Te Zemmo Ane Te Naaŋ Moɔloo Toma Lammo Yelsɛgree Yelpeɛre Gane
© 2025 Watch Tower Bible and Tract Society of Pennsylvania
SEPTEMBER 1-7
BAABOLE POƆ YELNIMIZEERE YENG YELIBIE 29
Zagre Sããkoŋyɛlɛ Ane Sagediibu Zaa Naŋ Ba Pɛlɛ Jehoova Poɔ
wp16.06 6, daga
Yelnyɛ Naŋ Kyaare Bana Naŋ Be Sazuŋ
A yi te zenɛ ŋa donɛɛ ŋa poɔŋ, noba yaga de la ba menne eŋ bag-maale yɛlɛ poɔŋ yaga zaa a kyɛ zoro sefaare meŋ dabeɛ̃ yaga zaa. Ba maŋ de la zueɛ, nubaŋne ane berebo boma mine a go neŋ ba menne. A ba seŋ ka ho e a yɛlɛ ŋa bee a zoraa dabeɛ̃. A Baabole ko teŋ sukyiridii yɛlɛ ŋa: “Jehoova nimie yoɔrɛɛ a tendaa zu zaa, ka o are noba na sukyiri naŋ paale o eŋɛŋ na gbɛbɔgriŋ a kyɛ wuli o kpeɛ̃o.” (2 Tungkori 16:9) Jehoova Naaŋmen taa la kpeɛ̃o yaga zaa gaŋ Setaana. O na go boŋ ka hooŋ sage O di.
Te na baŋ nyɛɛ gomeŋɛ yi Jehoova zie ka teneeŋ zanne baŋ yɛlɛ onaŋ boɔrɔ, a de a tonɔ neŋ toma te zemmo poɔŋ. Aŋa mannoo poɔŋ, a dɛndɛŋ Kristabiiri naŋ da be Efesu teŋɛ na da de la ba gama zaa ba naŋ da maŋ de erɛ berebo yɛlɛ a yi wa nyugi. (Toma 19:19, 20) Lɛ meŋ la, ka teneeŋ na baŋ nyɛ gomeŋɛ yi Jehoova zie, aseŋ ka te sãã berebo boma teŋ taa aŋa zueɛ, nubaŋne, berebo gama ane bonzaa naŋ kyaare sefaare yɛlɛ.
w19.04 17 wɛl. 13
Nyɔge A Yelmeŋɛ Naŋ Kyaare Kũũ Na Kpeɛŋaa
13 Ka hooŋ wa taa bonnoo a kyaare sããkoŋyɛlɛ mine, puore sɔre Jehoova ka o soŋ bo a ko bo sazu yɛŋ. (Kanne Gyimisi 1:5.) Pãã peɛre yɛlɛ a yi te gama na mine poɔŋ a kyaare a yɛlɛ. Ho na baŋ bɔ la sommo a yi ho lantaapuoruu nembɛrɛ zieŋ. Ba koŋ wuli bo yɛlɛ a naŋ seŋ ka ho e, kyɛ ba na de la Baabole sowuli naŋ kyaare a yɛlɛ a soŋ bo. Ka hooŋ e a yɛlɛ ŋa zaa, a na soŋ boŋ ka ho de “yɛŋ toŋ neŋ toma a teɛre yɛlɛ gaa tɔɔre,” ka a soŋ bo ka ho “baŋ yelsoŋ ane yelfaa tɛɛtɛɛ.”—Hib. 5:14.
w18.11 11 wɛl. 12
“N Na Kyɛnɛɛ Ho Yelmeŋɛ Sori Naŋ”
12 Sããkoŋyɛlɛ ane yeltuurii neŋ Baabole sowuli naŋ ba kyaare taa. Te booree deme, tontoŋtaaba ane sakuubitaaba na maŋ boɔrɔŋ ka te poɔ ba poɔŋ ka te laŋ di tige. Wala teŋ na baŋ e a tage te menne yi tige naŋ ba pɛlɛ Jehoova poɔ eŋɛŋ? Te na baŋ e la lɛ ka teneeŋ taa teɛroŋ na Jehoova naŋ taa kyaare a yɛlɛ. Ka te naŋ maŋ kanna te gama na mine naŋ kyaare zie a tige naŋ yi, a na baŋ soŋ teŋ yaga zaa. Ka teneeŋ maŋ teɛre te menne Baabole sowuli a kyaare ananso naŋ vɛŋ teŋ ba de te menne eŋnɛ tige poɔŋ, te sagedieŋ ka te erɛɛ “yɛlɛ naŋ soma a Daana nimitɔɔreŋ.” (Efe. 5:10) Ka teneeŋ dɛle Jehoova ane yelmenne naŋ be a Baabole poɔŋ na, te koŋ “zoro nensaaleba” dabeɛ̃.—Yeng. 29:25.
Baabole Poɔ Yelsonne
it “Pugi Te Gaalii” wɛl. 1
Pugi Te Gaalii
Pugi te gaalii wulee neɛ naŋ baŋ perɛ kyɛ de puubu naŋ ba seŋ neŋ korɔ neɛ kaŋa, a de yelbi-noɔ̃ne naŋ ba yi o sukyiriŋ a pugro neŋ a soba kyɛbee a pugro a soba yaga zaa. Noba maŋ eɛ a yɛlɛ ŋa ka lɛ vɛŋ ka neɛ na ba naŋ pugro na zɛgrɛ o meŋɛ, lɛ na baŋ de la saammo wa pɔge neɛ na ba naŋ pugro na. Noba maŋ eɛ lɛ ka ba de nyɛ tɔnɔ ko ba menne bee eŋgannoŋ sommo yi neɛ kaŋa zie. A maŋ vɛŋeŋ ka neɛ na ba naŋ pugro na nyɛ ka aseŋ ka o e yelkaŋa a ko neɛ na naŋ pugruu na. Noba maŋ eɛ a yɛlɛ ŋa ka ba bɛnle ba taa eŋ yɛlɛ poɔŋ. (Ye 29:5) A yɛlɛ ŋa ba wulo yɛŋ naŋ yi Naaŋmen zie; kyɛ a donɛɛ poɔ ka a yɛlɛ ŋa yi. Bombɔ-gaŋne la maŋ vɛŋ ka noba erɛ a yɛlɛ ŋa. (Gyi 3:17) A yele yɛlɛ naŋ ba yire ba sukyieŋ, ziri-ŋma, a pugi neɛ te gaali, ama zaa eɛ yɛlɛ naŋ ba pɛlɛ Naaŋmen poɔ.—2Ko 1:12; Ga 1:10; Ef 4:25; Kl 3:9; Yel 21:8.
SEPTEMBER 8-14
BAABOLE POƆ YELNIMIZEERE YENG YELIBIE 30
“Ta Ko Ma Nandaaloŋ Bee Bondaaloŋ”
w18.01 24-25 wɛl. 10-12
Bo Tɔ Nɔmmo La Maŋ Waneŋ Popeɛloŋ Meŋɛmeŋɛ?
10 Yelmeŋɛ la, te zaaŋ boɔrɔ libie. A maŋ soŋ teŋ teŋ da boma te naŋ boɔrɔ. (Ikil. 7:12) Kyɛ ka neɛŋ taa libie fẽẽ a na de kaa o meŋɛ, lɛ na baŋ vɛŋeŋ ka o taa popeɛloŋ bee? Ɛɛ! (Kanne Ikilisiasitiz 5:12.) Agur naŋ e Jakeh bidɔɔ sɛgɛɛŋ ka: ‘Ta ko ma nandaaloŋ bee bondaaloŋ. Ko ma bondirii naŋ na seŋ ma.’ Te baŋɛɛ bon na zuŋ oŋ ba boɔrɔ ka o e nandaana a te gaali. Aŋa lɛ na onaŋ yel na, o ba boɔrɔ ka o kpɛ pigrinyɛ poɔ ka a vɛŋ ka o te zu boma a sãã Naaŋmen poɔ. Kyɛ ananso la wala oŋ puore ka Naaŋmen ta koo bondaaloŋ? O sɛgɛɛŋ ka: ‘Ka N ta erɛ wa tegi a zagre bo bare a yele: ‘Nembuo la Jehoova?’’ (Yeng. 30:8, 9) Aminekaŋaŋ, te baŋ la noba naŋ dɛle bondaaloŋ a gaŋ Naaŋmen.
11 Noba naŋ nɔŋ libie koŋ baŋ pɛle Naaŋmen poɔ. Yezu yeleeŋ ka: “Neɛzaa koŋ baŋ tonɔ korɔ nembɛrɛ bayi; o na kyiiri la kaŋa, a kyɛ nɔŋ kaŋa, kyɛbee ka o kpimare kaŋa a kyɛ gyɛ kaŋa bare. Yɛ koŋ baŋ e gbaŋgbaare a ko Naaŋmen ane Bondaaloŋ.” O vɛŋɛɛŋ ka a yɛlɛ pɛle saŋa na oŋ yelka: “Yɛ ta boɔrɔ bondaaŋ boma binne a teŋɛzuŋ kyɛ, zie na mɔgre ane zoɔ̃ naŋ be, ka naŋnyigri meŋ na baŋ kɔɔ kpɛ zu a boma. Kyɛ yɛ boɔrɔ bondaaŋ boma binne sazuŋ, beŋ ka mɔgre ane zoɔ̃ ba kye, ka naŋnyigri meŋ koŋ baŋ kɔɔ kpɛ zu a.”—Mat. 6:19, 20, 24.
12 Noba yaga nyɛɛŋ ka ba taa la popeɛloŋ yaga zaa saŋa na baŋ ŋmaa ba libi-di bare na, ka lɛ vɛŋ baŋ nyɛ wagre yaga a tonɔ toma Jehoova puoruu poɔŋ. Jack naŋ be United States paaloŋ koɔrɛɛ o die ane o tomazie, o baŋɛɛŋ ka ka onaŋ e lɛ a na somooŋ ka o neŋ o pɔge zaa laŋ tonɔ a paaneɛ toma. O yeleeŋ ka: “A da eɛ kpeɛŋaa ko te ka te koɔre te di-veɛlaa ane te bontaare. Kyɛ, yuomo mine naŋ pare N teɛroŋ zaa da maŋ gyɛreŋ ka maaŋ wa yi tomazie wa, kyɛ N pɔge naŋ tonɔ a paaneɛ toma da maŋ taa la popeɛloŋ wagre zaa. O da maŋ yeleŋ ka, ‘N taa la toma neŋkpoŋ yɛlɛ naŋ soma yaga zaa a gaŋ toma neŋkpoŋ zaa!’ Pampana N meŋ naŋ tonɔ a paaneɛ toma, te zaa tonɔ korɛɛ Nenyeni, Jehoova.”
w87 5/15 30 wɛl. 8
Zoro Jehoova Ka Lɛ Soŋ Bo Ka Ho Taa Popeɛloŋ
◆ 30:15, 16—Wala ka a yelmannee ŋa wulo?
A wulee lɛ bonzaa naŋ koŋ baŋ paale bombɔ-gaŋne soba niŋe. Aŋa lɛ baleŋkpagrii naŋ maŋ nyu zĩĩ a tegi na, lɛ meŋ la ka bombɔ-gaŋne soba maŋ boɔrɔ libie aneŋ kpeɛ̃o yaga. Lɛ meŋ la ka Kũũ Bɔgi maŋ yuo noɔre a boɔrɔ kũũni, ka pɔge naŋ ba dɔgrɔ maŋ ‘kono boɔrɔ’ bie. (Munpiilee 30:1) Teŋgane naŋ ko yaga zaa maŋ nyu la saa koɔ̃ a ba maŋ kɔɔre kyɛ oŋ lɛ ko aŋa saa naŋ ba wa. Vũũ zele naŋ dire maŋ di la bonzaa naŋ be o soriŋ kyɛ a ba maŋ seŋ o. Lɛ meŋ ka bombɔ-gaŋne soba maŋ waa. Kyɛ noba naŋ de Naaŋmen bammo tonɔ neŋ toma maŋ go la ba menne a yi bombɔ-gaŋne naŋ e gyog-faa na eŋɛŋ.
w11 6/1 10 wɛl. 4
Wala Teŋ Na Toɔ̃ E A Kaara Te Libi-Yɛlɛ Zieŋ Soŋ Zaa
Ka hooŋ wa boɔrɔ ka ho da bonkaŋa, kyeɛre libie biŋ sɛre kyɛ daara. Aneazaa ka, a na maŋ waa ŋa libie ba naŋ kyeɛrɛ binne eɛ yɛlɛ naŋ pare wa gaa, kyɛ ka teneeŋ kyeɛrɛ libie binne, a eɛ sori na kaŋa teŋ na baŋ tu kyɛ biŋ libie, ka lɛ soŋ te ka naŋ ta wa kpɛ te. Ka nobaŋ wa e lɛ, a maŋ soŋ baŋ baŋ ba dire sama. Koɔ̃ na neɛ naŋ maŋ yɔɔ saŋa na oŋ wa pɛŋ libie na meŋ ba maŋ wa leɛ yɛlɛ dɔgle o zuŋ. A Baabole yeleeŋ a kyaare nyire ka, a taa la “yɛŋ” bonso a maŋ bɔ la “siimaa biŋ boma kyeɛbo saŋa” nendaarekaŋa zuŋ.—Yeng Yelibie 6:6-8; 30:24, 25.
Naŋ Kyɛnɛ E Saana Jehoova Tɛnte Na Poɔŋ Tegitegilɛ!
18 A na somaŋ ka te peɛre te menne soŋ a nyɛ teɛroŋ te naŋ taa kyaare libie. Soore ho meŋɛ ka: ‘Gbɛɛ yaga N maŋ teɛrɛɛ libie yɛlɛ ane boma maŋ boɔrɔ ka N da bee? Ka maaŋ wa pɛŋ neɛ kaŋa libiri a maŋ e maŋ tuo ka N leɛ yɔɔ a libiri ko o soba a teɛrɛ ka a libiri yɛlɛ ba fɛre o soba bee? Ka maaŋ wa taa libie a maŋ vɛŋeŋ maŋ nyɛ ka N seɛ la N taaba bee? A maŋ eɛ kpeɛŋaa ka N yuo N nu a soŋ N taaba bee? N maŋ teɛrɛŋ ka te yɔɔmine na naŋ taa libie na nɔŋ la libie a gaŋ Jehoova ba naŋ taa libie zuŋ bee? Ka lɛ N maŋ boɔrɔŋ ka N nyɔge zɔmennoŋ neŋ noba naŋ taa libie kyɛ ba boɔrɔ ka N nyɔge zɔmennoŋ neŋ noba naŋ ba taa libie bee?’ Aseŋ ka te soore te menne a soorebie ŋa bonso Jehoova ko teŋ apoɔsori naŋ e kpoŋ yaga zaa ka te wa e saamma o tɛnte na poɔŋ. Ka teneeŋ ba nɔŋ libie a na baŋ soŋ teŋ ka te naŋ kyɛnɛ e saamma Jehoova tɛnte na poɔŋ. Ka teneeŋ e lɛ, Jehoova daŋ koŋ gyɛ te bare zaa!—Kanne Hiburu 13:5.
Baabole Poɔ Yelsonne
w09 4/15 17 wɛl. 11-13
Jehoova Bonmaalee Wulee O Yɛŋ
11 Maraawa eɛ duŋo kaŋa naŋ waa ŋa soɔŋaa, o ba e kpoŋ kyɛ te na baŋ zannɛɛ yelnimizeere yaga yi o zieŋ. (Kanne Yeng Yelibie 30:26.) Maraawa maŋ waa ŋa soɔŋaa, kyɛ o tobo maŋ e la bilii, ka o gbɛɛ meŋ e ŋmaara. A duŋo ŋa maŋ kpeɛrɛ zie kubo bee pi-kpɔgɔ naŋ be. Maraawa nimie nyɛrɛŋ soŋ, azuŋ a maŋ sonnooŋ yaga zaa, oŋ maŋ kpɛ be ku-bɛrɛ poɔŋ na meŋ maŋ go oŋ ka yelfaa zaa ta wa pɔge o. Maraawa maŋ be la zie naŋ taa lirizie, a lɛ meŋ maŋ go oŋ a kyɛ sonnoo ɔɔre saŋa meŋ.
12 Bo yɛlɛ teŋ na baŋ zanne yi a maraawa naŋ waa ŋa soɔŋaa zie? A dɛndɛŋ, a duŋo ŋa koŋ sage bare o meŋɛ ka yelfaa zaa wa pɔge o. O naŋ nyɛrɛ soŋ zuŋ, a maŋ somooŋ oŋ toɔ̃ nyɛ toɔrɔ zaa naŋ waana, ka lɛ somoo oŋ bɔ bogi zie a zo kpɛ ka lɛ soŋ ka o go o meŋɛ. Lɛ meŋ la, aseŋ ka te vɛŋ ka te nimiri gaŋ ka lɛ vɛŋ ka te toɔ̃ nyɛ Setaana nyaammo soe na zaa onaŋ boɔrɔ ka o tu a nyɔge te na. Bitontona Piita da kpããŋ teŋ ka: “Yɛ baŋ yɛ menne taabo, a kaara velaa. A yɛ dɔndɔmɔ a sebɛlbɛllɛ bee a Dɛɛvul yoɔrɔ la a lanna aŋa gbeŋni naŋ kono a boɔrɔ neɛ ka o ɔɔ.” (1 Pit. 5:8) Saŋa na Yezu naŋ da be a teŋɛzuŋ na, o da kaarɛɛ o meŋɛ velaa, bonso Setaana da boɔrɔŋ ka o sãã yelmennoŋ na O naŋ dire korɔ Jehoova na. (Mat. 4:1-11) Yezu e la ewuli soŋ a ko te!
13 Sori na kaŋa teŋ na baŋ tu a kyɛ kaara velaa la ka, te maŋ dire siiloŋ poɔ bondirii na zaa Jehoova naŋ maŋ korɔ te na. Aseŋ ka te maŋ kanna a Baabole a kyɛ gɛrɛ a lammore wagre zaa. (Luk. 4:4; Hib. 10:24, 25) Aŋa lɛ na maraawa naŋ maŋ mɔɔrɔ ka o peɛle o bogi na, lɛ meŋ la aŋ seŋ ka te meŋ maŋ peɛle te Kristabitaaba ka lɛ vɛŋ ka te “toɔ̃ eŋ taa faŋa.” (Uro. 1:12) Ka teneeŋ boɔrɔ gomeŋɛ yi Jehoova zie, lɛ wuleeŋ ka te neŋ a yieloŋ yiele Deevid laŋɛɛ teɛroŋ. O da sɛgɛɛŋ ka: “Jehoova la N pi-kpɔgree ane N nyɔge-zikpeɛŋaa ane Neɛ naŋ maŋ faa ma. N Naaŋmen la N pie, o zieŋ la maŋ maŋ zo bɔ lirizie.”—Yiem. 18:2.
SEPTEMBER 15-21
BAABOLE POƆ YELNIMIZEERE YENG YELIBIE 31
Yɛlɛ Teŋ Na Baŋ Zanne A Yi Sowuli Bi-Ma Naŋ Maŋ Yi Nɔmmo Poɔŋ A De Tere
w11 2/1 19 wɛl. 7-8
Wuli Ho Biiri Ka Ba Taa Gyog-Sonne
Maŋ wulo ho biiri yelmeŋɛ naŋ bebe kyaare gaŋneŋ taa yɛlɛ. Kpããmo e la yelnimizeɛ. (1 Korinti 6:18; Gyimisi 1:14, 15) A Baabole vɛŋɛɛŋ teŋ baŋ ka gaŋneŋ taa e la kyɔɔtaa naŋ yi Jehoova zie, kyɛ a ba e kyɛbaa naŋ yi Setaana zie. (Yeng Yelibie 5:18, 19; Soolomong Yienii 1:2) Ka teneeŋ maŋ wulo te biiri yelfaare na yoŋ naŋ na baŋ pɔge ba ka ba naŋ de ba menne eŋ gaŋneŋ taa poɔŋ, a na vɛŋeŋ ka ba taa teɛroŋ naŋ ba soma kyaare gaŋneŋ taa. Baapaalaa kaŋa naŋ yi France ka o yuori di Corrina yeleeŋ ka, “N dɔgreba da maŋ yelee yelfaare na yoŋ naŋ na baŋ pɔge ma ka maaŋ wa de N meŋɛ eŋ peɛ̃mo toma poɔŋ, a da vɛŋɛɛŋ maŋ taa teɛroŋ naŋ ba soma kyaare gaŋneŋ taa.”
Maŋ mɔɔ kyɛ wuli ho biiri yelmenne na zaa naŋ bebe a kyaare gaŋneŋ taa yɛlɛ. Te yɔɔpɔge kaŋa naŋ e bi-ma a be Mexico ka o yuori di Nadia yeleeŋ ka, “N maŋ mɔɔrɔŋ ka N de a yɛlɛ ŋa soŋ N biiri ba baapaaloŋ saŋa. Gaŋneŋ taa e la kyɔɔtaa Jehoova naŋ de ko te, ka lɛ na vɛŋ ka nensaaleba taa popeɛloŋ ba zemmo poɔŋ. Kyɛ kultaa poɔŋ yoŋ aŋ seŋ ka te de o toŋ neŋ toma. Ka teneeŋ de o toŋ neŋ toma soŋ te na taa la popeɛloŋ, kyɛ ka teneeŋ ba de o toŋ neŋ toma soŋ te na di la dɔgɛɛ.”
ijwhf zannoo yɛlɛ 4 wɛl. 11-13
Vɛŋ Ka Ho Neŋ Ho Biiri Maŋ Di Dama Kyaare Dããkpeɛne Nyuubu
Daŋ de gbɛre ka yɛ di dama kyaare a yɛlɛ. “Baapaalba ba maŋ baŋ yɛlɛ yaga a kyaare dããkpeɛne nyuubu yɛlɛ,” Ŋaa ka Mark naŋ e bi-saa a yi Britain yeli. “N da soorɛɛ N bidɔɔ naŋ di yuomo anii ka, a somaŋ ka neɛ nyu dããkpeɛne bee a ba soma? N da vɛŋɛɛŋ ka a yɛlɛ e dama diibu, a lɛ da somooŋ oŋ baŋ yele yɛlɛ naŋ be o sukyiriŋ ka o ba sɔgle yelzaa.”
Ka ho neŋ ho bieŋ maŋ dire dama gbɛɛ yaga a kyaare dããkpeɛne nyuubu, a na somooŋ yaga zaa. Yuomo na ho bie naŋ di la na wuli dama na yɛŋ na baŋ di a kyaare dããkpeɛne nyuubu aneŋ yelnimizeere mine, aŋa gaŋneŋ taa yɛlɛ ane lɛ oŋ na baŋ kaara o meŋɛ soŋ ka onaŋ wa be sori zuŋ.
Vɛŋ ka ho yel-eree e ewuli soŋ. Biiri waa ŋa sapɔ, ba maŋ nyɔgrɛɛ yɛlɛ ba naŋ maŋ wono a kyɛ nyɛrɛ eŋnɛ ba teɛroŋ poɔŋ. Yelpeɛre wuleeŋ ka, yɛlɛ na bidɔgreba naŋ maŋ erɛ na, a na la ka ba biiri maŋ tɔglɔ. Lɛ wuleeŋ ka, ka hooŋ maŋ nyu dããkpeɛne ho toɔrɔ saŋa ka lɛ na vɛŋ ka ho toɔrɔ na ŋmaa bare, lɛ neŋ o zu ka ho bie na zanne yi ho zieŋ. Azuŋ e ewuli soŋ ko o, ka anaŋ wa wa dããkpeɛne nyuubu.
g17.6 9 wɛl. 5
Maŋ Wulo Ho Biiri Ka Ba Taa Sigrimennoŋ
Maŋ eŋnɛ ho biiri faŋa ka ba maŋ yuoro ba nu a terɛ boma. Vɛŋ ka ho bie na baŋ ka “neɛ naŋ terɛ taaɛ popeɛloŋ yaga a gaŋ neɛ naŋ derɛ.” (Toma 20:35) Ho neŋ ho bie na zaa na baŋ laŋ sɛgɛɛ noba naŋ boɔrɔ sommo yoe a biŋ, aŋa baŋ na yɛŋ na di daa ko ba, a soŋ ba ka ba maale ba bonkaŋa naŋ sãã bee a de ba neŋ yɛ lɔɔre. Saŋa na hoŋ wa gɛrɛ ka ho e a yɛlɛ ŋa na, vɛŋ ka ho biiri na soŋ bo ka yɛ te e a yɛlɛ ŋa. Maŋ vɛŋ ka ho biiri na nyɛ popeɛloŋ aneŋ nimipa na hoŋ taa saŋa na hoŋ sonnɔ ho yɔɔmine neŋ ba yelfɛree na. Ka hooŋ wa e lɛ, ho na de la ho ewuluu a wuli ho biiri sigrimeŋɛ so-soŋ poɔŋ.—Baabole sowuli: Luka 6:38.
Baabole Poɔ Yelsonne
w23 12 21 wɛl. 12
Te Yɔɔpɔgeba Naŋ E Baapaalba—Yɛ Baa A Wa Leɛ Kristabiiri Naŋ Kyile
12 Zanne baŋ lɛ ho neŋ noba naŋ na toɔ̃ yel yɛlɛ soŋ. A eɛ nimizeɛ ka Kristabie zaa baŋ lɛ eebo soŋ. Gyimisi ko teŋ kawane kaŋa naŋ soma yaga zaa ka: “Yɛ kaŋa zaa maŋ e tuloŋ yɛlɛ kyɛlle wommu eŋɛŋ, a kyɛ e maaroŋ yɛlɛ yeluu . . . eŋɛŋ.” (Gyi. 1:19) Ka teneeŋ maŋ kyɛllɛ wono te taaba yɛlɛ soŋ, a na soŋ teŋ ka te “maŋ de [te] menne eŋ [te] taaba gbɛbɔgriŋ.” (1 Pit. 3:8) Ka hooŋ ba baŋ yɛlɛ na neɛ kaŋa naŋ yele tɛgɛ soŋ, soore o soba soorebie naŋ seŋ neŋ a toɔ̃ woŋ a muni soŋ. A mãã ho meŋɛ, a teɛre yɛlɛ soŋ, kyɛ yele yɛlɛ. (Yeng. 15:28) Soore ho meŋɛ ka: ‘Yɛlɛ na maŋ waana ka N yel na na eŋɛɛ a soba faŋa bee? A wulee gyeremɛ ane nimimaaroŋ bee?’ Tɔglɔ Krista-bipɔgeba naŋ kyile a baŋ yɛlɛ yelibu na. (Kanne Yeng Yelibie 31:26.) Maŋ kaara lɛ na ba naŋ maŋ yele yɛlɛ na. Ka hooŋ zanne a yɛlɛ ŋa eebo soŋ, a na soŋ boŋ ka ho neŋ ho taaba taa zɔmennoŋ naŋ soma, ka emmaaroŋ meŋ be yɛ kpakyagaŋ..
SEPTEMBER 22-28
BAABOLE POƆ YELNIMIZEERE | IKILISIASITIZ 1-2
Yɛ De Wuluu Korɔ Baapaalba Naŋ Waana Na
w17.01 27-28 wɛl. 3-4
“De A Yɛlɛ Ama Ko Noba Ho Naŋ Na Toɔ̃ Dɛle”
3 Te yaga zie nɔŋ la a toma na te naŋ tonɔ na, te gba na boɔrɔŋ ka te tonaa gɛrɛ tegitegilɛ. Kyɛ a posaanaa zie la ka, a yi Adama saŋa na waana, noba na zaa naŋ maŋ wa bebe na maŋ kpiŋ ka neŋyobo wa leɛre ba gbɛbɔgriŋ. (Ikil. 1:4) Zenɛ ŋa meŋ, a na yɛlɛ ŋa de la yelkpeɛne mine waneŋ a Krista lantaapuoruu poɔŋ. Jehoova puorebiiri toma yɛllɛŋ kyɛ e kpeɛŋaa meŋ. Ka teneeŋ wa piili tonpaalaa kaŋa, ba maŋ bɔ la so paala mine teŋ na baŋ tu kyɛ toŋ a toma a na soe na mine aseŋ ka te maŋ de technology yɛlɛ naŋ leɛrɛ wagre zaa a toŋ neŋ toma. A maŋ eɛ kpeɛŋaa ka te yɔɔmine na yuomo naŋ gaa nimitɔɔre na toɔ̃ de a na boma na mine toŋ neŋ toma. (Luk. 5:39) Ka yɛlɛŋ ba waa lɛ gba, kyɛ baapaalba maŋ taa la faŋa a gaŋ neŋnyaane. (Yeng. 20:29) Azuŋ a na somaŋ kyɛ e a soriŋ meŋ ka neŋnyaaneŋ de wulibo ko a baapaalba a sɛgre ba ko toŋbɛrɛ naŋ gaŋ ba nimitɔɔreŋ na.—Kanne Yieme 71:18.
4 A ba maŋ e mɔlɔ ko noba naŋ taa apoɔsori ka ba de toma eŋ baapaalba nuuriŋ. Ba mine maŋ zoree dabeɛ̃ ka ba na kɔŋ la apoɔsori na ba naŋ nɔŋ yaga zaa na. Ba mine meŋ maŋ teɛreŋ ka ba koŋ la taa kpeɛ̃o na baŋ taa na, a kyɛ maŋ teɛrɛ ka baapaalba koŋ baŋ toŋ a toma soŋ. Ba mine meŋ maŋ teɛreŋ ka ba ba taa wagre a na de wuluu ko neɛ kaŋa. Aseŋ ka baapaalba meŋ kaara soŋ a ta wa vɛnɛ ka ba suuri ire ka ba naŋ ba ko ba toma yaga ka ba toŋ.
Baabole Poɔ Yelsonne
it “Ikilisiasitiz” wɛl. 1
Ikilisiasitiz
A Hiburu yuori Qo·heʹleth (wuleeŋ ka “Neɛ naŋ maŋ lagra noba laŋna taa”) a yɛlɛ ŋa vɛŋɛɛŋ aŋ pɛle soŋ zaa teŋ baŋ toma na namine naŋ da maŋ toŋ, a kaara a Izerayɛl biiri zu soŋ zaa baŋ taa popeɛloŋ (Ik 1:1, 12) A da e la naa zaa ferebo toma ka o kaara Naaŋmen noba na zu soŋ, ka ba dire yelmennoŋ korɔ Naaŋmen naŋ e ba Naa meŋɛmeŋɛ na. (1Nm 8:1-5, 41-43, 66) Azuŋ naa zaa yel-ereeŋ na wuli ka o e la na-soŋ bee na-faa, ka o na soŋ la Naaŋmen noba ka ba puoro Naaŋmen bee ka o koŋ e lɛ. (2Nm 16:1-4; 18:1-6) Soolomoŋ da eɛ neɛ naŋ da maŋ lagra noba laŋna taa. O da lagrɛɛ a Izerayɛl biiri, ane saamma naŋ da kpeɛrɛ ba poɔŋ na zaa lantaa a ŋmenpuoredieŋ. A yi o gane na poɔŋ, o da boɔrɔŋ ka o soŋ Naaŋmen noba na ka ba tage ba menne yi boma naŋ ba taa tɔnɔ naŋ be a donɛɛ ŋa poɔŋ, kyɛ na toɔ̃ de ba menne eŋ tonsonne tommoŋ aŋa Naaŋmen noba. Yuori na te naŋ de toŋ neŋ toma a te Nansaalee Baabole poɔŋ na, ba de oŋ yi a Qo·heʹleth naŋ be a Giriki Septuagint kɔkɔleɛroo; a yuori la, Ek·kle·si·a·stesʹ (Ikilisiasitiz), ka lɛ wulo ka “neɛ naŋ paale a Ikilisiasitiz poɔŋ (lantaapuoruu; lammo).”
SEPTEMBER 29–OCTOBER 5
BAABOLE POƆ YELNIMIZEERE | IKILISIASITIZ 3-4
Yɛ Nyɔge Yɛ Ŋmie Ata Ba Naŋ De Lantaa Na Kpeɛŋaa
ijwhf zannoo yɛlɛ 10 wɛl. 2-8
Lɛ Hoŋ Na Baŋ E A De Ho Fone Bee Tablɛt Tonɔ Neŋ Toma Soŋ
● Ka hooŋ de ho fone bee tablɛt tonɔ toma soŋ, a na baŋ soŋ la ho kultaa. Aŋa mannoo poɔŋ, kultaa deme na baŋ de la ba fone bee tablɛt toŋ toma ka lɛ vɛŋ ka ba wono taa yɛlɛ ka ba naŋ ba wa peɛle taa gba.
“Ka hooŋ toɔle mesɛge a yelka, ‘N nɔŋ boŋ’ bee ‘N teɛrɛɛ ho yɛlɛ’ a lɛ somaŋ yaga zaa.”—Jonathan.
● Ka neɛŋ ba de o fone bee tablɛt toŋ neŋ toma soŋ, a na baŋ sãã la o kultaa. Aŋa mannoo poɔŋ, noba mine maŋ be la ba fone zuŋ wagre zaa, a lɛ ŋa maŋ vɛŋeŋ ba ba maŋ la taa wagre ko ba kultatɔ.
“N teɛrɛɛŋ ka, gbɛɛ yaga N serɛ da naaŋ maŋ boɔrɔŋ ka o yele yɛlɛ ko ma ka maaŋ ba kye N fone zuŋ.”—Julissa.
● Noba mine maŋ yeleeŋ ka, ba neŋ ba kultatɔ na baŋ diree dama saŋa na ba naŋ de ba fone tonɔ neŋ toma. Ŋaa ka Sherry Turkle naŋ maŋ peɛrɛ nensaaleba gyogri yeli, “noba naŋ maŋ boɔrɔ ka ba laŋ yɛlɛ yaga a e a dayeni na koŋ baŋ e a soŋ.” A lɛ tɔ gyogo ŋa meŋ ba soma. O yeleeŋ ka, “ka teneeŋ wa erɛ lɛ te koŋ toɔ̃ toŋ a toma kaŋa zaa ka a te baare soŋ.”
“Ka N neŋ N serɛŋ wa dire dama N maŋ taa la popeɛloŋ, kyɛ ka onaŋ wa kaara o fone zuŋ a ba maŋ soŋ. Ka teneeŋ wa dire dama ka onaŋ wa kaara o fone zu, a maŋ wuli maŋ ka o poɔ na pɛleŋ ka maaŋ baroo ka o kaara o fone.”—Sarah.
Boŋ teŋ boɔrɔ ka te yeli: Lɛ na ho naŋ maŋ de ho fone tonɔ toma na baŋ soŋ la ho kultaa bee a sãã a kultaa.
Naŋ Vɛŋ Ka “Jehoova Vũũ” Na Dire Ho Kultaa Na Poɔŋ
12 Wala ka kultaa deme na toɔ̃ e a tɔglɔ Akuwiila neŋ Pirisiila ewuli soŋ ŋa? Yɛ zeŋ teɛre yɛlɛ na mine yɛŋ na baŋ laŋ erɛ aŋa kultaa deme. Aŋ da seŋ ka yɛ kaŋa zaa maŋ te tonɔ a toma na, nyɛ lɛ aŋ na soma seŋ ka yɛ zaa bayiŋ laŋ tonɔ a toma. Aŋa mannoo poɔŋ, Akuwiila neŋ Pirisiila da maŋ laŋ moɔlɛɛ a duorisoŋ. Yɛ meŋ maŋ sɛgrɛɛ wagre biŋ a laŋ gaa a naaŋ moɔloo bee? Akuwiila neŋ Pirisiila da maŋ laŋ tonɛɛ toma. Aminekaŋaŋ, ho neŋ ho kultatɔ na ba taa toŋ bonyenaa, kyɛ yɛ na baŋ laŋ toŋɛɛ yiri toma bee? (Ikil. 4:9) Ka yɛneeŋ wa soŋ taa a e yelkaŋa, a maŋ vɛmeŋ yɛŋ taa noɔreyeni, a kyɛ yuo sori ko yɛ ka yɛ dire dama. Robert neŋ Linda kulee taa yuomo 50 naŋ pare. Ŋaaŋ ka Robert yeli: “Yelmeŋɛ zaa, te ba taa wagre teŋ na maŋ de pɛlɛ te niŋe. Kyɛ ka maaŋ wa pɛge a laare a de ko N pɔge ka o meeli, kyɛbee ka maaŋ wa tonɔ toma gaadin poɔŋ, ka o naŋ wa sonnɔ ma tonɔ a toma, N poɔ zaa maŋ pɛle. Ka teneeŋ wa laŋ erɛ yɛlɛ, a maŋ vɛmeŋ teŋ taa noɔreyeni, a vɛŋ ka te nɔmmo na maaleŋ e zuluŋ.”
13 Teɛre baŋ ka, ka dɔɔ neŋ o pɔgeŋ laŋ kpeɛrɛ lɛ ba wuli ka ba na tage peɛlɛɛ taa. Pɔge kaŋa naŋ be Brazil paaloŋ yeleeŋ ka: “Beraayi ŋa kpakyagaŋ, yɛlɛ yaga bebeŋ a na baŋ tage te teɛroŋ yi taa enne, azuŋ a na baŋ eɛ mɔlɔ ko te ka te teɛre ka, te naŋ laŋ kpeɛrɛ die bonyenaa poɔŋ na zuŋ, lɛ wuleeŋ ka te taaɛ wagre ko taa. N wa nyɛɛŋ ka, ka teneeŋ laŋ kpeɛrɛ lɛ yoŋ ba seŋ, kyɛ aseŋ ka te maŋ mãã te menne a kyɛ kyɛlle woŋ te kultatɔ na yelfɛree.” Nyɛ lɛ na Bruno neŋ o pɔge Tays naŋ maŋ e a kyɛllɛ wono taa yɛlɛ soŋ zaa. Bruno yeleeŋ ka: “Ka teneeŋ wa nyɛ wagre a laŋ zeŋ ka te e yɛlɛ, te maŋ de la te fonehi bɔ zie biŋ, a kyɛ nyɛ wagre ko taa a dire dama.”
14 Kyɛ, te de ka ho neŋ ho pɔge ba nɔŋ ka yɛ maŋ laŋ erɛ yɛlɛ. Aminekaŋaŋ, yɛ yelboɔree ba yitaa, kyɛbee ka yɛneeŋ wa laŋ erɛ yɛlɛ yɛ maŋ dɔɔnɛɛ taa suuri. Wala yɛŋ na toɔ̃ e? Yɛ leɛteɛre a vũũ na yɛlɛ te naŋ yel a zannoo ŋa piilee zie na. Saŋa na baŋ wa maale a vũũ aŋ piili dire yaga zaa bee? Ai. Sɛre ka a vũũ na baŋ dire yaga zaa, aseŋ ka ba woro daare fẽẽfẽẽ fẽẽfẽẽ eŋnɛ a vũũ poɔŋ. Lɛ neŋ o zu la, yɛ na toɔ̃ bɔ la wagre fẽẽ biŋ bebiri zaa poɔŋ, a maŋ de laŋ e yɛlɛ. Yɛ kaa iri yɛlɛ naŋ korɔ yɛ zaa popeɛloŋ, a kyɛ bare yɛlɛ naŋ na vɛŋ ka yɛ suuri iri neŋ taa. (Gyi. 3:18) Ka yɛ naŋ piili erɛ a yɛlɛ ŋa fẽẽfẽẽ fẽẽfẽẽ, lɛ na vɛmeŋ ka yɛ nɔmmo vũũ na maaleŋ dire yaga zaa.
Naŋ Vɛŋ Ka “Jehoova Vũũ” Na Dire Ho Kultaa Na Poɔŋ
3 Ka kultaa demeŋ boɔrɔ ka “Jehoova vũũ” naŋ dire ba kultaa na poɔŋ, aseŋ ka ba vɛŋ ka ba neŋ Jehoova niiloŋ na e kpeɛŋaa. Sobuo ka a yɛlɛ ŋa na baŋ soŋ ba? Ka kultaa demeŋ de ba neŋ Jehoova niiloŋ na tegroŋ, ba na maŋ lonneŋ wieoŋ a de o kawane tonɔ neŋ toma. Ka ba naŋ erɛ lɛ, ba na tagɛɛ ba menne yi yelkpeɛne mine baŋ na toɔ̃ tuore eŋɛŋ, a kyɛ lɛ toɔ̃ are yelkpeɛŋaa zaa naŋ na baŋ vɛŋ ka ba nɔmmo na mãã noɔreŋ. (Kanne Ikilisiasitiz 4:12.) Noba neŋ Jehoova niiloŋ naŋ e kpeɛŋaa maŋ tɔglɛɛ o gyog-sonne na. Ba maŋ taaɛ nimimaaroŋ, a dire kannyiri, a kyɛ lɛ dire suuri meŋ korɔ noba. (Efe. 4:32–5:1) Ka kultaa demeŋ wa wulo taa a gyog-sonne ŋa, a maŋ vɛmeŋ ka ba nɔmmo na naŋ e tuluŋ. Te yɔɔpɔge Lena neŋ o serɛ naŋ kultaa, a parɛɛ yuomo 25, o yeleeŋ ka, “Ka neɛ kaŋa neŋ Jehoova niiloŋ wa e kpeɛŋaa, a maŋ eɛ mɔlɔ ka ho wulo o soba nɔmmo neŋ gyeremɛ.”
Baabole Poɔ Yelsonne
it “Nɔmmo” wɛl. 39
“Nɔmmo”
“Nɔmmo Wagre Bebeŋ.” Jehoova ba maŋ wulo nɔmmo korɔ noba naŋ de gbɛre ka ba na erɛɛ yelfaare. Naaŋmen maŋ wulee nɔmmo ko neɛzaa. Kyɛ ka nobaŋ wa de ba yel-eree wuli ka ba ba nɔŋ o yɛlɛ o ba maŋ lɛ wulo nɔmmo korɔ ba, nɔmmo na onaŋ taa ko ba na maŋ baareŋ. Jehoova Naaŋmen ane Yezu Krista nɔŋ la sontuuribo, kyɛ ba ha la noba naŋ saana bege. (Ym 45:7; Hi 1:9) Noba na naŋ ha a yelmeŋɛ Naaŋmen na, o ba maŋ wulo nɔmmo korɔ ba. Azuŋ, tɔnɔ zaa koŋ yi be wa ka Naaŋmeneŋ naŋ wulo nɔmmo korɔ ba, bonso ba ba sage o nɔmmo na. (Ym 139:21, 22; Ai 26:10) A lɛ ŋa zuŋ, Naaŋmen na sãã baŋ bonso o ba nɔŋ ba yɛlɛ.—Ym 21:8, 9; Ik 3:1, 8.
OCTOBER 6-12
BAABOLE POƆ YELNIMIZEERE | IKILISIASITIZ 5-6
Taa Gyeremɛ Naŋ E Zuluŋ Ko Naaŋmen
w08 8/15 15-16 wɛl. 17-18
De Emmo Korɔ Jehoova A Maŋ Wulo Ka Ho Taa La Gyeremɛ Koo
17 Aseŋ ka te maŋ wulo gyeremɛ naŋ e zuluŋ a kyɛ kaara soŋ ka teneeŋ wa waana Jehoova nimitɔɔre puoro poɔŋ. Ikilisiasitiz 5:1 yeleeŋ ka, ‘ka hooŋ wa gɛrɛ Naaŋmen die, kaara ho gbɛ-kyɛnee soŋ.’ Jehoova da yelko la Moosis ane Joosua ka ba fori ba nɔɔteɛ ka ba naŋ wa kpeɛrɛ a ziforifori. (Yiib. 3:5; Joos. 5:15) Ka ba naŋ wa e a yɛlɛ ŋa a na wuliŋ ka ba taa la gyeremɛ bee emmo ko Jehoova. A Izerayɛl ŋmenpuore wedeɛreba na da seŋ ka ba maŋ ‘pɔge ba menne.’ (Yiib. 28:42, 43) Ka lɛ ta wa vɛŋ ka ba yuo ba menne bare sori naŋ ba seŋ neŋ poɔŋ, saŋa na baŋ tonɔ a sareka irizie naŋ. Neɛzaa naŋ da yi a Eeroŋ booree na poɔŋ da seŋ ka o de a yɛlɛ ŋa toŋ neŋ toma.
18 Jehoova puoruu poɔŋ, emmo ane gyeremɛ e la yelnimizeɛ. Ka hooŋ boɔrɔ ka noba korɔ bo gyeremɛ, aseŋ ka ho maŋ wulo gyeremɛ. A ba seŋ ka te maŋ wulo gyeremɛ ka noba na nyɛ ka te wulee gyeremɛ, kyɛ aseŋ ka te maŋ e lɛ ka Jehoova meŋɛ nyɛ ka a yi la te sukyie poɔŋ. (1 Saa. 16:7; Yeng. 21:2) Aseŋ ka emmo ane gyeremɛ te naŋ taa na nyɛ kpeɛ̃o te enneŋ, a yi te gyogri poɔŋ, te yel-eree, te neŋ noba niiloŋ poɔŋ ane lɛ teŋ maŋ teɛre kyaare te menne. Aseŋ ka te de te yelyaga ane te yel-eree wuli ka te taa la emmo ane gyeremɛ. Ka anaŋ wa te yel-eree, lɛ teŋ maŋ de te menne ane lɛ teŋ maŋ maale te menne na, te maŋ mɔɔ kyɛ teɛre a bitontona Pɔɔl yɛlɛ ŋa: “Te ba derɛ bonzaa pigre neɛzaa sori, ka ba na ta wa nyɛ saanaa zaa a te toma poɔ; kyɛ te naŋ waa Naaŋmen toŋtoneba, te da ko la te menne garebanyɛ yelzaa poɔ.” (2 Kor. 6:3, 4) Te mɔɔrɔ ka, “te Faara naŋ e Naaŋmen wuluu na na baŋ nyɛ gyeremɛ sori zaa poɔŋ.”—Tit. 2:10.
w09 11/15 11 wɛl. 21
Baabole Zannoo Na Baŋ Soŋ Boŋ Ka Ho Puoro Maaleŋ Soma Yaga
21 Yezu da maŋ yi la gyeremɛ poɔŋ a puore yi o sukyiri zaaŋ. Sɛre oŋ na seŋ Laazoro yi kũũni poɔŋ na, “Yezu da [leɛrɛɛ] o niŋe tori sazu a yelka: ‘N Saa, N puoro boŋ bareka hoŋ maŋ kyɛllɛ wono N yɛlɛ. Yelmeŋɛ zaa, N baŋɛɛŋ ka ho maŋ kyɛllɛ wono la N yɛlɛ wagre zaa.’” (Gyn. 11:41, 42) Ho puoro maŋ wuliŋ ka, ho wulee gyeremɛ a kyɛ taa sagediibu bee? Ka hooŋ zanne puoro na Yezu naŋ da maŋ yi gyeremɛ poɔŋ puore na, ho na nyɛŋ ka Jehoova yuori naŋ na pɛgeyi, Naaŋmen Naaloŋ ane lɛ Naaŋmen poboɔbo naŋ na nyɛ eebo la oŋ da maŋ yele a yɛlɛ o puoro poɔŋ. (Mat. 6:9, 10) Mãã ho meŋɛ a teɛre yɛlɛ na hoŋ maŋ yele ho puoro poɔŋ. Ka lɛ a maŋ kyaarɛɛ Jehoova Naaloŋ na, o poboɔbo naŋ na nyɛ eebo aneŋ o yuori naŋ na pɛgeyi na bee? Aseŋ ka ho mɔɔ kyɛ vɛŋ ka a kyaare a yɛlɛ ama.
w17.04 6 wɛl. 12
“Paale Noɔre Na Ho Naŋ Eŋ Na”
12 Suobu deebo la meŋɛ deterebo piilee. Azuŋ te mɔɔrɔ ka te paale meŋɛ deteroo noɔre na te naŋ eŋ ko Naaŋmen na, ka te na puoree o yoŋ na. Azuŋ te na baŋ soorɛɛ te menne ka: ‘Ka lɛ N nyɛ la nimitɔɔre gaabo N suobu deebo puoriŋ? N naŋ gɛrɛɛ nimitɔɔre a yi N sukyiri poɔŋ zaa a puoro neŋ Jehoova bee? (Kol. 3:23) Ka lɛ, N maŋ puoroŋ, a kanna a Baabole, a gɛrɛ a lammore a kyɛ tonɔ a naaŋ moɔloo toma lɛ zaa maŋ na toɔ̃ bee? Kyɛbee a na yɛlɛ ŋa mine ŋmaa sigee teŋɛ bee?’ Bitontona Piita da yeleeŋ ka, ka teneeŋ maŋ zanna boma, a taa kannyiri a kyɛ mɔɔrɔ ka te taa gyo-sonne, a na go teŋ ka te nuuri ta wa kyoɔre Jehoova puoruu poɔŋ.—Kanne 2 Piita 1:5-8.
Baabole Poɔ Yelsonne
w20.09 31 wɛl. 3-5
Yɛlɛ Noba Naŋ Kanna Te Gama Naŋ Maŋ Soorɔ
A Ikilisiasitiz 5:8 zie ŋa mannɛɛ paaloŋ kaara kaŋa naŋ de nimikuonii a dɔgrɔ noba na oŋ kaara ba zu na, a kyɛ ba dire sɛrɛɛ dantorii soriŋ. Aseŋ ka a paaloŋ kaara teɛre baŋ ka neɛ kaŋa bebeŋ a taa kpeɛ̃o yaga zaa gaŋ o, a kyɛ kaara yɛlɛ na zaa o naŋ erɛ. A yelmeŋɛ naŋ bebe la ka, noba mine bebe a taa arezi-bɛrɛ. Kyɛ a nembao yɛlɛ la ka, nensaaleba gɔmenante yɛlɛ poɔŋ noba naŋ dire naaŋ na ba dire yelmennoŋ, ka lɛ vɛŋ ka noba na ba naŋ kaara ba zuŋ na tuoro daŋkyagre.
Kyɛ haali ka yɛlɛŋ sãã wala, te na baŋ sagediŋ ka Jehoova baŋɛɛ yelzaa naŋ erɛ, azuŋ o ‘kaarɛɛ boŋ na zaa a donɛɛ ŋa paaloŋ kaareba’ naŋ erɛ. Te na baŋ koŋ sɔrɛɛ Naaŋmen a maŋ de te yelwonii zaa dɔgle o zuŋ. (Yiem. 55:22; Fil. 4:6, 7) Te baŋɛɛŋ ka “Jehoova nimie yoɔrɛɛ a tendaa zu zaa, ka o are noba na sukyiri naŋ paale o eŋɛŋ na gbɛbɔgriŋ a kyɛ wuli o kpeɛ̃o.”—2 Tun. 16:9.
Ikilisiasitiz 5:8 soŋ teŋ teŋ nyɛ lɛ na nensaaleba naaloŋ naŋ waa meŋɛmeŋɛ; wagre zaa neɛ kaŋa maŋ bebeŋ a taa kpeɛ̃o gaŋ o tɔ. Kyɛ a yelnimizeɛ la ka, a sɛgre ŋa na baŋ soŋ teŋ ka te teɛre baŋ ka Jehoova yoŋ la do saa a gaŋ neɛzaa, o na meŋ la taa Kpeɛ̃o a gaŋ neɛzaa. O dire naaŋ a tuoro o Bie Yezu Krista naŋ e o Naaloŋ na Naa eŋɛŋ. A Kpeɛ̃o Zaa Daana ane o Bie naŋ e dantorii deme a maŋ di sɛrɛɛ naŋ tori na kaarɛɛ yelzaa naŋ erɛ.
OCTOBER 13-19
BAABOLE POƆ YELNIMIZEERE | IKILISIASITIZ 7-8
“Gaa Kuori Die”
it “Kuori” wɛl. 9
Kuori
Kuori Wagre Bebe. Ikilisiasitiz 3:1, 4 yeleeŋ ka “kuori wagre bebe, ka laare wagre bebe. Kpɛlle ŋmeɛbo wagre bebe, ka seɛre wagre bebe.” Nensaaleba diree dɔgɛɛ yaga, kyɛ a sɛgre vɛŋɛɛŋ teŋ baŋ ka yɛŋbanna sukyiri “maŋ be la kuori dieŋ” a gaŋ nimipɛle dieŋ. (Ik 7:2, 4; de manne Ye 14:13.) Yɛŋbanna maŋ de la a lɛ vuo na a wuli o nɔmmo a kyɛ dii o taaba sukyie. O ba maŋ vɛŋ ka nimipɛle yɛlɛ e nimizeɛ a koo a gaŋ oŋ na dii o taaba sukyie. Lɛ maŋ somooŋ oŋ baŋ ka o eɛ neɛ naŋ na baŋ kpi, ka lɛ vɛŋ oŋ yi o sukyiri zaa a puoro o Maala na sori naŋ seŋ neŋ poɔŋ.
w19.06 23 wɛl. 15
Soŋ Ho Taaba Ka Ba Toɔ̃ Are Ba Yelkpeɛne Noɔreŋ
15 Te yɔɔdɔɔ William naŋ kɔŋ o pɔge kũũ poɔŋ, yeleeŋ ka: “N poɔ maŋ pɛleŋ yaga zaa ka nobaŋ wa yele N pɔge gyog-sonne yɛlɛ; a maŋ vɛŋeŋ maŋ nyɛ ka noba da nɔŋ la o yɛlɛ a kyɛ taa gyeremɛ meŋ koo. A yɛlɛ ŋa da maŋ soŋ maŋ yaga zaa, bonso N pɔge da e la nanee yaga zaa ko ma N zemmo poɔŋ.” Te yɔɔpɔge Bianca naŋ kɔŋ o serɛ kũũ poɔŋ meŋ yeleeŋ ka: “Ka N taabaŋ wa wa N zie ka N neŋ ba laŋ puore a kyɛ kanne Baabole sɛgre mine, N maŋ nyɛ la sukyiridii. A maŋ soŋ maŋ yaga zaa ka ba naŋ wa yele yɛlɛ a kyaare N serɛ, a kyɛ kyɛlle woŋ N meŋ ka maaŋ wa yele yɛlɛ.”
w17.07 16 wɛl. 16
“Laŋ Kono Neŋ Noba Naŋ Kono”
16 Daaŋ ta wa teɛrɛ ka puoro na hoŋ neŋ te yɔɔ kaŋa naŋ kɔŋ o nɔŋna kaŋa kũũ poɔ naŋ maŋ laŋ puore na, ane puoro na hoŋ maŋ puore koo na ba taa tɔnɔ zaa. A na baŋ eɛ kpeɛŋaa ka ho neŋ o soba laŋ puore a lɛ wagre kpeɛne na saŋa. Ka hooŋ gbaŋ kono a koŋ baŋ yeli yɛlɛ ka a yi soŋ gba, kyɛ ka hooŋ yi ho sukyiri poɔ zaa ka ho neŋ o laŋ puore a na baŋ dii la o sukyiri yaga zaa. Te yɔɔpɔge Dalene yeleeŋ ka, “wagre mine ka te yɔɔpɔgebaŋ wa ka ba wa puore ma, N da maŋ yeleŋ ka yɛ neŋ ma na baŋ laŋ puoreŋ. Ka ba naŋ wa piili ka ba puore a piilee na, a maŋ eɛ kpeɛŋaa ko ba, kyɛ ka ba naŋ wa puore ta sogɔ ba kɔkɔre maŋ yireŋ soŋ zaa ka a puoro meŋ yire ba sukyie poɔŋ. Te yɔɔmine na sagediibu, nɔmmo ane lɛ ba naŋ taa N yɛlɛŋ na maŋ eŋ la N sagediibu faŋa.”
w17.07 16 wɛl. 17-19
“Laŋ Kono Neŋ Noba Naŋ Kono”
17 Lɛ na noba naŋ maŋ erɛ ba yɛlɛ ka ba naŋ wa dire woore na ba maŋ yitaa. Azuŋ, maŋ mɔɔ kyɛ bebe ko a soba wagre zaa, a ba wuli ka bebie na yoŋ o zɔmenne neŋ o dɔgreba naŋ na wa bebe na la, kyɛ kyuuri naŋ gaŋ yɛ nimitɔɔreŋ ka neɛzaa ba la wa kyebe na, maŋ mɔɔ kyɛ bebe ko o soba. “Zɔmeŋ-soŋ maŋ wulee nɔmmo wagre zaa o maŋ eɛ yɔɔ ba naŋ dɔge dɔgɛɛ daare zuŋ.” (Yeng. 17:17) Ka teneeŋ wa tuoro yelkpeɛne bee ka te neɛ kaŋaŋ wa kpi ka te dire woore te Kristabitaaba na baŋ eŋ teŋ faŋa a kɔɔre lɛ zaa a naŋ seŋ.—Kanne 1 Tɛsalonika 3:7.
18 Te baŋ ka noba naŋ dire woore sukyiri na baŋ la kyɛreŋ, ka ba naŋ wa leɛteɛrɛ bebiri na ba naŋ kultaa na, yiele mine booree, fotori, yel-eree mine, kyɛbee nyũũ kaŋa booree, bee a yuoni poɔ bebie mine. Wagre mine ka neɛ kultatɔŋ wa kpi ka o dire woore, a dɛndɛŋ bebiri na oŋ na gaa te lammore aŋa te gbandige bee Yezu kũũ Leɛteɛroo o yoŋ na, a na beɛrooŋ yaga zaa. Te yɔɔdɔɔ kaŋa pɔge naŋ da kpi yeleeŋ ka, “saŋa na N neŋ N pɔge kultaa bebiri naŋ wa tara na, N da kaarɛɛ sori ka ka maaŋ na leɛteɛre a bebiri na maŋ da de N pɔge na a na dɔŋ maŋ yaga, yɛlɛ da ba e moɔlɔ a ko ma fẽẽ zaa. Te yɔɔmine da sɛgrɛɛ yɛlɛ fẽẽ lɛ, a toŋboɔle te yɔɔmine bawala ka lɛ na vɛŋ ka N ta e N yoŋ.”
19 Maŋ vɛŋ ka a be ho teɛroŋ poɔŋ ka, noba naŋ dire woore maŋ boɔrɛɛ faŋa emmo wagre zaa, a ba wuli ka wagre kaŋa yoŋ la. Ŋaa ka Junia meŋ yeli: “Ka neɛ kaŋa nɔŋnaŋ wa kpi ka teneeŋ wa sonnɔ o soba a kyɛ ba erɛ yelzaa a na leɛteɛroo o nɔŋna na naŋ kpi na yɛlɛ, a na somaŋ yaga zaa,” o lɛ de poɔ yɛŋ ka, “ka lɛŋ wa e a maŋ dii la o soba sukyiri.” Ka neɛ kaŋa nɔŋnaŋ wa kpi, te koŋ baŋ vɛŋ ka woore na o soba naŋ dire na zaa baare, kyɛ te na baŋ e la yɛlɛ mine a de soŋ o soba ka o nyɛ sukyiridii a yi yɛlɛ na o soba naŋ tuoro na. (1 Gyn. 3:18) Gaby yeleeŋ ka: “N puoree Jehoova bareka aneŋ onaŋ ko te lantaapuoruu nembɛrɛ naŋ taa nɔmmo naŋ e zuluŋ. O da tu la ba eŋɛŋ kyɛ soŋ ma a yi N yelkpeɛne zaa maŋ da tuoro na poɔŋ. Ba yel eebo na vɛŋɛɛŋ maŋ nyɛ lɛ Jehoova naŋ nɔŋ ma seŋ.”
Baabole Poɔ Yelsonne
“A Ŋaa Zie La Ka Neɛzaa Na Baŋ Ka Yɛ Waa La N Potuuribo”
18 Aminekaŋaŋ ka te yɔɔ kaŋaŋ wa e yelkaŋa a sãã te poɔ aseŋ ka te gaa o zie ka te neŋ o te yel a yɛlɛ. Kyɛ aseŋ ka ho daŋ soore ho meŋɛ a soorebie ŋa: ‘N baŋɛɛ lɛ a yɛlɛ zaa naŋ e te baare?’ (Yeng. 18:13) ‘Aminekaŋaŋ o ba baŋ perɛ kyɛ e ana yɛlɛ na a sãã N poɔ bee?’ (Ikil. 7:20) ‘N meŋ daŋ ŋmɛ la ana gbɛre ŋa tɔ bee?’ (Ikil. 7:21, 22) ‘Ka maaŋ gaa o soba zie ka te yel a yɛlɛ ŋa, a na maaleŋ saaŋɛɛ a yɛlɛ bee?’ (Kanne Yeng Yelibie 26:20.) Ka teneeŋ peɛre te menne ana soorebie ŋa zaa yɛlɛ soŋ, a na baŋ soŋ teŋ ka te toɔ̃ wuli nɔmmo ko te yɔɔ na a bare a yɛlɛ.
OCTOBER 20-26
BAABOLE POƆ YELNIMIZEERE IKILISIASITIZ 9-10
Taa Teɛroŋ Soŋ Kyaare Yelkpeɛne Na Ho Naŋ Tuoro
w13 8/15 14 wɛl. 20-21
Daaŋ Ta Wa Vɛŋ Ka Ho “Suuri Iri Jehoova Eŋɛŋ”
20 De a yɛlɛ binzie na aŋ seŋ ka ho de a biŋ. Ananso la wala aŋ seŋ ka te e lɛ? A yelkpeɛne na mine naŋ maŋ pɔge te na, te menneŋ maŋ wanaa. Azuŋ ka a na yɛlɛ na mineŋ wa e, sage ka hooŋ wanaa. (Gal. 6:7) Ta lɛ de a na yɛlɛ na dɔgle Jehoova zuŋ ka onaŋ wanaa. Ananso la wala ka yɛŋ ba kye a yɛlɛ ŋa poɔŋ ka teneeŋ e lɛ? Te nyɛ a yelmannaa ŋa: Te de ka lɔɔre kaŋa na baŋ zoŋ yaga zaa, azuŋ ka lɔ-mɔnɔ kaŋaŋ de a lɔɔre a zoro yaga zaa a te pare lɛ na aŋ seŋ ka o zoro, ka lɛ vɛŋ oŋ te le. Ho teɛre ka neɛ na aŋ maale a lɔɔre na la aŋ seŋ ka te de a yɛlɛ dɔgle o zuŋ ka onaŋ wanaa bee? Ai, o naane wanaa! Lɛ neŋ o zu la, Jehoova maale teŋ teŋ na baŋ kaa iri yɛlɛ teneeŋ menne naŋ boɔrɔ. Kyɛ o de la sowuli ko te a kyaare lɛ teŋ na baŋ e a maŋ de gbɛ-sonne. Azuŋ te koŋ baŋ yelka Jehoova la vɛŋ ka yelfaare mine pɔge te saŋa na teŋ de gbɛ-faare na.
21 Yelmeŋɛ la, yelkpeɛne zaa teŋ maŋ tuoro na, a zaa naane maŋ yi te gbɛ-ŋmɛ poɔ bee gbɛ-faare te naŋ de poɔ. Yɛlɛ mine maŋ pɔgɛɛ neɛ bonso “wagre ane yɛlɛ [te] naŋ ba kaara soriŋ” maŋ toɔ̃ pɔge la te zaa. (Ikil. 9:11) Ane meŋ, a ba seŋ ka te inni ka Setaana a Dɛɛvul la neɛ naŋ maŋ vɛŋ ka yelfaare pɔgrɔ noba. (1 Gyn. 5:19; Yel. 12:9) O na la a dɔndɔma kyɛ Jehoova naane!—1 Pit. 5:8.
w19.09 5 wɛl. 10
Jehoova Puorebiiri Naŋ Taa Sigrimennoŋ Eɛ Nanee Yaga Zaa Koo
10 Sigrimennoŋ maŋ vɛŋeŋ ka te zemmo soma. A yelmeŋɛ naŋ bebe la ka, saŋa kaŋa te na maŋ nyɛɛ yɛlɛ mine naŋ ba tu sori bee yɛlɛ naŋ ba soma naŋ erɛ. Naa Soolomoŋ da yeleeŋ ka: ‘N nyɛ la gbaŋgbaare naŋ zoŋ wie kyɛ ka nabiiri kyɛnɛ gbɛɛ aŋa gbaŋgbaare.’ (Ikil. 10:7) Wagre zaa naane ka noba maŋ korɔ neɛ naŋ taa kpeɛ̃o gyeremɛ. Kyɛ noba maŋ ko la neɛ naŋ ba taa kpeɛ̃o yaga gyeremɛ yaga. Soolomoŋ da boɔrɔŋ ka te baŋ ka, a ba seŋ ka te vɛŋ ka yɛlɛ mine naŋ ba tori nyɛ kpeɛ̃o te teɛroŋ, kyɛ aseŋ ka te sage a yelmeŋɛ naŋ bebe. (Ikil. 6:9) Ka teneeŋ taa sigrimennoŋ, te na taa la nimipa lɛ zaa te zemmo naŋ waa, kyɛ te koŋ teɛrɛ lɛ te zemmo naŋ da seŋ ka o waa.
w11 10/15 8 wɛl. 1-2
Ho Maŋ Nyɛrɛɛ Tɔnɔ Yire Yɛlɛ Na Hoŋ Maŋ De Pɛlɛ Ho Niŋe Na Bee?
KA TENEEŊ kaa a Baabole poɔŋ, te maŋ nyɛŋ ka Jehoova ba boɔrɔ ka te zeŋ a teŋɛzu kyɛ tegitegilɛ yoŋ, kyɛ o boɔrɔŋ ka te taa popeɛloŋ te zemmo poɔŋ. Aŋa mannoo poɔŋ, Yieme 104:14, 15 yeleeŋ ka, Jehoova maŋ vɛŋeŋ ka “boma . . buli a teŋganeŋ, ane waiŋ naŋ maŋ vɛŋ ka nensaalaa sukyiri taa popeɛloŋ, kãã naŋ maŋ vɛŋ ka neɛ niŋesogɔ kyaane, ane boroboro nensaalaa naŋ na maŋ di tige.” Yelmeŋɛ la, Jehoova maŋ vɛŋeŋ ka boma buli kyɛ o maŋ la ko teŋ kãã ane waiŋ meŋ aŋ vɛŋ teŋ taa popeɛloŋ. Kyɛ waiŋ meŋ ‘maŋ vɛŋeŋ ka nensaalaa sukyiri taa popeɛloŋ.’ A na boma ŋa ba maŋ vɛŋ teŋ taa faŋa yoŋ, kyɛ a maŋ vɛŋeŋ teŋ taa popeɛloŋ meŋ. (Ikil. 9:7; 10:19) Jehoova sereŋ boɔrɔŋ ka te taa popeɛloŋ azuŋ o paalɛɛ te “sukyie zaa neŋ popeɛloŋ.”—Tom. 14:16, 17.
2 Azuŋ a ba e yelfaa ka teneeŋ bɔ wagre a “kaa a sazu nuuli velaa zaa nyɛ” ane “moɔ poɔ bon-puuro” bee ka te sɛgre yɛlɛ mine biŋ, a de pɛle neŋ te niŋe ka lɛ vɛŋ ka te woŋ nyɔvore noɔ̃. (Mat. 6:26, 28; Yiem. 8:3, 4) Teŋ na erɛ yɛlɛ naŋ soma te zemmo poɔŋ e la “Naaŋmen kyɔɔtaa.” (Ikil. 3:12, 13) Ka teneeŋ wa nyɛ ka wagre teŋ maŋ de pɛlɛ te niŋe na e la kyɔɔtaa naŋ yi Naaŋmen zie, a na vɛŋeŋ ka te maŋ boɔrɔ ka te de o toŋ neŋ toma soŋ ka lɛ vɛŋ ka Neɛ naŋ de o ko te na poɔ pɛle.
Baabole Poɔ Yelsonne
it “Po-zu, Yo-sãã” wɛl. 4, 8
Po-zu, Yo-sãã
Po-zu na baŋ vɛŋeŋ ka neɛ sãã o tɔsoba yuori, a lɛ eebo naŋ baŋ de la toɔrɔ waneŋ neɛ na naŋ saana o tɔsoba yuori na. Yɛlɛ naŋ be Ikilisiasitiz 10:12-14 vɛŋɛɛŋ ka a yɛlɛ pɛle soŋ zaa, be yeleeŋ ka: “Zɔle nɔ-gbama na de oŋ vɔle. O noɔre yelbie maŋ piiliŋ aneŋ zɔlehoŋ, ka o yelyaga baaraa e [yɛŋ-ya yɛlɛ yoŋ]. Zɔle maŋ eŋ ka o yelbie e yaga.”
Ka neɛŋ zuuro o tɔ puori a na baŋ de la saammo yaga waneŋ kyɛbee a koŋ baŋ de saammo waneŋ. A de tuuro po-zu, a na baŋ vɛŋeŋ ka neɛ sãã o tɔ zu. Neɛ naŋ sããna o taaba zu yel-eree na baŋ de la saammo yaga bee hataa waneŋ. Aminekaŋaŋ a soba baŋɛɛ perɛ bee o ba baŋ. Sori kaŋa poɔŋ, neɛ naŋ zuuro o tɔ puori maŋ erɛɛ yɛlɛ naŋ na sãã o neŋ Naaŋmen niiloŋ, “saŋa na oŋ erɛ yɛlɛ naŋ na vɛŋ ka hataa be a Krista lantaapuoruu na poɔ.” A gyogo ŋa eɛ yɛlɛ na kaŋa Jehoova naŋ ha. (Ye 6:16-19) A Giriki yelbiri ba naŋ de are ko “po-zu” la di·aʹbo·los. Ba de la a yelbiri ŋa toŋ neŋ toma a Baabole poɔŋ, o are ko la Setaana “a Dɛɛvul,” o na la a po-zu kpoŋ naŋ zuuro Naaŋmen puori na. (Gyn 8:44; Yel 12:9, 10; Mn 3:2-5) A yɛlɛ ŋa wulee zie na meŋɛ zirii aneŋ yelfaare naŋ yi.
OCTOBER 27–NOVEMBER 2
BAABOLE POƆ YELNIMIZEERE | IKILISIASITIZ 11-12
Kaara Ho Laafeeloŋ Zie Soŋ, Kyɛ Taa popeɛloŋ
g 3/15 13 wɛl. 6-7
Sase-Noɔ̃ Ane Ŋmenaa E La “Boma Naŋ Na Baŋ Soŋ Iri Baaloŋ Yi Te Enneŋ”?
Ŋmenaa taa la boma mine o eŋɛŋ naŋ na baŋ iri boŋ-faare mine yi te enneŋ. A Journal of Hospital Infection yeleeŋ ka, “baaloŋ-bie mine naŋ be saseɛ poɔŋ naŋ na baŋ vɛŋ ka te le baaloŋ maŋ kpiŋ ka ŋmenaa wa ŋmɛ a.”
Wala teŋ na baŋ e a nyɛ tɔnɔ yi ŋmenaa eŋɛŋ? Aminekaŋaŋ ho na yi la yeŋe a te deɛ pɛnnoo ane saseɛ. Ka hooŋ e lɛ a na somaŋ yaga zaa.
w23.02 21 wɛl. 6-7
Taa Gyeremɛ ko Nyɔvore Naŋ E Kyɔɔtaa Naaŋmen Naŋ Ko Te Na
6 Aneazaa ka a Baabole ba e laafeeloŋ gane bee gane naŋ yele bondirii a naŋ seŋ ka te dire, kyɛ a Baabole vɛŋɛɛŋ teŋ baŋ Jehoova teɛroŋ a kyaare a yɛlɛ ama. Aŋa mannoo poɔŋ, Jehoova kpãã teŋ ka, te “kaara” te eŋgama zieŋ soŋ ka bonzaa ta saamoo. (Ikil. 11:10) Bondirii di te gaali ane dããnyukuoli eɛ yɛlɛ naŋ na baŋ de saammo a waneŋ te eŋɛŋ, azuŋ a Baabole yeleeŋ ka a ba soma. (Yeng. 23:20) Jehoova kaarɛɛ soriŋ ka te kaara te menne soŋ, ka teneeŋ wa derɛ gbɛɛ a kyaare bondirii ane boŋ teŋ na nyu.—1 Kor. 6:12; 9:25.
7 Ka teneeŋ maŋ derɛ gbɛ-sonne te zemmo poɔŋ, lɛ maŋ wuliŋ ka te taa la nimipa a ko kyɔɔtaa naŋ e nyɔvore Jehoova naŋ ko te na. (Yiem. 119:99, 100; kanne Yeng Yelibie 2:11.) Aŋa mannoo poɔŋ, te maŋ wuliŋ ka te taa la teɛroŋ soŋ ka teneeŋ maŋ kaara te bondirii zieŋ soŋ. Ka teneeŋ nɔŋ bondiraa kaŋa a kyɛ baŋ ka a na bondiraa na na baŋ vɛŋeŋ ka te le baaloŋ, teɛroŋ soŋ na vɛŋeŋ ka te koŋ di a na bondiraa na. Ka teneeŋ maŋ gaŋ-gbiri ka a seŋ te, a maŋ dɛnnɛ te kɔbɔ wagre zaa, a maŋ maale te die poɔ ka o soma, a kyɛ maŋ kaara te eŋgama zie soŋ, lɛ na wuliŋ ka te taa la teɛroŋ soŋ.
“Yɛ E Noba Naŋ Maŋ De A Yelbiri Tonɔ Neŋ Toma”
2 Tenee Jehoova puorebiiri yɛŋ taa la popeɛloŋ. Bonso te taa la ananso yaga zaa, kyɛ agaŋaazaa, te maŋ kannɛɛ Naaŋmen Yelbiri na bebiri zaa, a maŋ mɔɔrɔ te mɔɔbo zaa ka te de yɛlɛ na te naŋ zanna na tonɔ neŋ toma te zemmo poɔŋ.—Kanne Gyimisi 1:22-25.
3 Te maŋ nyɛ la tɔnɔ yaga zaa ka teneeŋ wa “de a yelbiri tonɔ neŋ toma.” Aŋa mannoo poɔŋ, ka teneeŋ wa de yɛlɛ na te naŋ zanna yire Naaŋmen Yelbiri poɔ tonɔ neŋ toma, a maŋ vɛŋeŋ teŋ pɛlɛ Jehoova poɔ, lɛ meŋ maŋ vɛŋeŋ ka te poɔ pɛle. (Ikil. 12:13) Ane meŋ, ka teneeŋ wa de Baabole sowuli tonɔ neŋ toma, a na vɛŋeŋ ka te neŋ te booree deme ane te yɔɔmine naŋ be a lantaapuoruu poɔŋ na taa niiloŋ naŋ soma. A yɛlɛ ŋa nyɛɛ eebo te zemmo poɔŋ. Yelkpeɛne naŋ maŋ pɔgrɔ bana naŋ ba de Jehoova sowuli tonɔ neŋ toma na ba pɔgrɔ te. Ɛɛ, te neŋ Naa Deevid laŋɛɛ teɛroŋ. Saŋa na oŋ da yel Jehoova bege, sowuli, ane o sɛrɛɛdiibu yɛlɛ o yieloŋ poɔŋ na, a baaraa zaa o da yeleeŋ ka: “Ka neɛŋ de a tonɔ neŋ toma, o na nyɛɛ saŋyɔɔ kpoŋ.”—Yiem. 19:7-11.
Baabole Poɔ Yelsonne
it “A Tuuro A Vooroŋ Soŋ Eŋɛŋ” wɛl. 10
A Tuuro A Vooroŋ Soŋ Eŋɛŋ
Sieree yaga wuleeŋ ka, dɔbɔ na Naaŋmen naŋ vɛŋ baŋ sɛge a Baabole na, Jehoova da ba maŋ yele a yɛlɛ baŋ sɛgrɛ yɛlɛ na oŋ yele na. Yɛlɛ na bitontona Gyɔɔn naŋ da sɛge na, ‘Naaŋmen vooroŋ soŋ la e ka o sɛgaa.’ A Yel-iriwulaa na Naaŋmen naŋ da ko Gyɔɔn na, a tuuro “yelwulii” eŋɛŋ ka Naaŋmen da tu maleke eŋɛŋ kyɛ de a ko o, ka Gyɔɔn da di “Naaŋmen yelbiri danseɛ a Yezu Krista naŋ da di ane a yɛlɛ na zaa o naŋ da nyɛ danseɛ.” (Yel 1:1, 2) A tuuro “a vooroŋ soŋ” eŋɛŋ ka Gyɔɔn da wa be a “Daana bebiri daare” poɔŋ, oŋ da yelkoo ka: “Sɛge a yɛlɛ ho naŋ nyɛ eŋ gane poɔ.” (Yel 1:10, 11) Azuŋ Naaŋmen da nyɛɛŋ ka a na somaŋ ka o bare a noba naŋ da sɛgrɛ a Baabole ka ba menne kaa iri yelbie naŋ seŋ neŋ a de sɛge neŋ yelnyɛ na onaŋ da ko ba na. (Hab 2:2) Kyɛ Naaŋmen da maŋ kaarɛɛ ba zu, a kyɛ korɔ ba sowuli ka lɛ na vɛŋ ka boŋ na baŋ sɛgrɛ na a tori a kyɛ e yelmeŋɛ meŋ, a seŋ neŋ Jehoova poboɔbo. (Ye 30:5, 6) Mɔɔbo na zaa a Baabole sɛgsɛgreba naŋ da mɔɔ na yɛlɛ la ka a Ikilisiasitiz 12:9, 10, yel a yɛlɛ ka, ba da maŋ teɛreŋ, a bɔ a kyɛ sɛgre a yɛlɛ aŋ tutu taa soŋ zaa a sɛge “yelbie naŋ noma, a kyɛ lɛ boɔrɔ ka [ba] sɛge yelmeŋɛ yelbie naŋ tori.”—De manne Lu 1:1-4.