Te Zemmo Ane Te Naaŋ Moɔloo Toma Lammo Yelsɛgree Yelpeɛre Gane
© 2024 Watch Tower Bible and Tract Society of Pennsylvania
JULY 1-7
BAABOLE POƆ YELNIMIZEERE YIEME 57-59
Ka Nobaŋ Wa Iri Zɔɔrɔ Neŋ Jehoova Puorebiiri, O Na Baŋ Leɛrɛɛ Yɛlɛ Ka Maaloo Yi A Poɔ Wa
“A Te Ta A Teŋɛzu Lombori Zaa”
14 Stefanu da de la nyaa manne Jehoova yɛlɛ ko o dɔndɔnne na sɛre kyɛ baŋ koo. (Toma 6:5; 7:54-60) Saŋa na a “dɔgroŋ kpoŋ” naŋ wa piili na, a bitontonee yɛŋ da naŋ be la Gyɛruzɛlɛm, kyɛ Yezu potuuribo naŋ kyɛre na da zo gaaɛ Gyudiya ane Samareya tenne na poore. Kyɛ, ba da ba bare a naaŋ moɔloo toma. Filipi da gaaɛ Samareya teŋɛ kaŋa a te “manna a Krista yɛlɛ” korɔ ba. Maaloo yaga da yi la o naaŋ moɔloo toma na poɔŋ wa. (Toma 8:1-8, 14, 15, 25) Kyɛ lɛ yoŋ naane, a Baabole yeleeŋ ka: “A potuuribo naŋ da bebe saŋa na a dɔgroŋ naŋ wa piili baŋ ko Stefanu na da zo yaarɛɛŋ a gaa tɔɔre te ta Fɔniisiya, Sapuru, ane Antoɔki, kyɛ Gyuu noba yoŋ la baŋ da moɔlɔ a yelbiri korɔ. Kyɛ, a dɔbɔ na mine naŋ da be ba poɔŋ a yi Sapuru ane Saariine da wa la Antoɔki a wa piili manna a yɛlɛ korɔ noba naŋ da wono Giriki kɔkɔre na, ba da mannɛɛ a duorisoŋ naŋ kyaare te Daana Yezu na korɔ ba.” (Toma 11:19, 20) Ana saŋa na, lɛ na baŋ da dɔgrɔ a Kristabiiri na da vɛŋɛɛŋ ka a Naaloŋ duorisoŋ yaare ta ziiri yaga.
15 Te saŋa ŋa meŋ, a yɛlɛ ŋa tɔ da nyɛɛ eebo a Soviet Union paaloŋ na poɔŋ. A yi yuoni 1950 a gɛrɛ, ba da nyɔgɛɛ Jehoova Sieree Deme turituri yaga gaaneŋ Siberia wɛre na pooreŋ. Baŋ da de ba gaaneŋ ziiri yaga naŋ be a paaloŋ poɔŋ na zuŋ, ka ba naŋ wa ta zie zaa, ba da maŋ moɔlɛɛ a duorisoŋ korɔ noba naŋ bebe. Ka ba naŋ da bare Jehoova Sieree Deme yoŋ, ba kpoŋ zie zaa da naŋ koŋ nyɛ libie a kpɛ lɔɔre a tu sori gaa maalere aŋa 6,000 (kyɛbee kilometare 10,000) a te moɔle a duorisoŋ ko noba naŋ be ana paaloŋ na poɔŋ. Kyɛ, a gɔmenante da de la o meŋɛ lɔɛ a de te yɔɔmine ŋa gaaneŋ a paaloŋ lombori zaa. Te yɔɔdɔɔ kaŋa yeleeŋ ka: “Lɛ na a gɔmenante noba naŋ e na vɛŋɛɛŋ ka noba turituri naŋ taa sukyiri-soŋ a be Siberia paaloŋ na poɔŋ wa baŋ a yelmeŋɛ.”
Baabole Poɔ Yelsonne
“Yɛ Are Kpeɛŋaa, A Ta Wa Leɛrɛ Puori”
16 Taa sukyirikpagu. Naa Deevid da yeleeŋ ka nɔmmo na oŋ taa ko Jehoova daŋ koŋ baare zaa a da yiele ka: “N sukyiri eɛ kpeɛŋaa, Oo Naaŋmen.” (Yiem. 57:7) Te meŋ na baŋ taa la sukyirikpagu a dɛle Jehoova kpɛlɛŋkpɛlɛŋ. (Kanne Yieme 112:7.) Te nyɛ lɛ a yɛlɛ ŋa naŋ soŋ Bob te naŋ yel o yɛlɛ a piilee saŋa na. Saŋa na baŋ da yelkoo ka ba na de la zĩĩ mine biŋ ka a naŋ wa fɛre ka ba emoo zĩĩ na, o da yelko baŋ ka, ka ba naŋ baŋ ka ba na emooŋ zĩĩ yɛŋ, ona yi la a asibitiŋ tɔntɔbaalɛ a gaa die. A puoriŋ, Bob da yeleeŋ ka, “N da ba taa bonnoo zaa a kyaare yɛlɛ na maŋ erɛ na; yɛlɛ naŋ na yi a poɔŋ wa meŋ yɛlɛ da ba dɔnnɔ ma.”
17 Bob da toɔ̃ arɛɛ kpeɛŋaa bonso o da de la gbɛre ka o are kpeɛŋaa sɛre kyɛ gɛrɛ a asibiti. A dɛndɛŋ yɛlɛ la ka, o da boɔrɔŋ ka o e yɛlɛ naŋ na vɛŋ ka Jehoova poɔ pɛle. A yiiloŋ, o zannɛɛ lɛ a Baabole ane te gama naŋ yele nyɔvore ane zĩĩ yɛlɛ na soŋ. A taaloŋ, o da sagedieŋ ka ka onaŋ tu Jehoova sowuli, o na kooŋ maaloo yaga. Yelkpeɛŋaa zaa naŋ pɔge te, te meŋ na baŋ taa la sukyirikpagu.
JULY 8-14
BAABOLE POƆ YELNIMIZEERE YIEME 60-62
Jehoova Maŋ Korɔ Teŋ Zeŋ Laafeɛ, Gomeŋɛ, A Lɛ Eŋnɛ Te Faŋa Meŋ
it-2 1118 wɛl. 7
Ziduoruu
O Na Baŋ Are Ko La Yɛlɛ Mine. Noba naŋ taa sagediibu Jehoova eŋɛŋ, a sagra o nɔɛ, na baŋ taaɛ zeŋ laafeɛ meŋɛmeŋɛ. Deevid da yieleeŋ ka: “Hooŋ [Jehoova] la N zo lirizie, ho waa ŋa ziduoruu naŋ e kpeɛŋaa naŋ maŋ go ma yi N dɔndɔma nuuriŋ.” (Ym 61:3) Noba naŋ baŋ Naaŋmen yuori na pare meŋɛmeŋɛ, a dɛloo, a erɛ yɛlɛ naŋ na vɛŋ ka o yuori na pɛgeyi, ba seŋ ka ba zoro dabeɛ̃ zaa. Bonso a Baabole yeleeŋ ka: “Jehoova yuori na waa ŋa ziduoruu naŋ e kpeɛŋaa. Sontuuro maŋ zo kpɛ la o poɔ a nyɛ gomeŋɛ.”—Ye 18:10; de manne neŋ 1Sa 17:45-47.
it-2 1084 wɛl. 8
Tɛnte
A yelbiri “tɛnte” na baŋ lɛ are ko la yɛlɛ mine meŋ. Ka neɛŋ wa maale tɛnte, o maŋ kpɛ gaŋ la o poɔŋ a pɛnnɛ. A tɛnte maŋ go la o soba yi saa neŋ ŋmenaa toloŋ eŋɛŋ. (Mn 18:1) Aŋa lɛ na nensaaleba laŋ zemmo naŋ wuli na, ka neɛŋ wa deɛ o tɔsoba saannoŋ a kpɛ neŋ o tɛnte poɔ, a wuleeŋ ka o boɔrɔŋ ka o kaara o soba zu, a lɛ wulo o soba meŋ gyeremɛ naŋ e zuluŋ. Azuŋ, saŋa na Yel-iriwulaa 7:15 naŋ yelka Naaŋmen na “yɛrɛɛ o tɛnte na gaali” a nembeɛoŋ na, a wuleeŋ ka o go baŋ a kaara ba zu, a ko ba zeŋ laafeɛ meŋ. (Ym 61:3, 4) Saŋa mine a Baabole maŋ de la Zaayɔŋ are ko Naaŋmen pɔge. Azuŋ, Aizeeya da wulee lɛ aŋ seŋ ka Zaayɔŋ naŋ are ko Naaŋmen pɔge naŋ seŋ ka o e a toɔ̃ kaa biiri na oŋ na dɔge na zu. Ba da yelko la a pɔge ŋa ka, “maale ho tɛnte na ka o e yɛloŋ yaga zaa.” (Ai 54:2) Lɛ wuleeŋ ka, aseŋ ka o vɛŋ ka o zie na e yɛloŋ ka lɛ vɛŋ ka o toɔ̃ go biiri na zaa oŋ na dɔge na.
w02 4/15 16 wɛl. 14
Bege Na Naaŋmen Naŋ Ko Te Na Na Toɔ̃ Soŋ Teŋ
14 A yɛlɛ soŋ zie la ka, Naaŋmen bege na ba leɛrɛ. A donfaa ŋa poɔŋ teŋ be na, Jehoova waa ŋa pi-kpɔgree naŋ are kpeɛŋaa a yi wagre naŋ ba taa baaroo a gɛrɛ wagre naŋ ba taa baaroo. (Yieme 90:2) Jehoova meŋɛ yeleeŋ ka: “Maaŋ la Jehoova; N ba leɛre.” (Maalakai 3:6) Bege na Naaŋmen naŋ vɛŋ baŋ sɛge eŋ a Baabole poɔŋ na waa la dɛlebo kpɛlɛŋkpɛlɛŋ. A ba waa ŋa nensaaleba teɛroŋ na baŋ maŋ sɛge biŋ kyɛ aŋ ba kɔɔre baŋ leɛraa na. (Gyimisi 1:17) Aŋa mannoo poɔŋ, yuomo mine naŋ pare, dɔktare mine naŋ maŋ kaara nensaaleba teɛroŋ poɔ laafeeloŋ yɛlɛ da maŋ yeliŋ ka, ka neɛŋ boɔrɔ ka o guoli o bie soŋ, aseŋ ka o tere sori ka a bie erɛ lɛ na oŋ boɔrɔ. Kyɛ yuomo mine puoriŋ, ba da leɛrɛɛ ba teɛroŋ a yelka ba da ŋmɛɛ gbɛre a yi kawane na baŋ da tere na poɔŋ. Noba naŋ be a donɛɛ ŋa poɔŋ maŋ terɛɛ sowuli tɛɛtɛɛ a kyaare sori na aŋ seŋ ka bidɔgreba maŋ tu a guolo ba biiri. Kyɛ a ba maŋ kɔɔre baŋ leɛre ana sowuli na. Jehoova Yelbiri na yɛŋ ba leɛrɛ. A yi a yuomo ŋa zaa poɔŋ, a Baabole wuliŋ teŋ sori teŋ na baŋ tu a de nɔmmo guoli neŋ te biiri. Bitontona Pɔɔl da sɛgɛɛŋ ka: “Saamine yɛ ta dɔɔnɔ yɛ bibiiri suuri, kyɛ yɛ guoli ba Jehoova dɛnnoo ane o kawane poɔŋ.” (Efesu 6:4) Nyɛ lɛ a naŋ e sukyiridii yaga zaa ka te baŋ ka te na baŋ dɛlɛɛ bege na Jehoova naŋ biŋ na, bonso a daaŋ koŋ baŋ leɛre zaa.
Baabole Poɔ Yelsonne
w06 6/1 11 wɛl. 6
Yelnimizeere Naŋ Be A Yieme Yiiloŋ Gane Poɔŋ
62:11. Sɛre ka nensaaleba na toɔ̃ nyɛ faŋa, aseŋ ka ba di bondirii a nyu koɔ̃ meŋ. Kyɛ Naaŋmen ba nyɛrɛ o faŋa yire a boma ama taa poɔŋ kyɛbee ziyuo kaŋaŋ. Jehoova meŋɛ zieŋ la ka faŋa ane kpeɛ̃o a yi. Ɛɛ, ‘o soobu la faŋa.’
JULY 15-21
BAABOLE POƆ YELNIMIZEERE YIEME 63-65
“Ho Yelmeŋɛ Nɔmmo Eɛ Tegroŋ Gaŋ Nyɔvore”
w01 10/15 15-16 wɛl. 17-18
Nembuoŋ Na Toɔ̃ Wɛle Te Yi Naaŋmen Nɔmmo Na Poɔŋ?
17 Wala ka Naaŋmen nɔmmo na e tegroŋ ko bo aseŋ? Deevid da sɛgɛɛŋ ka: “Bonso ho yelmeŋɛ nɔmmo eɛ tegroŋ gaŋ nyɔvore, N na de la N nɔgbama pugiro bo. Azuŋ, N na pugiboŋ N nyɔvore bebie zaa poɔŋ; ho yuori na zuŋ, N na zɛgɛɛ N nuuri.” Ho meŋ taaɛ a teɛroŋ ŋa neŋ o zu bee? (Yieme 63:3, 4) Yelmeŋɛ zaa, te soore te menne ka, bonkaŋa be la a donɛɛ ŋa poɔŋ a na baŋ ko te popeɛloŋ ane zeŋ laafeɛ yaga a gaŋ popeɛloŋ na teŋ taa te naŋ e Naaŋmen zɔmenne ane noba o naŋ nɔŋ na bee? Aŋa mannoo poɔŋ, ka neɛŋ gaa sakuu gaa nimitɔɔre a wa nyɛ toma naŋ soma yaga zaa, lɛ na toɔ̃ ko la o soba teɛroŋ yeni ane popeɛloŋ a gaŋ neɛ neŋ Jehoova naŋ taa niiloŋ naŋ e kpeɛŋaa bee? (Luka 12:15) Saŋa mine, Kristabiiri mine maŋ tuoree yelkpeɛŋaa naŋ la ka, ba kaa iri Jehoova bee kũũ. A yɛlɛ ŋa da pɔgɛɛ te yɔɔmine kpɛŋ zie zaa Nazi nempɔgederi na pooreŋ a Donɛɛ Zaa Zɔɔre Ayi Soba na saŋa. Te yɔɔmine fẽẽ lɛ la da zagre Jehoova bare. Kyɛ, te yɔɔmine naŋ e Kristabiiri kpɛŋ zie zaa da kaa ireeŋ ka ba na de la ba menne eŋ Naaŋmen nɔmmo na poɔŋ. Ba da eɛ siri ka ba na tuoree kũũ ka a naŋ fɛre ka ba e lɛ. Noba naŋ moɔ̃ niŋe a de ba menne eŋ Naaŋmen nɔmmo na poɔŋ na baŋ taaɛ sagediibu ka Naaŋmen na ko baŋ nyɔvore naŋ ba taa baaraa. Bonzaa kyɛbee neɛzaa kyebe a na baŋ ko ba nyɔvore naŋ ba taa baaraa a donɛɛ ŋa poɔŋ. (Marko 8:34-36) Kyɛ, nyɔvore naŋ ba taa baaraa yoŋ naaneŋ ka Naaŋmen na ko te.
18 Yelmeŋɛ la, ka teneeŋ ba puoro Jehoova te koŋ baŋ nyɛ nyɔvore naŋ ba taa baaraa. Kyɛ hooŋ leɛ ŋmaa a yɛlɛ ŋa foto ho teɛroŋ poɔŋ nyɛ. Wala ka zemmo na waa ka hooŋ taa nyɔvore naŋ ba taa baaraa a kyɛ ba baŋ Jehoova? Zemmo koŋ taa tɔnɔ zaa, ho koŋ taa popeɛloŋ meŋ. Jehoova ko la o puorebiiri toma naŋ terɛ popeɛloŋ ka ba toŋ a bebi-baaree ŋa poɔŋ. Azuŋ, te na baŋ taaɛ sagediibu ka, Jehoova naŋ maŋ taa ananso o naŋ maale boma zaa na ko teŋ nyɔvore naŋ ba taa baaraa. Kyɛ lɛ yoŋ naane, o na ko teŋ toma naŋ terɛ popeɛloŋ ane yelsonne teŋ na zanna a kyɛ erɛ ka a korɔ te popeɛloŋ meŋ. (Ikilisiasitiz 3:11) Saŋa na teŋ zeŋ ka yuomo turituri para gɛrɛ na, te na zannɛɛ yɛlɛ yaga, kyɛ te daŋ koŋ toɔ̃ zanne baŋ “lɛ na Naaŋmen bondaaloŋ ane o yɛŋ ane o bammo naŋ e zuluŋ seŋ” zaa.—Urom 11:33.
w19.12 28 wɛl. 4
“Yɛ Maŋ Puoro Bareka Yelzaa Poɔŋ”
A somaŋ yaga zaa ka te maŋ puoro Naaŋmen bareka. Nɔkpeɛne zaa kyebe ka wagre mineŋ, ho maŋ teɛrɛɛ kyɔɔta-sonne na Jehoova naŋ korɔ bo, a naŋ gɛrɛ nimitɔɔre a korɔ bo na. Aminekaŋaŋ, ho maŋ lɛ teɛrɛɛ yɛlɛ na zaa Jehoova naŋ erɛ korɔ bo ka lɛ na vɛŋ ka ho ne o niiloŋ e kpeɛŋaa na. (Dut. 8:17, 18; Tom. 14:17) Kyɛ, a ba soma ka te maŋ teɛre yelsonne na zaa Naaŋmen naŋ erɛ korɔ te na wagre fẽẽ kaŋa poɔŋ yoŋ. A na somaŋ yaga zaa ka te maŋ bɔ wagre a teɛre maaloo na Naaŋmen naŋ korɔ hooŋ ane ho nɔŋneba na yɛlɛ gaa tɔɔre. Ka hooŋ maŋ teɛrɛ lɛ na Naaŋmen naŋ yuoro o nu a korɔ bo bontaree na, a na soŋ boŋ ka ho maŋ puoroo bareka, a lɛ vɛŋ ka ho sagedi ka Naaŋmen sereŋ nɔnɔ boŋ, a de bo tegroŋ yaga zaa meŋ.—1 Gyɔɔn 4:9.
w15 10/15 24 wɛl. 7
Naŋ Moɔ̃ Niŋe A Maŋ Teɛrɛ Yɛlɛ Naŋ Na Vɛŋ Ka Ho Neŋ Jehoova Niiloŋ E Kpeɛŋaa
7 A maŋ eɛ mɔlɔ ka te kanne boma, kyɛ a maŋ de la wagre ane moɔbo yaga ka te toɔ̃ teɛre yɛlɛ na teŋ kanne na yɛlɛ gaa tɔɔre. Te naŋ e noba naŋ ba pɛgeyi na zuŋ, gbɛɛ yaga, te teɛroŋ maŋ boɔrɔŋ ka te teɛrɛ yɛlɛ naŋ e mɔlɔ ane yɛlɛ eebo naŋ ba e tuo yɛlɛ. Azuŋ, wagre naŋ soma yaga zaa ko te ka te maŋ teɛre yɛlɛ gaa tɔɔre la saŋa na teŋ wa pɛnnɛ ka yelzaa ba dɔɔnɔ te, ka a zie e bɔin ka gɔmɔ zaa ba kyebe na. A yieloŋ yiele da wa nyɛɛŋ ka, wagre naŋ soma a koo ka o maŋ de teɛre yɛlɛ gaa tɔɔre la saŋa na oŋ maŋ gaŋ o gado zuŋ zisoɔree saŋa. (Yiem. 63:6) Yezu da eɛ neɛ naŋ taa teɛroŋ naŋ paale sori zaa poɔŋ, kyɛ o da baŋɛɛŋ ka a somaŋ yaga ka o maŋ bɔ zie naŋ e bɔin a toɔ̃ teɛre yɛlɛ gaa tɔɔre, a lɛ puore sɔre Naaŋmen meŋ.—Luk. 6:12.
w09 7/15 16 wɛl. 6
Tɔglɔ Yezu—Maŋ De Nɔmmo Wulo Neŋ Noba
6 Ka teneeŋ wa nɔŋ boma mine yɛlɛ, te maŋ boɔrɔŋ ka te manna a yɛlɛ korɔ noba. Ka teneeŋ wa nɔŋ bonkaŋa yɛlɛ neŋ te sukyiri zaa, te maŋ de la eŋnyagroŋ manna yɛlɛ na teŋ nɔŋ na yɛlɛ korɔ noba. Te eŋɛ maŋ yuoroŋ teŋ de eŋnyagroŋ manna a yɛlɛ. Ka teneeŋ wa nɔŋ neɛ kaŋa yɛlɛ, lɛ neŋ o zu teŋ maŋ erɛ. Te maŋ mannɛɛ o soba yɛlɛ korɔ noba. Gbɛɛ yaga, te maŋ boɔrɔŋ ka te manne yɛlɛ na te naŋ baŋ a kyaare o soba na ko te taaba. Te maŋ pugiree o soba, a eŋnɛ o soba, a pɛgrɛ o soba yuori meŋ korɔ noba. Te maŋ erɛɛ lɛ bonso te boɔrɔŋ ka te taaba meŋ wa nɔŋ o soba yɛlɛ a nyɛ gyog-sonne na oŋ taa na.
Baabole Poɔ Yelsonne
w07 11/15 15 wɛl. 6
Ho Maŋ Korɛɛ Ho Taaba Pɛnnoo Bee?
A maŋ eɛ mɔlɔ ka te sãã die ba naŋ mɛ a gaŋ teŋ na mɛ de-paalaa. Te na baŋ de la a yɛlɛ ŋa neŋ o zu manne neŋ yelyaga na teŋ maŋ yele ka te eŋ te taaba faŋa, kyɛbee a kyoɔre ba enne na. Te naŋ e noba naŋ ba pɛgeyi na zuŋ, te zaa taaɛ gbɛ-ŋmɛ ane yɛlɛ teŋ ba maŋ erɛ soŋ. Naa Soolomoŋ yeleeŋ ka: “Sontuuro zaa kye a teŋgane ŋa zuŋ a maŋ erɛ yɛlɛ naŋ soma wagre zaa a daŋ ba e yelfaa zaa.” (Ikilisiasitiz 7:20) A maŋ eɛ mɔlɔ ka te nyɛ te taaba gbɛ-ŋmɛ, a lɛ yeli potu-yɛlɛ meŋ ko ba ka lɛ na vɛŋ ka ba eŋɛ kyoɔre. (Yieme 64:2-4) Kyɛ, ka neɛŋ boɔrɔ ka o maŋ yele yɛlɛ naŋ eŋnɛ noba faŋa, aseŋ ka o taa nyɔge meŋɛ gyogo, a baŋ o zele meŋ taabo.
JULY 22-28
BAABOLE POƆ YELNIMIZEERE YIEME 66-68
Jehoova Maŋ Soŋ Teŋ Tuo Te Tuobu Bebiri Zaa
Lɛ Jehoova Naŋ Maŋ Tu Kyɛ Wono Te Puoro
15 Wagre zaa naane ka Jehoova maŋ tu soseɛlee kaŋa eŋɛŋ kyɛ iri te puoro noɔre ko te. Kyɛ lɛ zaa o naŋ maŋ tu kyɛ iraa nɔɛ na, a na baŋ soŋ teŋ ka te toɔ̃ puoroo yelmennoŋ poɔŋ. Azuŋ maŋ kaara ka ho nyɛ soe na Jehoova naŋ maŋ tu kyɛ ire ho puoro nɔɛ korɔ bo. Te yɔɔpɔge kaŋa ba naŋ boɔlɔ Yoko da teɛre ka Jehoova ba maŋ ire o puoro nɔɛ koroo, kyɛ o da piileeŋ a maŋ sɛgrɛ yɛlɛ na zaa o naŋ puore sɔre Jehoova na binne. Wagre mine puoriŋ, o da de la yɛlɛ na o naŋ sɛge biŋ na kaa a nyɛ ka Jehoova iree o puoro na yaga zie zaa nɔɛ koo, ane ana zaa gba oŋ inne a yɛlɛ na. Saŋa kaŋa, aseŋ ka te maŋ leɛteɛre nyɛ lɛ Jehoova naŋ iri te puoro nɔɛ ko te.—Yiem. 66:19, 20.
w10 12/1 23 wɛl. 6
Maŋ Wulo Nimibaaloŋ Korɔ Bidɔgreba Ba Kultatɔ Naŋ Kpi Kyɛ Bare Ba
Jehoova da de la o vooroŋ soŋ na soŋ noba baŋ sɛge yiele naŋ e forifori, ka a Izerayɛl biiri da maŋ yiele saŋa na zaa baŋ wa lantaa ka ba puore Jehoova na. Jehoova da de la o vooroŋ soŋ na soŋ a yieli yielba baŋ sɛge ka Jehoova eɛ te “saa” ane “sɛreŋmaara.” Leɛ ŋmaa foto ho teɛroŋ poɔŋ a nyɛ lɛ na a yɛlɛ ŋa naŋ na eŋ a Izerayɛl paaloŋ ko-pɔgeba ane bikpeere faŋa saŋa na baŋ wa kyeɛrɛ a yiele ŋa a woŋ a yelbie ŋa. A na eŋ baŋ faŋa ka ba baŋ ka Naaŋmen na kaarɛɛ ba zu, a korɔ ba boma zaa naŋ seŋ neŋ meŋ. (Yieme 68:5; 146:9) Yelbie na teŋ maŋ yeli ka te eŋ bidɔgreba ba kultatɔ naŋ kpi kyɛ bare faŋa na na toɔ̃ tɔɛ ba sukyie, a be ba teɛroŋ poɔŋ meŋ kɔɔre. Te yɔɔdɔɔ kaŋa da eŋɛɛ te yɔɔpɔge kaŋa baŋ boɔlɔ Ruut faŋa. Te yɔɔpɔge Ruut serɛ kpieŋ. Aneazaa ka yuomo 20 parɛɛŋ wa gaa, kyɛ a naŋ wa ta zenɛ ŋa o naŋ maŋ teɛrɛɛ yɛlɛ na te yɔɔdɔɔ na naŋ da yelkoo na. Te yɔɔdɔɔ na da yelko la Ruut ka: “Ho moɔrɔŋ yaga zaa neŋ lɛ na hoŋ guolo ho bidɔba bayi na. Moɔ̃ niŋe, ta wa bala.” Ruut yeleeŋ ka: “Saŋa na maŋ wa woŋ o yelbie na, a da eŋ maŋ faŋa yaga zaa.” Yelmeŋɛ zaa, “nimimaaroŋ yelbie waa ŋa tĩĩ naŋ soma.” A na baŋ eŋɛɛ bidɔgreba ba kultatɔ naŋ kpi kyɛ bare ba faŋa yaga zaa a gaŋ lɛ na teŋ teɛre. (Yeng Yelibie 15:4, Contemporary English Version) Ho teɛrɛɛ nɔmmo yelbie mine hoŋ na baŋ yeli a de pugi bidɔgrɔ kaŋa o kultatɔ naŋ kpi kyɛ baroo bee?
w09 4/1 31 wɛl. 1
Bikpeere Zaa Saa
A BAABOLE yeleeŋ ka: “Naaŋmen be la o kpeɛbo zie naŋ e forifori na, O eɛ bikpeere saa.” (Yieme 68:5) A yɛlɛ ŋa vooroŋ soŋ naŋ soŋ a yieloŋ yiele oŋ sɛge eŋ a Baabole poɔŋ na wuli teŋ yelnimizeɛ kaŋa a kyaare Jehoova Naaŋmen. A yelnimizeɛ la ka, ka nobaŋ wa be awonaa poɔŋ, Jehoova nimiri maŋ be la ba eŋɛŋ. Te wa baŋɛɛ lɛ na Jehoova naŋ teɛrɛ bikpeere yɛlɛ a yi Bege na Jehoova naŋ da de ko a Izerayɛl biiri na. A dɛndɛŋ saŋa baŋ sɛge a yelbiri “bikpeeba” eŋ a Baabole poɔŋ be la Yiibu 22:22-24. Yɛ vɛŋ ka te zanne a sɛgre ŋa yɛlɛ gaa tɔɔre, a nyɛ yɛlɛ teŋ na baŋ zanne yi be.
w23.01 19 wɛl. 17
Jehoova La Sonnɔ Bo Ka Ho Yɛlɛ Nyɛrɛ Nimitɔɔre Gaabo Lɛ
17 Kanne Yieme 40:5. Ka neɛŋ wa duoro taŋazu, o maŋ boɔrɔŋ ka o do te ta a taŋazu baaraa meŋɛ. Kyɛ saŋa na oŋ duoro a taŋa na, o maŋ wa ta la zie kaŋa a are a leɛ kaa nyɛ lɛ a zie naŋ veɛlɛ aseŋ. Lɛ neŋ o zu la, aseŋ ka te maŋ bɔ wagre a are, a teɛre lɛ na Jehoova naŋ sonnɔ te, teŋ nyɛrɛ nimitɔɔre gaabo aneazaa ka te tuoree yelkpeɛne. Azuŋ bebiri zaa, maŋ soore ho meŋɛ ka: ‘Bo maaloo la ka Jehoova ko ma zenɛ ŋa? Aneazaa ka yelkpeɛŋaa na maŋ tuoro na naŋ ba baare, kyɛ sobuo ka Jehoova sonnɔ ma maŋ dire kannyiri?’ Maŋ moɔrɔ ka ho nyɛ maaloo bonyeni Jehoova naŋ korɔ bo ka lɛ vɛŋ ka ho yɛlɛ nyɛrɛ nimitɔɔre gaabo.
Baabole Poɔ Yelsonne
w06 6/1 10 wɛl. 5
Yelnimizeere Naŋ Be A Yieme Yiiloŋ Gane Poɔŋ
68:18—Nembobo la a ‘nensaaleba ba naŋ vɛŋ baŋ e kyɔɔtaare’ na? Ba da eɛ dɔba na a Izerayɛl biiri naŋ da zɔɔtoɔ̃ a nyɔge ba saŋa na baŋ da wa zɔɔrɔ ka ba deɛ a Noɔre Emmo Teŋgane na. A puoriŋ, ba da kaa iree a dɔba ŋa ka ba sonnɔ a Liivai noba ba toma na poɔŋ.—Eezira 8:20.
JULY 29–AUGUST 4
BAABOLE POƆ YELNIMIZEERE YIEME 69
Bo Yɛlɛ Mine Ka Yɛlɛ Naŋ Be Yieme 69 Yelka Yezu Na Eŋ?
w11 8/15 11 wɛl. 17
Ba Da Kyɛnlɛɛ A Mɛzaaya
17 Noba na kyiiree a Mɛzaaya weɛ lɛ. (Yiem. 69:4) Bitontona Gyɔɔn da sɛgɛɛ Yezu yelbie na oŋ da yelka: “Ka maaŋ da ba toŋ toma na neɛzaa naŋ ba toŋ [a noba ŋa] poɔŋ yɛŋ, lɛ yɛŋ ba koŋ taa faaloŋ zaa; kyɛ pampana ŋa ba nyɛ maŋ, a lɛ kyiiri maaŋ ane N Saa zaa lantaa. Kyɛ a yɛlɛ ama nyɛɛ eebo ka lɛ na vɛŋ ka yɛlɛ na baŋ sɛge eŋ a Bege poɔŋ na nyɛ eebo: ‘N ba e yelfaa zaa kyɛ baŋ kyiiri ma.’” (Gyn. 15:24, 25) Gbɛɛ yaga, a yelbiri “Bege” maŋ are ko la a Baabole sɛgre naŋ da bebe sɛre kyɛ ka Yezu wa na. (Gyn. 10:34; 12:34) Yɛlɛ na baŋ sɛge eŋ Matio, Marko, Luka ane Gyɔɔn gama na poɔŋ sereŋ wuleeŋ ka noba da kyiiree Yezu. A meŋɛmeŋɛŋ, a Gyuu ŋmenpuore wedeɛreba na da ba nɔnɔ Yezu yɛlɛ fẽẽ zaa. Kyɛ lɛ yoŋ naane, Krista meŋɛ da yeleeŋ ka: “A donɛɛ noba ba taa ananso zaa ka ba kyiiri yɛ, kyɛ ba kyiiri maŋ, bonso N di la sieree ka toma na ba naŋ tonɔ na waa la faa.”—Gyn. 7:7.
w10 12/15 8 wɛl. 7-8
Taa Eŋnyagroŋ A Ko Yelmeŋɛ Puoruu
7 Yuoni 30 C.E. saŋa na baŋ da dire a Parebare Tigri na, Yezu da eɛ yelkaŋa a de wuli lɛ o naŋ taa eŋnyagroŋ aseŋ. O da eɛ a yɛlɛ ŋa saŋa na oŋ wa piili o naaŋ moɔloo toma na. Yezu neŋ o potuuribo na da gaaɛ Gyɛruzɛlɛm a te nyɛ “noba naŋ koɔrɔ nii, peere, ane naŋmama a ŋmenpuoredieŋ, o da nyɛɛ noba naŋ da maŋ leɛrɛ libie meŋ naŋ zeŋ ba kogri zuŋ.” Wala ka Yezu da e o yɛlɛ? Sobuo ka yɛlɛ na Yezu naŋ da e na da nyɛ kpeɛ̃o o potuuribo na zuŋ aseŋ?—Kanne Gyɔɔn 2:13-17.
8 Yɛlɛ na Yezu naŋ da e a kyɛ yeli ana saŋa na da vɛŋɛɛŋ ka o potuuribo na teɛre daŋyelbo yelbie na a yieloŋ yiele Deevid naŋ da sɛge na. Deevid da sɛgɛɛŋ ka: “Eŋnyagroŋ na maŋ taa ko ho die na paalɛɛ N eŋdaa zaa.” (Yiem. 69:9) Bonso ka a yɛlɛ ŋa e nimizeɛ? Ananso la ka, yɛlɛ na Yezu naŋ da e na na toɔ̃ vɛŋeŋ ka o kɔŋ o nyɔvore. Noba naŋ da so kpeɛ̃o a ŋmenpuoredieŋ da la a ŋmenpuore wedeɛreba, a bege wuliwulbo ane noba mine. Bana la da ko a tontonneba ŋa sori ka ba faara noba a nyɛrɛ tɔnɔ naŋ ba seŋ neŋ yire ba zie. Azuŋ, Yezu naŋ iri ba olo a lɛ sããna yɛlɛ na baŋ sɛgre biŋ na da waa ŋa oŋ iri zɔɔrɔ neŋ a ŋmenpuoreba yelsɛgree na baŋ da sɛgre biŋ ana saŋa na. Saŋa na o potuuribo naŋ da kaa a yɛlɛ velaa zaa baare na, ba da nyɛɛŋ ka, ‘eŋnyagroŋ na oŋ taa ko Naaŋmen die na,’ kyɛbee eŋnyagroŋ na oŋ taa ko yelmeŋɛ puoruu na da pɛlɛɛŋ weliweli. Kyɛ, boŋ la eŋnyagroŋ? Ka lɛ neɛ naŋ de nimizeeloŋ erɛ neŋ yɛlɛ, ane neɛ naŋ taa eŋnyagroŋ, wɛltaa kaŋa be la ba kpakyagaŋ bee?
g95 10/22 31 wɛl. 4
Sukyiri Kyɛre Na Baŋ Ko La Neɛ Bee?
Noba mine yeleeŋ ka, yɛlɛ na kaŋa naŋ vɛŋ ka Yezu Krista kpi la sukyiri kyɛre. A Baabole daŋyeleeŋ ka: “Nyaaba kyɛrɛɛ N sukyiri, a feli koŋ baŋ mãã.” (Yieme 69:20) Yɛlɛ na a Baabole naŋ yeli a zie ŋaŋ na nyɛɛ eebo meŋɛmeŋɛ bee? Aminekaŋaŋ. Bonso teŋ yeli lɛ? Ananso la ka, saŋa na baŋ da nyɔge Yezu na, ba da ŋmɛ oŋ yaga zaa a dɔgroo yaga. Kyɛ lɛ yoŋ naane, ba da lɛ e oŋ yɛlɛ naŋ kyɛrɛ sukyiri meŋ yaga. (Matio 27:46; Luka 22:44; Hiburu 5:7) Ane meŋ, bon nanso teŋ na baŋ yelka sukyiri kyɛre eɛ yeli na kaŋa naŋ da ko Yezu la ka, saŋa na neɛ kaŋa naŋ da de kpane a kyɔge Yezu lomboriŋ o kũũ puoriŋ na, boma mine naŋ da waa ŋa “zĩĩ ane koɔ̃” da yiree o lomboriŋ a kyire. Ka neɛ sukyiriŋ wa kyɛre, kyɛbee ka gyiilii kaŋa naŋ taa zĩĩ wa puri o soba sukyiriŋ, a na baŋ vɛŋeŋ ka zĩĩ wa be o soba nyaa. Kyɛbee saŋa mine a zĩĩ na baŋ wa be la bon na naŋ maŋ e baaloo a taa koɔ̃ a pɔge nensaalaa sukyiri na. (Ba boɔlɛɛ ana bon ŋa Nansaalee kɔkɔre poɔŋ ka pericardium.) Ka a yɛlɛŋ ŋaŋ wa e, ka neɛŋ de kpane kyɔge o soba lombori, “zĩĩ ane koɔ̃” na kyireŋ.—Gyɔɔn 19:34.
it-2 650
Teɛ Naŋ Waa Tuo
A Baabole yeleeŋ kyaare a Mɛzaaya ka, ba na de la “boma naŋ waa tuo” gyɛre neŋ bondirii eŋɛŋ ko a Mɛzaaya ka o di. (Ym 69:21) A yɛlɛ ŋa da nyɛɛ eebo saŋa na baŋ da kpa Yezu Krista na. Ba da de la kaliŋkaare kyɛbee lɛntɔɔ gyɛre neŋ waiŋ eŋɛŋ a koo ka o nyu. Kyɛ saŋa na Yezu naŋ wa lɛne a baŋ boma naŋ be a bonnyuurii poɔŋ na, o da zagrɛɛŋ ka o nyu a. Ka o naŋ nyu a, o koŋ lɛ wono eŋbaare na oŋ da wono a dɔgɛɛ daa zuŋ na. Saŋa na Matio naŋ wa sɛgrɛ a daŋyelbo ŋa yɛlɛ ane lɛ na aŋ nyɛ eebo Matio 27:34 poɔŋ na, o da de la Giriki yelbiri kho·leʹ (kyɛbee kaliŋkaare bee lɛntɔɔ a toŋ neŋ toma). A yelbiri ŋa neŋ o zu la be Yieme 69:21 a Giriki Septuagint poɔŋ. Kyɛ, Marko yɛŋ da sɛgɛɛŋ ka ba da de la mɛɛ ko Yezu ka o nyu (Mk 15:23). A yɛlɛ ŋa vɛŋɛɛŋ ka noba mine teɛre ka “boma naŋ waa tuo” kyɛbee a “kaliŋkaare bee lɛntɔɔ” na baŋ da de ko Yezu ka o nyu na da eɛ “mɛɛ.” Noba mine meŋ teɛrɛɛŋ ka, aminekaŋaŋ ba da de la kaliŋkaare bee lɛntɔɔ ane mɛɛ zaa laŋ gyɛre a bonnyuurii poɔŋ.
Baabole Poɔ Yelsonne
w99 1/15 18 wɛl. 11
Maŋ Yi Yelmennoŋ Poɔŋ A Zɛge Ho Nuuri A Puore Sɔre Naaŋmen
11 Ka noba mineŋ wa puore sɔrɔ Naaŋmen, gbɛɛ yaga ba maŋ sɔrɛɛ bonkaŋa yire Naaŋmen zieŋ. Kyɛ, nɔmmo te naŋ taa ko Jehoova seŋ ka a maŋ tɔ te sukyie ka te pugiroo, a lɛ puoruu bareka meŋ saŋa na teŋ wa are te taaba gbɛbɔgriŋ a puoro kyɛbee a puoro te yoŋ na. Bitontona Pɔɔl da sɛgɛɛŋ ka: “Yɛ ta vɛŋ ka yelzaa dɔɔnɔ yɛ, kyɛ a yi yelzaa poɔŋ yɛ maŋ tu puoro eŋɛŋ, koŋ sɔroo eŋɛŋ, bareka puoruu eŋɛŋ, kyɛ vɛŋ ka Naaŋmen baŋ yɛ yelfɛree; lɛ la ka Naaŋmen maaroŋ naŋ gaŋ bammo zaa na go yɛ sukyie ane yɛ teɛrɛ a tuuro Krista Yezu eŋɛŋ.” (Filipae 4:6, 7) Yelmeŋɛ la, aseŋ ka te maŋ koŋ sɔre Naaŋmen, a sɔre yɛlɛ meŋ yi o zie. A lɛ eɛ nimizeɛ meŋ ka te maŋ puore Jehoova bareka neŋ yelsonne na zaa oŋ erɛ korɔ te eŋgannoŋ neŋ siiloŋ poɔŋ na. (Yeng Yelibie 10:22) A yieloŋ yiele da yieleeŋ a yelka: “De bareka puoruu iri neŋ sareka ko Naaŋmen, paale nɔɛ na zaa hoŋ eŋ ko Neɛ Naŋ Do Saa Yaga Zaa na.” (Yieme 50:14) Deevid da sɛgɛɛ yieloŋ kaŋa a yeli yɛlɛ mine naŋ toɔrɔ sukyiri yaga zaa. O da yeleeŋ ka: “N na kyɛɛ pugibu yiele a de pugi Naaŋmen yuori na, N na de la bareka puoruu a pugoo.” (Yieme 69:30) Ho ba nyɛ ka aseŋ ka te meŋ maŋ erɛ lɛ saŋa teŋ wa are te taaba gbɛbɔgriŋ a puoro sɔrɔ Naaŋmen ane saŋa na teŋ wa puoro te yoŋ sɛŋ na bee?
AUGUST 5-11
BAABOLE POƆ YELNIMIZEERE YIEME 70-72
Manne Naaŋmen Kpeɛ̃o Na Yɛlɛ Ko Dɔge-tutaa Naŋ Waana
w99 9/1 18 wɛl. 17
Baapaalba—Yɛ Moɔrɔ Ka Yɛ Taa Teɛroŋ Naŋ Kyile
17 Ka yɛneeŋ boɔrɔ ka yɛ faa yɛ menne yi Setaana kyɛbihi na poɔŋ, a fɛrɛɛŋ ka yɛ kaara yɛ menne velaa zaa. Saŋa mine meŋ a na fɛreŋ ka yɛ taa nyaa kpoŋ. Bonso teŋ yeli lɛ? Ananso la ka, saŋa mine yɛ na nyɛŋ ka noba na iri zɔɔrɔ ne yɛŋ. Yɛ taa baapaalba yoŋ naaneŋ na erɛ lɛ, kyɛ noba naŋ be a donɛɛ poɔŋ meŋ na baŋ iri zɔɔrɔ ne yɛŋ. A yieloŋ yiele Deevid da puore sɔrɛɛ Naaŋmen a yelka: “Bonso hooŋ la N teɛretɔ, Oo Soobu Kpeɛ̃o Zaa Daana Jehoova; N baapaaloŋ saŋa zaa maŋ dɛle bo. Oo Naaŋmen, N baapaaloŋ saŋa zaa hoŋ wuli ma, a naŋ wa ta pampana N naŋ mannɛɛ ho toŋseɛlɛ yɛlɛ.” (Yieme 71:5, 17) Noba yaga baŋɛɛŋ ka Deevid da eɛ neɛ naŋ taa nyaa kpoŋ. Kyɛ, bo saŋa oŋ da piili zanna lɛ oŋ na baŋ taa a nyaa ŋa? Saŋa na oŋ da naŋ e baapaalaa. Noba yaga baŋɛɛŋ lɛ na Deevid naŋ da ko Golaiyat na yɛlɛ. Kyɛ sɛre ka Deevid na zɔɔ neŋ Golaiyat na, o da wuleeŋ ka o taaɛ nyaa kpoŋ saŋa na oŋ da kaara o saa peere na. Saŋa na oŋ da kaara o saa peere na o da ko la gbeŋni ane gboŋgbori. (1 Saamiuel 17:34-37) Kyɛ Deevid da yeleeŋ ka Jehoova la somoo oŋ toɔ̃ de nyaa e a yɛlɛ ama zaa. O da yeleeŋ ka o ‘baapaaloŋ saŋa zaa oŋ dɛle’ Jehoova. Deevid naŋ da dɛle Jehoova zuŋ oŋ da toɔ̃ are yelkpeɛne zaa oŋ da tuoro noɔreŋ. Ka hooŋ meŋ dɛle Jehoova, o na ko boŋ nyaa kpoŋ ane faŋa ka ho de ‘zɔɔtoɔ̃ neŋ a donɛɛ.’—1 Gyɔɔn 5:4.
g04 10/8 23 wɛl. 3
Lɛ Aŋ Seŋ Ka Te Kaara Noba Na Yuomo Naŋ Nyɛ Nimitɔɔre Gaabo Na Zu
A yieloŋ yiele da puore sɔrɛɛ Naaŋmen a yelka: “Ta wa derɛ ma lɔɔrɔ saŋa na N yuomo naŋ wa gaa nimitɔɔre na; ta wa gyeɛre ma bara saŋa na N faŋa naŋ baara.” (Yieme 71:9) Naaŋmen ba maŋ de o yelmeŋɛ puorebiiri ‘lɔɔ bare,’ haali saŋa na baŋ wa teɛre ka ba eɛ neŋnyaane a koŋ baŋ lɛ toŋ tonkpeɛne na baŋ da tonɔ saŋa kaŋa naŋ pare na. A yieloŋ yiele da ba teɛre ka Jehoova gyɛ oŋ bare. Kyɛ, o da wa nyɛɛŋ ka a eɛ nimizeɛ ka o dɛle Jehoova saŋa na o yuomo naŋ nyɛrɛ nimitɔɔre gaabo na. Jehoova meŋ maŋ yi la yelmeŋɛ nɔmmo poɔŋ a sonnɔ a noba ŋa taa ba nyɔvore zemmo zaa poɔŋ. (Yieme 18:25) Gbɛɛ yaga, o maŋ tu la te Kristabitaaba zieŋ a de a sommo ŋa ko ba.
w14 1/15 23 wɛl. 4-5
Puoro Jehoova Sɛre Kyɛ Ka Toɔrɔ Bebie Na Wa
4 Ka hooŋ e neŋkpoŋ ho tuoree yɛlɛ yaga ho zemmo poɔŋ ka lɛ vɛŋ hoŋ zanne yɛlɛ yaga yi be. Azuŋ, soorebiri naŋ e nimizeɛ aŋ seŋ ka ho soore ho meŋɛ la ka, ‘Pampana ŋa N taaɛ faŋa neŋ laafeeloŋ naŋ soma, bo yɛlɛ aŋ seŋ ka N erɛ N zemmo poɔŋ?’ Aŋa Kristabie naŋ baŋ yɛlɛ yaga nimiri, ho taaɛ apoɔsoe yaga ka ho e yɛlɛ mine soŋ ho taaba. Ho na baŋ de la yɛlɛ na hoŋ zanne baŋ na wuli baapaalba naŋ zanna Jehoova yɛlɛ. Ka hooŋ maŋ manne popeɛloŋ na hoŋ nyɛ saŋa na hoŋ puoro Naaŋmen na korɔ ba, a na eŋ baŋ faŋa yaga zaa. Naa Deevid da puore sɔrɛɛ Naaŋmen ka o ko o sori ka o toɔ̃ e lɛ. O da sɛgɛɛŋ ka: “Oo Naaŋmen, N baapaaloŋ saŋa zaa hoŋ wuli ma . . . Haali saŋa na maŋ kore ka N zukɔɔloŋ pɛle na, Oo Naaŋmen, ta wa gyeɛrɛ ma bara. Vɛŋ ka N manne ho faŋa na yɛlɛ ko dɔge-tutaa naŋ waana, a lɛ manne ho kpeɛ̃o na yɛlɛ ko noba naŋ waana na.”—Yiem. 71:17, 18.
5 Sobuo hoŋ na baŋ tu a de yɛlɛ na zaa hoŋ zanne baŋ a yuomo ŋa zaa poɔŋ na wuli neŋ ho taaba? Ho na baŋ toŋboɔlɛɛ baapaalba naŋ puoro Jehoova ka ba wa ho die ka ho ne ba di dama a eŋ taa faŋa. Ho na baŋ toŋboɔle baŋ ka ba wa poɔ ho eŋɛŋ a naaŋ moɔloo toma poɔŋ, lɛ na yuo la sori ko bo ka ho wuli ba popeɛloŋ na hoŋ nyɛrɛ Jehoova puoruu poɔŋ na. Elaihu naŋ da bebe takoreŋ saŋa na da yeleeŋ ka: “Vɛŋ ka noba yuomo naŋ gaa nimitɔɔre yeli yɛlɛ, a vɛŋ ka noba yuomo naŋ e yaga manne yɛŋ yɛlɛ.” (Joob 32:7) Bitontona Pɔɔl da eŋɛɛ pɔgeba naŋ e Kristabiiri faŋa ka ba maŋ tu ba yelyaga ane ba yel-eree eŋɛŋ a eŋnɛ ba taaba faŋa. O da sɛgɛɛŋ ka: “Vɛŋ ka pɔgeba na yuomo naŋ gaa nimitɔɔre na . . . maŋ wulo yɛlɛ naŋ soma.”—Tit. 2:3.
Baabole Poɔ Yelsonne
it-1 768
Yuferate Koɔnbɔɔ
A Izerayɛl Paaloŋ Na Tɛribɔgri Ta Ziiri. Saŋa na Naaŋmen neŋ Aboraham naŋ wa maale nɔlaŋ na, Naaŋmen da yelko oŋ ka o na de la a teŋgane naŋ “yi a Igyipiti koɔnbɔɔ na te ta a koɔnbɔɔ naŋ e kpoŋ na, a Yuferate koɔnbɔɔ na” ko Aboraham yaane. (Mn 15:18) Naaŋmen da lɛ mannɛɛ a nɔlaŋ ŋa yɛlɛ ko a Izerayɛl paaloŋ noba. (Yi 23:31; Du 1:7, 8; 11:24; Js 1:4) Dɛndɛŋ Tungkori 5:9 yeleeŋ ka, sɛre ka Deevid na piili o naaloŋ diibu na, a Ruubeŋ bale na noba da yɛllɛɛ ba kpɛziiri na “a te ta zie na a wɛgyɛŋ naŋ piili a Yuferate koɔnbɔɔ naŋ.” Ka neɛŋ wa tu “Giiliyad sapare sɛŋ” a gɛrɛ, o na nyɛɛ a Yuferate koɔnbɔɔ naŋ gaŋ a ta ŋa kilometare 800 (kyɛbee maalere 500). (1Tu 5:10) Lɛ wuleeŋ ka a Ruubeŋ bale na noba da te kpeɛrɛɛ Giiliyad Sapare sɛŋ a te ta Siiriya teŋɛ na biiree naŋ be yaga zaa na piiluu zie. Ana zie na da eɛ biiree teŋɛ lɛɛŋ a te ta Yuferate koɔnbɔɔ na. (RS Baabole na yeleeŋ ka, “a piili a biiree teŋɛ na a te ta a Yuferate koɔnbɔɔ na lombozaala kaŋa”; JB Baabole na meŋ kannɛɛŋ ka, “a piili a biiree teŋɛ na a te ta zie na a Yuferate koɔnbɔɔ naŋ piili na.”) Lɛ wuleeŋ ka, noɔre na Jehoova naŋ da eŋ na da nyɛɛ eebo saŋa na Deevid neŋ Soolomoŋ naŋ da piili ba naaloŋ diibu na. Ba naaloŋ diibu na saŋa, a Izerayɛl paaloŋ tɛribɔgri na da yɛllɛŋ lɛɛŋ a te ta Zooba naŋ da e Areemiya naa na naaloŋ na poɔŋ. Lɛ wuleeŋ ka a tɛribɔgi da te taɛ a Yuferate koɔnbɔɔ na noɔreŋ. Ka hooŋ te ta zie na a Izerayɛl paaloŋ tɛribɔgi naŋ da ta na a ŋmaa a Yuferate koɔnbɔɔ, ho na kpɛɛ Siiriya paaloŋ samun-gɔɔ sɛŋ. (2Sa 8:3; 1Nm 4:21; 1Tu 18:3-8; 2Tu 9:26) Noba yaga naŋ da baŋ a Yuferate koɔnbɔɔ na zuŋ, gbɛɛ yaga ba da maŋ boɔlooŋ ka “a Koɔnbɔɔ.”—Js 24:2, 15; Ym 72:8.
AUGUST 12-18
BAABOLE POƆ YELNIMIZEERE YIEME 73-74
Bo Yɛlɛŋ Na Baŋ Pɔge Te Ka Teneeŋ Erɛ Noba Naŋ Ba Puoro Naaŋmen Nyuuri?
w20.12 19 wɛl. 14
‘Jehoova . . . Maŋ Faa La Noba Na Eŋɛ Naŋ Kyoɔre Na’
14 Neɛ naŋ sɛge Yieme 73 da eɛ Liivai dɔɔ. Oŋ da e Liivai neɛ na zuŋ, o da taaɛ apoɔsori naŋ e o yoŋ ka o tonɔ toma Jehoova ŋmenpuoredie na poɔŋ. Kyɛ, a wa ta la saŋa kaŋa o zemmo poɔŋ ka o eŋɛ zaa da kyoɔre. Boŋ da vɛŋ ka o eŋɛ kyoɔre? O da piili erɛɛ neŋfaare ane noba naŋ erɛ taŋkaŋyɛlɛ nyuuri. Faaloŋ na baŋ da erɛ na zuŋ naane oŋ da erɛ ba nyuuri, kyɛ a da waa ŋa a noba ŋa da taaɛ bontaree yaga. A da waa ŋa a neŋfaare ŋa taaɛ bondaaloŋ, zeŋ laafeɛ, ka yelzaa meŋ ba dɔɔnɔ ba. (Yiem. 73:2-9, 11-14) Lɛ na neŋfaare yɛlɛ naŋ da nyɛrɛ nimitɔɔre gaabo na da vɛŋɛɛŋ ka a yieloŋ yiele ŋa eŋɛ da kyoɔre yaga zaa, azuŋ o da yeleeŋ ka: “Yelmeŋɛ zaa, lɛ na maŋ moɔ a taa sukyiripeɛlaa na ane lɛ na maŋ pɛge N nuuri aŋ e forifori na ba taa tɔnɔ zaa.” A pɛlɛɛŋ ka yɛlɛ na a yieloŋ yiele ŋa naŋ da teɛrɛ na toɔ̃ sãã la o neŋ Jehoova niiloŋ na.
w20.12 19-20 wɛl. 15-16
‘Jehoova . . . Maŋ Faa La Noba Na Eŋɛ Naŋ Kyoɔre Na’
15 Kanne Yieme 73:16-19, 22-25. A Liivai dɔɔ ŋa da te ‘kpɛɛ Naaŋmen kpɛzie naŋ e forifori na.’ Aminekaŋaŋ, o da poɔ la o taa Jehoova puorebiiri poɔŋ, lɛ da somooŋ oŋ toɔ̃ mãã o meŋɛ a gyieli yɛlɛ na oŋ da tuoro na yɛlɛ gaa nimitɔɔre. O da wa nyɛɛ a yɛlɛ aŋ pɛle weliweli, o da puore sɔrɛɛ Jehoova meŋ. Boŋ da yi a poɔŋ wa? A da somooŋ oŋ wa nyɛ ka teɛroŋ na oŋ da taa na da ba soma. O da wa nyɛɛŋ ka o da piili teɛrɛɛ yɛlɛ naŋ na vɛŋ ka o wɛle o meŋɛ yi Jehoova zie. O da lɛ wa baŋɛɛŋ ka neŋfaare eɛ noba naŋ are “teŋɛ naŋ sara zuŋ.” Ba baaroo meŋ koŋ “soma fẽẽ zaa.” Kyɛ yɛlɛ naŋ da soŋ a Liivai dɔɔ ŋa naŋ da e yieloŋ yiele oŋ zɔɔtoɔ̃ nyuuri na oŋ da erɛ neŋfaare na la ka, o da leɛ taaɛ teɛroŋ na Jehoova naŋ taa kyaare yɛlɛ na. Saŋa na oŋ da wa e lɛ na, o da leɛ taaɛ sukyirimaaroŋ neŋ popeɛloŋ. Azuŋ o da yeleeŋ ka: “A yi [Jehoova] puoriŋ N ba lɛ boɔrɔ bonzaa naŋ be a teŋɛzuŋ.”
16 Yɛlɛ teŋ na baŋ zanne yi be. Yɛ daŋ ta wa vɛnɛ ka te erɛ neŋfaare yeltaree naŋ nyɛrɛ nimitɔɔre gaabo nyuuri zaa. Ba ba taa emmaaroŋ meŋɛmeŋɛ. A koŋ kɔɔre ba emmaaroŋ na na baareŋ. Ba ba taa nendaare kaŋa meŋ teɛretɔ. (Ikil. 8:12, 13) Ka teneeŋ erɛ ba nyuuri a na vɛŋeŋ ka te enne kyoɔre, a lɛ sãã te neŋ Jehoova niiloŋ na meŋ. Azuŋ, ka hooŋ wa nyɛ neŋfaare yeltaree naŋ nyɛrɛ nimitɔɔre gaabo ka lɛ vɛŋ hoŋ erɛ ba nyuuri, moɔ a e yɛlɛ na a Liivai dɔɔ naŋ da e na. De kawane na Naaŋmen naŋ yi nɔmmo poɔŋ korɔ bo na tonɔ neŋ toma, ka hooŋ vɛŋ ka ho popeɛloŋ zaa be Jehoova eŋɛŋ, ho na nyɛɛ popeɛloŋ meŋɛmeŋɛ. Lɛ na soŋ boŋ ka ho naŋ kyɛnɛ a sori naŋ gɛrɛ “a nyɔvo-meŋɛ” na poɔ.—1 Tim. 6:19.
w14 4/15 4 wɛl. 5
Tɔglɔ Moosis Sagediibu Na
5 Wala hoŋ na toɔ̃ e a zagre ‘faaloŋ noɔ̃ hoŋ na woŋ wagre belaŋ kaŋa poɔŋ’ bare? Daŋ ta inne ka, noɔ̃ teŋ na woŋ faaloŋ tommo poɔŋ maŋ bebeŋ wagre fẽẽ poɔŋ. Ka hooŋ taa sagediibu naŋ e kpeɛŋaa, a na soŋ boŋ ka ho nyɛ ka “a donɛɛ para gɛrɛŋ, ka o vɔlaa meŋ para gɛrɛ.” (1 Gyɔɔn 2:15-17) Maŋ teɛrɛ neŋfaare naŋ moɔ̃ niŋe a erɛ yelfaare, a ba erɛ kaŋdabaŋkalɛ baaroo yɛlɛ. Ba eɛ noba naŋ “are teŋɛ naŋ sara zuŋ . . . ba baaroo ba maŋ soma fẽẽ zaa!” (Yiem. 73:18, 19) Azuŋ, ka hooŋ wa tuore pigrinyɛ ka ho e yelkaŋa naŋ ba soma, soore ho meŋɛ ka, ‘Wala maŋ boɔrɔ ka N nendaare kaŋa waa?’
w13 2/15 25-26 wɛl. 3-5
Ta Vɛŋ Ka Yelkaŋa Pigi Bo Sori Ka Ho Ta Kpɛ Gyeremɛ Poɔ
3 A yieloŋ yiele da vɛŋɛɛŋ aŋ pɛle ka o taaɛ sagediibu ka Jehoova na nyɔgɛɛ o nuduluŋ a de o kpɛ neŋ gyeremɛ meŋ poɔŋ. (Kanne Yieme 73:23, 24.) Sobuo ka Jehoova maŋ tu a e lɛ? Jehoova maŋ tu la soe yaga a de o puorebiiri naŋ sigri ba menne kpɛ neŋ gyeremɛ poɔŋ. O maŋ soŋɛɛ o puorebiiri baŋ baŋ o poboɔbo yɛlɛ velaa zaa. (1 Kor. 2:7) Noba na naŋ kyɛllɛ wono o yelbiri a lɛ sagra o nɔɛ meŋ ne o maŋ taaɛ niiloŋ naŋ e kpeɛŋaa yaga zaa.—Gyi. 4:8.
4 Jehoova de la a naaŋ moɔloo toma naŋ terɛ gyeremɛ yaga zaa na eŋ o puorebiiri nuuriŋ. (2 Kor. 4:1, 7) A naaŋ moɔloo toma maŋ de teŋ kpɛ neŋ gyeremɛ poɔŋ. Jehoova eŋɛɛ noɔre ko noba naŋ maŋ de apoɔsoe na baŋ taa a de pugiroo, a lɛ tonɔ tonkpeɛne sonnɔ ba taaba na ka: “Noba naŋ eŋnɛ ma, N meŋ maŋ eŋnɛ baŋ.” (1 Saa. 2:30) Noba naŋ erɛ lɛ maŋ taaɛ yosoŋ Jehoova nimitɔɔreŋ. Gbɛɛ yaga, ba Kristabitaaba meŋ maŋ yelee yelsonne na baŋ erɛ na yɛlɛ.—Yeng. 11:16; 22:1.
5 Bo maaloo ka noba naŋ “de [ba] teɛretɔ zaa eŋ Jehoova eŋɛŋ, a tuuro o sori” na nyɛ? Jehoova eŋɛɛ noɔre ko ba ka: “O na zɛge [baŋ] ka [ba] do a kyɛ vɛŋ ka [ba] zeŋ a teŋgane zuŋ. Saŋa na oŋ na wa iri neŋfaare zaa bare na, [ba menne] na de la [ba nimie] nyɛ.” (Yiem. 37:34) A noba ŋa kaarɛɛ soriŋ ka ba nyɛ gyeremɛ o tɔ naŋ ba kyebe, ba na nyɛɛ nyɔvore naŋ ba taa baaraa.—Yiem. 37:29.
Baabole Poɔ Yelsonne
it-2 240
Livayataŋ
Yieme 74 wulee sori na Jehoova naŋ tu a faa o puorebiiri. O wɛlbo 13 neŋ 14 de la yɛlɛ bigree mine a wuli sori na Jehoova naŋ tu a faa a Izerayɛl biiri yi a Igyipiti noba nuuriŋ. Ka hooŋ kaa a sɛgre soŋ, o boɔlɛɛ “dun-bɛrɛ naŋ be a koɔ̃ne poɔŋ,” a kyɛ lɛ yelka ba ŋmarɛɛ “Livayataŋ” zuri. [Hiburu kɔkɔre poɔŋ ba maŋ yeliŋ ka, than·ni·nimʹ, ka a naŋ wa e yaga baŋ yelka tan·ninʹ]. A yɛlɛ ŋa wulee saŋa na Jehoova naŋ da faa a Izerayɛl biiri yi a Igyipiti noba nuuriŋ, a kyɛ ko Faaro neŋ o sogyare na a maŋ-zeɛ poɔŋ na. Ka hooŋ kaa Aramaic Targums sɛgre na poɔŋ, ba ba yelka “Livayataŋ zuri,” kyɛ ba sɛge eŋɛɛ beŋ ka “Faaro sogyare naŋ e kpeɛne na.” (De manne neŋ Iz 29:3-5, beŋ baŋ de Faaro manne neŋ “mane poɔ dun-kpoŋ” naŋ be a Nael baa na poɔŋ; ane Iz 32:2.) Aizeeya 27:1 wuleeŋ ka Livayataŋ (LXX, kyɛbee “a diraagɔŋ”) are ko la naaloŋ kaŋa kyɛbee yelsɛgraa kaŋa naŋ be a donɛɛ lombori zaa. Ka neɛ naŋ e naa a kaara ana yelsɛgraa ŋa zu e “waabo” ane “diraagɔŋ.” (Yel 12:9) Yɛlɛ naŋ be Aizeeya 27:1 wulee sori na Jehoova naŋ na tu a faa a Izerayɛl biiri ka ba leɛ gaa ba paaloŋ a te vɛŋ ka yelmeŋɛ puoruu bebe. Azuŋ, a sɛgre naŋ yelka Jehoova leɛrɛɛ o teɛroŋ gaa Livayataŋ zie na wuleeŋ ka o ‘leɛrɛɛ o teɛroŋ’ eŋ Baabilɔŋ eŋɛŋ. Kyɛ o wɛlbo 12 neŋ 13 yeleeŋ ka Asiiriya neŋ Igyipiti meŋ poɔ la a yɛlɛ ŋa poɔŋ. Azuŋ a yi a sɛgre ŋa poɔŋ, Livayataŋ are ko la yelsɛgraa kaŋa kyɛbee naaloŋ kaŋa naŋ be a donɛɛ lombori zaa a maŋ iri zɔɔrɔ neŋ Jehoova ane o puorebiiri.
AUGUST 19-25
BAABOLE POƆ YELNIMIZEERE YIEME 75-77
Bonso Aŋ Ba Seŋ Ka Te Wulo Te Menne?
w18.01 28 wɛl. 4-5
Ho Nyɛɛ Lɛ Na Nensaaleba Naŋ E Tɛɛtɛɛ Na Bee?
4 Saŋa na Pɔɔl naŋ da sɛge ka noba na nɔŋ la ba menne a lɛ nɔŋ libie na, o da lɛ gaaɛ nimitɔɔre a sɛge ka noba na wulee ba menne, a zɛgrɛ ba menne, a lɛ paale neŋ pɔloo. Ka neɛŋ wa baŋ yɛlɛ mine eebo, a veɛlɛ, a taa libie yaga, kyɛbee a taa arezie kaŋa naŋ do, a maŋ vɛmeŋ ka o soba wulo o meŋɛ. Noba naŋ taa a gyogri ŋa maŋ boɔrɔŋ ka noba pugiro ba a lɛ de gyeremɛ naŋ e kpoŋ meŋ korɔ ba. Gaŋbanna kaŋa sɛgɛɛŋ a kyaare neɛ naŋ taa pɔloo gyogo a yelka: “A waa ŋa o soba naŋ maale sareka irizie kaŋa naŋ e bile o sukyiriŋ, a maŋ kyuli o meŋɛ nimitɔɔreŋ a puore o meŋɛ.” Noba mine yeleeŋ ka, noba naŋ erɛ pɔloo ba nɔnɔ noba naŋ taa pɔloo gyogo.
5 Jehoova kyiiree pɔloo gyogo. O kyiiree “zɛgemeŋɛ nimie.” (Yeng. 6:16, 17) Ka neɛŋ erɛ pɔloo o koŋ toɔ̃ peɛle Naaŋmen. (Yiem. 10:4) Pɔloo eɛ a Dɛɛvul gyogo kaŋa. (1 Tim. 3:6) A yɛlɛ nembao zie la ka, a maŋ wa ta la saŋa kaŋa ka Jehoova yelmeŋɛ puorebiiri piili zɛgrɛ ba menne. Gyuuda naa Uzaaya da de la yuomo yaga a puoro Jehoova yelmennoŋ poɔŋ. Kyɛ a puoriŋ a Baabole da yeleeŋ a kyaaroo ka: “Kyɛ, saŋa na oŋ wa e kpeɛŋaa baare na, o da piili zɛgrɛɛ o meŋɛ o sukyiriŋ, ka lɛ vɛŋ ka saammo wa o zuŋ, o da leɛ erɛɛ yɛlɛ naŋ wuli ka o ba lɛ dire yelmennoŋ korɔ Jehoova o Naaŋmen, o da kpɛɛ Jehoova ŋmenpuoredie na ka o te nyege insɛnse a insɛnse nyege zie na.” A puoriŋ, Naa Hezekaiya meŋ da leɛ piili zɛgrɛɛ o meŋɛ, kyɛ a ba kɔɔre oŋ leɛre o eebo.—2 Tun. 26:16; 32:25, 26.
w06 7/15 11 wɛl. 2
Yelnimizeere Naŋ Be A Yieme Taaloŋ Neŋ Naaloŋ Gama Poɔŋ
75:4, 5, 10—Bo ka a yelbiri “iilii” are ko a sɛgre ŋa poɔŋ? Duŋo iilɛ eɛ boma na oŋ maŋ de wulo o kpeɛ̃o. Azuŋ, a yelbiri “iilii” na baŋ are ko la kpeɛ̃o ane faŋa. Jehoova la maŋ duore o noba iilɛ, lɛ wuleeŋ ka o naŋ maŋ zɛge ba baŋ do. Kyɛ Jehoova maŋ ‘ŋmaa la neŋfaare iilɛ.’ A Baabole kpãã teŋ ka te kaara soŋ a ta wa ‘zɛgrɛ te menne iilɛ ka a duoro.’ Lɛ wuleeŋ ka a ba seŋ ka te erɛ pɔloo kyɛbee taŋkaŋyɛlɛ. Jehoova la maŋ zɛge neɛ oŋ do, azuŋ toma zaa ba naŋ ko te a lantaapuoruu poɔŋ, Jehoova zieŋ la ka a toma yi.—Yieme 75:7.
Baabole Poɔ Yelsonne
w06 7/15 11 wɛl. 3
Yelnimizeere Naŋ Be A Yieme Taaloŋ Neŋ Naaloŋ Gama Poɔŋ
76:10—Sobuo ka “Nensaalaa sutoloŋ” maŋ de pugibu wa ko Jehoova? Ka Naaŋmeneŋ wa tere sori ka nensaaleba de sutoloŋ wa o puorebiiri eŋɛŋ a dɔgrɔ ba, a na baŋ toɔ̃ de la yɛlɛ naŋ soma waneŋ. Sori kaŋa poɔŋ na, yelkpeɛne na teŋ maŋ tuoro na na toɔ̃ ko teŋ dɛnnoo. Jehoova maŋ terɛɛ sori teŋ di dɔgɛɛ, a lɛ tu ana dɔgɛɛ na eŋɛŋ a de wuluu naŋ seŋ neŋ ko te. (1 Piita 5:10) ‘Ka nensaalaa suuriŋ wa iri ka o lɛ de a suuri mine poɔ, Naaŋmen maŋ toɔ̃ tu la lɛ eŋɛŋ a nyɛ gyeremɛ.’ Kyɛ te de ka ho di la dɔgɛɛ lɛɛŋ a te kpi? Ka lɛŋ e gba, kyɛ a na toɔ̃ de la pugibu naŋ seŋ neŋ ko Jehoova. Bonso noba naŋ nyɛ te teŋ are kpeɛŋaa a di kannyiri te ta a baara na toɔ̃ piili derɛɛ pugibu korɔ Naaŋmen.
AUGUST 26–SEPTEMBER 1
BAABOLE POƆ YELNIMIZEERE YIEME 78
A Izerayɛl Biiri Tokpeɛne Na Eɛ Kpããmo Yɛlɛ Ko Te
w96 12/1 29-30
Bonso Aŋ Seŋ Ka Te “Maŋ Teɛrɛ Takoreŋ Saŋa Bebie Na Yɛlɛ”?
A yɛlɛ nembao zie la ka, a Izerayɛl biiri da maŋ innee yelsonne na zaa Jehoova naŋ e ko ba na yɛlɛ. A yɛlɛ ŋa da eɛ yelfaa yaga zaa. Boŋ da maŋ yi a poɔŋ wa? A Baabole yeleeŋ ka: “Ba da maŋ eɛ Naaŋmen nyɛ gbɛɛ yaga, a vɛŋ ka Neɛ Naŋ E Forifori Izerayɛl poɔŋ na poɔ sãã yaga. Ba da ba teɛre o kpeɛ̃o na yɛlɛ, a bebiri na oŋ faa ba yi ba dɔndɔmɔ nuuriŋ na.” (Yieme 78:41, 42) Lɛ na baŋ da maŋ inne bege na Jehoova naŋ ko ba na da vɛŋɛɛŋ oŋ zagre ba bare kpɛlɛŋkpɛlɛŋ.—Matio 21:42, 43.
A yieloŋ yiele da eɛ ewuli soŋ ko te. O da sɛgɛɛŋ ka: “N na teɛrɛɛ Jehoova toma yɛlɛ; peɛlaaŋ N na teɛrɛɛ o takoreŋ saŋa tonkpeɛne yɛlɛ. N na teɛrɛɛ o toma zaa yɛlɛ, N na teɛrɛɛ o yel-eree zaa yɛlɛ.” (Yieme 77:11, 12) Ka teneeŋ maŋ mãã te menne a leɛteɛre lɛ na Jehoova naŋ di yelmennoŋ ko te saŋa kaŋa naŋ pare, ane lɛ na oŋ maŋ yi nɔmmo poɔŋ a korɔ te boma zaa yɛlɛ naŋ fɛrɛ te na, a na eŋ teŋ faŋa, a nyagre te eŋɛ ka te maŋ puoruu bareka. Ka teneeŋ “maŋ teɛrɛ takoreŋ saŋa bebie na yɛlɛ,” a na soŋ teŋ ka te iri balebo zaa naŋ be te enneŋ a bare, a kyɛ nyagre te enne ka te tonɔ o puoruu toma na. A na vɛŋeŋ ka te dire kannyiri ane yelmennoŋ koroo.
w06 7/15 17 wɛl. 16
‘Yɛ Ta Ŋmoonɔ’
16 Ka neɛŋ wa ŋmoonɔ, o maŋ de la o teɛroŋ zaa eŋ o meŋɛ ane yelkpeɛne na oŋ tuoro na eŋɛŋ. O soba ba maŋ lɛ teɛrɛ maaloo na te naŋ nyɛrɛ aŋa Jehoova Sieree Deme na yɛlɛ. Yɛlɛ naŋ na toɔ̃ soŋ te ka te ta ŋmoonɔ la teŋ na maŋ teɛrɛ maaloo te naŋ nyɛrɛ na yɛlɛ. Aŋa mannoo poɔŋ, te kaŋa zaa taaɛ apoɔsori ka ba boɔlɔ te Jehoova Sieree Deme kaŋa. (Aizeeya 43:10) Te neŋ Jehoova na baŋ taaɛ niiloŋ naŋ e kpeɛŋaa. Wagre zaa te naŋ boɔrɔ te na baŋ puore sɔrɛɛ “Soba na naŋ kyɛllɛ wono puoro” na. (Yieme 65:2; Gyimisi 4:8) Te zemmo taaɛ ananso bonso te baŋɛɛ yelfaare na Setaana naŋ yeli kyaare sori na Jehoova naŋ maŋ tu a dire o naaloŋ na. Te lɛ baŋɛɛŋ meŋ ka Jehoova ko teŋ apoɔsori ka te dire yelmennoŋ koroo a de wuli ka Setaana eɛ ziri-ŋmaara. (Yeng Yelibie 27:11) Te lɛ taaɛ apoɔsori meŋ ka te moɔlɔ a Naaloŋ duorisoŋ korɔ noba wagre zaa. (Matio 24:14) Sagediibu na teŋ taa Yezu Krista sareka na eŋɛŋ vɛŋɛɛŋ teŋ taa zoma naŋ e forifori. (Gyɔɔn 3:16) Te nyɛrɛɛ a maaloo ama zaa aneazaa ka te naŋ tuoree yelkpeɛne.
w11 7/1 10 wɛl. 3-4
Te Yel-Eree Na Baŋ Vɛŋeŋ Ka Jehoova Poɔ Sãã Bee Ka O Poɔ Pɛle?
A yieloŋ yiele da yeleeŋ ka: “Gbɛɛ yaga ba da maŋ deɛ la taawae o eŋɛŋ a wɛgyɛŋ poɔŋ!” (Wɛlbo 40) O wɛlbo 41 na meŋ yeleeŋ ka: “Ba da maŋ eɛ Naaŋmen nyɛ gbɛɛ yaga.” Ka hooŋ kaa a sɛgre ama soŋ, ho na nyɛɛ lɛ na a Baabole sɛgsɛgrɛ naŋ wuli lɛ a Izerayɛl biiri naŋ da maŋ derɛ taawae gbɛɛ yaga. Saŋa na Jehoova naŋ faa ba yi Igyipiti noba nuuriŋ na, a da ba kɔɔre kyɛ baŋ wuli ka ba taaɛ a gyog-faa ŋa. A noba da piili ŋmoonɔ eŋnɛɛ Naaŋmen, a da yele yɛlɛ naŋ wuli ka ba taaɛ bonnoo ka Naaŋmen na baŋ kaa baŋ. (Soribu 14:1-4) Yɛlɛ mine ba naŋ peɛre yi a Baabole poɔŋ wuleeŋ ka, a yelbie na a Baabole sɛgsɛgrɛ naŋ sɛge ka “ba da maŋ de la taawae o eŋɛŋ” na baŋ “wuliŋ sekpɔgɔ poɔŋ ka, ‘a noba da vɛŋɛɛŋ ka ba sukyie e kpeɛŋaa a ko Naaŋmen.’ Kyɛbee ‘ba da yelko la Naaŋmen ka “Ai a seŋɛɛŋ.”’ Kyɛ, ka ba naŋ wa e kaŋdabaŋkalɛ a leɛ wa Jehoova zie, o da maŋ zo la ba nembaaloŋ a di suuri ko ba. Kyɛ lɛ puoriŋ, a da ba maŋ kɔɔre baŋ lɛ wuli a gyog-faa ŋa a lɛ derɛ taawae. Gbɛɛ yaga, lɛ baŋ da maŋ erɛ.—Yieme 78:10-19, 38.
Saŋa zaa a Izerayɛl biiri naŋ wa deɛ taawae Jehoova eŋɛŋ, wala aŋ da maŋ kpɛ o aseŋ? O wɛlbo 40 yeleeŋ ka ba ‘da maŋ eɛ yɛlɛ naŋ kpɛ o yaga.’ A yi Baabole yuo kaŋa poɔŋ, a zie ŋa kannɛɛŋ ka “ba da maŋ vɛŋeŋ oŋ dire woore.” Yɛlɛ mine ba naŋ peɛre yi a Baabole poɔŋ wuleeŋ ka yɛlɛ na a zie ŋa naŋ wulo la ka: “Gyogo a Hiburu noba naŋ da taa na da waa ŋa baŋ da maŋ baŋ perɛ a kyɛ erɛ yɛlɛ naŋ na kpɛ Naaŋmen. Ba da erɛɛ ba yɛlɛ aŋa bie naŋ e tokpeɛne soba ane taawae derɛ naŋ maŋ erɛ o yɛlɛ na.” Aŋa lɛ na bi-tokpeɛne soba naŋ maŋ zagra o dɔgreba nɔɛ ka lɛ vɛŋ ka o dɔgreba dire woore na, a Izerayɛl biiri naŋ e taawae derebɛ na da maŋ eɛ yɛlɛ “a vɛŋ ka Neɛ Naŋ E Forifori Izerayɛl poɔŋ na poɔ sãã yaga.”—Wɛlbo 41.
Baabole Poɔ Yelsonne
w06 7/15 11 wɛl. 4
Yelnimizeere Naŋ Be A Yieme Taaloŋ Neŋ Naaloŋ Gama Poɔŋ
78:24, 25—Bonso ka a Baabole boɔle maana ka a eɛ “sazu bondirii” ane “kpeɛ̃o deme kyɛbee malekere bondirii”? Yɛlɛ na a sɛgre ŋa na yeli na ba wuli ka maana eɛ malekere bondirii. Maana da maŋ yi la sazuŋ a lere teŋɛŋ, azuŋ ka a sɛgre yelka a eɛ “sazu bondirii.” (Yieme 105:40) Yɛlɛ na a sɛgre naŋ lɛ yelka “kpeɛ̃o deme bondirii” na baŋ wuliŋ ka Naaŋmen zie ka a bondirii yi wa, bonso Naaŋmen neŋ a malekere kyɛbee “kpeɛ̃o deme” kpeɛrɛɛ sazuŋ. (Yieme 11:4) Aminekaŋaŋ, Jehoova da tu la malekere eŋɛŋ a de a maana ko a Izerayɛl biiri.