Hammagedon Na Piilee A Izerayɛl Paaloŋ Poɔŋ Bee?​—Wala Ka A Baabole Yeli Kyaare A Yɛlɛ Ŋa?

A yi a Baabole poɔŋ, Hammagedon zɔɔre na ba e zɔɔre naŋ na be a donɛɛ lombore kaŋa yoŋ, kyɛ a Baabole wuleeŋ ka o eɛ zɔɔre nensaaleba gɔmenantere neŋ Naaŋmen naŋ na zɔɔ.

• “A eɛ yelbie malekefaare naŋ voore eŋ . . . a kyɛ yi gaa a namine naŋ be a tendaa zaa zu ziiri, ka ba te lagre ba lantaa a ko Naaŋmen a Kpeɛ̃o Zaa Daana zɔɔre bebi-kpoŋ na. . . . Ba da lagre baŋ lantaa a gaaneŋ zie na baŋ boɔlɔ Hiburu kɔkɔre poɔŋ ka Hammagedon na.”​—Yel-iriwulaa 16:14, 16.

A Hiburu yelbiri Har Meghid·dohnʹ la baŋ maŋ leɛre waneŋ “Hammagedon.” A Hiburu yelbiri ŋa tɛgɛ la “Mɛgido Taŋa.” Mɛgido da eɛ teŋkpɛŋ kaŋa naŋ da be takoreŋ saŋa Izerayɛl paaloŋ na. A yɛlɛ ŋa zuŋ ka noba mine sagedi ka ba na zɔɔ la Hammagedon zɔɔre na Izerayɛl paaloŋ poɔŋ. Kyɛ, a Mɛgido teŋɛ na zaa, kyɛbee teŋɛ naŋ be a Donɛɛ Sapare sɛŋ na ba e kpɛŋ ka “a namine naŋ be a tendaa zaa zu ziiri” neŋ ba sogyare na baŋ te lantaa beŋ.

Yɛlɛ na ba naŋ sɛge eŋ a Yel-iriwulaa gane na eɛ “yɛlɛ bigree,” kyɛbee te na baŋ yeliŋ ka a eɛ yɛlɛ naŋ are ko yɛlɛ mine. (Yel-iriwulaa 1:1) Hammagedon ba e zie kaŋa naŋ be a teŋɛzu zie kaŋaŋ, kyɛ o are ko la yɛlɛ naŋ na e a teŋɛzu zaa saŋa na a paalonne zaa naŋ na wa lantaa ka ba zɔɔ neŋ sori na Naaŋmen naŋ taa ka o dire naaloŋ na.​—Yel-iriwulaa 19:11-16, 19-21.