Te Zemmo Ane Te Naaŋ Moɔloo Toma Lammo Yelsɛgree Yelpeɛre Gane

JULY 5-11

BAABOLE POƆ YELNIMIZEERE | DUTUROONOMI 11-12

“Lɛ Jehoova Naŋ Boɔrɔ Ka Te Puoro O”

it-2 1007 wɛl. 4

Nyɔvore

Puoro Jehoova Ane Ho Nyɔvore Zaa. Aŋa lɛ te naŋ wa nyɛ na, a “nyɔvore” la a nensaalaa meŋa. Kyɛ a Baabole maŋ eŋ teŋ faŋa ka, te nɔŋ Naaŋmen a puoro o ‘ne te sukyiri zaa ane te nyɔvore zaa.’ (Du 4:29; 11:13, 18) Duturoonomi 6:5 yelka: “Maŋ nɔnɔ Jehoova ho Naaŋmen ane ho sukyiri zaa, ane ho nyɔvore zaa, ane ho faŋa meŋ zaa.” Yezu meŋ da yeleeŋ ka nɔŋ Jehoova ane ho nyɔvore zaa ane ho faŋa zaa, a kyɛ la yel poɔ ka, nɔŋ o “ane fo yɛŋ zaa.” (Mk 12:30; Lk 10:27) Faŋa ane yɛŋ paalɛɛ neɛ nyɔvore eŋɛŋ, kyɛ bonso ka a Baabole maŋ boɔle a zaa ata lantaa? Te de yelmannaa ŋa wuli a yɛlɛ muni soŋ: Ka neɛŋ boɔrɔ, o na toɔ̃ koɔrɛɛ o meŋa bee (o nyɔvore) a leɛ gbaŋgbaa ko neɛ kaŋa. Ka o naŋ wa e lɛ o maŋ leɛ la neɛ na o naŋ koɔre o meŋa ko na suobu. Kaapage o koŋ de o sukyiri zaa a tonɔ korɔ o nenkpoŋ na. Lɛ na vɛŋeŋ o koŋ boɔrɔ ka o tonɔ neŋ o faŋa zaa ka o daana na poɔ pɛle. Ka lɛŋ wa bebe o koŋ de o faŋa ane o yɛŋ zaa tonɔ o daana na toma ka a nyɛ nimitɔɔre gaabo. (De manne Ef 6:5; Kl 3:22.) Azuŋ ka a sɛgre maŋ boɔle a yɛlɛ ata ŋa zaa lantaa, a leɛ teɛre te ka aseŋ ka te de a yɛlɛ ata ŋa zaa puoro Naaŋmen, bonso te eɛ Naaŋmen suobu, o de la o bidɔɔ yɔɔdeɛbo sareka na da neŋ te. Ka neɛŋ de o “nyɔvore zaa” a puoro neŋ Naaŋmen lɛ wuleeŋ ka o deɛ o meŋa zaa, o eŋgane zaa, yelzaa o naŋ de biŋ o nimitɔɔreŋ, o yel-eraa zaa, ane o boɔbo zaa puoro o.​—De manne Mt 5:28-30; Lk 21:34-36; Ef 6:6-9; Fi 3:19; Kl 3:23, 24.

it-1 84 wɛl. 3

Sareka Irizie

Jehoova da ko la a Iisiriel biiri sowuli ka ba sãã a Keenan deme sareka iriziiri na, a sãã a bagmaale dalugo na ane a bagmaale daare na ba naŋ da maŋ maale poɔ a eŋɛŋ na. (Yi 34:13; Du 7:5, 6; 12:1-3) A da ba seŋ ka ba tɔglɔ a Keenan deme bee a de ba biiri ire sareka korɔ baga. (Du 12:30, 31; 16:21) A da ba seŋ ka a Iisiriel biiri taa sareka iriziiri yaga zaa, kyɛ a da seŋ ka ba taa sareka irizie bonyeni baŋ na maŋ ire sareka o zuŋ korɔ Naaŋmen. Ba na mɛ la a sareka irizie ŋa meŋ zie na Jehoova naŋ iri ko ba ka ba mɛ o na. (Du 12:2-6, 13, 14, 27; de manne neŋ Baabilɔŋ, beŋ baŋ da mɛ sareka iriziiri 180 ko Ishtar bagre na yoŋ.) Jehoova da yelko baŋ ka, ka ba naŋ wa ŋmaa a Gyɔɔdan Koɔnbɔɔ baare, ba de kubo ba naŋ ba pɛnne maale sareka irizie. (Du 27:4-8) Joosua da mɛ la a sareka irizie a Iibal Taŋa na zuŋ. (Js 8:30-32) Saŋa na ba naŋ da po a noɔre emmo teŋgane baare na, a Uruben ane Gaad bale na ane a Manaasɛ bale na kyɛlee da wa mɛ la sareka irizie kaŋa naŋ e kpoŋ a peɛle a Gyɔɔdan. A yɛlɛ ŋa da vɛŋɛɛŋ ka nɔkpeɛne fẽẽ kaŋa da wa a Iisiriel biiri kpakyagaŋ, a gaa ta saŋa na a Iisiriel biiri naŋ wa nyɛ ka a sareka irizie ŋa ba e bagmaale sareka irizie kyɛ o eɛ sareka irizie ba naŋ maale ka o leɛ teɛre ba yelmennoŋ na ba naŋ di ko Jehoova a yelmeŋa Naaŋmen.​—Js 22:10-34.

Baabole Poɔ Yelsonne

it-1 925-926

Geerizim Taŋkpoŋ

Saŋa na Joosua naŋ da zɔɔ toɔ̃ E-ai baare na, o da tu la Moosis sowuli na a lagre a Iisiriel biiri lantaa Geerizim ane Iibal taŋbɛrɛ na muniŋ. Ba da kannɛɛ a Moosis bege ko a noba baŋ woŋ maaloo na baŋ na nyɛ ka ba naŋ kyɛllɛ Jehoova yɛlɛ ane saammo naŋ na pɔge ba ka ba naŋ zagre o noɔre. Simeon, Liivai, Gyuda, Isaaka, Gyoosef, ane Bɛŋgyamen bale na zaa da arɛɛ a Geerizim Taŋkpoŋ na nimitɔɔreŋ. Ka Liivai deme naŋ da taa a nɔbinaa daga na da are a baa poɔŋ, ka a Iisiriel bale ayoɔbo naŋ kyɛre na meŋ da are Iibal Taŋkpoŋ na meŋ nimitɔɔreŋ. (Du 11:29, 30; 27:11-13; Js 8:28-35) Neɛ naŋ da kanna a maaloo yɛlɛ na da are toree a Iisiriel biiri naŋ da are a Geerizim Taŋkpoŋ na muniŋ, ka neɛ naŋ da kanna a dɔgroŋ yɛlɛ na meŋ da are tore a Iisiriel biiri naŋ da are Iibal Taŋkpoŋ na muniŋ, ka ba naŋ wa kanne ba zaaŋ da maŋ sagedeɛ. Noba mine yeleeŋ ka a Geerizim Taŋkpoŋ naŋ da e kpoŋ yaga zaa a veɛlɛ ka bonbulo bebe yaga zaa na zuŋ baŋ da tore be kyɛ kanna a maaloo yɛlɛ, kyɛ a Iibal Taŋkpoŋ naŋ da e pi-kuurii yoŋ ka bonbulo ba kye be na zuŋ baŋ da tore be a kyɛ kanna a dɔgroŋ yɛlɛ korɔ a noba, kyɛ a Baabole ba yel yɛlɛ yaga kyaare a yɛlɛ ŋa. Ba da kannɛɛ a Bege a “Iisiriel lammo na zaa nimitɔɔreŋ, a pɔgeba, a bibiiri ane a saamma naŋ kpeɛrɛ ba poɔŋ na nimitɔɔreŋ oŋ daaŋ kannaa.” (Js 8:35) A nembeɛoŋ naŋ da are a taŋbɛrɛ ayi muniŋ da wono la yɛlɛ na zaa ba naŋ da kanna korɔ ba na. Kaapage lɛ a zie naŋ da waa naŋ da vɛŋ ka a kannoo baŋ toɔ̃ gɛrɛ tɔɔre baŋ wonaa.​—Nyɛ IIBAL TAŊKPOŊ.

JULY 12-18

BAABOLE POƆ YELNIMIZEERE | DUTUROONOMI 13-15

“Lɛ Jehoova Bege Naŋ Da Wuli Ka O Teɛrɛɛ Nandaaneba Yɛlɛ”

it-2 1110 wɛl. 3

Ziiri Pie Ziyeni

A waa ŋa ba naŋ da maŋ iri ziiri pie ziyeni naŋ e o yoŋ ba weɛ boma poɔŋ yuoni la yuoni zaa, a yiiloŋ ziiri pie ziyeni ŋa ba naŋ da maŋ iri yuoni la yuoni zaa na, ba da ba maŋ de lɛ boma ŋa sonnɔ neŋ a ŋmenpuore wedeɛreba na, kyɛ a Liivai deme da maŋ toɔ̃ nyɛɛ tɔnɔ fẽẽ yi a poɔŋ. Ka a Iisiriel biiriŋ wa gaa ka ba di ba yuoni zaa tige na, ana ka booree zaa da maŋ kyeɛre lantaa di neŋ a tige. Ka zie ba naŋ yi kyɛ gɛrɛ Gyɛruzɛlɛm naŋ e tɔɔre yaga zaa, ka lɛ vɛŋ baŋ koŋ toɔ̃ de ba ziiri pie ziyeni na gaa be, ba da maŋ de aŋ leɛre neŋ libie bee a koɔraa. A de a libie gaaneŋ Gyɛruzɛlɛm a te kaara ba menne saŋa na ba naŋ dire a tigri beŋ na. (Du 12:4-7, 11, 17, 18; 14:22-27) Yuomo anaare bee yuoni bonyeni sɛre ka a yuomo ayɔpoi pɛnnoo yuoni na ta, ba da ba maŋ de a ziiri pie ziyeni ŋa gaa di neŋ a paaloŋ tigri na. Kyɛ ba da maŋ wɛlaaŋ biŋ ko a Liivai deme, saamma, ko-pɔgeba ane bikpiire naŋ da be ba gbaŋdige naŋ.​—Du 14:28, 29; 26:12.

it-2 833

A Pɛnnoo Yuoni

Ba da boɔlɛɛ a Pɛnnoo yuoni ŋa ka “a barebo yuoni [hash·shemit·tahʹ].” (Du 15:9; 31:10) Lɛ yuoni na ba da ba maŋ kɔ bonzaa a teŋganeŋ, ba da maŋ barooŋ oŋ gaŋ lɛ. (Yi 23:11) Lɛ yuoni na a Iisiriel biiri maŋ barɛɛ sane zaa o tɔ naŋ di a ko o. A eɛ “Jehoova sane vɛŋkuubu.” Ba da maŋ eɛ lɛ a de emmo korɔ o. Noba mine naŋ maŋ peɛrɛ Baabole yɛlɛ taaɛ teɛroŋ yuo kyaare a yɛlɛ ŋa, ba yelka a ba e ŋa ba da maŋ vɛŋɛɛ a sane ko o soba. Kyɛ a da ba seŋ ka a Iisiriel biiri fere o tɔsoba ka o yɔɔ sane o naŋ di lɛ yuoni na. Bonso neɛ zaa da ba maŋ kɔ boma lɛ yuoni na; kyɛ ba na baŋ ferɛɛ saamma yɛŋ ka ba yɔɔ ba sane ko ba. (Du 15:1-3) A Hiburu wulwulibo mine da wuleeŋ ka ka neɛŋ te pɛŋ libie ka o wa soŋ o yɔɔ naŋ e nandaana, lɛ yɛŋ ho na toɔ̃ vɛŋ ko la o soba. Kyɛ ka yaako yɛlɛ poɔŋ la oŋ di a sane aseŋ ka o yɔɔ. Ba da yel paalɛɛŋ ka, a yi a dɛndɛŋ yuoŋ kɔɔ na saŋa, Hillel da waanɛɛ yelsɛgraa kaŋa ka ho na toɔ̃ de la neɛ naŋ di ho sane gaaneŋ sɛrɛɛ diibu zie ka yɛ te yelbiŋ ka, ka a Pɛnnoo yuoniŋ wa baare o na yɔɔ la a sane.​—The Pentateuch and Haftorahs, edited by J. Hertz, London, 1972, pp. 811, 812.

it-2 978 wɛl. 6

Gbaŋgbaa

Lɛ a Bege naŋ da wuli niiloŋ naŋ seŋ ka o be gbaŋgbaa neŋ o daana kpakyagaŋ. Tɛɛtɛɛ be la lɛ na Iisiriel bie naŋ na taa o tɔ Iisiriel bie naŋ leɛ o gbaŋgbaa ane saana naŋ wa leɛ o gbaŋgbaa. Ka neɛ naŋ ba e Iisiriel bieŋ wa leɛ gbaŋgbaa, o maŋ leɛ la o daana na suobu. Ka a daana wa kpi, o gbaŋgbaa na maŋ leɛ la o bidɔɔ meŋ suobu. (Lv 25:44-46) Kyɛ ka a Iisiriel bie kaŋa wa leɛ gbaŋgbaa a de yuomo ayɔpoi toŋ toma bee ka a soŋ-meŋa yuoni naŋ wa ta, ba da maŋ barooŋ oŋ gaa. A yi saŋa na zaa a Iisiriel bie naŋ be o gbaŋgbaaloŋ poɔ na, o da maŋ tonɔŋ kyɛ baŋ yɔɔroo. (Yi 21:2; Lv 25:10; Du 15:12) Ka a Iisiriel bie kaŋaŋ wa koɔre o meŋa eŋ gbaŋgbaaloŋ poɔŋ a ko saana kaŋa kyɛbee neɛ kaŋa naŋ wa kpeɛrɛ a Iisiriel paaloŋ, sori da bebeŋ ka ba leɛ da o wagre zaa ba naŋ boɔrɔ. A gbaŋgbaa na toɔ̃ leɛ da la o meŋɛ bee neɛ naŋ taa sori ka o leɛ da o na toɔ̃ eɛ lɛ. Ba da maŋ kaa la yuomo naŋ kyɛre sɛre ka a soŋ-meŋa yuoni na ta, bee yuomo naŋ kyɛre ka o toŋ ka a ta yuomo ayɔpoi kyɛ wuli o sane oŋ yɔɔ. (Lv 25:47-52; Du 15:12) Ka ba naŋ wa ko a Iisiriel bie kaŋa naŋ e gbaŋgbaa soŋ-meŋa, o daana na da maŋ ko oŋ bonkaŋa fẽẽ ka o meŋ de piili yaako o meŋɛŋ. (Du 15:13-15) Ka a sobaŋ de pɔge sɛre kyɛ wa leɛ gbaŋgbaa, o neŋ a pɔge zaaŋ da maŋ so ba menne. Kyɛ, ka o daana la de a pɔge ko o (ka a pɔge e pɔg-saana o koŋ nyɛ soŋ-meŋa a yi a yuomo ayɔpoi na toma baaroo saŋa), azuŋ a pɔge neŋ a biiri zaa maŋ wa leɛ la o daana na suobu. Ka Iisiriel bie naŋ e gbaŋgbaaŋ wa iri ka o na tonɔ korɔ la o daana, lɛ yɛŋ aseŋ ka o daana na de vuraa puo o toorii, lɛ eebo na wuliŋ ka o na tonɔ korɔ la o daana na a gɛrɛ o kũũ saŋa.​—Yi 21:2-6; Du 15:16, 17.

Baabole Poɔ Yelsonne

w06 4/1 31

Yɛlɛ Noba Naŋ Kanna Te Gama Naŋ Maŋ Soorɔ

Bo yɛlɛ teŋ na baŋ zanne yi a bege naŋ be Yiibu 23:19 naŋ yelka: “Ta wa dogrɔ bobile o ma beroŋ poɔŋ”?

A sowuli ŋa naŋ be a Moosis Bege poɔŋ na be la a Baabole poɔŋ gbɛre bota. A vɛŋɛɛŋ teŋ baŋ ka Jehoova boɔrɔŋ ka te taa gyog-soŋ, nimimaaroŋ ane nyonono. A kyɛ lɛ wuli te ka te kyiire zirii puoruu zaa.​—Yiibu 34:26; Duturoonomi 14:21.

Ka neɛŋ doge bobile bee duŋ-bile zaa o ma beroŋ poɔŋ, lɛ wuleeŋ ka o ba de Jehoova yelsɛgraa na oŋ biŋ kyaare o bonmaalee na toŋ toma. Naaŋmen maalɛɛ beroŋ eŋ dunni eŋɛŋ ka lɛ na vɛŋ ka a bilii toɔ̃ muge a beroŋ baa. Yelpeɛrɛ kaŋa yeli la yelkaŋa a kyaare neɛ naŋ dogrɔ duŋ-bile o ma beroŋ eŋɛŋ. O yelka, “a yɛlɛ ŋa eebo wuleeŋ ka o soba saaŋɛɛ niiloŋ na Jehoova naŋ maale ka o be bie ane o ma kpakyagaŋ na.”

Noba mine meŋ da yelka, noba naŋ puoro baga da maŋ dogɛɛ duŋ-bile o ma beroŋ eŋɛŋ ka lɛ na vɛŋ ka saa wa. Ka lɛ ka a yɛlɛ da waa yɛŋ, a bege naŋ yelka a Iisiriel biiri ta wa dogrɔ duŋ-bile o ma beroŋ poɔŋ na da gu la a Iisiriel biiri a yi a paalonne naŋ da ŋmaa ba gyeere na bagmaale puoruu naŋ da e daŋbol yɛlɛ ane zukuoŋ yɛlɛ na eŋɛŋ. A Moosis Bege na da kpãã la a Iisiriel biiri ka ba ta wa tɔglɔ a paalonne naŋ ŋmaa ba gyeere na yel-eere.​—Liivai 20:23.

A baaraa zaa, a bege ŋa wuli teŋ ka Jehoova taaɛ nimimaaroŋ yaga. A Moosis Bege taa la a sowuli ŋa taa naŋ da wuli a Iisiriel biiri ka a ba seŋ ka ba erɛ dunni nimikuonii. A kyɛ lɛ wuli ba ka a ba seŋ ka ba yel-eere saaŋ yɛlɛ na Jehoova naŋ sɛgre biŋ o bonmaalee poɔŋ na. Aŋa mannoo poɔŋ, a Bege da wuleeŋ ka a ba seŋ ka Iisiriel biiri de duŋo naŋ ba di beri ayɔpoi o ma seŋ a iri sareka. A Bege da la wuleeŋ ka a ba seŋ ka ba ko duŋo neŋ o bie bebiyeŋ poɔŋ, a da ba lɛ seŋ ka ba nyɔge nuulee o togo poɔŋ a kyɛ lɛ wore o gyɛlɛ zaa ane o bilii zaa a gaaneŋ.​—Liivai 22:27, 28; Duturoonomi 22:6, 7.

Azuŋ, a pɛlɛɛŋ ka a Moosis Bege da ba wulo a Iisiriel biiri yɛlɛ naŋ seŋ ka ba e ane yɛlɛ naŋ ba seŋ ka ba e yoŋ. A bege wulo teŋ yelnimizeere yaga, kyɛ yelnimizeɛ kaŋa o naŋ wulo te la ka te taa gyog-soŋ naŋ wuli ka te tɔglɛɛ Jehoova gyog-sonne na.​—Yieme 19:7-11.

JULY 19-25

BAABOLE POƆ YELNIMIZEERE | DUTUROONOMI 16-18

“Sowuli Naŋ Na Toɔ̃ Soŋ A Sɛreŋmaareba Ka Ba Dire Sɛrɛɛ Mennoŋ Poɔŋ”

it-1 343 wɛl. 5

Zɔnnoŋ

Ka a Iisiriel sɛreŋmaarebaŋ ba di sɛrɛɛ dantorii soriŋ, ba da maŋ de aŋ manne neŋ zɔnnoŋ. Azuŋ ka a Bege da kpãã a Iisiriel sɛreŋmaareba ka, ba ta deɛrɛ noba boma dire sori naŋ ba tori poɔŋ, bee a deɛrɛ kyɔɔtaare bee a wɛlɛ noba. Ka ba naŋ erɛ lɛ ba koŋ toɔ̃ dire sɛrɛɛ dantorii soriŋ. “Gyɛŋfaŋ boma deɛbu maŋ eŋ ka yɛŋbaŋna leɛ zɔŋa.” (Yi 23:8) “Boŋ deɛ di zɔnna yɛ yɛbaŋna nimie.” (Du 16:19) Ka sɛreŋmaaraŋ baŋ yɛŋ bee a e neŋmeŋɛ a seŋ wala, kyɛ ka o naŋ deɛ kyɔɔtaa a yi noba na kaŋa o naŋ waana ka o di sɛrɛɛ na zieŋ, a yi o bammo poɔŋ bee ba bammo poɔŋ a na toɔ̃ vɛŋeŋ ka o di sɛrɛɛ naŋ ba tori. Azuŋ, Naaŋmen bege da kpãã la a sɛreŋmaareba ka ba kaara ba menne soŋ a yi kyɔɔtaare deɛbo eŋɛŋ, a kyɛ lɛ kpãã ba ka ba ta de ba menne teɛroŋ a dire a sɛrɛɛ. Azuŋ a bege da yelka: “Ta wa derɛ baalibu nenbaaleba eŋɛŋ, bee a deɛrɛ kpeɛrɛ nentegrɛ.” (Lv 19:15) A sɛreŋmaareba da ba seŋ ka ba de ba menne teɛroŋ bee teɛroŋ noba naŋ taa kyaare bondaana kaŋa a di o sɛrɛɛ ka o le o naŋ e bondaana zuŋ.​—Yi 23:2, 3.

it-2 511 wɛl. 7

Yɛlɛ Sɔrebie Naŋ Are Ko A Baabole Poɔŋ

Ayi. Ba maŋ de la a namba ayi toŋ ne toma gbɛɛ yaga sɛrɛɛ diibu poɔŋ. Ka noba bayiŋ wa di sieree a kyaare yelkaŋa, a maŋ wuliŋ ka a yɛlɛ e la yelmeŋɛ. A da fɛrɛɛŋ ka noba bayi bee noba bata di yelkaŋa sieree sɛre ka ba na baŋ de a yɛlɛ gaaneŋ a sɛreŋmaareba nimitɔɔre. Zenɛ ŋa, ba de la a sowuli ŋa tonɔ neŋ toma a Krista lantaapuoruu poɔŋ meŋ. (Du 17:6; 19:15; Mt 18:16; 2Ko 13:1; 1Ti 5:19; Hi 10:28) Naaŋmen meŋ da tu la a sowuli ŋa saŋa na o naŋ toŋ o Bidɔɔ ka o wa kpi a faa nensaaleba na. Yezu da yeleeŋ ka: “A yɛ Naaŋmen begɛ poɔ, ba sɛgɛɛ la ka noba bayi danseɛ la waa yelmeŋɛ. N dire la N meŋɛ danseɛ, ka a N Saa naŋ toŋ ma meŋ dire N danseɛ.”​—Gyn 8:17, 18.

it-2 685 wɛl. 6

Ŋmenpuore Wedeɛrɛ

A ŋmenpuore wedeɛrebaŋ da taa a poɔsori ka ba wulo a noba Naaŋmen bege na. Ba da la poɔ la a Iisiriel sɛreŋmaareba na poɔŋ. Ba da maŋ toɔ̃ soŋ la a sɛreŋmaareba naŋ be a teŋbɛrɛ na zaa ba naŋ iri ko a ŋmenpuore wedeɛreba ka ba kpeɛrɛ na. Ka yelkaŋaŋ wa bebe a e tuo yaga zaa ko a sɛreŋmaareba ka ba di a sɛrɛɛ, a ŋmenpuore wedeɛreba da maŋ soŋ baŋ. (Du 17:8, 9) Ka a Iisiriel bie kaŋaŋ ko neɛ a kyɛ zo gaa a lirizie teŋkpoŋ na kaŋa, a ŋmenpuore wedeɛreba da maŋ soŋ la a nembɛrɛ naŋ be ana teŋkpoŋ na baŋ di o soba sɛrɛɛ sori naŋ seŋ poɔŋ ka lɛ na vɛŋ ka ba iri a teŋkpoŋ yi zĩĩ sane diibu eŋɛŋ. (Du 21:1, 2, 5) Ka serɛ naŋ taa nyuuriŋ yelka o pɔge sɔgle sɛŋɛɛŋ, ba da maŋ de oŋ gaaneŋ a ŋmenpuoredie. A ŋmenpuore wedeɛrɛ da maŋ tu la yeltuurii mine ka lɛ na vɛŋ ka Jehoova di a yɛlɛ sɛrɛɛ kyɛ wuli yelmeŋɛ naŋ be a yɛlɛ poɔŋ, ka a pɔge sereŋ sɛŋɛɛŋ bee o ba sɛŋ. (So 5:11-31) A yi a yɛlɛ ama ŋa zaa poɔŋ, a da fɛrɛɛŋ ka a noba taa gyeremɛ a ko a sɛrɛɛ na a ŋmenpuore wedeɛreba bee a sɛreŋmaareba naŋ dire na; ka neɛŋ zagre ba sɛrɛɛ diibu na bee a e tokpeɛne, ba da maŋ ko la o soba.​—So 15:30; Du 17:10-13.

Baabole Poɔ Yelsonne

it-1 787

Lɛ Ba Naŋ Da Maŋ Tu Kyɛ Iri Neɛ Bare A Iisiriel Paaloŋ

A yi a Moosis Bege poɔŋ, a da fɛrɛɛŋ ka noba bayi bee noba naŋ gaŋ lɛ di sieree kyaare neɛ kaŋa naŋ le sɛrɛɛ diibu poɔŋ, sɛre ka ba na toɔ̃ ko o soba. (Du 19:15) A siere-direbɛ ŋa la seŋ ka ba daŋ piili de kubo za neɛ na naŋ le a sɛrɛɛ diibu poɔŋ na. (Du 17:7) A lɛ eebo na wuliŋ ka ba taa la eŋnyagroŋ ka ba tu Naaŋmen bege na, a kyɛ lɛ wuli ka ba boɔrɔŋ ka ba pɛge dɛgre zaa a yi a Iisiriel biiri lantaa na poɔŋ. A kyɛ lɛ e kpããmo ko neɛ zaa naŋ na boɔrɔ ka o di sieree naŋ e zirii bee a tu sori naŋ ba seŋ poɔŋ a di sieree.

JULY 26–AUGUST 1

BAABOLE POƆ YELNIMIZEERE | DUTUROONOMI 19-21

“Nensaalaa Nyɔvore Eɛ Nanee Ko Jehoova”

w17.11 14 wɛl. 4

Tɔglɔ Jehoova Dantorii Ane O Nembazo Na

⁴ A da e la mɔlɔ ka neɛ zo gaa a lirizie teŋbɛrɛ ayoɔbo na kaŋa. Jehoova da ko la a Iisiriel biiri noɔre ka ba po a teŋbɛrɛ naŋ da be a Gyɔɔdan koɔnbɔɔ na lomboe ayi na zaa ka a seŋ taa. Ananso la wala? Ka lɛ na vɛŋ ka a e mɔlɔ ko Iisiriel bie naŋ ba baŋ kyɛ ko neɛ ka o toɔ̃ zo bɔ lirizie beŋ. (Sor. 35:11-14) Ba da maalɛɛ soe naŋ gɛrɛ a lirizie teŋbɛrɛ ŋa aŋ soma yaga. (Dut. 19:3) A Gyuumine saaŋkoŋyɛlɛ wuleeŋ ka, ba da maŋ de la boma biŋ a soriŋ a wulo a soba zie a teŋbɛrɛ ŋa naŋ be. Aŋ da e mɔlɔ ka Iisiriel bie naŋ ba baŋ kyɛ ko neɛ zo gaa a lirizie teŋbɛrɛ ŋa na zuŋ, a da vɛŋɛɛŋ ka o soba koŋ zo gaa paaloŋ yuo kaŋa, ka lɛ vɛŋ ka o te puoro baga beŋ.

w17.11 15 wɛl. 9

Tɔglɔ Jehoova Dantorii Ane O Nembazo Na

⁹ Ananso a lirizie teŋbɛrɛ naŋ da bebe la ka a gu a Iisiriel biiri yi zĩĩ sane diibu eŋɛŋ. (Dut. 19:10) Jehoova nɔnɔ la nyɔvore, azuŋ o kyiiree nenkoorɔ zaa “nuure naŋ kyire neɛ naŋ e soli bee neɛ naŋ ba taa saanaa zĩĩ.” (Yeng. 6:16, 17) Naaŋmen taa la dantorii a kyɛ e forifori meŋ, azuŋ o daŋ koŋ iri o nimiri a yi neɛ naŋ ba baŋ kyɛ ko neɛ eŋɛŋ. Yelmeŋɛ la, ka neɛŋ ba baŋ kyɛ ko neɛ ba da maŋ zo la o nembao. Kyɛ, a soba naŋ seŋ ka o te manne o yɛlɛ ko a nembɛrɛ, ka a nembɛrɛŋ wa di a sɛrɛɛ a yelka o sereŋ ba baŋ kyɛ ko a soba, aseŋ ka o te kpeɛrɛ a lirizie teŋkpoŋ na a te ta saŋa na a ŋmenpuore wedeɛre kpoŋ naŋ na kpi. Lɛ na baŋ wuliŋ ka o soba na te kpeɛrɛɛ beŋ o nyɔvore zemmo zaa poɔŋ. A yɛlɛ ŋa da vɛŋɛɛŋ ka a Iisiriel biiri baŋ ka nensaalaa nyɔvore e la nanee yaga zaa. Ka ba naŋ boɔrɔ ka ba de gyeremɛ korɔ neɛ naŋ Terɛ Nyɔvore na, aseŋ ka ba bare yel-eroo zaa bee teɛroŋ zaa naŋ na toɔ̃ vɛŋ ka neɛ kɔŋ o nyɔvore.

it-1 344

Zĩĩ

Naaŋmen boɔrɔŋ ka te wono nyɔvore noɔŋ, azuŋ neɛ zaa naŋ iri nyɔvore Naaŋmen naŋ ko te na, aseŋ ka Naaŋmen di o soba sɛrɛɛ. Naaŋmen wuli teŋ a yɛlɛ ŋa a yi yɛlɛ na o naŋ da yelko Cain saŋa na o naŋ ko o yɔɔ na: “Ho yɔɔ zĩĩ yire la teŋgane a kono enna ma.” (Mn 4:10) Azuŋ, ka neɛŋ kyiire o tɔsoba, ka lɛ vɛŋ ka o boɔrɔ ka o tɔ na kpi, bee ka o dɛgrɛ o yuori bee ka o dire zirii sieree a kyaaroo, ka lɛ na baŋ vɛŋ ka o soba kɔŋ o nyɔvore. Lɛ na vɛŋeŋ ka o soba di zĩĩ sane.​—Lv 19:16; Du 19:18-21; 1Gyn 3:15.

Baabole Poɔ Yelsonne

it-1 518 wɛl. 1

Sɛrɛɛ Diibu Zie, Sɛrɛɛ Diibu Yɛlɛ

Ba da maŋ maalɛɛ a sɛrɛɛ diibu zie peɛle a teŋkpoŋ denɔkpoŋ. (Du 16:18; 21:19; 22:15, 24; 25:7; Ru 4:1) Lɛ wuleeŋ ka a sɛrɛɛ diibu zie da maŋ be la gbaŋgbale naŋ be a teŋkpoŋ, a peɛle a denɔkpoŋ. A denɔbɛrɛŋ baŋ da maŋ lagre a noba, a kanne a Bege ane bege paalaa zaa ba naŋ maale ko ba na. (Ni 8:1-3) Ka ba naŋ boɔrɔ ka ba di sɛrɛɛ a kyaare yelkaŋa aŋa neɛ kaŋa naŋ boɔrɔ ka o koɔre o kyɛŋ bee a yɛlɛ ŋa taa. A da e la mɔlɔ ka ba nyɛ siere-direbɛ bonso noba da maŋ tuuro la a denɔkpoŋ a kpeɛrɛ a kyɛ yire bebiri zaa. A sɛreŋmaareba naŋ da maŋ zeŋ a gbaŋgbale a peɛle a denɔkpoŋ ka neɛ zaa nyɛrɛ ba na, a da maŋ vɛŋeŋ baŋ kaara soŋ a tu sori naŋ seŋ poɔŋ a dire sɛrɛɛ dantorii soriŋ. Lɛ wuleeŋ ka ba da maalɛɛ ziiri mine a peɛle a denɔkpoŋ, ka a sɛreŋmaareba da maŋ zeŋ be a dire a sɛrɛɛ. (Jb 29:7) Saamiuel da maŋ tuglee Bɛɛtil, Giiligal, ane Miizipa gbandige na zaa, “a ŋmaara Iisiriel noba na sɛrɛɛ ana ziiri na zaaŋ.” Ane Reemaa zie na o naŋ da kpeɛrɛ na.​—1Sa 7:16, 17.

AUGUST 2-8

BAABOLE POƆ YELNIMIZEERE | DUTUROONOMI 22-23

“Lɛ Jehoova Bege Naŋ Wuli Ka O Teɛrɛɛ Dunni Yɛlɛ”

it-1 375-376

Tuo Tegrɛ

Takoroŋ saŋa na, dunni baŋ da maŋ de tuo neŋ tuobu. Azuŋ, a bege da wulee a Iisiriel biiri ka, ka ba naŋ nyɛ ba dɔndɔma kaŋa duŋo naŋ le neŋ tuobu a gaŋ, a ba seŋ ka ba baroo, kyɛ aseŋ ka ba “somoo ka o lori a tuobu bare a duŋo eŋɛŋ.” (Yi 23:5) Boma na a duŋo naŋ da maŋ tuo na la baŋ boɔlɔ tuobu. Aŋa mannoo poɔŋ “bontanne bee wiri-bonne ayi tuobu.”​—2Nm 5:17.

it-1 621 wɛl. 1

Duturoonomi

A Duturoonomi gane da wuleeŋ ka a Iisiriel biiri seŋ ka ba taa nimimaaroŋ a ko dunni. A bege da ba tere sori ka a Iisiriel biiri maŋ iri nuule ma neŋ o bilii naŋ be togo poɔŋ kyɛ bare a bilii. Bonso, o na la da maŋ guuro o bilii na a kyɛ sonnaa. Ba da maŋ barɛɛ a ma oŋ ɛge gaa, kyɛ sori da bebeŋ ka ba de a bilii yɛŋ. Bonso, ka a maŋ ɛge gaa, o na baŋ lɛ te wɛgɛɛ bilii. (Du 22:6, 7) A bege da ba tere sori ka koɔraa de boŋa ane nadɛre lantaa ka a koɔrɔ. Bonso ka o naŋ e lɛ a duŋo naŋ ba taa faŋa na na dire la dɔgɛɛ. (Du 22:10) A bege da wuleeŋ ka a ba seŋ ka ba le nadɛre naŋ ŋmeɛrɛ kyi noɔre, ka kɔŋ ta wa kpɛ o te gaali saŋa na o naŋ ŋmeɛrɛ a kyi, kyɛ ka a kyi na o naŋ ŋmeɛrɛ na biŋ o nimitɔɔreŋ.​—Du 25:4.

w03 10/15 32 wɛl. 1-2

“Yɛ Ta Laŋna Ne Noba Naŋ Ba Sage De A Krista Yɛlɛ”

AŊA LƐ te naŋ nyɛ a foto poɔŋ na, bontaaŋa neŋ nadɛre faŋa naŋ ba seŋ taa na zuŋ, ka a naŋ laŋ koɔrɔ a na dire la dɔgɛɛ. A gbogli ba naŋ maŋ maale a de yɛre dunni aŋ koɔrɔ neŋ na, ba da maŋ maalaaŋ ko dunni ayi naŋ seŋ taa ka a faŋa meŋ seŋ taa. Ka a naŋ ba waa lɛ a dunni ayi zaa na dire la dɔgɛɛ. Naaŋmen naŋ da teɛrɛ a dunni ŋa yɛlɛ zuŋ na, o da yelko la a Iisiriel biiri ka: “Yɛ ta wa laŋna boŋa ane nadavaraa koɔrɔ neŋ.” (Duturoonomi 22:10) A sowuli ŋa neŋ o zu kyaarɛɛ nadɛre ane bontaaŋa meŋ.

A ba maŋ e koɔraa boɔbo ka o de a dɔgɛɛ ŋa tɔ ennɛ o dunni. Kyɛ ka o naŋ ba taa nadɛɛ ayi, kaapage o na de la dunni ayi na o naŋ taa na lantaa ka a kɔ. Aminekaŋaŋ, lɛ ka a takoroŋ saŋa koɔraa na naŋ be te yelmannaa na poɔŋ e. A naŋ ba seŋ taa ka a faŋa meŋ ba seŋ taa na zuŋ, a na e la tuo ko a duŋo naŋ ba taa faŋa yaga na ka o toɔ̃ toŋ toma na a duŋo naŋ taa faŋa yaga naŋ tonɔ na. A duŋo naŋ ba taa faŋa yaga na na leɛ la tuobu a dɔgle a duŋo naŋ taa faŋa yaga na.

Baabole Poɔ Yelsonne

it-1 600

Sane, Sandire

Ka hooŋ pɛŋ neɛ kaŋa boŋ bee a eŋ noɔre ka ho da boŋkaŋa bee a e yelkaŋa a ko neɛ, lɛ wuleeŋ ka ho di la sane. Takoroŋ saŋa na, ka neɛŋ wa be nandaaloŋ poɔŋ, o maŋ piili dire la sama. A da ba maŋ soma a ko a Iisiriel bie kaŋa ka o leɛ sandire bonso, o maŋ wa leɛ la gbaŋgbaa ko neɛ na sane o naŋ di na. (Ye 22:7) Azuŋ, Naaŋmen da yelko la o noba ka ba maŋ yuoro ba nu, a yire ba poɔ zaa a derɛ pɛmmo korɔ ba taa Iisiriel biiri naŋ be nandaaloŋ poɔŋ. A da ba seŋ ka ba maŋ de koɔ̃ eŋ ba pɛmmo na poɔŋ, ka lɛ ta erɛ wa wuli ka ba boɔrɔŋ ka ba nyɛ tɔnɔ yi o soba pɛmmo na poɔŋ. (Yi 22:25; Du 15:7, 8; Ym 37:26; 112:5) Kyɛ ka saanaŋ wa pɛŋ libie yi ba zie, ba na toɔ̃ eŋɛɛ koɔ̃. (Du 23:20) A Gyuumine gaŋbanneba yeleeŋ ka, a sowuli ŋa kyaarɛɛ libie neɛ naŋ pɛŋ ka o te e yaako, kyɛ a ba kyaare neɛ naŋ kpɛ nandaaloŋ poɔ a wa pɛŋ libie. Saamma naŋ da maŋ wa a Iisiriel paaloŋ na da ba maŋ wa zeŋ be lɛɛŋ a gɛrɛ, gbɛɛ yaga ba da maŋ waŋ ka ba e yaako. Azuŋ, libie zaa ba naŋ pɛŋ lɛ saŋa na, ba da maŋ kaarɛɛ soriŋ ka ba na yɔɔŋ ane koɔ̃. Bonso, ka ba naŋ wa ko Iisiriel bie meŋ zaa pɛmmo, ba da maŋ eŋ la koɔ̃.

AUGUST 9-15

BAABOLE POƆ YELNIMIZEERE | DUTUROONOMI 24-26

“Lɛ Jehoova Bege Naŋ Wuli Ka O Teɛrɛɛ Pɔgeba Yɛlɛ”

it-2 1196 wɛl. 4

Pɔge

A Moosis Bege da wuleeŋ ka, ka dɔɔŋ de pɔge paalaa, a da ba seŋ ka o gaa zɔɔre yuoni gbuli. A yɛlɛ ŋa da maŋ ko la a kultaa deme ŋa sori baŋ toɔ̃ dɔge bie. A bie maŋ e la sukyiridii a ko a ma saŋa na o serɛ naŋ wa gaa zɔɔre, bee ka o serɛ naŋ kɔŋ o nyɔvore zɔɔre poɔŋ.​—Du 20:7; 24:5.

it-1 963 wɛl. 2

Weɛ Bonkyɛlɛɛ Deebo Bee Innoo

A yelsɛgraa ŋa da somaŋ yaga a sonna nandaaneba naŋ da be a paaloŋ poɔŋ. A da wulee a noba ka ba yuoro ba nu a korɔ ba taa boma, a ta boɔrɔ ba yoŋ boma a kyɛ dɛle Jehoova ka o na maale baŋ. A yelsɛgraa ŋa da ba wulo a noba ka ba e eŋtuo deme. A yɛlɛ ŋa vɛŋɛɛŋ ka Deevid yɛlɛ na e yelmeŋa: “N naŋ ba nyɛ Daana naŋ zagre neŋsoŋ, N ba nyɛ o booree naŋ sɔrɔ bondirii meŋ.” (Ym 37:25) A yelsɛgraa ŋa naŋ da be a Bege poɔŋ na da yuo la sori ko nandaaneba gba, a tuuro ba tonkpeɛne eŋɛŋ ka ba na toɔ̃ nyɛ bonkaŋa a di. Ka ba neŋ ba biiri koŋ sɔre bondirii di.

w11 3/1 23

Ho Da Baŋɛɛŋ?

Takoroŋ saŋa na, Iisiriel paaloŋ poɔŋ ka dɔɔŋ kpi a kyɛ ba taa bidɔɔ, aseŋ ka o yɔɔdɔɔ de a pɔge na o naŋ kpi kyɛ bare na, ka o ne o dɔge biiri. Ka lɛ vɛŋ ka a dɔɔ naŋ kpi na booree naŋ bebe a gɛrɛ. (Munpiilee 38:8) A puoreŋ, a yelsɛgraa ŋa wa paalɛɛ a Moosis Bege na poɔŋ. Ba da boɔlooŋ ka serebile kultaa bee dɔɔ naŋ kpi ka o dɔgrɔ kaŋa leɛ de o pɔge. (Duturoonomi 25:5, 6) Aŋa lɛ Ruut gane naŋ wuli na, lɛ na Boaz naŋ da e na wuleeŋ ka, ka a dɔɔŋ kpi kyɛ ba taa yɔɔdɔɔ zaa naŋ na de o pɔge na, lɛɛŋ o dɔgrɔ kaŋa naŋ e dɔɔ na toɔ̃ de la a pɔge ka ba dɔge biiri.​—Ruut 1:3, 4; 2:19, 20; 4:1-6.

Yɛlɛ na a Sadusii deme naŋ da soore Yezu baŋ sɛgaa eŋ Marko 12:20-22 na vɛŋɛɛŋ teŋ baŋ ka, a serebile kultaa ŋa da naŋ bebeŋ Yezu saŋa na. Dɔɔ kaŋa naŋ da sɛgrɛ a Gyuudeme takoroŋ yɛlɛ binne a dɛndɛŋ yuoŋ kɔɔ na saŋa, ka o yuori di Flavius Josephus da yeleeŋ ka, a yelsɛgraa ŋa da maŋ soŋeŋ ka a booree yuori naŋ bebe a gɛrɛ a kyɛ lɛ vɛŋ ka kyɛŋ zaa naŋ be a booree poɔŋ meŋ bebe a gɛrɛ. A kyɛ la e guubu meŋ a ko a pɔge na o serɛ naŋ kpi kyɛ bare na. A lɛ saŋa, pɔge da ba taa sori zaa ka o di o serɛ kyɛŋ. Kyɛ ka a dɔɔ naŋ kpi na yɔɔ kaŋa bee o dɔgrɔ kaŋaŋ leɛ de a pɔge ka ba dɔge bie, a bieŋ na leɛ di a kyɛŋ.

Baabole Poɔ Yelsonne

it-1 640 wɛl. 5

Kultasãã

Pɔg-Bare Gane. A ba seŋ ka te teɛre ka, aŋa lɛ a Moosis Bege naŋ wuli ka, ka dɔɔŋ nyɛ yelkaŋa naŋ ba soma o pɔge eŋɛŋ o na toɔ̃ barooŋ na, lɛ wuleeŋ ka a e la mɔlɔ ko Iisiriel dɔɔ ka o bare pɔge o naŋ de. Ka dɔɔŋ na bare o pɔge, aseŋ ka o tu yɛlɛ mine ka a ta. A da fɛrɛɛŋ ka o sɛge gane kaŋa ba naŋ boɔlɔ ka “pɔg-bare gane” a ko a pɔge. A serɛ na “de la a gane eŋ o nuureŋ kyɛ kare o bare o dieŋ.” (Du 24:1) A Baabole ba wuli soe na zaa a dɔɔ naŋ seŋ ka o tu na te baare. Kyɛ ka a dɔɔŋ boɔrɔ ka o bare o pɔge, o maŋ te mannɛɛ a yɛlɛ ko a nembɛrɛ. Yɛlɛ a nembɛrɛ naŋ na daŋ e la ka, ba mɔɔ nyɛ ka ba na toɔ̃ maale baŋ taaŋ bee. Wagre na ba naŋ maŋ de maale a pɔg-bare gane kyɛ boɔrɔ ka ba tu a bege sori a wuli ka a dɔɔ sereŋ bare la o pɔge na, a da maŋ ko la a dɔɔ sori ka o leɛ zeŋ teɛre gbɛre na o naŋ derɛ na soŋ. Aseŋ ka o wuli ananso o naŋ bara a pɔge. Ka ba naŋ tu a kulta bare sowuli ŋa zaa te baare, a na e la kpããmo ko dɔɔ zaa ka a ba e mɔlɔ lɛ ka ba bare ba pɔge. A yelsɛgraa ŋa da e la gumeŋa ko a pɔgeba. A Baabole ba wuli yɛlɛ na ba naŋ da maŋ sɛge eŋ a “pɔg-bare gane” poɔŋ.

AUGUST 16-22

BAABOLE POƆ YELNIMIZEERE | DUTUROONOMI 27-28

“A Maaloo Ŋa Zaaŋ Na Wa . . . Pɔge Bo”

w10 12/15 19 wɛl. 18

Nyɛ Maaloo A Yi Naa Na Naaŋmen Vooroŋ Soŋ Naŋ Wulo O Sori Na!

¹⁸ Ka yɛlɛ na zaa te naŋ maŋ zanna yire a Baabole poɔŋ, ane yɛlɛ na zaa Naaŋmen naŋ maŋ wulo te naŋ toɔrɔ te sukyiri, lɛ wuleeŋ ka te kyɛllɛ wono la Naaŋmen yɛlɛ. (Mat. 24:45) Ka teneeŋ erɛ yɛlɛ Naaŋmen neŋ o Bidɔɔ naŋ boɔrɔ, lɛ meŋ wuleeŋ ka te kyɛllɛ wono la ba yɛlɛ. Yezu da yeleeŋ ka: “A ba e ka neɛ zaa naŋ boɔlɔ ma ‘Daana, Daana,’ la na kpɛ a tenvelaa naaloŋ. Kyɛ soba na yoŋ naŋ erɛ a N Saa naŋ be tenvelaa poɔ poboɔbo yɛlɛ la na kpɛ a tenvelaa.” (Mat. 7:21) Ka teneeŋ sigre te menne a ko yelsɛgree na Jehoova naŋ tu a lantaapuoruu nembɛrɛ naŋ e ‘noba naŋ taa kyɔɔtare’ eŋɛŋ a sɛgre biŋ a lantaapuoruu poɔŋ na, lɛ wuleeŋ ka te kyɛllɛ wono la o yɛlɛ.​—Efe. 4:8.

w01 9/15 10 wɛl. 2

Ka Lɛ Jehoova Maaloo Na Pɔge Boŋ Bee?

² A Hiburu yelbiri ba naŋ de toŋ neŋ toma ka “naŋ tuuro” naŋ be Duturoonomi 28:2 wulee yɛlɛ neɛ naŋ erɛ wagre zaa. Jehoova puorebiiri ba seŋ ka ba maŋ kyɛllɛ wono o yɛlɛ saŋa kaŋa kyɛ zagre o noɔre saŋa kaŋa; kyɛ aseŋ ka ba kyɛllɛ wono o yɛlɛ ba zemmo zaa poɔŋ. Lɛ yoŋ eeboŋ na toɔ̃ de maaloo wa ko ba. A Hiburu yelbiri ba naŋ de toŋ neŋ toma ka “ta pɔge” eɛ naŋkpaaŋ toma yelbiri kaŋa naŋ wulo naŋkpaana naŋ maŋ “zo pɔge” bee a “ta pɔge bonkaŋa.”

w10 9/15 8 wɛl. 4

Moɔŋ Nimiri A Boɔrɔ Jehoova Maaloo

⁴ Bo gyogo ka a Iisiriel biiri seŋ ka ba taa a toɔ̃ kyɛllɛ wono Naaŋmen yɛlɛ? Naaŋmen Bege na da wuleeŋ ka Jehoova poɔ koŋ pɛle ka ba naŋ ba de “nyɛŋka bee kyelloo ane popɛle sukyiri a puoro o.” (Kanne Duturoonomi 28:45-47.) Jehoova ba boɔrɔ ka te erɛ yɛlɛ o naŋ boɔrɔ weɛ lɛ, bonso dunni ane malki-faare meŋ na toɔ̃ eɛ lɛ. (Marko 1:27; Gyi. 3:3) Kyɛ aseŋ ka te maŋ yi te sukyiri zaa poɔŋ a wono Naaŋmen yɛlɛ te naŋ nɔmoo zuŋ. Sagediibu te naŋ taa maŋ vɛŋeŋ teŋ taa popeɛloŋ, bonso te baŋ ka Jehoova bege tuubu ba e tuo te gaali. “Naaŋmen maŋ yɔɔ la banaŋ naŋ boɔrɔ o yɛlɛ.”​—Hib. 11:6; 1 Gyɔɔn 5:3.

Baabole Poɔ Yelsonne

it-1 360

Tɛribogu Kuurii

Jehoova bege da ba tere sori ka neɛ tage o tɔ tɛribogu kuurii gaaneŋ puore. (Du 19:14; kanne Ye 22:28 meŋ.) A yɛlɛ ŋa da eɛ nimizeɛ, bonso a bege da wuleeŋ ka neɛ zaa naŋ tage “o tɔ tɛribogu kuurii” gaaneŋ puore na nyɛ la dɔgroŋ. (Du 27:17) A tendaamba da maŋ kɔ la boma ba teŋgane na ba naŋ so na zuŋ. Lɛ zuŋ ka neɛŋ tage o tɔ tɛribogu kuurii gaaneŋ puore, lɛ na vɛŋeŋ ka o soba kɔŋ o teŋgane na kyɛlee o naŋ da naŋ kɔ a nyɛ bondirii yi a poɔŋ na. Takoroŋ saŋa na, ka neɛŋ wa e a yɛlɛ ŋa ba da maŋ yeleŋ ka nannyige la. (Jb 24:2) Kyɛ tokpeɛne deme mine da bebeŋ a tonɔ ana toŋfaare ŋa, a yi Hozeeya saŋa na o da de la a Gyuda nabiiri na manne neŋ neɛ naŋ tagra o tɔ tɛribogu kuurii gɛrɛ neŋ puore.​—Ho 5:10.

AUGUST 23-29

BAABOLE POƆ YELNIMIZEERE | DUTUROONOMI 29-30

“Jehoova Puoruu Ba E Tuo Yaga Te Gaali”

w09 11/1 31 wɛl. 2

Jehoova Ko Teŋ Sori Ka Te E Yɛlɛ Te Naŋ Boɔrɔ

A eɛ tuo ka te baŋ yɛlɛ Naaŋmen naŋ boɔrɔ, a tuuro a meŋ bee? Moosis yeleeŋ ka: “Noɔre ŋa N naŋ korɔ yɛ zenɛ ŋa ba e zuŋzuguloŋ gaali a koɛ, o ba la be tɔɔre zaa meŋ.” (Du 30:11) Jehoova daŋ koŋ sage yelka te e yɛlɛ teŋ koŋ toɔ̃ e. O bege ba e kpeɛŋaa te gaali, te na toɔ̃ baŋaaŋ, a tuuro a meŋ. A ba seŋ ka te do gaa “aregyena bee sazu” bee ka te “lɔŋ maŋkpoŋ” sɛre kyɛ na baŋ zanne yɛlɛ Naaŋmen naŋ boɔrɔ ka te erɛ. (Du 30:12, 13) A Baabole wuli teŋ peɛlaaŋ yelzaa o naŋ boɔrɔ ka te erɛ.​—Maika 6:8.

w09 11/1 31 wɛl. 1

Jehoova Ko Teŋ Sori Ka Te Maŋ E Yɛlɛ Te Naŋ Boɔrɔ

KRISTA BIPƆGE kaŋa naŋ tuore yelkpeɛne yaga o zemmo poɔŋ da teɛre ka o koŋ toɔ̃ e yelsoŋ zaa. O da yeleeŋ ka, “N taa la dabeɛ̃ kaŋa naŋ be N eŋɛŋ ka N koŋ toɔ̃ e yɛlɛ naŋ pɛlɛ Jehoova poɔ.” Yelmeŋa la? Yelfaare te naŋ e bee yɛlɛ naŋ pɔge te saŋa kaŋa naŋ pare wuleeŋ ka te koŋ toɔ̃ pɛle Jehoova poɔ bee? Ai. Jehoova ko teŋ soŋ-meŋa ka te na baŋ kaa iree yɛlɛ te naŋ boɔrɔ ka te erɛ te zemmo poɔŋ. Jehoova boɔrɔŋ ka te iri yɛlɛ naŋ soma, o Yelbiri, a Baabole, wuli teŋ sori teŋ na toɔ̃ tu kyɛ e lɛ. Hooŋ leɛ nyɛ Moosis yelbie naŋ be Duturoonomi zu 30.

w09 11/1 31 wɛl. 4

Jehoova Ko Teŋ Sori Ka Te Maŋ E Yɛlɛ Te Naŋ Boɔrɔ

Yɛlɛ te naŋ iri ka te e te zemmo poɔŋ yɛlɛ fɛrɛɛ Jehoova bee? Ɛɛ, a yɛlɛ ferɛɛ Jehoova! Naaŋmen da de la o vooroŋ soŋ eŋ Moosis oŋ yelka: “Lugi bee kaa iri nyɔvore.” (Du 30:19) Kyɛ, sobuoŋ teŋ na toɔ̃ kaa iri nyɔvore? Moosis da wulee a muni ka: “E lɛ a toɔ̃ nɔŋ Ba Tari Baahaa Daana Jehoova ho Naaŋmen a tuuro o noɔre kyɛ nyɔge o a mare o.” (Du 30:20) Ka teneeŋ nɔnɔ Jehoova, yelkpeɛne zaa teŋ na tuore, kyɛ te naŋ na kyɛllɛ wono la o yɛlɛ a kyɛ yi yelmennoŋ poɔŋ meŋ a kpi mare o. Ka teneeŋ erɛ lɛ, a wuleeŋ ka te kaa iree nyɔvore​—a nyɔvore sori ŋa la soma yaga zaa a gaŋ yelzaa pampana, bonso a maŋ ko teŋ teɛretɔ ka te na nyɛ la nyɔvore naŋ ba taa baaraa Naaŋmen donpaalaa na poɔŋ.​—2 Piita 3:11-13; 1 Gyɔɔn 5:3.

Baabole Poɔ Yelsonne

it-1 665 wɛl. 3

Toorii

Jehoova da tu la o toŋtoneba na eŋɛŋ a yelka, a Iisiriel biiri naŋ da e zukpeɛne deme a ba wono o yɛlɛ na taa la ‘tobo naŋ sere.’ (Jr 6:10; Tm 7:51) A da waa ŋa boma mine naŋ fure ba toboŋ baŋ ba wono yɛlɛ soŋ. A eɛ tobo Jehoova naŋ ba yuo, bonso o na la maŋ de tobo naŋ wono yɛlɛ a kyɛ tuuro o yɛlɛ a ko bana naŋ boɔrɔ o na, a kyɛ vɛŋ ka noba naŋ e tokpeɛne deme tobo sere baŋ ba wono o yɛlɛ. (Du 29:4; Ur 11:8) A bitontonɔ Pɔɔl da yeleeŋ ka wagre kaŋa na taŋ ka noba naŋ yelka ba e la yelmeŋa puorebiiri na zagre a yelmeŋa puoruu bare a kyɛ yele yelfaare kyaara a lantaapuoruu. Ba koŋ boɔrɔ ka ba wono a yelmeŋa naŋ be a Baabole poɔŋ. Ba na taa la tobo naŋ “noma” a boɔrɔ ka ba kyɛllɛ yɛlɛ naŋ pɛlɛ ba poɔ, lɛ zuŋ ba na leɛ te kyɛllɛ la zirii wulwulibo yɛlɛ. (2Ti 4:3, 4; 1Ti 4:1) Ane meŋ, ka neɛŋ woŋ nɔmaaŋ duoro, aŋa saammo duoro, lɛ na vɛŋeŋ ka o tobo “vuunɔ.”—1Sa 3:11; 2Nm 21:12; Jr 19:3.

AUGUST 30–SEPTEMBER 5

BAABOLE POƆ YELNIMIZEERE | DUTUROONOMI 31-32

“Zanne Yelkaŋa Yi Yelmannee Naŋ Be A Moosis Yieloŋ Na Poɔŋ”

w20.06 10 wɛl. 8-9

“Ko Ma Sukyiri Yeni Ka N Zoro Ho Yuori”

⁸ Aŋ da kyɛre fẽẽ ka a Iisiriel biiri gaa a Noɔre Emmo Teŋgane na, Jehoova da wulee Moosis yieloŋ kaŋa. (Dut. 31:19) Moosis meŋ da wulee a noba a yieloŋ. (Kanne Duturoonomi 32:2, 3.) Ka teneeŋ teɛre o wɛlbo ayi ane ata na yɛlɛ gaa tɔɔre te na nyɛŋ ka Jehoova ba boɔrɔ ka o yuori na sɔgle, o ba boɔrɔ ka noba teɛre ka o yuori na eɛ forifori yaga ka ba boɔle. Jehoova boɔrɔŋ ka neɛ zaa baŋ o yuori na! Nyɛ lɛ a naŋ e a poɔsori ka ba kyɛllɛ wono Moosis naŋ wulo ba Jehoova ane o yuori naŋ taa gyeremɛ yaga zaa na yɛlɛ! Yɛlɛ na Moosis naŋ da wuli ba na da eŋ baŋ faŋa a kyɛ ko ba pɛnnoo, aŋa saa naŋ mi eŋ mɔmaara. Wala teŋ meŋ na baŋ e ka te wulibo waa ŋa saa naŋ mi eŋ mɔmaara?

⁹ Ka teneeŋ wa moɔlɔ a duoro yie neŋ yie poɔŋ bee gyamaa poɔŋ, te na toɔ̃ deɛ a Baabole wuli noba ka Naaŋmen yuori la Jehoova. Te na baŋ deɛ te gama, te vidiori, ane yɛlɛ naŋ be te intanɛt tomazie na wuli ba. Ka toma zieŋ la, bee ka sukuuŋ la, bee te gɛrɛɛ zie kaŋa, a zaa e la soyuo teŋ na baŋ tu kyɛ yel te Naaŋmen na te naŋ nɔnɔ na yɛlɛ ko noba. Ka teneeŋ yele poboɔbo na Jehoova naŋ taa ko nensaaleba ane a teŋgane na yɛlɛ korɔ noba, te wulo baŋ Jehoova yɛlɛ baŋ da ba baŋ. Ka teneeŋ wulo noba yelmeŋa naŋ kyaare te Saa naŋ taa nɔmmo na, te soŋɛɛŋ a vɛŋ ka o yuori na erɛ forifori. Ka teneeŋ wa erɛ lɛ te na iree zirii na zaa noba naŋ ŋma kyaare Jehoova ane lɛ na ba naŋ dɛgrɛ o yuori na bare. Te mannɛɛ duoro naŋ eŋnɛ faŋa a kyɛ diire sukyiri korɔ noba.​—Aiz. 65:13, 14.

w09 5/1 14 wɛl. 4

Yelmannee Naŋ Be A Baabole Poɔŋ—Ho Baŋ La A Tɛgɛ Soŋ?

Wagre mineŋ a Baabole maŋ deɛ Jehoova manne neŋ boma mine naŋ ba voorɔ. Boma na mine a Baabole naŋ maŋ de Jehoova manne neŋ la “Iisiriel Pie,” “pi-kuurii,” ane “zi-kpeɛŋaa.” (2 Saamiuel 23:3; Yieme 18:2; Duturoonomi 32:4) Bo yitaa la be a yɛlɛ ŋa poɔŋ? Aŋa lɛ pie naŋ maŋ are kpeɛŋaa, a ba zigre na, lɛ meŋ la ka Naaŋmen e Zie teŋ na baŋ toɔ̃ zo gaa bɔ sɔgle zie.

w01 10/1 9 wɛl. 7

Tɔglɔ Jehoova Saŋa Na Ho Naŋ Guolo Ho Biiri Na

⁷ Hooŋ leɛ nyɛ nɔmmo na Jehoova naŋ da wulo a Iisiriel biiri. Moosis da de la yelmannaa kaŋa naŋ soma yaga a wuli lɛ Jehoova naŋ nɔŋ a Iisiriel paaloŋ a seŋ. Te kannɛɛŋ ka: “Aŋa kakyigu bee tuu-kpoŋ naŋ maŋ dɔnnɔ o togo, a maŋ do laala o bilii zuŋ, a yaare o kpaŋkpama, a derɛ dɔglɔ o kpaŋkpama lɛ na, Ba Tari Baahaa Daana Jehoova yoŋ da deɛ [Jeekob] weɛ.” (Duturoonomi 32:9, 11, 12) Ka kakyigu bee tuu-kpoŋ maŋ boɔrɔ ka o wuli o bilii lɛ aŋ na ɛge, a ma maŋ ‘dɔnnɛɛ a togo’ a ŋmeɛrɛ o kpaŋkpama a e lɛ ka a na ɛge. Ka a bile kaŋaŋ wa ɛge yi a togo naŋ be a pi-kpagree zuŋ na, a ma maŋ “laalɛɛ” a bile zuŋ. Ka anaŋ wa waa ŋa a bile waanaŋ ka o wa le teŋɛŋ, a ma maŋ zo sigeŋ a de o ‘dɔgle o kpaŋkpamaŋ.’ Lɛ meŋ la ka Jehoova da yi nɔmmo soriŋ a kaara a Iisiriel biiri naŋ da wa leɛ paaloŋ gbuli na. O da ko baŋ a Moosis Bege na. (Yieme 78:5-7) Naaŋmen da vɛŋɛɛŋ ka o nimiri be a paaloŋ ŋa eŋɛŋ a maŋ e siri ka o wa faa ba, saŋa na o noba naŋ wa be awonaa poɔŋ na.

Baabole Poɔ Yelsonne

w04 9/15 27 wɛl. 12

Yelnimizeere Naŋ Be A Duturoonomi Gane Poɔ

31:12. Bibiiri seŋ ka ba maŋ zeŋ peɛle nembɛrɛ a lantaapuoruu lammo saŋa a e siri ka ba kyɛllɛ wono a yɛlɛ a toɔ̃ zanne yelkaŋa yi be.