Te Zemmo Ane Te Naaŋ Moɔloo Toma Lammo Yelsɛgree Yelpeɛre Gane
© 2024 Watch Tower Bible and Tract Society of Pennsylvania
NOVEMBER 4-10
BAABOLE POƆ YELNIMIZEERE YIEME 105
‘O Maŋ Teɛrɛɛ O Nɔlaŋ Na Yɛlɛ Wagre Zaa’
Wala Teŋ Na Baŋ E A Eŋ Te Sagediibu Faŋa A Kyaare Noɔre Na Jehoova Naŋ Eŋ Te Ka Donpaalaa Na Waŋ Na?
11 Te nyɛ yɛlɛ na mine Jehoova naŋ da eŋ noɔre ko o noba ka o na e ko baŋ aŋ da waa ŋa a koŋ baŋ nyɛ eebo na. O da yelko la Aboraham ane Saara ka ba na dɔgɛɛ bidɔɔ aneazaa ka ba da nyaaŋɛɛŋ. (Mun. 17:15-17) O da la yelko la Aboraham ka ba na de la Keenan teŋgane na ko o yaane. Kyɛ saŋa na Aboraham yaane naŋ e a Izerayɛl deme naŋ da be gbaŋgbaaloŋ poɔŋ Igyipiti paaloŋ na, a da waa ŋa a noɔre emmo ŋa daŋ koŋ baŋ nyɛ eebo. Kyɛ a da nyɛɛ eebo. Yuomo mine puoriŋ, Jehoova da yelko la Elizabɛl ka o na dɔgɛɛ bie aneazaa ka o da nyaaŋɛɛŋ. O da yelko la Mareya naŋ da e pɔge naŋ ba baŋ dɔɔ ka o na dɔgɛɛ ona Naaŋmen Bidɔɔ. Ana vɛmeŋ ka noɔre kaŋa Naaŋmen naŋ da eŋ yuomo turituri naŋ pare a Eedin gaadin na poɔŋ nyɛ eebo!—Mun. 3:15.
12 Ka teneeŋ wa teɛre nɔɛ na zaa Jehoova naŋ eŋ, ane lɛ o naŋ paalaa na, a maŋ vɛmeŋ teŋ nyɛ lɛ o naŋ taa kpeɛ̃o seŋ. Lɛ na baŋ soŋ teŋ ka te sagediibu te naŋ taa a donpaalaa noɔre emmo na e kpeɛŋaa yaga. (Kanne Joosua 23:14; Aizeeya 55:10, 11.) A maŋ lɛ soŋ teŋ teŋ e siri ka te soŋ noba ka ba nyɛ ka, a donpaalaa nɔ-ennaa na ba e gaŋzannoo, a na nyɛɛ eebo meŋɛmeŋɛ. Jehoova meŋɛ la da yel ŋaa a kyaare a sazu paalaa ane donpaalaa ka: “A yelbie ama taa la dɛloo kyɛ waa yelmeŋɛ.”—Yel. 21:1, 5.
it-2 1201 wɛl. 2
A Yelbiri
Naaŋmen maalɛɛ boma naŋ voorɔ ane boma naŋ ba voorɔ. Naaŋmen na baŋ tu la o yelbiri eŋɛŋ, a vɛŋ ka a boma ŋa zaa e yɛlɛ naŋ na vɛŋ ka o poboɔbo nyɛ eebo. (Ym 103:20; 148:8) Yelzaa Naaŋmen naŋ yeli waa la dɛlebo. Ka Onaŋ wa eŋ noɔre ka o na eɛ yelkaŋa, o maŋ teɛreŋ a e a yɛlɛ meŋ. (Du 9:5; Ym 105:42-45) Naaŋmen meŋɛ yeleeŋ ka, o yelbiri “maŋ areŋ a gɛrɛ wagre zaa.” O koŋ leɛ wa [o] zie kpale, kyɛ o na toŋ la [o] poboɔbo toma.—Ai 40:8; 55:10, 11; 1Pi 1:25.
Baabole Poɔ Yelsonne
w86 11/1 19 wɛl. 15
Arezie Baapaalba Naŋ Taa Jehoova Booree Naŋ Taa Popeɛloŋ Neŋ Noɔreyeni Na Poɔŋ
15 Gyoosɛf da di la dɔgɛɛ aŋa gbaŋgbaa a be nempɔgedieŋ yuomo pie neŋ ata, a te ta saŋa na noɔre na Jehoova naŋ eŋ na naŋ wa paale. Yɛlɛ na Gyoosɛf naŋ da tuore na da somooŋ oŋ toɔ̃ taa gyog-sonne. A Baabole yeleeŋ ka, ‘Ba da de la banzɔlɔ le [Gyoosɛf] gbɛɛ aŋ ŋma felɛ, a de a banzɔlɔ le ne o; a gɛrɛ wagre na o yelbiri naŋ wa paale, Jehoova yelbiri la da peɛroo.’ (Yieme 105:17-19) Jehoova naaneŋ da vɛŋ ka Gyoosɛf tuore a yelkpeɛne ŋa. Kyɛ, Jehoova da taaɛ ananso o naŋ tere sori ka Gyoosɛf tuoraa. Gyoosɛf na nyɔgɛɛ teɛretɔ na oŋ taa ‘Jehoova yelbiri’ eŋɛŋ na kpeɛŋaa, aneazaa ka o tuoree dɔgroŋ yaga zaa bee? Gyoosɛf na terɛɛ sori ka gyog-sonne na oŋ taa na maaleŋ nyɛ nimitɔɔre gaabo bee? O na terɛɛ sori ka a yelkpeɛne ŋa somoo ka o taa kannyiri, sigrimennoŋ, a vɛŋ ka o neŋ Naaŋmen niiloŋ na e kpeɛŋaa bee? O na vɛŋeŋ ka a yɛlɛ ŋa somoo ka o taa nyaa a toɔ̃ toŋ tonkpeɛŋaa zaa baŋ na de eŋ o nuuriŋ bee? Tɔɔ, yɛlɛ na zaa Gyoosɛf naŋ da tuore na da vɛŋɛɛŋ oŋ maaleŋ taa gyog-sonne yaga zaa, ka lɛ vɛŋ oŋ da e neŋ-tegroŋ Naaŋmen nimitɔɔreŋ. Azuŋ a lɛ puoriŋ, Naaŋmen da de oŋ toŋ neŋ toma yaga zaa.—Munpiilee 41:14, 38-41, 46; 42:6, 9.
NOVEMBER 11-17
BAABOLE POƆ YELNIMIZEERE YIEME 106
‘Ba Da Innee Naaŋmen Ba Deɛrɛ Na Yɛlɛ’
w18.07 20 wɛl. 13
“Nembuoŋ Are Jehoova Puoriŋ?”
13 Saŋa na a Izerayɛl biiri naŋ wa nyɛ a zuŋzugri naŋ e ligroŋ, a saa nyegroo, ane yelseɛlɛ na Naaŋmen naŋ da erɛ na, dabeɛ̃ da kpɛ baŋ yaga zaa. Ba da yelko la Moosis ka o maŋ are ba gbɛbɔgriŋ ka o neŋ Jehoova dire dama a Sainai Taŋa na zuŋ. (Yiib. 20:18-21) Moosis da do la a taŋazu a te kɔɔre yaga zaa. Moosis la da derɛ a noba weɛ, azuŋ oŋ da ba lɛ be ba poɔŋ na wuleeŋ ka a Izerayɛl biiri koŋ baŋ lɛ e yelzaa a wɛgyɛŋ poɔŋ bee? A yɛlɛ faa zie la ka, a noba sagediibu zaa da arɛɛ Moosis naŋ da be ba poɔŋ na eŋɛŋ. Azuŋ, saŋa na Moosis naŋ da ba lɛ be ba poɔŋ na, eŋkyere da kpɛ baŋ baŋ yelko Eeroŋ ka: ‘Maale ŋmene ko te ka o deɛ te weɛ, bonso Moosis, a dɔɔ na naŋ taa te yi neŋ Igyipiti paaloŋ waneŋ na, te ba baŋ yɛlɛ naŋ pɔgoo.’—Yiib. 32:1, 2.
Baabole Poɔ Yelsonne
w06 7/15 13 wɛl. 9
Yelnimizeere Naŋ Be A Yieme Taaloŋ Neŋ Naaloŋ Gama Poɔŋ
106:36, 37. A Baabole sɛgre ŋa de la baga puoruu manne neŋ neɛ naŋ ire sarekare korɔ malekefaare. Lɛ wuleeŋ ka, ka neɛŋ wa puoro baga, o neŋ malekefaare na baŋ laŋ erɛɛ yɛlɛ. Azuŋ, ka a Baabole ko te kawane ka: “Yɛ gu yɛ menne yi [baga] enne.”—1 Gyɔɔn 5:21.
NOVEMBER 18-24
BAABOLE POƆ YELNIMIZEERE YIEME 107-108
‘Yɛ Puore Jehoova Bareka, Bonso O Yɛlɛ Somaŋ’
w07 4/15 20 wɛl. 2
Vɛŋ Ka A Lantaapuoruu Noba Zaa Pugiro Jehoova
2 A lantaapuoruu ba e zie noba naŋ maŋ wa lantaa a erɛ yɛlɛ yoŋ. A ba e zie noba naŋ be gbandige kaŋa poɔŋ, a yi ziyeni, a boɔrɔ nimipɛle yɛlɛ bonyenaa meŋ naŋ wa lantaa a erɛ yɛlɛ. Kyɛ, ba sɛgrɛɛ a lantaapuoruu ka te maŋ tu be a de pugibo korɔ Jehoova Naaŋmen. Takoreŋ saŋa zaa, lɛ aŋ da waa. Ka hooŋ kaa a Yieme gane poɔŋ, ho na nyɛɛ a yɛlɛ ŋa meŋɛmeŋɛ. Yieme 35:18 kannɛɛŋ ka: ‘N na puore boŋ bareka a lammokpɛŋ poɔŋ. Gyamaa poɔŋ maŋ na pugibo.’ Lɛ neŋ o zu la, Yieme 107:31, 32 eŋnɛ te faŋa ka: ‘Oo yɛ vɛŋ ka noba de bareka puoruu korɔ Jehoova o nɔmmo naŋ ba baara zuŋ, ane o toŋseɛlɛ oŋ tonɔ korɔ nensaaleba zuŋ. Vɛŋ ka ba duoruu a noba lammo poɔŋ.’
w15 1/15 9 wɛl. 4
Puore Jehoova Bareka, A Nyɛ Maaloo
4 Ka teneeŋ boɔrɔ ka te naŋ kyɛnɛ taa bareka puoruu gyogo, aseŋ ka te yi te sukyie poɔŋ a sage ka Jehoova korɔ teŋ maaloo. Aseŋ ka te maŋ lɛ teɛrɛ maaloo na zaa oŋ korɔ te na meŋ yɛlɛ gɛrɛ tɔɔre. Aseŋ ka te maŋ lɛ mãã te menne a teɛre soe na Jehoova naŋ tuuro a wulo te yelmeŋɛ nɔmmo na. Saŋa na a yieloŋ yiele naŋ da e lɛ na, o noɔre zaaŋ da mãã neŋ yelseɛlɛ na zaa Jehoova naŋ da e na.—Kanne Yieme 40:5; 107:43.
Baabole Poɔ Yelsonne
it-2 420 wɛl. 4
Mooab
A puoriŋ, saŋa na Deevid naŋ da dire naaŋ na, zɔɔre da be la Izerayɛl ane Mooab noba kpakyagaŋ. Ba da zɔɔtoɔ̃ la a Mooab noba kpɛlɛŋkpɛlɛŋ, a da vɛŋ baŋ maŋ de zuyɔɔ wa ko Deevid. Ka hooŋ nyɔge a Mooab dɔba naŋ e zɔɔzɔɔreba na zaa poŋ eŋ ziiri ata, aminekaŋaŋ, saŋa na a zɔɔre naŋ wa baare na, a Izerayɛl biiri da ko la a Mooab noba ziiri ayi a baare ba yɛlɛ kpɛlɛŋkpɛlɛŋ. A waa ŋa Deevid da vɛŋɛɛŋ ka a Mooab noba zaa gaŋ teŋɛŋ a tontaa, oŋ pãã de bon baŋ maŋ de manna zie a de manne wuli a Mooab noba ziiri ayi na aŋ seŋ ka ba ko, ane ziyeni na aŋ seŋ ka ba bare. (2Sa 8:2, 11, 12; 1Tu 18:2, 11) Aminekaŋaŋ, a yi ana zɔɔre na poɔŋ, Bɛnaaya naŋ da e Gyɛhoiyada bidɔɔ da ‘ko la Ariyɛl naŋ yi Mooab bidɔba bayi.’ (2Sa 23:20; 1Tu 11:22) Daŋyelbo na Beelam naŋ da yeli aŋa yuomo 400 mine naŋ pare na da nyɛɛ eebo saŋa na Deevid naŋ da zɔɔtoɔ̃ a Mooab noba kpɛlɛŋkpɛlɛŋ na. Beelam da yeleeŋ ka: ‘Ŋmarbiri na yi la Gyekɔb eŋɛŋ, naaloŋ daŋgbale na iri yi la Izerayɛl poɔŋ. O na ŋmarɛɛ Mooab lomboe zaaŋ, a sãã a bidɔba naŋ derɛ taawae na zɔɔre poɔŋ.’ (So 24:17) Aminekaŋaŋ, a zɔɔtoɔ̃ ŋa yɛlɛ la ka a yieloŋ yiele da manna, saŋa na oŋ da yelka, Mooab wa leɛ la Naaŋmen “boŋpɛge laa” na.—Ym 60:8; 108:9.
NOVEMBER 25–DECEMBER 1
BAABOLE POƆ YELNIMIZEERE YIEME 109-112
Are Te Naa Yezu Puoriŋ!
w06 9/1 13 wɛl. 6
Yelnimizeere Naŋ Be A Yieme Gama Anuu Soba Poɔŋ
110:1, 2—Bo ka “[Deevid] Daana” naŋ la Yezu Krista da erɛ saŋa na oŋ da zeŋ Naaŋmen nuduloŋ na? Saŋa na Yezu naŋ da iri yi kũũni poɔŋ a do sazu na, o da te zeŋ la Naaŋmen nuduloŋ a kyɛnlɛ ka yuoni 1914 ta ka o pãã piili dire naaŋ. Ana saŋa na Yezu naŋ da zeŋ kyɛnlɛ na, o da diree naaŋ Kristabiiri na baŋ sɔ naaloŋ kãã na zuŋ. O da de la wuluu korɔ ba baŋ tonɔ a naaŋ moɔloo toma, ka lɛ vɛŋ baŋ sonnɔ noba ka ba wa leɛ Yezu potuuribo. Yezu da lɛ nara baŋ a korɔ saŋa na baŋ na wa poɔ o eŋɛŋ ka o ne ba dire Naaloŋ na meŋ.—Matio 24:14; 28:18-20; Luka 22:28-30.
w00 4/1 18 wɛl. 3
Noba Naŋ Iri Zɔɔrɔ Neŋ Naaŋmen Daaŋ Koŋ Zɔɔtoɔ̃ Zaa!
3 Aŋa yuomo kɔɔ mine naŋ pare, noba yaga iri zɔɔrɔ neŋ la Jehoova puorebiiri. A yi paalonne yaga poɔŋ, neŋfaare moɔrɛɛ ba moɔbo zaa ka ba pigi Naaŋmen Naaloŋ duorisoŋ na moɔloo toma sori. Naaŋmen dɔndɔn-kpoŋ baŋ boɔlɔ a Dɛɛvul la maŋ daara ba eŋnɛ ka ba erɛ a yɛlɛ ama. Bonso a Dɛɛvul “yoɔrɔ la a lanna aŋa gbeŋni naŋ kono a boɔrɔ neɛ ka o ɔɔ.” (1 Piita 5:8) Saŋa na “wagre na ba naŋ biŋ ko a tenne noba” naŋ wa baare yuoni 1914 na, Naaŋmen da kaa iree o Bidɔɔ na oŋ wa leɛ Naa, a dire naaŋ a teŋɛzu noba zuŋ. Naaŋmen da ko oŋ noɔre ka: “Di naaloŋ ho dɔndɔnne poɔŋ.” (Luka 21:24; Yieme 110:2) Krista da de la kpeɛ̃o na Naaŋmen naŋ koo na toŋ neŋ toma, a iri Setaana yi neŋ sazuŋ, a de o lɔɔ a teŋɛzuŋ. Setaana naŋ baŋ ka wagre na oŋ taa na eɛ fẽẽ zuŋ na, o suuri iree Kristabiiri na baŋ sɔ naaloŋ kãã ane ba tutaaba na zuŋ yaga zaa. (Yel-iriwulaa 12:9, 17) Ka ba naŋ wa iri zɔɔrɔ neŋ Naaŋmen, bo yɛlɛŋ maŋ yi a zɔɔre poɔŋ wa?
be 76 wɛl. 2
Nyɛrɛ Nimitɔɔre Gaabo—Maŋ Daŋ De A Gbɛre
A Baabole eŋ teŋ faŋa ka te maŋ de kyɔɔtaare na teŋ taa na tonɔ neŋ toma. Lɛ wuleeŋ ka aseŋ ka te maŋ daŋ de a gbɛre. Ho maŋ daŋ de la gbɛre ka ho neŋ ho taaba laŋ toŋ toma a naaŋ moɔloo poɔŋ bee? Ho maŋ kaara boɔrɛɛ soe mine hoŋ na baŋ tu a soŋ ho taaba naŋ be a lantaapuoruu poɔŋ a e nempaalba, baapaalba, kyɛbee neŋnyaane bee? Ho maŋ de la ho meŋɛ tere ka ho meeli a Lammozie, kyɛbee a soŋ toŋ toma mine te lammobɛrɛ ane te lammobilii na ziiriŋ bee? Saŋa kaŋa, ho maŋ de la ho meŋɛ eŋ a auxiliary paaneɛ toma poɔŋ bee? Ho na baŋ toŋɛɛ a regular paaneɛ toma, kyɛbee ka ho te soŋ lantaapuoruu kaŋa naŋ boɔrɔ sommo yaga bee? Ka hooŋ e te yɔɔdɔɔ na kaŋa, ho moɔrɛɛ ho moɔbo zaa ka ho toɔ̃ ta yɛlɛ na a Baabole naŋ wuli ka aseŋ ka neɛ ta sɛre kyɛ ka ba kaa iruu ka o wa e a lantaapuoruu neŋkpoŋ kaŋa, kyɛbee a nembɛrɛ sonnɔ kaŋa bee? Ka hooŋ maŋ yi ho poɔ zaa a de ho meŋɛ tere a sonnɔ ho taaba, a sage toma zaa ba naŋ de eŋ ho nuuriŋ, lɛ na wuliŋ ka ho nyɛrɛɛ nimitɔɔre gaabo.—Yiem. 110:3.
Baabole Poɔ Yelsonne
it-1 524 wɛl. 2
Nɔlaŋ
Nɔlaŋ Ka O Wa E Ŋmenpuore Wedeɛrɛ Aŋa Mɛlekizɛdɛk. Ba sɛgɛɛ a nɔlaŋ ŋa yɛlɛ eŋ Yieme 110:4 poɔŋ. Neɛ naŋ sɛge a Hiburu gane na yeleeŋ ka a sɛgre ŋa nyɛɛ eebo Krista eŋɛŋ. O sɛgɛɛ a yɛlɛ eŋ Hiburu 7:1-3, 15-17. Jehoova neŋ Yezu yoŋ la maale a nɔlaŋ ŋa. Aminekaŋaŋ, Yezu da mannɛɛ a nɔlaŋ ŋa yɛlɛ saŋa na o neŋ o potuuribo naŋ da wa maala a naaloŋ nɔlaŋ na. (Lk 22:29) Jehoova meŋɛ pɔɛŋ ka o Bidɔɔ Yezu Krista naŋ be sazuŋ, na leɛ la ŋmenpuore wedeɛrɛ aŋa lɛ na Mɛlekizɛdɛk naŋ da waa na. Mɛlekizɛdɛk da eɛ naa ane Naaŋmen ŋmenpuore wedeɛrɛ a teŋɛzuŋ. Yezu Krista meŋ na wa leɛ la Naa ane Ŋmenpuore Wedeɛrɛ sazuŋ, kyɛ a teŋɛ ŋa zuŋ naane. Saŋa na Yezu naŋ da iri yi kũũni poɔŋ a do sazu na, o nu da te kpɛɛ apoɔsori ŋa tegitegilɛ. (Hi 6:20; 7:26, 28; 8:1) A nɔlaŋ ŋa naŋ na tonɛɛ toma a gɛrɛ wagre naŋ ba taa baaroo, bonso Jehoova naŋ na derɛɛ sowuli korɔ Yezu ka o tonɔ toma aŋa Naa ane Ŋmenpuore Wedeɛrɛ tegitegilɛ.—Hi 7:3.
DECEMBER 2-8
BAABOLE POƆ YELNIMIZEERE YIEME 113-118
Wala Maŋ Na Toɔ̃ E A De Puore Neŋ Jehoova Bareka?
w01 1/1 11 wɛl. 13
Yɛ Vɛŋ Ka Nɔmmo Maaleŋ Eŋ Yɛ Faŋa
13 Yezu yelbie na vɛŋɛɛŋ aŋ pɛle ka, a dɛndɛŋ yɛlɛ naŋ e nimizeɛ yaga zaa la ka, te nɔŋ Jehoova. Kyɛ, ba ba wa dɔgrɔ te kaŋa zaa ka te nɔŋ la Jehoova. Aseŋ ka te menne moɔ te moɔbo zaa a wa taa a nɔmmo ŋa ko Jehoova. Azuŋ, aseŋ ka te moɔ sɛre kyɛ wa taa a nɔmmo ŋa. A dɛndɛŋ saŋa na teŋ wa woŋ Jehoova yɛlɛ na, a da vɛŋɛɛŋ teŋ wa boɔrɔ o yɛlɛ. Fẽẽfẽẽ fẽẽfẽẽ, te wa zannɛɛŋ a baŋ sori na oŋ tu a maale a teŋgane ko nensaaleba. (Munpiilee 2:5-23) Te wa nyɛɛ lɛ na oŋ taa nimimaaroŋ meŋ ko nensaaleba. Saŋa na faaloŋ naŋ wa kpɛ nensaaleba eŋɛ na, Naaŋmen da ba gyɛ te bare, kyɛ o da de la gbɛɛ a boɔrɔ ka o leɛ da te yi neŋ a faaloŋ poɔŋ. (Munpiilee 3:1-5, 15) Naaŋmen da wulee nimimaaroŋ korɔ noba naŋ da puoruu yelmennoŋ poɔŋ na. A baaraa zaa, o da toŋɛɛ o Bidɔɔ yeni oŋ wa kpi a yuo yelfaare sudi sori ko te. (Gyɔɔn 3:16, 36) A bammo ŋa teŋ taa kyaare Jehoova na vɛŋɛɛŋ teŋ maaleŋ nɔmoo yaga zaa. (Aizeeya 25:1) Naa Deevid da yeleeŋ ka, o nɔŋ la Jehoova bonso Jehoova meŋ nɔmooŋ a kaara o zu velaa. (Yieme 116:1-9) Zenɛ ŋa, Jehoova kaarɛɛ te meŋ zu velaa, a maŋ wulo te sori, a eŋnɛ te faŋa, a lɛ korɔ te kpeɛ̃o meŋ. Ka teneeŋ moɔ̃ niŋe zanna Jehoova yɛlɛ a na vɛŋeŋ ka nɔmmo na teŋ taa koo na maaleŋ e zuluŋ.—Yieme 31:23; Zefanaiya 3:17; Urom 8:28.
w09 7/15 29 wɛl. 4-5
Maŋ Yi Ho Sukyiri Poɔŋ A Deɛ Boma Ba Naŋ De Korɔ Bo—Maŋ Yi Ho Sukyiriŋ A Terɛ Boma
A yieloŋ yiele da yieleeŋ ka: ‘Bo yɛlɛ la maŋ na e ko Jehoova o tɔnɔ ŋa zaa naŋ waana N zieŋ zuŋ?’ (Yiem. 116:12) Bo tɔnɔ la oŋ nyɛ yi Jehoova zie? Saŋa na oŋ da wa tuoro ‘toɔrɔ ane woore’ na, Jehoova da somooŋ oŋ toɔ̃ are a noɔreŋ. Kyɛ lɛ yoŋ naane, Jehoova lɛ ‘faa oŋ a yi kũũ poɔŋ.’ A yieloŋ yiele da boɔrɔŋ ka o ‘leɛ e yelkaŋa ko’ Jehoova. Sobuo ka a yieloŋ yiele na toɔ̃ e a yɛlɛ ŋa? O da yeleeŋ ka: ‘N na paalɛɛ N nɔɛ pampana a ko Jehoova.’ (Yiem. 116:3, 4, 8, 10-14) O da narɛɛ o meŋɛ ka, nɔɛ na zaa oŋ eŋ ko Jehoova na, o na paalɛɛ a zaa. Ferebo toma na zaa Jehoova naŋ de eŋ o nuuriŋ na meŋ, o da eɛ siri ka o na toŋɛɛ a zaa.
Ho meŋ na toɔ̃ eɛ lɛ. Sobuoŋ? Ka hooŋ moɔ̃ niŋe a de Naaŋmen bege ane o sowuli tonɔ neŋ toma ho zemmo poɔŋ wagre zaa. Lɛ wuleeŋ ka, aseŋ ka ho de Jehoova puoruu ka o e yɛlɛ naŋ e nimizeɛ yaga zaa ko bo ho zemmo poɔŋ. Aseŋ ka ho tere sori ka Naaŋmen vooroŋ soŋ na meŋ wulo bo sori a yi yɛlɛ zaa ho naŋ erɛ poɔŋ. (Ikil. 12:13; Gal. 5:16-18) Kyɛ, a yɛlɛ yelmeŋɛ zie la ka, lɛ zaa ho naŋ erɛ kyɛ ho daaŋ koŋ baŋ leɛ yɔɔ yɛlɛ na Jehoova naŋ e ko bo na sane koo. Kyɛ, ka teneeŋ wa yi te sukyie poɔŋ a de te menne tere a tonɔ Jehoova puoruu toma na, a maŋ vɛŋeŋ ka ‘Jehoova poɔ pɛle’ yaga zaa. (Yeng. 27:11) A eɛ apoɔsori yaga zaa ka te toɔ̃ toŋ a toma ŋa taa a vɛŋ ka Jehoova poɔ pɛle!
w19.11 22-23 wɛl. 9-11
Yɛlɛ Te Naŋ Na Baŋ Zanne Yi A Liivai Gane Na Poɔŋ
9 A yiiloŋ yɛlɛ teŋ na baŋ zanne yi be: Te maŋ yi la te sukyie poɔŋ a puoro Jehoova. A yi takoreŋ saŋa Izerayɛl paaloŋ na poɔŋ, sareka kaŋa da poɔ la yelmeŋɛ puoruu poɔŋ ka o yɛlɛ e nimizeɛ yaga zaa. Ona la a maaroŋ sareka na. Yɛ vɛŋ ka te manne o yɛlɛ fẽẽ a nyɛ. A Liivai gane na wuleeŋ ka, ka a Izerayɛl bieŋ boɔrɔ, o na baŋ iree a maaroŋ sareka ŋa ka o e “bareka puoruu sareka.” (Liiv. 7:11-13, 16-18) A da ba e ferebo ka o soba iri a sareka ŋa, kyɛ o soba da maŋ yi la o poɔ zaa a iri a sareka. Azuŋ, nɔmmo na neɛ naŋ taa ko Jehoova na la da maŋ vɛŋ oŋ yi o poɔ zaa a iri a sareka ŋa ko Jehoova o Naaŋmen. Neɛ na naŋ ire a sareka, o booree deme, ane a ŋmenpuore wedeɛrɛ da maŋ laŋɛɛ taa a ɔɔ a duŋo na baŋ de iri neŋ a sareka na nɛne. Kyɛ, ba da maŋ kaa iree a duŋo ziiri mine a de iri neŋ sareka ko Jehoova kpɛlɛŋkpɛlɛŋ. Zi-bobo baŋ da maŋ kaa iri a de e lɛ?
10 A yɛlɛ ata soba teŋ na baŋ zanne: Te maŋ yi la nɔmmo poɔŋ a de te bontare-sonne a korɔ Jehoova. Jehoova nimitɔɔreŋ, a duŋo kãã da maŋ eɛ tegroŋ yaga zaa. Jehoova da lɛ yeleeŋ ka a duŋo ziiri mine, aŋa o haareŋbie meŋ da eɛ boma naŋ e tegroŋ koo. (Kanne Liivai 3:6, 12, 14-16.) Azuŋ, ka a Izerayɛl bie kaŋa zaaŋ wa yi o poɔ zaa a de a duŋo ziiri ŋa ane a kãã iri neŋ sareka ko Jehoova, a maŋ vɛŋeŋ ka Jehoova poɔ pɛle yaga. Ka a Izerayɛl biiri kaŋa zaaŋ wa iri a sareka ŋa tɔ, o maŋ wuliŋ ka o yi la o boɔbo zaa poɔŋ a boɔrɔ ka o de o bontare-sonne ko Naaŋmen. Yezu meŋ da yi la o poɔ zaa a de o bontare-sonne a puoro neŋ Jehoova. Oŋ da nɔŋ Jehoova zuŋ, o da de la o nyɔvore zaa puoro ne O. (Gyɔɔn 14:31) Naaŋmen boɔbo eebo da maŋ korɛɛ Yezu popeɛloŋ, bonso Yezu da taaɛ nɔmmo naŋ e zuluŋ ko Naaŋmen bege na. (Yiem. 40:8) Saŋa na Jehoova naŋ da nyɛ Yezu naŋ maŋ yi o sukyiri zaa poɔŋ a puoruu na, o poɔ da maŋ pɛleŋ yaga zaa!
11 Aŋa a maaroŋ sarekare ŋa, nɔmmo na teŋ taa ko Jehoova na la maŋ vɛŋ teŋ yi te poore zaa a ire sarekare koroo. Te maŋ boɔrɔŋ ka te de te bontare-sonne ko Jehoova, bonso te nɔŋ la Jehoova neŋ te sukyie zaa. Saŋa na Jehoova naŋ wa nyɛ noba turituri yaga naŋ taa nɔmmo naŋ e zuluŋ a koo ane o sowuli na, a maŋ lɛ yi ba poore zaa poɔŋ a puoruu, o poɔ maŋ pɛleŋ yaga zaa. Jehoova maŋ nyɛrɛɛ yɛlɛ na zaa te naŋ erɛ, ane poteɛrɛ na zaa teŋ de erɛ a yɛlɛ. Jehoova nimitɔɔreŋ, yɛlɛ na zaa teŋ maŋ erɛ ane poteɛrɛ na teŋ maŋ taa na maŋ eɛ tegroŋ yaga zaa koo. A yɛlɛ ŋa diiree sukyiri yaga zaa. Aŋa mannoo poɔŋ, ka hooŋ e neŋnyaaŋaa a koŋ baŋ lɛ toŋ toma aŋa lɛ na hoŋ da tonɔ korɔ Jehoova na, aseŋ ka ho baŋ ka Jehoova nyɛrɛɛ yɛlɛ na zaa hoŋ toɔ̃nɔ erɛ ho faŋa bɔgiŋ na. Aminekaŋaŋ, ho na teɛreŋ ka ho koŋ baŋ lɛ e yɛlɛ yaga a soŋ, kyɛ Jehoova baŋɛɛ nɔmoo naŋ e zuluŋ na hoŋ taa koo. O baŋɛɛŋ ka a nɔmmo ŋa la maŋ eŋ bo faŋa hoŋ boɔrɔ ka ho toŋ ho faŋa bɔgiŋ a koo. Jehoova poɔ maŋ pɛleŋ yaga zaa ka o sage sarekare na hoŋ maŋ yi ho faŋa bɔgiŋ a de koroo na.
Baabole Poɔ Yelsonne
w12 5/15 22 wɛl. 1-2
Yɛlɛ Noba Naŋ Kanna Te Gama Naŋ Maŋ Soorɔ
Vooroŋ soŋ da soŋɛɛ a yieloŋ yiele kaŋa oŋ yieli ka: ‘Jehoova yelmeŋɛ puorebiiri kũũ eɛ yelkpoŋ o nimiriŋ.’ (Yiem. 116:15) Jehoova puorebie kaŋa zaa nyɔvore eɛ tegroŋ yaga zaa koo. Kyɛ, yɛlɛ naŋ be Yieme 116 ba yele Jehoova puorebie kaŋa zaa bonyeŋ bonyeŋ kũũ yɛlɛ.
Ka te Kristabitɔ kaŋaŋ wa kpi ka te yɔɔ kaŋaŋ wa terɛ o kuore yelyaga, a ba seŋ ka a yelyaga soba de yɛlɛ naŋ be Yieme 116:15 na manne neŋ neɛ naŋ kpi na yɛlɛ, aneazaa ka o soba di la yelmennoŋ ko Jehoova te ta o kũũ saŋa. Ananso la wala? Ananso la ka, yɛlɛ na a yieloŋ yiele naŋ da yeli na muni wommu gaaɛ nimitɔɔre a gaŋ Jehoova puorebie bonyeni kũũ yɛlɛ. A yieloŋ yiele da boɔrɔŋ ka o wuli ka, Jehoova koŋ sage tere sori ka ba ko o yelmeŋɛ puorebiiri zaa naŋ be a teŋɛzuŋ a baare ba zaa yɛlɛ kpɛlɛŋkpɛlɛŋ. Bonso Jehoova yelmeŋɛ puorebiiri zaa nyɔvoɛ eɛ tegroŋ yaga zaa koo.—Kanne Yieme 72:14; 116:8.
DECEMBER 9-15
BAABOLE POƆ YELNIMIZEERE YIEME 119:1-56
‘Wala Ka Bipɔlee Na Toɔ̃ E A Maale O Sori Ka O E Forifori?’
w87 11/1 18 wɛl. 10
Ho Naŋ Kyɛnɛ Eɛ Forifori A Yi Yɛlɛ Zaa Poɔŋ Bee?
10 Pɔɔl da kpãã teŋ a yi Efesu 5:5 ka: “Yɛ baŋ a yeli ŋa velaa, ka neɛ naŋ tonɔ peɛ̃mo toma, bee nendɛgre bee bombɔ-gaŋne soba (a tɛgɛ la neɛ naŋ be [baga] yɛlɛ poɔ) ba taa kyɛŋ a Krista ane a Naaŋmen naaloŋ poɔ.” Kyɛ, yuoni la yuoni zaa, ba maŋ yelee te yɔɔmine naŋ pare turi nimiri yɛlɛ ko ba, kyɛbee a iri ba bare a lantaapuoruu poɔŋ ba naŋ de ba menne eŋ peɛ̃mo toma zuŋ. A noba ŋa maŋ ‘toŋɛɛ faaloŋ a kyaare ba menne eŋgama.’ (1 Korinti 6:18) Gbɛɛ yaga yɛlɛ naŋ maŋ te waneŋ a yɛlɛ ŋa zaa la ka, ba ba maŋ “go ba menne velaa a tuuro [Naaŋmen] yelbiri na eŋɛŋ.” (Yieme 119:9) Ka te yɔɔmineŋ wa deɛ wagre yi ba tomazieŋ a gaa zie kaŋa ka ba te pɛnne, gbɛɛ yaga ba maŋ barɛɛ ba menne. Ba neŋ ba yɔɔmine naaneŋ maŋ te laŋna ana zie naŋ, kyɛ ba maŋ te nyɔgɛɛ noba mine naŋ ba puoro Jehoova a meŋ wa a zie ka ba pɛnne na zɔmennoŋ. Ba maŋ teɛreŋ ka ‘oo a noba ŋa yɛlɛ somaŋ.’ Kristabiiri mine gba maŋ poɔ la a noba ŋa eŋɛŋ a erɛ yɛlɛ Kristabie naŋ ba seŋ ka o e. Lɛ neŋ o zu la, te yɔɔmine neŋ ba tontoŋtaaba mine maŋ peɛlɛɛ taa yaga zaa te gaali. Kristabie kaŋa naŋ e a lantaapuoruu neŋkpoŋ kaŋa da peɛlɛɛ pɔge kaŋa oŋ de oŋ tonɔ koroo yaga zaa te gaali, ka lɛ vɛŋ oŋ bare o booree deme a kyɛ wore te kpeɛrɛ neŋ a pɔge ŋa. A baaraa zaa ba da irooŋ bare a lantaapuoruu poɔŋ. Yelmeŋɛ ka a Baabole yeli, “Zɔmeŋ-faare tuubu maŋ sãã la gyog-sonne”!—1 Korinti 15:33.
w06 6/15 25 wɛl. 1
‘Yɛlɛ Na Hoŋ Maŋ Leɛteɛre Ma Na La N Nimipɛle’
JEHOOVA maŋ leɛteɛrɛɛ o puorebiiri yɛlɛ naŋ na baŋ soŋ ba ka ba toɔ̃ are yelkpeɛne na baŋ tuoro a wagre kpeɛne ŋa poɔŋ na noɔreŋ. Saŋa mine, te menne Baabole kannoo poɔŋ la oŋ maŋ leɛteɛre te a yɛlɛ ama. Jehoova maŋ lɛ tu la yɛlɛ teŋ maŋ zanna te Kristabiiri lammore na zieŋ, ane yɛlɛ nɔɛ iribo na teŋ maŋ woŋ beŋ na a leɛteɛre te yɛlɛ mine. Yɛlɛ na mine teŋ maŋ kanne a kyɛ woŋ a lammore zieŋ ba maŋ e yelpaalba ko te. Aminekaŋaŋ, te daŋ zannɛɛ a yɛlɛ saŋa kaŋa naŋ pare. Kyɛ, te eɛ noba naŋ maŋ inne yɛlɛ, azuŋ aseŋ ka ba maŋ leɛteɛre te Jehoova poboɔbo yɛlɛ, o bege, ane o sowuli. Aseŋ ka te maŋ de yɛlɛ na Naaŋmen naŋ maŋ leɛteɛre te na tegroŋ yaga zaa. A maŋ eŋ teŋ faŋa a soŋ te teŋ de te teɛroŋ zaa eŋ lɛ teŋ na baŋ erɛ yɛlɛ te zemmo poɔŋ ka Naaŋmen poɔ pɛle. Azuŋ, a yieloŋ yiele da yieli ko la Jehoova ka: ‘Yɛlɛ na hoŋ maŋ leɛteɛre ma na la N nimipɛle.’—Yieme 119:24.
w10 4/15 20 wɛl. 2
Leɛre Ho Nimie Yi Boma Naŋ Ba Taa Tɔnɔ Kaabo Eŋɛŋ!
2 Yɛlɛ na teŋ maŋ de te nimie kaara na baŋ de la toɔrɔ naŋ e kpoŋ waneŋ te zuŋ. Ka teneeŋ wa de te nimie kaa bonkaŋa, te teɛroŋ maŋ nyɔgɛɛ a yɛlɛ. Yɛlɛ na teŋ maŋ de te nimie kaara na baŋ vɛŋeŋ ka te piili taa vɔlaa mine, kyɛbee a boɔrɔ ka te e yɛlɛ mine te sukyie poɔŋ. A yi Setaana a Dɛɛvul donɛɛ ŋa poɔŋ teŋ be na, noba ba taa gyogri naŋ soma. Ba maŋ boɔrɔŋ ka ba erɛ yɛlɛ naŋ na korɔ ba na yoŋ popeɛloŋ. Azuŋ gbɛɛ yaga, te maŋ nyɛɛ fotori ane yɛlɛ naŋ ba soma ka noba de toɔlɔ korɔ taa. Ka teneeŋ gbaŋ kaa a boma ama fẽẽ, kyɛ a na baŋ de la toɔrɔ waneŋ te zuŋ. (1 Gyɔɔn 5:19) A ba e seɛlee a yieloŋ yiele naŋ da sɔre Jehoova ka: ‘Leɛre N nimie a yi yɛlɛ naŋ ba taa tɔnɔ kaabo eŋɛŋ; a go ma taa ho sori na zuŋ.’—Yiem. 119:37.
Baabole Poɔ Yelsonne
w00 10/1 14 wɛl. 8
Boma Zannoo—Te Na Baŋ Nyɛɛ Tɔnɔ Yi Be, A Eɛ Yɛlɛ Naŋ Maŋ Korɔ Te Popeɛloŋ Meŋ
8 Aseŋ ka te de te sukyiri zaa a nɔŋ Jehoova Yelbiri na, bonso ka neɛŋ wa boɔrɔ yelkaŋa yaga zaa, o maŋ de la a yɛlɛ eŋ o sukyiriŋ. Azuŋ aseŋ ka te maŋ mãã te menne a teɛre Baabole ziiri na teŋ kanna na yɛlɛ gaa tɔɔre. Aseŋ ka te maŋ teɛrɛ Jehoova yelbiri na yɛlɛ soŋ zaa, a toɔ̃ nyɛ lɛ teŋ na baŋ e a de a tonɔ neŋ toma meŋ. Lɛ wuleeŋ ka aseŋ ka te maŋ bɔ zie naŋ e bɔin a teɛre a yɛlɛ gaa tɔɔre, a kyɛ puore sɔre Jehoova ka o soŋ te ka te woŋ a muni meŋ soŋ. Aŋa Eezira, aseŋ ka te meŋ maŋ nare te sukyie ka te kanne a kyɛ zanne Naaŋmen Yelbiri na. A Baabole yeleeŋ a kyaare Eezira ka: ‘Eezira daaŋ [narɛɛ] o sukyiri ka o bɔ Jehoova bege na, a tuuro a bege kyɛ wulo o yeltuurii ane nɔbinnii na Izerayɛl poɔŋ.’ (Eezira 7:10) Ho nyɛɛ a yɛlɛ ata na zuŋ Eezira naŋ da nare o sukyiri? O da narɛɛ o sukyiri ka o zanne a bege, a de yɛlɛ na oŋ zanna na tonɔ neŋ toma, a kyɛ wulo o taaba meŋ. Aseŋ ka te tɔglɔ o ewuli soŋ na.
DECEMBER 16-22
BAABOLE POƆ YELNIMIZEERE YIEME 119:57-120
Yɛlɛ Naŋ Na Baŋ Soŋ Te Ka Te Are Yelkpeɛne Noɔreŋ
w06 6/15 20 wɛl. 2
‘Oo Nyɛ Maŋ Nɔŋ Ho Bege Seŋ Lɛ!’
2 Ana somaŋ ka te soore ka, “Sobuo ka Naaŋmen bege na da ko a yieloŋ yiele sukyirimaaroŋ a lɛ dii o sukyiri meŋ?” Yɛlɛ naŋ da somoo yaga zaa la saŋa na oŋ wa baŋ ka Jehoova da boɔrɛɛ o yɛlɛ na. Saŋa na oŋ wa zanne Naaŋmen bege yɛlɛ gaa tɔɔre na, a da wa nyɛ nɔmmo na Naaŋmen naŋ wuluu a bege poɔŋ na, a da vɛŋɛɛŋ oŋ taa popeɛloŋ, aneazaa ka o dɔndɔnne da dɔgroŋ yaga zaa. O da nyɛɛŋ ka Jehoova eɛ yelsonne yaga zaa koo. Saŋa na oŋ wa de sowuli naŋ be Naaŋmen bege poɔŋ tonɔ neŋ toma na, a da vɛŋɛɛŋ oŋ e yɛmbaŋna a gaŋ o dɔndɔnne na. A da lɛ somoo oŋ taa nyɔvore. Naaŋmen bege na da vɛŋɛɛŋ oŋ taa emmaaroŋ ane zoma naŋ soma.—Yieme 119:1, 9, 65, 93, 98, 165.
w00 12/1 14 wɛl. 3
Ho Nɔŋ La Yɛlɛ Na Jehoova Naŋ Maŋ Leɛteɛre Bo Na Yaga Zaa Bee?
3 Yɛlɛ na Naaŋmen naŋ da maŋ leɛteɛre a yieloŋ yiele na da eɛ tegroŋ yaga zaa a koo. Azuŋ, o da yieleeŋ ka: ‘N lonneeŋ, N ba naara ka N tu ho nɔkurii. Neŋfaare mie le maŋ, kyɛ N ba inni ho bege.’ (Yieme 119:60, 61) Yɛlɛ na Jehoova naŋ maŋ leɛteɛre te na maŋ soŋ teŋ teŋ toɔ̃ are dɔgroŋ noɔreŋ. Bonso te maŋ taaɛ sagediibu ka, te Saa naŋ be sazuŋ na na iree yelkpeɛne na zaa te dɔndɔnne naŋ de waana neŋ te zuŋ na. Wagre naŋ gɛrɛ poɔŋ na, o na faa te yi a yelkpeɛne zaa poɔŋ, ka lɛ vɛŋ ka te naŋ moɔ̃ niŋe moɔlɔ a Naaloŋ duorisoŋ.—Marko 13:10.
w06 9/1 14 wɛl. 4
Yelnimizeere Naŋ Be A Yieme Gama Anuu Soba Poɔŋ
119:71—Ka teneeŋ wa tuoro yelkpeɛne, sobuo aŋ na baŋ soŋ te? Ka teneeŋ wa tuoro yelkpeɛne, a na baŋ soŋ teŋ ka te dɛle Jehoova kpɛlɛŋkpɛlɛŋ. A na baŋ lɛ soŋ teŋ ka te maŋ puoro sɔrɔ Jehoova nimizeɛ̃, a moɔ̃ niŋe zanna a Baabole, a maŋ de yɛlɛ na teŋ zanna na tonɔ neŋ toma. Ane meŋ, lɛ na teŋ maŋ e te yɛlɛ saŋa na teŋ wa tuoro dɔgroŋ na baŋ wulee gyogri mine aŋ seŋ ka te bare. Ka teneeŋ tere sori ka yelkpeɛne na teŋ tuoro na soŋ te ka te taa gyog-sonne, a na vɛŋeŋ ka te suuri koŋ iri yaga zaa saŋa na teŋ wa tuoro a yelkpeɛne na.
w17.07 13 wɛl. 3, 5
Yɛ “Laŋ Kono Ne Banaŋ Naŋ Kono”
3 Nɔkpeɛne zaa kyebe ka, te sazu Saa Jehoova zie la ka mooreteroo zaa maŋ yi wa. (Kanne 2 Korinti 1:3, 4.) Jehoova eɛ ewuli soŋ yaga zaa a yɛlɛ ŋa poɔŋ, bonso o maŋ de la o meŋɛ a eŋ te gbɛbɔgriŋ. Azuŋ, o da yelko la o puorebiiri ka: ‘Maaŋ, maaŋ la Neɛ na naŋ mɔglɛɛ.’—Aiz. 51:12; Yiem. 119:50, 52, 76.
5 Te na baŋ taaɛ sagediibu kpɛlɛŋkpɛlɛŋ ka, Jehoova na arɛɛ te gbɛbɔgriŋ a e yɛlɛ ko te. Azuŋ, a ba maŋ seŋ ka te naara, aseŋ ka te maŋ lonne wieoŋ a tu puore sɔroo eŋɛŋ a vɛŋ ka Jehoova baŋ yelzaa naŋ be te sukyie poɔŋ a dɔɔnɔ te. A diiree sukyiri yaga zaa ka te baŋ ka Jehoova baŋɛɛ yelkpeɛne na teŋ tuoro na, a e siri ka o dii te sukyie a kyɛ soŋ te yelzaa meŋ poɔŋ. Kyɛ, sobuoŋ oŋ maŋ tu a e lɛ?
Baabole Poɔ Yelsonne
w06 9/1 14 wɛl. 5
Yelnimizeere Naŋ Be A Yieme Gama Anuu Soba Poɔŋ
119:96—Bo yɛlɛ ka a yieloŋ yiele da boɔrɔ ka o wuli saŋa na oŋ yelka, ‘N nyɛɛ pɛgeyiibo zaa ta zie’? A yieloŋ yiele da mannɛɛ teɛroŋ na nensaaleba naŋ taa kyaare pɛgeyiibo yɛlɛ. O da boɔrɔŋ ka o wuli ka teɛroŋ na nensaaleba naŋ taa kyaare pɛgeyiibo na taaɛ ta zie. Kyɛ, Naaŋmen bege na yɛŋ ba taa ta zie. Te na baŋ de la Naaŋmen sowuli toŋ neŋ toma te zemmo yɛlɛ zaa poɔŋ. A New International Version Baabole na kannɛɛŋ ka, “N nyɛɛ zie pɛgeyiibo zaa naŋ maŋ ta, kyɛ ho bege ba taa ta zie.”
DECEMBER 23-29
BAABOLE POƆ YELNIMIZEERE YIEME 119:121-176
Lɛ Hoŋ Na Toɔ̃ E Tage Ho Meŋɛ Yi Sukyiri-Kyɛre Yɛlɛ Poɔŋ
w18.06 17 wɛl. 5-6
De Naaŋmen Bege Ane O Sowuli Na Wulo Ho Zoma
5 Ka teneeŋ boɔrɔ ka te nyɛ tɔnɔ yaga zaa a yi Naaŋmen bege na poɔŋ, aseŋ ka te maŋ kannaa, lɛ na baŋ soŋ teŋ ka te baŋ a bege soŋ. Aseŋ ka te nɔŋ Naaŋmen bege na meŋ a de a tegroŋ. Naaŋmen Yelbiri na yelka: ‘Yɛ kyiiri faaloŋ, a nɔŋ soŋ.’ (Eemos 5:15) Kyɛ, sobuo teŋ na baŋ tu kyɛ e lɛ? Yelnimizeɛ kaŋa naŋ na toɔ̃ soŋ te la, teŋ na maŋ taa Jehoova teɛroŋ a kyaare yɛlɛ. Te de yelmannaa wuli a muni: Te de ka ho maŋ gaŋeŋ ka ho gbiri, kyɛ ho koŋ baŋ gbiri. Beŋ la ka ho dɔkta wuli bo bondirii naŋ seŋ ka ho dire, lɛ aŋ seŋ ka ho dɔlɔ ho kɔbɔ, ane yɛlɛ aŋ seŋ ka ho leɛre ho zemmo poɔŋ. Saŋa na hoŋ wa de yɛlɛ na o naŋ wuli bo na toŋ toma na, ho wa nyɛɛŋ ka a soŋ boŋ yaga zaa! Nɔkpeɛne zaa kyebe ka, lɛ na ho dɔkta naŋ soŋ bo ka ho zemmo leɛ soma na vɛŋɛɛŋ ka ho poɔ pɛle yaga zaa.
6 Lɛ neŋ o zu la, Neɛ naŋ maale te na ko teŋ bege naŋ na toɔ̃ go te yi faaloŋ eŋɛŋ, a kyɛ lɛ vɛŋ ka te zemmo meŋ soma yaga. Hooŋ meŋɛ teɛre nyɛ tɔnɔ hoŋ na nyɛ ka hooŋ tuuro bege na a Baabole naŋ biŋ a kyaare zirii ŋmaabo, daware yɛlɛ, nannyigri, sɛŋsɛŋ yɛlɛ, kpaŋkpaŋkpeɛ̃o toma ane sɔyɛlɛ na. (Kanne Yeng Yelibie 6:16-19; Yel. 21:8) Ka teneeŋ wa de Jehoova bege na toŋ neŋ toma a nyɛ maaloo yaga zaa, a maŋ vɛmeŋ ka nɔmmo na te naŋ taa koo na maaleŋ e kpoŋ, a lɛ vɛŋ teŋ wuli nimipa a ko Jehoova ane bege na oŋ biŋ na.
w93 4/15 17 wɛl. 12
Baapaalba—Boŋ La Ka Yɛ Boɔrɔ?
12 Agaŋaazaa, aseŋ ka yɛ kyiiri faaloŋ, a lɛ tage yɛ menne yi faaloŋ poɔŋ kpɛlɛŋkpɛlɛŋ. (Yieme 97:10) Ho kyiiree yelkaŋa naŋ na baŋ vɛŋ ka ho taa popeɛloŋ kyɛbee a woŋ noɔ̃ wagre fẽẽ poɔŋ a piilee saŋa bee? Maŋ leɛteɛre yɛlɛ naŋ na baŋ yi a poɔŋ wa. A Baabole yeleeŋ ka, “Yɛ ta vɛŋ ka ba bɛlle yɛ; Naaŋmen ba e neɛ ba naŋ na erɛ laara, bonso, bonna zaa neɛ naŋ bore la ka o na kyɛ. Ka neɛŋ bore o meŋɛ eŋgane yelboɔre, o na kyɛ la sããmmo yi a eŋgane zie.” (Galesiya 6:7, 8) Ka hooŋ wa tuore pigrinyɛ ka ho de ho meŋɛ eŋ sɛŋsɛŋ toma poɔŋ, teɛre nyɛ yɛlɛ naŋ na baŋ yi a poɔŋ wa ho zuŋ. Teɛre nyɛ lɛ na a yɛlɛ naŋ na beɛrɛ Jehoova sɛŋ. (De manne neŋ Yieme 78:41.) Leɛteɛre poɔ meŋ hoŋ na taa saŋa na hoŋ ba e siri yɛlɛ a nyɛ, kyɛbee baaloŋ faa kaŋa aŋa AIDS naŋ na kpɛ bo yɛlɛ. Leɛteɛre lɛ na a yɛlɛ naŋ na kyɛre ho sukyiri aseŋ, ane lɛ na aŋ na vɛŋ ka ho kɔŋ ho gyeremɛ nensaaleba nimitɔɔreŋ. A yi wagre kɔɔroo kaŋa poɔŋ gba, kyɛ a toɔrɔ naŋ na baŋ wa la ho zuŋ. Te yɔɔpɔge kaŋa yeleeŋ ka: “Sɛre ka N neŋ N serɛ na wa kultaa na, te da tonɛɛ peɛ̃mo toma yaga zaa. Aneazaa ka zenɛ ŋa te eɛ Kristabiiri, kyɛ gaŋneŋ taa yɛlɛ na teŋ e saŋa kaŋa naŋ pare na maŋ wanɛɛ zɔɔre ane nyuuri te kpakyagaŋ a kultaa poɔŋ.” Ka neɛŋ de o meŋɛ eŋ peɛ̃mo toma poɔŋ, a na baŋ vɛŋeŋ ka o kɔŋ apoɔsori na oŋ taa a lantaapuoruu poɔŋ, kyɛbee ka ba iruu bare a lantaapuoruu poɔŋ. (1 Korinti 5:9-13) Azuŋ, aseŋ ka ho de a yɛlɛ ama zaa iri neŋ sareka a toɔ̃ woŋ noɔ̃ fẽẽ lɛ bee?
Baabole Poɔ Yelsonne
w23.01 2 wɛl. 2
Sagedi Ka Naaŋmen ‘Yelihoŋ E La Yelmeŋɛ’
2 Jehoova puorebiiri zaa sagedieŋ peɛlaaŋ ka Jehoova la ‘a yelmeŋɛ Naaŋmen.’ Poteɛre sonne yoŋ ka Jehoova maŋ taa kyaara ne te. (Yiem. 31:5; Aiz. 48:17) Te baŋɛɛŋ ka te na baŋ dɛlɛɛ yɛlɛ na zaa naŋ be a Baabole poɔŋ na, bonso Naaŋmen ‘yelihoŋ e la yelmeŋɛ.’ (Kanne Yieme 119:160.) Te neŋ Baabole gaŋbaŋna kaŋa laŋɛɛ teɛroŋ, o da yeleeŋ ka: “Zirii naŋ e fẽẽ lɛ bonyeni ba kye Naaŋmen Yelbiri na poɔŋ. Yelzaa Naaŋmen naŋ yeli bonyeni meŋ koŋ le teŋɛŋ. Naaŋmen noba na baŋ dɛlɛɛ yɛlɛ na zaa Naaŋmen naŋ maŋ yeli na, bonso ba dɛlɛɛ Naaŋmen na naŋ yeli a yɛlɛ na.”
DECEMBER 30–JANUARY 5
BAABOLE POƆ YELNIMIZEERE YIEME 120-126
Ba Da Borɛɛŋ Neŋ Neŋtaŋ, A Kyɛ De Popeɛloŋ De Neŋ A Boma
w04 6/1 16 wɛl. 10
Noba Naŋ Korɔ Naaŋmen Gyeremɛ Na Nyɛɛ Maaloo
10 Ka teneeŋ wa de te dɔgɛɛ daa na tuo a tuuro Yezu puori, te neŋ Setaana maŋ zɔɔrɔŋ. Gyimisi 4:7 yeleeŋ ka, ‘Yɛ kyaare a Dɛɛvul ne nyaa, o na zo yi la yɛ zie.’ Lɛ ba wuli ka Naaŋmen puoruu eɛ mɔlɔ. Aseŋ ka te maŋ moɔ te moɔbo zaa kyɛ toɔ̃ puoro Naaŋmen. (Luka 13:24) Kyɛ, a Baabole eŋɛɛ noɔre kaŋa naŋ be Yieme 126:5 ka: ‘Noba na naŋ borɔ neŋ neŋtaŋ na kyɛŋ neŋ popeɛloŋ yieme.’ Te ba puoro Naaŋmen naŋ maŋ inni yelsonne na zaa te naŋ e koo na. Naaŋmen “maŋ yɔɔ [la] banaŋ naŋ boɔrɔ O yɛlɛ.” O maŋ ko la noba na zaa naŋ koroo gyeremɛ meŋ maaloo.—Hiburu 11:6.
w21.11 24 wɛl. 17
Wala Ka Ho Sagediibu Na Toɔ̃ E Kpeɛŋaa Seŋ?
17 Ho nɔŋna kaŋa la kpi, ka lɛ vɛŋ hoŋ dire woore yaga zaa bee? Maŋ bɔ wagre a kanna yɛlɛ na baŋ sɛge eŋ a Baabole poɔŋ a kyaare a kũũ leɛ-iruu yɛlɛ na, a na soŋ boŋ ka ho sagediibu maaleŋ e kpeɛŋaa. Ba iree ho booree neɛ kaŋa bare a lantaapuoruu poɔŋ ka lɛ vɛŋ ka ho poɔ sãã yaga zaa bee? Moɔ̃ niŋe zanna a Baabole, a na soŋ boŋ ka ho wa nyɛ ka sori na Naaŋmen naŋ maŋ tu a de dɛnnoo korɔ te na maŋ soma wagre zaa. Yelkpeɛŋaa zaa ho naŋ tuoro, tu ana yelkpeɛŋaa na eŋɛŋ a mɛ ho sagediibu ka o maaleŋ e kpeɛŋaa. Yeli yelzaa naŋ be ho sukyiri poɔŋ a dɔɔnɔ bo ko Jehoova. Ta wa tagra ho meŋɛ yire ho yɔɔmine zieŋ, kyɛ naŋ tage peɛle ba. (Yeng. 18:1) De ho meŋɛ eŋ yɛlɛ hoŋ na baŋ erɛ ka a soŋ bo ka ho nyɔgrɔ ho meŋɛ poɔŋ, haali ka hooŋ na erɛ lɛ neŋ neŋtaŋ. (Yiem. 126:5, 6) Moɔ̃ niŋe gɛrɛ a lammore, a tonɔ a naaŋ moɔloo toma, a kanna a Baabole meŋ. De ho teɛroŋ zaa eŋ maaloo na Jehoova naŋ na ko bo nendaare kaŋa na eŋɛŋ. Ka hooŋ wa nyɛ lɛ na Jehoova naŋ sonnɔ bo na, a na vɛŋeŋ ka ho sagediibu na maaleŋ e kpeɛŋaa yaga zaa.
w01 7/15 18-19 wɛl. 13-14
Moɔ̃ Niŋe Tonɔ A Boma Deebo Toma!
13 Yɛlɛ naŋ be Yieme 126:5, 6 na baŋ dii la noba naŋ tonɔ toma a boma deebo toma poɔŋ sukyie, a meŋɛmeŋɛŋ bana na naŋ tuoro dɔgroŋ. Be kannɛɛŋ ka: ‘Noba na naŋ borɔ neŋ neŋtaŋ na kyɛŋ neŋ popeɛloŋ yieme. Neɛ naŋ maŋ yi gɛrɛ a kono, a taa bonbie buoɔra, nɔkpeɛne zaa kyebe ka o na leɛ waŋ neŋ popeɛloŋ yieme, a tuo kazuri.’ Yɛlɛ na a yieloŋ yiele naŋ yele a kyaare boma borebo ane boma deebo na wulee lɛ na Jehoova naŋ da kaara a Izerayɛl biiri naŋ da yi Baabilɔŋ gbaŋgbaaloŋ poɔŋ a leɛ wa a Izerayɛl paaloŋ na zu, ane sori na oŋ da tu a korɔ ba maaloo. Ba poore zaaŋ da pɛle saŋa na baŋ da faa ba yi neŋ gbaŋgbaaloŋ poɔ na. Aminekaŋaŋ, saŋa na baŋ da borɔ boma a teŋgane naŋ da gaŋ a e dabore na da vɛŋɛɛŋ baŋ koŋ. Bonso yuomo 70 da parɛɛŋ a gaa ka neɛzaa ba toŋ toma a teŋgane zuŋ. Kyɛ noba na zaa naŋ da moɔ̃ niŋe a borɔ boma, a kyɛ tonɔ a meɛbo toma na da nyɛɛ maaloo ba tonkpeɛne na zuŋ. Maaloo na baŋ da nyɛ na da vɛŋɛɛŋ ka ba poore pɛle.
14 Ka teneeŋ wa tuoro yelkpeɛne, kyɛbee ka te Kristabitɔ kaŋaŋ wa dire dɔgɛɛ sontuubu zuŋ, a na baŋ vɛŋeŋ ka te ŋma neŋtaŋ. (1 Piita 3:14) A yi a boma deebo toma na teŋ tonɔ na poɔŋ, aminekaŋaŋ a piilee saŋa na, a na baŋ eɛ kpeɛŋaa ko te bonso te na baŋ teɛreŋ ka tɔnɔ zaa ba yire moɔbo na zaa teŋ moɔrɔ a naaŋ moɔloo toma poɔŋ na. Kyɛ ka teneeŋ moɔ̃ niŋe a borɔ a kyɛ eŋnɛ a boma koɔ̃, Naaŋmen na vɛŋeŋ ka a baa. Saŋa kaŋa gba, a maŋ baaŋ a gaŋ lɛ na teŋ teɛre na. (1 Korinti 3:6) Lɛ na teŋ maŋ de a Baabole ane te Baabole poɔ gama na tɔrɔ korɔ noba na vɛŋɛɛŋ ka a yɛlɛ ŋa pɛle velaa zaa.
Baabole Poɔ Yelsonne
cl 73 wɛl. 15
Kpeɛ̃o Na Oŋ Maŋ De Go Te—“Naaŋmen La Te Lirizie”
15 A dɛndɛŋ, yɛ vɛŋ ka te manne kpeɛ̃o na Naaŋmen naŋ maŋ de go te eŋgannoŋ poɔŋ na yɛlɛ. Aŋa Jehoova puorebiiri, te kaarɛɛ soriŋ ka Jehoova na maŋ go la o puorebiiri zaa. Ka Jehoova naaneŋ da maŋ go te, a da naŋ eɛ mɔlɔ ko Setaana ka o sãã te zaa kpɛlɛŋkpɛlɛŋ. Teɛre a yɛlɛ ŋa soŋ: Setaana la “a tendaa naa,” yɛlɛ oŋ boɔrɔ yaga zaa a gaŋ yelzaa la ka o iri yelmeŋɛ puoruu bare a teŋɛ ŋa zuŋ. (Gyɔɔn 12:31; Yel-iriwulaa 12:17) Gɔmenantere naŋ taa kpeɛ̃o yaga zaa de la ba nuuri dɔgle te naaŋ moɔloo toma na zuŋ, a moɔrɔ ka ba ko Jehoova puorebiiri zaa baare kpɛlɛŋkpɛlɛŋ. Kyɛ Jehoova puorebiiri arɛɛ kpeɛŋaa a moɔ̃ niŋe moɔlɔ a duorisoŋ a ba bala. Bonso ka paalonne naŋ taa kpeɛ̃o yaga zaa ba toɔ̃ pigi toma na a Kristabiiri naŋ e fẽẽ yaga zaa, a ba taa nensaaleba gomeŋɛ zaa naŋ tonɔ na? Ananso la ka, Jehoova la de o begɛ na go ne te.—Yieme 17:7, 8.