Te Zemmo Ane Te Naaŋ Moɔloo Toma Lammo Yelsɛgree Yelpeɛre Gane
© 2022 Christian Congregation of Jehovah’s Witnesses
JANUARY 2-8
BAABOLE POƆ YELNIMIZEERE | 2 NAMINE 22-23
“Bonso Aŋ Seŋ Ka Te Sigri Te Menne?”
w00 9/15 29-30
Gyozaaya Naŋ Da Sigri O Meŋɛ Zuŋ, Jehoova Da Kooŋ Maaloo
Begu-pipi saŋa, noba naŋ da leɛ maala a ŋmenpuoredie na da tonɛɛ tonkpeɛne yaga. Nɔkpeɛne zaa kyebe ka Gyozaaya da puoree Jehoova bareka ane tonkpeɛne na a tontonneba naŋ tonɔ ka ba leɛ maale saammo na o sããkommine naŋ da e neŋfaare naŋ da sãã Naaŋmen die na. Saŋa na a toma naŋ nyɛrɛ nimitɔɔre gaabo na, Seefaŋ da waɛ la ka o ko Gyozaaya duoro mine. Kyɛ, bo duoro oŋ waana ka o manne ko Gyozaaya? Bonso oŋ da taa gane kaŋa meŋ o nuŋ? Seefaŋ da yeleeŋ ka a Ŋmenpuore Wedeɛrekpoŋ Hilikaiya da nyɛɛ “Jehoova bege gane na oŋ daaŋ tere a tuuro Moosis eŋɛŋ na.” (2 Tungkori 34:12-18) Bon na baŋ da nyɛ na da somaŋ yaga. Nɔkpeɛne zaa kyebe ka, a gane ŋa da la a dɛndɛŋ gane na Moosis meŋɛ naŋ de o nu a sɛge Naaŋmen Bege eŋ na!
Gyozaaya eŋɛ da nyagraŋ ka o woŋ yelbiri zaa naŋ be a gane poɔŋ. Saŋa na Seefaŋ naŋ kanna a gane na, Gyozaaya da teɛrɛɛ lɛ o neŋ a noba naŋ na toɔ̃ de a bege ŋa toŋ neŋ toma ba zemmo poɔŋ. Saŋa na Seefaŋ naŋ da kanne a gane, a wuli toɔrɔ naŋ na pɔge a noba ane gbaŋgbaaloŋ na poɔ baŋ na gaa ka ba naŋ zagre yelmeŋɛ puoruu bare a kyɛ te puoro zirii ŋmema na, a da tɔ la Gyozaaya sukyiri yaga zaa. Gyozaaya naŋ wa nyɛ ka a noba da ba tuuro Naaŋmen bege na zaa na, o da tage la o bonsuurii kyeɛre a kyɛ yelko Hilikaiya, Seefaŋ ane ba taaba na ka: ‘Yɛ gaa te peɛre a gane na baŋ nyɛ na yelbie yɛlɛ Jehoova zieŋ ko ma; bozuŋ Jehoova sutuloŋ naŋ iri te eŋɛŋ e la kpoŋ. Bozuŋ te sããkommine daaŋ ba tu Jehoova yelihoŋ aŋa lɛ na zaa ba naŋ sɛge a gane eŋɛŋ na.’—2 Namine 22:11-13; 2 Tungkori 34:19-21.
w00 9/15 30 wɛl. 2
Gyozaaya Naŋ Da Sigri O Meŋɛ Zuŋ, Jehoova Da Kooŋ Maaloo
Noba na Gyozaaya naŋ da toŋ na da gaa la pɔge-daŋyele Huulida naŋ da be Gyɛruzɛlɛm na zie. Ba da leɛ de la duoro a yi o zieŋ a wa ko Gyozaaya. Huulida da yelee Jehoova yelbiri na ko ba. O da yeleeŋ ka a toɔrɔ na zaa ba naŋ sɛge eŋ a gane na ba naŋ nyɛ na poɔŋ na pɔge la a paaloŋ, bonso, ba zagrɛɛ yelmeŋɛ puoruu bare. Kyɛ, Gyozaaya naŋ sigri o meŋɛ Jehoova Naaŋmen nimitɔɔreŋ na zuŋ, o koŋ de o nimiri nyɛ a toɔrɔ ŋa. Gyozaaya na kpi la emmaaroŋ poɔŋ, ka ba de o te uuŋ.—2 Namine 22:14-20; 2 Tungkori 34:22-28.
Baabole Poɔ Yelsonne
w01 4/15 26 wɛl. 3-4
Lɛ Zaa Ba Naŋ Tu Kyɛ Guoli Bo, Kyɛ Ho Yɛlɛ Na Toɔ̃ Maaleŋ
Aneazaa ka Gyozaaya bibiiloŋ saŋa, yɛlɛ da ba kyɛnɛ soŋ fẽẽ zaa, kyɛ Gyozaaya da erɛɛ yɛlɛ naŋ da soma Jehoova niŋeŋ. O naaloŋ diibu na da somaŋ yaga zaa, ka a Baabole gba yelka: “Aŋa namine naŋ di kyɛ koo poɔŋ, naa zaa daaŋ kyebe a waa ŋa ona. Kaŋa zaa daaŋ ba toɔ̃ de o sukyiri zaa a dɛle Jehoova aŋa Gyozaaya. O daaŋ eɛ lɛ neŋ o [nyɔvore] zaa, ane o faŋa zaa aŋa Moosis bege zaa naŋ wuli lɛ na. O puoreŋ meŋ, naa zaa daaŋ ba iri a waa ŋa ona.”—2 Namine 23:19-25.
Gyozaaya ewuli soŋ ŋa na toɔ̃ eŋɛɛ te yɔɔmine naŋ tuore yelkpeɛne yaga zaa ba bibiiloŋ saŋa na faŋa. Bo teŋ na baŋ zanne yi Gyozaaya ewuli soŋ ŋa poɔŋ? Boŋ da soŋ Gyozaaya oŋ kaa iri yɛlɛ naŋ soma, a kyɛ lɛ moɔ̃ niŋe erɛ yɛlɛ meŋ naŋ soma?
JANUARY 9-15
BAABOLE POƆ YELNIMIZEERE | 2 NAMINE 24-25
“Daŋ Ta Wa Inne Ka A Donɛɛ Baaroo Peɛlɛɛŋ”
w01 2/15 12 wɛl. 2
Jehoova Sɛrɛɛ Diibu Bebiri Na Peɛlɛɛŋ!
2 Nɔkpeɛne zaa kyebe ka, Zefanaiya daŋyelbo toma na da vɛŋɛɛŋ ka Gyozaaya naŋ da e baapaalaa a lɛ saŋa na nyɛ ka a eɛ nimizeɛ ka o iri zirii puoruu zaa yi a Gyuuda paaloŋ poɔŋ. Aneazaa ka naa Gyozaaya da mɔɔ la o mɔɔbo zaa ka o iri zirii puoruu yi a Gyuuda paaloŋ poɔŋ, kyɛ o da ba toɔ̃ iri a neŋfaare zaa yi a noba poɔŋ, kyɛbee a iri o sããkoma Naa Manaase yelfaare na bare. Naa Manaase ‘daaŋ kyiree noba naŋ ba taa sããnaa zĩĩ pa Gyɛruzɛlɛm.’ (2 Namine 24:3, 4; 2 Tungkori 34:3) Azuŋ, yelzaa da koŋ toɔ̃ pigi Jehoova sɛrɛɛ diibu na sori ka o ta wa a Gyuuda noba zuŋ.
w07 3/15 11 wɛl. 10
Yelnimizeere Naŋ Be A Gyɛremaiya Gane Poɔ
Yuoni 607 B.C.E. da la, Zedekaiya naaloŋ diibu yuoŋ pie neŋ yeni poɔŋ. Kyuuri pie neŋ anii naŋ pare, Baabilɔŋ naa Nebukadineezer da wa ŋmaa gyeerɛɛ Gyɛruzɛlɛm. Nebukadineezer naaloŋ diibu yuomo pie neŋ awae poɔŋ, a kyuuri anuu soba, o bebie ayɔpoi daare, Nebuzareedaŋ naŋ da e a sogyare neŋkpoŋ na da ‘waɛ la,’ kyɛbee o da wa taɛ Gyɛruzɛlɛm. (2 Namine 25:8) Aminekaŋaŋ, o da wa kpeɛrɛɛ a Baabilɔŋ noba na poɔŋ, ba da maalɛɛ ba kampuri peɛle a Gyɛruzɛlɛm daŋkyime na. Nebuzareedaŋ da wa kaa la lɛ na yɛlɛ naŋ kyɛnɛ, a kyɛ da wuli a noba yɛlɛ naŋ seŋ ka ba e. Bebie ata puoreŋ, a kyuuri pie soba poɔŋ, O da ‘kpɛ la’ Gyɛruzɛlɛm teŋkpɛŋ na poɔ. O da kpɛ la be a te nyege o zaa neŋ vũũ.—Jeremaiya 52:12, 13.
Baabole Poɔ Yelsonne
w05 8/1 12 wɛl. 1
Yelnimizeere Naŋ Be A Yiiloŋ Namine Gane Poɔ
24:3, 4. Manaase naŋ da ko noba naŋ ba taa sããnaa na zuŋ, Jehoova da ba e siri ka o “vɛŋaa” ko a Gyuuda noba. Naaŋmen de la noba naŋ ba taa sããnaa zĩĩ bee nyɔvore tegroŋ yaga. A yɛlɛ ŋa vɛŋɛɛŋ teŋ baŋ peɛlaaŋ ka, Jehoova na sãã la noba naŋ maŋ ko noba naŋ ba taa sããnaa na zaa.—Yieme 37:9-11; 145:20.
JANUARY 16-22
BAABOLE POƆ YELNIMIZEERE | 1 TUNGKORI 1-3
“A Baabole Eɛ Yelmeŋɛ Gane, O Ba E Sensellɛ Gane”
w09 9/1 14 wɛl. 1
Adama Neŋ Hawaa Da Eɛ Noba Naŋ Da Bebe Meŋɛmeŋɛ Bee?
Aŋa mannoo poɔŋ, hooŋ leɛ nyɛ a Gyuumine sããkompare yoe na ba naŋ sɛge eŋ a Dɛndɛŋ Tungkori gane na poɔ, o zu 1 te ta 9 na, ane a sããkompare yoe na ba naŋ sɛge eŋ Luka o zuri 3 na. A sããkompare yoe naŋ be a Dɛndɛŋ Tungkori gane na e la sããkommine dɔge-tutaa yoe naŋ ta 48. Ka a sããkompare yoe naŋ be a Luka gane na meŋ taa sããkommine dɔge-tutaa yoe naŋ ta 75. Luka da sɛgɛɛ Yezu Krista sããkompare yoe. Neɛ naŋ sɛge a Dɛndɛŋ Tungkori gane na meŋ da sɛgɛɛ a Izerayɛl paaloŋ namine ane ba ŋmenpuore wedeɛreba na sããkompare yoe. Kyɛ a gama ayi ŋa zaa da boɔlɛɛ noba mine te naŋ baŋ yoe. Noba aŋa Soolomoŋ, Deevid, Gyekɔb, Aziki, Aboraham, Noowa, ane Adama. Noba na zaa yoe baŋ da sɛge na da e la noba naŋ da bebe meŋɛmeŋɛ, Adama la a dɛndɛŋ nensaalaa Jehoova naŋ maale, o meŋ da eɛ neɛ naŋ da bebe meŋɛmeŋɛ.
w08 6/1 3 wɛl. 4
Noowa Ane A Kɔmpiiri Yɛlɛ Da Eɛ Yɛlɛ Naŋ Da E Meŋɛmeŋɛ, A Ba E Sensellɛ
Sããkompare ayi mine yɛlɛ ba naŋ sɛge eŋ a Baabole poɔŋ di la sieree ka, Noowa da eɛ neɛ naŋ bebe meŋɛmeŋɛ. (1 Tungkori 1:4; Luka 3:36) Eezira ane Luka la da sɛge a sããkompare yɛlɛ ŋa. Ba da eɛ noba naŋ da maŋ mãã ba menne, a peɛre yɛlɛ soŋ, a baŋ a yelmeŋɛ sɛre kyɛ sɛgrɛ a yɛlɛ. Luka naŋ da wa boɔlɔ Yezu Krista sããkompare yoe na, o da boɔlɛɛ Noowa meŋ yuori.
w09 9/1 14-15
Adama Neŋ Hawaa Da Eɛ Noba Naŋ Da Bebe Meŋɛmeŋɛ Bee?
Aŋa mannoo poɔŋ, Kristabiiri kpoŋ zie zaa nɔŋ la a Yezu yɔɔdeɛbo sareka wuluu na soŋ. A yɔɔdeɛbo wuluu ŋa wuleeŋ ka, Yezu Krista de la o nyɔvore naŋ pɛgeyi na a iri sareka, a na e lɛ faa nensaaleba yi ba faaloŋ poɔŋ. (Matio 20:28; Gyɔɔn 3:16) Ka ba naŋ yelka yɔɔdeɛbo a tɛgɛ la bo? Aŋa te zaa naŋ baŋ na, ka neɛŋ sãã bonkaŋa kyɛbee a kɔŋ bonkaŋa, ka ho te yɔɔ bon na oŋ sãã na sane ka a paale, kyɛbee ka ho leɛ da bon na o naŋ kɔŋ na, ba maŋ boɔlɛɛ a sane na hoŋ yɔɔ na ka yɔɔdeɛbo. Lɛ zuŋ ka a Baabole yelka Yezu e la “neɛ naŋ yɔɔ de nensaaleba zaa.” (1 Timoti 2:6) Kyɛ, neɛ kaŋa na sooreŋ ka, bo saammo, kyɛbee bo ka nensaaleba kɔŋ aŋ fɛre ka Yezu yɔɔdeɛ ba? A Baabole iree a noɔre ka: “Aŋa lɛ a noba zaa naŋ kpi Adama zuiŋ, lɛ la ka a noba zaa meŋ na la voorɔ a Krista zuiŋ.” (1 Korinti 15:22) Saŋa na Adama naŋ da be a Eedin gaadin poɔŋ na, o da ba taa faaloŋ zaa. Kyɛ, oŋ wa e tokpeɛne na zuŋ, o da wa leɛ la neŋfaa, a da kɔŋ apoɔsori ka o zeŋ a teŋɛzu kyɛ tegitegilɛ. A nyɔvore naŋ ba taa baaraa na la ka Yezu de o nyɔvore a yɔɔdeɛ ko nensaaleba zaa naŋ e siri ka ba sagra Naaŋmen nɔɛ. (Urom 5:12) Azuŋ, ka Adamaŋ da e neɛ naŋ da ba bebe meŋɛmeŋɛ, lɛ wuleeŋ ka Krista yɔɔdeɛbo sareka na ba taa tɔnɔ zaa.
Baabole Poɔ Yelsonne
it-1 911 wɛl. 3-4
Sããkompare Yoe
Pɔgeba Yoe. Ka yelnimizeere mineŋ da e, kyɛbee a na e pɔgeba mine zemmo poɔŋ, saŋa kaŋa ba da maŋ sɛgɛɛ ba yoe a poɔ sããkompare yoe poɔŋ. Aŋa mannoo poɔŋ, ba da sɛgɛɛ Saarai (ona baŋ da leɛ boɔlɔ Saara) yuori eŋ Munpiilee 11:29, 30, bonso, o Yaaŋaa na la a Mɛzaaya. A da lɛ wuleeŋ ka Aboraham pɔge yobo na zieŋ naane ka a Mɛzaaya na tu kyɛ wa. Ba da boɔlɛɛ Miilika meŋ yuori ana zie naŋ, bonso, o da e la Aziki pɔge Rebɛɛka makoma. Lɛ meŋ da wuleeŋ ka Rebɛɛka da e la Aboraham dɔgrɔ, bonso Aziki da ba seŋ ka o de pɔge naŋ ba e Aboraham dɔgrɔ. (Mn 22:20-23; 24:2-4) A yi Munpiilee 25:1, ba da sɛgɛɛ Aboraham pɔge Ketuura yuori eŋ beŋ, lɛ wuleeŋ ka Saara kũũ puoreŋ, Aboraham da de la pɔge. Yuomo lezaayi naŋ pare, Jehoova da vɛŋɛɛŋ ka Aboraham dɔɔloŋ na leɛ tonɔ ka lɛ vɛŋ oŋ na baŋ dɔge biiri. Aboraham naŋ da leɛ de Ketuura oŋ e o pɔge na wuleeŋ ka o dɔɔloŋ na da naŋ tonɔŋ oŋ na baŋ dɔge biiri. (Ur 4:19; Mn 24:67; 25:20) A yɛlɛ ŋa meŋ lɛ vɛŋɛɛŋ teŋ baŋ niiloŋ naŋ be a Miidiya noba, Areebiya noba ane a Izerayɛl biiri kpakyagaŋ.
Ba da sɛgɛɛ Liiya, Reekyel ane Gyekɔb sɛneba na ane ba biiri zaa yoe eŋ a sããkompare yoe mine poɔŋ. (Mn 35:21-26) A yɛlɛ ŋa soŋ teŋ teŋ baŋ lɛ na Naaŋmen neŋ Gyekɔb bidɔbɔ naŋ laŋ e yɛlɛ. A yɛlɛ ŋa mine zuŋ la so baŋ da maŋ sɛge pɔgeba mine meŋ yoe eŋ sããkompare yoe poɔŋ. Ka ba naŋ wa tu pɔge kaŋa zie kyɛ de kyɛŋ boma a ko neɛ kaŋa, ba da maŋ sɛge la a pɔge yuori eŋ a sããkompare yoe poɔŋ. (So 26:33) Yelmeŋɛ la, ba da sɛgɛɛ Teemar, Reehab, ane Ruut yoe poɔ a Mɛzaaya Yezu Krista sããkompare yoe na poɔŋ. Ba kaŋa zaa da e la yelkaŋa naŋ e o yoŋ, lɛŋ vɛŋ baŋ da sɛge ba yoe eŋ beŋ. (Mn 38; Ru 1:3-5; 4:13-15; Mt 1:1-5) 1 Tungkori 2:35, 48, 49; 3:1-3, 5 wuli teŋ ziiri na mine meŋ ba naŋ sɛge pɔgeba yoe eŋ sããkompare yoe poɔŋ.
JANUARY 23-29
BAABOLE POƆ YELNIMIZEERE | 1 TUNGKORI 4-6
“Bo Yɛlɛ Ka N Puoro Wuli A Kyaare Ma?”
w10 10/1 23 wɛl. 3-7
O E La Neɛ Naŋ “Wono Puoro”
Gyeebez da e la dɔɔ naŋ ba deɛnɛ neŋ puoro yɛlɛ fẽẽ zaa. Saŋa na oŋ wa puoro sɔrɔ Naaŋmen na, o da piileeŋ a yelka Naaŋmen koo maaloo. Yɛlɛ ata na oŋ da puore sɔre na da wuleeŋ ka o e la dɔɔ naŋ taa sagediibu naŋ e kpeɛŋaa yaga.
A dɛndɛŋ, Gyeebez da puore sɔrɛɛ Naaŋmen a yelka: “Vɛŋ ka N paaloŋ bee teŋgane e kpoŋ.” (Wɛlbo 10) Gyeebez da e la dɔɔ noba naŋ da korɔ gyeremɛ yaga, azuŋ, a yɛlɛ ŋa ba wuli ka o da boɔrɔŋ ka o tu sori naŋ ba seŋ neŋ a faa o tɔ kaŋa teŋgane. Yɛlɛ na oŋ da puoro sɔrɔ na da kyaarɛɛ nensaaleba, a da ba kyaare teŋgane yɛlɛ. O da puore sɔrɛɛ Naaŋmen ka o vɛŋ ka o teŋgane na e kpoŋ, ka lɛ vɛŋ ka noba yaga na baŋ wa be a wa puoro a yelmeŋɛ Naaŋmen.
A yiiloŋ, Gyeebez da puore sɔrɛɛ Naaŋmen ka o vɛŋ ka o “nu” be o zieŋ. Naaŋmen nu are ko la o faŋa na oŋ maŋ de sonnɔ o puorebiiri na. (1 Tungkori 29:12) Gyeebez da baŋɛɛŋ ka, sɛre ka o nu na toɔ̃ kpɛ yɛlɛ na oŋ yi o sukyiriŋ a sɔrɔ yire Naaŋmen zie na, aseŋ ka o taa tamaa Naaŋmen eŋɛŋ, bonso Naaŋmen nu ba e ŋmaa ka o soŋ noba naŋ taa sagediibu o eŋɛŋ.—Aizeeya 59:1.
A taaloŋ, Gyeebez da puoreeŋ ka: “Maŋ lɛg ma yi faaloŋ eŋɛŋ ka N ta maŋ dire dɔgɛɛ.” A yelihoŋ “ka N ta maŋ dire dɔgɛɛ” ba wuli ka Gyeebez da puoro sɔrɔŋ ka Naaŋmen pigi toɔrɔ zaa sori ka a ta pɔgoo. Kyɛ, o da puoro sɔrɔŋ ka Naaŋmen somoo ka o toɔ̃ are toɔrɔ zaa, kyɛbee yelfaa zaa naŋ na baŋ pɔgoo noɔreŋ.
Gyeebez puoro na da wuleeŋ ka o da e la neɛ naŋ da de yelmeŋɛ puoruu tegroŋ yaga, ka o sagediibu meŋ e kpeɛŋaa, a kyɛ lɛ wuli meŋ ka o da dɛlɛɛ Soba na naŋ kyɛllɛ wono puoro na. Sobuo ka Jehoova da tu kyɛ iri o puoro na noɔre? Gyeebez yɛlɛ na ba naŋ sɛgaa ŋmaaŋmaa eŋ a Baabole poɔŋ na baarɛɛŋ neŋ a yelbie ŋa: “Ka Naaŋmen daaŋ deɛ o sɔrebo.”
Baabole Poɔ Yelsonne
w05 10/1 9 wɛl. 7
Yelnimizeere Naŋ Be A Dɛndɛŋ Tungkori Gane Poɔ
5:10, 18-22. Naa Sɔɔl bebie na poɔŋ, a Izerayɛl bale naŋ da be a Gyɔɔdan sapare seŋ na da zɔɔtoɔ̃ la a Heegar noba na. Aneazaa ka a Heegar noba da e la yaga gaŋ a Izerayɛl noba na gbɛre buyi. A Izerayɛl noba naŋ da te zɔɔ neŋ a Heegar noba na da dɛlɛɛ Jehoova, a da taa tamaa ka o na soŋ baŋ. Azuŋ, yɛ vɛŋ ka te meŋ taa sagediibu naŋ e kpeɛŋaa yaga zaa Jehoova eŋɛŋ, saŋa na te naŋ zɔɔrɔ neŋ dɔndɔnne naŋ e kpeɛne yaga a siiloŋ poɔ zɔɔre na poɔŋ.—Efesu 6:10-17.
JANUARY 30–FEBRUARY 5
BAABOLE POƆ YELNIMIZEERE | 1 TUNGKORI 7-9
“Jehoova Na Toɔ̃ Soŋ Boŋ Ka Ho Toŋ Toma Zaa Ba Naŋ De Eŋ Ho Nuureŋ”
w05 10/1 9 wɛl. 8
Yelnimizeere Naŋ Be A Dɛndɛŋ Tungkori Gane Poɔ
9:26, 27. Ba da de la tone kaŋa naŋ e kpoŋ yaga eŋ a Liivai deme naŋ da e a ŋmenpuoredie denɔkaareba na nuureŋ. Ba na la da maŋ taa a ŋmenpuoredie ziiri naŋ e forifori na gboribie. Bebiri zaa, ba da maŋ wuliŋ ka ba e la noba naŋ be dɛlebo. Ba de la tone kaŋa naŋ e tegroŋ yaga a eŋ te meŋ nuureŋ. A tone la ka, te yi gaa te soŋ noba naŋ be te gbandige naŋ ka ba meŋ wa puoro Jehoova. Azuŋ, ho ba nyɛ ka aseŋ ka te tonɔ a toma ŋa nimizeɛ̃, a kyɛ e noba meŋ naŋ be dɛlebo aŋa a Liivai denɔkaareba na bee?
w11 9/15 32 wɛl. 7
Ka Lɛ Ho Na Tɔglɛɛ Fiiniyas Saŋa Na Hoŋ Wa Tuoro Yelkpeɛne Na Bee?
Takoreŋ saŋa Izerayɛl paaloŋ na poɔŋ, ba da de la toma naŋ e tegroŋ yaga zaa eŋ Fiiniyas nuureŋ. Fiiniyas da e la dɔɔ naŋ da taa nyaa, a da maŋ teɛrɛ yɛlɛ gɛrɛ tɔɔre, a da dɛle Naaŋmen meŋ. Azuŋ, o da toɔ̃ arɛɛ yelkpeɛne zaa oŋ da tuore noɔreŋ. Lɛ na Fiiniyas naŋ da mɔɔrɔ o mɔɔbo zaa a kaara Naaŋmen laŋne noba na zu na, da vɛŋɛɛŋ ka Jehoova da koo maaloo yaga. Yuoŋ 1,000 puoreŋ, vooroŋ soŋ da soŋɛɛ Eezira oŋ sɛge ka: “Elieezer bidɔɔ Fiiniyas daaŋ e la ba karikyi bee wedeɛrɛ saŋa kaŋa naŋ pare poɔŋ. Jehoova daaŋ be la o sɛŋ.” (1 Tun. 9:20) Azuŋ, noba naŋ derɛ Naaŋmen noba weɛ zenɛ ŋa, ane Kristabiiri zaa naŋ puoro Naaŋmen yelmennoŋ poɔ seŋ ka ba tɔglɔ Fiiniyas ewuli soŋ na.
Baabole Poɔ Yelsonne
w10 12/15 21 wɛl. 6
Yieli Ko Jehoova!
6 Jehoova da tu la o daŋyelba na zieŋ a kyɛ yelko o puorebiiri ka ba maŋ de yieloŋ a puguu. Ba da maŋ iree a Liivai noba baŋ da kaa iri ka ba e yieloŋ yielba na yoe yi ferebo toma na a Liivai noba naŋ seŋ ka ba tonɔ na poɔŋ. Ananso la wala? Ananso la ka, lɛ na vɛmeŋ ka ba nyɛ vuo a toɔ̃ mãã ba menne a sɛge a yiele, a zannaa meŋ soŋ zaa, ka lɛ vɛŋ ka ba toɔ̃ yielaa ka a noma.—1 Tun. 9:33.
FEBRUARY 6-12
BAABOLE POƆ YELNIMIZEERE | 1 TUNGKORI 10-12
“Moɔ̃ Niŋe A Erɛ Yɛlɛ Naaŋmen Naŋ Boɔrɔ”
w12 11/15 6 wɛl. 12-13
“Wuli Ma Ka N Toŋ Ho Boɔbo”
12 Lɛ na Deevid naŋ da baŋ sowuli naŋ be a Bege poɔŋ na, ane lɛ na oŋ da maŋ de a tonɔ neŋ toma o zemmo poɔŋ na eɛ yɛlɛ te zaa naŋ na baŋ tɔgle. Aŋa mannoo poɔŋ, hooŋ nyɛ yɛlɛ naŋ da e saŋa na Deevid naŋ da yelka, “Bɛɛtilehem kɔloŋ na koɔ̃” nyuubu vɔlaa kpɛ oŋ na. Ana saŋa na, a Filiisitiya nobaŋ da kpeɛrɛ a Bɛɛtilehem teŋkpɛŋ na poɔŋ, kyɛ Deevid dɔbɔ na bata da de la kpaŋkpaŋkpeɛ̃o a kpɛ a teŋkpɛŋ poɔ, a te ɔŋ a kɔloŋ koɔ̃ a wa ko Deevid. Kyɛ, “Deevid daaŋ ba sage nyua. Oŋ daaŋ de a kyiri bare ko Jehoova.” Bonso ka Deevid da e lɛ? Deevid da wulee a muni ka: “Oo N Naaŋmen kyiree la ka N e lɛ! A dɔbɔ ŋa naŋ ba e ba nyɔvoe niiri na zĩĩ maŋ na nyu bee? Bozuŋ ba nyɔvoe la baŋ de tɛgi ne a waneŋ.”—1 Tun. 11:15-19.
Deevid da baŋɛɛŋ ka Jehoova Bege na da wuleeŋ ka, a ba seŋ ka ba dire zĩĩ, kyɛ aseŋ ka ba maŋ de a kyiri bare teŋɛŋ aŋa koɔ̃. Deevid da baŋɛɛ bon naŋso a Bege naŋ yelka ba maŋ e lɛ. Deevid da baŋɛɛŋ meŋ ka “eŋgane nyɔvore be la a zĩĩ eŋɛŋ.” Kyɛ, koɔ̃ da la, a da ba e zĩĩ. Bonso ka Deevid da zagre ka o nyu a koɔ̃? Deevid da baŋɛɛ sowuli naŋ be a bege ŋa poɔŋ. Deevid yɛŋ zieŋ, a koɔ̃ da e la nanee aŋa a dɔbɔ bata na zĩĩ. Azuŋ, a da koŋ soma ka Deevid nyu a koɔ̃. O da ba nyu a koɔ̃, o da de la a koɔ̃ kyiri bare teŋɛŋ.—Liiv. 17:11; Dut. 12:23, 24.
w18.06 17 wɛl. 5-6
De Naaŋmen Bege Ane O Sowuli Na Wulo Ho Zoma
5 Ka teneeŋ boɔrɔ ka te nyɛ tɔnɔ yaga zaa a yi Naaŋmen bege na poɔŋ, aseŋ ka te maŋ kannaa, lɛ na baŋ soŋ teŋ ka te baŋ a bege soŋ. Aseŋ ka te nɔŋ Naaŋmen bege na meŋ a de a tegroŋ. Naaŋmen Yelbiri na yelka: “Yɛ ha faaloŋ, a nɔŋ soŋ.” (Eemos 5:15) Kyɛ, sobuo teŋ na baŋ tu kyɛ e lɛ? Yelnimizeɛ kaŋa naŋ na toɔ̃ soŋ te la, teŋ na maŋ taa Jehoova teɛroŋ a kyaare yɛlɛ. Te de yelmannaa wuli a muni: Te de ka ho maŋ gaŋeŋ ka ho gbiri, kyɛ ho koŋ baŋ gbiri. Beŋ la ka ho dɔkta wuli bo bondirii naŋ seŋ ka ho dire, lɛ aŋ seŋ ka ho dɔlɔ ho kɔbɔ, ane yɛlɛ aŋ seŋ ka ho leɛre ho zemmo poɔŋ. Saŋa na hoŋ wa de yɛlɛ na o naŋ wuli bo na toŋ toma na, ho wa nyɛɛŋ ka a soŋ boŋ yaga zaa! Nɔkpeɛne zaa kyebe ka, lɛ na ho dɔkta naŋ soŋ bo ka ho zemmo leɛ soma na vɛŋɛɛŋ ka ho poɔ pɛle yaga zaa.
6 Lɛ neŋ o zu la, Neɛ naŋ maale te na ko teŋ bege naŋ na toɔ̃ go te yi faaloŋ eŋɛŋ, a kyɛ lɛ vɛŋ ka te zemmo meŋ soma yaga. Hooŋ meŋɛ teɛre nyɛ tɔnɔ hoŋ na nyɛ ka hooŋ tuuro bege na a Baabole naŋ biŋ a kyaare zirii ŋmaabo, daware yɛlɛ, nannyigri, sɛŋsɛŋ yɛlɛ, kpaŋkpaŋkpeɛ̃o toma ane sɔyɛlɛ na. (Kanne Yeng Yelibie 6:16-19; Yel. 21:8) Ka teneeŋ wa de Jehoova bege na toŋ neŋ toma a nyɛ maaloo yaga zaa, a maŋ vɛmeŋ ka nɔmmo na te naŋ taa koo na maaleŋ e kpoŋ, a lɛ vɛŋ teŋ wuli nimipa a ko Jehoova ane bege na oŋ biŋ na.
Baabole Poɔ Yelsonne
it-1 1058 wɛl. 5-6
Sukyiri
Puoro Jehoova Neŋ Ho ‘Sukyiri Zaa.’ Aseŋ ka neɛ eŋgannoŋ poɔ sukyiri e gbuli sɛre kyɛ ka o na toɔ̃ tonɔ toma soŋ. Kyɛ, neɛ na baŋ de la sukyiri kyɛlee a puoro Jehoova. Deevid da puore sɔrɛɛ Naaŋmen a yelka: “Ko ma sukyiriyeni ka N zoro ho yuori.” Yɛlɛ na oŋ da yel na wuleeŋ ka, neɛ na baŋ de la sukyiri kyɛlee a nɔŋ yelkaŋa, kyɛbee a de sukyiri kyɛlee a zoro dabeɛ̃ ka o e yelkaŋa. (Ym 86:11) Ka neɛŋ wa e lɛ, o soba sukyiri na ba maŋ “nyɔge yelyeni,” ka o soba puoro Naaŋmen aŋa o naŋ ba boɔrɔ ka o puoroo. (Ym 119:113; Yel 3:16) Neɛ kaŋa meŋ na baŋ taaɛ “sukyie ayi,” ka neɛŋ wa taa a sukyiri ŋa tɔ, o maŋ boɔrɔŋ ka o tonɔ korɔ nembɛrɛ bayi. O soba na baŋ de la o noɔre a yel yelkaŋa, kyɛ o meŋɛ teɛroŋ poɔ, o koŋ sage e yɛlɛ na o naŋ de o noɔre yel na. (1Tu 12:33; Ym 12:2) Yezu da yeleeŋ peɛlaaŋ ka, noba naŋ taa a sukyie ayi ŋa, a e bampuori kombampoɔ noba na ba erɛ yɛlɛ naŋ soma.—Mt 15:7, 8.
Neɛ naŋ boɔrɔ ka o pɛlɛ Naaŋmen poɔ ba seŋ ka o de sukyiri kyɛlee, kyɛbee sukyie ayi a puoroo. Kyɛ aseŋ ka o soba de o sukyiri zaa a puoroo. (1Tu 28:9) Aseŋ ka o soba mɔɔ o mɔɔbo zaa sɛre kyɛ na toɔ̃ e a yɛlɛ ŋa, bonso, nensaalaa sukyiri bammo eɛ tuo yaga, nensaalaa sukyiri meŋ maŋ boɔrɛɛ yɛlɛ naŋ ba soma. (Jr 17:9, 10; Mn 8:21) Yɛlɛ na mine naŋ na toɔ̃ soŋ neɛ ka o de o sukyiri zaa puoro Naaŋmen la ama: aseŋ ka o soba maŋ yi o sukyiri poɔ a puore sɔre Naaŋmen (Ym 119:145; La 3:41), a moɔ̃ niŋe a zanna Naaŋmen Yelbiri na wagre zaa (Ez 7:10; Ye 15:28), a de eŋnyagroŋ moɔlɔ a duorisoŋ (de manne neŋ Jr 20:9), a kyɛ laŋna neŋ o taaba naŋ de ba sukyie zaa puoro ne Jehoova.—De manne neŋ 2Nm 10:15, 16.
FEBRUARY 13-19
BAABOLE POƆ YELNIMIZEERE | 1 TUNGKORI 13-16
“Ka Teneeŋ Tuuro Sowuli Te Na Nyɛɛ Maaloo Yaga”
w03 5/1 10-11
Ho Maŋ Sooreŋ Ka, “Yeneŋ Ka Jehoova Be” Bee?
12 Saŋa na baŋ da leɛ de a nɔlaŋ daga waneŋ a Izerayɛl paaloŋ na, ba da de oŋ te biŋ Kiirayat-gyiirim, oŋ bebe yuomo yaga. A da e la Naa Deevid poboɔbo ka o de a nɔlaŋ daga waneŋ Gyɛruzɛlɛm. Deevid neŋ a Izerayɛl paaloŋ nembɛrɛ da di la dama a kyaare a yɛlɛ ŋa. Deevid da yelka o na de la a Nɔlaŋ daga waneŋ Gyɛruzɛlɛm, ‘ka lɛŋ soma a noba nimitɔɔreŋ, a kyɛ seŋ neŋ Jehoova nimitɔɔreŋ meŋ.’ Kyɛ, Deevid da ba mãã o meŋɛ a peɛre baŋ Jehoova sowuli a kyaare a yɛlɛ ŋa. Ka onaŋ da e lɛ, o da koŋ vɛŋ ka nadɛɛ de a Nɔlaŋ daga. Kyɛ, o da naŋ vɛmeŋ ka a Liivai booree noba na baŋ boɔlɔ Koohat booree na de a Nɔlaŋ daga pare ba bagebieŋ a waneŋ Gyɛruzɛlɛm, aŋa lɛ Naaŋmen naŋ da wuli na. Gbɛɛ yaga, Deevid da maŋ peɛrɛɛ yɛlɛ yi Jehoova zieŋ sɛre kyɛ erɛ yelzaa. Kyɛ a yɛlɛ ŋa poɔŋ, o da ba tu sori naŋ seŋ neŋ poɔŋ a peɛre a yɛlɛ yi Jehoova zie. Azuŋ, yɛlɛ naŋ da yi a poɔŋ wa na da ba soma fẽẽ zaa. A yɛlɛ ŋa puoreŋ, Deevid meŋɛ da yeleeŋ ka: “Jehoova te Naaŋmen daaŋ ŋmɛ teŋ, teŋ daaŋ ba peɛre baŋ lɛ na aŋ seŋ ka te tu na zuŋ oŋ daaŋ e lɛ.”—1 Tungkori 13:1-3; 15:11-13; Soribu 4:4-6, 15; 7:1-9.
w03 5/1 11 wɛl. 13
Ho Maŋ Sooreŋ Ka, “Yeneŋ Ka Jehoova Be” Bee?
13 Saŋa na a Liivai noba naŋ da te de a Nɔlaŋ daga a yi Oobed-iidom dieŋ a gɛrɛ Gyɛruzɛlɛm na, ba da yielee yieloŋ kaŋa Deevid naŋ da sɛge. Yelbie na mine naŋ da be a yieloŋ poɔŋ la ŋa: “Yɛ boɔrɔ Jehoova ane o kpeɛ̃o. Yɛ maŋ derɛ yɛ yelfɛree binne o nimitɔɔreŋ wagre zaa. Yɛ teɛrɛ o tonkpeɛne oŋ toŋ. Yɛ teɛrɛ o yelseɛlɛ ane o noɔre sɛrɛɛ diibu na yɛlɛ.”—1 Tungkori 16:11, 12.
Baabole Poɔ Yelsonne
w14 1/15 10 wɛl. 14
Puoro A Naa Naŋ Ba Taa Piilee Ane Baaraa Na, Jehoova
14 Deevid da vɛŋɛɛŋ baŋ de a nɔlaŋ daga waneŋ Gyɛruzɛlɛm. Saŋa na baŋ da de a nɔlaŋ daga waana neŋ Gyɛruzɛlɛm na, a noba poɔ zaaŋ da pɛle ka a Liivai noba da yiele a pugiro Jehoova. Yelnimizeɛ kaŋa da be la a yieloŋ yelbie poɔŋ. Ba sɛgɛɛ a yɛlɛ ŋa eŋ 1 Tungkori 16:31: “Ba yele ŋaaŋ a paalonne pooreŋ: ‘Jehoova wa leɛ la Naa!’” Kyɛ, neɛ kaŋa na teɛreŋ ka, ‘Jehoova e la Naa naŋ ba taa piilee bee baaroo, azuŋ, sobuo oŋ wa leɛ Naa a lɛ saŋa na?’ Ka a naŋ wa ta saŋa kaŋa ka Jehoova kaa iri naa kaŋa biŋ o naaloŋ na puliŋ, kyɛbee a kaa iri neɛ kaŋa ka o are o gbɛbɔgriŋ wagre kaŋa poɔŋ, kyɛbee ka o naŋ wa biŋ yelsɛgraa kaŋa a na tu o eŋɛŋ a vɛŋ ka yelnimizeɛ kaŋa nyɛ eebo, a lɛ sori na poɔŋ, o maŋ wa leɛ la Naa. Saŋa na zaa Jehoova naŋ wa e a yɛlɛ ŋa kaŋa zaa na, lɛ wuleeŋ ka yelnimizeɛ kaŋa waanaŋ ka o nyɛ eebo. Sɛre ka Deevid na kpi na, Jehoova da eŋɛɛ noɔre koo ka a naaloŋ na be la o dieŋ a gɛrɛ wagre naŋ ba taa baaraa. Jehoova da yeleeŋ ka: “A saŋa maŋ na biŋ ho booree ka o deɛ ho zie. O na e la ho meŋɛ bidɔɔ, ka N vɛŋ ka o naaloŋ are kpeɛŋaa.” (2 Saa. 7:12, 13) Saŋa na wagre naŋ gɛrɛ nimitɔɔre ka a yɛlɛ ŋa na wa nyɛ eebo na, a da de la yuoŋ turi sɛre kyɛ ka a Deevid “booree bee yaaŋaa” ŋa na wa. Nembuo da la a Deevid yaaŋaa ŋa? Bo saŋa oŋ na wa leɛ Naa?
FEBRUARY 20-26
BAABOLE POƆ YELNIMIZEERE | 1 TUNGKORI 17-19
“Naŋ Kyɛnɛ Taa Ho Popeɛloŋ Haali Ka Yɛlɛŋ Ba Kyɛŋ Aŋa Lɛ Na Hoŋ Da Boɔrɔ Na”
w06 7/15 19 wɛl. 1
De Ho Teɛroŋ Eŋ Jehoova Lantaapuoruu Na Yelsonne Eŋɛŋ
TAKOREŊ saŋa Izerayɛl paaloŋ na poɔŋ, dɔɔ kaŋa da bebeŋ baŋ da boɔlɔ Deevid. O da e la ewuli soŋ yaga zaa, azuŋ, ba da sɛgɛɛ o yɛlɛ eŋ a Hiburu Gama na poɔŋ. A dɔɔ ŋa da eɛ pekyeenɛ, yieli yiele, daŋyele ane naa. O da dɛlɛɛ Jehoova Naaŋmen kpɛlɛŋkpɛlɛŋ. Deevid neŋ Jehoova niiloŋ naŋ da e kpeɛŋaa yaga zaa na zuŋ, o da boɔrɔŋ ka o mɛ die a koo. A die ŋa bee a ŋmenpuoredie ŋa na e la zie noba naŋ na maŋ wa puore Jehoova a Izerayɛl paaloŋ poɔŋ. Deevid da baŋɛɛŋ ka ka o naŋ mɛ a ŋmenpuoredie ŋa, a na de la popeɛloŋ ane maaloo yaga a wa ko Naaŋmen noba na. Azuŋ, Deevid da yieleeŋ a yelka: ‘Nyɛ neɛ hoŋ kaa iri a e oŋ maŋ wa ho sɛŋ a kpeɛrɛ ho die poɔŋ popɛle naŋ seŋ lɛ. Ho die sonnoŋ na vɛmeŋ ka te tegi, ho ŋmenpuoredekpoŋ forifori na.’—Yieme 65:4.
w21.08 22-23 wɛl. 11
Vɛŋ Ka Apoɔsoe Na Hoŋ Taa Na Korɔ Bo Popeɛloŋ
11 Lɛ neŋ o zu la, te na baŋ taaɛ popeɛloŋ naŋ e kpoŋ ka teneeŋ de te sukyie zaa erɛ yelzaa ba naŋ de eŋ te nuureŋ ka te erɛ Jehoova puoruu poɔŋ. Aseŋ ka te “moɔ̃ nimiri” a moɔlɔ a duorisoŋ ane toma zaa ba naŋ ko te ka te tonɔ a lantaapuoruu poɔŋ. (Tom. 18:5; Hib. 10:24, 25) Sɛre hoŋ na gaa a lantaapuoruu lammo na, maŋ nare ho meŋɛ ka ho te iri yɛlɛ nɔɛ naŋ na eŋ ho yɔɔmine faŋa a zannoo saŋa. Ka ba naŋ ko bo sakuubiiri toma a daagbuli poɔ lammo na poɔŋ, nare ho meŋɛ soŋ a wa toŋ a toma soŋ zaa. Ka ba naŋ de toma zaa eŋ ho nuureŋ a lantaapuoruu poɔŋ, maŋ wa wagre naŋ seŋ poɔŋ a wa toŋ a toma a wuli ka ho be la dɛlebo. Daŋ ta wa teɛrɛ ka tone kaŋa ba naŋ ko bo ba seŋ ka ho sããna ho wagre o eŋɛŋ. (Yeng. 22:29) Moɔ̃ niŋe a nyɛrɛ nimitɔɔre gaabo a wa e neɛ naŋ kyili. Ka hooŋ moɔ̃ niŋe a tonɔ tonkpeɛne Jehoova puoruu poɔŋ, ho na nyɛɛ nimitɔɔre gaabo wieoŋ wieoŋ, ka ho popeɛloŋ meŋ maaleŋ e kpoŋ. (Gal. 6:4) Ka ba naŋ de apoɔsori na hoŋ da boɔrɔ na ko ho tɔsoba, a na e la mɔlɔ ka ho neŋ o soba meŋ laŋ kyilɛ.—Uro. 12:15; Gal. 5:26.
Baabole Poɔ Yelsonne
w20.02 12, daga
Te Nɔŋ La Te Saa Jehoova Yaga
Jehoova Baŋ Maŋ Bee?
Ho daaŋ soorɛɛ ho meŋɛ ka, ‘Noba turituri yaga zaa be la a teŋsare ŋa zuŋ, bonso, ka Jehoova na baŋ ma?’ Ka lɛ la, ho yoŋ naaneŋ daaŋ teɛre lɛ. Naa Deevid da sɛgɛɛŋ ka: “Jehoova, bo la nensaalaa ka ho baga bee teɛroŋ be o zieŋ?” (Yiem. 144:3) Deevid da baŋɛɛŋ ka Jehoova bamooŋ yaga zaa. (1 Tun. 17:16-18) Jehoova tu la o Yelbiri ane o lantaapuoruu eŋɛŋ kyɛ boɔrɔ ka ho baŋ peɛlaaŋ ka o nyɛrɛɛ lɛ na zaa ho naŋ erɛ a wulo ka ho nɔmooŋ na. Vɛŋ ka te nyɛ yɛlɛ mine naŋ be Naaŋmen Yelbiri na poɔŋ naŋ na toɔ̃ soŋ te ka te baŋ ka a yɛlɛ ŋa e la yelmeŋɛ:
• Saŋa na hoŋ da naŋ be ho ma poɔŋ a e bilɛɛ na, kyɛ Jehoova da baŋ boŋ.—Yiem. 139:16.
• Jehoova baŋɛɛ yɛlɛ naŋ be ho sukyiriŋ, ane yɛlɛ na hoŋ teɛrɛ.—1 Tun. 28:9.
• Jehoova maŋ kyɛllɛ wono la ho puoro zaa.—Yiem. 65:2.
• Ho yel-erre na baŋ vɛmeŋ ka Jehoova poɔ pɛle, kyɛbee ka o poɔ sãã.—Yeng. 27:11.
• Jehoova meŋɛ la soŋ bo hoŋ toɔ̃ tage peɛloo.—Gyn. 6:44.
• Jehoova baŋ boŋ velaa zaa, azuŋ ka hooŋ kpi, o na baŋ seŋ boŋ ka ho iri yi kũũni poɔŋ. O na maalɛɛ eŋdaa a ko bo, a leɛ de teɛrɛ na zaa hoŋ da taa sɛre kyɛ kpi na, ane ho gyogri zaa leɛ ko bo.—Gyn. 11:21-26, 39-44; Tom. 24:15.
FEBRUARY 27–MARCH 5
BAABOLE POƆ YELNIMIZEERE | 1 TUNGKORI 20-22
“Soŋ Baapaalba Ka Ba Yɛlɛ Maale”
w17.01 29 wɛl. 8
“Bonna Ho Naŋ Da Woŋ Yi N Zie . . . Manne Ko A Yelmeŋɛ Deme”
8 Kanne 1 Tungkori 22:5. Deevid da naaŋ baŋ teɛreŋ ka, Soolomoŋ koŋ baŋ kaa a noba zu ka ba toŋ a toŋ nimizeɛ ŋa. Bonso a ŋmenpuoredie na baŋ da waana ka ba mɛ na da seŋ ka o “maaleŋ veɛlɛ yaga.” A saŋa meŋ, Soolomoŋ da eɛ ‘bibile, o da naŋ ba baŋ yeltaree nimiri.’ Kyɛ, Deevid da baŋɛɛŋ ka Jehoova na toɔ̃ soŋɛɛ Soolomoŋ ka o toŋ tone na baŋ de eŋ o nuureŋ ka o toŋ na. Azuŋ, Deevid da de la o teɛroŋ eŋ lɛ na oŋ na toɔ̃ e a soŋ Soolomoŋ. O da bɔ la bontaree na baŋ na de mɛ a ŋmenpuoredie na yaga zie zaa biŋ.
w17.01 29 wɛl. 7
“Bonna Ho Naŋ Da Woŋ Yi N Zie . . . Manne Ko A Yelmeŋɛ Deme”
7 Deevid da ba zagre ka o soŋ Soolomoŋ. Deevid da ba teɛre ka ka o naŋ soŋ Soolomoŋ ka o mɛ a ŋmenpuoredie, noba na de la a ŋmenpuoredie meɛbo gyeremɛ zaa a ko Soolomoŋ. Yelmeŋɛ meŋ la, ba da yeleeŋ ka Soolomoŋ la mɛ a ŋmenpuoredie, ba da ba yelka Deevid la mɛ a ŋmenpuoredie. A da e la Deevid sukyiri boɔbo ka o mɛ a ŋmenpuoredie ŋa, kyɛ lɛ da ba toɔ̃ nyɛ eebo. Kyɛ aneazaa, Deevid da mɔɔ la o mɔɔbo zaa a soŋ Soolomoŋ oŋ mɛ a ŋmenpuoredie. Deevid da narɛɛ a tontonneba zaa, a bɔ kuree, yaawa, wari, salma, ane siida daare a biŋ. Kyɛ lɛ yoŋ naane, Deevid da eŋɛɛ Soolomoŋ faŋa a yelka: “N bidɔɔ, Jehoova be ho sɛŋ. Naaŋmen na vɛŋ ka ho [yɛlɛ] maale, ka ho mɛ Jehoova ho Naaŋmen die na aŋa lɛ na oŋ yelko bo na.”—1 Tun. 22:11, 14-16.
w18.03 11-12 wɛl. 14-15
Bidɔgreba, Yɛ Sonnɛɛ Yɛ Bibiiri Ka Ba Na Nyɛ Nimitɔɔre Gaabo A Te De Suobu?
14 A lantaapuoruu nembɛrɛ waa ŋa pekyeeneba Jehoova puoruu poɔŋ. Ba na baŋ soŋɛɛ bidɔgreba ka ba soŋ ba bibiiri ka ba de yɛlɛ biŋ ba nimitɔɔreŋ Jehoova puoruu poɔŋ. Te yɔɔpɔge kaŋa naŋ de yuomo naŋ pare lezaata neŋ pie toŋ a paaneɛ toma teɛrɛɛ lɛ na te Yɔɔdɔɔ Charles T. Russell naŋ da somoo saŋa na oŋ da di yuomo ayoɔbo na. Te yɔɔpɔge na yeleeŋ ka, “N ne o da di la dama minti pie neŋ anuu a kyaare yɛlɛ maŋ na toɔ̃ de biŋ N nimitɔɔreŋ Jehoova puoruu poɔŋ.” Yelmeŋɛ la, yelbi-sonne na hoŋ na yeli a eŋ ba faŋa na na toɔ̃ soŋ baŋ yaga zaa. (Yeng. 25:11) A lantaapuoruu nembɛrɛ na baŋ de la bidɔgreba ane ba bibiiri poɔ a lantaapuoruu Lammozie maaloo toma poɔŋ. Ba na baŋ kaa la a bibiiri yuomo ane yɛlɛ baŋ na toɔ̃ e a kyɛ de toma naŋ seŋ neŋ ko ba.
15 Ka a lantaapuoruu noba meŋ wa tu sori naŋ seŋ neŋ poɔŋ a kyɛ wuli ka ba boɔrɛɛ baapaalba yɛlɛ, ba na toɔ̃ soŋ baŋ yaga zaa. A lantaapuoruu noba na baŋ vɛmeŋ ka ba nimiri gaŋ teŋɛŋ ka ba kaara lɛ a baapaalba ŋa naŋ mɔɔrɔ ka ba nyɛ nimitɔɔre gaabo Jehoova puoruu poɔŋ. Ka baapaalaa kaŋaŋ wa wa a lammozie, o maŋ iree yɛlɛ noɔre naŋ toɔrɔ sukyiri bee? Kyɛbee, ka ba naŋ wa koo sakuubiiri toma a daagbuli poɔ lammo na saŋa, o maŋ toŋ la a toma velaa zaa? A baapaalaa ŋa tuoree yelkpeɛne kyɛ toɔ̃ are a noɔreŋ bee? Kyɛbee o toɔ̃ moɔlɛɛ a duorisoŋ ko neɛ kaŋa sakuuŋ? Ta maŋ naara ka ho de pugibu naŋ seŋ neŋ a korɔ ba. Ho ne ba na baŋ di la dama sɛre ka a lammo piili, kyɛbee ka a lammoŋ wa baare bee? Ka hooŋ e lɛ, ho na wuliŋ ka ho boɔrɛɛ ba yɛlɛ. Ka hooŋ erɛ a yɛlɛ ŋa zaa ane a taa, a baapaalba na wa nyɛŋ ka ba meŋ poɔ la ‘a lantaapuoruu poɔŋ.’—Yiem. 35:18.
Baabole Poɔ Yelsonne
w05 10/1 11 wɛl. 6
Yelnimizeere Naŋ Be A Dɛndɛŋ Tungkori Gane Poɔ
21:13-15. Jehoova da yelko la a maleke ka a seŋɛɛŋ, bare a saammo lɛ. Ananso la wala? Ananso la ka, ka Jehoova puorebiiriŋ wa dire dɔgɛɛ a maŋ beɛrooŋ yaga zaa. Yelmeŋɛ la, “o [nembaalonzoe] eɛ kpoŋ yaga.”