Te Zemmo Ane Te Naaŋ Moɔloo Toma Lammo Yelsɛgree Yelpeɛre Gane
© 2024 Watch Tower Bible and Tract Society of Pennsylvania
SEPTEMBER 2-8
BAABOLE POƆ YELNIMIZEERE | YIEME 79-81
Wulo Ka Ho Nɔnɔ La Jehoova Yuori Naŋ Taa Gyeremɛ Yaga Zaa Na
w17.02 9 wɛl. 5
A Yɔɔdeɛbo—O Eɛ “Kyɔɔtaa . . . Naŋ Soma” A Yi Te Saa Zie
5 Wala teŋ na baŋ e a de wuli ka te nɔnɔ la Jehoova yuori na? Te na toɔ̃ tu la te gyogri eŋɛŋ a e lɛ. Jehoova boɔrɔ ka te e forifori. (Kanne 1 Piita 1:15, 16.) Lɛ wuleeŋ ka aseŋ ka te puoro Jehoova yoŋ, a maŋ yi te sukyie zaa a sagra o nɔɛ. Haali ka ba naŋ wa dɔgrɔ te, aseŋ ka te maŋ moɔ te moɔbo zaa a de o sontuubu sowuli ane o bege na tonɔ neŋ toma. Ka teneeŋ wa erɛ a yelsonne ama zaa, te na vɛŋeŋ ka te kyaanee na kyããne ka lɛ vɛŋ ka Jehoova yuori na nyɛ pugibu. (Mat. 5:14-16) Ka teneeŋ wa e noba naŋ e forifori, a na vɛŋeŋ ka te de te zemmo yɛlɛ wuli ka, bege na Jehoova naŋ ko te na somaŋ. A lɛ vɛŋ ka a pɛle meŋ ka yɛlɛ na zaa Setaana naŋ yeli kyaare Jehoova na eɛ zirii. Te baŋɛɛŋ ka wagre mine te zaa na baŋ ŋmɛɛ gbɛɛ, kyɛ ka teneeŋ wa ŋmɛ gbɛɛ, aseŋ ka te maŋ yi te sukyieŋ a e kaŋdabaŋkalɛ, a lɛ tage te menne yi yelfaare na te naŋ erɛ aŋ ba de gyeremɛ korɔ Jehoova na eŋɛŋ.—Yiem. 79:9.
ijwbv 3 wɛl. 4-5
Urom 10:13—“Boɔle A Daana Yuori”
A yi a Baabole poɔŋ, ka ba naŋ yelka ‘boɔle Jehoova yuori’ lɛ wuleeŋ ka aseŋ ka te baŋ Naaŋmen yuori, a de a yuori meŋ tonɔ neŋ toma te puoruu poɔŋ. (Yieme 116:12-14) Kyɛ lɛ yoŋ ba seŋ, a na baŋ lɛ wuliŋ ka te dɛle Naaŋmen, a maŋ gaa o zie a te bɔ sommo meŋ.—Yieme 20:7; 99:6.
Naaŋmen yuori na da eɛ tegroŋ yaga zaa ko Yezu Krista. Azuŋ, saŋa na oŋ da wulo o potuuribo sori baŋ na toɔ̃ tu a maŋ puore na, o da piileeŋ a yelka: “Te Saa naŋ be sazuŋ, vɛŋ ka ho yuori pɛgeyi,” kyɛbee a e forifori. (Matio 6:9) Yezu da lɛ wuleeŋ ka, ka teneeŋ boɔrɔ ka te nyɛ nyɔvore naŋ ba taa baaraa a fɛrɛɛŋ ka te wa baŋ, a kyɛ nɔŋ Neɛ naŋ di a yuori Jehoova na, a lɛ sagra o nɔɛ meŋ.—Gyɔɔn 17:3, 6, 26.
Baabole Poɔ Yelsonne
it-2 111
Gyoosɛf
Gyoosɛf Yuori Na Da Eɛ Tegroŋ Yaga Zaa. Gyoosɛf arezie da eɛ tegroŋ yaga zaa Gyekɔb bidɔba na poɔŋ. Azuŋ saŋa kaŋa, ka a Baaboleŋ wa boɔle Gyoosɛf yuori, o na baŋ are ko la a Izerayɛl biiri zaa (Ym 80:1), kyɛbee a Izerayɛl biiri naŋ da be a Izerayɛl paaloŋ samun-gɔɔ sɛŋ na. (Ym 78:67; Em 5:6, 15; 6:6) Ba maŋ lɛ de la Gyoosɛf yuori na toŋ neŋ toma Baabole daŋyelbo poɔŋ. A yi Iziikiel yelnyɛ daŋyelbo na poɔŋ, ba da ko la Gyoosɛf kyɛŋ parɛɛ ayi (Iz 47:13). A teŋkpɛŋ na meŋ baŋ boɔlɔ ka ‘Jehoova Be La Be’ na poɔŋ, ba sɛgɛɛ Gyoosɛf yuori eŋ a denɔkpoŋ kaŋaŋ (Iz 48:32, 35). Saŋa na Jehoova naŋ da manna sori na oŋ na tu a de a Izerayɛl biiri wa lantaa ka ba de noɔreyeni puoruu na, a Baabole yeleeŋ ka Gyoosɛf eɛ a Izerayɛl paaloŋ kyɛlee kaŋa nabie, ka Gyuuda meŋ e a paaloŋ kyɛlee kaŋa nabie. (Iz 37:15-26) A yi Obadaiya daŋyelbo na poɔŋ, o da wuleeŋ ka “Gyoosɛf die” na soŋeŋ a sãã “Esɔ die” na (Ob 18). Zekaraiya daŋyelbo na meŋ da wuleeŋ ka Jehoova na faa la “Gyoosɛf die” na noba. (Zk 10:6) Saŋa na baŋ da wa boɔlɔ a siiloŋ poɔ Izerayɛl noba yoe na, ba da ba boɔle Eferiam yuori, kyɛ ba da boɔlɛɛ Gyoosɛf yɛŋ yuori.—Yel 7:8.
Baŋ boɔle Gyoosɛf yuori a yi yoe na baŋ sɛge eŋ Yel-iriwulaa 7:8 na wuleeŋ ka, daŋyelbo na Gyekɔb naŋ da yeli saŋa na oŋ da waana ka o kpi na da nyɛɛ eebo siiloŋ poɔ Izerayɛl eŋɛŋ. Lɛ wuleeŋ ka Gyekɔb Naaŋmen naŋ taa kpeɛ̃o yaga zaa na, Jehoova Naaŋmen la lɛ, da kaa iree Yezu Krista naŋ e a Pekyeeŋ-soŋ oŋ de o nyɔvore iri neŋ sareka ko “a peere.” (Gyn 10:11-16) Yezu Krista meŋ la Naaŋmen ŋmenpuoredie depare kuurii naŋ e kpeɛŋaa ka a siiloŋ poɔ Izerayɛl zaa are o zuŋ. (Ef 2:20-22; 1Pi 2:4-6) A Pekyeenɛ ŋa ane a Kuurii ŋa be la a Kpeɛ̃o Zaa Daana Naaŋmen na zie.—Gyn 1:1-3; Tm 7:56; Hi 10:12; de manne neŋ Mn 49:24, 25.
SEPTEMBER 9-15
BAABOLE POƆ YELNIMIZEERE YIEME 82-84
Vɛŋ Ka Apoɔsoe Na Hoŋ Taa Na Paale Ho Niŋe
wp16.6 8 wɛl. 2-3
Yɛlɛ Teŋ Na Baŋ Zanne Yi Sazu Nuuli Zieŋ
Noba naŋ da kpeɛrɛ Gyɛruzɛlɛm da baŋɛɛ teetaare yɛlɛ. A eɛ nuuli naŋ maŋ maale a kyogri die sazu ziiri mineŋ. A mine da maalɛɛ a kyogri Soolomoŋ ŋmenpuoredie na poɔŋ. Ka a teetaare ŋaŋ wa maale a kyogri a ŋmenpuoredie ziiri naŋ, a maŋ taaɛ gomeŋɛ, a maŋ toɔ̃ guolee a bilii meŋ ka neɛzaa ba dɔŋaa.
Koora bidɔba na kaŋa la da sɛge Yieme 84. Kyuuri ayoɔbo zaa poɔŋ, o da maŋ wa toŋɛɛ toma a ŋmenpuoredieŋ daagbuli. Ka onaŋ wa wa be o maŋ nyɛɛ a teetaare kyogri a ŋmenpuoredie zie naŋ. A Koora bidɔɔ ŋa eŋɛ da nyagraŋ ka o meŋ da taa kpɛzie tegitegilɛ Jehoova die na, aŋa lɛ na a teetaare naŋ da maale a kyogi beŋ na. Azuŋ, o da yeleeŋ ka: ‘Oo sogya-muno daana Jehoova, nyɛ ho ŋmenpuoredie na naŋ veɛlɛ seŋ lɛ! N nyɔvore boɔrɛɛ Jehoova davoro na yɛlɛ yaga zaa . . . Teetaare gba nyɛ la die, ka bambalaaraa nyɛ kyogi ka ka o maŋ gyeɛle o bilii, ho sareka iri ziiri na la lɛ. Beŋ oŋ na gyeɛle o bilii, oo sogya-muno daana Jehoova, N Naa ane N Naaŋmen.’ (Yieme 84:1-3) Ka lɛ te neŋ te biiri zaa taaɛ nimipa naŋ e zuluŋ, ka te enne meŋ maŋ nyagra ka te laŋna neŋ Naaŋmen puorebiiri bee?—Yieme 26:8, 12.
w08 7/15 30 wɛl. 3-4
Maŋ De Yɛlɛ Hoŋ Na Baŋ Ta Biŋ Ho Nimitɔɔreŋ, Ka Lɛ Vɛŋ Ka Ho Taa Popeɛloŋ
Ka ho yuomoŋ nyɛrɛ nimitɔɔre gaabo ka ho laafeeloŋ meŋ yɛlɛŋ ba wa soma, a na baŋ vɛŋeŋ ka a e kpeɛŋaa ko bo ka ho lɛ toɔ̃ e yɛlɛ mine Jehoova puoruu poɔŋ. Ka hooŋ e bidɔgrɔ, aminekaŋaŋ ho na teɛreŋ ka ho ba maŋ nyɛrɛ tɔnɔ yaga a yire ho meŋɛ boma zannoo kyɛbee a Kristabiiri lammore na poɔŋ, bonso ho maŋ de la ho wagre ane ho faŋa zaa a kaara ho biiri na. Kyɛ ka hooŋ de ho teɛroŋ eŋ yɛlɛ na hoŋ koŋ baŋ lɛ e na eŋɛŋ, a na baŋ pigi boŋ sori ka ho nyɛ yɛlɛ na hoŋ na baŋ e.
Yuomo turituri mine naŋ pare, dɔɔ kaŋa naŋ da yi a Liivai booree na poɔŋ da taaɛ poboɔbo kaŋa naŋ daaŋ koŋ baŋ nyɛ eebo zaa. O da taaɛ apoɔsori ka o maŋ wa a ŋmenpuoredie yuoni zaa a wa toŋ toma daaraayi. Kyɛ, o da taaɛ poboɔbo kaŋa naŋ soma, o da boɔrɔŋ ka o taa kpɛzie peɛle a sareka irizie tegitegilɛ. (Yiem. 84:1-3) Boŋ da soŋ a dɔɔ ŋa ka o niŋe pa neŋ apoɔsoe na oŋ taa na? O da wa nyɛɛŋ ka haali ka o naŋ be Jehoova ŋmenpuoredie davoro na poɔŋ bebiyenaa yoŋ gba, kyɛ a eɛ apoɔsori naŋ e kpoŋ yaga zaa. (Yiem. 84:4, 5, 10) Lɛ neŋ o zu la, a ba seŋ ka ho de ho teɛroŋ zaa eŋ yɛlɛ na hoŋ koŋ baŋ e na eŋɛŋ, kyɛ aseŋ ka ho moɔrɔ a teɛrɛ yɛlɛ na hoŋ naŋ na baŋ e, vɛŋ ka ana yɛlɛ na meŋ paale ho niŋe.
w20.01 17 wɛl. 12
Jehoova Ho Naaŋmen De Boŋ Tegroŋ Yaga Zaa!
12 Ka hooŋ taa baaloŋ kaŋa naŋ dɔɔnɔ bo, baŋ peɛlaaŋ ka Jehoova baŋɛɛ yelkpeɛne na zaa hoŋ tuoro na. Sɔroo ka o soŋ bo ka ho toɔ̃ taa teɛroŋ naŋ soma a kyaare yɛlɛ na poɔŋ hoŋ be na. Ka hooŋ maŋ kanna a Baabole, ho na nyɛɛ yelbi-sonne na Jehoova naŋ vɛŋ baŋ sɛge eŋ be na. Maŋ de ho teɛroŋ zaa eŋ a Baabole kannoo ziiri naŋ wulo lɛ na Jehoova naŋ de o puorebiiri tegroŋ aseŋ. Ka hooŋ erɛ lɛ, ho na wa nyɛŋ ka Jehoova maŋ erɛɛ yelsonne korɔ noba na zaa naŋ puoruu yelmennoŋ poɔŋ na.—Yiem. 84:11.
Baabole Poɔ Yelsonne
it-1 816
Bikpeebɛ
A na baŋ eɛ mɔlɔ ka noba ta lɛ kaara bikpeere ane noba naŋ ba taa neɛzaa naŋ na soŋ ba. Azuŋ Jehoova da de la a yelbiri “bikpeebɛ” toŋ neŋ toma saŋa na oŋ da wulo lɛ na a Izerayɛl biiri naŋ ba lɛ erɛ yɛlɛ naŋ tu sori, kyɛbee lɛ na baŋ zagre o sontuubu soe bare na. Ka a Izerayɛl biiri neŋ Jehoova niiloŋ wa e kpeɛŋaa, ba da maŋ kaarɛɛ bikpeere. Kyɛ ka dantorii ba lɛ be a paaloŋ poɔŋ, ba maŋ zagreŋ ka ba kaara bikpeere. Lɛ da maŋ wuliŋ ka a Izerayɛl paaloŋ zaa erɛɛ yɛlɛ naŋ ba seŋ neŋ Jehoova nimitɔɔreŋ. (Ym 82:3; 94:6; Ai 1:17, 23; Jr 7:5-7; 22:3; Iz 22:7; Zk 7:9-11; Ml 3:5) Jehoova pɔre da maŋ dɔglɛɛ noba na zaa naŋ dɔgrɔ bikpeere zuŋ. (Du 27:19; Ai 10:1, 2) Jehoova meŋɛ yeleeŋ ka o eɛ bikpeere Yɔɔdeɛrɛ (Ye 23:10, 11), ba Sonnɔ (Ym 10:14), ane ba Saa (Ym 68:5). Jehoova lɛ yeleeŋ ka onaŋ maŋ are ba gbɛbɔgriŋ a ŋmaa sɛrɛɛ ko ba (Du 10:17, 18), a wulo ba nembaalonzoe (Ho 14:3), a korɔ ba pɛnnoo (Ym 146:9), a lɛ goro ba nyɔvoɛ meŋ.—Jr 49:11.
Yɛlɛ na kaŋa naŋ maŋ vɛŋ teŋ baŋ yelmeŋɛ Kristabiiri la, lɛ na baŋ maŋ kaara noba naŋ kɔŋ ba sereba bee ba dɔgreba zu na. Bitontona Gyimisi da sɛge te ko la Kristabiiri ka: “Puoruu naŋ veɛlɛ, ka dɛgre zaa ba kye o poɔ a Saa Naaŋmen zie la ŋa: kaara bikpeere ane pɔg-kɔbɔ zu a ba woore poɔ, kyɛ gu ho meŋɛ, a ta mɔge faaloŋ a teŋɛzu.”—Gyi 1:27.
SEPTEMBER 16-22
BAABOLE POƆ YELNIMIZEERE YIEME 85-87
Puoro Maŋ Soŋ Teŋ Teŋ Nyɔgrɔ Te Menne
w12 5/15 25 wɛl. 10
Ho Yel-Eree Wulee Jehoova Gyeremɛ Na Bee?
10 Ka teneeŋ na toɔ̃ vɛŋ ka te yel-eree wulo Naaŋmen gyeremɛ na, aseŋ ka te “kpimare puoro tegitegilɛ.” (Uro. 12:12) Aseŋ ka te puore sɔre Jehoova ka o soŋ te ka te toɔ̃ tu sori naŋ seŋ neŋ poɔŋ a puoruu. Azuŋ, te na baŋ sɔrooŋ ka o ko te o vooroŋ soŋ na, a vɛŋ ka te sagediibu e kpeɛŋaa, a eŋ te faŋa ka te toɔ̃ are kpeɛŋaa saŋa na teŋ wa tuoro pigrinyɛ na. Te na baŋ lɛ puore sɔrooŋ ka o soŋ te ka te toɔ̃ ‘taa a yelbiri velaa zaa.’ (2 Tim. 2:15; Mat. 6:13; Luk. 11:13; 17:5) Aŋa lɛ na bie naŋ maŋ dɛle o saa na, aseŋ ka te meŋ dɛle Jehoova naŋ e te Saa naŋ be sazuŋ na. Ka teneeŋ puore sɔroo ka o soŋ te ka te toɔ̃ puoruu neŋ te sukyie zaa, te na baŋ taaɛ sagediibu ka o na eɛ lɛ ko te. Azuŋ, daŋ ta wa teɛrɛ ka ho dɔɔnɛɛ Jehoova zaa, kyɛ a yi puore sɔroo poɔŋ, maŋ pugoo, a puoroo bareka, a bɔ o sowuli saŋa na hoŋ wa tuoro yelkpeɛne na. Maŋ puore sɔroo ka o soŋ bo ka ho toɔ̃ puoruu soe naŋ na vɛŋ ka o yuori naŋ e forifori na nyɛ pugibu.—Yiem. 86:12; Gyi. 1:5-7.
Lɛ Jehoova Naŋ Maŋ Tu Kyɛ Wono Te Puoro
17 Kanne Yieme 86:6, 7. A yieli yiele Deevid da sagedieŋ peɛlaaŋ ka Jehoova kyɛlle woŋee o puoro na. Ho meŋ na baŋ taa la ana sagediibu ŋa tɔ. Aŋa lɛ te naŋ nyɛ te yɔɔmine zemmo yɛlɛ a zannoo ŋa poɔŋ na, a eŋ teŋ faŋa ka Jehoova na baŋ ko teŋ a yɛŋ ane a kpeɛ̃o ka te toɔ̃ are te yelkpeɛne noɔreŋ. O na baŋ tu la te taaba Kristabiiri eŋɛŋ, kyɛbee noba gba naŋ ba puoro Jehoova eŋɛŋ a kyɛ soŋ te soe mine poɔŋ.
18 Aneazaa ka aminekaŋaŋ Jehoova ba maŋ iri te puoro na mine nɔɛ aŋa lɛ teŋ maŋ kaara soriŋ na, kyɛ te baŋɛɛŋ ka o na iree a nɔɛ ko te. O na baŋ ko teŋ bonzaa yɛlɛ naŋ fɛre te wagre naŋ seŋ neŋ poɔŋ. Azuŋ maŋ puore kyɛ taa sagediibu ka Jehoova na kaa la ho zu pampana, a “paale bonvore zaa boɔbo” a donpaalaa meŋ poɔŋ.—Yiem. 145:16.
Baabole Poɔ Yelsonne
it-1 1058 wɛl. 5
Sukyiri
Puoro Jehoova Neŋ Ho ‘Sukyiri Zaa.’ Aseŋ ka neɛ eŋgannoŋ poɔ sukyiri e gbuli sɛre kyɛ ka o na toɔ̃ tonɔ toma soŋ. Kyɛ, neɛ na baŋ de la sukyiri kyɛlee a puoro Jehoova. Deevid da puore sɔrɛɛ Naaŋmen a yelka: “Ko ma sukyiriyeni ka N zoro ho yuori.” Yɛlɛ na oŋ da yel na wuleeŋ ka, neɛ na baŋ de la sukyiri kyɛlee a nɔŋ yelkaŋa, kyɛbee a de sukyiri kyɛlee a zoro dabeɛ̃ ka o e yelkaŋa. (Ym 86:11) Ka neɛŋ wa e lɛ, o soba sukyiri na ba maŋ “nyɔge yelyeni,” ka o soba puoro Naaŋmen aŋa o naŋ ba boɔrɔ ka o puoruu. (Ym 119:113; Yel 3:16) Neɛ kaŋa meŋ na baŋ taaɛ “sukyie ayi,” ka neɛŋ wa taa a sukyiri ŋa tɔ, o maŋ boɔrɔŋ ka o tonɔ korɔ nembɛrɛ bayi. O soba na baŋ de la o noɔre a yel yelkaŋa, kyɛ o meŋɛ teɛroŋ poɔ, o koŋ sage e yɛlɛ na o naŋ de o noɔre yel na. (1Tu 12:33; Ym 12:2) Yezu da yeleeŋ peɛlaaŋ ka, noba naŋ taa a sukyie ayi ŋa, a e bampuori kombampoɔ noba na ba erɛ yɛlɛ naŋ soma.—Mt 15:7, 8.
SEPTEMBER 23-29
BAABOLE POƆ YELNIMIZEERE YIEME 88-89
Sori Na Jehoova Naŋ Maŋ Tu A Dire O Naaloŋ Na Somaŋ Yaga Zaa
w17.06 28 wɛl. 5
Are Jehoova Naaloŋ Diibu Na Puoriŋ Kpeɛŋaakpeɛŋaa!
5 Jehoova la Neɛ naŋ seŋ ka o dire naaloŋ a kaara bonvore zaa. Ananso la wala? Ananso la ka o maŋ de la o kpeɛ̃o tonɔ neŋ toma dantorii naŋ paale sori poɔŋ. Jehoova meŋɛ yeleeŋ ka: ‘Maaŋ la Jehoova. Maaŋ maŋ wulo nɔmmo naŋ ba baara, dantorii ane sontuubu teŋganeŋ, bozuŋ a yɛlɛ ŋaŋ ka N popeɛloŋ be.’ (Jer. 9:24) Jehoova ba maŋ de bege na nensaaleba naŋ ba pɛgeyi naŋ sɛge biŋ tonɔ neŋ toma, a maŋ are a zuŋ a wulo te yɛlɛ naŋ soma ane yɛlɛ naŋ ba soma. Jehoova meŋɛ eɛ dantorii soba, o gyogo la lɛ, azuŋ onaŋ seŋ ka o korɔ nensaaleba bege ka ba tuuro. A Baabole yeleeŋ ka, ‘Sontuubu ane dantorii la ho nakogi pare.’ Lɛ na a Baabole naŋ yeli a zie ŋaŋ na vɛŋɛɛŋ teŋ baŋ ka, te na baŋ sagɛɛ bege, sowuli ane yɛlɛ na zaa Jehoova naŋ maŋ yeli ka te erɛ na di, bonso a zaa eɛ sontuubu. (Yiem. 89:14; 119:128) Aneazaa ka Setaana yeleeŋ ka Jehoova naaloŋ diibu na ba soma, kyɛ Setaana meŋɛ gba ba toɔ̃ vɛŋ ka dantorii meŋɛ be a donɛɛ na oŋ dire naaŋ kaara na poɔŋ.
w17.06 29 wɛl. 10-11
Are Jehoova Naaloŋ Diibu Na Puoriŋ Kpeɛŋaakpeɛŋaa!
10 Jehoova ba maŋ tu nimikuonii bee potuo sori a dire o naaloŋ na. Kyɛ O maŋ ko teŋ son-meŋɛ, a vɛŋ teŋ taa popeɛloŋ meŋ. (2 Kor. 3:17) Ŋaaŋ ka Deevid da yeli kyaare a yɛlɛ ŋa: ‘Emmo ane nembɛree gyeremɛ be la [Naaŋmen] nimitɔɔreŋ. Kpeɛ̃o ane popeɛloŋ be la o kpɛzieŋ.’ (1 Tun. 16:7, 27) Lɛ neŋ o zu la, a yieloŋ yiele Eetaŋ da sɛgɛɛŋ ka: ‘Nyɛ bana na naŋ baŋ popeɛloŋ gɔmɔ naŋ woŋ noɔ̃ seŋ lɛ. Oo Jehoova, ba maŋ kyɛnɛɛ ho niŋesogɔ kyaanee poɔŋ. Ho yuoriŋ baŋ maŋ taa popeɛloŋ a yi beguo gɛrɛ zisoɔree. Ho sontuubuŋ baŋ maŋ duori ba menne.’—Yiem. 89:15, 16.
11 Ka teneeŋ maŋ teɛrɛ Jehoova sonnoŋ na yɛlɛ gɛrɛ tɔɔre, a na baŋ vɛŋeŋ ka te maaleŋ taa sagediibu ka sori na Jehoova naŋ maŋ tu a dire o naaloŋ na somaŋ yaga zaa. Te meŋ na wa taa la teɛroŋ na a yieloŋ yiele naŋ taa saŋa na oŋ yelka: ‘Bebiyeni ho dieŋ seɛ la bebie turi zie kaŋaŋ.’ (Yiem. 84:10) Jehoova la Neɛ naŋ maale te, o nɔŋ teŋ meŋ yaga zaa, azuŋ o baŋɛɛ yɛlɛ naŋ na baŋ vɛŋ ka te taa popeɛloŋ meŋɛmeŋɛ. O maŋ sonnɔ teŋ teŋ erɛ ana yɛlɛ na meŋ yaga zaa. Te soŋ zuŋ ka Jehoova maŋ yelka te erɛ yɛlɛ mine, ka teneeŋ wa erɛ a yɛlɛ meŋ, te maŋ taaɛ popeɛloŋ naŋ e kpoŋ. Ka a naŋ wa fɛre ka te de yɛlɛ mine iri neŋ sareka a toɔ̃ e yɛlɛ naŋ pɛlɛ Jehoova poɔ, aseŋ ka te baŋ ka te soŋ zuŋ ka Jehoova yelka te e lɛ.—Kanne Aizeeya 48:17.
w14 10/15 10 wɛl. 14
Taa Sagediibu Naŋ E Kpeɛŋaa Yaga Zaa A Naaloŋ Eŋɛŋ
14 Jehoova da eŋɛɛ noɔre ko Naa Deevid. Ba boɔlɛɛ a nɔlaŋ ŋa ka a Deevid nɔlaŋ na. (Kanne 2 Saamiuel 7:12, 16.) Deevid da be la Gyɛruzɛlɛm a dire naaŋ, a saŋa ka Jehoova ne o da maale a nɔlaŋ ŋa. Jehoova da eŋɛɛ noɔre ko Deevid ka a Mɛzaaya na eɛ o yaaŋaa. (Luk. 1:30-33) A yi a sori ŋa poɔŋ na, Jehoova da wulee booree na poɔŋ a Mɛzaaya naŋ na yi wa. O da vɛŋɛɛŋ aŋ pɛle ka Deevid yaaŋaa la na “so” sori ka o zeŋ a Mɛzaaya Naaloŋ nakogi na zuŋ. (Izik. 21:25-27) A tuuro Yezu eŋɛŋ, Deevid naaloŋ na na “areŋ a gɛrɛ wagre zaa.” Yelmeŋɛ zaa, Deevid “booree na areŋ a gɛrɛ wagre zaa. O nakogi na areŋ aŋa ŋmenaa N nimitɔɔreŋ.” (Yiem. 89:34-37) A Mɛzaaya Naaloŋ na daaŋ koŋ sãã zaa, maaloo na oŋ na waneŋ na meŋ na bebe tegitegilɛ!
Baabole Poɔ Yelsonne
cl 281 wɛl. 4-5
“Hooŋ Yoŋ La Waa Yelmeŋɛ Soba”
4 A yi a Hiburu Sɛgre poɔŋ, a yelbiri “yelmennoŋ” na baŋ wulee neɛ naŋ yi nɔmmo neŋ nimimaaroŋ poɔŋ a de o meŋɛ mare bonkaŋa, a kpimare a bon a te ta saŋa na poboɔbo na zuŋ oŋ kpimare a bon naŋ na nyɛ eebo. Lɛ wuleeŋ ka aseŋ ka o soba e neɛ naŋ taa dɛlebo. Kyɛ lɛ yoŋ ba seŋ, ananso la ka ka neɛŋ wa baŋ ka o ferebo toma eɛ yelkaŋa, o soba na baŋ toŋɛɛ a toma a de wuli ka o taaɛ dɛlebo. Kyɛ, a Hiburu yelbiri na baŋ de toŋ neŋ toma na wulee neɛ naŋ yi nɔmmo poɔŋ a erɛ a yɛlɛ ama zaa. Ane meŋ, saŋa kaŋa a Baabole maŋ yeliŋ ka boma mine naŋ ba voorɔ eɛ boma naŋ taa dɛlebo. Aŋa mannoo poɔŋ, a yieloŋ yiele da yeleeŋ ka kyuu eɛ “yelmeŋɛ sieridire saganeŋ,” lɛ wuleeŋ ka a kyuu taa la dɛlebo. Bon nanso oŋ da yeli lɛ la ka, wagre zaa ka zieŋ wa soɔ, kyuu maŋ be la a saluoni poɔŋ. (Yieme 89:37) Kyɛ te koŋ baŋ yelka kyuu taaɛ yelmeŋɛ nɔmmo. Ananso la wala? Ananso la ka yelmeŋɛ nɔmmo eɛ sori kaŋa te naŋ maŋ tu a wulo te taaba nɔmmo. Boma naŋ ba voorɔ koŋ baŋ wuli a nɔmmo ŋa tɔ.
5 Ka neɛŋ wa taa yelmeŋɛ nɔmmo ko o tɔsoba, lɛ wuleeŋ ka niiloŋ be la ba kpakyagaŋ. A yelmennoŋ ŋa ba maŋ leɛrɛ. O ba waa ŋa mane kon-mie naŋ maŋ leɛrɛ saŋa na saseɛ naŋ fuuro na. Kyɛ, a yelmeŋɛ nɔmmo ŋa maŋ eɛ kpeɛŋaa a bebe haali saŋa na baŋ wa tuoro yelkpeɛne yaga zaa.
SEPTEMBER 30–OCTOBER 6
BAABOLE POƆ YELNIMIZEERE YIEME 90-91
Ka Hooŋ Boɔrɔ Nyɔvo-Tɔɔre, Dɛle Jehoova
wp19.3 5 wɛl. 3-5
Lɛ Na Noba Naŋ Moɔrɔ Ba Moɔbo Zaa Ka Ba Taa Nyɔvo-Tɔɔre
Science noba zaa naaneŋ sage ka ka neɛŋ nyuuro teenɛɛ naŋ na vɛŋ ka o koŋ leɛ neŋnyaaŋaa wieoŋ, lɛ na vɛŋeŋ ka o soba nyɔvore e tɔɔre a gaŋ lɛ na noba nyɔvore naŋ waa zenɛ na. Yelmeŋɛ la, a yi yuomo kɔɔraayi mine naŋ pare, nensaaleba moɔ la ba moɔbo zaa a vɛŋ ka noba taa nyɔvo-tɔɔre fẽẽ lɛ. Teenɛɛ na baŋ maala korɔ noba baŋ nyuuro, ane teenɛɛ baŋ maŋ kyɔgi ba aŋ go ba yi baalonne mine eŋɛŋ la soŋ ka noba nyɔvoɛ e tɔɔre feẽ. Lɛ na baŋ sonnɔ noba ba maŋ maala ba ziiri a e forifori meŋ vɛŋɛɛŋ ka noba nyɔvoɛ e tɔɔre fẽẽ. Noba naŋ kaara nensaaleba genes yɛlɛ yeleeŋ ka, ba koŋ baŋ lɛ e yelzaa a vɛŋ ka nensaalaa nyɔvore e tɔɔre a gaŋ zie na oŋ ta na.
Aŋa yuomo 3,500 mine naŋ pare, a Baabole sɛgsɛgrɛ na baŋ boɔlɔ Moosis na da yeleeŋ ka: ‘Te nyɔvore bebie eɛ yuomo 70. Kyɛ ka kpeɛ̃o bebe, a na ta la 80, kyɛ a maŋ paaleŋ neŋ tonkpeɛne ane toɔrɔ yoŋ, bozuŋ a maŋ wa pare gaaŋ wieoŋ, teŋ ɛge gaa.’ (Yieme 90:10) Nensaaleba moɔ la ba moɔbo zaa ka ba vɛŋ ka te taa nyɔvo-tɔɔre, kyɛ te nyɔvore tɔɔre zaa waa ŋa lɛ na Moosis naŋ da yeli na.
Kyɛ, dunni mine aŋa dunni naŋ be a maŋzeɛ̃ baŋ boɔlɔ ɔɔkyiŋ (urchin), kyɛbee duŋo na baŋ boɔlɔ kuwaahɔk kilaam (quahog clam) na baŋ bebeŋ a pare yuomo 200. Teere mine meŋ bebeŋ aŋa a teɛ na naŋ maŋ baa a e kpoŋ yaga zaa baŋ boɔlɔ ka sekooya (sequoia) na baŋ bebeŋ aŋa yuomo turi. Ka teneeŋ de te nyɔvoɛ manne neŋ lɛ na a boma ŋa naŋ bebe kɔɔre na, te na maŋ teɛreŋ ka, ‘ka lɛ a yuomo 70 bee 80 ŋa la nensaaleba yuomo zaa bee?’
wp19.1 5, daga
Naaŋmen Yuori La Bo? Nembuoŋ Maale Naaŋmen?
Noba yaga teɛrɛɛ a soorebiri ŋa yɛlɛ yaga. Aminekaŋaŋ, ho meŋ teɛrɛɛ o yɛlɛ. Kyɛbee te na baŋ yeliŋ ka: Ka Naaŋmen la maale a aŋdonɛɛ zaa ane boma zaa naŋ be o poɔŋ na, lɛ yɛŋ nembuoŋ maale Naaŋmen?
Science noba kpoŋ zie zaa yeleeŋ ka a aŋdonɛɛ taaɛ piiluu. Lɛ neŋ o zu ka a Baabole meŋ yeli. A Baabole dɛndɛŋ sɛgre na kannɛɛŋ ka: ‘A munpiileeŋ Naaŋmen daaŋ maalɛɛ sagane ane teŋgane.’—Munpiilee 1:1.
Teɛre a yɛlɛ ŋa soŋ, a aŋdonɛɛ meŋɛŋ bebe lɛɛŋ a maale o meŋɛ a wa bebe bee? Ai. Ka hooŋ ba taa bonzaa, ho na baŋ maalɛɛ bonkaŋa bee? Ka bonzaaŋ da ba kyebe sɛre ka a aŋdonɛɛ piili, lɛ wuleeŋ ka a aŋdonɛ gba da koŋ bebe zenɛ ŋa. Yelmeŋɛ la, ka ba naŋ yelka neɛ kaŋa naŋ ba waa ŋa nensaalaa la daaŋ bebe a vɛŋ ka a boma ŋa zaa wa, a maŋ eɛ kpeɛŋaa ko nensaaleba ka ba baŋ a pare te baare. Kyɛ, Jehoova Naaŋmen naŋ e Kpeɛ̃o Zaa Daana eɛ vooroŋ poɔ neɛ, Ona la vɛŋ ka a boma ŋa zaa wa bebe.—Gyɔɔn 4:24.
A Baabole yeleeŋ a kyaare Naaŋmen ka: “Saŋa na hoŋ da naŋ ba maale taŋbɛrɛ na, kyɛ ho eɛ Naaŋmen. Saŋa hoŋ da naŋ ba maale teŋgane ane a donɛɛ na, kyɛ ho eɛ Naaŋmen. Haali a yi wagre naŋ ba taa baaraa a gɛrɛ wagre naŋ ba taa baaraa, ho eɛ Naaŋmen.” (Yieme 90:2) Azuŋ, ka hooŋ leɛre wagre a gaa puori lɛɛŋ, Naaŋmen da bebeŋ, ka hooŋ lɛ leɛre wagre a gɛrɛ nimitɔɔre lɛɛŋ, Naaŋmen naŋ na bebeŋ. A Baabole naŋ yelka “a munpiileeŋ” na wuleeŋ ka Naaŋmen la maale a aŋdonɛɛ na teŋ na baŋ de te nimie nyɛ na.—Yel-iriwulaa 4:11.
w22.06 18 wɛl. 16-17
Lɛ Na Nɔmmo Naŋ Maŋ Soŋ Te Teŋ Zɔɔtoɔ̃ Dabeɛ̃
16 Setaana baŋɛɛŋ ka te zaa nɔŋ la nyɔvore. Azuŋ, o yeleeŋ ka te na de la bonzaa te naŋ taa, haali te neŋ Jehoova zɔmennoŋ na iri sareka ka lɛ vɛŋ ka te toɔ̃ taa nyɔvore. (Joob 2:4, 5) Nyɛ ziri-kpoŋ Setaana naŋ ŋma seŋ lɛ. Yelmeŋɛ la, Setaana la “taa kpeɛ̃o ka o de kũũ waneŋ.” O naŋ baŋ ka te zoree kũũ na zuŋ, saŋa kaŋa o maŋ boɔrɔŋ ka o tu be a tɔ dabeɛ̃ eŋ te ka te bare Jehoova. (Hib. 2:14, 15) Saŋa kaŋa, Setaana maŋ tu la noba eŋɛŋ a kyɛ fuuro Jehoova puorebiiri ka, ka ba naŋ yelka ba naŋ na puoree Jehoova, lɛ yɛŋ ba na ko baŋ. Saŋa kaŋa meŋ, Setaana na baŋ tu la baaloŋ kpeɛŋaa kaŋa naŋ kpɛ te eŋɛŋ, a moɔrɔ ka o vɛŋ ka te bare te sagediibu na. Dɔktare ane te booree deme naŋ ba puoro Jehoova na baŋ fɛrɛ teŋ ka te sage ka ba eŋ te zĩĩ. Kyɛ, te daŋ koŋ sage sãã bege na Naaŋmen naŋ biŋ na zaa. Kyɛbee, neɛ kaŋa na baŋ bɛnle teŋ a boɔrɔ ka te tu sori kaŋa naŋ na sãã a Baabole bege a saŋ te baaloŋ na.
17 Te kaŋa zaa ba boɔrɔ ka te kpi. Kyɛ te baŋɛɛŋ ka, ka teneeŋ kpi gba lɛ ba wuli ka Jehoova ba lɛ nɔnɔ te yɛlɛ. (Kanne Urom 8:37-39.) Ka Jehoova zɔmeŋɛ kaŋa zaaŋ wa kpi, o maŋ de la o soba eŋ o teɛroŋ poɔŋ. Azuŋ, a maŋ waa ŋa o soba aŋ naŋ voorɔ. (Luk. 20:37, 38) Jehoova eŋɛ nyagraŋ ka o seŋ ba zaa ka ba iri yi kũũni poɔŋ. (Joob 14:15) Jehoova yɔɔ la sane naŋ e kpoŋ yaga ka lɛ na vɛŋ ka te “na nyɛ nyɔvore naŋ ba taa baaraa.” (Gyn. 3:16) Te baŋɛɛŋ peɛlaaŋ ka Jehoova nɔŋɛɛ te yɛlɛ yaga zaa, a taa te yɛlɛŋ meŋ. Azuŋ, saŋa na teŋ wa beɛrɛ, kyɛbee ka nobaŋ wa de kũũ yɛlɛ a fuuro te, a saŋa naane aŋ seŋ ka te zagre Jehoova bare. Kyɛ, a saŋa la aŋ seŋ ka te gaa o zie a te bɔ sukyiridii, yɛŋ, ane faŋa. Lɛ neŋ o zu ka Valérie neŋ o serɛ da e.—Yiem. 41:3.
Baabole Poɔ Yelsonne
wp17.5 5
Ho Taaɛ Maleke Naŋ Goro Bo Bee?
A Baabole ba wuli ka te yeni yeni zaa taaɛ maleke naŋ goro te. Yelmeŋɛ la, Yezu da yeleeŋ ka: ‘Yɛ gu yɛ menne velaa a ta wa boɔlɔ a bibiiri [Krista potuuribo] bama kaŋa zaa zaala. N yele korɔ yɛ la, a bibiiri malekere maŋ nyɛrɛ la a N Saa naŋ be sazu niŋe tegitegilɛ.’ (Matio 18:10) Kyɛ, Yezu da ba wulo ka te yeni yeni zaa taaɛ maleke naŋ maŋ goro te. Yezu da boɔrɔŋ ka o wuli ka a malekere boɔrɛɛ o potuuribo na yeni yeni zaa yɛlɛ. Azuŋ, yelmeŋɛ Kristabiiri koŋ sage e dambol-yɛlɛ, kyɛbee a e yɛlɛ naŋ ba seŋ neŋ a kyɛ teɛrɛ ka Naaŋmen malekere na na go baŋ.
Lɛ wuleeŋ ka malekere koŋ baŋ soŋ nensaaleba bee? Ai. (Yieme 91:11) Noba mine wa nyɛɛŋ ka Naaŋmen tu la o malekere na zie a go ba, a lɛ wulo ba sori meŋ. Lɛ ka Kenneth te naŋ yeli o yɛlɛ a piilee yɛlɛ na poɔŋ da teɛre. Aneazaa ka a Baabole zie zaa ba wuli a yɛlɛ ŋa, kyɛ aminekaŋaŋ yɛlɛ na baŋ teɛrɛ na toreeŋ. Ka Jehoova Sieree Demeŋ wa tonɔ a naaŋ moɔloo toma, gbɛɛ yaga ba maŋ nyɛrɛɛ sieree naŋ wuli ka a malekere la wulo ba sori. Kyɛ, te koŋ baŋ de te nimie nyɛ a malekere, azuŋ te koŋ baŋ yeli te baare soe na Naaŋmen naŋ maŋ tu a de a malekere ŋa sonnɔ noba soe yaga poɔŋ. Kyɛ ka teneeŋ maŋ puore a Kpeɛ̃o Zaa Daana bareka neŋ lɛ na oŋ sonnɔ te na, a ba e yelfaa.—Kolosi 3:15; Gyimisi 1:17, 18.
OCTOBER 7-13
BAABOLE POƆ YELNIMIZEERE YIEME 92-95
Teŋ Na Puoro Jehoova La Yɛlɛ Naŋ Soma Yaga Zaa Te Zemmo Poɔŋ!
w18.04 26 wɛl. 5
Baapaalba, Yɛ De La Yɛ Teɛroŋ Eŋ Yɛlɛ Yɛŋ Na Toɔ̃ De Biŋ Yɛ Nimitɔɔreŋ Jehoova Puoruu Poɔŋ Bee?
5 Bon nanso aŋ seŋ ka te maŋ de yɛlɛ biŋ te nimitɔɔreŋ Jehoova puoruu poɔŋ la ka, te boɔrɔŋ ka te puore Jehoova bareka neŋ nɔmmo ane yelsonne na zaa oŋ e ko te na. A yieloŋ yiele da yeleeŋ ka: ‘A eɛ soŋ ka te puore Jehoova bareka. . . . Bozuŋ hooŋ Jehoova ko maŋ popeɛloŋ a tuuro ho tomaŋ. N na yieliŋ ane kyilloo ho nuuri toma zuŋ.’ (Yiem. 92:1, 4) Saŋa na hoŋ naŋ e baapaalaa na, mãã ho meŋɛ a teɛre yɛlɛ na zaa hoŋ na baŋ e a ko Jehoova. Teɛre ho nyɔvore yɛlɛ, ho sagediibu, a Baabole, a lantaapuoruu, ane teɛretɔ na naŋ soma yaga zaa hoŋ taa kyaare nendaare kaŋa na. Ka hooŋ de Jehoova puoruu yɛlɛ de weɛ ho zemmo poɔŋ, a na wuli ka ho taaɛ bareka puoruu a ko maaloo na zaa Naaŋmen naŋ ko bo na, a na lɛ veŋɛŋ ka ho tage peɛloo meŋ.
w18.11 20 wɛl. 8
Nembuo Teɛrɛ Hoŋ Maŋ Teɛrɛ?
8 Aŋa bidɔgrɔ naŋ soma, Jehoova boɔrɔŋ ka o biiri taa zemmo naŋ soma yaga zaa. (Aiz. 48:17, 18) Azuŋ, o maŋ ko teŋ sowuli naŋ na vɛŋ ka te taa gyogo naŋ soma, a lɛ erɛ yelsonne meŋ korɔ te taaba. A yi a yɛlɛ ama poɔŋ, Jehoova maŋ eŋnɛ teŋ faŋa ka te maŋ teɛrɛ yɛlɛ na oŋ teɛrɛ na, a lɛ de yɛlɛ na oŋ yelka a somaŋ na tonɔ neŋ toma. A yɛlɛ ŋa eebo ba maŋ e tuobu dɔgle te zuŋ, kyɛ a maŋ eŋ teŋ faŋa, a vɛŋ teŋ toɔ̃ teɛrɛ yɛlɛ meŋ gɛrɛ tɔɔre. (Yiem. 92:5; Yeng. 2:1-5; Aiz. 55:9) A maŋ lɛ soŋ teŋ teŋ toɔ̃ kaa iri yɛlɛ naŋ na vɛŋ ka te taa popeɛloŋ, a lɛ vɛŋ teŋ e noba naŋ nyɛrɛ nimitɔɔre gaabo. (Yiem. 1:2, 3) Yelmeŋɛ la, ka teneeŋ teɛrɛ yɛlɛ aŋa Jehoova, a eɛ yɛlɛ naŋ soma yaga zaa, a lɛ e yɛlɛ naŋ na soŋ te meŋ.
w20.01 19 wɛl. 18
Jehoova De Boŋ Tegroŋ Yaga Zaa!
18 Saŋa na te yuomo naŋ nyɛrɛ nimitɔɔre gaabo na, aseŋ ka te baŋ peɛlaaŋ ka Jehoova naŋ taaɛ toma ko te ka te toŋ. (Yiem. 92:12-15) Yezu da vɛŋɛɛŋ teŋ baŋ ka, ka teneeŋ koŋ baŋ lɛ erɛ yɛlɛ aŋa lɛ na teŋ da erɛ saŋa kaŋa naŋ pare na, kyɛbee ka teneeŋ erɛ yɛlɛ a teɛre ka moɔbo na teŋ moɔrɔ na eɛ fẽẽ, kyɛ Jehoova niŋe paalɛɛ toma na zaa te naŋ tonɔ o puoruu toma poɔŋ na. (Luk. 21:2-4) Azuŋ, de ho teɛroŋ eŋ yɛlɛ na hoŋ na baŋ e na eŋɛŋ. Aŋa mannoo poɔŋ, ho na baŋ mannɛɛ Jehoova yɛlɛ korɔ ho taaba, a puore sɔre Jehoova ka o sonnɔ ho yɔɔmine, a eŋnɛ ho taaba faŋa ka ba de yelmennoŋ puoro Jehoova. Jehoova nimitɔɔreŋ ho naŋ eɛ o tontoŋtɔ, a ba e ka yɛlɛ na hoŋ toɔ̃ erɛ zuŋ la, kyɛ lɛ na hoŋ maŋ yi ho poɔ zaa a sagra o nɔɛ na zuŋ la.—1 Kor. 3:5-9.
Baabole Poɔ Yelsonne
cl 176 wɛl. 18
“Oo Nyɛ Lɛ Na Naaŋmen . . . Yɛŋ . . . Naŋ E Zuluŋ Seŋ Lɛ!”
18 Nyɛ lɛ na bitontona Pɔɔl naŋ wuli lɛ Jehoova yɛŋ naŋ e zuluŋ aseŋ. O da yeleeŋ ka: “Oo nyɛ lɛ na Naaŋmen bondaaloŋ ane o yɛŋ ane o bammo naŋ e zuluŋ seŋ lɛ! Te koŋ baŋ peɛre te baŋ o sɛrɛɛdiibu yɛlɛ zaa te baare, te koŋ baŋ peɛre baŋ o soe meŋ yɛlɛ zaa a te baŋ a baaraa!” (Urom 11:33) Pɔɔl piilee o yɛlɛ na a yelka “Oo,” lɛ wuleeŋ ka Pɔɔl da yi la o sukyiri poɔŋ a manna a yɛlɛ. A lɛ wulee lɛ na o noɔre naŋ mãã aseŋ. A Giriki yelbiri na baŋ leɛre waneŋ ka “zuluŋ” neŋ a yelbiri na baŋ maŋ leɛre waneŋ ka “abyss” kyɛbee bog-zuluŋ naŋ ba taa baaraa na yi la taa. Lɛ wuleeŋ ka a da waa ŋa o naŋ ŋmaa a yɛlɛ foto o teɛroŋ poɔŋ. Ka teneeŋ maŋ teɛrɛ Jehoova yɛŋ na yɛlɛ gɛrɛ tɔɔre, a maŋ waa ŋa te naŋ kaara bog-zuluŋ kaŋa naŋ ba taa baaraa, a e kpoŋ, a lɛ e zuluŋ yaga ka lɛ vɛŋ teŋ koŋ toɔ̃ baŋ o baaraa. Te gba koŋ baŋ wuli o piiluu ane lɛ na oŋ tu lɛɛŋ a te baare. (Yieme 92:5) Ho ba nyɛ ka a yɛlɛ ŋa seŋ ka a vɛŋ ka te sigre te menne yaga zaa bee?
OCTOBER 14-20
BAABOLE POƆ YELNIMIZEERE YIEME 96-99
‘Moɔlɔ A Duorisoŋ’!
w11 3/1 6 wɛl. 1-2
Bo La A Duorisoŋ?
A EƐ Kristabiiri zaa ferebo toma ka ba moɔlɔ “a Naaloŋ duorisoŋ” korɔ ba taaba. Aseŋ ka ba soŋ ba taaba ka ba baŋ ka Naaŋmen Naaloŋ na la gɔmenante naŋ na wa dire naaŋ a kaara a teŋɛzu sontuubu poɔŋ. Kyɛ, bo ka a yelbiri “duorisoŋ” wuli? A yi a Baabole poɔŋ ba maŋ de la a yelbiri duorisoŋ toŋ neŋ toma soe yaga poɔŋ. Aŋa mannoo poɔŋ, a Baabole yeleeŋ ka a duorisoŋ eɛ “faabo duorisoŋ.” (Yieme 96:2) A lɛ yelka ‘a Naaŋmen duorisoŋ na’ (Urom 15:16); ane “a duorisoŋ naŋ kyaare Yezu Krista.”—Marko 1:1.
Azuŋ, a yɛlɛ ŋmaaŋmaa la ka, a duorisoŋ eɛ yelmenne na zaa Yezu naŋ wuli ane yɛlɛ na zaa o potuuribo naŋ sɛge biŋ na. Sɛre ka Yezu na do sazu na, o da yelko la o potuuribo na ka: “Yɛ gaa a tenne zaa poore a te soŋ noba ka ba wa leɛ N potuuribo, yɛ korɔ ba suobu a Saa neŋ a Bidɔɔ neŋ a vooroŋ soŋ yuori eŋɛŋ, yɛ wulo ba ka ba erɛ a yɛlɛ na zaa N naŋ ko yɛ noɔre ka yɛ erɛ na.” (Matio 28:19, 20) A eɛ yelmeŋɛ Kristabiiri zaa ferebo toma ka ba manna a Naaloŋ yɛlɛ korɔ noba, kyɛ lɛ yoŋ naane aŋ seŋ ka ba erɛ, a lɛ seŋ ka ba moɔrɔ ka ba sonnɔ ba ka ba wa leɛ Yezu potuuribo.
w12 9/1 16 wɛl. 1
Bo Yɛlɛ Na E Sɛrɛɛdiibu Bebiri Na?
Aŋa lɛ na a foto naŋ be ho nuduloŋ sɛŋ naŋ wulo na, noba yaga maŋ teɛreŋ ka, a Sɛrɛɛdiibu Bebiri na, noba turiturituri naŋ kpi seere na wa arɛɛ Naaŋmen nakogi na nimitɔɔreŋ ka o di ba sɛrɛɛ a kyaare yɛlɛ na baŋ e kyɛ kpi na. Ka o naŋ wa di ba sɛrɛɛ baare, o na ko la ba mine nyɔvore sazuŋ, a kyɛ dɔgre ba mine meŋ dazugovũũ poɔŋ. Kyɛ, a Baabole wuleeŋ ka Sɛrɛɛdiibu Bebiri eɛ bebiri baŋ na faa noba yi daŋkyagre poɔŋ. (Yieme 96:13) Naaŋmen kaa iree Yezu ka o e Sɛre-ŋmaara, Yezu na vɛŋeŋ ka dantorii be a teŋɛzuŋ.—Kanne Aizeeya 11:1-5; Toma 17:31.
w12 9/15 12 wɛl. 18-19
Emmaaroŋ Na Bebeŋ Yuomo Turi—A Gɛrɛ Wagre Naŋ Ba Taa Baaroo!
18 A emmaaroŋ na Naaŋmen naŋ da boɔrɔ ka o be nensaaleba laŋ zemmo poɔŋ na da sããŋɛɛŋ saŋa na Setaana naŋ da bɛnle a dɛndɛŋ nensaaleba baŋ iri zɔɔrɔ neŋ Jehoova naaloŋ diibu na. A piili yuoni 1914, a Mɛzaaya Naaloŋ na erɛɛ yɛlɛ naŋ na vɛŋ ka noɔreyeni ane zeŋ laafeɛ be nensaaleba poɔŋ. (Efe. 1:9, 10) Saŋa na Yezu naŋ na wa dire o Yuoŋ Turi Naaloŋ na, o na eɛ yelseɛlɛ teŋ daaŋ ba ‘nyɛ’ zaa zenɛ ŋa. Beŋ la ka a “baaraa na ta.” Krista Yuoŋ Turi Naaloŋ Diibu na na wa la o baaroo. Bo yɛlɛŋ na e ana saŋa na? Aneazaa ka Naaŋmen ko la Krista “kpeɛ̃o zaa naŋ be sazu ane teŋɛ,” kyɛ Yezu ba e neɛ naŋ boɔrɔ yuori neŋ arezi-bɛrɛ korɔ o meŋɛ. O na yi la sigrimennoŋ poɔŋ a “de a naaloŋ ko a Saa Naaŋmen.” O na lɛ de la arezie naŋ e o yoŋ ane kpeɛ̃o na Naaŋmen naŋ koo na toŋ neŋ toma a de “puubu ko a Saa Naaŋmen.”—Mat. 28:18; Fil. 2:9-11.
19 Ana saŋa na, noba naŋ be a teŋɛzuŋ ka a Naaloŋ kaara ba na na eɛ noba naŋ e forifori, a pɛgeyi sori zaa poɔŋ. Ba meŋ na tɔglɛɛ Yezu ewuli soŋ na a yi sigrimennoŋ neŋ ba poɔ zaa a sage ka Jehoova la seŋ ka o dire naaŋ a kaara bonvore zaa. Ba na taaɛ apoɔsori ka ba wuli a yɛlɛ ŋa saŋa na baŋ na are kpeɛŋaa a enyɛ baaraa na saŋa. (Yel. 20:7-10) A lɛ puoreŋ, ba na sãã la taawae derebɛ zaa, ka ba naŋ e nensaaleba bee malekere. Ba na sãã baŋ kpɛlɛŋkpɛlɛŋ, ba koŋ lɛ bebe. A saŋa te na taaɛ popeɛloŋ, a lɛ kyillɛ meŋ. A malekere naŋ be sazuŋ ane nensaaleba naŋ be a teŋɛzuŋ na de la noɔreyeni a pugiro Jehoova. A saŋa ka Jehoova “na dire naaloŋ a boma zaa zu.”—Kanne Yieme 99:1-3.
Baabole Poɔ Yelsonne
it-2 994
Yieloŋ
Ka hooŋ kaa a Yieme gane poɔŋ, ho na nyɛɛ a yelbie “yieloŋ paalaa.” Kyɛ, be yoŋ naane baŋ sɛge a yelbie ŋa eŋ, Aizeeya ane bitontona Gyɔɔn meŋ da sɛgɛɛ a yelbie ŋa neŋ a zu. (Ym 33:3; 40:3; 96:1; 98:1; 144:9; 149:1; Ai 42:10; Yel 5:9; 14:3) Ka teneeŋ mãã te menne a peɛre ziiri na zaa ba naŋ sɛge a yelbie “yieloŋ paalaa” eŋ a Baabole poɔŋ na, te na wa nyɛŋ ka a maŋ wulee saŋa na Jehoova naŋ tu so-paalaa kaŋa a wuli ka ona la seŋ ka o dire naaŋ a kaara bonvore zaa. Yieme 96:10 yeleeŋ ka: ‘Jehoova wa leɛ la naa.’ Azuŋ, boŋ la a “yieloŋ paalaa” ŋa yelzu? A yelzu la ka, Jehoova vɛŋɛɛŋ ka o naaloŋ na yɛlle gaa tɔɔre, a lɛ wulo lɛ na a yɛlɛ ŋa naŋ e nimizeɛ a ko noba naŋ be sazu neŋ a teŋɛzuŋ.—Ym 96:11-13; 98:9; Ai 42:10, 13.
OCTOBER 21-27
BAABOLE POƆ YELNIMIZEERE YIEME 100-102
Lɛ Teŋ Na Toɔ̃ E A De Wuli Ka Te Niŋe Paalɛɛ Yelmeŋɛ Nɔmmo Na Jehoova Naŋ Wulo Te Na
Lɛ Hoŋ Na Baŋ E Sɛgre Ho Meŋɛ A De Suobu
18 Ka hooŋ nɔŋ Jehoova, a eɛ yɛlɛ naŋ soma yaga a gaŋ yelzaa. (Kanne Yeng Yelibie 3:3-6.) Ka nɔmmo ho naŋ taa ko Jehoova naŋ e kpeɛŋaa, ho na toɔ̃ arɛɛ yelkpeɛŋaa zaa hoŋ na tuore noɔreŋ. Gbɛɛ yaga a Baabole maŋ yelee yelmeŋɛ nɔmmo na Jehoova naŋ taa ko o puorebiiri na yɛlɛ. A yelmeŋɛ nɔmmo ŋa tɛgɛ la ka, Jehoova daŋ koŋ zagre o puorebiiri bare. Nɔmmo na o naŋ taa ko ba na daŋ koŋ baare zaa. (Yiem. 100:5) Naaŋmen maale boŋ o waaloŋ poɔŋ. (Mun. 1:26) Azuŋ wala hoŋ meŋ na baŋ toɔ̃ e a wulo ana nɔmmo ŋa tɔ?
19 Te daŋ yel nimipa yɛlɛ. (1 Tɛs. 5:18) Bebiri zaa maŋ soore ho meŋɛ ka, ‘Sobuoŋ ka Jehoova wuli nɔmmo ko ma?’ Ka hooŋ wa puoro, maŋ mɔɔ kyɛ puore Jehoova bareka, a yel yɛlɛ na meŋɛ o naŋ e ko bo. Baŋ ka, yɛlɛ na zaa Jehoova naŋ erɛ korɔ bo na, o naŋ nɔŋ bo zuŋ oŋ maŋ eraa, aŋa lɛ bitontona Pɔɔl meŋ naŋ da wa nyɛ na. (Kanne Galesiya 2:20.) Soore ho meŋɛ ka, ‘Lɛ na Jehoova naŋ nɔŋ ma na vɛŋɛɛŋ maŋ meŋ boɔrɔ ka N wulo nɔmmo koroo bee?’ Ka hooŋ nɔŋ Jehoova a na soŋ boŋ ka ho toɔ̃ are ho pigrinyɛ ane ho yelkpeɛne noɔreŋ. Ana soŋ boŋ ka ho puoro Jehoova wagre zaa a maŋ wulo ho nɔmmo koroo bebiri zaa.
w23.02 17 wɛl. 10
“Yɛ Baŋ Yɛmenne Taabo, A Kaara Velaa!”
10 Yɛlɛ na mine aŋ seŋ ka te tage te menne yi a poɔŋ la, teŋ na maŋ deɛnɛ neŋ neɛ kaŋa aŋa te naŋ boɔroo, dããnyu-gaalii, bondi-gaalii, potu-yɛlɛ yeluu, nimipɛle yɛlɛ naŋ taa zɔɔzɔɔ yɛlɛ a poɔŋ, pornography, ane a taataa. (Yiem. 101:3) Te dɔndɔmɔ Setaana maŋ boɔrɛɛ soe ka o sãã te neŋ Jehoova niiloŋ na wagre zaa. (1 Pit. 5:8) Nyuuri, zirii ŋmaabo, bombɔ-gaŋne, taŋkama, haabo ane teŋ na maŋ gbuuli yɛlɛ eŋ te poɔŋ eɛ gyogri naŋ ba soma. Ka teneeŋ ba kaara soŋ Setaana na baŋ vɛŋeŋ ka te taa a gyogri ŋa te teɛrɛ ane te sukyie pooreŋ. (Gal. 5:19-21) A gyogri ŋa maŋ piilee fẽẽfẽẽ te enneŋ, kyɛ ka teneeŋ ba lonne wieoŋ a iraa bare, a na baŋ baaŋ a tɛ nyɛgɛ, a waa ŋa teɛ naŋ taa zɛloŋ a sãã te yɛlɛ zaa.—Gyi. 1:14, 15.
w11 7/15 16 wɛl. 7-8
Ho Na Sagɛɛ Jehoova Kpããmo Na Bee?
7 Bo yɛlɛ teŋ na baŋ lɛ e a de wuli ka te tagrɛɛ te menne yire a zirii wulwulbo ŋa eŋɛŋ? A ba seŋ ka te deɛ ba saannoŋ waneŋ te deri pooreŋ. Te koŋ sage kanne ba gama ba naŋ sɛge meŋ, kyɛbee a kaa ba TV zu yɛlɛ. Te koŋ sage gaa ba intanɛt tomaziiri meŋ a te peɛrɛ yɛlɛ beŋ, kyɛbee a sɛge yɛlɛ eŋ yɛlɛ na baŋ maŋ de eŋ intanɛt zuŋ na. Bonso aŋ seŋ ka te e lɛ? Ananso la nɔmmo. Te nɔŋ la ‘a yelmeŋɛ Naaŋmen,’ azuŋ, te ba boɔrɔ ka te de zirii wuluu zaa naŋ ba kyaare o yelmeŋɛ Yelbiri na poɔŋ tonɔ neŋ toma. (Yiem. 31:5; Gyn. 17:17) Te nɔŋ la Jehoova lantaapuoruu na meŋ, Jehoova tu la a lantaapuoruu ŋa eŋɛŋ a wuli te yelmenne naŋ toɔrɔ sukyiri yaga. A yelmenne ŋa mine la, Jehoova yuori na, lɛ a yuori naŋ wulo, poboɔbo na Naaŋmen naŋ taa ko a teŋgane, yɛlɛ naŋ maŋ pɔge neɛ saŋa na oŋ wa kpi, ane a kũũ leɛ-iruu teɛretɔ na. Ho na baŋ teɛrɛɛ lɛ na aŋ da tɔ ho sukyiri saŋa na hoŋ wa zanne a yelmenne ŋa a dɛndɛŋ saŋa na bee? Azuŋ, bonso aŋ seŋ ka ho tere sori ka noba naŋ ba taa gyeremɛ ko Jehoova lantaapuoruu na sãã teɛroŋ na hoŋ taa kyaare a lantaapuoruu na naŋ wuli bo a yelmenne ŋa zaa na?—Gyn. 6:66-69.
8 Yelzaa zirii wulwulbo naŋ na yeli, kyɛ te daŋ koŋ de ba yɛlɛ na toŋ neŋ toma zaa! Bonso aŋ seŋ ka te gaa a kɔlonne ŋa naŋ ko zie ka ba te bɛnle te, a lɛ e te yɛlɛ naŋ na vɛŋ ka te poɔ sãã? Yɛ vɛŋ ka te zaa naŋ kyɛnɛ dire yelmennoŋ korɔ Jehoova ane o lantaapuoruu na, bonso a yi wagre kɔɔroo kaŋa poɔŋ ba wuleeŋ ka ba eɛ noba naŋ taa koɔ̃ naŋ maŋ mãã te kɔnnyuuri. A koɔ̃ ŋa la wuluu na baŋ maŋ korɔ te yire Naaŋmen Yelbiri na oŋ de vooroŋ soŋ a soŋ noba baŋ sɛge na. A wuluu ŋa maŋ korɔ teŋ pɛnnoo.—Aiz. 55:1-3; Mat. 24:45-47.
Baabole Poɔ Yelsonne
it-2 596
Zuŋyaaraa
Ka zuŋyaaraŋ wa di bondirii a tigi o zaa, o maŋ ɛgeŋ a gaa zie kaŋa a te bebe o yoŋ sɛŋ. Ka o naŋ wa gaa ana zie na, o maŋ te erɛɛ nemba-yɛlɛ. O maŋ de la o zu a eŋ o begɛ na kpakyagaŋ a are dendeŋe lɛ, azuŋ, ka neɛŋ be tɔɔreŋ a kaaroo o soba na teɛreŋ ka ku-pelaa la. A nuulee ŋa maŋ toɔ̃ eɛ a yɛlɛ ŋa aware yaga. A lɛ zuŋ, saŋa na a yieloŋ yiele naŋ da boɔrɔ ka o wuli lɛ na posãã naŋ kyɛre o sukyiri na, o da de la lɛ na a zuŋyaaraa naŋ maŋ erɛ na a de wuli a yɛlɛ muni. O da yeleeŋ ka: “N waa ŋa mɔpere poɔ zuŋyaaraa.” (Ym 102:6) A yelbiri “mɔpere” ba wulo zie biiree naŋ be yoŋ, kyɛ o na baŋ lɛ wulee zie nensaaleba naŋ ba kpeɛrɛ. O na baŋ wulee ziiri naŋ taa mɛmɛrɛɛ meŋ. Ka a saluoniŋ wa leɛre, a Gyɔɔdan Baa na samun-gɔɔ sɛŋ naŋ maŋ taa mɛmɛrɛɛ na zuŋ, zuŋyaaree maŋ te kpeɛrɛɛ beŋ. A naŋ wa ta zenɛ ŋa, a zuŋyaaree ŋa naŋ maŋ gaa la be. Zuŋyaaree parɛɛ ata la da maŋ be a Izerayɛl paaloŋ poɔŋ. Kaŋa na soba noba naŋ da maŋ nyɛrɛ yaga zaa la a eastern white zuŋyaaraa na (ona ka Science noba maŋ boɔlɔ ka Pelecanus onocrotalus). Kyɛ a Dalmatian zuŋyaaraa (ona ka Science noba maŋ boɔlɔ ka Pelecanus crispus), ane a pink-backed zuŋyaaraa (ona ka Science noba maŋ boɔlɔ ka Pelecanus rufescens) na yɛŋ, noba ba maŋ nyɛraa yaga a Izerayɛl paaloŋ poɔŋ.
Zuŋyaaree maŋ nɔŋeŋ ka a be zie noba naŋ ba koɔrɔ, bonso a ba maŋ boɔrɔ ka noba dɔɔnaa. Ka a naŋ wa gaa a ziiri ŋa, a maŋ te maalɛɛ a kyogri, a nyɛ a gyɛlɛ, a guoli a bilii, a kyɛ pãã leɛ gaa mane a te boɔrɔ zoma ka a vɔle. Zuŋyaaree naŋ maŋ nɔŋ ka a be zie kaŋa a yoŋ sɛŋ ane zie noba naŋ ba be na zuŋ, saŋa kaŋa a Baabole maŋ de la zuŋyaaree are ko sããmmo kpɛlɛŋkpɛlɛŋ. Saŋa na Aizeeya naŋ da boɔrɔ ka o wuli lɛ na baŋ na sãã Iidom kpɛlɛŋkpɛlɛŋ na, o da yeleeŋ ka, zuŋyaaree na kpeɛrɛɛ Iidom teŋɛ na. (Ai 34:11) Zefanaiya meŋ daŋyeleeŋ ka zuŋyaaree na kpeɛrɛɛ Ninevɛ teŋkpɛŋ na poɔŋ. Lɛ wuleeŋ ka ba na sãã la Ninevɛ kpɛlɛŋkpɛlɛŋ ka neɛzaa koŋ lɛ zeŋ beŋ.—Zf 2:13, 14.
OCTOBER 28–NOVEMBER 3
BAABOLE POƆ YELNIMIZEERE YIEME 103-104
O Maŋ Leɛteɛreŋ Ka “Tɛne Lɛ Te”
Tɔglɔ Jehoova A Ta Vɛŋ Ka Ho Yɛlɛ E Tuo Te Gaali
5 Jehoova naŋ taa sigrimennoŋ ane nyonono zuŋ, o yɛlɛ ba e tuo te gaali. Aŋa mannoo poɔŋ, Jehoova da wulee o sigrimennoŋ saŋa na oŋ da waana ka o sãã neŋfaare naŋ da be Sodom na. Jehoova da tu la o malekere eŋɛŋ kyɛ yelko Lɔt naŋ da e mennoŋ soba ka o zo gaa tanne zu a te bɔ o zu zie. Lɔt da zoree dabeɛ̃ ka o gaa be. Lɔt da sɔrɛɛ Jehoova ka o vɛŋ ka o neŋ o yideme zo gaa Zooer. Kyɛ Zooer meŋ da e la teŋbile kaŋa Jehoova naŋ da boɔrɔ ka o sãã. Jehoova da naaŋ baŋ yelkooŋ ka o gaa zie na O naŋ wuluu na. Kyɛ Jehoova da sagɛɛ Lɔt sɔroo na, azuŋ o da ba sãã Zooer. (Mun. 19:18-22) Yuomo mine puoreŋ, Jehoova da wulee nyonono ko a Ninevɛ deme meŋ. O da yelko la Gyoona ka o te yel a sããmmo kpoŋ naŋ waana na yɛlɛ a ko a teŋɛ noba. Kyɛ saŋa na a Ninevɛ deme naŋ da leɛre ba eebo na, Jehoova da zo la ba nembaaloŋ, azuŋ o da ba sãã ba.—Joona 3:1, 10; 4:10, 11.
Dɛle Jehoova Aŋa Lɛ Samsen Naŋ Da E Na
16 Aneazaa ka yeltuo da pɔge la Samsen o gbɛre na o naŋ da ŋmɛ na zuŋ, o da naŋ mɔɔrɔŋ ka o erɛ Jehoova boɔbo. Ka teneeŋ gbaŋ wa ŋmɛ gbɛre ka ba yel te nimiri yɛlɛ ko te, bee ka te kɔŋ apoɔsori mine te naŋ da taa, aseŋ ka te naŋ mɔɔrɔ ka te erɛ yɛlɛ naŋ pɛlɛ Jehoova poɔ. Teɛrɛ baŋ ka Jehoova eɛ siri ka o di te yelbebe suuri ko te. (Yiem. 103:8-10) Aneazaa ka te maŋ ŋmeɛrɛɛ gbɛɛ, kyɛ Jehoova naŋ na baŋ de teŋ toŋ ne toma aŋa Samsen.
17 Te nyɛ te yɔɔdɔɔ bile kaŋa yuori naŋ di Michael. O nimiri da moɔ̃ la Jehoova puoruu poɔŋ, o da eɛ a nembɛrɛ sonneba kaŋa a kyɛ da la e paaneɛ meŋ. A posaanaa la ka, o da ŋmɛ la gbɛre, aŋ vɛŋ oŋ koŋ apoɔsoe na oŋ da taa a lantaapuoruu poɔŋ na. O yeleeŋ ka: “N nimiri da moɔ̃ la yaga zaa Jehoova toma poɔŋ, kyɛ aŋ wa ta saŋa kaŋa ka yɛlɛ da leɛre dayeni, aŋ waa ŋa N koŋ baŋ la e yelzaa Jehoova puoruu poɔŋ. N da baŋɛɛŋ ka Jehoova koŋ zagre ma bare zaa, kyɛ N da maŋ teɛrɛŋ ka N ne o niiloŋ daŋ koŋ baŋ lɛ waa ŋa lɛ na oŋ da waa na, bee N daŋ koŋ baŋ lɛ toŋ ko Jehoova a lantaapuoruu poɔŋ, aŋa lɛ maŋ da erɛ na.”
18 Kyɛ a yɛlɛ soŋ zie la ka, Michael eŋɛ da ba kyoɔre. O da lɛ yeleeŋ ka: “N da mɔɔrɛɛ N mɔɔre zaa ka N neŋ Jehoova niiloŋ la waa lɛ na oŋ da waa na, N da maŋ yi la N sukyiri zaa a puoro koroo wagre zaa, a zanna boma, a maŋ teɛrɛ yɛlɛ na maŋ zanna na yɛlɛ gɛrɛ tɔɔre.” Wagre mine puoriŋ, Michael da lɛ nyɛɛ apoɔsoe na oŋ da taa a lantaapuoruu poɔŋ na. Pampana ŋa o eɛ a lantaapuoruu neŋkpoŋ kaŋa ane paaneɛ. O yeleeŋ ka: “Sommo ane faŋa emmo na a lantaapuoruu nembɛrɛ naŋ da ko ma na da soŋ maŋ maŋ nyɛ ka Jehoova naŋ nɔŋ maŋ. Pampana ŋa, N de la zoma naŋ tori a puoro Jehoova. A yɛlɛ ŋa soŋ maŋ maŋ nyɛ ka Jehoova na baŋ vɛŋ ko la neɛzaa naŋ e kaŋdabaŋkalɛ a leɛre yi o yelbebe poɔŋ.” Te meŋ na baŋ sagediŋ ka, ka teneeŋ gbaŋ daŋ ŋmɛ gbɛre a kyɛ mɔɔrɔ te mɔɔbo zaa ka te maale a yɛlɛ, a kyɛ dɛle Jehoova meŋ, o na baŋ lɛ de teŋ toŋ neŋ toma a ko te maaloo meŋ.—Yiem. 86:5; Yeng. 28:13.
Ho Na Baŋ Ta La Yɛlɛ Na Hoŋ De Biŋ Ho Nimitɔɔreŋ Jehoova Puoruu Poɔŋ
2 Ka hooŋ de yelkaŋa biŋ ho nimitɔɔreŋ pampana a kyɛ naŋ ba ta a yɛlɛ, ta vɛŋ ka ho eŋɛ kyoɔre. Ka neɛŋ de yelfẽẽ kaŋa biŋ o nimitɔɔreŋ, kyɛ a maŋ de la wagre neŋ tonkpeɛne sɛre kyɛ oŋ na ta a yɛlɛ. Lɛ na hoŋ mɔɔrɔ ka ho ta yɛlɛ na hoŋ de biŋ ho nimitɔɔreŋ na wuleeŋ ka ho de la ho neŋ Jehoova niiloŋ na tegroŋ yaga, a boɔrɔ ka ho tonɔ koroo neŋ ho faŋa zaa. Jehoova poɔ maŋ pɛle neŋ la ho mɔɔbo na zaa. Yelmeŋɛ la, o ba kaara soriŋ ka ho e yɛlɛ naŋ gaŋ ho faŋa. (Yiem. 103:14; Maik. 6:8) Azuŋ, de yɛlɛ hoŋ na baŋ ta biŋ ho nimitɔɔreŋ. Ka hooŋ wa de yɛlɛ biŋ ho nimitɔɔreŋ, wala hoŋ na baŋ e a ta a yɛlɛ? Yɛ vɛŋ ka te nyɛ yɛlɛ mine naŋ na toɔ̃ soŋ te.
Baabole Poɔ Yelsonne
cl 55 wɛl. 18
Kpeɛ̃o Na Oŋ Taa Ka O Maale Boma—Soba Na Naŋ “Maale Sazu Ane Teŋgane” Na
18 Bo yɛlɛ teŋ na baŋ zanne yi lɛ na Jehoova naŋ maŋ de kpeɛ̃o na oŋ taa ka o maale boma na tonɔ neŋ toma na? Ka teneeŋ leɛ kaa boma tɛɛtɛɛ na zaa Jehoova naŋ maale na, te nɔɛ zaaŋ maŋ mãã. A yieloŋ yiele kaŋa noɔre da mãã yɛŋ yaga zaa oŋ yelka: ‘Oo Jehoova, nyɛ ho toma naŋ e gyamaa seŋ lɛ. . . . Teŋgane paalɛɛŋ neŋ ho bontaree.’ (Yieme 104:24) A yɛlɛ ŋa eɛ yelmeŋɛ yaga zaa. Noba naŋ maŋ peɛrɛ bonvobɔ yɛlɛ baŋ boɔlɔ ka biologists yeleeŋ ka bon-irii tɛɛtɛɛ naŋ pare turituri la be a teŋɛzuŋ. Noba yaga teɛrɛɛŋ ka bon-irii tɛɛtɛɛ naŋ pare lɛ gba bebeŋ. Ka nensaalaaŋ wa paintere boma, saŋa kaŋa o maŋ wa nyɛŋ ka o ba maŋ lɛ taa bonzaa oŋ na painte ka o e o yoŋ. Jehoova taaɛ a kpeɛ̃o a na baŋ maale boma tɛɛtɛɛ, ka kaŋa zaa maŋ e o yoŋ. Kpeɛ̃o na oŋ taa ka o maŋ maale bonpaala na daaŋ koŋ baŋ baare zaa.