Te Zemmo Ane Te Naaŋ Moɔloo Toma Lammo Yelsɛgree Yelpeɛre Gane
© 2025 Watch Tower Bible and Tract Society of Pennsylvania
NOVEMBER 3-9
BAABOLE POƆ YELNIMIZEERE SOOLOMONG YIENII 1-2
Zemmo Yɛlɛ Naŋ Kyaare Nɔmmo Meŋɛmeŋɛ
w15 1/15 30 wɛl. 9-10
Neɛ Na Baŋ Taa La Nɔmmo Meŋɛ Bee?
9 Kultaa ba e yelsɛgraa ba naŋ sɛgre biŋ ka nɔmmo zaa ba kye o poɔŋ. Nɔmmo e la bon nimizeɛ naŋ maŋ be Kristabiiri kultaa poɔŋ. Bo tɔ nɔmmo la teŋ yele? O eɛ nɔmmo na a Baabole naŋ yel o yɛlɛ na bee? (1 Gyn. 4:8) A nɔmmo ŋa e la nɔmmo naŋ be booree deme kpakyagaŋ bee? A nɔmmo ŋa e la nɔmmo naŋ be zɔmenne kpakyagaŋ bee? (Gyn. 11:3) O eɛ nɔmmo naŋ be dɔɔ neŋ pɔge kpakyagaŋ bee? (Yeng. 5:15-20) Yelmeŋɛ la, a nɔmmo ŋa zaa te naŋ yel a yɛlɛ la maŋ be kultaa deme kpakyagaŋ. Neɛ yel-eree la oŋ maŋ de wuli ka o taa la nɔmmo. Azuŋ a eɛ nimizeɛ ka kultaa deme ta vɛŋ ka yɛlɛ ba naŋ maŋ erɛ bebiri zaa pigi ba sori ka ba ta toɔ̃ wulo nɔmmo korɔ taa! Lɛ na vɛŋeŋ ka popeɛloŋ ane gomeŋɛ be a kultaa poɔŋ. Noba mine sããkoŋyɛlɛ poɔŋ, ba maŋ sɛgrɛɛ a kultaa yɛlɛ a ko a dɔɔ neŋ a pɔge, azuŋ a maŋ e la kpeɛŋaa ko a dɔɔ neŋ a pɔge ka ba nyɛ taa sɛre kyɛ ka ba kultaa bebiri na ta. Kyɛ aseŋ ka ba maŋ dire dama ka lɛ vɛŋ ka nɔmmo na ba naŋ taa ko taa na e kpeɛŋaa ka lɛ vɛŋ ka ba naŋ wa kultaa ka ba kultaa na soma.
10 Yelbie noba naŋ maŋ yele a wulo ka ba nɔŋ la ba kultatɔ na, taa la yelsoŋ kaŋa aŋ maŋ la e. Naa Soolomoŋ da yeleeŋ ka o na maalɛɛ ‘salema bonsuurii boŋ veɛle, a eŋaa ware lɛbie’ ko a Suulam bipɔge na. O da puguuŋ yaga zaa, a yelka o “veɛlɛŋ aŋa kyuu, a pɛle aŋa ŋmenaa.” (Sool. 1:9-11; 6:10) Kyɛ a bipɔge da naŋ di la yelmennoŋ ko a pikyeenɛ na oŋ da nɔŋ na. Bo yɛlɛ la da emoo faŋa a kyɛ dii o sukyiri saŋa na o neŋ o nɔŋna naŋ ba la wa peɛle taa na? Ŋaa oŋ yeli. (Kanne Soolomong Yienii 1:2, 3.) Lɛ na a pikyeenɛ naŋ da ‘wuluu nɔmmo’ naŋ da vɛŋ. A Suulam bipɔge da nyɛɛŋ ka a lɛ nɔmmo na “seɛ la waiŋ” naŋ maŋ vɛŋ ka neɛ taa popeɛloŋ. O yuori waa ŋa “kãã nyunoɔ̃ ba naŋ kpaa” eŋ neɛ zuŋ. (Yiem. 23:5; 104:15) Yelmeŋɛ la, a teɛroŋ sonne ŋa ba naŋ da taa kyaare nɔmmo na na baŋ vɛŋeŋ ka nɔmmo na ba naŋ taa ko taa na e kpeɛŋaa. Nyɛ lɛ anaŋ e nimizeɛ ka kultaa deme wulo taa a lɛ nɔmmo ŋa tɔ wagre la wagre!
Baabole Poɔ Yelsonne
w15 1/15 31 wɛl. 11
Neɛ Na Baŋ Taa La Nɔmmo Meŋɛ Bee?
11 A Soolomong Yienii ŋa poɔŋ, te na nyɛɛ zannoo yɛlɛ naŋ na toɔ̃ soŋ noba na naŋ ba kpɛ kultaa poɔ kyɛ boɔrɔ kultatɔ naŋ soma. A Suulam bipɔge na da ba taa nɔmmo zaa ko Soolomoŋ. O da eŋɛɛ noɔre ko a Gyɛruzɛlɛm bipɔgeba na a yelka: ‘Yɛ ta wa dɔnnɔ bee a seŋnɛ N nɔmmo a gɛrɛ N emmaaroŋ saŋa.’ (Sool. 2:7; 3:5) Azuŋ a koŋ soma fẽẽ zaa ka te wuli nɔmmo naŋ be dɔɔ neŋ pɔge kpakyagaŋ a ko neɛzaa naŋ yelka o boɔrɔ teŋ. Azuŋ a eɛ nimizeɛ ka Kristabie naŋ boɔrɔ kultatɔ di kannyiri a te ta saŋa oŋ na nyɛ neɛ onaŋ sereŋ nɔŋ.
NOVEMBER 10-16
BAABOLE POƆ YELNIMIZEERE SOOLOMONG YIENII 3-5
Ananso La Wala Aŋ E Nimizeɛ Ka Neɛ Taa Gyog-Sonne?
w15 1/15 30 wɛl. 8
Neɛ Na Baŋ Taa La Nɔmmo Meŋɛ Bee?
8 Yɛlɛ na naŋ be Soolomong Yeinii na ba kyaare eŋgannoŋ veɛloŋ yoŋ. Nyɛ yɛlɛ a pikyeenɛ naŋ da yelkyaare lɛ a Suulam bipɔge naŋ maŋ yele yɛlɛ. (Kanne Soolomong Yienii 4:7, 11.) Ho nɔgbama “togiroŋ aŋa segane.” Bonso segane maŋ nomaŋ yaga zaa a gaŋ seo ba naŋ yuo bare ka saseɛ kpɛ a. ‘Seo aneŋ beroŋ be la ho zeleŋ,’ lɛ wuleeŋ ka o yelyaga nomaŋ aŋa seo aneŋ beroŋ. Azuŋ ka a pikyeenɛ yelko a bipɔge ka, ‘ho zaaŋ veɛlɛ . . . ho ba taa saana zaa ho eŋɛŋ.’ Saŋa na a pikyeenɛ naŋ da yele a yɛlɛ ŋa na, a Suulam bipɔge eŋgannoŋ veɛloŋ yoŋ naane oŋ da yele.
w00 11/1 11 wɛl. 17
Naaŋmen Teɛroŋ O Naŋ Taa A Kyaare Foriforihoŋ
17 A Suulam bipɔge na la a noba bata soba na naŋ da taa yelmennoŋ. O da eɛ baapaalaa naŋ veɛlɛ, azuŋ pikyeenɛ kaŋa da boɔrooŋ kyɛ a pikyeenɛ yoŋ naaneŋ da boɔroo; Izerayɛl naa Soolomoŋ meŋ da boɔrooŋ. A Suulam bipɔge zemmo yɛlɛ naŋ be Soolomong Yienii na poɔŋ vɛŋɛɛŋ teŋ baŋ ka o da kaarɛɛ o meŋɛ soŋ, ka lɛ vɛŋ ka noba da de gyeremɛ koroo. Aneazaa ka a bipɔge da zagrɛɛ Soloomoŋ, kyɛ Jehoova da vɛŋɛɛŋ ka Soolomoŋ sɛge o zemmo yɛlɛ biŋ. A pikyeenɛ na meŋ naŋ da nɔmoo na da taa la gyeremɛ ko o ane o gyog-sonne na. Saŋa kaŋa, o da kaa la a Suulam bipɔge na a yelka o waa ŋa “gaadin naŋ lare.” (Soolomong Yienii 4:12) A Izerayɛl biiri saŋa na, gaadin veɛle da maŋ taa la va-veɛle, felaawa nyunoɔ̃ne ane teere yaga a poɔŋ. Ana gaadin na taa, ka neɛŋ na kpɛ be, a denoɔre yoŋ oŋ na baŋ tu kpɛ, ba da maŋ larɛɛ a denoɔre meŋ. (Aizeeya 5:5) A pikyeenɛ da nyɛ la a Suulam bipɔge gyog-soŋ ane o veɛloŋ na oŋ da taa na ka a waa ŋa gaadin naŋ veɛlɛ ka o tɔ ba kyebe. A bipɔge ŋa daaŋ ba de o meŋɛ eŋ gaŋneŋ taa yɛlɛ poɔŋ. O da de la o meŋɛ biŋ a kyɛnlɛ o serɛ oŋ na kuli nendaarekaŋa na.
g04 12/22 9 wɛl. 2-5
Bo Tɔ Veɛloŋ La Ka O Yɛlɛ Fere Yaga Zaa?
Ka teneeŋ wa taa gyog-sonne, a na baŋ tage la noba peɛle te bee? Te yɔɔpɔge Georgina naŋ kuli serɛ o yuomo pie la ŋa, ŋaa oŋ yeli: “A yi a yuomo ŋa zaa teŋ kultaa na, yɛlɛ naŋ vɛŋ maŋ la tage peɛle N serɛ yaga zaa la ka, o taa la yelmennoŋ a kyɛ maŋ yi o poɔ zaa erɛ yɛlɛ korɔ ma. Yɛlɛ naŋ e nimizeɛ koo o zemmo poɔŋ la ka o pɛlɛ Naaŋmen poɔ. A lɛ ŋa somooŋ oŋ maŋ teɛrɛ N yɛlɛ a kyɛ taa nɔmmo meŋ ko ma. Ka o naŋ wa derɛ gbɛre ka o e yelkaŋa o maŋ teɛrɛɛ N yɛlɛ, a lɛ ŋa maŋ vɛŋeŋ maŋ taa popeɛloŋ. N baŋɛɛŋ ka o nɔŋ maŋ yaga zaa.”
Ŋaa ka Daniel naŋ de pɔge yuoni 1987 yeli: “N pɔge veɛlɛŋ a ko ma. Kyɛ eŋgannoŋ poɔ veɛloŋ yoŋ naaneŋ vɛŋ maŋ tage peɛloo kyɛ o gyog-sonne la vɛŋ maŋ nɔmoo yaga zaa. O maŋ teɛrɛɛ o taaba yɛlɛ a mɔɔrɔ ka o soŋ ba ka ba taa popeɛloŋ. O taa la Kristabiiloŋ gyogri yaga naŋ soma. A vɛŋɛɛŋ aŋ e mɔlɔ ka N neŋ o laŋ zeŋ a yuomo ŋa zaa wa ta ŋaa.”
A yi a donɛɛ ŋa poɔŋ, aseŋ ka te maŋ kaa yɛlɛ gaa tɔɔre. Aseŋ ka te baŋ ka yɛlɛ na teŋ boɔrɔ ka te e na maŋ waa ŋa a koŋ baŋ nyɛ eebo a kyɛ ba taa tɔnɔ yaga meŋ. Kyɛ, ka teneeŋ mɔɔ kyɛ taa gyog-sonne a na vɛŋeŋ ka te taa veɛloŋ kaŋa naŋ e o yoŋ, te na baŋ toɔ̃ eɛ lɛ ka teneeŋ boɔrɔ. A Baabole yeleeŋ ka: ‘Nimiri nyeebo taa la bɛnlebo, ka veɛloŋ e kpale, kyɛ pɔge naŋ zoro Jehoova, onaŋ na nyɛ pugibu.’ A Sɛgre ŋa meŋ kpãã teŋ ka: ‘Aŋa sanlii fentere naŋ be dobaa nyebɔgre, lɛ neŋ o zu la pɔge veɛlaa naŋ ba taa teɛroŋ soŋ.’—Yeng Yelibie 11:22; 31:30.
Naaŋmen Yelbiri na soŋ teŋ teŋ de “a sukyiri poɔ nensaal-sɔglaa na, o na la veɛloŋ naŋ koŋ baŋ sãã, a waa baaloŋ a e bɔin na, a veɛloŋ ŋa la e tegroŋ yaga zaa Naaŋmen nimitɔɔreŋ.” (1 Piita 3:4) Yelmeŋɛ la, a veɛloŋ ŋa teŋ yele o yɛlɛ ŋa la e tegroŋ gaŋ eŋgannoŋ veɛloŋ. Te zaa meŋ na baŋ taa la ana veɛloŋ ŋa.
Baabole Poɔ Yelsonne
w06 11/15 18 wɛl. 4
Yelnimizeere Mine Naŋ Be A Soolomong Yienii Gane Poɔŋ
2:7; 3:5—Ananso la wala ka a Suulam bipɔge na da de “walehe bee moɔ wale-pɔgeba” eŋ noɔre ko a “Gyɛruzɛlɛm bipɔgeba”? Walehe bee moɔ wale-pɔgeba e la donne naŋ veɛlɛ yaga. A suulam bipɔge da de la bon naŋ veɛlɛ yaga a eŋ noɔre ka a Gyɛruzɛlɛm bipɔgeba na ta seŋ nɔmmo naŋ be o eŋɛŋ na.
NOVEMBER 17-23
BAABOLE POƆ YELNIMIZEERE SOOLOMONG YIENII 6-8
Waa Ŋa Daŋkyini, Ta Waa Ŋa Denoɔre
it “Soolomong Yienii” wɛl. 11
Soolomong Yienii
Soolomoŋ da bare la a Suulam bipɔge na oŋ leɛ gaa die. Saŋa na o yɔɔdɔbɔ naŋ da nyɛ o oŋ naŋ te kyɛnɛ waana na ba da yeleeŋ ka: ‘Nembuo la ŋa a yi wɛgyɛŋ duoro waana a dɛle o nɔŋna?’ (Sol 8:5a) A Suulam bipɔge na yɔɔdɔbɔ da ba baŋ ka ba yɔɔpɔge na taa la nɔmmo meŋɛ ko o nɔŋna. O yɔɔdɔbɔ na kaŋa da yelkyaarooŋ saŋa kaŋa naŋ pare ka: “Te taa la yɔɔpɔgebile naŋ ba taa berɛ. Bo teŋ na e ko te yɔɔpɔge ŋa daare na baŋ na yeli o yɛlɛ?” (8:8) Ka o yɔɔdɔɔ na kaŋa iri a noɔre ka: “Ka onaŋ e daŋkyini te na mɛ la ware ziduoruu o eŋɛŋ, ka onaŋ e denoɔre meŋ te na maalɛɛ siida daare gyili o nyaga.” (8:9) A Suulam bipɔge na da nyɔgɛɛ o meŋɛ a ba vɛŋ ka yelzaa tage o ka o de o meŋɛ eŋ peɛ̃mo toma poɔŋ a da di yelmennoŋ ko o nɔŋna na (8:6, 7, 11, 12), azuŋ oŋ da yelka: “N eɛ daŋkyini, ka N berɛ waa ŋa ziduoruu. Lɛ la maŋ waa neɛ naŋ waana neŋ o laafeɛ.”—8:10.
yp 188 wɛl. 2
Ka Nobaŋ Gaŋneŋ Taa Sɛre Kyɛ Kpɛ Kultaa Poɔ, A Somaŋ Bee?
Ka neɛŋ ba de o meŋɛ eŋ peɛ̃mo toma poɔŋ a maŋ go oŋ yi yelfaare mine naŋ na baŋ pɔge o eŋɛŋ. A Baabole yeleeŋ a kyaare a Suulam bipɔge na ka, o da nɔŋ la a pikyeenɛ na naŋ boɔroo na yaga zaa kyɛ o da ba vɛŋ ka o neŋ o gaŋneŋ taa a te ta saŋa na baŋ kultaa. Azuŋ o da baŋ de la nyaa yelka: “N eɛ daŋkyini, ka N berɛ waa ŋa ziduoruu.” O ba waa ŋa ‘denoɔre naŋ maŋ pɔgrɔ yuoro’ mɔlɔ lɛ ka onaŋ wa tuoro yɛlɛ naŋ na baŋ vɛŋ ka o de o meŋɛ eŋ peɛ̃mo toma poɔŋ. O da waa ŋa daŋkyin-wogi naŋ ŋmaa gyeere di-kpoŋ kaŋa neɛ zaa naŋ koŋ baŋ do kpɛ! O seŋnɛɛŋ ka ba boɔloo ka ‘neɛ naŋ ba taa saanaa.’ Azuŋ o na baŋ yelko la o serɛ ka ‘N waa neɛ naŋ waana neŋ o laafeɛ.’ O meŋɛ emmaaroŋ na la soŋ ka bon ba naŋ taa seŋ ba.—Soolomong Yienii 6:9, 10; 8:9, 10.
yp2 33
Tɔglɔ A Suulam Bipɔge Na
A Suulam bipɔge na da baŋɛɛŋ ka aseŋ ka o kaara o meŋɛ soŋ ka o neŋ a pikyeenɛ wa wulo nɔmmo korɔ taa. O da yelko la a Gyɛruzɛlɛm bipɔgeba na ka ‘N eŋɛɛ noɔre ka: Yɛ ta wa dɔnnɔ bee a seŋnɛ N nɔmmo a gɛrɛ N emmaaroŋ saŋa.’ A Suulam bipɔge da baŋɛɛŋ ka o teɛrɛ na baŋ saaŋɛɛ o sukyiri. O da baŋɛɛŋ ka o taaba na baŋ bɛnlooŋ ka o taa nɔmmo ko neɛ o naŋ ba boɔrɔ. O da baŋɛɛŋ meŋ ka o teɛrɛ na baŋ sãã la o sukyiri ka o e yɛlɛ naŋ ba soma. Azuŋ a Suulam bipɔge da waa ŋa “daŋkyini.”—Soolomong Yienii 8:4, 10.
Ho taa la teɛroŋ na a Suulam bipɔge naŋ da taa kyaare nɔmmo naŋ be dɔɔ neŋ pɔge kpakyagaŋ na bee? Maŋ kaara yɛlɛ soŋ a ta vɛŋ ka ho sukyiri bɛnle bo. (Yeng Yelibie 2:10, 11) Wagre mine, noba mine na boɔrɔŋ ka ba bɛnle bo eŋ kultaa yɛlɛ poɔŋ saŋa na ho naŋ ba e siri. Hooŋ meŋɛ na baŋ de la ana yɛlɛ ŋa wa dɔgle ho zuŋ. Aŋa mannoo poɔŋ, ka hooŋ wa nyɛ dɔɔ neŋ pɔge naŋ nyɔge taa nuure a kyɛnɛ, ho meŋ maŋ boɔrɔŋ ka ho neŋ neɛ kaŋa laŋ ana yɛlɛ ŋa taa bee? Ka lɛ ho na sageŋ ka ho neŋ neɛ kaŋa naŋ ba puoro Jehoova a tuuro taa bee? A Suulam bipɔge da wuleeŋ ka o kyilɛɛŋ ka a naŋ wa wa dɔɔ neŋ pɔge nɔmmo yɛlɛ. Lɛ hoŋ meŋ waa bee?
Baabole Poɔ Yelsonne
w15 1/15 29 wɛl. 3
Neɛ Na Baŋ Taa La Nɔmmo Meŋɛ Bee?
3 Kanne Soolomong Yienii 8:6. Ba deɛ a yelbie “Jehoova vũũ,” manne nɔmmo yɛlɛ soŋ zaa. Yelmeŋɛ nɔmmo e la “Jehoova vũũ” bonso Jehoova meŋɛ zie la ka a nɔmmo ŋa yi. O maalɛɛ nensaaleba o meŋɛ waaloŋ poɔŋ baŋ na baŋ toɔ̃ wuli nɔmmo. (Mun. 1:26, 27) Saŋa na Naaŋmen naŋ da de a pɔge dɛndɛŋ, Hawaa wa ko Adama na, Adama da yelee yelseŋkpelweeraa kaŋa a de wuli lɛ o eŋɛ naŋ mãã. Lɛŋ vɛŋ ka Hawaa da tage peɛle Adama bonso o baŋɛɛŋ ka ba “iruuŋ yi” Adama eŋɛŋ. (Mun. 2:21-23) Jehoova naŋ maale nensaaleba teŋ na baŋ wuli nɔmmo na zuŋ, lɛŋ vɛŋ ka dɔɔ neŋ pɔge na baŋ taa nɔmmo meŋɛmeŋɛ ko taa.
NOVEMBER 24-30
BAABOLE POƆ YELNIMIZEERE AIZEEYA 1-2
Tamaa Naŋ Bebe Ko Noba Na ‘Yelfaare Naŋ Zuli Ba’
ip-1 14 wɛl. 8
Bi-Saa Ane O Bi-Tokpeɛne
8 Aizeeya da de la yelbie naŋ e kpeɛŋaa a yel a Gyuuda noba nimiri yɛlɛ ko ba: ‘Oo, paaloŋ naŋ erɛ yelbebe, noba ŋa yelfaare naŋ zuli. Toŋfatonneba aneŋ biiri naŋ saana booree la. Ba zagrɛɛ Jehoova. Ba dɔŋ la O Na Na Naŋ Pɛgeyi Izerayɛl na suuri. Ba leɛ gaa la puori.’ (Aizeeya 1:4) Yelfaare neɛ naŋ erɛ na baŋ laŋɛɛ taa a e yaga, a zuli o soba. Aboraham saŋa na Jehoova da yeleeŋ ka Sodom ane Gomora deme yelfaare na eɛ “kpoŋ.” (Munpiilee 18:20) Lɛ meŋ ka a Gyuuda noba yɛlɛ da wa waa, Aizeeya yeleeŋ ka ba ‘yelfaare na zuli’ baŋ. Ane meŋ o da la boɔle baŋ ka ‘toŋfatonneba aneŋ biiri naŋ saana booree.’ A pɛlɛɛŋ ka a Gyuuda noba da waa ŋa bi-tokpeɛne. Ba da ‘leɛ gaa la puori’ a bare ba Saa.
ip-1 28-29 wɛl. 15-17
‘Ka Te Yeli Yɛlɛ Woŋ Taa Sɛŋ’
15 Lɛ na Jehoova naŋ yel yɛlɛ na vɛŋɛɛŋ teŋ nyɛ lɛ o naŋ taa nɔmmo ane nimimaaroŋ aseŋ. ‘Yɛ wa pampana ka te yeli yɛlɛ woŋ taa sɛŋ. Jehoovaŋ yeli. ‘Aneazaa ka yɛ yelbebe eɛ zeɛ toẽtoẽ lɛ, kyɛ N na vɛŋeŋ ka a waa peɛlaa lɛ aŋa sakubo; Ka a naŋ gbaŋ moɔ̃ a te suɔ, a na leɛ eɛ peɛlaa lɛ a ŋa pe-kɔ̃ɔ̃ peɛle.’ (Aizeeya 1:18) A toŋboɔle ŋa ba naŋ de piili a sɛgre na noba yaga ba woŋ o muni. Aŋa mannoo poɔŋ, A New English Bible yeleeŋ ka, “Vɛŋ ka te ŋmɛ nɔkpeɛne kyaare a yɛlɛ.” Lɛ na a sɛgre ŋa naŋ yel na vɛŋɛɛŋ aŋ waa ŋa noba bayi naŋ laŋ sage yelkaŋa bee a laŋ noɔre yelkaŋaŋ. Kyɛ lɛ naane aŋ waa! Jehoova ba taa saanaa zaa. Kyɛ a Izerayɛl biiri la e tokpeɛne a ba taa yelmennoŋ meŋ. (Duturoonomi 32:4, 5) Ana sɛgre ŋa ba yele tage-kaŋ-tage naŋ be noba kpakyagaŋ, kyɛ a eɛ apoɔsori Jehoova naŋ yuo ka lɛ na vɛŋ ka o neŋ a Izerayɛl biiri sɛgre yɛlɛ dantorii soriŋ. A waa ŋa Jehoova naŋ de a Izerayɛl biiri gaaneŋ sɛredi-zie.
16 A yɛlɛ naaŋ eɛ dabeɛ̃ ka Jehoovaŋ da de ba kpɛ neŋ sɛredi-zie, kyɛ Jehoova eɛ nimimaaroŋ soba gaŋ neɛzaa, azuŋ o maŋ di la sɛrɛɛ nɔmmo soriŋ. O maŋ vɛŋ koŋ sokpoŋ poɔŋ ka neɛzaa koŋ baŋ e lɛ. (Yieme 86:5) Jehoova yoŋ la neɛ naŋ na baŋ iri a Izerayɛl biiri yelbebe naŋ e ‘zeɛ toẽtoẽ lɛ’ a bare, a kyɛ pɛgeba ka ba yi ‘pɛle aŋa sakubo.’ Nensaaleba mɔɔbo, tonkpeɛne, sarekare bee puoro koŋ baŋ iri faaloŋ bare. Jehoova vɛŋ koobo yoŋ la na baŋ pɛge yelbebe bare. Naaŋmen maŋ vɛŋ ko la noba a de tuuro sowuli na o na meŋɛ naŋ biŋ, ana la neɛ aŋ na yi o sukyiri zaa a leɛre yi o yelbebe o naŋ erɛ na poɔŋ.
17 A daŋyelbo ŋa yɛlɛ eɛ nimizeɛ ko Jehoova yaga zaa azuŋ oŋ de yelseŋkpelweeraa toŋ neŋ toma a yelka, ka ba yelbebeŋ e ‘zeɛ toẽtoẽ lɛ’ kyɛ a na leɛ pɛleŋ aŋa pe-kɔ̃ɔ̃ peɛle. Jehoova boɔrɔŋ ka te baŋ ka o eɛ Neɛ naŋ maŋ vɛŋ te yelbebe ko te kpɛlɛŋkpɛlɛŋ, ka te naŋ gbaŋ e yelfaa naŋ e nimizeɛ a kyɛ yi te sukyie poɔ zaa a leɛre te eebo. Ka neɛ kaŋaŋ teɛrɛ ka o na yɛŋ Jehoova koŋ sage di suuri koo, o soba na baŋ zannɛɛ Manaase zemmo yɛlɛ. O da toŋ la faaloŋ yaga zaa a kyaare Jehoova yuomo yaga. Kyɛ o da leɛrɛɛ o eebo ka Jehoova da vɛŋ o yelbebe a ko o. (2 Tungkori 33:9-16) Jehoova boɔrɔŋ ka te zaa aneŋ noba na aŋ toŋ faaloŋ yaga zaa a kyaaroo na baŋ ka, a vuo naŋ bebeŋ ka te neŋ o ‘yeli yɛlɛ woŋ taa sɛŋ’ a sɛgre te neŋ o niiloŋ naŋ sãã na.
Baabole Poɔ Yelsonne
ip-1 39 wɛl. 9
Jehoova Die Na Do La Saa
9 Zenɛ ŋa, Naaŋmen noba ba maŋ te laŋ taŋazuŋ ba naŋ de kubo mɛ ŋmenpuoredie beŋ a puoroo. Urom deme da sãã la Jehoova ŋmenpuoredie naŋ be Gyɛruzɛlɛm yuoni 70 Y.W.P. A bitontona Pɔɔl da vɛŋɛɛŋ aŋ pɛle ka, a ŋmenpuoredie naŋ da be Gyɛruzɛlɛm ane Moosis saŋa ŋmenpuoredie [tɛnt] na baŋ da maŋ maale na are ko la yelkaŋa. A na yelsɛgraa ŋa da are ko la yeltegroŋ kaŋa naŋ be sazuŋ, “a tɛnt meŋɛ zisoŋ zie na a Daana meŋɛ naŋ maale ka nensaalaa naane maale.” (Hiburu 8:2) A siiloŋ poɔ tɛnt ŋa naŋ be a sazu na Jehoova meŋɛ la maaloo, ka te na baŋ tu be kyɛ wa o nimitɔɔre a wa puore koo a tuuro a sareka na Yezu naŋ wa iri na eŋɛŋ. (Hiburu 9:2-10, 23) Azuŋ, “Jehoova taŋazu die” na Aizeeya 2:2 naŋ yele o yɛlɛ na are ko la lɛ na yelmeŋɛ puoruu naŋ do saa te saŋa ŋa yɛlɛ. Noba na naŋ sage ka ba wa poɔ yelmeŋɛ puorebiiri poɔŋ zenɛ na, a ba la fɛre ka ba maŋ te laŋ taŋazu a puoro Jehoova; kyɛ ba maŋ laŋ la taa a ba lammozieŋ a de noɔreyeni a puoro Jehoova.
DECEMBER 1-7
BAABOLE POƆ YELNIMIZEERE AIZEEYA 3-5
Aseŋ Ka Te Maŋ Sagra Jehoova Sowuli
ip-1 73-74 wɛl. 3-5
Girep Weɛ Teere Na Naŋ Ba Taa Yelmennoŋ Na Di La Dɔgɛɛ!
3 Ka a yelmannaa ŋa e la yieloŋ Aizeeya naŋ yieli ko a noba bee ka o ba e lɛ, yɛlɛ te naŋ baŋ la ka, o yelyaga na da tagɛɛ a noba teɛroŋ waneŋ yɛlɛ na oŋ da yele na eŋɛŋ. Kaapɔge a noba da baŋ la waiŋ teere toma yaga zaa, azuŋ ba da woŋ la yɛlɛ na Aizeeya naŋ da yele na muni soŋ zaa. Aŋa lɛ na noba naŋ maŋ borɔ waiŋ tebie naŋ maŋ e na, ba maŋ “borɛɛ bonbie naŋ soma,” lɛ wuleeŋ ka ba maŋ ŋmaa la waiŋ danuure naŋ soma a sɛle. O maŋ borɛɛ a waiŋ teere zie o naŋ baŋ ka a na bulee soŋ zaa.
4 A maŋ de la tonkpeɛne sɛre kyɛ ka neɛ na toɔ̃ kaa waiŋ teere zieŋ ka a wɔŋ soŋ. Aizeeya da manne wulee lɛ o soba naŋ maŋ tu a ‘iri a kubo zaa yi a teŋɛŋ,’ a da eɛ toma naŋ e kpeɛŋaa yaga zaa! Aminekaŋaŋ o da maŋ de la a ku-bɛrɛbɛrɛ “mɛ ziduoruu.” Takoreŋ saŋa na, a ziduoruu ŋa zuŋ ka kaakaareba da maŋ are kaara ba weɛ boma ka nanyigri ta wa zu a bee ka donne ta wa saaŋaa. Ane meŋ, ba da maŋ de la kubo a mɛ kɔgraa pɔge a teɛ pare ka koɔ̃ ta wa wuo a tɛne gaa. (Aizeeya 5:5)
5 Neɛ naŋ so a waiŋ teere naŋ maŋ toŋ tonkpeɛne na zuŋ o maŋ kaarɛɛ soriŋ ka a teere wɔŋ soŋ. O maŋ maalɛɛ bon oŋ na de maale neŋ waiŋ a biŋ. Kyɛ wagre mineŋ a waiŋ teere ba maŋ wɔŋ wɔŋ-sonne kyɛ a maŋ wɔŋ la wɔŋ-faare.
ip-1 76 wɛl. 8-9
Girep Weɛ Teere Na Naŋ Ba Taa Yelmennoŋ Na Di La Dɔgɛɛ!
8 Aizeeya boɔlɛɛ Jehoova naŋ e waiŋ teɛ soba na ka, “N nɔŋna.” (Aizeeya 5:1) Aizeeya neŋ Naaŋmen da taa la niiloŋ naŋ soma azuŋ oŋ da boɔloo lɛ. (De manne Joob 29:4; Yieme 25:14.) Ho koŋ baŋ de nɔmmo na a daŋyele naŋ da taa ko Naaŋmen na manne neŋ nɔmmo Naaŋmen naŋ taa ko a “waiŋ teɛ,” a paaloŋ o naŋ ‘sɛle’ na.—De manne Yiibu 15:17; Yieme 80:8, 9.
9 Jehoova da “sɛle” la o paaloŋ na Kaana teŋɛ na poɔŋ, a da ko ba bege naŋ da waa ŋa daŋkyini naŋ da na baŋ go ba yi paaloŋ yuo eŋɛŋ. (Yiibu 19:5, 6; Yieme 147:19, 20; Efesu 2:14) Jehoova da lɛ ko baŋ sɛreŋmaareba, ŋmenpuore wedeɛreba ane daŋyelba ka ba korɔ ba sowuli. (2 Namine 17:13; Maalakai 2:7; Toma 13:20) Ka Izerayɛl biiri dɔndɔnneŋ wa iri zɔɔrɔ neŋ ba Jehoova da maŋ iree noba baŋ zɔɔ deɛ ba. (Hiburu 11:32, 33) Azuŋ ka Jehoova da soore ka: “Bo maŋ da naŋ la e N girep weɛ ŋa kyɛ maŋ ba e o poɔŋ?”
w06 6/15 18 wɛl. 1
“Kaa Ho Girep Ŋmeɛlee Ŋa Zieŋ”!
Aizeeya da de la “a Izerayɛl die” na manne neŋ girep teere naŋ wɔnɔ “girep faare”. (Aizeeya 5:2, 7) Girep faare maŋ e la bilii a gaŋ ana baŋ maŋ kɔ na, a bie maŋ eɛ bɛrɛ azuŋ a ba maŋ taa saa yaga. Girep faare ba taa tonɔ zaa a koŋ baŋ maale waiŋ bee neɛ koŋ baŋ di a. A Izerayɛl biiri da waa ŋa ana girep faare ŋa, ba da wɔŋ la wɔŋ faare, a saana bege a gaŋ baŋ na e sontuuribo. A Weɛ Soba naaŋ vɛŋ ka a girep ba wɔŋ-soŋ. Jehoova mɔɔ la o mɔɔbo zaa ka o soŋ a Izerayɛl biiri kyɛ baŋ naŋ taa gyog-faare. Azuŋ Jehoova da soorɛɛŋ ka “bo maŋ da naŋ la e N girep weɛ ŋa kyɛ maŋ ba e o poɔŋ?”.—Aizeeya 5:4.
w06 6/15 18 wɛl. 2
“Kaa Ho Girep Ŋmeɛlee Ŋa Zieŋ”!
A Izerayɛl biiri girep na naŋ da wɔnɔ wɔŋ faare zuŋ, Jehoova da kpaare baŋ ka o na saa la dankyini na o naŋ mɛ oŋ go ba taa na. Jehoova koŋ la maale a girep ka a wɔŋ soŋ bee a maale a tɛne ka a soma. Saa koɔ̃ na naŋ maŋ vɛŋ ka a girep teere baara na koŋ la wa, moɔ̃ ane goore na buliŋ a pa a weɛ zaa.—Aizeeya 5:5, 6.
Baabole Poɔ Yelsonne
ip-1 80 wɛl. 18-19
Girep Weɛ Teere Na Naŋ Ba Taa Yelmennoŋ Na Di La Dɔgɛɛ!
18 A Izerayɛl paaloŋ teŋgane zaa da e la Jehoova suobu. Booree zaa da maŋ nyɛ la kyɔɔtaa yi Jehoova zie, ba da na baŋ de la ana bon na pɛŋ neɛ kyɛ ba da koŋ baŋ koɔroo zaa. (Liivai 25:23) A bege da maŋ go la noba, ka di-meɛreba ta wa faa a teŋgane. A lɛ da maŋ go la booree deme ka naŋ ta wa kpɛ ba te gaali. Noba mine da saana la Naaŋmen bege Gyuuda poɔŋ a kyaare boma taabo aŋa teŋgane. Maika da sɛgɛɛŋ ka: “Ba maŋ eɛ noba wɛre niiri, a de a gaa aneŋ kpeɛ̃o. Ba maŋ eɛ deri meŋ niiri, a faa gaa. Lɛ zuŋ baŋ maŋ filiŋ dɔɔ aneŋ o die, a filiŋ dɔɔ aneŋ o kyɛŋ.” (Maika 2:2) Kyɛ Yeng Yelibie 20:21 kpãã teŋ ka: ‘Kyɛŋ na neɛ naŋ lonne nyɛ a piileeŋ, koŋ nyɛ maaloo a baaraaŋ.’
19 Jehoova eŋɛɛ noɔre ka o na iree a neŋfaare ŋa naŋ taa a teɛroŋ faare ŋa bare. A deri ba naŋ faare na na “gaŋɛɛ kpale.” A teŋgama ba naŋ faare na na wa leɛ la bonkaŋa yɛlɛ naŋ ba fɛre a ba taa tɔnɔ zaa. Zie ane wagre na a yɛlɛ naŋ na nyɛ eebo na a Baabole ba yeli. Aminekaŋaŋ, saammo na a Baabilɔŋ deme naŋ da de waneŋ a Izerayɛl biiri zuŋ na a kyɛ nyɔge ba gaaneŋ gbaŋgbaaloŋ na poɔ la a to-tage poɔŋ.—Aizeeya 27:10.
DECEMBER 8-14
BAABOLE POƆ YELNIMIZEERE AIZEEYA 6-8
“Nyɛ Ma La Ŋa! Toŋ Ma!”
ip-1 93-94 wɛl. 13-14
Jehoova Naaŋmen Be La O Ŋmenpuoredi-Forifori Poɔŋ
13 Yɛ vɛŋ ka te neŋ Aizeeya zaa laŋ kyɛllɛ a yɛlɛ ŋa. ‘Maŋ la woŋ Jehoova kɔkɔre aŋ yele: Nembuo maŋ na toŋ? Nembuoŋ na gaa a ko te? Beŋ la maŋ yeli: Nyɛ ma la ŋa. Toŋ ma.’ (Aizeeya 6:8) Soorebiri na Jehoova naŋ soore na, o da boɔrɔŋ ka Aizeeya iri a noɔre, bonso daŋyele zaa da ba lɛ poɔ o eŋɛŋ a yelnyaabo poɔŋ. A ba e gbɛ-ŋmɛ bee yelfaa Jehoova naŋ vɛŋ ka Aizeeya wa e o daŋyele. Kyɛ ananso la wala ka Jehoova soore ka, “Nembuoŋ na gaa a ko te?” Ka hooŋ iri a yelbiri “N” kyɛ de “te” leɛre o voɔreŋ lɛ wuleeŋ ka, Jehoova de la nembonyeni poɔ o eŋɛŋ. Kyɛ nembuo la a soba? O Bidɔɔ yeni ba naŋ boɔlɔ Yezu Krista na la bee? Ɛɛ, o Bie na ne o zu la, o da yelkooŋ ka, “Vɛŋ ka te maale nensaalaa te meŋɛ waaloŋ poɔ.” (Munpiilee 1:26; Yeng Yelbie 8:30, 31) Yelmeŋɛ la, Jehoova neŋ o Bidɔɔ yeni na zaa laŋ be la sazuŋ.—Gyɔɔn 1:14.
14 Aizeeya da lonneeŋ wieoŋ a sage a toma! Aneazaa ka o da ba baŋ yelzaa kyaare a duoro na oŋ na te moɔle na yɛlɛ, kyɛ ŋaa oŋ da yeli: “Nyɛ ma la ŋa! Toŋ ma.” O da ba soore ka o na nyɛ la bonkaŋa ka o naŋ wa sage a toma ŋa. O meŋɛ de terebo na e la gyog-soŋ naŋ seŋ ka yelmeŋɛ Kristabiiri naŋ bebe zenɛ ŋa meŋ tɔgle, ba na la noba naŋ taa apoɔsori ka ba moɔle a Naaŋmen ‘naaloŋ duorisoŋ na a tendaa lombori zaa’ (Matio 24:14) Aŋa Aizeeya, ba maŋ mɔɔrɔ la ba moɔbo zaa ka ba di “sieree ko a paalonne noba zaa,” aneazaa ka noba yaga ba maŋ kyɛllɛ wono a duorisoŋ. Kyɛ ba maŋ de la nyaa a gɛrɛ nimitɔɔre a moɔlɔ a duorisoŋ aŋa lɛ Aizeeya naŋ da e na, bonso ba baŋɛɛŋ ka neɛ na naŋ taa kpeɛ̃o a gaŋ neɛzaa la toŋ ba.
ip-1 95 wɛl. 15-16
Jehoova Naaŋmen Be La O Ŋmenpuoredi-Forifori Poɔŋ
15 Jehoova da wulee Aizeeya yɛlɛ o naŋ na yeli ane noɔre iribo o naŋ na nyɛ: ‘Gaa te yelko a noba ŋa: Yɛ maŋ wonoŋ, kyɛ koŋ baŋ a pare. Yɛ maŋ nyɛrɛŋ, kyɛ koŋ baŋ a nimiri. Vɛŋ ka a noba ŋa sukyie ko, ka ba tobo e kpeɛne. Pɔge ba nimie, ka ba ta erɛ wa nyɛ neŋ ba nimie, a woŋ neŋ ba tobo, ka ba ta erɛ wa woŋ a muni aneŋ ba sukyie, a leɛ wa a nyɛ sammo.’ (Aizeeya 6:9, 10) Lɛ wuleeŋ ka, Aizeeya na yelee a yɛlɛ lɛ zaa o naŋ boɔrɔ a koŋ tu nyaammo sori zaa ka lɛ vɛŋ ka Jehoova neŋ a Izerayɛl biiri zɔɔrɔ neŋ taa bee? Ai, o koŋ sage e lɛ! Aizeeya meŋɛ noba la a noba ŋa azuŋ ba yɛlɛ e oŋ nembao. Kyɛ Jehoova yelbie na wulee lɛ a noba naŋ na e ba yɛlɛ, haali ka Aizeeya toŋ o toma soŋ zaa seŋ wala.
16 A noba la da taa saana. Aizeeya da yelee a yɛlɛ a ko ba baŋ ‘woŋ,’ kyɛ ba da ba sage a yɛlɛ bee a mɔɔrɔ ka ba baŋ a pare. Ba yaga zie da e la tokpeɛne a zagre ka ba kyɛlle Aizeeya yɛlɛ na, aŋa noba naŋ ba wono a kyɛ zɔŋ. Oŋ da gɛrɛ a noba zie gbɛɛ yaga na da vɛŋɛɛŋ aŋ pɛle ka “a noba” ba boɔrɔ ka ba woŋ a yɛlɛ pare. Ba da wuleeŋ ka ba ba e siri ka ba de Aizeeya duoro naŋ yi Naaŋmen zie na eŋ ba teɛroŋ bee ba sukyieŋ. Lɛ ka noba meŋ be zenɛ ŋa! Noba yaga ba maŋ e siri ka ba kyɛlle woŋ Jehoova Sieree Deme duoro na baŋ maŋ moɔlɔ a kyaare Naaŋmen Naaloŋ na naŋ waana na yɛlɛ.
ip-1 99 wɛl. 23
Jehoova Naaŋmen Be La O Ŋmenpuoredi-Forifori Poɔŋ
23 Saŋa na Yezu naŋ wa yele Aizeeya daŋyelbo yɛlɛ na, o da wuleeŋ ka a da nyɛɛ eebo o saŋa na. A noba sukyie ane ba yel-eree da waa ŋa Aizeeya saŋa noba na. Ba da vɛŋɛɛŋ ka ba nimie ba nyɛrɛ ka ba tobo ba wono a duoro Yezu naŋ da manna na, ka lɛ vɛŋ baŋ nyɛ saammo. (Matio 23:35-38; 24:1, 2) Ba da nyɛ la saammo saŋa na Urom sogyare neŋkpoŋ kaŋa yuori naŋ di Tiitu naŋ wa zɔɔ neŋ Gyɛruzɛlɛm yuoni 70 Y.W.P, a sãã a teŋkpɛŋ ane a ŋmenpuoredie na. Kyɛ, noba mine da kyɛlle woŋ la Yezu yɛlɛ na a wa leɛ o potuuribo. Yezu da yeleeŋ ka ana noba ŋa taa la “popeɛloŋ.” (Matio 13:16-23, 51) O da yelko baŋ ka, ka ba naŋ wa nyɛ “sogyare naŋ ŋmaa gyeere Gyɛruzɛlɛm,” ba “piili zoro duoro a tanne zuri.” (Luka 21:20-22) Kyɛ a “booree pɛgeyiruu” naŋ wuli sagediibu da wa leɛ la siiloŋ poɔ paaloŋ, “a Naaŋmen noba Izerayɛl,” da nyɛɛ faabo.—Galesiya 6:16.
Baabole Poɔ Yelsonne
w06 12/1 9 wɛl. 4
Yelnimizeere Mine Naŋ Be A Aizeeya Gane Poɔ—I
7:3, 4—Ananso la wala ka Jehoova da deɛ Na-faa Ahaz? A Siiriya namine ane a Izerayɛl noba mine da boɔrɔŋ ka ba iri Ahaz bare ka o ta la e Naa, kyɛ de neɛ ba naŋ boɔrɔ a kyɛ na baŋ feroo ka o e ba boɔbo zegle ka o e Gyuuda naa. Tabeel bidɔɔ la baŋ da boɔrɔ ka ba iri ka o e a naa, kyɛ o meŋ da ba e Deevid yaaŋaa. Setaana nyaammo soe neŋ daware yɛlɛ ŋa da naaŋ baŋ vɛŋeŋ ka nɔlaŋ na Jehoova neŋ Deevid naŋ da taa a kyaare a Naaloŋ na sãã. Jehoova da deɛ la Ahaz ka lɛ na vɛŋ a tuuro o eŋɛŋ ka noɔre na Jehoova naŋ eŋ a kyaare a “Maaroŋ Na-bie” na nyɛ eebo.—Aizeeya 9:6.
DECEMBER 15-21
BAABOLE POƆ YELNIMIZEERE AIZEEYA 9-10
Daŋyelbo Naŋ Kyaare “Kyaanee Kpoŋ” Kaŋa
ip-1 125-126 wɛl. 16-17
A Maaroŋ Nabie Ba Naŋ Eŋ Noɔre Ka O Na Waŋ Na
16 A yelbie “a puoriŋ” na Aizeeya naŋ yeli na da kyaarɛɛ Yezu teŋɛzu kyɛ naaŋ moɔloo toma na yɛlɛ. Yezu nyɔvore zemmo kpoŋ zie zaa Galili poɔŋ oŋ da kpeɛrɛ. A Galili teŋɛ la oŋ da piili o naaŋ moɔloo toma na a da piili yelka: “A sazu naaloŋ peɛlɛɛ la.” (Matio 4:17) Galili poɔŋ la oŋ da yeli a o taŋazu yelyaga na, a iri o bitontonee, a toŋ o dɛndɛŋ toŋseɛlee a kyɛ da iri o meŋɛ wuli o potuuribo 500 saŋa na oŋ leɛ-iri yi kũũ poɔŋ na. (Matio 5:1–7:27; 28:16-20; Marko 3:13, 14; Gyɔɔn 2:8-11; 1 Korinti 15:6) A sori ŋaŋ Yezu da paalɛɛ daŋyelbo na Aizeeya naŋ da yelka: “Zɛbulun paaloŋ aneŋ Nafetalai paaloŋ” na nyɛɛ emmo. Kyɛ, a ba wuli ka Galili noba yoŋ la ka Yezu da moɔle a duorisoŋ ko. Yezu naŋ da moɔle a duorisoŋ a paalonne zaa poɔŋ na da ‘vɛŋɛɛŋ oŋ nyɛ gyeremɛ’ a Izerayɛl paaloŋ zaa poɔŋ ka Gyuuda meŋ poɔ.
17 Matio da yeleeŋ ka “kyaanee kpoŋ” kaŋa na yi la Galili. Ana yelbie na meŋ da yi la Aizeeya daŋyelbo na poɔŋ. Aizeeya da sɛgɛɛŋ ka: ‘Noba na naŋ daaŋ kyɛnɛ ligroŋ poɔŋ nyɛɛ kyaanee naŋ e kpoŋ. Bana na naŋ daaŋ kpeɛrɛ kũũ dasuoluŋ paaloŋ, ba eŋɛŋ ka kyaanee kyaaŋ.’ (Aizeeya 9:2) Yezu saŋa na, zirii puoruu da vɛŋɛɛŋ ka a yelmeŋɛ kyaanee na be ligroŋ poɔŋ. A Gyuumine ŋmenpuore wedeɛreba da naŋ nyɔge la ba sããkoŋyɛlɛ taa ka lɛ ‘vɛŋ ka Naaŋmen yelbiri na ba taa tɔnɔ.’ (Matio 15:6) Ba da dɔgrɔ la sigrimeŋɛ deme bonso, ‘zɔnne la da tagra zɔnne.’ (Matio 23:2-4, 16) Saŋa na Yezu naŋ e a Mɛzaaya naŋ da wa a teŋɛzu na, a kyaanee da kyaaŋ ko la sigrimeŋɛ deme soseɛlee poɔŋ. (Gyɔɔn 1:9, 12) Yezu naaŋ moɔloo toma na oŋ da toŋ a teŋɛ zuŋ na, Aizeeya daŋyelbo de aŋ manne neŋ “kyaanee kpoŋ.”—Gyɔɔn 8:12.
ip-1 126-128 wɛl. 18-19
A Maaroŋ Nabie Ba Naŋ Eŋ Noɔre Ka O Na Waŋ Na
18 Noba na naŋ da sage a duorisoŋ na da taa la ananso ka ba taa popeɛloŋ. Ŋaa ka Aizeeya da tɔnne a yeli: ‘Ho e yɛŋ ka a paaloŋ ugi, a e ka ba popeɛloŋ e kpoŋ. Ba taa la popeɛloŋ ho nimitɔɔreŋ aŋa noba naŋ taa popeɛloŋ boma kyeɛbo saŋa. Ba taa la popeɛloŋ aŋa dɔbɔ naŋ maŋ taa popeɛloŋ saŋa na baŋ poro boma baŋ zɔɔ faa.’ (Aizeeya 9:3) A de tuuro a naaŋ moɔloo toma Yezu potuuribo naŋ toŋ na eŋɛŋ, sukyiri-sonne deme da sage la a yɛlɛ, a wuli ka ba boɔrɔŋ ka ba puore Jehoova vooroŋ ane yelmennoŋ poɔŋ. (Gyɔɔn 4:24) Yuomo anaare kpakyagaŋ, noba yaga da wa leɛ la Kristabiiri. Noba turi ata la da de suobu bebi-yeni Pɛnteko 33 Y.W.P. Kyɛ a ba la kɔɔre, “ba da ta ŋa noba turi anuu.” (Toma 2:41; 4:4) Saŋa na Yezu potuuribo na naŋ wa vɛŋ ka ba kyaanee na kyaaŋ yaga zaa na, “ka a potuuribo noɔre da erɛ yaga Gyɛruzɛlɛm poɔŋ; ka ŋmenpuore wedeɛreba gyamaa da sagra a sagediibu yɛlɛ.”—Toma 6:7.
19 Aŋa lɛ na noba naŋ maŋ gaa zɔɔre a te zɔɔtoɔ̃ a wa poro a boma ba naŋ nyɛ ka lɛ vɛŋ baŋ taa popeɛloŋ na, lɛ ka Yezu potuuribo na meŋ da taa popeɛloŋ saŋa na baŋ wa nyɛ noba yaga naŋ sagra a duorisoŋ. (Toma 2:46, 47) Wagre naŋ gɛrɛ na, Jehoova da vɛŋɛɛŋ ka a kyaanee kyaaŋ ko a donɛɛ deme zaa. (Toma 14:27) Azuŋ noba naŋ yi bale yobo zaa taa la popeɛloŋ, sori naŋ yuo ko ba baŋ meŋ na baŋ wa puore Jehoova.—Toma 13:48.
ip-1 128-129 wɛl. 20-21
A Maaroŋ Nabie Ba Naŋ Eŋ Noɔre Ka O Na Waŋ Na
20 Yɛlɛ na a Mɛzaaya naŋ e na bebeŋ gɛrɛ, yɛlɛ na Aizeeya naŋ da la yeli naŋ vɛŋ teŋ baŋ lɛ: “Bozuŋ ho kɔɔ yɛ o tuobu yoki, a kɔɔ ba bagebie dabɔle ne. Ho kɔɔ yɛ neɛ na aŋ dɔgrɔ ba daa aŋa Miidiya bebiri na.” (Aizeeya 9:4) Yuomo mine sɛre ka Aizeeya saŋa na ta, Miidiya deme ane Mooab noba da boɔrɔŋ ka ba bɛnle a Izerayɛl biiri ka ba toŋ faaloŋ. (Soribu 25:1-9, 14-18; 31:15, 16) A puoriŋ, Miidiya noba da dɔgre la a Izerayɛl deme a maŋ te fa ba boma, a de ba weɛ boma meŋ aŋa yuomo ayɔpoi. (Saringmaariba 6:1-6) Kyɛ Jehoova da tu la o toŋtonɔ Giidioŋ eŋɛ kyɛ zɔɔtoɔ̃ a Miidiya sogyare. A yi “Miidiya bebiri” na, sieree zaa ba la kyebe a wuli ka a Miidiya noba da wa dɔgrɛɛ Jehoova noba. (Saringmaariba 6:7-16; 8:28) Nendaarekaŋa naŋ waana Yezu Krista naŋ gaŋ Giidioŋ na sãã la noba na naŋ iri zɔɔrɔ neŋ Jehoova puorebiiri na. (Yel-iriwulaa 17:14; 19:11-21) Aŋa lɛ aŋ da waa “a Miidiya bebiri” na, Yezu na zɔɔtoɔ̃ŋeŋ kpɛlɛŋkpɛlɛŋ, nensaaleba faŋa naane oŋ na de e lɛ, kyɛ Jehoova faŋa la oŋ na de zɔɔtoɔ̃. (Saringmaariba 7:2-22) Naaŋmen noba daaŋ koŋ la di dɔgɛɛ a yi dɔgɛɛ noba naŋ maŋ de waneŋ ba zuŋ na!
21 Kpeɛ̃o na Jehoova naŋ maŋ de ko neɛ oŋ toɔ̃ zɔɔtoɔ̃ na a ba seŋ ka o soba maŋ de a bareka puoruu korɔ o meŋɛ. A Yezu naŋ da iri yi kũũni poɔŋ na la a Maaroŋ Nabie, saŋa na oŋ na wa iri o dɔndɔnne bare na, o na de teŋ gaaneŋ emmaaroŋ naŋ ba taa baaraa poɔ. Aizeeya da yeleeŋ kyaare boma ba naŋ maŋ de gɛrɛ ne zɔɔre ka ba na saaŋaaŋ ne vũũ: “Bozuŋ tammo zɔɔzɔɔrɔ zaa nɔɔteɛ naŋ yi a tammo gɔmɔ poɔŋ ane kparoo zaa naŋ meeli zĩĩ eŋɛŋ, ba na de aŋ nyugi, ka a leɛ boma vũũ naŋ na di.” (Aizeeya 9:5) Te daaŋ koŋ lɛ woŋ lɛ na a zɔɔzɔɔreba nɔɔteɛ naŋ maŋ gɔnɔ saŋa na ba naŋ wa yi zɔɔre waana na. Te daaŋ koŋ la nyɛ boma ba naŋ maŋ su gaaneŋ zɔɔre. Zɔɔre na baareŋ kpɛlɛŋkpɛlɛŋ!—Yieme 46:9.
Baabole Poɔ Yelsonne
ip-1 130 wɛl. 23-24
A Maaroŋ Nabie Ba Naŋ Eŋ Noɔre Ka O Na Waŋ Na
23 Kawaŋ-terɛ la neɛ naŋ maŋ korɔ o taaba kawane. Saŋa na Yezu naŋ wa be a teŋɛ zuŋ na, o da eɛ kawaŋ-terɛ naŋ soma yaga zaa. A Baabole yeleeŋ ka “a nembeɛoŋ nɔɛ zaaŋ da mãã ne sori na o naŋ da tu kyɛ wulo ba na.” (Matio 7:28) O eɛ kawaŋ-terɛ naŋ taa yɛŋ ane nyonono, a taa yɛlɛ muni wommo naŋ e zuluŋ ko nensaaleba. O ba maŋ kaa lɛ neɛ naŋ waa sɛre kyɛ ko o kawane. Gbɛɛ yaga, o da maŋ yi la nɔmmo poɔŋ kyɛ terɛ kawane. Yezu kawane na da maŋ somaŋ bonso yɛŋ da maŋ bebeŋ, aŋ tori kyɛ ka gbɛ-ŋmɛ zaa meŋ ba kye a eŋɛŋ. Ka neɛŋ tuuraa, o na nyɛ la nyɔvore naŋ ba taa baaraa.— Gyɔɔn 6:68.
24 Yezu naŋ e kawaŋ-terɛ naŋ soma na ba wuli ka o meŋɛ bammo la oŋ da maŋ de erɛ lɛ. Kyɛ o yeleeŋ ka: ‘A yɛlɛ N naŋ wulo ba waa N meŋɛ yɛlɛ, kyɛ a yi la a soba na naŋ toŋ ma zie.’ (Gyɔɔn 7:16) Aŋa lɛ aŋ da waa ko Soolomoŋ na, Jehoova Naaŋmen zie ka bammo na zaa Yezu naŋ taa na yi. (1 Namine 3:7-14; Matio 12:42) Wulwulbo ane kawaŋ-terebɛ naŋ be a lantaapuoruu poɔŋ na baŋ zannɛɛ yelkaŋa yi Yezu ewuli na poɔŋ, a maŋ de ba wuluu zaa yi neŋ Naaŋmen Yelbiri poɔŋ.—Yeng Yelbie 21:30.
DECEMBER 22-28
BAABOLE POƆ YELNIMIZEERE AIZEEYA 11-13
Bo Yɛlɛ Ka A Baabole Yelkyaare A Mɛzaaya?
ip-1 159 wɛl. 4-5
Te Na Nyɛ La Nyɔvore A Kyɛ Taa Popeɛloŋ A Mɛzaaya Naaloŋ Na Puliŋ
4 Yuomo mine sɛre ka Aizeeya saŋa na ta, Hiburu Baabole sɛgsɛgreba da yelee yɛlɛ kyaare a Mɛzaaya waa yɛlɛ, a Wedeɛrɛ o na ka Jehoova toŋ ka o wa Izerayɛl na. (Munpiilee 49:10; Duturoonomi 18:18; Yieme 118:22, 26) A tuuro Aizeeya zie, Jehoova da la de la duoro paale. Aizeeya da la sɛgɛɛŋ ka: “Da-nu kaŋa na buliŋ a yi Gyeesi teɛ na eŋɛŋ, ka bulii kaŋa buli yi o nyagaŋ a wɔŋ wɔmɔ.” (Aizeeya 11:1; De manne Yieme 132:11.) “Da-nu” ane “bulii” zaa wuleeŋ ka a Mɛzaaya na eɛ Gyeesi yaaŋaa a tu o bidɔɔ Deevid zie, o na la baŋ da sɔ naaloŋ kãã oŋ wa e Izerayɛl naa na. (1 Saamiuel 16:13; Jeremaiya 23:5; Yel-iriwulaa 22:16) Ka a Mɛzaaya meŋɛŋ wa wa a bon “bulii” na la lɛ, o na wɔŋ la wɔŋ-sonne.
5 A Mɛzaaya ba naŋ eŋ noɔre ka o na waŋ na la Yezu. Matio da de la Aizeeya yelbie na mine toŋ neŋ toma, ana yɛlɛ ŋa be la Aizeeya 11:1. O yeleeŋ ka ba boɔlɛɛ Yezu ka “Naazɛrɛ neɛ” a lɛ da vɛŋɛɛŋ ka Aizeeya yelbie nyɛ eebo. Naazɛrɛ teŋɛ la baŋ da guoli Yezu, azuŋ baŋ boɔloo ka Naazɛrɛ neɛ. A Hiburu yelbiri “bulii” naŋ be Aizeeya 11:1 neŋ a yuori Naazɛrɛ neɛ baŋ de toŋ neŋ toma na e la bonyeni.—Matio 2:23, Luka 2:39, 40.
ip-1 159 wɛl. 6
Te Na Nyɛ La Nyɔvore A Kyɛ Taa Popeɛloŋ A Mɛzaaya Naaloŋ Na Puliŋ
6 Neŋ bo tɔ na la a Mɛzaaya saŋa na oŋ na wa dire naaŋ na? O koŋ waa ŋa a Asiiriya na-faa na naŋ da e nimikuonii soba naŋ da sãã a Izerayɛl samun-gɔɔ seŋ ŋmenpuoredie na. Aizeeya da yeleeŋ kyaare a Mɛzaaya ka: “Jehoova vooroŋ na sigi wa la o zuŋ, yɛŋ ane yɛlɛ pare bammo vooroŋ, kawane ane kpeɛ̃o vooroŋ, bammo ane Jehoova zoobu vooroŋ. O na taaɛ popeɛloŋ Jehoova zoobu eŋɛŋ.” (Aizeeya 11:2, 3a) Naaloŋ kãã naŋ yi a donɛɛ ŋa zu naane baŋ de sɔ a Mɛzaaya, kyɛ Naaŋmen vooroŋ soŋ na da la. A yɛlɛ ŋa da eɛŋ Yezu suobu deebo zieŋ. Gyɔɔn a ŋmenkoɔ̃suoro da nyɛ la Naaŋmen vooroŋ soŋ na ka o sigre waana Yezu eŋɛŋ aŋa na-ŋmanee. (Luka 3:22) Jehoova vooroŋ soŋ na da wa ‘sigi la’ Yezu eŋɛŋ. Yezu yel-eree da wuleeŋ ka a yɛlɛ ŋa e la yelmeŋɛ saŋa na oŋ da erɛ yɛlɛ neŋ yɛŋ, yɛlɛ muni wommo, a terɛ kawaŋ-sonne kyɛ de bammo tonɔ neŋ toma na. Nyɛ gyog-sonne o naŋ taa seŋ lɛ!
ip-1 160 wɛl. 8
Te Na Nyɛ La Nyɔvore A Kyɛ Taa Popeɛloŋ A Mɛzaaya Naaloŋ Na Puliŋ
8 Bo la Jehoova zoobu? Ka wala ka Yezu da ewuli ka o zoree Jehoova? Zoobu na Yezu naŋ da zoro Naaŋmen na ba wuli ka o da zoree dabeɛ̃ ka Naaŋmen na e oŋ yelfaa kaŋa. Kyɛ a Mɛzaaya taa la gyeremɛ naŋ e zuluŋ aneŋ nɔmmo naŋ e kpoŋ ko Naaŋmen. Neɛ naŋ zoro Naaŋmen maŋ boɔrɔŋ ka wagre zaa o “erɛ yɛlɛ naŋ pɛlɛ o poɔ,” aŋa lɛ na Yezu naŋ erɛ na. (Gyɔɔn 8:29) A yi Yezu yelyaga ane o yel-eree poɔŋ, o da wuleeŋ ka yelzaa kyebe ana baŋ ko te popeɛloŋ a gaŋ teŋ na maŋ erɛ yɛlɛ a wuli ka te zoree Naaŋmen bebiri zaa.
ip-1 160 wɛl. 9
Te Na Nyɛ La Nyɔvore A Kyɛ Taa Popeɛloŋ A Mɛzaaya Naaloŋ Na Puliŋ
9 Aizeeya da yelee gyogri na mine a Mɛzaaya naŋ na taa na yɛlɛ: “O koŋ maŋ are yɛlɛ oŋ de o nimie nyɛrɛ eŋɛŋ kyɛ dire sɛrɛɛ, o koŋ maŋ are yɛlɛ oŋ de o tobo woŋ eŋɛŋ kyɛ ko noba kpããmo.” (Aizeeya 11:3b) Ka hooŋ na gaa ana sɛredi-zie ŋa tɔ ka ba na te di ho yɛlɛ sɛrɛɛ ho poɔ koŋ pɛle bee? A Mɛzaaya la nensaaleba zaa Sɛreŋmaara, o koŋ tere sori ka zirii, sɛredi-zie, yɛlɛ o naŋ woŋ bee bondaanboma bɛnloo. O nyɛrɛɛ zirii zaa noba naŋ ŋmaara, a kyɛ baŋ nensaaleba waaloŋ zaa, o baŋɛɛ “a sukyiri poɔ nensaal-sɔglaa na,” “a nensaal-sɔglaa.” (1 Piita 3:4) Yezu gyog-sonne na eɛ ewuli soŋ a ko noba na zaa naŋ maŋ nyɛ apoɔsori ka ba di sɛrɛɛ a lantaapuoruu poɔŋ.—1 Korinti 6:1-4.
ip-1 161 wɛl. 11
Te Na Nyɛ La Nyɔvore A Kyɛ Taa Popeɛloŋ A Mɛzaaya Naaloŋ Na Puliŋ
11 Saŋa na Yezu naŋ wa de kawane korɔ o potuuribo na, o da yelee a yɛlɛ lɛ aŋ na soŋ ba ka ba nyɛ tɔnɔ yi be. A lɛ e la gyog-soŋ aŋ seŋ ka lantaapuoruu nembɛrɛ zanne. Kyɛ, noba na zaa naŋ erɛ nimikuoŋ yɛlɛ na, Yezu na ko baŋ sɛrɛɛdiibu naŋ e kpeɛŋaa. Ka Naaŋmeneŋ wa ka o di a donɛɛ ŋa sɛrɛɛ, a Mɛzaaya na de la o noɔre daa na “ŋmɛ a tendaa,” o na di la neŋfaare sɛrɛɛ a sãã ba kpɛlɛŋkpɛlɛŋ. (Yieme 2:9; De manne Yel-iriwulaa 19:15.) Ka neŋfaareŋ ba wa kyebe a la dɔɔnɔ zie, nensaaleba na taa la emmaaroŋ. (Yieme 37:10, 11) Yezu nɔŋ la sontuubu ane yelmennoŋ, a kyɛ taa a kpeɛ̃o a na baŋ e a yɛlɛ ŋa zaa.—Yieme 45:3-7.
Baabole Poɔ Yelsonne
ip-1 165-166 wɛl. 16-18
Te Na Nyɛ La Nyɔvore A Kyɛ Taa Popeɛloŋ A Mɛzaaya Naaloŋ Na Puliŋ
16 Setaana da piili zɔɔrɔ neŋ la yelmeŋɛ puoruu a yi a Eedin gaadin poɔŋ. O da bɛnlɛɛ Adama ane Hawaa baŋ zagre Jehoova noɔre. Setaana naŋ ba bare, o nimiri naŋ moɔŋɛɛŋ oŋ mɔɔrɔ ka o tage noba yaga yi Naaŋmen zieŋ. Kyɛ Jehoova koŋ sage ka yelmeŋɛ puoruu bɔre a teŋɛ ŋa zuŋ, bonso o yuori naŋ na nyɛ pɛgebo poɔ la a yɛlɛ poɔŋ, ane meŋ o nɔŋ la noba na naŋ puoruu na. Azuŋ a tuuro Aizeeya eŋɛŋ o eŋ la noɔre ka: “A lɛ bebiri na Gyeesi nyagree na iri areŋ aŋa bon ba naŋ zɛge oŋ do saa a ko a noba. A paalonne noba na gaa la o zie a te bɔ sowuli, ka o pɛnnoo zie na leɛ gyeremɛ zie.” (Aizeeya 11:10) Yuoni 537 Y.W.P., Deevid da vɛŋɛɛŋ ka Gyɛruzɛlɛm wa leɛ a Izerayɛl teŋkpɛŋ, a lɛ ŋa da wuleeŋ ka aseŋ ka a Gyuumine naŋ be paaloŋ yobo na leɛ wa mɛ a ŋmenpuoredie.
17 Kyɛ yɛlɛ yaga naŋ be la a daŋyelbo poɔŋ. Aŋa lɛ te naŋ nyɛ na, o yelee a Mɛzaaya naaŋ diibu yɛlɛ, onaŋ na wa di naaŋ a donɛɛ zaa zu na. Bitontona Pɔɔl da yelee yɛlɛ na mine naŋ be Aizeeya 11:10, ka o de wuli ka noba naŋ da bebe o saŋa na meŋ na nyɛ la apoɔsori ka ba poɔ a Kristabiiri lantaapuoruu na poɔŋ. Aŋa lɛ a Septuagint naŋ wuli a sɛgre ŋa muni na, ‘Aizeeya da yeleeŋ ka: A Gyeesi bale neɛ na wa la, a soba na naŋ iri ka o di naaloŋ a Nemboore-yobo zu; o eŋɛŋ la ka a nemboore-yobo na taa teɛretɔroo.’ (Urom 15:12) Ane meŋ a daŋyelbo nyɛɛ eebo a wa tɔ zenɛ ŋa, a daŋyelbo wuleeŋ ka a paaloŋ noba na wulee nɔmmo ko Jehoova saŋa na baŋ de sommo korɔ a Mɛzaaya yɔɔmine ba naŋ sɔ naaloŋ kãã na.—Aizeeya 61:5-9; Matio 25:31-40.
18 Te zenɛ ŋa meŋ, a sɛgre ŋa nyɛɛ eebo, “a lɛ bebiri” na Aizeeya naŋ yele na da e la saŋa na baŋ da zegle a Mɛzaaya oŋ wa e Naaŋmen Naaloŋ na Naa yuoni 1914. (Luka 21:10; 2 Timoti 3:1-5; Yel-iriwulaa 12:10) A yi ana saŋa na waana, Yezu Krista piili sɛgrɛɛ yɛlɛ soŋ zaa, a na ko a siiloŋ poɔ Izerayɛl ane nemboore-yobo zaa naŋ be a donɛɛ zu naŋ boɔrɔ gɔmenante naŋ na baŋ waneŋ sontuubu. A Mɛzaaya de la sowuli tere a soŋ ka a naaloŋ duorisoŋ ta a donɛɛ lombori zaa aŋa o naŋ eŋ noɔre lɛ na. (Matio 24:14, Marko 13:10) A duorisoŋ taa la kpeɛ̃o yaga a sonnɔ noba yaga meŋ. “Nembeɛoŋ ka neɛzaa koŋ baŋ sɔre ba. Ba da yi la a tenne zaa poore” a sigri ba menne ko a Mɛzaaya a de ba menne mare bana na ba naŋ sɔ naaloŋ kãã naŋ be yelmeŋɛ puoruu poɔŋ na. (Yel-iriwulaa 7:9) Saŋa na noba yaga naŋ sagra a yelmeŋɛ a de ba menne wa mare noba na baŋ sɔ naaloŋ kãã, a maŋ de la gyeremɛ wa ko a Mɛzaaya “pɛnnoo zie,” ane Naaŋmen ŋmenpuoredi-kpoŋ na.—Aizeeya 56:7; Haagai 2:7.
DECEMBER 29–JANUARY 4
BAABOLE POƆ YELNIMIZEERE AIZEEYA 14-16
Jehoova Na Tagɛɛ O Puorebiiri Dɔndɔnne Tobo
ip-1 180 wɛl. 16
Jehoova Da Saaŋɛɛ Paaloŋ Kaŋa Naŋ Da Zɛgrɛ O Meŋɛ
16 A yɛlɛ ŋa da ba nyɛ eebo tɔntɔbaalɛ yuoni 539 S.Y.W poɔŋ. Kyɛ zenɛ ŋa meŋ gba, te nyɛɛ sieree naŋ wuli ka daŋyelbo na zaa yɛlɛ Aizeeya naŋ da yelkyaare Baabilɔŋ na da nyɛɛ eebo meŋɛmeŋɛ. Ŋaa ka Baabole gaŋ peɛrɛ kaŋa yeli: “A yi takoreŋ saŋa zaa a waana zenɛ, Baabilɔŋ e la teŋɛ naŋ sãã o zaa a gaŋ.” O da la de poɔ yɛŋ ka: “a ba maŋ e mɔlɔ ka te sage lɛ na Aizeeya neŋ Jeremaiya daŋyelbo na zaa naŋ nyɛ eebo na di.” A pɛlɛɛŋ meŋ ka neɛzaa kyebe Aizeeya saŋa na a da na baŋ yeli lɛ na Baabilɔŋ naŋ na nyɛ saammo. A ananso la ka, Aizeeya da sɛgɛɛ a yɛlɛ ŋa biŋ yuomo 200 sɛre kyɛ ka a Miidiya ane a Pɛɛsiya deme da wa ŋmɛ nyɔge Baabilɔŋ noba na! Yuomo mine puoriŋ ba da wa saamooŋ kpɛlɛŋkpɛlɛŋ. A yɛlɛ ŋa ba ennɛ te sagediibu faŋa a kyaare Naaŋmen Yelbiri na bee? (2 Timoti 3:16) Jehoova naŋ toɔ̃ paale daŋyelbo mine naŋ pare saŋa kaŋa na, a eŋɛɛ te sagediibu faŋa ka o na paalɛɛ a na naŋ kyɛre na wagre o meŋɛ naŋ biŋ poɔŋ.
ip-1 184 wɛl. 24
Jehoova Da Saaŋɛɛ Paaloŋ Kaŋa Naŋ Da Zɛgrɛ O Meŋɛ
24 A Baabole de la Deevid booree na manne neŋ ŋmarbie. (Soribo 24:17) A yi Deevid puoriŋ a “ŋmarbie” ŋa da di la naaŋ Zaayɔŋ Taŋa na zuŋ. Saŋa na Soolomoŋ naŋ da mɛ a ŋmenpuoredie baare na, ba da wa leɛ boɔlɛɛ a paaloŋ zaa Zaayɔŋ. A yi a Izerayɛl biiri Bege na poɔŋ, a da seŋ ka Izerayɛl dɔbɔ maŋ tu sori gaa a Zaayɔŋ taŋa na zu gbɛre bota yuoni zaa. Azuŋ be da wa leɛ la ba “lammo tankpoŋ.” Nebukadineezer da boɔrɔŋ ka o iri a Gyuu namine na zaa naŋ da be a taŋazuŋ na bare, a kyɛ da boɔrɔ ka o wuli ka o do la saa gaŋ a “ŋmarbie” zaa. O da ba de gyeremɛ korɔ Jehoova o naŋ zɔɔtoɔ̃ ba zuŋ, kyɛ o da leɛ de la o meŋɛ manna neŋ Jehoova.
ip-1 189 wɛl. 1
Jehoova Ko La A Paalonne Kawane
JEHOOVA na baŋ de la paalonne a dɛnne o noba ba toŋfaare zuŋ. Kyɛ ana zaa puoriŋ, o ba maŋ sage ka noba de nimikuonii, dɔgroŋ, zɛgemeŋɛ ane potuoloŋ pɔgrɔ o puorebiiri. O da vɛŋɛɛŋ ka Aizeeya daŋ sɛge “yeltegroŋ naŋ waana Baabilɔŋ eŋɛŋ” na biŋ. (Aizeeya 13:1) Baabilɔŋ yɛlɛ na da e la nendaarekaŋa yɛlɛ naŋ da na e. Aizeeya saŋa na, Asiiriya noba da dɔgrɛɛ Naaŋmen noba na yaga zaa. Asiiriya noba da sãã la a Izerayɛl samun-gɔɔ naaloŋ na ane Gyuuda kpoŋ zie. Kyɛ a Asiiriya dɔgroŋ na da wa la o baaroo. Aizeeya da sɛgɛɛŋ ka: ‘Bonzaa maala Jehoova pɔɛŋ a yeli: Peɛlaaŋ, lɛ na maŋ teɛre, lɛŋ na e. Lɛ na maŋ e siri ka N e, lɛŋ na are. N na saaŋɛɛ a Asiiriya neɛ N paalooŋ. N na tiginooŋ teŋɛŋ N taŋbɛrɛ zuriŋ. Beŋ la ka o yoki na yi ba eŋɛŋ, ka o tuo-tegrɛ yi ba bagebieŋ.’ (Aizeeya 14:24, 25) Aizeeya naŋ yeli a daŋyelbo yelbie ŋa na, a ba kɔɔre kyɛ baŋ da iri a Asiiriya dɔgroŋ baŋ da dɔgrɔ a Gyuu noba na bare.
ip-1 194 wɛl. 12
Jehoova Ko La A Paalonne Kawane
12 Bo saŋa ka a daŋyelbo ŋa na nyɛ eebo? A koŋ kɔɔre. ‘Yɛlɛ na Jehoova naŋ yeli aŋa Mooab yɛlɛ a yi ana wagre naŋ la lɛ. Kyɛ pampana Jehoova yelee yɛlɛ a yeli: Yuomo ata poɔŋ, aŋa dɔɔ ba naŋ de libie ha naŋ maŋ teɛre o yuomo lɛ na, ba na de la Mooab fɔɔ aneŋ o neŋyaga yaga na zaa. Bana na naŋ kyɛre na eɛ fẽẽ a koŋ taa faŋa.’ (Aizeeya 16:13, 14) Aŋa lɛ a sɛgre ŋa naŋ wuli na, sieree bebeŋ a wuli ka a yi yuoni 700 te ta yuoni 800 S.Y.W. kpakyagaŋ, a Mooab noba na da tuoree dɔgroŋ naŋ e kpeɛŋaa ka lɛ vɛŋ ka ba noɔre da ŋmaa sigi. Tiglath-pileser III da yeleeŋ ka Salamanu naŋ yi Mooab meŋ poɔ la a zukaareba na naŋ maŋ yɔɔrɔ zu-yɔɔ a koroo na. Senaakerib da maŋ de la zu-yɔɔ a yi Kammusunadbi naŋ e Mooab naa zie. Asiiriya paaloŋ kaara Esar-haddon ane Ashurbanipal da yeleeŋ ka a Mooab Namine Musuri ane Kamashaltu be la ba puliŋ. Yoŋ tuuri yaga naŋ wa pare, a Mooab noba da ba lɛ kyebe. Noba da teɛre ka ba na baŋ peɛre nyɛ la yɛlɛ mine naŋ kyaare ba, kyɛ yɛlɛ fẽẽ lɛ yoŋ baŋ da nyɛ kyaare a noba ŋa naŋ da e a Izerayɛl biiri dɔndɔnne na.
Baabole Poɔ Yelsonne
w06 12/1 10 wɛl. 11
Yelnimizeere Mine Naŋ Be Aizeeya Gane Na Poɔŋ—I
14:1, 2—Sobuo ka Jehoova noba da “ŋmɛnyɔgere bana na naŋ daaŋ ŋmɛnyɔge ba na” baŋ wa leɛ “taa naaŋkpeɛ̃o bana na naŋ da dɔgrɔ ba na eŋɛŋ.”? A yɛlɛ ŋa da nyɛɛ eebo Daaniel saŋa na. O da wa taa la arezi-kpoŋ Baabilɔŋ poɔŋ saŋa na a Miidiya ne a Pɛɛsiya deme naŋ da wa dire naaŋ na; Eesiter, meŋ da wa e la Pɛɛsiya napɔge; ka Mɔɔdekai meŋ da wa e paaloŋ kaara Pɛɛsiya poɔŋ.