Moɔ̃ Niŋe Sonnɔ Noba Naŋ Sagede A Duorisoŋ

1. Ka teneeŋ wa moɔle a duorisoŋ ko noba, wala baŋ maŋ e ba yɛlɛ? (Tom. 13:47, 48; 16:14, 15)

SAŊA na noba yaga naŋ da woŋ a duorisoŋ na a dɛndɛŋ Kristabiiri naŋ da moɔlɔ na, ba da lonnee wieoŋ a sagede a yɛlɛ, a wa leɛ Kristabiiri. (Kanne Toma 13:47, 48; 16:14, 15.) Zenɛ ŋa meŋ, ka noba mineŋ wa woŋ a duorisoŋ a dɛndɛŋ saŋa, ba poore zaaŋ maŋ pɛle. A piilee saŋa, noba mine yel-eree maŋ wuliŋ ka ba poɔ ba pɛle neŋ a Naaloŋ duorisoŋ, kyɛ a puoriŋ ba maŋ boɔrɔŋ ka ba zanne Naaŋmen yɛlɛ. Ka teneeŋ wa nyɛ sukyiri sonne deme a naaŋ moɔloo poɔŋ, wala aŋ seŋ ka te e?

2. Sobuo ka te naaŋ moɔloo toma na waa ŋa neɛ naŋ maala gaadin?

² Te de yelmannaa kaŋa wuli a muni. Te na baŋ de la a naaŋ moɔloo toma manne neŋ neɛ naŋ maale gaadin a bore boma o poɔŋ. Wagre naŋ gɛrɛ poɔŋ na ka a boma mineŋ wa buli a wɔŋ wɔmɔ, a gaadin soba maŋ pɔrɛɛ a wɔmɔ, a kyɛ naŋ moɔ̃ niŋe yɔgrɔ a tɛne a borɔ bon yobo mine meŋ. Ka teneeŋ meŋ wa tonɔ a naaŋ moɔloo toma, a nyɛ neɛ kaŋa naŋ sagede a yɛlɛ wieoŋ, te maŋ moɔrɛɛ te moɔbo zaa ka te soŋ o soba wieoŋ ka o wa leɛ Yezu potuuro. Kyɛ, te naŋ maŋ moɔ̃ la niŋe a sonnɔ noba naŋ ba sagede a duorisoŋ ka ba meŋ wa sagede a yɛlɛ. (Gyn. 4:35, 36) Ka teneeŋ vɛŋ ka te nimiri gaŋ teŋɛŋ ka te kaara ba yel-eree velaa, a na soŋ teŋ ka te de sommo naŋ seŋ neŋ ko ba. Ka teneeŋ wa pɔge neɛ kaŋa poɔ naŋ pɛle neŋ a duorisoŋ, wala aŋ seŋ ka te e? Wala teŋ na baŋ e a naŋ sonnɔ o soba ka o nyɛrɛ nimitɔɔre gaabo? Te na zannɛɛ a yɛlɛ ama a zannoo ŋa poɔŋ.

LƐ HOŊ NA TOƆ̃ E SOŊ NOBA NAŊ BOƆRƆ A DUORISOŊ

3. Ka teneeŋ wa pɔge noba naŋ boɔrɔ a duorisoŋ, wala teŋ na baŋ e? (1 Korinti 9:26)

³ Ka teneeŋ wa pɔge noba poɔ naŋ pɛle neŋ a duorisoŋ a naaŋ moɔloo poɔŋ, te maŋ boɔrɔŋ ka te soŋ ba ka ba zanne Jehoova yɛlɛ yaga. Azuŋ, a piilee dama diibu saŋa gba, kyɛ te na baŋ mannɛɛ te Baabole zannoo na yɛlɛ ko ba, a lɛ toŋboɔle ba ka ba wa te lammore na.​—Kanne 1 Korinti 9:26.

4. Manne neɛ kaŋa zemmo yɛlɛ naŋ wuli ka noba mine maŋ boɔrɔŋ ka ba zanne a Baabole wieoŋ.

⁴ Manne a Baabole zannoo yɛlɛ ko o soba. Noba na mine te ne ba naŋ maŋ di dama na maŋ boɔrɔŋ ka ba piili a Baabole zannoo wieoŋ. Aŋa mannoo poɔŋ, Thursday daare kaŋa pɔg-saraa kaŋa naŋ be Canada paaloŋ da gaaɛ te gyamaa poɔ naaŋ moɔloo toriko na kaŋa zie a te iri a Nyɛ Zeŋ Laafeɛ Tegitegilɛ! gambile na. Te yɔɔpɔge na da yelko la a pɔg-saraa ka te maŋ de la a gambile zanna a Baabole zaala zaala. A pɔg-saraa poɔ da pɛle neŋ la a zannoo yɛlɛ, azuŋ, o da de la o fone namba ko te yɔɔpɔge na. Ana bebiri na, a pɔg-saraa da sɛgɛɛ message a de toɔle ko te yɔɔpɔge na a soorɔ a zannoo yɛlɛ. Te yɔɔpɔge na da yeleeŋ ka a daagbuli baaraa saŋa o na waɛ o zie, kyɛ a pɔg-saraa da soorooŋ ka: “Ho na baŋ waɛ bieu? N koŋ erɛ yelzaa.” Friday daare ba da zannɛɛ a Baabole. Ana daagbuli na baaraa saŋa, a pɔg-saraa da waɛ te lammozie na, a naŋ moɔ̃ niŋe nyɛrɛ nimitɔɔre gaabo.

5. Wala teŋ na toɔ̃ e baŋ sori na aŋ seŋ ka te tu a manne a Baabole zannoo yɛlɛ ko neɛ kaŋa? (Kaa a fotori.)

⁵ Tɔɔ, te baŋɛɛŋ ka lɛ na a pɔg-saraa ŋa naŋ sagede a duorisoŋ wieoŋ na, lɛ naane ka neɛzaa na sagede a duorisoŋ. A maŋ fɛreŋ ka te nyɛ wagre ko ba mine sɛre kyɛ baŋ wa sagede a duorisoŋ. Saŋa kaŋa a maŋ fɛreŋ ka te de yɛlɛ naŋ pɛlɛ ba poɔ piili neŋ a dama diibu. Kyɛ, aseŋ ka te maŋ taa teɛroŋ naŋ soma, a de te yel-eree meŋ wuli ka te boɔrɛɛ noba yɛlɛ. Aminekaŋaŋ, lɛ na vɛŋeŋ ka o sage wieoŋ ka te zanne a Baabole. Sobuo teŋ na baŋ tu a manne a Baabole zannoo yɛlɛ ko ba? Ba soorɛɛ te yɔɔmine naŋ kyile a naaŋ moɔloo poɔŋ a soorebiri ŋa. Yɛ vɛŋ ka te nyɛ lɛ na baŋ iri a noɔre.

6. Bo yɛlɛ teŋ na baŋ yeli a soŋ neɛ ka o nyɛ ka a Baabole zannoo na toɔ̃ somooŋ?

⁶ A naaŋ moɔleba neŋ paaneere na baŋ da soore yɛlɛ a kyaare lɛ te neŋ noba naŋ na baŋ piili Baabole zannoo yeleeŋ ka, paalonne mine poɔŋ, ka hooŋ wa manna a Baabole zannoo yɛlɛ korɔ neɛ, a na somaŋ ka ho ta wa derɛ yelbie aŋa “Baabole zannoo yelsɛgraa,” kyɛbee “te maŋ wulee noba a Baabole” tonɔ neŋ toma. Ba yeleeŋ ka a na somaŋ ka te maŋ de yelbie aŋa “dama diibu,” ane “dama diibu naŋ na soŋ bo ka ho baŋ a Baabole poɔ yɛlɛ yaga” toŋ neŋ toma. Lɛ maŋ vɛŋeŋ aŋ e mɔlɔ ko noba ka ba sage a Baabole zannoo yɛlɛ. Ka hooŋ boɔrɔ ka yɛ tɔnne yɛ dama diibu na, ho na baŋ yeliŋ ka, “Lɛ na a Baabole naŋ iri zemmo yelnimizeere soorebie nɔɛ na somaŋ yaga.” Kyɛbee ka ho yelka, “A Baabole ba manna ŋmenpuore yɛlɛ yoŋ; kyɛ o poɔ yɛlɛ na baŋ soŋ teŋ te bebiri zaa yeltaree poɔŋ.” Ho na baŋ lɛ yeliŋ ka: “Ho na baŋ deɛ wagre fẽẽ lɛ ka te di o poɔ yɛlɛ dama. Ho na baŋ de la minti 10 bee 15 zanne yelnimizeɛ kaŋa.” Ka hooŋ de yelbie aŋa “bebiri zaa” kyɛbee “daagbuli zaa” toŋ neŋ toma, a na vɛŋeŋ ka o soba teɛre ka a eɛ ferebo ka yɛ maŋ zanne a Baabole bebiri zaa kyɛbee daagbuli zaa.

7. Boŋ maŋ soŋ noba mine baŋ woŋ yɛlɛ na baŋ zanna na muni soŋ? (1 Korinti 14:23-25)

⁷ Toŋboɔle ba ka ba wa a lammozie. Bitontona Pɔɔl saŋa na, ka noba mineŋ wa gaa a Kristabiiri lammore a dɛndɛŋ saŋa, a maŋ soŋ baŋ baŋ woŋ yɛlɛ na baŋ zanna na muni soŋ. (Kanne 1 Korinti 14:23-25.) Lɛ aŋ waa zenɛ ŋa meŋ. Ka noba naŋ zanna a Baaboleŋ wa waana te lammore na, a maŋ vɛŋeŋ baŋ nyɛ nimitɔɔre gaabo wieoŋ. Bo saŋa aŋ seŋ ka te toŋboɔle ba ka ba wa te lammozie na? Ka hooŋ kaa a Nyɛ Zeŋ Laafeɛ Tegitegilɛ! gane na zannoo 10, ho na nyɛŋ ka ba maŋ toŋboɔlɛɛ o soba ana zannoo na poɔŋ ka o wa te lammore na. Kyɛ, a ba seŋ ka ho kyɛnle ka a na saŋa na ta. A yi yɛ dɛndɛŋ dama diibu na poɔŋ, ho na baŋ toŋboɔlɛɛ o soba ka o wa te daagbuli baaraa lammo na. Ho na baŋ wuluuŋ a gyamaa poɔ yelyaga yelzu, kyɛbee yelnimizeɛ kaŋa teŋ na zanne a Kaakaara Ziduoruu Zannoo na poɔŋ.

8. Bo yɛlɛ teŋ na baŋ manne a kyaare te lammore na ko neɛ saŋa na teŋ wa tonɔ boɔloo? (Aizeeya 54:13)

⁸ Ka hooŋ wa tonɔ boɔlɔ o soba, somoo ka o baŋ ka te lammore na neŋ puoruu lammore na oŋ maŋ gɛrɛ na ba yitaa. Saŋa na Baabole zannezanna kaŋa naŋ da wa te lammozie a kyɛlle woŋ a Kaakaara Ziduoruu Zannoo baare na, o da soorɛɛ o wulwulo na ka, “Neɛ naŋ kaa a zannoo zu na baŋɛɛ neɛzaa yuori bee?” Te yɔɔpɔge na da iree a noɔre ka te zaa maŋ moɔrɔŋ ka te baŋ a lantaapuoruu noba zaa yoe, aŋa lɛ na teŋ baŋ te booree deme yoe na. A zannezanna da nyɛɛŋ ka lɛ naane ka yɛlɛ waa o misaŋ. Te na baŋ lɛ soŋɛɛ o soba ka o nyɛ ka soe yaga poɔŋ na, te lammore na eɛ a yoŋ. (Kanne Aizeeya 54:13.) Te maŋ gaaɛ te lammozie na ka te de puoruu ko Jehoova, a zanne o yɛlɛ, a kyɛ lɛ eŋ taa faŋa meŋ. (Hib. 2:12; 10:24, 25) Azuŋ baŋ maŋ sɛgre te lammore na yɛlɛ velaa zaa, ka lɛ na vɛŋ ka te zanne yɛlɛ aŋ na baŋ soŋ te te zemmo poɔŋ. Te ba maŋ erɛ sããkomyɛlɛ, kyɛbee a tuuro sããkommine yelturii te lammore na saŋa. (1 Kor. 14:40) Zie maŋ kyããneŋ soŋ zaa ka lɛ na vɛŋ ka te toɔ̃ zanne a yɛlɛ velaa. Te ba yele paati yɛlɛ be, bonso te ba derɛ te menne eŋnɛ naaŋ di yɛlɛ poɔŋ. Te ba derɛ te nu meŋ eŋnɛ noba mine laŋ zemmo yelbawoŋtaa yɛlɛ poɔŋ. Sɛre ka o soba na wa a lammozie na, a na somaŋ ka ho iri a vidio Boŋ Ka Te Maŋ Erɛ Te Zannoo Zie Naŋ? wuli o soba. Ana somooŋ ka o baŋ yɛlɛ teŋ maŋ erɛ te lammozie naŋ.

9-10. Ka hooŋ wa tonɔ boɔlɔ neɛ ka o wa a lammozie, wala hoŋ na baŋ e somoo ka o baŋ ka te ba maŋ ferɛ noba eŋnɛ te puoruu na poɔŋ? (Kaa a foto.)

⁹ Noba mine maŋ teɛreŋ ka ka ba naŋ wa te lammozie na, te na fere baŋ ka ba leɛ Jehoova Sieree Deme kaŋa. Azuŋ, dabeɛ̃ maŋ erɛ baŋ ka ba wa a lammozie. Vɛŋ ka o soba baŋ ka te boɔrɛɛ saamma yɛlɛ, kyɛ te ba maŋ fɛrɛ noba eŋnɛ te puoruu na poɔŋ, kyɛbee a maŋ fɛrɛ ba ka ba de ba menne eŋ a lammo poɔŋ. Booree deme neŋ ba bibiiri zaa na baŋ waŋ. A lammore saŋa te ba maŋ wɛle a bibiiri yi ba dɔgreba zieŋ. Ba neŋ ba dɔgreba zaa maŋ laŋ zeŋeŋ a zanna a yɛlɛ. A maŋ vɛŋeŋ ka a bidɔgreba baŋ zie na ba biiri naŋ be, ane yɛlɛ na baŋ zanna. (Dut. 31:12) Te ba deɛrɛ kɔlɛsin kyɛbee a maŋ de boma ko noba ka ba de libie eŋ. Yezu da yeleeŋ ka: “Ba de ko yɛŋ weɛ lɛ, azuŋ yɛ meŋ de korɔ ba weɛ lɛ.” (Mat. 10:8) Te maŋ de la a kawane ŋa tonɔ neŋ toma. Vɛŋ ka o soba baŋ ka a ba seŋ ka o su boma daa naŋ e tuo wa a lammozie, bonso nensaalaa sukyiriŋ ka Naaŋmen maŋ kaara, o ba kaara boma te naŋ su.​—1 Saa. 16:7.

¹⁰ Ka o sobaŋ wa wa a lammozie, koo waayaane a vɛŋ ka o sukyiri mãã. De o gaaneŋ a lantaapuoruu nembɛrɛ ane a naaŋ moɔleba mine zie ka o te puore ba. Ka a sobaŋ baŋ ka a lantaapuoruu noba boɔrɛɛ o yɛlɛ, a na tɔɛ o sukyiri ka o boɔrɔ ka o leɛ wa. Ka a lammoŋ wa piili kyɛ ka o soba ba taa Baabole, ho na baŋ yuo la ho Baabole ka ho ne o zaa maŋ kanne o poɔ yɛlɛ. Somoo ka o maŋ yuo a Baabole sɛgre na a yelyaga soba naŋ de terɛ o yelyaga na, a deɛ gama na teŋ maŋ zanna te zannoo zieŋ na mine koo.

LƐ HOŊ NA TOƆ̃ SOŊ O SOBA SAŊA NA YƐŊ WA ZANNA A BAABOLE

11. Wala hoŋ na baŋ e a de wuli ka ho ba boɔrɔ ka ho sãã a die daana wagre kyɛbee o yelsɛgree?

¹¹ Bo yɛlɛŋ seŋ ka a be te teɛroŋ poɔŋ saŋa na te neŋ neɛ kaŋa naŋ wa zanna a Baabole na? De a die daana yelsɛgraa ane wagre na oŋ ko bo na tonɔ neŋ toma. Aŋa mannoo poɔŋ, ka hooŋ biŋ wagre kaŋa ka ho na waɛ o zie, mɔɔ a gaa ana wagre na. Haali ka noba naŋ be ho gbandige naŋ ba de ba wagre tonɔ neŋ toma, kyɛ a ba seŋ ka ho tɔglɔ ba. Ane meŋ, ka ho ne o wa piili a zannoo, a na somaŋ ka yɛ zanne a yɛlɛ fẽẽ lɛ. Noba mine naŋ kyile a naaŋ moɔloo poɔŋ yeleeŋ ka, a na somaŋ ka ho baare a zannoo ka saŋa na o soba naŋ ko bo naŋ ba ta gba, haali ka o sobaŋ boɔrɔ ka o zanne yɛlɛ yaga poɔ. Ta maŋ yele yɛlɛ yaga. Ko a die daana vuo ka o yeli yɛlɛ naŋ be o sukyiriŋ.​—Yeng. 10:19.

12. Ka te neŋ o sobaŋ wa piili zanna a Baabole, bo sommo aŋ seŋ ka te de koo?

¹² Saŋa na ho neŋ o soba naŋ piili a Baabole zannoo na, mɔɔ a somoo ka o wa baŋ Jehoova neŋ Yezu soŋ. Lɛ na vɛŋeŋ ka o taa nɔmmo naŋ e zuluŋ ko ba. Ka hooŋ maŋ tage o teɛroŋ eŋ yɛlɛ naŋ be a Baabole poɔŋ, a na somooŋ yaga. Kaara soŋ a ta wa tagra o soba teɛroŋ waana ho meŋɛ eŋɛŋ, kyɛbee ka ho boɔrɔ ka ho wuli o soba ka ho baŋɛɛ a Baabole poɔ yɛlɛ soŋ. (Tom. 10:25, 26) Bitontona Pɔɔl maŋ de la o wuluu kyaare Yezu eŋɛŋ, bonso ona la ka Jehoova toŋ ka o wa wuli te o yɛlɛ, ka lɛ vɛŋ ka te nɔmoo. (1 Kor. 2:1, 2) Pɔɔl da vɛŋɛɛŋ aŋ pɛle ka aseŋ ka te soŋ te Baabole zannezanneba ka ba taa gyog-sonne. O da de la a gyog-sonne ŋa manne neŋ salema, ware, ane kusibɛ daa naŋ ba wono. (1 Kor. 3:11-15) A gyogri ŋa mine la, sagediibu, yɛŋ naŋ e zuluŋ, yɛlɛ pare bammo, ane Jehoova zoobu. (Yiem. 19:9, 10; Yeng. 3:13-15; 1 Pit. 1:7) Tɔglɔ Pɔɔl a wuli ho Baabole zannezanna na ka o taa sagediibu naŋ e kpeɛŋaa Jehoova eŋɛŋ, a kyɛ somoo ka o ne o niiloŋ na meŋ maaleŋ e kpeɛŋaa.​—2 Kor. 1:24.

13. Saŋa na teŋ sonnɔ o soba na, bo yɛlɛ teŋ na baŋ e a de wuli ka te taaɛ kannyiri neŋ yɛlɛ muni wommu koo? (2 Korinti 10:4, 5) (Kaa a foto.)

¹³ Tɔglɔ Yezu a maŋ dire kannyiri korɔ o soba, saŋa na hoŋ wuluu a yɛlɛ na. Taa yɛlɛ muni wommu meŋ koo. Ta maŋ sooroo soorebie naŋ na emoo viŋ. Ka hooŋ wa wuluu yɛlɛ mine ka a e kpeɛŋaa koo ka o woŋ a muni, baraa a kyɛ vɛŋ ka yɛ tɔnne a zannoo. A puoriŋ, yɛ na baŋ leɛ wa zannɛɛ a yɛlɛ. Ta wa ferɛ o soba ka o sage yɛlɛ mine hoŋ wuluu a di, kyɛ hooŋ ko o soba wagre ka o teɛre a yɛlɛ gaa tɔɔre a toɔ̃ leɛre o teɛroŋ. (Gyn. 16:12; Kol. 2:6, 7) A Baabole de la zirii wuluu na teŋ boɔrɔ ka o soba bare na manne neŋ teŋ boɔrɔ ka te zɔɔ faa sɔglezi-kpeɛŋaa kaŋa. (Kanne 2 Korinti 10:4, 5.) Te de ka ho Baabole zannezanna na be la a sɔglezi-kpeɛŋaa na hoŋ boɔrɔ ka ho zɔɔ faa na poɔŋ, ho na ŋmorɛɛ a zie eŋ o soba bee? Ai, ho na somooŋ ka o vɛŋ ka Jehoova e o Sɔglezie.​—Yiem. 91:9.

LƐ HOŊ NA TOƆ̃ SOŊ NEMPAALBA NAŊ WA TE LAMMOZIE NA

14. Bo yɛlɛ aŋ seŋ ka te erɛ korɔ nempaalba naŋ wa te lammozie na?

¹⁴ Lɛ zaa neɛ sããkomyɛlɛ naŋ waa, arezie onaŋ taa, kyɛbee bale o naŋ yi, kyɛ ka o naŋ wa te lammozie na, Jehoova boɔrɔŋ ka te wulo o soba nɔmmo. (Gyi. 2:1-4, 9) Wala teŋ na baŋ e a wuli noba naŋ wa te lammozie na nɔmmo?

15-16. Wala teŋ na baŋ e a soŋ noba naŋ wa te lammozie na ka ba sukyiri mãã?

¹⁵ Noba mine yelbaŋ zuŋ baŋ maŋ wa te lammozie na, ba mine meŋ neɛ kaŋa naŋ be ziyuo kaŋa la maŋ eŋ ba faŋa ka ba wa a lammozie. Azuŋ, ka neɛ kaŋaŋ wa wa a lammozie, te na baŋ gaaɛ o zie ka te ne o te di dama. Ho na baŋ ko oŋ waayaane. Kyɛ, ta wa erɛ yɛlɛ naŋ na emoo viŋ. Vɛŋ ka o zeŋ peɛle bo. Ho na baŋ yuo la ho Baabole ane ho zannoo gama ka yɛ zaa kaara, kyɛbee ka ho deɛ mine koo. Teɛre yɛlɛ mine meŋ hoŋ na baŋ lɛ e a vɛŋ ka ba sukyiri mãã. Bebiri kaŋa, dɔɔ kaŋa naŋ wa te Lammozie na da yelko la te yɔɔdɔɔ naŋ koo waayaane na ka vi zaaŋ kpɛ o, bonso boma na oŋ su na ba seŋ neŋ. Te yɔɔdɔɔ na da yelko oŋ ka Jehoova Sieree Deme eɛ nensaaleba aŋa lɛ na oŋ waa na, azuŋ a ba seŋ ka o zoro te dabeɛ̃. A yɛlɛ ŋa da vɛŋɛɛŋ ka a dɔɔ sukyiri mãã. A dɔɔ da nyɛɛ nimitɔɔre gaabo a te de suobu, o daaŋ ba inni yɛlɛ na te yɔɔdɔɔ ŋa naŋ yelkoo na. Kyɛ, aseŋ ka te kaara soŋ. Ka ho neŋ noba naŋ wa te lammozie naŋ wa dire dama, de ho yel-eree wuli ka ho boɔrɛɛ ba yɛlɛ, kyɛ ta soorɔ ba soorebie a kyaare yɛlɛ naŋ ba e ho yɛlɛ.​—1 Pit. 4:15.

¹⁶ Ka te ne baŋ wa dire dama, aseŋ ka te wulo ba gyeremɛ. Ka teneeŋ wa taa toma a lammozie, kyɛbee a ire yɛlɛ nɔɛ, a ba seŋ ka te yele yɛlɛ naŋ ba seŋ neŋ a kyaara noba naŋ ba puoro Jehoova, kyɛbee yɛlɛ ba naŋ sagedi. Lɛ na vɛŋeŋ ka nempaalba naŋ wa te lammozie na sukyiri mãã. A ba seŋ ka te yele yɛlɛ naŋ na vɛŋ ka ba koŋ lɛ boɔrɔ ka ba wa a lammozie, kyɛbee ka ba teɛre ka te toorɔ baŋ. (Tit. 2:8; 3:2) Aŋa mannoo poɔŋ, a ba seŋ ka te yele yelfaare a kyaara yɛlɛ na baŋ sagedi na. (2 Kor. 6:3) Te yɔɔdɔba naŋ terɛ gyamaa poɔ yelyaga la seŋ ka ba kaa a yɛlɛ ŋa zie soŋ paa. Ka ba naŋ wa terɛ a yelyaga, aseŋ ka ba baŋ ka noba naŋ ba puoro Jehoova meŋ kyɛllɛɛ ba yɛlɛ na, azuŋ aseŋ ka ba wuli yɛlɛ mine ba naŋ ba baŋ muni ka a pɛle.

17. Ka teneeŋ wa nyɛ noba naŋ taa sukyiri soŋ a naaŋ moɔloo poɔŋ, wala aŋ seŋ ka te e?

¹⁷ Bebiri zaa a naaŋ moɔloo toma maŋ maaleŋ eɛ nimizeɛ yaga zaa. Te maŋ toɔ̃ pɔgɛɛ ‘noba naŋ boɔrɔ nyɔvore naŋ ba taa baaraa’ a naaŋ moɔloo poɔŋ. (Tom. 13:48) Ka teneeŋ wa pɔge ba, a ba seŋ ka te naara ka te manne a Baabole zannoo yɛlɛ ko ba, kyɛbee a toŋboɔle ba ka ba wa a lammozie. Ka teneeŋ e lɛ te na soŋ baŋ ka ba de gbɛɛ a wa kyɛnɛ a sori “naŋ gɛrɛ nyɔvore poɔ.”—Mat. 7:14.