Yɛ Kultaa Na Seŋ Ka O Bebe Yɛ Nyɔvore Zemmo Zaa Poɔŋ

Kristabiiri kultaa naŋ soma maŋ deɛ emmo korɔ Jehoova, a kyɛ vɛŋ ka a dɔɔ neŋ a pɔge meŋ taa popeɛloŋ yaga. (Mk 10:9) Ka Kristabiiriŋ boɔrɔ ka ba kultaa are kpeɛŋaa, aseŋ ka ba de a Baabole sowuli toŋ neŋ toma saŋa na baŋ wa ire ba kultatɔ na.

A na somaŋ ka ho di kannyiri ka ho ‘baapaaloŋ vɔlaa na sigi teŋɛ’ sɛre kyɛ ka ho neŋ bidɔɔ kaŋa, bee pɔgesaraa kaŋa piili tuuro taa, bonso, ho baapaaloŋ saŋa, gaŋneŋ taa vɔlaa maŋ eɛ kpeɛŋaa ho eŋɛŋ, a na baŋ vɛmeŋ ka a e kpeɛŋaa ko bo ka ho de gbɛɛ naŋ soma. (1Ko 7:36) Saŋa na hoŋ naŋ e ho yoŋ na, mɔɔ ka ho neŋ Jehoova niiloŋ e kpeɛŋaa, a mɔɔrɔ ka ho taa Kristaaloŋ gyogri meŋ. Ka hooŋ e lɛ, a na soŋ boŋ ka ho wa taa kultaa naŋ soma yaga.

Sɛre hoŋ na sage ka ho kuli neɛ kaŋa na, mãã ho meŋɛ kyɛ baŋ o soba “sukyiri nensaal-sɔgloo na.” (1Pi 3:4) Ka hooŋ piili bonnɔ yɛlɛ mine naŋ e nimizeere a kyaare neɛ na ho ne o naŋ tuuro taa na, ho neŋ o soba na baŋ di la dama a kyaare a yɛlɛ. Aŋa lɛ zɔmennoŋ zaa naŋ waa na, aseŋ ka ho de ho teɛroŋ eŋ yɛlɛ na hoŋ na baŋ erɛ korɔ ho kultatɔ na, a ba seŋ ka ho de ho teɛroŋ eŋ yɛlɛ hoŋ na nyɛrɛ yire ho kultatɔ na zieŋ yoŋ. (Fi 2:3, 4) Ka hooŋ de Baabole sowuli tonɔ toma pampana sɛre kyɛ kpeɛrɛ kultaa poɔ, a na eɛ mɔlɔ ko bo ka ho de Baabole sowuli toŋ toma ka hooŋ wa kpɛ kultaa poɔ.

KAA A VIDIO ŊA, NARE HO MEŊƐ SƐRE KYƐ KPEƐRƐ KULTAA POƆ​—KYƐLEE 3: “DAŊ ZEŊ A PEƐRE A YIRI MEƐBO ZAA SANE A NYƐ,” KYƐ PÃÃ IRI A SOOREBIE ŊA NƆƐ:

• Saŋa na te yɔɔpɔge na neŋ Shane naŋ da piili tuuro taa na, wala ka yɛlɛ da kyɛnɛ?

• Saŋa na oŋ da wa baŋ Shane soŋ na, bo yɛlɛ oŋ da nyɛ?

• Sobuo ka o dɔgreba da tu kyɛ somoo? Bo gbɛ-soŋ la oŋ da de?