Te Zemmo Ane Te Naaŋ Moɔloo Toma Lammo Yelsɛgree Yelpeɛre Gane
MAY 3-9
BAABOLE POƆ YELNIMIZEERE | SORIBU 27-29
“Tɔglɔ Jehoova Dantorii Na”
w13 6/15 10 wɛl. 14
De Ho Sukyiri Zaa Wulo Nimipa Korɔ Jehoova Gyog–Sonne Na
14 Zeloofehad pɔgeyaare banuu na da gaa la Moosis seŋ a te sooroo ka: “Wala zuŋ ka te ba yuori na bɔre o dinoɔreŋ oŋ ba tare bidɔɔ zuŋ?” Ba da la yelka: “Azuŋ yɛ ko te teŋgane te saa babiiri na poɔŋ.” Ka lɛ Moosis da yelka ‘o koŋ baŋ e yelzaa a yɛlɛ ŋa poɔŋ bee’? Ai, o “da de la a yɛlɛ waaneŋ Jehoova nimitɔɔre.” (Sor. 27:2-5) Boŋ da yi a poɔŋ wa? Jehoova da yelko la Moosis ka: “Zeloofehad bipɔgeba na toɔre nomaŋ. Peɛlaaŋ, yɛ ko ba teŋgane ka ba di kyɛŋ ba babiiri poɔŋ, leɛre ba saa kyɛŋ ko ba.” Jehoova da ba de a yɛlɛ biŋ beŋ. A lɛ puoreŋ Jehoova da leɛrɛɛ O sarɛɛ diibu na oŋ wa leɛ begu, azuŋ o da yelko la Moosis ka: “Ka dɔɔŋ kpi kyɛ ba tare bidɔɔ, yɛ maŋ leɛre o kyɛŋ ko o bipɔgeba.” (Sor. 27:6-8; Joos. 17:1-6) A yi ana saŋa gɛrɛ, a begu ŋa da gu la Iisiriel pɔgeba naŋ na be a yelwonaa ŋa tɔ poɔŋ.
w13 6/15 11 wɛl. 15
De Ho Sukyiri Zaa Wulo Nimipa Korɔ Jehoova Gyog–Sonne Na
15 Nyɛ lɛ a yɛlɛ ŋa naŋ da wuli ka Jehoova taaɛ nimimaaroŋ aneŋ dantorii! Jehoova da wulee gyeremɛ ko a pɔgeyaare ŋa naŋ be a wommo poɔŋ na, aŋa lɛ o naŋ da taa gyeremɛ ko Iisiriel biiri zaa naŋ da ba kye a wommo ŋa tɔ poɔŋ na. (Yiem. 68:5) A yɛlɛ ama taa eɛ yaga a Baabole poɔŋ. A Zeloofehad pɔgeyaare ŋa yɛlɛ toɔrɛɛ sukyiri a kyɛ wulo te ka: Jehoova maŋ wulee dantorii korɔ o puorebiiri zaa.—1 Saa. 16:1-13; Toma 10:30-35, 44-48.
w13 6/15 11 wɛl. 16
De Ho Sukyiri Zaa Wulo Nimipa Korɔ Jehoova Gyog–Sonne Na
16 Wala teŋ na toɔ̃ e a tɔglɔ Jehoova dantorii na? Teɛre baŋ ka, te na toɔ̃ wulee dantorii soe ayi mine poɔŋ. Ka te naŋ taa dantorii gyogo, lɛ yɛŋ te na toɔ̃ wulee neɛzaa dantorii. Yelmeŋa la, te kaŋa zaa maŋ deŋ ka te sagrɛɛ noba mine teɛroŋ a kyɛ wulo dantorii meŋ. Kyɛ te zaa baŋɛɛŋ ka, wagre mine a ba maŋ e mɔlɔ ka te sage ka te teɛroŋ ba tori. Azuŋ, wala teŋ na e baŋ ka noba nyɛrɛ teŋ ka te eɛ noba naŋ wulo dantorii? Tɔɔ, saŋa na Yezu naŋ da boɔra ka o baŋ teɛroŋ na noba naŋ taa kyaaroo na, o da soorɛɛ o zɔmenne na o naŋ sagedi na ka: “A noba yelka nembuo la a nensaalaa bie?” (Mat. 16:13, 14) Ho na toɔ̃ tɔglɛɛ Yezu a sori ŋa poɔŋ. Ho na toɔ̃ soorɛɛ ho zɔmeŋa kaŋa naŋ na toɔ̃ yeli a yelmeŋa ko bo, ka ho sereŋ eɛ neɛ naŋ wulo dantorii bee. Ka o sobaŋ yelka, wagre mineŋ ho ba maŋ wulo nɔmmo korɔ noba mine naŋ yi ziyobo, bee noba mine naŋ ba taa arizi-bɛra a gbaŋdige poɔŋ, bee nandaaneba, bo aŋ seŋ ka ho e? Puore sɔre Jehoova nimizeɛŋ a kyaare a yɛlɛ ŋa, sɔroo ka o soŋ bo ka ho toɔ̃ leɛre teɛroŋ na ho naŋ taa kyaare noba na, ka lɛ vɛŋ ka ho toɔ̃ wulo dantoriihi aneŋ ho sukyiri zaa.—Mat. 7:7; Kol. 3:10, 11.
Baabole Poɔ Yelsonne
it-2 528 wɛl. 5
Kyɔɔtaare
Bon-nyuurii Sareka. A Iisiriel biiri da maŋ deɛ bon-nyuurii poɔ ba sarekare na ba naŋ da maŋ ire na, agaŋ azaa saŋa na ba naŋ te kpɛ a Noɔre Emmo Teŋgane na. (So 15:2, 5, 8-10) A bon-nyuurii sareka da eɛ (“dããkpeɛne”) ba naŋ da maŋ de kyiri waare a sareka irizie. (So 28:7, 14; de manne neŋ Yi 30:9; So 15:10.) Bitontona Pɔɔl da sɛge te koɛ Kristabiiri naŋ da be Filipae ka: “Haali ka ba naŋ de N nyɔvore bee a de ma kyiri aŋa bon-nyuurii sareka yɛ sagediibu toma na eŋaŋ, N poɔ pɛlɛɛŋ.” A zie ŋaŋ o da deɛ a bon-nyuurii sareka e bigree, a wuli lɛ o naŋ boɔra ka o yi o sukyiri zaa poɔ a toŋ toŋkpeɛne ko o taa Kristabiiri. (Fi 2:17) Aŋ da kyɛre fẽẽ ka Pɔɔl kpi na, o da sɛgɛɛ gane te ko Timoti a yelka: ‘Maa eŋ, ba de ma la maale ne sareka baare aŋa ba naŋ bare koɔ̃, ka a saŋ ta ka N yi a teŋɛzu.’—2Ti 4:6.
MAY 10-16
BAABOLE POƆ YELNIMIZEERE | SORIBU 30-31
“Paale Ho Pɔre Na”
it-2 1162
Pɔre
A Da Ba E Fɛrɛbo Ka Neɛ Pɔ, Kyɛ Ka Ho Naŋ Pɔ, Fɛrɛbo La Ka Ho Paale A Pɔre. Pɔre da ba e fɛrɛbo. Kyɛ, ka neɛŋ wa pɔ, Naaŋmen bege da wuleeŋ ka aseŋ ka o paale ana pɔre na. Azuŋ ka neɛŋ pɔ ‘o maŋ lee o meŋa,’ lɛ wuleeŋ ka o maŋ deɛ o nyɔvore biŋ ka, ka o naŋ ba paale a pɔre, o na kɔŋ la o nyɔvore. (So 30:2; kanne Ur 1:31, 32 meŋ.) Teŋ na toɔ̃ kɔŋ te nyɔvore zuŋ la ka a Baabole kpãã te nimizeɛŋ ka, te maŋ teɛre te fɛrɛbo toma naŋ be a pɔre poɔŋ gaa tɔɔre sɛre kyɛ pɔrɔ. A Moosis Bege da wuleeŋ ka: ‘ka ho naŋ maŋ wa di nɔsama bee a pɔ Jehoova ho Naaŋmen seŋ . . . ta maŋ naara ka ho yɔɔ, bozuŋ Jehoova ho Naaŋmen na soore boŋ o sane, ka a leɛ faaloŋ ko bo. Kyɛ ka ho naŋ ba di nɔsama yɛŋ bee a pɔ, lɛ koŋ leɛ faaloŋ ko bo.’—Du 23:21, 22.
it-2 1162
Pɔre
Pɔre eɛ noɔre emmo neɛ naŋ maŋ eŋ ko Naaŋmen nimizeɛŋ ka o e yelkaŋa, bee a iri sareka kaŋa bee a tere kyɔɔtaa kaŋa, bee a toŋ o puoruu toma mine, bee a tage o meŋa yi yelkaŋa a bege naŋ tere sori ka o na baŋ eŋ gba. Pɔre eɛ yɛlɛ neɛ naŋ da maŋ pɔ ko Naaŋmen a yi o meŋa poboɔbo poɔŋ. Pɔre naŋ e yelnimizeɛ ho naŋ eŋ noɔre na zuŋ, wagre mine o maŋ wa leɛ la yɛlɛ ho naŋ polle bee a pɔ ka ho na eŋ. Azuŋ wagre mine ba maŋ de la a yelbie ayi ŋa zaa toŋ toma a Baabole poɔŋ. (So 30:2; Mt 5:33) “Pɔre” eɛ yɛlɛ ho naŋ maŋ yele gbaŋgbaleŋ a wuli lɛ ho naŋ boɔra ka ho e, kyɛ ka yɛlɛ ho naŋ “polle biŋ” wuli ka, ho yi la ho sukyiri zaa poɔŋ a yele korɔ neɛkaŋa kpeɛ̃o naŋ gaŋ bo ka, yɛlɛ na ho naŋ pɔ na sereŋ eɛ yelmeŋa bee a sereŋ le boŋ. Pɔre da maŋ are di la sieree a ko layiri.—Mn 26:28; 31:44, 53.
w04 8/1 27 wɛl. 3
Yɛlnimizeere Naŋ Be A Soribu Gane Poɔ
30:6-8—A Kristabiiri lantaapuoruu poɔŋ, dɔɔ na toɔ̃ pigee o pɔgɔ sori ka o ta paale o pɔre bee? Ka te naŋ wa pɔ, Jehoova kaarɛɛ soriŋ ka te kaŋa la kaŋa zaa paale o pɔre. Aŋa bigree poɔŋ, te meŋa la maŋ yi te sukyiri poɔŋ a de te menne ko Jehoova. (Galesiya 6:5) Azuŋ, serɛ ba taa kpeɛ̃o ka o pige o pɔgɔ sori ka o ta paale o pɔre. Kyɛ a ba seŋ ka a pɔgɔ pɔre na sãã Naaŋmen Bege, bee a piguu sori ka o ta toɔ̃ toŋ o fɛrɛbo toma ko o serɛ.
Baabole Poɔ Yelsonne
it-2 28 wɛl. 1
Jeefita
Ba da maŋ toɔ̃ deɛ neɛ tere ka o tona Jehoova toma yoŋ a ŋmenpuoredieŋ. Bidɔgreba da taaɛ kpeɛ̃o ka ba de a gbɛre ŋa ko ba biiri. Aŋa bigree poɔŋ, sɛre baŋ na dɔge Saamiuel na, o ma Haana da eŋɛɛ noɔre ka o na de oŋ tere ka o te tona toma a ŋmenpuoredie poɔŋ. O serɛ Elikeena da sagɛɛ a pɔre ŋa. A yi saŋa na Haana naŋ wa ŋmaa Saamiuel bere na, o da de oŋ gaa neŋ a ŋmenpuoredie. Haana da deɛ Saamiuel a de sareka nadare paale o eŋeŋ gaa neŋ. (1Sa 1:11, 22-28; 2:11) Saamisong meŋ da eɛ a bie ŋa kaŋa naŋ e o yoŋ baŋ de o tere ka o tona Naaŋmen toma aŋa Naazariti.—Sar 13:2-5, 11-14; kaa nyɛ lɛ bisaa naŋ taa kpeɛ̃o o pɔgeyaa eŋɛŋ aŋa lɛ ba naŋ sɛgɛ eŋ So 30:3-5, 16.
MAY 17-23
BAABOLE POƆ YELNIMIZEERE | SORIBU 32-33
“Yɛ Kare A Paaloŋ Kpeɛreba Zaa Bare Yɛ Nimitɔɔreŋ”
w10 8/1 23
Ho Da Baŋɛɛŋ?
“Ziduorihi” na Hiburu Sɛgre naŋ yel a yɛlɛ gbɛɛ yaga na la bo?
A naŋ da kyɛre fẽẽ ka a Iisiriel biiri gaa a Noɔre Emmo Teŋgane na, Jehoova da yelko baŋ ka, ba sãã a Keenan deme naŋ da kpeɛra be bagmaale puoruu ziiri na zaa. Naaŋmen da ko baŋ noɔre ka “Yɛ kare . . . a paaloo kpeɛreba zaa ka ba yi yɛ nimitɔɔreŋ, yɛ sãã ba kubo baga ne zaa, yɛ sãã ba baga baŋ nyɛli boma maale a sãã ba ziduorihi zaa.” (Soribu 33:52) Ba da maalɛɛ a bagmaale puoruu ziiri ŋa tanne zuriŋ, bee ziyobo mine ba naŋ da maalaa biŋ aŋa teere muniŋ bee a teŋkpɛŋ poɔŋ. (1 Namine 14:23; 2 Namine 17:29; Iziikiel 6:3) A bagmaale ziiri ŋa da maŋ taaɛ sareka iri ziiri, bagmaale kubo bee bagmaale daare, bagpɛnnee, iinsens nyugi ziiri, aneŋ a boma ŋa taa baŋ da maŋ puoro.
w08 2/15 27 wɛl. 5-6
Zanne Yelkaŋa Yi A Iisiriel Biiri Gbɛŋmɛ Na Eŋaŋ
Zenɛ ŋa, te meŋ maŋ tuoree yelkpeɛne na a Iisiriel biiri naŋ da tuore na mine. Zenɛ ŋa noba mine puoree boma mine aŋa baga. A boma ŋa mine la libie, bee noba yoe naŋ do nimipɛl yɛlɛ poɔŋ, kɔbɔ dɛnnoo poɔŋ, a donɛɛ naaŋ diibu yɛlɛ poɔŋ, bee ŋmenpuore wedeɛreba mine, aneŋ te yideme gba. Ka te naŋ ba kaa soŋ, te meŋ na deɛ te teɛroŋ zaa gaa eŋ a yɛlɛ ama mine poɔŋ. Ka te neŋ noba naŋ ba nɔnɔ Jehoovaŋ nyɔge zɔmennoŋ, ana toɔ̃ sãã la te neŋ Jehoova zɔmennoŋ na.
Peɛ̃mmo toma da eɛ a Baal puoruu yelnimizeɛ na kaŋa ba naŋ da de bɛnle nyɔge a Iisiriel biiri yaga zie zaa. Peɛ̃mmo toma eɛ kyɛbaa naŋ naŋ nyɔgrɔ Naaŋmen puorebiiri zenɛ. Aŋa bigree poɔŋ, ka neɛŋ wa be die poɔŋ o yoŋ a ba kaara soŋ, o na baŋ kaaɛ bonkaŋa o komputa zuŋ ka a sãã o zumɔ. Nyɛ lɛ a naŋ na e faa ka Kristabie vɛŋ ka a intanɛt sɛŋsɛŋ fotori ane vidiori kaabo vɔlaa kpɛ o!
it-1 404 wɛl. 2
Keenan
Joosua da yi la yɛŋ poɔŋ a saaŋ a Keenan deme yaga zie zaa. “O daŋ ba bare yɛlɛ na zaa Jehoova naŋ ko Moosis noɔre ka o toŋ na.” (Js 11:15) A Iisiriel biiri da zagrɛɛŋ ka ba tu Joosua ewuli soŋ na, azuŋ ba da ba iri a Keenan deme zaa bare a Noɔre Emmo Teŋɛŋ. A Iisiriel biiri naŋ da bare a Keenan deme baŋ kpeɛrɛ ba poɔŋ na, a da deɛ saammo yaga wa pɔge ba. Azuŋ wagre mine puoreŋ, a yɛlɛ ŋa da vɛŋɛɛŋ ka Iisiriel biiri kpi yaga zaa a gba gaŋ lɛ na a Keenan noba naŋ da naaŋ kpi ka ba naŋ da tu Jehoova noɔre a saaŋ a Keenan noba zaa (ka bana naŋ kpi a yi ba toŋfa toŋ, Peɛ̃mmo toma, aneŋ bagmaale gba ba poɔ). (So 33:55, 56; Sar 2:1-3, 11-23; Ym 106:34-43) Jehoova da kpãã la a Iisiriel biiri ka o ba leɛrɛ o dantorii aneŋ o sarɛɛ diibu, azuŋ ka a Iisiriel biiriŋ nyɔge a Keenan deme zɔmennoŋ, bee ka ba neŋ ba laŋ kultaa yɛlɛ, kyɛ bee a de ba menne eŋ ba puoruu yɛlɛ poɔŋ, bee ka ba de a Keenaŋ deme puoruu sããkoŋ yɛlɛ, bee a tɔglɔ ba gyog–faare na, lɛ na vɛŋɛŋ ka a Keenan deme saammo na neŋ o zu wa page ba, bee ka a ‘teŋgane na ba naŋ kpeɛrɛ na ti ba bare.’—Yi 23:32, 33; 34:12-17; Lv 18:26-30; Du 7:2-5, 25, 26.
Baabole Poɔ Yelsonne
it-1 359 wɛl. 2
Toribogu
Ka ba naŋ wa lɔɔ a bie baare, a pãã na wulee zie a Iisiriel baloo zaa naŋ na zeŋ. Ba maŋ lɛ kaa la lɛ bale zaa noba naŋ e yaga seŋ kyɛ pãã po a teŋgane ko ba. “Yɛ po a paaloo a tuuro pohibuŋ bee bie lɔɔboŋ ka o e kyɛŋboŋ ko yɛ di-noe. Ka nobaŋ wa e yaga, ho na ko baŋ kyɛŋ naŋ e kpoŋ, ka ba naŋ wa e fẽẽ ho na ko baŋ kyɛŋ naŋ e fẽẽ. Kaŋa zaa kyɛŋ na maŋ eɛ boŋ naŋ wa o seŋ a tuuro pohibuŋ bee bie lɔɔboŋ.” (So 33:54) Ka a bie lɔɔboŋ wa iri zie kaŋa ko a bale kaŋa, ba koŋ leɛroo. Kyɛ lɛ na noba naŋ e yaga seŋ ana bale na poɔŋ la na wuli lɛ a kyɛŋ naŋ na e kpoŋ seŋ. Azuŋ saŋa na ba naŋ da wa nyɛ ka Gyuuda teŋgane na da eɛ kpoŋ te gaali na, ba da leɛrɛɛ Gyuuda teŋgane na kyɛlee a ko Simeon bale na.—Js 19:9.
MAY 24-30
BAABOLE POƆ YELNIMIZEERE | SORIBU 34-36
“Bɔ Lirizie Jehoova Seŋ”
w17.11 9 wɛl. 4
Ho Vɛŋɛɛŋ Ka Jehoova E Ho Lirizie?
4 Ka a Iisiriel bie kaŋa ba baŋ kyɛ ko neɛ, wala baŋ da maŋ e o? Aneazaa ka o soba ba baŋ kyɛ ko a neɛ, kyɛ o naŋ toŋ la toŋfaa bonso o ko la neɛ naŋ ba taa saanaa. (Mun. 9:5) Nembazo zuŋ, ba da terɛɛ sori ka o na toɔ̃ zo gaa la a yibɛrɛ ayoɔbo naŋ da e lirizie na kaŋa ka a kũũ yɔɔ kaŋa ta page o ko yaa sane. Beŋ ka o soba da maŋ te nyɛ guubu. Ka o naŋ zo gaa a yibɛrɛ ŋa naŋ e lirizie na kaŋa, aseŋ ka o bebe lɛɛŋ a te ta saŋa na a ŋmenpuore wideɛrɛ kpoŋ naŋ na kpi.—Sor. 35:15, 28.
w17.11 9 wɛl. 6
Ho Vɛŋɛɛŋ Ka Jehoova E Ho Lirizie?
6 Ka neɛŋ ba baŋ kyɛ ko neɛ a kyɛ pãã zo gaa bɔ lirizie a teŋbɛrɛ na kaŋaŋ, yɛlɛ aŋ seŋ ka o daŋ e la ka ‘o manne o yɛlɛ na ko ana teŋkpɛŋ na nembɛrɛ ka ba woŋ.’ Aseŋ ka ba deɛ o soba neŋ saannoŋ. (Joos. 20:4) Ka wagre mineŋ wa pare, ba da maŋ de la o soba leɛ gaa ko a nembɛrɛ naŋ be a yiri na o naŋ ko a neɛ na baŋ di o sarɛɛ. (Kanne Soribu 35:24, 25.) Ka a nembɛrɛŋ wa di o sarɛɛ a nyɛ ka o sereŋ ba baŋ kyɛ ko o soba, ba maŋ leɛ de oŋ gaaneŋ a zo lirizie teŋkpɛŋ na.
w17.11 11 wɛl. 13
Ho Vɛŋɛɛŋ Ka Jehoova E Ho Lirizie?
13 Ka o sobaŋ wa be a zo lirizie teŋkpɛŋ na poɔŋ, o maŋ taa la guubu. Jehoova da yɛlɛɛŋ ka: “A yibɛrɛ ŋa na eɛ kyihi ziiri bee lirizie ko yɛ.” (Joos. 20:2, 3) Jehoova bege da ba lɛ tere sori ka ba la di o soba sarɛɛ buyi ana yelfaa bonyeni na yoŋ zuŋ; aneŋ meŋ neɛ naŋ seŋ ka o naa zĩĩ sane na da ba taa sori ka o kpɛ a teŋkpɛŋ a te ko o soba. Azuŋ o soba da ba seŋ ka o zoro dabeɛ̃ ka neɛ kaŋa na ko oŋ. Ka o sobaŋ wa be a zo lirizie teŋkpɛŋ na poɔŋ, Jehoova da maŋ ko la a soba guubu. A teŋkpɛŋ da ba waa ŋa pagebo die ba naŋ maŋ lare neɛ bare na. A teŋkpɛŋ ŋa da maŋ ko la o soba a poɔsori ka o toŋ toma, a toɔ̃ soŋ nenyobo, a kyɛ puoro Jehoova eŋmaaroŋ poɔŋ. Ɛɛ, o soba na toɔ̃ taaɛ popeɛloŋ aneŋ zeŋ laafeɛ beŋ!
Baabole Poɔ Yelsonne
w91 2/15 13 wɛl. 13
O Yɔɔ Deɛ La Nensaaleba Zaa
13 Adama neŋ Hawaa yɛŋ koŋ nyɛ a yɔɔdeɛbo tɔnɔ. A Moosis Bege da terɛɛ sowuli ka: “Ta wa vɛnɛ ka ba yɔɔ deɛra neɛ aŋ seŋ neŋ ka ba ko.” (Soribu 35:31) Setaana da ba bɛnle Adama. Adama da yi la o meŋa boɔboŋ a toŋ faa. (1 Timoti 2:14) Adama faaloŋ na de la saammo wa ko o biiri zaa, ka lɛ vɛŋ ka o biiri kaŋa zaa ba la pɛgeyi, azuŋ ka Adama biiri zaa kpiire na. A pɛlɛɛŋ ka Adama seŋ ka o kpi, bonso o da pɛgiyieŋ a kyɛ yi o meŋa poboɔboŋ a e tokpeɛne a zagre Naaŋmen begu. Ka Jehoovaŋ da vɛŋ ka Adama nyɛ a yɔɔdeɛbo tɔnɔ, lɛ da naŋ wuliŋ ka Jehoova sãã la o meŋa dantorii na. Kyɛ a yɔɔdeɛbo ŋa soŋɛɛŋ a iri a kũũ na Adama naŋ de wa dɔgle o biiri zuŋ na bare! (Urom 5:16) Bege poɔŋ, a yɔɔdeɛbo iree saammo na faaloŋ naŋ de waaneŋ na zaa bare. A yɔɔdeɛra ‘kpieŋ a ko neɛzaa,’ a faa Adama biiri zaa yi dɔgɛɛ na faaloŋ naŋ de waaneŋ na poɔŋ.—Hiburu 2:9; 2 Korinti 5:21; 1 Piita 2:24.
MAY 31–JUNE 6
BAABOLE POƆ YELNIMIZEERE | DUTUROONOMI 1-2
“Naaŋmen La So A Sarɛɛ Diibu”
w96 3/15 23 wɛl. 1
Jehoova Nɔnɔ La Suntuubu Aneŋ Dantorii
Jehoova iree a lantaapuoruu nembɛrɛ ka ba maŋ di noba naŋ toŋ faaloŋ naŋ e nimizeɛ sarɛɛ. (1 Korinti 5:12, 13) Ka a nembɛrɛŋ wa dire neɛ sarɛɛ, ka o soba yi o sukyiri poɔ e kaŋdabaŋkalɛ, aseŋ ka ba de Naaŋmen dantorii toŋ toma a wuli o soba nembazo. Kyɛ ka o sobaŋ ba yi o sukyiri poɔ e kaŋdabaŋkalɛ, lɛ yɛŋ ba koŋ toɔ̃ wuluu nembazo. Ka a naŋ fɛre ka a nembɛrɛ iri a toŋfatona yi a lantaapuoruu poɔŋ, ba na eɛ lɛ, kyɛ a ba seŋ ka ba are yelkaŋa a soba naŋ e a neŋkpɛŋ kaŋa kyɛ di o sarɛɛ. Ka ba naŋ iri o soba bare ba maŋ taaɛ teɛretɔ ka a na somooŋ ka o leɛre o eebo. (De manne ne Iziikiel 18:23.) Krista la a lantaapuoruu zudaana, ka a lantaapuoruu nembɛrɛ meŋ maŋ wulo dantorii, a kyɛ lɛ e “lirizie a yi saa saseu” eŋɛŋ a ko a lantaapuoruu. (Aizeeya 32:1, 2) Aseŋ ka ba maŋ wulo dantorii a kyɛ maŋ teɛrɛ yɛlɛ gɛrɛ tɔɔre.—Duturoonomi 1:16, 17.
w02 8/1 9 wɛl. 4
Yi Yelmennoŋ Poɔŋ A Sigiri Ho Meŋa Naaŋmen Kpeɛ̃o Na Puliŋ
4 A Moosis Bege bammo da bie o yoŋ, ka sarɛɛ diibu meŋ be o yoŋ. A nembɛrɛ naŋ ba paale pie na zuŋ, aseŋ ka ba kaara soŋ ka gyog–faare mine ta wa vɛŋ ka ba di sarɛɛ naŋ ba tori—aŋa ba menne boɔbo, a wɛlɛ noba, aneŋ bombɔ gaali. Moosis da yelko baŋ ka: ‘Yɛ ta wa baana bee a wɛlɛ noba sarɛɛ diibu poɔŋ. Yɛ maŋ kyɛnle woŋ neŋbaaleba aneŋ neŋtegrɛ zaa yɛlɛ. Yɛ ta wa zoro dabeɛŋ neɛ zaa nimitɔɔreŋ, bozuŋ Naaŋmen la so a saree diibu.’ Ɛɛ, a Iisiriel sare-ŋmaareba da maŋ arɛɛ Naaŋmen gbɛbogreŋ kyɛ dire sarɛɛ. Nyɛ lɛ a poɔsori ŋa naŋ e tegroŋ aseŋ lɛ!— Duturoonomi 1:16, 17.
Baabole Poɔ Yelsonne
w13 9/15 9 wɛl. 9
Te Na Toɔ̃ Dɛlɛɛ Yɛlɛ Na Jehoova Naŋ Maŋ Leɛteɛre Te Na
9 Saŋa na a Iisiriel biiri naŋ da wa piili ka ba kyeŋ sori yuomo lezaa-ayi a “‘wɛgyɛŋ’ naŋ taa dabeɛ̃” poɔ na, Jehoova da ba daŋ wuli ba lɛ o naŋ na wulo ba sori, bee a guuro ba, kyɛ bee a kaara ba yelfɛree zieŋ. Kyɛ, gbɛɛ yaga Jehoova da wuli baŋ ka ba na toɔ̃ dɛlooŋ ane o sowuli na zaa. Ŋmenaa saŋa Jehoova da maŋ de la zuŋzugri kaŋa de ba weɛ, a lɛ de vũũ zeɛ kaŋa meŋ de ba weɛ zisoɔree saŋa meŋ, a teɛre a Iisiriel biiri ka o arɛɛ ba puoreŋ a wulo ba sori a wɛgyɛŋ naŋ taa dabeɛ̃ na poɔŋ. (Dut. 1:19; Yiib. 40:36-38) Jehoova da maŋ kaarɛɛ ba yelfɛree zieŋ. “Ba bonsuurii daaŋ ba kpi, ba gbɛɛ meŋ ba mɔre mɔre.” Yelmeŋa, “ba daaŋ ba kɔŋ bonzaa.”—Niih. 9:19-21.
JUNE 7-13
BAABOLE POƆ YELNIMIZEERE | DUTUROONOMI 3-4
“Yɛŋ Ane Dantorii Be La Jehoova Bege Poɔŋ”
it-2 1140 wɛl. 5
Yɛlɛ Muni Wommu
Ka neɛŋ moɔ nimiri a zanna a Baabole a de o poɔ yɛlɛ tona toma o zemmo poɔŋ, lɛ na toɔ̃ vɛŋɛŋ ka o soba baŋ yɛlɛ nimiri a gaŋ o wulwulibo aneŋ noba naŋ kore o gba. (Ym 119:99, 100, 130; de manne ne Lk 2:46, 47.) Bonso, yɛŋ aneŋ yɛlɛ muni wommu be la Naaŋmen bege aneŋ o sarɛɛ diibu sowuli zaa poɔŋ; azuŋ ka a Iisiriel biiriŋ da mɔɔ ba mɔɔbo zaa a tuuro Naaŋmen bege na, lɛ na vɛŋɛŋ ka a paalonne naŋ ŋmaa ba gyeere na nyɛ ka ba eɛ “yɛŋbaŋniba a e noba naŋ taa nimiyuo bee yɛlɛ muni wommu.” (Du 4:5-8; Ym 111:7, 8, 10; de manne ne 1Nm 2:3.) Neɛ naŋ taa yɛlɛ muni wommu baŋ ka a Baabole poɔ yɛlɛ ba leɛrɛ, azuŋ o maŋ boɔraŋ ka o de a Baabole kawane tona toma o zemmo poɔŋ a maŋ puore sɔre Naaŋmen ka o somoo ka o toɔ̃ e lɛ. (Ym 119:169) O maŋ zannɛɛ Naaŋmen yelbiri na a woŋ a muni soŋ zaa (Mt 13:19-23), o maŋ sɛgaaŋ eŋ o sukyiriŋ (Ye 3:3-6; 7:1-4), azuŋ o maŋ wa kyiiree “zirii sori zaa” (Ym 119:104). Yezu naŋ da be a teŋɛ zu kyɛ na, o da woŋ la a yɛlɛ ŋa muni soŋ, o da ba boɔra ka o zo yi a nyaaba kũũ ŋa o naŋ na kpi a daa zuŋ na, bonso a da fɛrɛɛŋ ka o kpi sɛre kyɛ ka a danyelbo naŋ be a Sɛgre poɔ na toɔ̃ nyɛ eebo.—Mt 26:51-54.
w99 11/1 20 wɛl. 6-7
O Yuoree O Nu Yaga
A Siiba pɔgenaa noɔre da mããɛŋ aneŋ yɛlɛ o naŋ nyɛ a kyɛ woŋ na, azuŋ o da yi la sigrimeŋa poɔŋ a yelka: “Ka ho toŋtoneba ŋa meŋ woŋ noɔŋ, aŋa baŋ be ho nimitɔɔreŋ wagre zaa a wono ho yɛŋ na!” (1 Namine 10:4-8) Aneazaa ka bondaaloŋ da ŋmaa la Soolomoŋ toŋtoneba na gyeere, kyɛ a bondaaloŋ zuŋ naane oŋ da yelka ba taaɛ popeɛloŋ. Kyɛ wagre zaa, Soolomoŋ toŋtoneba naŋ da maŋ nyɛ a poɔsori ka ba kyɛnlɛ wono yɛŋ na Naaŋmen naŋ de ko o na zuŋ ka a pɔgenaa da yelka ba nyɛɛ maaloo. Nyɛ ewuli soŋ a Siiba pɔgenaa naŋ ewuli Jehoova noba zenɛ, bonso te e la noba naŋ maŋ wono Jehoova meŋa aneŋ o Bidɔɔ Yezu Krista yɛŋ na wagre zaa!
A Siiba pɔgenaa da la yelee yelnimizeɛ kaŋa ko Soolomoŋ ka: “Jehoova ho Naaŋmen tarɛɛ pɛgre bee maaloo.” (1 Namine 10:9) A da pɛle ko la a pɔgenaa ka, Soolomoŋ yɛŋ na aneŋ o bondaaloŋ na yi la Jehoova seŋ. A yɛlɛ ŋa neŋ o zu ka Jehoova daaŋ eŋ noɔre ko a Iisiriel deme. Jehoova da yelka ‘yɛ tuuro N bege,’ “bozuŋ lɛŋ na wuli ka yɛ taaɛ yɛŋ aneŋ nimiyuo bee yɛlɛ muni wommu a paalonne naŋ daaŋ na woŋ yeltuurii ŋa zaa niŋeŋ. Ba na yɛlɛŋ: sereŋmeŋa, ‘A paaloŋ kpoŋ ŋa noba eɛ yɛŋbaŋniba aneŋ noba aŋ tare nimiyuo bee yɛlɛ muni wommu.’”—Duturoonomi 4:5-7.
w07 8/1 29 wɛl. 13
Ho Eɛ “Bondaana Naaŋmen Seŋ” Bee?
13 Ka Jehoovaŋ wa ko o noba maaloo, o maŋ ko baŋ maaloo naŋ soma gaŋ maaloo zaa. (Gyimisi 1:17) Aŋa bigree poɔŋ, a teŋgane Jehoova naŋ da de ko a Iisiriel biiri na da e la “teŋgane naŋ puoro beroŋ aneŋ seere.” Aneazaa ka lɛ ka a Iijipiti paaloŋ na meŋ da puoro neŋ beroŋ aneŋ seere, kyɛ a teŋgane Jehoova naŋ de ko a Iisiriel biiri na da e la o yoŋ sori kaŋa poɔŋ. Moosis da yelko la a Iisiriel biiri ka ‘o eɛ teŋgane Jehoova ho Naaŋmen naŋ taa o yɛlɛŋ’. Lɛ da wuleeŋ ka Jehoova naŋ kaara ba zu na, ba na nyɛɛ maaloo yaga. Saŋa na zaa a Iisiriel biiri naŋ maŋ wa dire yelmeŋa korɔ Jehoova, ba maŋ nyɛ la maaloo yaga zaa ka ba zemmo meŋ soma yaga a gaŋ paalonne na zaa naŋ ŋmaa gyeere ba na. Ɛɛ, Jehoova maaloo la “bondaaloŋ”!—Soribu 16:13; Duturoonomi 4:5-8; 11:8-15.
Baabole Poɔ Yelsonne
w04 9/15 25 wɛl. 3
Yɛlnimizeere Naŋ Be A Duturoonomi Gane Poɔ
4:15-20, 23, 24—Ka lɛ Jehoova bege na o naŋ de ko a Iisiriel biiri ka ba ta wa pɛnna bagre zaa na, lɛ wuleeŋ ka a eɛ faa ka te pɛnne bonvelaa kaŋa ko te menne bee? Ai. A bege da wuleeŋ ka a ba seŋ ka ba pɛnne baga a puoraa—bee ‘a gbi dumo tebɛ nimitɔɔreŋ a de puoruu koraa.’ A Sɛgre ba wuli ka a e la faa ka neɛ pɛnne bonkaŋa bee a painti bonkaŋa naŋ veɛlɛ a ko o meŋa.—1 Namine 7:18, 25.
JUNE 14-20
BAABOLE POƆ YELNIMIZEERE | DUTUROONOMI 5-6
“Yɛ Wulo Yɛ Biiri Ka Ba Nɔnɔ Jehoova”
w05 6/15 20 wɛl. 11
Bidɔgreba, Yɛ Kaara Yɛ Yideme Yelfɛree Zieŋ
11 Ka te naŋ wa woŋ a yɛlɛ ŋa, Sɛgre naŋ maŋ wa te teɛroŋ poɔ la Duturoonomi 6:5-7. Sɔrebo la, yuo ho Baabole a kanne a sɛgre ŋa. Ka hoŋ kaa a sɛgre soŋ, o yelka a seŋ ka bidɔgreba vɛŋ ka Jehoova puoruu yɛlɛ e nimizeɛ ko ba, ka ba taa nɔmmo naŋ e kpeɛŋaa ko Jehoova, a kyɛ vɛŋ ka o yelbie be ba sukyieŋ. Ɛɛ, aseŋ ka ho zanna a Baabole nimizeɛŋ, a kannoo bebiri zaa a maŋ teɛre o yɛlɛ gaa tɔɔre, ka lɛ vɛŋ ka ho taa yɛlɛ muni wommu aneŋ nɔmmo ko Jehoova soe, ane o sowuli, aneŋ o bege zaa. Ka hoŋ e lɛ, ho sukyiri na paaleŋ aneŋ Baabole yelmenne naŋ e seɛlɛ, ka lɛ vɛŋ ka ho taa popeɛloŋ, aneŋ gyeremɛ, aneŋ nɔmmo ko Jehoova. Lɛ na vɛŋɛŋ ka yɛ zanne yelsonne yaga a de wuli yɛ biiri.—Luka 6:45.
w07 5/15 15-16
Wala Maŋ Na Toɔ̃ E A De Wuluu Naŋ Soma Ko N Biiri?
Ho yelyaga aneŋ ho yel–eree maŋ wulee yɛlɛ hoŋ de biŋ ho nimitɔɔreŋ, yɛlɛ hoŋ maŋ teɛrɛ, aneŋ yɛlɛ naŋ e tegroŋ ko bo, aneŋ yɛlɛ naŋ pɛlɛ ho poɔ. (Urom 2:21, 22) A yi ba biiloŋ saŋa, bibiiri maŋ kaarɛɛ lɛ ba dɔgreba naŋ maŋ erɛ na soŋ zaa, a tɔglɔ ba. Ka bibiiriŋ wa peɛre baŋ yɛlɛ naŋ e nimizeɛ ko ba dɔgreba, ba maŋ vɛŋɛŋ ka ana yɛlɛ ŋa e nimizeɛ ko ba meŋ ba zemmo poɔŋ. Ka ho naŋ sereŋ nɔnɔ Jehoova, ho biiri na nyɛŋ a baŋ. Aŋa bigree poɔŋ, ba na nyɛŋ ka Baabole kannoo aneŋ Baabole zannoo eɛ nimizeɛ ko bo. Ba na wa nyɛŋ ka ho de la Naaŋmen Naaloŋ yɛlɛ de weɛ ho zemmo poɔŋ. (Matio 6:33) Ka ho naŋ moɔ nimiri gɛrɛ a lammore a kyɛ de ho meŋa eŋ a Naaŋ moɔloo toma poɔŋ, ba na wa nyɛŋ ka Jehoova puoruu toma yɛlɛŋ fɛrɛbo gaŋ yelzaa.—Matio 28:19, 20; Hiburu 10:24, 25.
w05 6/15 21 wɛl. 14
Bidɔgreba, Yɛ Kaara Yɛ Yideme Yelfɛree Zieŋ
14 Aŋa lɛ Duturoonomi 6:7 naŋ wuli na, yɛna bidɔgreba taaɛ soe yaga yɛŋ na toɔ̃ tu kyɛ wuli yɛ biiri Jehoova yɛlɛ. Ka yɛ naŋ tu sori gɛrɛ zie kaŋa, bee a laŋ tona a yɛ yiri toma, kyɛ bee yɛ zeŋ pɛnnaŋ, a zaa eɛ soyuo yɛ naŋ taa ka yɛ soŋ yɛ biiri ka ba nyɔge Jehoova zɔmennoŋ. Kyɛ lɛ ba wuli ka ho “maŋ yele” Baabole poɔ yɛlɛ yoŋ korɔ ho biiri wagre la wagre zaa. Kyɛ a yi ho booree dama diibu poɔŋ, maŋ mɔɔ kyɛ vɛŋ ka ho yelyaga enna ba faŋa a kyɛ tagra ba peɛlɛ Jehoova. Aŋa bigree poɔŋ, a Awake! gane maŋ taaɛ yelzuri naŋ e tɛɛtɛɛ yaga zaa. A yelzuri ŋa na toɔ̃ yuo la sori ko bo ka ho ne ba di dama a kyaare dunni Jehoova naŋ maale, ziiri yaga naŋ be a donɛɛ a veɛlɛ yaga, aneŋ nensaaleba zemmo yɛlɛ naŋ e tɛɛtɛɛ. A dama diibu ŋa taa na toɔ̃ tɔɛ a baapaalba ŋa sukyie ka ba kanna gama na a gbaŋgba-bivelaa aneŋ yɛŋbaŋna naŋ maŋ sɛge ko te na.—Matio 24:45-47.
Baabole Poɔ Yelsonne
w19.02 22 wɛl. 11
Nɔmmo Aneŋ Dantorii Naŋ Da Be Takoreŋ Iisiriel
11 Yɛlɛ teŋ na toɔ̃ zanne yi be: Te waaloŋ ane te eebo yoŋ naane ka Jehoova maŋ nyɛrɛ. Kyɛ o maŋ kaa teŋ a baŋ yɛlɛ naŋ be te sukyiri poɔ meŋɛŋ. (1 Saa. 16:7) Te koŋ baŋ de te teɛrɛ, te yelboɔree, bee te yel–eree zaa sɔgloo. O maŋ kaarɛɛ yelsonne te naŋ erɛ na a ennɛ te faŋa beŋ. Jehoova maŋ boɔraŋ ka te peɛre te menne a iri teɛroŋ faa zaa naŋ be te teɛroŋ bare ka a ta wa vɛŋ ka te e yelfaa kaŋa.—2 Tun. 16:9; Mat. 5:27-30.
JUNE 21-27
BAABOLE POƆ YELNIMIZEERE | DUTUROONOMI 7-8
“Ho Ne Ba Ta Wa Kulo Taa”
w12 7/1 29 wɛl. 2
Bonso Ka Naaŋmen Da Tere Bege Ka A Iisiriel Biiri Maŋ Kuli Noba Ba Ne Ba Naŋ Laŋ Puoro Jehoova?
Jehoova da teɛrɛɛ yɛlɛ gaa tɔɔre a nyɛ ka, Setaana da boɔraŋ ka o bɛnle O puorebiiri ka ba te puoro zirii ŋmema a tu be sãã ba yɛlɛ zaa. Naaŋmen da kpãã baŋ ka a zirii ŋmenpuoreba ŋa “na leɛrɛɛ ho bidɔba a yi N tuubu ka ba tona korɔ ŋmen zaane.” A yɛlɛ ŋa da eɛ nimizeɛ. Ka a Iisiriel biiriŋ da bare Jehoova puoruu a kyɛ puoro ŋmen zaane, ba da koŋ la taa Naaŋmen maaloo aneŋ o guubu. Lɛ na vɛmeŋ ka a e mɔlɔ ka ba dɔndɔnne zɔɔ toɔ̃ ba. Ka lɛŋ da e, a Mɛzaaya da naaŋ toɔ̃ tu la a Iisiriel booree na poɔ wa bee? Nɔkpeɛne zaa kyebe ka, lɛ zuŋ ka Setaana da boɔra ka o bɛnle a Iisiriel biiri ka ba ne noba naŋ ba puoro Jehoova laŋ kultaa yɛlɛ.
w15 3/15 30-31
Yɛ Kulo Taa “A Daana Eŋɛŋ”—Lɛ Na Toɔ̃ Eŋ Zenɛ Ŋa Meŋ Bee?
Jehoova terɛɛ sowuli a Baabole poɔŋ ka te kulo taa a Daana eŋɛŋ yoŋ. Ananso la wala? Bonso Jehoova baŋɛɛ yɛlɛ naŋ soma ko o noba. A ba e ŋa Jehoova boɔraŋ ka o gu o puoribiiri yi toɔra naŋ maŋ wa noba naŋ zagre o bege tuubu na eŋɛŋ yoŋ zuŋ la, kyɛ o boɔraŋ ka ba taa popeɛloŋ meŋa. Niihemaiya wagre na, a Iisiriel biiri yaga zaa naŋ da te kuli saamma naŋ ba puoro Jehoova na, Niihemaiya da leɛteɛre baŋ Soolomoŋ ewuli faa na. Aneazaa ka Soolomoŋ da eɛ neɛ o “Naaŋmen naŋ nɔŋoo, . . . kyɛ a pɔge saamma da vɛŋɛɛŋ oŋ toŋ faa, haali ona gba.” (Niih. 13:23-26) Naaŋmen naŋ boɔra ka te yɛlɛ maale soŋ na, azuŋ oŋ ko te a bege ka te kulo noba naŋ e yelmeŋa puorebiiri yoŋ na. (Yiem. 19:7-10; Aiz. 48:17, 18) Yelmeŋa Kristabiiri maŋ taaɛ nimipa a ko Naaŋmen nɔmmo a kyɛ dɛloo ka o korɔ ba sowuli. Ka ba naŋ sigri ba menne a ko Naaŋmen aŋa ba Naa, lɛ wuleeŋ ka ba sagɛɛ o Naaŋ Diibu Kpeɛ̃o na.—Yeng. 1:5.
w15 8/15 26 wɛl. 12
Kaa Iri Ho Zɔmenne Soŋ A Bebi Baaree Ŋa Poɔŋ
12 Kristabiiri naŋ boɔra ka ba kpɛ kultaa poɔ seŋ ka ba kaara soŋ a yi ba tutaaba eŋɛŋ. A Baabole ko teŋ kawane ka: “Yɛ ta laŋna ne noba naŋ ba sage de a Krista yɛlɛ. Boŋ lantaa la ka mennoŋ ane faaloŋ taa? Bee boŋ lantaa la be kyaane ane ligruŋ sogɔŋ?” (2 Kor. 6:14) A Baabole la ko la Naaŋmen puorebiiri naŋ boɔra kultaa kawane ka ba kulo taa “a Daana eŋɛŋ yoŋ,” lɛ wuleeŋ ka aseŋ ka o kuli neɛ naŋ de o nyɔvore ko Jehoova, a de suobo a kyɛ de a Baabole wuluu tona toma o zemmo poɔŋ. (1 Kor. 7:39) Ka ba naŋ kuli ba Kristabitaa naŋ de ba nyɔvore ko Jehoova, ba na soŋ baŋ ka ba naŋ kyene a yelmeŋa soriŋ.
Baabole Poɔ Yelsonne
w04 2/1 13 wɛl. 4
Jehoova Maŋ Ko Teŋ Bonzaa Naŋ Fɛrɛ Te Bebiri Zaa
4 Ka te naŋ wa puoro sɔrɔ ka Naaŋmen ko te bondirii bebiri zaa, aseŋ ka te maŋ teɛre ka lɛ aŋ fɛrɛ ka te zanna o yelbiri meŋ bebiri zaa. Aneazaa ka Yezu da lee noɔre ka kɔŋ kpɛ o yaga, kyɛ saŋa na Setaana naŋ da yelka o vɛŋ ka kubo leɛ paanuu na, o da zagrɛŋ, a kyɛ yelko Setaana ka: “Ba sɛgɛɛ la: ‘Bondirii yoŋ naane korɔ nensaala nyɔvore, kyɛ yelbiri zaa naŋ yi Jehoova noɔre meŋ terɛ la nyɔvore.’” (Matio 4:4) Zie ŋaŋ Yezu da de la daŋyele Moosis yelbie na toŋ toma, saŋa na Moosis naŋ yelko a Iisiriel biiri ka: “[Jehoova] daaŋ sigre boŋ, a vɛŋ ka kɔŋ kpɛ bo. Oŋ daaŋ ko bo maana hoŋ ɔɔ. Ho daaŋ ba baŋaa. Ho bamine meŋ daaŋ ba baŋaa. O daaŋ boɔraŋ ka o vɛŋ ka ho baŋ ka nensaalaa koŋ tare nyɔvore a tuuro siimaa bee bondirii yoŋ eŋaŋ, kyɛ o na taaɛ nyɔvore a tuuro yɛlɛ zaa naŋ yire Naaŋmen noɔre eŋaŋ.” (Duturoonomi 8:3) Jehoova da ko la a Iisiriel biiri maana baŋ di, a tu ana sori na a vɛŋ baŋ zanne yɛlɛ yaga zaa a kyaaroo. Yelkaŋa la ŋa, a da seŋ ka ba “lagraa ka a siŋ sinbu kaŋa beo zaa.” Ka ba naŋ lagraa a gaŋ bebiyeŋ diibo, a kyɛlɛɛ na da maŋ wɛgɛɛ dandulo a nyuuro. (Yiibu 16:4, 20) Kyɛ a bebie ayoɔbo daare yɛŋ, ka ba naŋ wa lagre a bebi ayopoi tuore poɔ ka ba toɔ̃ dia te ta a Pɛnnoo Bebiri baaroo saŋa, a ba maŋ sãã bee a wɛge dandulo a nyuuro. (Yiibu 16:5, 23, 24) Azuŋ a maana da vɛŋɛɛŋ baŋ baŋ peɛlaaŋ ka aseŋ ka ba wono Naaŋmen yɛlɛ, a kyɛ lɛ vɛŋ baŋ baŋ ka ba nyɔvore ba are bondirii yoŋ eŋɛŋ, kyɛ a arɛɛ “yelbiri zaa naŋ yire Jehoova noɔreŋ.”
JUNE 28–JULY 4
BAABOLE POƆ YELNIMIZEERE | DUTUROONOMI 9-10
“Bo Ka Jehoova Ho Naaŋmen La Boɔrɔ Ho Seŋ?”
w09 10/1 10 wɛl. 3-4
Bo Ka Jehoova Boɔra Yi Te Seŋ?
Boŋ na toɔ̃ soŋ te ka te yi te sukyiri zaa poɔŋ a wono Naaŋmen yɛlɛ? Moosis da wuli teŋ yelkaŋa, saŋa na o naŋ yelka: “Yɛ zoro Jehoova yɛ Naaŋmen.” (Du 10:12) Teŋ na zoro Naaŋmen ba wuli ka te zoro dabeɛ̃ ka, ka te naŋ toŋ faa, yelfaa na page teŋ, kyɛ a wuleeŋ ka te taa gyeremɛ naŋ e kpoŋ a ko Naaŋmen aneŋ o sowuli zaa. Ka te naŋ taa gyeremɛ naŋ e kpoŋ ko Naaŋmen, te koŋ boɔra ka te erɛ yɛlɛ naŋ na sãã o poɔ.
Kyɛ bo yelnimizeɛ kaŋaŋ na toɔ̃ soŋ te ka te kyɛnlɛ Naaŋmen yɛlɛ? Moosis da yɛlɛɛŋ ka: ‘Nɔŋ [Jehoova] a de ho . . . sukyiri zaa aneŋ ho nyɔvore zaa tona Jehoova ho Naaŋmen.’ (Du 10:12) Te yel–ereeŋ maŋ wuli ka te nɔŋ la Naaŋmen. Yelpeɛreba mine da wulee a muni ka: “A Hiburu yelbie naŋ are ko yɛlɛ neɛ naŋ teɛrɛ na toɔ̃ lɛ are ko la yɛlɛ naŋ maŋ yi o soba eebo poɔŋ wa.” A yelpeɛreba ŋa lɛ de poɔyɛŋ ka, ka te naŋ nɔŋ Naaŋmen, lɛ wuleeŋ ka aseŋ ka “te de te eebo wuli ka te nɔnooŋ.” Lɛ wuleeŋ ka ka te naŋ sereŋ nɔŋ Naaŋmen, te yel–eree zaa poɔŋ te na maŋ erɛɛ yɛlɛ naŋ na pɛlɛ o poɔ.—Yeng Yelibie 27:11.
w09 10/1 10 wɛl. 6
Bo Ka Jehoova Boɔra Yi Te Seŋ?
Ka te naŋ yi te sukyiri zaa poɔŋ a kyɛnlɛ Jehoova yɛlɛ, te na nyɛɛ maaloo yaga. Moosis da sɛgɛɛŋ ka: “Tuuro o noɔre . . . maŋ korɔ bo zenɛ ŋa, tuuraa ho soŋ zuŋ.” (Du 10:13) Ɛɛ, Jehoova noɔre zaa—yelzaa o naŋ yele ka te e—te meŋa soŋ zuŋ la. Naaŋmen na sage wuli teŋ yelfaa kaŋa bee? A Baabole yelka “Naaŋmen waa la nɔmmo.” (1 Gyɔɔn 4:8) Azuŋ, o naŋ boɔraŋ ka te taa zeŋ laafeɛ a gɛrɛ wagre naŋ ba taa baaraa zuŋ la oŋ ko te a nɔɛ ŋa zaa. (Aizeeya 48:17) Ka te naŋ erɛ yɛlɛ na zaa Jehoova naŋ ko te noɔre ka te erɛ na, te na deɛ la te menne a yi toɔra yaga poɔŋ, a lɛ nyɛ maaloo naŋ ba taa baaraa o Naaloŋ na poɔŋ.
cl 16 wɛl. 2
Ka Lɛ Ho Na “Toɔ̃ Tage Peɛlɛɛ Naaŋmen” Bee?
2 Aboraham naŋ da bebe takoreŋ saŋa na da tage peɛlɛɛ Naaŋmen yaga. Jehoova da boɔlɛɛ Aboraham ka “N zɔmeŋa.” (Aizeeya 41:8) Ɛɛ Jehoova da deɛ Aboraham oŋ e o zɔmeŋa naŋ peɛle o. Aboraham da wa e la Naaŋmen zɔmeŋa bonso o “da sage de la Jehoova yɛlɛ.” (Gyimisi 2:23) Zenɛ ŋa meŋ, Jehoova maŋ kaaraŋ a boɔra ka o “tage peɛle” noba naŋ yi nɔmmo poɔŋ a puoruu na. (Duturoonomi 10:15) A Baabole eŋ teŋ faŋa ka: “Yɛ tage peɛle Naaŋmen, o na tage peɛle yɛ la.” (Gyimisi 4:8) A sɛgre ŋa tona boɔlɔ teŋ a kyɛ ennɛ te noɔre meŋ.
Baabole Poɔ Yelsonne
it-1 103
Eenak
A Eenak deme da eɛ bale kaŋa noba naŋ da e bɛrɛ bɛrɛ a kyɛ lɛ wogre meŋ a da kpeɛra a Keenan teŋgane tanne ziiri na aneŋ a mane noɔre a gɛrɛ Samuŋ Duri seŋ na. Saŋa kaŋaŋ dɔbɔ bata mine naŋ taa yuori a yi Eenak bale na poɔŋ ka ba yoe e, Ahaimaŋ, Siisai, ane Taalimai da wa kpeɛrɛɛ Hii–biroŋ poɔ. (So 13:22) Zie ŋaŋ ka a Iisiriel biiri pie neŋ bayi naŋ da gaa ka ba pigiri a teŋgane na da gaa te nyɛ a Eenak deme. Beŋ la ka ba poɔ pie da leɛ de duoro naŋ ennɛ dabeɛ̃ wa ko a noba. Ba da yeleeŋ ka a daba ŋa da eɛ Noowa saŋa Neefiilimhi na biiri, a kyɛ la yelka, a Iisiriel biiri na waa ŋa “sobo” ba nimitɔɔreŋ. (So 13:28-33; Du 1:28) Lɛ na ba naŋ da e bɛroŋ a e kpoŋ seŋ na da vɛŋɛɛŋ ka noba gba da maŋ de ba manna a Ii–mim aneŋ Reefeyim dɔɔ bɛra na. Noba da maŋ de la a Eenak deme faŋa na a lɔɔ sekpɔgɔ ka: “Nembuoŋ na baŋ are Eenak biiri nimitɔɔreŋ?”—Du 2:10, 11, 20, 21; 9:1-3.