Te Zemmo Ane Te Naaŋ Moɔloo Toma Lammo Yelsɛgree Yelpeɛre Gane

NOVEMBER 1-7

BAABOLE POƆ YELNIMIZEERE | JOOSUA 18-19

“Lɛ Jehoova Naŋ Tu Yɛŋ Sori A Kyɛ Po A Teŋgane”

it-1 359 wɛl. 1

Tɛribogu

A waa ŋa yɛlɛ ayi mine baŋ da maŋ kaa kyɛ po a teŋgane ko a Izerayɛl bale na kaŋa zaa, ba da maŋ lɔɔ la bie a kyɛ kaa lɛ a bale noba naŋ e yaga seŋ. A bie lɔɔboŋ da maŋ wuli a teŋgane lombori zie na ba naŋ seŋ ka ba de ko a lɛ bale na, lɛ wuleeŋ ka a bie lɔɔboŋ maŋ wuli ka ba na ko baŋ teŋgane naŋ be Samun-Gɔɔ seŋ bee Samun-Dure seŋ bee Sapare seŋ bee Saniŋe seŋ, bee ka teŋgane na baŋ na ko ba na na peɛlɛɛ a mannoɔre bee a tanbɛrɛ ziiri naŋ. Jehoova la da tere sowuli ka ba maŋ de a bie lɔɔbo po a teŋgane, a lɛ da vɛŋɛɛŋ ka a Izerayɛl biiri da ba erɛ taa nyuuri bee a zɔɔrɔ ne taa. (Ye 16:33) A tuuro a bie lɔɔbo eŋɛŋ Naaŋmen da sɛgrɛɛ yɛlɛ soŋ zaa baŋ po a teŋgane ko a Izerayɛl bale na kaŋa zaa. Zie na zaa baŋ na de ko a Izerayɛl bale na kaŋa zaa na vɛŋ ka a booree zudaana Gyekɔb daŋyelbo na o naŋ yel saŋa na aŋ da kyɛre fẽẽ ka o kpi aŋ be Munpiilee 49:1-33 na nyɛ eebo.

it-1 1200 wɛl. 1

Gbaŋdiruŋ

Gbaŋdiruŋ Teŋgama. Jehoova la da ko a Izerayɛl biiri kaŋa zaa ba gbaŋdiruŋ, Jehoova la da lɛ wuli Moosis a teŋgane zaa tɛribogri. (So 34:1-12; Js 1:4) Moosis la da ŋmaa a teŋgama ko Gaad biiri, Ruubeŋ biiri, ane Manaase bale na kyɛlee. (So 32:33; Js 14:3) A Izerayɛl bale na zaa naŋ kyɛre na yɛŋ, Joosua ane Ileezar la da ko ba ba tɛribogri. (Js 14:1, 2) Aŋa lɛ Gyekɔb daŋyelbo naŋ be Munpiilee 49:5, 7 naŋ wuli na, ba da ba ko Simeon ane Liivai bale na teŋgama naŋ e ba gbaŋdiruŋ. Simeon bale na teŋgane na (ane ba teŋbɛrɛ baŋ da taa na) da be la Gyuuda tɛribogu na poɔŋ (Js 19:1-9), ba da ko la a Liivai bale na teŋbɛrɛ naŋ ta lezaayi ne anii a Izerayɛl tɛribogri na zaa poɔŋ. Jehoova naŋ da kaa iri a Liivai noba ka ba tonɔ toma a ŋmenpuoredieŋ na zuŋ, o da yeleeŋ ka, o na la ba gbaŋdiruŋ. Azuŋ ba da maŋ de la a puobu pie poɔ ziyeni na a ko ba baŋ kaara ne ba menne. (So 18:20, 21; 35:6, 7) Bale zaa meŋ da maŋ ko la ba booree noba teŋgama ba tɛribogri na poɔŋ. Ka a booree kaŋa zaaŋ wa dɔge bidɔbɔ, a bidɔbɔ maŋ iri di la ba saamine kyɛŋ, lɛ na vɛmeŋ ka ba po a teŋgane fẽẽfẽẽ ko a biiri zaa.

it-1 359 wɛl. 2

Tɛribogu

Ka ba naŋ wa lɔɔ a bie baare, a pãã na wulee zie a Izerayɛl bale zaa naŋ na zeŋ. Ba maŋ lɛ kaa la lɛ bale zaa noba naŋ e yaga seŋ kyɛ pãã po a teŋgane ko ba. “Yɛ po a paaloo a tuuro pohibuŋ bee bie lɔɔboŋ ka o e kyɛŋbon ko yɛ di-noɛ. Ka nobaŋ wa e yaga, ho na ko baŋ kyɛŋ naŋ e kpoŋ, ka ba naŋ wa e fẽẽ ho na ko baŋ kyɛŋ naŋ e fẽẽ. Kaŋa zaa kyɛŋ na maŋ eɛ boŋ naŋ wa o seŋ a tuuro pohibuŋ bee bie lɔɔboŋ.” (So 33:54) Ka a bie lɔɔboŋ wa iri zie kaŋa ko a bale kaŋa, ba koŋ leɛroo. Kyɛ lɛ na noba naŋ e yaga seŋ a lɛ bale na poɔŋ la na wuli lɛ a kyɛŋ naŋ na e kpoŋ seŋ. Azuŋ saŋa na ba naŋ da wa nyɛ ka Gyuuda teŋgane na da eɛ kpoŋ te gaali na, ba da leɛrɛɛ Gyuuda teŋgane na kyɛlee a ko Simeon bale na.​—Js 19:9.

Baabole Poɔ Yelsonne

it-1 359 wɛl. 5

Tɛribogu

Lɛ na baŋ da po a teŋgama naŋ da be a Gyɔɔdan Saniŋe seŋ na wuleeŋ ka a dɛndɛŋ bie na baŋ da lɔɔ na da wulee a Gyuuda bale na (Js 15:1-63), Joosef (bee Iifiriam) bale na (Js 16:1-10), ane a Manaase bale na kyɛlee naŋ da be a Gyɔɔdan Saniŋe seŋ na teŋgama ane teŋbɛrɛ na ba naŋ so. (Js 17:1-13) A lɛ puoreŋ, a da waa ŋa baŋ da bare a teŋgane puobu lɛ, bonso a Izerayɛl noba da yi la Giiligal a gaa Sailo. (Js 14:6; 18:1) A Baabole ba wuli lɛ a naŋ kɔɔre seŋ, kyɛ Joosua da yel la a Izerayɛl bale ayopoĩ na nimiri yɛlɛ ko ba, a kyaare eŋtuo gyogo na baŋ da taa ka lɛ vɛŋ baŋ da ba te zɔɔ deɛ a teŋgane kyɛlee na ka o leɛ ba soobu. (Js 18:2, 3) Noba yaga mɔɔ la ba mɔɔbo zaa ka ba wuli ananso a bale ayopoĩ ŋa naŋ da taa a lɛ gyogo na. Baabole zannezanneba mine yeleeŋ ka aminekaŋaŋ, a bonsonne na ba naŋ da nyɛ saŋa na ba naŋ zɔɔrɔ ka ba deɛ a teŋgama so na ane lɛ a Keenan noba naŋ da ba iri zɔɔrɔ ne ba na, da vɛŋɛɛŋ ka a lɛ bale na noba da teɛre ka a ba seŋ ka ba kyerɛ ba menne ka ba deɛ a teŋgane naŋ kyɛre na ka o leɛ ba soobu. Aminekaŋaŋ ba da zoree ba dɔndɔnne naŋ e kpeɛne na dabeɛ̃, lɛŋ so baŋ da naara ka ba zɔɔ deɛ a teŋgane so. (Js 13:1-7) Teŋgane na baŋ da po ko ba na yoŋ baŋ da baŋ soŋ, ba da ba baŋ a Noɔre Emmo Teŋgane kyɛlee na soŋ.

NOVEMBER 8-14

BAABOLE POƆ YELNIMIZEERE | JOOSUA 20-22

“Yɛlɛ Teŋ Na Baŋ Zanne Yi Nɔkpeɛne Na Naŋ Da Be A Izerayɛl Biiri Kpakyagaŋ Na”

w06 4/15 5 wɛl. 3

Yɛlɛ Naŋ Na Toɔ̃ Soŋ Bo Ka Ho Ne Ho Kulta Tɔ Dire Dama

Ka teneeŋ maŋ yi te poɔ zaa ka te neŋ noba dire dama a na toɔ̃ vɛmeŋ ka zɔɔre ane nɔkpeɛne naŋ be te kpakyagaŋ na baare. Saŋa na a Izerayɛl biiri naŋ da gaa a Noɔre Emmo Teŋgane na, a Ruubeŋ bale, Gaad bale ane a Manaase bale na naŋ da be a Gyɔɔdan Koɔnbɔɔ sapare seŋ na da maalɛɛ “sareka irizie kaŋa naŋ e kpoŋ” a peɛle a Gyɔɔdan. A Izerayɛl bale naŋ kyɛre na da ba baŋ ananso ba naŋ e lɛ. Ba da teɛre ka ba yɔɔmine naŋ be a Gyɔɔdan sapare seŋ na zagrɛɛ Jehoova puoruu, azuŋ a Izerayɛl bale naŋ da be a Gyɔɔdan saniŋe seŋ na da sɛgrɛɛ ba menne ka ba te zɔɔ ne ba yɔɔmine ŋa ba naŋ teɛre ka ba e la “taawae” noba na zuŋ. Kyɛ sɛre baŋ na gaa ka ba ne ba te zɔɔ na, ba da toŋ la noba ka ba gaa ka ba neŋ a Izerayɛl bale naŋ be a Gyɔɔdan sapare seŋ na te di dama. Yɛlɛ na baŋ da e na da somaŋ yaga zaa! A yi ba dama diibu na poɔŋ, ba wa nyɛɛŋ ka ba da ba maale a sareka irizie ŋa ka ba ire sareka naŋ ba seŋ neŋ o zuŋ. Kyɛ, a Izerayɛl bale naŋ da be a Gyɔɔdan sapare seŋ na da zoree dabeɛ̃ ka, nendaare kaŋa ba yɔɔmine naŋ be a Gyɔɔdan saniŋe seŋ na na yelko baŋ ka: “Yɛ ba tare toɔri bee kyɛŋ Ba Tari Baahaa Daana Jehoova eŋɛŋ.” A lɛ sareka irizie ŋa na di la sieree a wuli ka ba meŋ da puoree Jehoova. (Joosua 22:10-29) Ba da boɔlee a sareka irizie ŋa ka Sieree, bonso a sareka irizie ŋa da di la sieree a ko ba ka Jehoova la a yelmeŋɛ Naaŋmen.​—Joosua 22:34, kaa a muni zie na.

w08 11/15 18 wɛl. 5

“Yɛ Pãã Vɛŋ Ka Te Boɔrɔ Yɛlɛ Naŋ Waana Ne Emmaaroŋ”

A Izerayɛl biiri mine da teɛre ka ba taa la sieree naŋ wuli ka ba yɔɔmine na toŋ la faa, azuŋ ba da teɛre ka, ka ba naŋ sɔgle te zɔɔ neŋ ba, ba koŋ ko noba yaga. Kyɛ ba da ba lonne te zɔɔ ne ba yɔɔmine naŋ be a Gyɔɔdan saniŋe seŋ na, ba da toŋ la noba ka ba gaa ba zie ka ba ne ba te di dama a kyaare yɛlɛ na ba naŋ e na. Ba da soore baŋ ka: “Bo limaŋkoŋ toma bee yelfaa la ŋa yɛŋ toŋ Izerayɛl Naaŋmen na eŋɛŋ? Yɛ leɛ la zenɛ a ba tuuro Ba Tari Baahaa Daana Jehoova?” A Izerayɛl bale na naŋ maale a sareka irizie na da ba zagre Jehoova puoruu. Kyɛ wala baŋ na e a kyaare a yɛlɛ ŋa baŋ yel dɔgle ba na? Ka lɛ ba suuri na iri la ba yɔɔmine na zuŋ bee ba na zagreŋ ka ba ne ba di dama bee? A Izerayɛl biiri naŋ da maale a sareka irizie na da yi la sumaaroŋ poɔŋ, a wuli ka ba maalɛɛ a sareka irizie ba naŋ boɔrɔ ka ba puore Jehoova zuŋ. Lɛ na baŋ da yi sumaaroŋ poɔŋ a iri a noɔre na da vɛŋɛɛŋ ka ba neŋ Naaŋmen niiloŋ maaleŋ e kpeɛŋaa, a kyɛ da faa ba nyɔvoɛ meŋ. Lɛ meŋ da lɛ vɛŋɛɛŋ baŋ maale a yɛlɛ a kyɛ vɛŋ ka emmaaroŋ be ba kpakyagaŋ.​—Joos. 22:13-34.

Baabole Poɔ Yelsonne

it-1 402 wɛl. 3

Keenan

Aneazaa ka a Izerayɛl biiri da sãã la a Keenan noba yaga zie zaa saŋa na baŋ da zɔɔrɔ ka ba deɛ a teŋgane so na, a Keenan noba naŋ da kyɛre na meŋ da zagrɛɛŋ ka ba sigri ba menne ko a Izerayɛl biiri. Kyɛ a Baabole naŋ yeleeŋ ka “Ba Tari Baahaa Daana Jehoova daaŋ ko la Izerayɛl a paalonne zaa oŋ daaŋ pɔ ka o na ko la ba sããkommine na. A Baabole da lɛ yel poɔ yɛŋ ka, Jehoova da ko baŋ “pɛnnoo wa gyili,” a kyɛ lɛ yelka “yelsonne na zaa Ba Tari Baahaa Daana Jehoova aŋ daaŋ eŋ noɔre ko Izerayɛl na; a zaaŋ paale.” (Js 21:43-45) Dabeɛ̃ da kpɛ la a Izerayɛl dɔndɔnne naŋ da ŋmaa ba gyeere na, lɛ zuŋ a Izerayɛl biiri da taa la zeŋ laafeɛ. Naaŋmen da yelko baŋ ka, o na karɛɛ a Keenan noba bare “beɛla beɛla” ka lɛ naane a teŋgane na gaŋ la kpale lɛ ka wɛdunni wa paale o zaa. (Yi 23:29, 30; Du 7:22) Aneazaa ka a Keenan noba da taa la zɔɔzɔɔ boma naŋ e zɔɔre torikori naŋ taa soore, kyɛ ka a Izerayɛl biiriŋ da ba toɔ̃ zɔɔ deɛ a Keenan teŋgane na lombori kaŋa ka o leɛ ba soobu, lɛ da ba wuli ka Jehoova ba paale o noɔre na o naŋ da eŋ na. (Js 17:16-18; Sar 4:13) Kyɛ, a Baabole wuleeŋ ka, ka a Izerayɛl biiriŋ wa e tokpeɛne kyaare Jehoova a kyɛ gaa zɔɔre ba dɔndɔnne da maŋ te zɔɔtoɔ̃ baŋ.​—So 14:44, 45; Js 7:1-12.

NOVEMBER 15-21

BAABOLE POƆ YELNIMIZEERE | JOOSUA 23-24

“Joosua Yelyaga Baaraa O Naŋ Da Yelko A Izerayɛl Biiri”

it-1 75

Paalonne Naŋ Laŋnoɔre

Yelkaŋa meŋ da lɛ piili erɛŋ saŋa na a Izerayɛl biiri naŋ da gaa Keenan, a Noɔre Emmo Teŋgane na. A Boma Zaa Naaŋmen da paalɛɛ o noɔre na o naŋ da eŋ ko a Izerayɛl biiri sããkommine na, saŋa na oŋ da de a teŋgane ko ba na. Azuŋ, a Izerayɛl biiri da ba e saamma a teŋganeŋ. Jehoova da kpããŋ baŋ ka ba ta wa de ba menne te laŋna a paalonne noba naŋ da be a Keenan teŋganeŋ a ba puoruu na eŋɛŋ. (Yi 23:31-33; 34:11-16) Naaŋmen bege ane o sowuli yoŋ aŋ da seŋ ka ba tuuro, a da ba seŋ ka ba tuuro a paalonne naŋ seŋ ka ba kare bare na bege bee sowuli. (Lv 18:3, 4; 20:22-24) Jehoova da kpãã baŋ nimizeɛ̃ ka, ba ta wa vɛna ka ba neŋ a paalonne noba kulo taa. Ka ba neŋ a paalonne nobaŋ wa kultaa, ba na de la pɔgeba naŋ ba puoro Jehoova, a taa deɛŋ-mine meŋ naŋ ba puoro Jehoova, a kyɛ lɛ tuuro ba zirii puoruu yel-eere ane ba lasiri yɛlɛ na meŋ. Ka ba naŋ e lɛ, a na leɛ la kyɛbaa ko ba ka lɛ vɛŋ ka ba bare Jehoova puoruu.​—Du 7:2-4; Yi 34:16; Js 23:12, 13.

w07 11/1 26 wɛl. 19-20

Jehoova Yelbiri Daaŋ Koŋ Le Teŋɛ Zaa

¹⁹ Yelmeŋɛ la, yɛlɛ na zaa te menne naŋ de te nimie nyɛ na, te na baŋ yeleŋ ka: “Yelsonne na zaa Ba Tari Baahaa Daana Jehoova yɛ Naaŋmen naŋ yel yɛ yɛlɛ na, yelyenaa zaa ba le. A zaaŋ wa paale ko yɛ. Yelbiri bonyenaa zaa ba le.” (Joosua 23:14) Jehoova na faa la o puorebiiri, a go ba a kyɛ kaara ba yelfɛree zaa zieŋ meŋ. Ka lɛ ho na toɔ̃ wulee noɔre kaŋa Naaŋmen naŋ eŋ aŋ ba nyɛ eebo wagre naŋ seŋ poɔŋ bee? Lɛ daaŋ koŋ baŋ e zaa. Azuŋ, yɛŋ bebeŋ ka te dɛle Naaŋmen Yelbiri na kpɛlɛŋkpɛlɛŋ.

²⁰ Ka nendaare kaŋa meŋ? Jehoova yelko teŋ ka, o na leɛrɛɛ a teŋgane zaa Paradiisi a ko noba naŋ taa teɛretɔ ka ba zeŋ a teŋɛzu kyɛ tegitegilɛ na. Noba fẽẽ lɛ la taa teɛretɔ ka ba te poɔ Krista eŋɛŋ ka ba ne o di naaloŋ sazuŋ. Teɛretɔ zaa te naŋ taa, kyɛ te naŋ taa la ananso a naŋ seŋ ka te naŋ dire yelmennoŋ aŋa Joosua. Bebiri kaŋa waanaŋ ka te teɛretɔ na zaa na nyɛ eebo. Ka lɛŋ wa e, te na leɛ kaa la puore a nyɛ lɛ Jehoova nɔ-ennee na zaa naŋ nyɛ eebo na, ka lɛ vɛŋ ka te meŋ yelka: “A zaaŋ wa paale.”

Baabole Poɔ Yelsonne

w04 12/1 12 wɛl. 1

Yelnimizeere Naŋ Be A Joosua Gane Poɔ

24:2​—Ka lɛ Aboraham saa Tera da puoree baga bee? A piilee saŋa na, Tera da ba puoro Jehoova Naaŋmen. Aminekaŋaŋ o da puoree a kyuu ŋmene na a Ur noba kpɛŋ zie zaa naŋ da puoro baŋ boɔlɔ Sin na. A Gyuu noba sããkommine yɛlɛ wuleeŋ ka, Tera gba da pɛnnɛɛ baga. Kyɛ saŋa na Naaŋmen naŋ da ko Aboraham noɔre ka o yi Ur na, Tera da poɔ la o eŋɛŋ ka o ne o gaa Haran.​—Munpiilee 11:31.

NOVEMBER 22-28

BAABOLE POƆ YELNIMIZEERE | SARINGMAARIBA 1-3

“Ehud Yɛlɛ Na Wulo Teŋ Nyaa Taabo Ane Lɛ Teŋ Na Erɛ Te Yɛlɛ Nyaammo Soriŋ”

w04 3/15 31 wɛl. 3

Ehud Da Zɔɔtoɔ̃ La A Izerayɛl Biiri Dɔndɔnne Na

Yelzaa Ehud naŋ da e da nyɛ la maaloo, a ba e ŋa oŋ da baŋ nyaammo zuŋ la, bee ba dɔndɔnne naŋ da ba nare ba menne zuŋ la. Ka Jehoova boɔbo la ka yelkaŋa nyɛ eebo, nensaalaa zaa kyebe a na baŋ pigi o sori. Naaŋmen da arɛɛ Ehud puoreŋ saŋa na oŋ zɔɔrɔ ka o faa O noba na, a lɛ zuŋ ka yelzaa Ehud naŋ da e da nyɛ maaloo. Naaŋmen la da iri Ehud, “ka Jehoova Ba Tari Baahaa Daanaŋ wa iri sɛreŋmaareba ko [o noba] zaa, O maŋ be la a sɛreŋmaara seŋ.”​—Saringmaariba 2:18; 3:15.

w04 3/15 30 wɛl. 1-3

Ehud Da Zɔɔtoɔ̃ La A Izerayɛl Biiri Dɔndɔnne Na

Yɛlɛ Ehud naŋ da e fɔrɔ la ka, o maale “soɔ kaŋa”​—o da e la zɔɔzɔɔ-sɔnɔkpara naŋ da e ŋmaa, oŋ maŋ de sɔgle o bonsuurii poɔŋ. Aminekaŋaŋ o da baŋɛɛŋ ka ba na kaa la o eŋɛ a boɔrɔ ka ba nyɛ bon naŋ sɔgle o bonsuurii poɔŋ. Ka neɛŋ e nuduloŋ soba o maŋ de la o zɔɔzɔɔ soɔ na lere o lombogɔɔŋ, ka lɛ na vɛŋ ka o maŋ toɔ̃ iri o wieoŋ a zɔɔ. Kyɛ Ehud da e la gɔɔbaa. Azuŋ, o da de la o zɔɔzɔɔ soɔ na sɔgle “o duri gbɛkpomiŋ o kparoo poɔŋ,” aminekaŋaŋ a naa sogyare na da ba kaa o lomboduloŋ seŋ na. Yelzaa da ba pigi o sori saŋa na, “oŋ daaŋ de a kyeɛroo a te ko Moo-ab naa Eegiloŋ” na.​—Saringmaariba 3:16, 17.

Saŋa na baŋ da gaa Eegiloŋ zie na a Baabole ba wuli yɛlɛ naŋ da e a piilee saŋa na. A Baabole yelka: “Oŋ daaŋ wa tere a kyeɛroo baare, oŋ bare bana na aŋ daaŋ tuo a kyeɛroo na.” (Saringmaariba 3:18) Ehud da de la a kyeɛroo ko a naa, a kyɛ leɛ beɛle noba naŋ da poɔ o eŋɛŋ baŋ de a kyeɛroo wa ko Eegiloŋ na a gaaneŋ tɔɔre zaa, a pãã da bare ba beŋ kyɛ leɛ gaa Eegiloŋ zie. Ananso la wala? Ka lɛ oŋ da boɔrɔ ka ba go o zuŋ oŋ da vɛŋ baŋ poɔ o eŋɛŋ bee, kyɛbee sowuli kaŋa ture la oŋ da tuuro, bee o ture da boɔrɔŋ ka ba somoo a de a kyeɛroo te ko a naa? Kyɛbee o da ba boɔrɔ ka ba bebe saŋa na o naŋ da boɔrɔ ka o e yɛlɛ na o naŋ maale o teɛroŋ ka o e na? Lɛ zaa o naŋ da teɛrɛ, Ehud da de la nyaa a leɛ gaa a naa zie.

Ka “[Ehud] leɛ Giiligal zie na baŋ de kubo maale bagre na a wa a naa seŋ. Oŋ yeli: ‘Oo naa, N taa la duoro naŋ e gondo bee duoro neɛzaa naŋ ba seŋ ka o womaa a na ko bo.’” A Baabole ba wuli lɛ na Ehud naŋ e te kpɛ a naa die na. Ka lɛ a da ba seŋ ka a naa sogyare na da teɛre ka o na baŋ e la ba naa na yelfaa kaŋa bee? Kyɛbee ba da teɛre ka a Izerayɛl dɔɔ ŋa yoŋ koŋ baŋ e ba naa na yelzaa? Kyɛbee Ehud yoŋ naŋ da wa na, ba da teɛre ka o da waanaŋ ka o iri o noba na tere? Lɛ zaa naŋ la, Ehud da yeleeŋ ka o boɔrɔŋ ka o ne a naa yoŋ yel yɛlɛ, azuŋ ba da ko oŋ sori ka o ne a naa yoŋ yel yɛlɛ.​—Saringmaariba 3:19.

Baabole Poɔ Yelsonne

w05 1/15 24 wɛl. 7

Yelnimizeere Naŋ Be A Sɛreŋmaareba Gane Poɔ

2:10-12. Aseŋ ka te sɛgre te wagre soŋ ka lɛ vɛŋ ka te toɔ̃ zanna a Baabole bebiri zaa, ka teneeŋ e lɛ, a na vɛmeŋ ka te ‘ta inni Jehoova toma.’ (Yieme 103:2) Bidɔgreba meŋ seŋ ka ba de yelmenne naŋ be Naaŋmen Yelbiri na poɔ wulo ba biiri ka a kpɛ ba sukyie soŋ.​—Duturoonomi 6:6-9.

NOVEMBER 29–DECEMBER 5

BAABOLE POƆ YELNIMIZEERE | SARINGMAARIBA 4-5

“Jehoova Da Tu La Pɔgeba Bayi Eŋɛŋ A Kyɛ Faa O Noba”

w15 8/1 13 wɛl. 1

“Maaŋ Iri Aŋa Biiri Ma Izerayɛl Poɔŋ”

Siisera! Ka a Izerayɛl biiriŋ wa woŋ a yuori ŋa dabeɛ̃ da maŋ kpɛ baŋ yaga zaa. A Keenan noba na ŋmenpuore yɛlɛ ane ba lasiri yɛlɛ da ba soma fẽẽ zaa. Ba da maŋ de la ba biiri ire sareka korɔ baga a kyɛ da maŋ tonɔ peɛ̃mo toma ba ŋmenpuorederi na poɔŋ. Wala ka zemmo da waa ko a Izerayɛl biiri saŋa na Siisera ane o sogyare naŋ da kaara a paaloŋ na? Deebora yieloŋ na wuleeŋ ka, a da e la kpeɛŋaa ka neɛ kyɛŋ sori gaa zie kaŋa, a da ba e mɔlɔ ko a Izerayɛl biiri ka ba kpeɛrɛ a teŋbilii poɔ. (Saringmaariba 5:6, 7) Hooŋ leɛ ŋmaa foto ho zuŋ a nyɛ noba dabeɛ̃ naŋ kpɛ ka lɛ vɛŋ baŋ sɔglɔ ba menne daare poɔŋ ane tanbilii poɔŋ, dabeɛ̃ gba da erɛɛ a Izerayɛl biiri ka ba kɔ boma bee ka ba kpeɛrɛ teŋbilii naŋ ba taa daŋkyime naŋ ŋmaa gyeeraa. Ba da zoree dabeɛ̃ ka ba kyɛŋ sori naŋ be zi-gbaŋgbaleŋ, ka lɛ naane a Keenan noba na wa zɔɔ ne baŋ, a nyɔge ba biiri a kyɛ fere gaŋ neŋ ba pɔgeba.

w15 8/1 13 wɛl. 2

“Maaŋ Iri Aŋa Biiri Ma Izerayɛl Poɔŋ”

A Keenan noba da dɔgrɛɛ a Izerayɛl biiri yuomo lezare, a te ta saŋa na Jehoova naŋ nyɛ sieree naŋ wuli ka o koŋwoŋwuluu noba na e la siri ka ba leɛre ba eebo, bee aŋa lɛ yieloŋ na Deebora ane Baarak naŋ da yieli naŋ yelka, “A baarɛɛŋ a waana wagre na maaŋ Deebora aŋ iri, maaŋ iri aŋa biiri ma Izerayɛl poɔŋ.” Te ba baŋ baare ka Laapidot pɔge Deebora da taa la biiri bee ka o da ba taa biiri, kyɛ a lɛ yelbie na da are ko la yelkaŋa. A da are ko la lɛ na Jehoova naŋ da iri Deebora ka o go a Izerayɛl paaloŋ aŋa lɛ biiri ma naŋ maŋ go o biiri na. Jehoova da yelko la Deebora ka, o kaa iri dɔɔ kaŋa naŋ taa sagediibu yaga ba naŋ boɔlɔ Sɛreŋmaara Baarak, a ko o sowuli ka o nare o meŋɛ te zɔɔ neŋ Siisera.​—Saringmaariba 4:3, 6, 7; 5:7.

w15 8/1 15 wɛl. 2

“Maaŋ Iri Aŋa Biiri Ma Izerayɛl Poɔŋ”

Jee-yel da seŋ ka o e yelkaŋa wieoŋ. O da ko la Siisera zie oŋ gaŋ. Beŋ la ka Siisera da yelko o ka, ka neɛzaaŋ wa soorɔ o yɛlɛ, o yelko o soba ka o ba kyebe. Jee-yel da de la tama pɔge Siisera, saŋa na Siisera naŋ yelka o ko o koɔ̃ ka o nyu na, Jee-yel da ko oŋ beroŋ oŋ nyu. A da ba kɔɔre kyɛ ka Siisera da faa gbiri gaa tɔɔre. Jee-yel pãã da de la tontoŋ boma mine pɔgeba naŋ kpeɛrɛ tɛnt poɔ naŋ da maŋ de tonɔ neŋ toma​—a tɛnt pinbiri ane hama. O da te dɔɔ peɛlɛɛ Siisera zu seŋ na, pampana ŋa aseŋ ka o toŋ toŋkpɛŋ naŋ la ka o are Jehoova gbɛbɔgreŋ a kyɛ ko a dɔɔ ŋa. Ka o naŋ ba e yelzaa soŋ bee ka o naŋ naara, a na baŋ de la saammo waneŋ o eŋɛŋ. Ka lɛ o teɛrɛɛ Naaŋmen noba na yɛlɛ ane lɛ a dɔɔ ŋa naŋ dɔgrɔ ba a yuomo ŋa zaa poɔŋ na bee? Bee o da teɛrɛɛ apoɔsori na o naŋ nyɛ ka o are Jehoova puoreŋ na? A Baabole ba wuli a yɛlɛ zaa te baare. Kyɛ te baŋɛɛŋ ka o da e la yɛlɛ na o naŋ boɔrɔ ka o e na. O da ŋmɛɛ Siisera ko!​—Saringmaariba 4:18-21; 5:24-27.

Baabole Poɔ Yelsonne

w05 1/15 25 wɛl. 5

Yelnimizeere Naŋ Be A Sɛreŋmaareba Gane Poɔ

5:20​—Sobuo ka a ŋmarbie naŋ da be sazuŋ na da are Baarak gbɛbɔgreŋ kyɛ zɔɔrɔ? A Baabole ba wuli ka malekere la da soŋ Baarak a zɔɔre poɔŋ, bee ka lɛ na baŋ da tu a ŋmarbie eŋɛŋ a kyɛ bugi ba baga na la ka Siisera dɔbɔ naŋ e yɛŋbanneba na da ba baŋ a tɛgɛ te baare, bee lɛ baŋ da teɛre ka a ŋmarbie wuleeŋ ka lɛŋ na e na da ba nyɛ eebo. Kyɛ, nɔkpeɛne zaa kyebe ka Jehoova la da soŋ a Izerayɛl biiri baŋ zɔɔtoɔ̃ Siisera.

DECEMBER 6-12

BAABOLE POƆ YELNIMIZEERE | SARINGMAARIBA 6-7

“Gaa Neŋ A Kpeɛ̃o Ŋa”

w02 2/15 6-7

A Baabole Sowuli Na Toɔ̃ Soŋ Boŋ

Neɛ kaŋa naŋ da taa teɛroŋ naŋ soma a kyaare o meŋɛ a kyɛ ba zɛgrɛ o meŋɛ la Giidioŋ. O da e la a takoreŋ saŋa Izerayɛl sɛreŋmaareba na kaŋa. O da ba boɔrɔ ka o e a Izerayɛl biiri wedeɛrɛ kaŋa. Azuŋ, saŋa na baŋ da wa iruu ka o deɛ a Izerayɛl biiri weɛ na, Giidioŋ da yeleeŋ ka o ba seŋ neŋ a lɛ toma na. O da yelka “Nyɛ, N zaga la noba naŋ e nembaalba yaga Manaase booree poɔŋ. Maaŋ meŋ la neɛ naŋ ba e bonzaa N ba deoŋ.”​—Saringmaariba 6:12-16.

w05 7/15 16 wɛl. 3

“Jehoova Ane Giidioŋ Takobi Bee Zɔɔzɔɔ Soɔ!”

Nyɛ dabeɛ̃ naŋ da kpɛ a Miidiya noba seŋ lɛ! A tɔntɔbaalɛ, ka a dɔbɔ kɔɔraata na da piili ŋmara ba koɔndɔgre a peɛlɛ ba iilɛ na a kyɛ gɔnɔ yaga zaa. Dabeɛ̃ da kpɛ la a Miidiya noba baŋ da piili ŋmeɛrɛ kpɛlli, saŋa na baŋ da woŋ a Izerayɛl noba naŋ da gɔnɔ a kyɛ yele ka “Jehoova ane Giidioŋ takobi bee zɔɔzɔɔ soɔ” na. Ba naŋ da be buroŋburoŋ poɔŋ na zuŋ, ba da ba lɛ baŋ ba zɔmeŋa ane ba dɔmɔ taaŋ. A dɔbɔ kɔɔraata ŋa da are la ba areziiriŋ a kyɛ nyɛ lɛ Naaŋmen naŋ da vɛŋ ka ba dɔndɔnne ŋa leɛ koorɔ taa. Dabeɛ̃ da kpɛ la a Miidiya noba ka lɛ vɛŋ baŋ zaa zo yaare, kyɛ ka a Izerayɛl noba da moɔ̃ nimiri zo nyɔge ba a ko ba. Lɛ da vɛŋɛɛŋ ka lɛ na a Miidiya noba naŋ da dɔgrɔ ba a kyɛ koorɔ ba na zaa baare.​—Saringmaariba 7:19-25; 8:10-12, 28.

Baabole Poɔ Yelsonne

w05 1/15 26 wɛl. 6

Yelnimizeere Naŋ Be A Sɛreŋmaareba Gane Poɔ

6:25-27. Giidioŋ da de la yɛŋ toŋ neŋ toma ka lɛ vɛŋ oŋ da ba e yɛlɛ naŋ na vɛŋ ka o saa yideme na suuri iri weɛ lɛ. Ka teneeŋ wa moɔlɔ a duorisoŋ, aseŋ ka te maŋ kaara soŋ a ta vɛŋ ka te yelyaga dɔnnɔ noba suuri weɛ lɛ.

DECEMBER 13-19

BAABOLE POƆ YELNIMIZEERE | SARINGMAARIBA 8-9

“Sigrimeŋɛŋ Somaŋ Yaga Gaŋ Zɛgemeŋɛ”

w00 8/15 25 wɛl. 3

Wala Hoŋ Maŋ E Sɛgre Nɔkpeɛne Ho Ne Noba Naŋ Taa?

Saŋa na Giidioŋ neŋ a Miidiya noba naŋ da zɔɔrɔ na, o da toŋboɔlɛɛ a Iifiriam bale na ka ba wa somoo. Kyɛ, saŋa na a zɔɔre naŋ da wa baare na, a Iifiriam noba da de la sutuloŋ a gaa Giidioŋ zie a te yelka, ananso la wala oŋ ba daŋ boɔle ba a piilee saŋa na ka ba wa somoo zɔɔ neŋ a Miidiya noba? A Baabole yelka “baŋ mĩĩ emoo yaga zaa.” Giidioŋ da iree a noɔre ko ba ka: “Yɛlɛ na maŋ e ane yɛlɛ yɛŋ e na toɔ̃ mannɛɛ taa? Girepihi na baŋ maŋ inni Iifiriam paaloŋ na seɛ la girepihi na Abiezer naŋ maŋ kyɛ na. Yɛ nuureŋ ka Naaŋmen de Miidiya sogyare wedeɛreba Oreb ane Zeeb eŋ. Bo maŋ na toɔ̃ e seŋ lɛ ŋa yɛŋ e ŋa?” (Saringmaariba 8:1-3) Giidioŋ da yelee yɛlɛ naŋ soma a kyɛ maana sukyiri ko ba. Lɛ na Giidioŋ naŋ da e na da wanɛɛ emmaaroŋ ba kpakyagaŋ. A waa ŋa a Iifiriam bale na noba da de la ba menne tegroŋ yaga a kyɛ zɛgrɛ ba menne meŋ. Kyɛ, lɛ da ba pigi Giidioŋ sori ka o mɔɔ kyɛ vɛŋ ka emmaaroŋ be ba kpakyagaŋ. Ka lɛ te meŋ na toɔ̃ eɛ lɛ bee?

w17.01 20 wɛl. 15

Ananso A Naŋ Fɛre Ka Te Baŋ Te E Ta Zie

¹⁵ Giidioŋ e la ewuli soŋ a kyaare neɛ naŋ baŋ o e ta zie. Saŋa na Jehoova maleke naŋ da iri o meŋɛ wuluu a dɛndɛŋ saŋa na, Giidioŋ da yeleeŋ ka, o e la nembaala a kyɛ ba taa arezie zaa meŋ. (Sar. 6:15) Kyɛ saŋa na oŋ da wa sage toma na Jehoova naŋ ko o ka o toŋ na, Giidioŋ da mɔɔ la o mɔɔbo zaa ka o baŋ yɛlɛ na Jehoova naŋ boɔrɔ ka o e, a kyɛ dɛle Jehoova meŋ ka o ko o sowuli ka o toɔ̃ e lɛ. (Sar. 6:36-40) Giidioŋ da taa la sukyirikpagu ane nyaa. Kyɛ, o da maŋ erɛɛ yɛlɛ yɛŋ ane nyaammo soriŋ. (Sar. 6:11, 27) O da ba maŋ de o arezie na boɔrɔ yuori meŋ. Kyɛ, ka o naŋ wa e yɛlɛ naŋ seŋ ka o e na baare, o da maŋ leɛ gaa la zie na o naŋ yi na.​—Sar. 8:22, 23, 29.

w08 2/15 9 wɛl. 9

Kyɛnɛ Jehoova Soriŋ

⁹ Ka te naŋ boɔrɔ ka te e Naaŋmen zɔmenne, aseŋ ka te “sigri te menne te teɛroŋ poɔŋ.” (1 Pit. 3:8; Yiem. 138:6) Saringmaariba zuri 9 wuli teŋ ananso a naŋ fɛre ka te sigri te menne. Giidioŋ bidɔɔ Jootam da yeleeŋ ka: “Teereŋ daaŋ yi ka a te boɔ kãã waari Naa a bimoo.” O da boɔlɛɛ a ooliv teɛ, a kaŋkaŋ teɛ, ane a girep teɛ na yoɛ. A teere ŋa are ko la noba naŋ da ba zɛgrɛ ba menne ka ba di naaloŋ a Izerayɛl biiri zuŋ. Kyɛ a goɔ teɛ na yɛŋ, vũũ yoŋ baŋ da maŋ de o nyegi. O are ko la Abiimelek naŋ da zɛgrɛ o meŋɛ, a kyɛ boɔrɔ ka o di naaloŋ o taaba zuŋ ka lɛ vɛŋ oŋ da ko noba mine na. Aneazaa ka o ‘da de la yuomo ata di naaloŋ a Izerayɛl biiri zuŋ,’ kyɛ a baaraa zaa o da kɔŋ la o nyɔvore. (Sar. 9:8-15, 22, 50-54) Nyɛ lɛ a naŋ soma yaga zaa ka te “sigri te menne te teɛroŋ poɔŋ”!

Baabole Poɔ Yelsonne

it-1 753 wɛl. 1

Iifod, I

Giidioŋ da taa la poteɛresoŋ saŋa na oŋ da maale a Iifod na, o da maalɛɛ a iifod ka o maŋ leɛteɛroo lɛ na Jehoova naŋ somoo oŋ zɔɔ faa a Izerayɛl biiri, a kyɛ lɛ vɛŋ oŋ de gyeremɛ korɔ Jehoova meŋ. Kyɛ ka a iifod “daaŋ leɛ kyɛbaa a ko Giidioŋ ane o deo noba,” bonso a Izerayɛl biiri da bare la Jehoova puoruu a kyɛ te puoro a iifod. (Sar 8:27) Kyɛ, a Baabole ba wuli ka Giidioŋ meŋɛ da puoree a iifod; kyɛ a yɛlɛ soŋ zie la ka, bitontona Pɔɔl da boɔlɛɛ Giidioŋ yuori poɔ a ‘dansediribe yaga’ naŋ da e Jehoova sieree deme sɛre ka a Kristabiiri saŋa na ta.​—Hi 11:32; 12:1.

DECEMBER 20-26

BAABOLE POƆ YELNIMIZEERE | SARINGMAARIBA 10-12

“Jeefita Da E La Dɔɔ Naŋ Taa Sagediibu Yaga”

w16.04 7 wɛl. 9

Ka Teneeŋ Dire Yelmennoŋ Korɔ Naaŋmen O Na Maale Teŋ

⁹ Noba mine ewuli sonne na da soŋɛɛ Jeefita yaga zaa, aŋa lɛ Joosef naŋ da zo o yɔɔmine nembaaloŋ na​—aneazaa ka ba da “ha oŋ”. (Mun. 37:4; 45:4, 5) Jeefita naŋ da leɛteɛre a noba ŋa ewuli sonne na da somooŋ oŋ e yɛlɛ naŋ pɛlɛ Jehoova poɔ. Yelmeŋɛ la, yɛlɛ na o yɔɔmine naŋ da e o na da kpɛ oŋ yaga zaa, kyɛ lɛ da ba vɛŋ oŋ bare Jehoova puoruu bee oŋ ba lɛ tonɔ korɔ Jehoova noba. (Sar. 11:9) Jeefita naŋ na zɔɔtoɔ̃ a vɛŋ ka Jehoova yuori pɛgeyi naŋ da e nimizeɛ ko o a gaŋ nɔkpeɛne zaa o ne noba naŋ taa. O da e la siri ka o na dire la yelmennoŋ korɔ Jehoova, a lɛ eebo da de la maaloo wa ko o ane o taaba.​—Hib. 11:32, 33.

it-2 27 wɛl. 2

Jeefita

Jeefita da ba naare, o da narɛɛ o meŋɛ wieoŋ a deɛ a Izerayɛl biiri weɛ. O da toŋ la noba baŋ gaa Aamoŋ naa zie, o da vɛŋɛɛŋ ka Aamoŋ naa baŋ ka a Aamoŋ noba ba taa sori zaa ka ba wa deɛ a Izerayɛl noba teŋgane na so. A Aamoŋ naa da leɛ yeleeŋ ka a Izerayɛl biiri la wa deɛ a teŋgane yi a Aamoŋ noba nuureŋ. (Sar 11:12, 13) A zie ŋaŋ, Jeefita da wuleeŋ ka o ba e neɛ naŋ taa faŋa yoŋ, bee a e zɔɔzɔɔrɔ naŋ ba baŋ yɛlɛ nimiri, kyɛ o da wuleeŋ ka o baŋ la a Izerayɛl biiri takoroŋ yɛlɛ ane lɛ Naaŋmen neŋ o noba naŋ laŋ e yɛlɛ saŋa kaŋa naŋ pare. Azuŋ, o da ba sage a Aamoŋ noba yɛlɛ na, kyɛ o da yelko baŋ ka (1) a Izerayɛl noba da ba zɔɔ neŋ a Aamoŋ, Mooab, bee Iidom noba na (Sar 11:14-18; Du 2:9, 19, 37; 2Tu 20:10, 11); (2) a Aamoŋ noba da ba kye a lɛ teŋgane na poɔŋ saŋa na a Izerayɛl noba naŋ da zɔɔ deɛ a teŋgane so na, bonso a teŋgane da e la Aamor noba soobu kyɛ ka Naaŋmen da de ba naa Saihoŋ a eŋ a Izerayɛl biiri nuureŋ baŋ zɔɔtoɔ̃ ba; (3) a Izerayɛl biiri da kpeɛrɛɛ a lɛ teŋgane na yuomo kɔɔraata sɛre ka a Aamoŋ noba wa yelka ba teŋgane la; azuŋ, pampana ŋa, bo yɛlɛŋ wuli ka banaŋ so a lɛ teŋgane na?​—Sar 11:19-27.

it-2 27 wɛl. 3

Jeefita

Jeefita da baŋɛɛŋ ka ŋmenpuore yɛlɛ da la yelnimizeɛ naŋ da be a yɛlɛ poɔŋ. O da yeleeŋ ka, Jehoova Naaŋmen la ko ba a teŋgane, a lɛ zuŋ ba koŋ de a teŋgane fẽẽ gba a ko noba naŋ puoro zirii ŋmene kaŋa. O da lɛ yeleeŋ ka Kiimos la a Aamoŋ noba ŋmene. Noba mine yelka a yɛlɛ ŋa ba e yelmeŋɛ. Kyɛ, aneazaa ka a Aamoŋ noba ŋmene da la Miilikom, kyɛ ka Mooab noba ŋmene da e Kiimos. Kyɛ a paalonne ŋa da puoree ŋmema yaga. Soolomoŋ meŋ naŋ da de pɔge saamma na da vɛŋɛɛŋ oŋ toŋfaa saŋa na oŋ da de Kiimos puoruu a waneŋ a Izerayɛl paaloŋ. (Sar 11:24; 1Nm 11:1, 7, 8, 33; 2Nm 23:13) Gaŋbanneba mine yeleeŋ ka “Kiimos” tɛgɛ la “neɛ naŋ so kpeɛ̃o bee neɛ naŋ zɔɔtoɔ̃.” (Kaa Gesenius’s Hebrew and Chaldee Lexicon gane na, S. Tregelles la leɛroo eŋ kɔkɔ yuoŋ, 1901, p. 401.) Jeefita da boɔrɔŋ ka o wuli ka a Aamoŋ noba da de la kpeɛ̃o korɔ ba ŋmene na, ba naŋ toɔ̃ di ‘kpeɛ̃o’ noba zuŋ bee a ‘zɔɔtoɔ̃’ ba a deɛ ba teŋgama na zuŋ.

Baabole Poɔ Yelsonne

it-2 26

Jeefita

Jeefita Da Ba E Sɛnsɛnbie. Jeefita ma da e la “pɔge-gyɛnterɛ bee pɔge sɛnsɛnɛ,” kyɛ lɛ ba wuli ka sɛnsɛŋ poɔŋ oŋ da dɔge Jeefita bee Jeefita da e la sɛnsɛnbie. O ma da e la sɛnsɛnɛ sɛre ka Giilied wa de o oŋ e o pɔgebile, aŋa lɛ Reehab naŋ da e sɛnsɛnɛ sɛre kyɛ wa kuli Salmɔn na. (Sar 11:1; Js 2:1; Mt 1:5) Yelkaŋa naŋ lɛ vɛŋ teŋ baŋ ka Jeefita da ba e sɛnsɛnbie la ka, o makpoŋ biiri na da kare oŋ bare bonso ba da ba boɔrɔ ka ba ne o po ba kyɛŋ na. (Sar 11:2) Ane meŋ, a puoreŋ Jeefita da wa leɛ la a Giilied noba wedeɛrɛ (o makpoŋ biiri na meŋ da poɔ la a Giilied noba poɔŋ). (Sar 11:11) Jeefita da maŋ te iree sareka ko Naaŋmen a ŋmenpuoredieŋ. (Sar 11:30, 31) Ka o naŋ da e sɛnsɛnbie, o da koŋ baŋ e a yɛlɛ ŋa zaa. Bonso a Bege da wuleeŋ ka: “Neɛ ŋa naŋ e sɛnsɛnbie ta wa kpeɛrɛ Ba Tari Baahaa Daana Jehoova lammo na. Haali a gɛrɛ a gyɛmane pie daana eŋɛŋ gba kyɛ o booree kaŋa zaa ta wa kpeɛrɛ Ba Tari Baahaa Daana Jehoova lammo na.”​—Du 23:2.

DECEMBER 27–JANUARY 2

BAABOLE POƆ YELNIMIZEERE | SARINGMAARIBA 13-14

“Yɛlɛ Bidɔgreba Naŋ Na Baŋ Zanne Yi Manoowa Ane O Pɔge Zie”

w13 8/15 16 wɛl. 1

Bidɔgreba​—Yɛ Wulo Yɛ Biiri Saŋa Na Baŋ Naŋ E Bileeri

Hooŋ leɛ nyɛ dɔɔ kaŋa naŋ da be Daan bale na poɔŋ baŋ boɔlɔ Manoowa zemmo yɛlɛ na soŋ. O da kpeɛrɛɛ a takoreŋ saŋa Izerayɛl teŋkpɛŋ na baŋ da boɔlɔ ka Zoora na. Jehoova maleke da wa yelko la Manoowa pɔge-ɔɔ na ka o na taa la poɔ a dɔge bidɔɔ. (Sar. 13:2, 3) Manoowa ane o pɔge poɔ zaaŋ da pɛle neŋ a yɛlɛ ŋa. Kyɛ, yelnimizeere mine da ferebaŋ yaga zaa. Azuŋ Manoowa da puore sɔrɛɛŋ ka: “Oo N Daana Jehoova, N sɔrɔ boŋ, vɛŋ ka a Naaŋmen toŋtona na hoŋ toŋ na la wa te zie. Vɛŋ ka o wuli te lɛ na teŋ na e a bie ŋa teŋ na dɔge ŋa.” (Sar. 13:8) Manoowa ane o pɔge na da boɔrɔŋ ka ba guoli ba bie na soŋ. Azuŋ nɔkpeɛne zaa kyebe ka ba da wulee ba bidɔɔ Samsen Naaŋmen bege na, ba mɔɔbo na da sereŋ nyɛ la maaloo. A Baabole yeleeŋ ka “Ba Tari Baahaa Daana Jehoova sie bee vooroŋ soŋ daaŋ piili tonɔ [Samsen] eŋɛŋ.” A lɛ zuŋ Samsen da toŋ la tonkpeɛne yaga saŋa na oŋ wa leɛ a Izerayɛl sɛreŋmaareba na kaŋa.​—Sar. 13:25; 14:5, 6; 15:14, 15.

w05 3/15 25-26

Jehoova Da Ko La Samsen Faŋa Oŋ Zɔɔtoɔ̃ O Dɔndɔnne!

Saŋa na Samsen naŋ wa baara na, “Ba Tari Baahaa Daana Jehoova pɛgooŋ bee da maalooŋ.” (Saringmaariba 13:24) Bebiri kaŋa Samsen da gaa la o saa ane o ma zie a te yelka: “N nyɛ la pɔge kaŋa Tiiminat poɔŋ oŋ e Filiisitiya noba bi-pɔge. Lɛ zuŋ yɛ te de o wa ko ma ka o e N pɔge.” (Saringmaariba 14:2) Hooŋ leɛ nyɛ lɛ a yɛlɛ ŋa naŋ da na mãã o saa ane o ma noɔre seŋ lɛ. Aŋ da seŋ ka o faa a Izerayɛl biiri yi ba dɔndɔnne nuureŋ na, ba bidɔɔ na da leɛ boɔrɔŋ ka o de ba pɔgeyaa na kaŋa ka o e o pɔge. Naaŋmen Bege da ba tere sori ka a Izerayɛl biiri de paalonne noba naŋ puoro zirii ŋmema pɔgeyaare ka ba e ba pɔgeba. (Yiibu 34:11-16) Azuŋ, o saa ane o ma da zagrɛɛŋ a kyɛ yelka: “Pɔge zaa kye ho dɔgreba bi-pɔgeba poɔŋ, bee N noba zaa poɔŋ? A e la kparaama ka ho gaa te de pɔge yi Filiisitiya noba ŋa naŋ ba iri ba dɛgre ŋa seŋ?” Kyɛ Samsen da arɛɛ kpeɛŋaa a meŋ yelka: “Yɛ gaa te bɔ o wa ko ma, bozuŋ o naŋ sigi N nimiriŋ.”​—Saringmaariba 14:3.

Baabole Poɔ Yelsonne

w05 3/15 26 wɛl. 1

Jehoova Da Ko La Samsen Faŋa Oŋ Zɔɔtoɔ̃ O Dɔndɔnne!

Sobuo meŋɛ la ka a Filiisitiya pɔge ŋa da “sigi” a ko Samsen? McClintock ane Strong’s Cyclopedia gama na yeleeŋ ka, a ba waa ŋa a pɔge ŋa naŋ da “veɛlɛ yaga ka o yɛlɛ da taa nimiri bee o nimisogo naŋ da veɛlɛ yaga” zuŋ la oŋ da sigi, “kyɛ o da sigɛɛŋ a ko yelkaŋa baaroo bee a tuuro o seŋ ka yelkaŋa na nyɛ eebo.” Bo yɛlɛ baaroo la oŋ na waaneŋ? Saringmaariba 14:4 wulee a muni ka Samsen “daaŋ boɔrɛɛ vuo ka o iri a Filiisitiya noba eŋɛŋ.” Samsen da taa la ananso o naŋ da boɔrɔ a bi-pɔge ŋa. Saŋa na o naŋ wa baa a e dɔɔkpoŋ na, “ka Ba Tari Baahaa Daana Jehoova sie bee vooroŋ soŋ daaŋ piili tonɔ o eŋɛŋ,” bee Jehoova vooroŋ soŋ na la da korɔ o faŋa oŋ erɛ yɛlɛ. (Saringmaariba 13:25) Azuŋ Jehoova vooroŋ soŋ na la da vɛŋ ka Samsen da yelka o boɔrɔŋ ka o de a Filiisitiya pɔgeyaa na ka o e o pɔge. Jehoova vooroŋ soŋ na neŋ o zu la da sonnoo oŋ tonɔ toma aŋa Izerayɛl sɛreŋmaara. Ka lɛ Samsen da nyɛ la vuo na oŋ da boɔrɔ na bee? Yɛ vɛŋ ka te daŋ nyɛ lɛ Jehoova naŋ tu kyɛ vɛŋ ka Samsen baŋ ka o are la o puoreŋ.