Yɛlɛ Hoŋ Na Baŋ E Saŋa Na Hoŋ Wa Tuore Daŋkyagre

1-2. (a) Ka noba mineŋ wa nyɛ daŋkyagre, wala baŋ maŋ e ba yɛlɛ? (b) Bo yɛlɛ mine la teŋ na baŋ soore te menne?

A DONƐƐ ŋa paalɛɛŋ neŋ daŋkyagre. Noba mine bebeŋ sɛre baŋ na wuli bo gyeremɛ na, ba maŋ kaaɛ lɛ na hoŋ taa libie aseŋ, zie hoŋ yi, ane ho eŋgane kala, a kyɛ pãã baŋ lɛ na baŋ na wuli bo gyeremɛ aseŋ. Noba mine meŋ ba taa gyeremɛ ko dɔba bee pɔgeba. Gɔmenante nembɛrɛ ane bondaanba mine meŋ maŋ teɛrɛɛ libi-bɔ yoŋ yɛlɛ, azuŋ ba maŋ erɛɛ yɛlɛ naŋ sããna a saluoni neŋ a teŋgane, ka lɛ vɛŋ ka noba dire dɔgɛɛ yaga. Sori kaŋa poɔŋ na, te zaa tuoree a daŋkyagre ŋa.

² A ba e seɛlee neŋ noba yaga suuri naŋ iri neŋ daŋkyagre naŋ be a donɛɛŋ na. Te zaa boɔrɔŋ ka zeŋ laafeɛ neŋ dantorii be a donɛɛŋ. Azuŋ, noba mine maŋ de la ba menne te poɔ yelsɛgree mine poɔŋ a moɔrɔ ka ba iri daŋkyagre bare. Ba maŋ de la taawae a gɔmenante neŋ bege na baŋ maale na eŋɛŋ. A maŋ lɛ voote ko noba naŋ eŋ noɔre ka ba na iree daŋkyagre bare na. Kyɛ, tenee yɛŋ “ba e a donɛɛ kyɛlee.” Azuŋ, te kyɛnlɛɛ wagre na Naaŋmen Naaloŋ naŋ na wa iri daŋkyagre zaa bare. (Gyn. 17:16) Kyɛ, ka teneeŋ wa nyɛ neɛ kaŋa naŋ tuoro daŋkyagre, a maŋ beɛrɛ teŋ yaga. A maŋ vɛŋeŋ teŋ soore te menne ka: ‘Wala aŋ seŋ ka N e a yɛlɛ ŋa poɔŋ? Yelkaŋa bebeŋ maŋ na toɔ̃ e a vɛŋ ka daŋkyagre baare pampana bee?’ Yɛ vɛŋ ka te nyɛ teɛroŋ na Jehoova neŋ Yezu naŋ taa a kyaare daŋkyagre, a na soŋ teŋ ka te nyɛ a soorebie ama nɔɛ iribo.

JEHOOVA NEŊ YEZU BA NƆŊ DAŊKYAGRE

3. Bonso teŋ maŋ nyɛ daŋkyagre aŋ beɛrɛ te yaga? (Aizeeya 5:7)

³ A Baabole wuli teŋ bon nanso teŋ maŋ nyɛ daŋkyagre aŋ beɛrɛ te. Jehoova ‘nɔŋɛɛ sontuubu ane sɛrɛɛ diibu naŋ tori.’ O maale teŋ o waaloŋ poɔŋ. (Yiem. 33:5; Mun. 1:26) Jehoova daaŋ koŋ e te yɛlɛ naŋ ba seŋ neŋ. Azuŋ, o ba boɔrɔ ka te erɛ te taaba meŋ yɛlɛ naŋ ba seŋ neŋ. (Dut. 32:​3, 4; Maik. 6:8; Zek. 7:9) Aŋa mannoo poɔŋ, daŋyele Aizeeya saŋa na Jehoova da woŋee a Izerayɛl biiri na baŋ da erɛ potu-yɛlɛ na ‘kuori.’ (Kanne Aizeeya 5:7.) Jehoova da tagɛɛ a Izerayɛl biiri naŋ da baŋ perɛ a zagre o Bege a kyɛ erɛ ba taaba potu-yɛlɛ na toorii.—Aiz. 5:​5, 13.

4. Ka nobaŋ wa erɛ ba taaba yɛlɛ naŋ ba seŋ neŋ, wala ka Yezu maŋ teɛre? (Kaa a foto.)

⁴ Yezu nɔŋɛɛ dantorii, azuŋ o ba nɔŋ daŋkyagre. Saŋa na Yezu naŋ da tonɔ o naaŋ moɔloo toma na, bebiri kaŋa o da nyɛɛ dɔɔ kaŋa nu naŋ kpi. Nembao da kpɛɛ Yezu oŋ saŋ a dɔɔ baaloŋ. Kyɛ, a puoruu wedeɛreba sukyie naŋ da dare na poɔ da ba pɛle neŋ lɛ. Ba da maŋ boɔrɔŋ ka ba de a Pɛnnoo Bebiri bege na tonɔ neŋ toma a gaŋ baŋ na de sommo naŋ seŋ neŋ ko a dɔɔ. Bo teɛroŋ ka Yezu da taa kyaare gyogo na baŋ da taa na? ‘O poɔ da sããŋɛɛŋ ne lɛ ba sukyie naŋ dare.’—Mak. 3:​1-6.

5. Bonso aŋ ba seŋ ka te suuri iri yaga zaa saŋa na teŋ wa nyɛ daŋkyagre?

⁵ Te wa nyɛɛŋ ka Jehoova neŋ Yezu ba nɔŋ daŋkyagre. A ba e seɛlee te meŋ naŋ ba nɔnɔ daŋkyagre. (Efe. 4:26) Kyɛ, aseŋ ka te nyɔgrɔ te menne, bonso lɛ zaa te suuri naŋ iri seŋ, kyɛ te daaŋ koŋ baŋ iri daŋkyagre bare zaa. Ka teneeŋ vɛŋ ka te suuri iri te gaali, te na nyɛɛ sukyiri baaloŋ, ka te enne meŋ kyoɔre. (Yiem. 37:1, 8; Gyi. 1:20) Azuŋ, wala aŋ seŋ ka te e ka neɛ kaŋaŋ wa e te, kyɛbee a e neŋyuo kaŋa daŋkyagre yɛlɛ? Te na baŋ zannɛɛ yelnimizeɛ kaŋa yi Yezu zieŋ.

YƐLƐ YEZU NAŊ DA E SAŊA NA OŊ NYƐ NOBA NAŊ ERƐ BA TAABA YƐLƐ NAŊ BA SEŊ NEŊ

6. Bo daŋkyagre mine la ka Yezu da nyɛ saŋa na oŋ da be a teŋɛzuŋ na? (Kaa a foto.)

⁶ Saŋa na Yezu naŋ da be a teŋɛzuŋ na, o da nyɛɛ daŋkyagre yaga. O da nyɛɛ lɛ na a puoruu wedeɛreba naŋ da dɔgrɔ ba taaba naŋ ba taa arezi-bɛrɛ na. (Mat. 23:​2-4) O da nyɛɛ lɛ na a Urom nembɛrɛ naŋ da dɔgrɔ noba na. Azuŋ, a Gyuu noba kpoŋ zie zaa da boɔrɛɛ son-meŋɛ yi a Urom noba nuuriŋ. Ba mine gba da wa laŋɛɛ taa a de noɔreyeni zɔɔrɔ neŋ a Urom noba. Kyɛ, Yezu da ba de o meŋɛ poɔ a noba ŋa poɔŋ, a meŋ iri zɔɔrɔ neŋ a Urom noba ka o soŋ ka ba iri ba naaloŋ na bare. Saŋa na Yezu naŋ wa baŋ ka noba mine da boɔrɔŋ ka ba kaa iri Yezu ka o e naa na, o da wɛlɛɛ o meŋɛ yi ba zieŋ.—Gyn. 6:15.

7-8. Saŋa na Yezu naŋ da be a teŋɛzuŋ na, bonso oŋ da ba moɔrɔ ka o iri daŋkyagre bare? (Gyɔɔn 18:36)

⁷ Saŋa na Yezu naŋ da be a teŋɛzuŋ na, o da ba de o meŋɛ eŋ naaŋ di yɛlɛ poɔŋ a moɔrɔ ka o iri daŋkyagre bare. Ananso la wala? Yezu da baŋɛɛŋ ka Jehoova ba maale nensaaleba ka ba dire naaŋ a kaara ba menne. (Yiem. 146:3; Jer. 10:23) Nensaaleba koŋ baŋ iri neɛ na meŋɛ naŋ waana neŋ daŋkyagre bare. Setaana a Dɛɛvul la a donɛɛ ŋa naa, azuŋ ona la de o kpeɛ̃o ferɛ neŋ noba baŋ erɛ ba taaba yɛlɛ naŋ ba seŋ neŋ. (Gyn. 8:44; Efe. 2:2) Te naŋ e noba naŋ ba pɛgeyi na zuŋ, saŋa kaŋa te maŋ taaɛ poteɛre soŋ, kyɛ ho maŋ wa baŋna ka te erɛɛ te taaba yɛlɛ naŋ ba seŋ neŋ.—Ikil. 7:20.

⁸ Yezu da baŋɛɛŋ ka Naaŋmen Naaloŋ na yoŋ la na toɔ̃ iri daŋkyagre zaa bare kpɛlɛŋkpɛlɛŋ. Azuŋ, o da de la o wagre kpoŋ zie zaa ane o faŋa zaa ‘moɔlɔ a Naaŋmen Naaloŋ duorisoŋ korɔ noba.’ (Luk. 8:1) O da vɛŋɛɛŋ ka “noba naŋ mɔɔrɔ ba mɔɔbo zaa a tuuro Naaŋmen bege” na baŋ ka bebiri kaŋa daŋkyagre ane potu-yɛlɛ na baareŋ kpɛlɛŋkpɛlɛŋ. (Mat. 5:6; Luk. 18:​7, 8) Nensaaleba gɔmenante koŋ baŋ iri daŋkyagre bare. Naaŋmen Naaloŋ yoŋ na toɔ̃ e lɛ. Naaŋmen Naaloŋ na “ba yi a tendaa ŋa poɔ.”—Kanne Gyɔɔn 18:36.

TƆGLƆ YEZU SAŊA NA HOŊ WA NYƐRƐ DAŊKYAGRE

9. Boŋ vɛŋ hoŋ sagedi ka Naaŋmen Naaloŋ na iree daŋkyagre zaa bare?

⁹ Zenɛ ŋa ka daŋkyagre bebe yaga zaa a gaŋ saŋa na Yezu naŋ da be a teŋɛzuŋ na. Setaana ane noba naŋ ba pɛgeyi la vɛŋ ka daŋkyagre maaleŋ bebe yaga zaa a “bebi-baaree saŋa.” (2 Tim. 3:​1-5, 13; Yel. 12:12) Te meŋ baŋɛɛŋ ka Naaŋmen Naaloŋ yoŋ la na baŋ iri daŋkyagre zaa bare. Te arɛɛ Naaŋmen Naaloŋ na puoriŋ, azuŋ ka nobaŋ iri de taawae ba nembɛrɛ zuŋ a boɔrɔ ka ba iri daŋkyagre bare, te ba maŋ de te nu eŋnɛ a poɔŋ. Te de te yɔɔpɔge Stacy zemmo yɛlɛ wuli a muni.a Sɛre oŋ na wa zanne a yelmeŋɛ na, o da maŋ te poɔ la noba mine poɔŋ baŋ iri zɔɔrɔ neŋ noba naŋ waana neŋ daŋkyagre na. Kyɛ, o da nyɛɛŋ ka yɛlɛ na oŋ erɛ na koŋ baŋ soŋ noba. O yeleeŋ ka: “Ka maaŋ wa poɔ a taawae derebɛ poɔŋ, N da maŋ soorɛɛ N meŋɛ ka, a yɛlɛ ŋa na baŋ iree daŋkyagre bare yɛŋ? Pampana ŋa N arɛɛ Naaŋmen Naaloŋ na puoriŋ. A Naaloŋ na iree daŋkyagre bare. N baŋɛɛŋ ka Jehoova la na baŋ zɔɔtoɔ̃ noba naŋ erɛ ba taaba potu-yɛlɛ a baare ba yɛlɛ kpɛlɛŋkpɛlɛŋ.”—Yiem. 72:​1, 4.

10. Aŋa lɛ na Matio 5:​43-48 naŋ wuli na, bonso teŋ ba boɔrɔ ka te leɛre paalonne bege kyɛbee a soŋ ka ba iri a gɔmenante bare? (Kaa a foto.)

¹⁰ Noba mine maŋ de la ba menne te poɔ nensaaleba laŋnoɔre yelsɛgree poɔŋ a moɔrɔ ka ba iri gɔmenante naŋ vɛŋ baŋ tuoro daŋkyagre na. Daŋkyagre na baŋ tuoro zuŋ, a maŋ vɛŋeŋ ka ba mine suuri iri yaga, baŋ e yɛlɛ naŋ ba seŋ neŋ, a pere ba taaba. Kyɛ, Yezu ba wuli te ka te erɛ lɛ. (Efe. 4:31) Te yɔɔdɔɔ Jeffrey yeleeŋ ka: “N wa nyɛɛŋ ka ka nobaŋ iri taawae ba nembɛrɛ zuŋ a erɛ yɛlɛ emmaaroŋ soriŋ, kyɛ a ba maŋ kɔɔre ka ba suuri iri baŋ sããna boma, a zuuro boma, a lɛ pere ba taaba meŋ.” Kyɛ, Yezu wuli teŋ ka te wulo noba zaa nɔmmo, haali noba naŋ ba sage te wuluu di a dɔgrɔ te. (Kanne Matio 5:​43-48.) Te naŋ e Yezu potuuribo zuŋ, te boɔrɔŋ ka te de o wuluu zaa tonɔ neŋ toma.

11. Bonso aŋ na baŋ e kpeɛŋaa saŋa kaŋa ka te tɔglɔ Yezu?

¹¹ Yelmeŋɛ la, te baŋɛɛŋ ka Naaŋmen Naaloŋ yoŋ la na iri daŋkyagre bare kpɛlɛŋkpɛlɛŋ. Kyɛ, ka teneeŋ wa tuore daŋkyagre, a maŋ eɛ kpeɛŋaa ko te ka te tɔglɔ Yezu. Te yɔɔpɔge Janiya neŋ neɛ kaŋa da laŋ erɛɛ yɛlɛ ka o soba kaa o eŋgane kala zuŋ a e o yɛlɛ naŋ ba seŋ neŋ. Ŋaaŋ oŋ yeli: “N suuri da ireeŋ yaga zaa. A yɛlɛ da kpɛ maŋ yaga maŋ boɔrɔ ka N e yelkaŋa yaa a sane. A da waɛ N teɛroŋ poɔŋ ka N te poɔ yelsɛgraa kaŋa naŋ zɔɔrɔ neŋ a daŋkyagre yɛlɛ ŋa. N da teɛre ka lɛ eebo na vɛŋeŋ ka N suuri mãã.” Kyɛ, Janiya wa nyɛɛŋ ka aseŋ ka o leɛre o teɛroŋ. O yeleeŋ ka: “N da vɛŋɛɛŋ ka noba yel-eree leɛre N teɛroŋ, azuŋ N da ba lɛ dɛle Jehoova, kyɛ N da leɛ dɛlɛɛ nensaaleba. Azuŋ, N da ba laŋna neŋ noba naŋ taa a teɛrɛ ŋa taa.” Aseŋ ka te kaara te menne velaa a ta wa vɛnɛ ka suuri e ka te de te menne te eŋ a donɛɛ ŋa nadi yɛlɛ, kyɛbee ba laŋ zemmo yelbawoŋtaa poɔŋ.—Gyn. 15:19.

12. Bonso aŋ seŋ ka te kaara soŋ a kyaare yɛlɛ na teŋ kanna a kyɛ kyɛllɛ zieŋ soŋ?

¹² Ka noba mineŋ wa e te yɛlɛ naŋ ba seŋ neŋ, bo yɛlɛŋ na toɔ̃ vɛŋ ka te suuri ta iri yaga? Noba mine bebeŋ, ba ba kanna daŋkyagre yɛlɛ, kyɛbee a kyɛllaa bee a kaara a vidiori. Yɛlɛ na mine baŋ maŋ de eŋ intanɛt zuŋ na maŋ wulee daŋkyagre, ane yɛlɛ a gɔmenante naŋ ba erɛ soŋ. Saŋa kaŋa, duori-enneba maŋ wulee teɛroŋ na baŋ taa kyaare yɛlɛ mine, kyɛ a yelmeŋɛ maŋ naane lɛ. Haali ka teneeŋ woŋ yelkaŋa naŋ e yelmeŋɛ a kyaare daŋkyagre, a na somaŋ ka te teɛrɛ a yɛlɛ yaga zaa bee? Ka teneeŋ de te wagre kpoŋ zie zaa a kanna kyɛbee a kyɛllɛ a duoro ŋa taa, te suuri na iriŋ ka te enne meŋ kyoɔre. (Yeng. 24:10) Ka teneeŋ ba kaa soŋ te na inniŋ ka Naaŋmen Naaloŋ na yoŋ na baŋ iri daŋkyagre bare.

13. Sobuo ka a Baabole kannoo na toɔ̃ soŋ te ka te taa teɛroŋ naŋ soma a kyaare daŋkyagre?

¹³ Ka teneeŋ maŋ kanna a Baabole a teɛrɛ o poɔ yɛlɛ gɛrɛ tɔɔre, a na soŋ teŋ ka te are daŋkyagre noɔreŋ. Saŋa na te yɔɔpɔge Alia naŋ wa nyɛ lɛ na noba naŋ maŋ erɛ o gbandige noba nimikpɛ yɛlɛ na, a da dɔɔnooŋ yaga zaa. A da waa ŋa noba naŋ erɛ ba a nimikpɛ yɛlɛ na ba nyɛrɛ totage zaa. O yeleeŋ ka: “N da leɛ soorɛɛ N meŋɛ ka, ‘N sereŋ sagedieŋ ka Jehoova na iree daŋkyagre zaa bare bee?’ Ana saŋa la maŋ da kanne Gyoob 34:​22-29. A sɛgre ŋa vɛŋɛɛŋ maŋ baŋ ka Jehoova nyɛrɛɛ yelzaa. Ona yoŋ la taa dantorii meŋɛmeŋɛ. Ona yoŋ na baŋ iri a yɛlɛ ama zaa bare.” Te kyɛnlɛŋ ka Naaŋmen Naaloŋ na wa iri daŋkyagre zaa bare, kyɛ a fɛrɛɛŋ ka te baŋ lɛ teŋ na toɔ̃ are daŋkyagre noɔreŋ pampana.

YƐLƐ TEŊ NA BAŊ E PAMPANA ŊA

14. Bo yɛlɛ teŋ na baŋ erɛ pampana ŋa a kyaare daŋkyagre? (Kolosi 3:​10, 11)

¹⁴ Te koŋ baŋ fere noba ka ba erɛ yelsonne, kyɛ tenee yɛŋ na baŋ moɔ̃ la niŋe a erɛ yɛlɛ naŋ soma. Aŋa lɛ na teŋ nyɛ a zannoo ŋa poɔŋ na, te tɔglɛɛ Yezu a meŋ wulo te taaba nɔmmo. A nɔmmo ŋa na toɔ̃ vɛŋeŋ ka te wulo noba gba naŋ erɛ ba taaba yɛlɛ naŋ ba seŋ neŋ gyeremɛ. (Mat. 7:12; Uro. 12:17) Ka teneeŋ wa wulo te taaba nimimaaroŋ neŋ nɔmmo, Jehoova poɔ maŋ pɛleŋ.—Kanne Kolosi 3:​10, 11.

15. Ka teneeŋ wulo noba a Baabole poɔ yɛlɛ, sobuo aŋ na toɔ̃ soŋ ba?

¹⁵ Sori na kaŋa teŋ na baŋ tu a soŋ noba la teŋ na manna a Baabole poɔ yɛlɛ korɔ ba. Bonso teŋ yeli lɛ? Ananso la ka, ka neɛŋ taa sutoloŋ seŋ wala, kyɛ “Jehoova bammo” na toɔ̃ leɛrɛɛ o soba ka o taa gyogri aŋa emmaaroŋ ane nimimaaroŋ ko noba. (Aiz. 11:​6, 7, 9) Sɛre ka dɔɔ kaŋa baŋ boɔlɔ Jemal na zanne a yelmeŋɛ na, o da de la o meŋɛ te poɔ taawae derebɛ mine poɔŋ baŋ iri zɔɔrɔ neŋ ba paaloŋ gɔmenante naŋ da erɛ ba potu-yɛlɛ na. O yeleeŋ ka: “Ho koŋ baŋ fere noba ka ba leɛre ba gyogri. Neɛzaa naaneŋ fere ma maŋ leɛre N gyogo, kyɛ a Baabole poɔ yɛlɛ na maŋ zanne na la soŋ ma maŋ leɛre N gyogo.” Yɛlɛ na Jemal naŋ da zanna na da vɛŋɛɛŋ oŋ bare zɔɔzɔɔ yɛlɛ. Ka teneeŋ wulo noba a Baabole poɔ yɛlɛ, ba na leɛrɛɛ ba eebo, azuŋ ba koŋ lɛ erɛ ba taaba nimikpɛ yɛlɛ.

16. Bonso hoŋ boɔrɔ ka ho manna Naaŋmen Naaloŋ na yɛlɛ korɔ noba?

¹⁶ Te maŋ tɔglɛɛ Yezu a manna korɔ noba ka Naaŋmen Naaloŋ yoŋ la na baŋ iri daŋkyagre bare kpɛlɛŋkpɛlɛŋ. A yɛlɛ ŋa naŋ terɛ teɛretɔ ŋa na toɔ̃ dii la noba naŋ tuoro daŋkyagre sukyie. (Jer. 29:11) Stacy teŋ yeli o yɛlɛ a zannoo ŋa poɔŋ na yeleeŋ ka: “Yɛlɛ na maŋ zanne yi a Baabole poɔŋ na soŋ maŋ maŋ toɔ̃ are daŋkyagre na maŋ nyɛ a kyɛ tuore na noɔreŋ. Jehoova maŋ tu la a Baabole poɔ yɛlɛ a diire te sukyie.” Ka hooŋ boɔrɔ ka ho manne yɛlɛ a Baabole naŋ yeli kyaare daŋkyagre ka a tɔ noba sukyie, aseŋ ka ho nare ho meŋɛ velaa. Ka hooŋ sage yɛlɛ na hoŋ zanne a zannoo ŋa poɔŋ na di yaga zaa, ana eɛ mɔlɔ ko bo ka ho yi gyeremɛ poɔŋ a manne a yɛlɛ ko noba saŋa na hoŋ be sakuuŋ bee tomazieŋ.b

17. Sobuo ka Jehoova tu a soŋ te teŋ toɔ̃ are daŋkyagre teŋ tuoro pampana noɔreŋ?

¹⁷ A yɛlɛ nembao zie la ka, Setaana naŋ la “a tendaa naa,” azuŋ te baŋɛɛŋ ka te na tuoree daŋkyagre. Kyɛ, te taaɛ teɛretɔ, bonso ba na “digi” la Setaana bare. (Gyn. 12:31) Jehoova tu la a Baabole poɔŋ a vɛŋ teŋ baŋ ka o ba nɔŋ daŋkyagre yɛlɛ. O lɛ vɛŋɛɛŋ teŋ baŋ ka o poɔ maŋ sããŋeŋ saŋa na oŋ wa nyɛ noba naŋ tuoro daŋkyagre. (Yiem. 34:​17-19) Jehoova tu la Yezu eŋɛŋ a wuli te yɛlɛ naŋ seŋ ka te e ka teneeŋ wa tuoro daŋkyagre, ane lɛ na o Naaloŋ naŋ na wa iri daŋkyagre zaa bare kpɛlɛŋkpɛlɛŋ. (2 Pit. 3:13) Azuŋ, yɛ vɛŋ ka te de eŋnyagroŋ a moɔlɔ a Naaloŋ duorisoŋ, a kyɛ taa sagediibu meŋ ka bebiri kaŋa waanaŋ ka a tendaa zaa na paale neŋ dantorii ane sontuubu.—Aiz. 9:7.