ZANNOO 30
Ho Nɔŋneba Naŋ Kpi Na Na Iri Yi La Kũũni Poɔŋ A Voorɔ!
Ka te nɔŋna kaŋaŋ wa kpi, te maŋ diree woore yaga zaa. A lɛ zuŋ ka a Baabole yelka te dɔndɔmɔ la kũũ. (1 Korinti 15:26) A yi a Zannoo 27 poɔŋ, te zannɛɛŋ ka Naaŋmen na iree kũũ a bare. Kyɛ, ka noba naŋ kpikpi na meŋ? A zannoo ŋa poɔŋ, te na zannɛɛ yɛlɛ yaga a kyaare noɔre kaŋa Jehoova naŋ eŋ. O eŋɛɛ noɔre ka o na seŋɛɛ noba turituri yaga ka ba iri yi kũũni poɔŋ a nyɛ zeŋ laafeɛ tegitegilɛ! A yɛlɛ ŋa na toɔ̃ nyɛɛ eebo bee? O na seŋ baŋ ka ba gaa sazu, bee o na seŋ baŋ ka ba zeŋ a teŋɛzuŋ?
1. Bo ka Jehoova boɔrɔ ka o e ko te nɔŋneba naŋ kpi na?
Jehoova eŋɛ nyagraŋ ka o seŋ noba naŋ kpi na ka ba iri yi kũũni poɔŋ a voorɔ. Dɔɔ kaŋa naŋ da taa sagediibu yaga baŋ boɔlɔ Gyoob da baŋɛɛŋ ka ka o naŋ kpi, Naaŋmen koŋ inni o yɛlɛ. O da yelko la Naaŋmen ka: “Ho na boɔleŋ, ka N sage [a yi N kũũ bogi poɔŋ].”—Kanne Joob 14:13-15.
2. Wala teŋ e baŋ ka Naaŋmen na seŋɛɛ noba naŋ kpi na?
Saŋa na Yezu naŋ da be a teŋɛzuŋ na, Naaŋmen da ko oŋ kpeɛ̃o ka o seŋ kũũni. Yezu da seŋɛɛ pɔgelee kaŋa naŋ da di yuoŋ pie neŋ ayi oŋ iri yi kũũni poɔŋ. A kyɛ da lɛ seŋ ko-pɔge kaŋa meŋ bidɔɔ oŋ iri yi kũũni poɔŋ a voorɔ. (Marko 5:41, 42; Luka 7:12-15) A lɛ puoreŋ, Yezu zɔmeŋɛ Laazoro da kpieŋ. Aneazaa ka Laazoro da kpieŋ baŋ uumoo beri anaare, kyɛ Yezu da seŋooŋ oŋ iri yi kũũni poɔŋ a voorɔ. Saŋa na Yezu naŋ da puore ko Naaŋmen baare na, o da are toree a kũũ bogi a kyɛ yel neŋ kɔkɔkpeɛŋaa ka: “Laazoro, iri yi wa!” “A kũũ da iri yi waɛ la.” Laazoro da iri yi la kũũni poɔŋ a voorɔ! (Gyɔɔn 11:43, 44) Laazoro booree deme neŋ o zɔmenne poɔ zaaŋ da pɛle ba naŋ leɛ nyɛ o!
3. Bo tamaaŋ bebe a ko ho nɔŋneba naŋ kpi na?
A Baabole eŋɛɛ noɔre ka: “Kũũ poɔ iri yiibu daŋ na bebeŋ.” (Toma 24:15) Noba na Yezu naŋ da seŋ saŋa na oŋ be a teŋɛzuŋ na da ba iri gaa sazu. (Gyɔɔn 3:13) O da seŋ baŋ baŋ iri yi kũũni poɔŋ a zeŋ a teŋɛzuŋ, lɛ da vɛŋɛɛŋ ka ba poɔ pɛle yaga zaa. Lɛ ka Yezu na lɛ e, o na seŋɛɛ noba turituri yaga ka ba iri yi kũũni poɔŋ a zeŋ a paradiisi teŋɛ na poɔŋ tegitegilɛ. Yezu yeleeŋ ka “banaŋ zaa naŋ be ba yaare poore” na nyɛ la kũũni leɛ iruu. Haali noba na nensaaleba naŋ inni ba yɛlɛ kyɛ baŋ be Naaŋmen teɛroŋ poɔ na zaaŋ na iri yi kũũni poɔŋ.—Gyɔɔn 5:28, 29.
ZANNE YƐLƐ YAGA POƆ
Ho na zanne nyɛɛ sieree naŋ sereŋ wuli ka Yezu taaɛ a kpeɛ̃o ka o seŋ noba naŋ kpi na. Ho na lɛ zanne nyɛɛ lɛ a kũũ poɔ leɛ iruu yɛlɛ naŋ na toɔ̃ dii ho sukyiri a ko bo tamaa meŋ.
4. Yezu wuleeŋ ka o taa la a kpeɛ̃o ka o seŋ kũũni
Zanne yɛlɛ yaga a kyaare yɛlɛ na Yezu naŋ da e ko o zɔmeŋɛ Laazoro. Kanne Gyɔɔn 11:14, 38-44, a kyɛ gyieli a soorebie ŋa yɛlɛ:
Wala teŋ e baŋ ka Laazoro sereŋ da kpieŋ?—Kaa o wɛlbo 39.
Ka Laazoroŋ da gaa sazu, ho teɛre ka Yezu da naŋ seŋooŋ ka o iri yi kũũni poɔŋ a zeŋ a teŋɛzuŋ kyɛ bee?
5. Ba na seŋɛɛ noba yaga ka ba iri yi kũũni poɔŋ!
Kanne Yieme 37:29, a kyɛ gyieli a soorebiri ŋa yɛlɛ:
Yeŋ ka a noba turituri yaga zaa na baŋ na seŋ ka ba iri yi kũũni poɔŋ na na be?
Noba naŋ puoro Jehoova yoŋ naane ka Yezu na seŋ. Kanne Toma 24:15, a kyɛ gyieli a soorebiri ŋa yɛlɛ:
Nembuo hoŋ kaara soriŋ ka ba seŋoo ka ho leɛ nyɛ o?
Teɛre a yɛlɛ a nyɛ: Yezu na baŋ seŋɛɛ neɛ ka o iri yi kũũni poɔŋ aŋa lɛ bi-saa naŋ na baŋ seŋ o bie naŋ gbire ka o iri lɛ na
6. A kũũ poɔ leɛ iruu yɛlɛ na baŋ dii la ho sukyiri a kyɛ ko bo tamaa meŋ
A Baabole wulee lɛ Yezu naŋ da seŋ dɔɔ kaŋa baŋ boɔlɔ Gyaruse pɔgeyaa kaŋa yi kũũni poɔŋ, a yɛlɛ ŋa toɔ̃ dii la noba yaga naŋ dire woore sukyie. Kanne a yɛlɛ ŋa a yi Luka 8:40-42, 49-56.
Sɛre ka Yezu na seŋ Gyaruse pɔgeyaa na, Yezu da yelko la Gyaruse ka: “Ta zoro dabeɛ̃. Hooŋ eŋ sage de.” (Kaa o wɛlbo 50.) Sobuo ka a kũũ poɔ leɛ iruu tamaa ŋa na baŋ soŋ bo . . .
saŋa na ho nɔŋna kaŋa naŋ kpi?
saŋa na ho naŋ tuoro yelkaŋa naŋ na toɔ̃ vɛŋ ka ho kɔŋ ho nyɔvore?
Ŋmɛ a VIDIO, a kyɛ gyieli a soorebiri ŋa yɛlɛ.
Sobuo ka a kũũ leɛ iruu tamaa na da dii Phelicity dɔgreba sukyie?
NOBA MINE MAŊ YELEŊ KA: “A na eɛ kpeɛŋaa ka noba naŋ kpi toɔ̃ iri yi kũũni poɔŋ a voorɔ.”
Wala hoŋ meŋ teɛre?
A Baabole sɛgre buo soba hoŋ na toɔ̃ de soŋ o soba ka o baŋ ka kũũ leɛ iruu sereŋ bebeŋ?
A ZANNOO YELNIMIZEERE
A Baabole eŋɛɛ noɔre ka noba turituri yaga naŋ kpi na iri yi la kũũni poɔŋ a voorɔ. Jehoova boɔrɔŋ ka o seŋ kũũni, o ko la Yezu kpeɛ̃o ka o seŋ kũũni.
Bo Hoŋ Zanne
Wala teŋ e baŋ ka Jehoova neŋ Yezu eŋɛ nyagraŋ ka ba seŋ kũũni?
Ka banaŋ seŋ noba turituri yaga zaa ka ba iri yi kũũni poɔŋ, ba na be la sazu bee teŋɛzuŋ? Bonso hoŋ yel lɛ?
Boŋ vɛŋ hoŋ sagedi peɛlaaŋ ka, ho na leɛ nyɛɛ ho nɔŋneba naŋ kpi na?
YƐLƐ MINE NAŊ LƐ BEBE
Kanne a gane ŋa a nyɛ yɛlɛ naŋ na toɔ̃ soŋ bo saŋa na hoŋ dire woore.
Ka neɛŋ wa dire woore, a Baabole kawane na toɔ̃ soŋɛɛ o soba bee?
Ka bibile kaŋaŋ wa kɔŋ o nɔŋna kaŋa kũũ poɔŋ, bo yɛlɛŋ na baŋ somoo?
Ba na seŋɛɛ noba mine yi kũũni poɔŋ ka ba iri do gaa sazu bee? Aŋ mine baŋ koŋ seŋ yi kũũni poɔŋ?