŋ puore sɔrɛɛ Jehoova ka o ko ma faŋa ka N toɔ̃ erɛ yɛlɛ naŋ pɛlɛ o poɔ. Jehoova da kyɛlle woŋee N puoro a da ko ma sukyiri maaroŋ, a ko ma nyaa maŋ na toɔ̃ moɔle a duore soŋ, ane te gama na mine maŋ na de zanna o yɛlɛ a toɔ̃ tage peɛloo yaga zaa.” O da la yeleeŋ ka: “Maŋ da maŋ kanna te yɔɔdɔbɔ ane te yɔɔpɔgeba mine zemmo yɛlɛ a nyɛrɛ lɛ Jehoova naŋ soŋ ba na, a da eŋɛɛ N sagediibu faŋa ka N meŋ dire yelmennoŋ korɔ Jehoova.”

11-12. Sobuo ka Jehoova na baŋ tu te yɔɔmine eŋɛŋ kyɛ iri te puoro noɔre ko te? (Kaa a foto meŋ.)

¹¹ O maŋ tu la te Kristabitaaba eŋɛŋ kyɛ iri te puoro nɔɛ ko te. Zie naŋ na nyaa ka ba ko Yezu na, ana daare na zisoɔree, o da puoreŋ yaga zaa. O da sɔrɛɛ Jehoova ka o ta vɛŋ ka noba teɛrɛ ka o tõõ zuma a de ana yɛlɛ na di o sɛrɛɛ. Kyɛ Jehoova da ba e lɛ koo, kyɛ o da soŋɛɛ Yezu a da toŋ a malekere kaŋa oŋ gaa emoo faŋa. (Luk. 22:42, 43) Aminekaŋaŋ Jehoova na vɛmeŋ ka te yɔɔ kaŋa boɔle te fone zuŋ bee a wa te zie a wa eŋ te faŋa. Te zaa maŋ boɔrɔ apoɔsori teŋ na baŋ tu a yel “yelbisoŋ” a eŋ te Kristabitaaba faŋa.​—Yeng. 12:25.

¹² Te nyɛ te yɔɔpɔge Miriam zemmo yɛlɛ. O serɛ naŋ da wa kpi daaraa wala puoriŋ, Miriam da be la dieŋ o yoŋ tɛgɛ, o poɔ zaaŋ da sãã. O da konoŋ yaga zaa, aŋ da fɛre ka o yel yɛlɛ ko neɛ kaŋa. O yeleeŋ ka: “N da ba la taa faŋa a na boɔle neɛzaa, azuŋ N da puore sɔrɛɛ Jehoova. Saŋa na maŋ da naŋ puoro na, N fone da koŋeeŋ. A lantaapuoruu neŋkpoŋ kaŋa naŋ e N zɔmeŋ soŋ la da boɔle.” Miriam da nyɛ la sukyiridii a yi a lantaapuoruu neŋkpoŋ ane o pɔge zie. O da sagedieŋ ka Jehoova la vɛŋ ka a te yɔɔdɔɔ ŋa boɔloo.

13. Tere yelmannaa naŋ wuli ka Jehoova maŋ tu la noba naŋ ba puoroo eŋɛŋ kyɛ iri te puoro noɔre.

¹³ O maŋ tu la noba naŋ ba puoroo eŋɛŋ kyɛ iri te puoro noɔre. (Yeng. 21:1) Saŋa kaŋa Jehoova maŋ iree o puorebiiri puoro noɔre a vɛŋ ka neɛ kaŋa naŋ ba puoroo soŋ ba. Aŋa mannoo poɔŋ, o da vɛŋɛɛŋ ka Naa Aritazeerikisis ko Niihemaiya sori, oŋ leɛ gaa Gyɛruzɛlɛm a te soŋ ka ba leɛ mɛ a teŋkpɛŋ. (Niih. 2:3-6) Zenɛ ŋa meŋ, Jehoova na baŋ eŋɛɛ noba naŋ ba puoroo ka ba soŋ te ka a naŋ wa fɛre ka ba e lɛ.

14. Sobuo ka Soo Hing zemmo yɛlɛ ŋa eŋ bo faŋa? (Kaa a foto meŋ.)

¹⁴ Te yɔɔpɔge kaŋa yuori naŋ di Soo Hing da nyɛɛŋ ka Jehoova da tu la o dɔkta eŋɛŋ kyɛ somoo. O bidɔɔ da taa la teɛroŋ poɔ baaloŋ. Saŋa na accident faa kaŋa naŋ da pɔge o bie na, te yɔɔpɔge ŋa ne o serɛ da barɛɛ ba toma kyɛ wa kaara ba bie na. Azuŋ libi yɛlɛ da wa eɛ kpeɛŋaa a ko ba. Soo Hing yeleeŋ ka a da waa ŋa o faŋa zaa naŋ baare, oŋ koŋ baŋ la are a yelkpeɛne noɔreŋ. O da yelee o sukyiri yɛlɛ zaa ko Jehoova, a sɔroo ka o somoo. A dɔkta da bɔ la sori oŋ na baŋ tu kyɛ soŋ te yɔɔpɔge ŋa neŋ o yideme. Lɛ da soŋɛɛŋ baŋ nyɛ sommo yi a paaloŋ nembɛrɛ zie a toɔ̃ nyɛ zi-soŋ a kpeɛrɛ. Lɛ puoriŋ Soo Hing da yeleeŋ ka: “Te nyɛɛŋ ka Jehoova la soŋ te a yɛlɛ ŋa poɔŋ. Sereŋ meŋɛ, o eɛ Neɛ ‘naŋ wono puoro.’”​—Yiem. 65:2.

SAGEDIIBU NA TOƆ̃ SOŊ TEŊ KA TE SAGE SOE NA JEHOOVA NAŊ MAŊ TU KYƐ IRI TE PUORO NƆƐ NA

15. Boŋ soŋ te yɔɔpɔge kaŋa oŋ nyɛ ka Jehoova maŋ iree o puoro nɔɛ koroo?

¹⁵ Wagre zaa naane ka Jehoova maŋ tu soseɛlee kaŋa eŋɛŋ kyɛ iri te puoro noɔre ko te. Kyɛ lɛ zaa o naŋ maŋ tu kyɛ iraa nɔɛ na, a na baŋ soŋ teŋ ka te toɔ̃ puoroo yelmennoŋ poɔŋ. Azuŋ maŋ kaara ka ho nyɛ soe na Jehoova naŋ maŋ tu kyɛ ire te puoro nɔɛ korɔ te. Te yɔɔpɔge kaŋa ba naŋ boɔlɔ Yoko da teɛre ka Jehoova ba maŋ wono o puoro, kyɛ o da piileeŋ a maŋ sɛgrɛ yɛlɛ na zaa o naŋ puore sɔre Jehoova na binne. Wagre mine puoriŋ o da de la yɛlɛ na o naŋ sɛge biŋ na kaa a nyɛ ka Jehoova iree o puoro na yaga zie zaa nɔɛ koo, ane ana zaa gba oŋ inne a yɛlɛ na. Saŋa kaŋa aseŋ ka te maŋ leɛteɛre nyɛ lɛ Jehoova naŋ iri te puoro nɔɛ ko te.​—Yiem. 66:19, 20.

16. Sobuo teŋ na baŋ wuli sagediibu a kyaare puoro yɛlɛ? (Hiburu 11:6)

¹⁶ Te maŋ wuliŋ ka te taa la sagediibu Jehoova eŋɛŋ ka teneeŋ maŋ puoro koroo a sage lɛ zaa meŋ oŋ na tu kyɛ iri a puoro noɔre ko te na. (Kanne Hiburu 11:6.) Te nyɛ te yɔɔdɔɔ Mike ane o pɔge Chrissy zemmo yɛlɛ. Ba da de biŋee ba nimitɔɔreŋ ka ba gaa Bɛɛtil. Mike yeleeŋ ka: “N neŋ N pɔge zaa da laŋ fiilɛɛ a Bɛɛtil fɔɔm a puore sɔre Jehoova gbɛɛ yaga a kyaare a yɛlɛ ŋa teŋ de biŋ te nimitɔɔreŋ na, kyɛ ba da ba boɔle te.” Mike ane Chrissy da naŋ taa la a sagediibu ka Jehoova baŋɛɛ lɛ oŋ na de ba toŋ ne toma o toma poɔŋ. Ba da naŋ mɔɔrɛɛ ba mɔɔre zaa a paaneɛ toma poɔŋ, a te sonnɔ zie ba naŋ boɔrɔ naaŋ moɔleba yaga, a sonnɔ te puoruu ziiri meɛbo toma na meŋ. Zenɛ ŋa, ba be la a gbandige zukaara toma poɔŋ. Mike yeleeŋ ka: “Jehoova ba maŋ iri te puoro zaa nɔɛ ko te lɛ teŋ da kaara soriŋ na, kyɛ o gba iraaŋ sori naŋ soma yaga zaa a gaŋ lɛ na gba teŋ da teɛrɛ na.”

17-18. Aŋa lɛ na Yieme 86:6, 7 naŋ yel na, boŋ teŋ na baŋ sagedi?

¹⁷ Kanne Yieme 86:6, 7. A yieli yiele Deevid da sagedieŋ peɛlaaŋ ka Jehoova kyɛlle woŋee o puoro na. Ho meŋ na baŋ taa la ana sagediibu ŋa tɔ. Aŋa lɛ te naŋ nyɛ te yɔɔmine zemmo yɛlɛ a zannoo ŋa poɔŋ na, a eŋ teŋ faŋa ka Jehoova na baŋ ko teŋ a yɛŋ ane a kpeɛ̃o ka te toɔ̃ are te yelkpeɛne noɔreŋ. O na baŋ tu la te taaba Kristabiiri eŋɛŋ, kyɛbee noba gba naŋ ba puoro Jehoova eŋɛŋ kyɛ baŋ soŋ te soe mine poɔŋ.

¹⁸ Aneazaa ka aminekaŋaŋ Jehoova ba maŋ iri te puoro na mine nɔɛ aŋa lɛ teŋ maŋ kaara soriŋ na, kyɛ te baŋɛɛŋ ka o na iree a nɔɛ ko te. O na baŋ ko teŋ bonzaa yɛlɛ naŋ fɛre te wagre naŋ seŋ neŋ poɔŋ. Azuŋ maŋ puore kyɛ taa sagediibu ka Jehoova na kaa la ho zu pampana, a “paali bonvore zaa boɔbo” a dompaalaa meŋ poɔŋ.​—Yiem. 145:16.