-
Bo La Naaŋmen Naaloŋ Na?Nyɛ Zeŋ Laafeɛ Tegitegilɛ!—Lɛ A Baabole Zannoo Naŋ Na Toɔ̃ Soŋ Bo
-
-
ZANNOO 31
Bo La Naaŋmen Naaloŋ Na?
Naaŋmen Naaloŋ na la yɛlɛ naŋ e nimizeɛ yaga zaa a be a Baabole poɔŋ. Jehoova na tu la o Naaloŋ na eŋɛŋ kyɛ vɛŋ ka a teŋgane zaa leɛ Paradiisi. Bo la Naaŋmen Naaloŋ na? Wala teŋ e baŋ ka a Naaloŋ diree naaŋ pampana ŋa? Bo yɛlɛ ka a Naaloŋ toɔ̃ e? Bo yɛlɛ ka a Naaloŋ na e nendaare kaŋa? Te na nyɛɛ a soorebie ŋa nɔɛ iribo a zannoo ŋa ane a zannoo ayi naŋ tɔnne na poɔŋ.
1. Bo la Naaŋmen Naaloŋ na, nembuo la a Naa?
Naaŋmen Naaloŋ na e la gɔmenante Jehoova Naaŋmen naŋ sɛgre biŋ sazuŋ. Yezu Krista la a Naa. (Matio 4:17; Gyɔɔn 18:36) A Baabole yeleeŋ a kyaare Yezu ka: “O na di la naaloŋ . . . tegitegilɛ.” (Luka 1:32, 33) Yezu la Naaŋmen Naaloŋ na Naa, azuŋ o na di la naaloŋ a kaara neɛzaa naŋ be a teŋɛzuŋ.
2. Aŋ mine neŋ Yezuŋ na di a naaloŋ?
Yezu yoŋ naaneŋ na di a naaloŋ. Noba naŋ yi “bale zaa poɔ ane kɔkɔɛ zaa poɔ ane nemboorɔ zaa poɔ ane tenne zaa . . . na di la naaloŋ a [kaara a] teŋɛzu.” (Yel-iriwulaa 5:9, 10) Noba bawala ka ba neŋ Yezu na di a naaloŋ? A yi saŋa na Yezu naŋ wa a teŋɛzu kyɛ na, Kristabiiri turituri yaga wa leɛ la o potuuribo. Kyɛ, noba 144,000 yoŋ la na gaa sazu ka ba neŋ Yezu te di naaloŋ. (Kanne Yel-iriwulaa 14:1-4.) Yezu neŋ a noba 144,000 na di la naaloŋ a kaara Kristabiiri zaa naŋ be a teŋɛzuŋ.—Yieme 37:29.
3. Sobuo ka Naaŋmen Naaloŋ na soma yaga a gaŋ nensaaleba naaloŋ?
Nensaaleba namine maŋ mɔɔrɛɛ ba mɔɔbo zaa ka ba erɛ yɛlɛ naŋ soma, kyɛ ba ba maŋ taa a kpeɛ̃o ka ba e yelzaa ba naŋ boɔrɔ ka ba e na. A baaraa zaa ba maŋ iri baŋ bare, a kyɛ leɛ iri neŋyobo a de a naaloŋ ko ba. Saŋa kaŋa a noba ŋa baŋ maŋ leɛ iri ŋa maŋ boɔrɛɛ ba yoŋ tɛgɛ boma, azuŋ ba ba maŋ boɔrɔ ka ba sonnɔ a noba. Kyɛ, Yezu naŋ e Naaŋmen Naaloŋ Naa na yɛŋ, neɛzaa koŋ deɛ a Naaloŋ yi o nuureŋ. Bonso Naaŋmen “biŋ la naaloŋ naŋ daaŋ koŋ sãã zaa.” (Daaniel 2:44) Yezu na di la naaloŋ a kaara neɛzaa naŋ be a teŋɛzuŋ, o na taa la nɔmmo ko neɛzaa meŋ. Yezu taa la nɔmmo, a e nimimaaroŋ soba, a nɔŋ dantorii meŋ. Azuŋ, Yezu na wulee noba ka ba meŋ wulo taa nɔmmo, nimimaaroŋ ane dantorii.—Kanne Aizeeya 11:9.
ZANNE YƐLƐ YAGA POƆ
Ho na zanne nyɛɛ bon naŋso ka Naaŋmen Naaloŋ na soma yaga zaa a gaŋ nensaaleba naaloŋ.
4. Naaŋmen Naaloŋ na taaɛ kpeɛ̃o yaga zaa a na kaara neɛzaa naŋ be a teŋɛzuŋ
Nensaaleba namine zaa naŋ daŋ zeŋ a teŋɛ ŋa zuŋ, Yezu la taa kpeɛ̃o a gaŋ ba zaa. Kanne Matio 28:18, a kyɛ gyieli a soorebiri ŋa yɛlɛ:
Bonso teŋ na baŋ yelka, Yezu taaɛ kpeɛ̃o yaga zaa a gaŋ nensaaleba namine?
Nensaaleba naaloŋ yɛŋ, neɛ kaŋa maŋ diree a naaloŋ zenɛ ŋa, kyɛ a ba maŋ kɔɔre kyɛ baŋ iri o soba bare a naaloŋ poɔŋ, ba kaŋa zaa meŋ daŋ ba di naaloŋ a kaara a teŋɛzu zaa. Ka Naaŋmen Naaloŋ na meŋ? Kanne Daaniel 7:14, a kyɛ gyieli a soorebie naŋ tu na yɛlɛ:
A Baabole yelka, ba daŋ “koŋ sãã” Naaŋmen Naaloŋ na zaa. Bonso ka a yɛlɛ ŋa soma yaga zaa?
Bonso aŋ na soma yaga zaa ka Naaŋmen Naaloŋ na dire naaŋ a kaara a teŋɛzu zaa?
5. Naaŋmen Naaloŋ na na iree nensaaleba namine zaa bare
Bonso aŋ seŋ ka Naaŋmen Naaloŋ iri nensaaleba naaloŋ zaa bare? Ŋmɛ a VIDIO, a kyɛ gyieli a soorebiri ŋa yɛlɛ.
Bo yɛlɛ ka nensaaleba naaloŋ diibu waaneŋ?
Kanne Ikilisiasitiz 8:9, a kyɛ gyieli a soorebie ŋa yɛlɛ:
Ho teɛre ka a somaŋ ka Naaŋmen Naaloŋ na iri nensaaleba naaloŋ zaa bare bee? Bonso hoŋ yel lɛ?
6. Naaŋmen Naaloŋ na taa la namine naŋ taa yɛlɛ muni wommo ko te
Saŋa na te Naa Yezu naŋ da wa a teŋɛzu kyɛ na, o da e la nensaalaa aŋa tenee. Azuŋ, o na “toɔ̃ moore ko [teŋ] a te bambaaloŋ poɔ.” (Hiburu 4:15) A dɔbɔ ane pɔgeba 144,000 na Jehoova naŋ kaa iri ka ba neŋ Yezu di naaloŋ na meŋ e la noba “naŋ yi a bale zaa poɔ ane kɔkɔɛ zaa poɔ ane nemboorɔ zaa poɔ ane tenne zaa poore.”—Yel-iriwulaa 5:9.
Yezu ane noba naŋ na poɔ o eŋɛŋ ka ba di a naaloŋ na zaa daŋ e la nensaaleba. Ho teɛre ka a yɛlɛ ŋa diiree sukyiri bee? Bonso hoŋ yel lɛ?
Jehoova kaa iree dɔbɔ ane pɔgeba naŋ yi a donɛɛ lombori zaa ka ba te poɔ Yezu eŋɛŋ ka ba ne o di naaloŋ
7. Naaŋmen Naaloŋ na taa la bege naŋ soma yaga zaa
Gɔmenantere naŋ maŋ boɔrɔ ka ba soŋ ba noba a kyɛ go ba na zuŋ, ba maŋ biŋee bege a ko ba. Naaŋmen Naaloŋ na meŋ taaɛ bege. Aseŋ ka a Naaloŋ biiri zaa tuuro a bege ŋa. Kanne 1 Korinti 6:9-11, a kyɛ gyieli a soorebie naŋ tu na yɛlɛ:
Ka neɛzaaŋ de Naaŋmen Naaloŋ bege na tonɔ neŋ toma, ho teɛre ka wala ka a donɛɛ ŋa na waa?a
Jehoova kaarɛɛ soriŋ ka neɛzaa naŋ be a Naaloŋ puliŋ tuuro a Naaloŋ bege. Ho teɛre ka lɛ seŋ nɛɛŋ bee? Bonso hoŋ yel lɛ?
Bo siereeŋ bebe a wuli ka noba naŋ da ba tuuro a bege ŋa na toɔ̃ leɛrɛɛ ba eebo?—Kaa o wɛlbo 11.
Gɔmenantere naŋ maŋ boɔrɔ ka ba soŋ ba paaloŋ noba na a kyɛ lɛ go ba na zuŋ, ba maŋ biŋee bege a ko ba. Naaŋmen Naaloŋ na taaɛ bege naŋ soma yaga zaa a gaŋ nensaaleba bege. Naaŋmen Naaloŋ bege na maŋ sonnɔŋ, a kyɛ maŋ lɛ go neɛzaa naŋ be a Naaloŋ puliŋ meŋ
AMINEKAŊAŊ NEƐ KAŊA NA SOOREŊ KA: “Bo la Naaŋmen Naaloŋ na?”
Wala hoŋ na iri a noɔre ko o soba?
A ZANNOO YELNIMIZEERE
Naaŋmen Naaloŋ na e la gɔmenante naŋ bebe meŋɛmeŋɛ. A Naaloŋ na be la sazuŋ, a kyɛ kaara neɛzaa naŋ be a teŋɛzuŋ.
Bo Hoŋ Zanne
Aŋ mine la Naaŋmen Naaloŋ na namine?
Sobuo ka Naaŋmen Naaloŋ na soma yaga zaa a gaŋ nensaaleba naaloŋ?
Bo yɛlɛ mine la ka Jehoova kaara soriŋ ka noba naŋ boɔrɔ ka ba be a Naaloŋ puliŋ na erɛ?
YƐLƐ MINE NAŊ LƐ BEBE
Kanne a nyɛ yɛlɛ na Yezu naŋ yel a kyaare zie na Naaŋmen Naaloŋ na naŋ na be.
“Ho Sukyiriŋ Ka Naaŋmen Naaloŋ Na Be Bee?” (Intanɛt zu gane)
Jehoova Sieree Deme maŋ diree yelmennoŋ a korɔ Naaŋmen Naaloŋ na a gaŋ baŋ na dire yelmennoŋ a korɔ nensaaleba naaloŋ. Bonso baŋ maŋ e lɛ? Kaa a vidio ŋa a nyɛ a noɔre iribo.
Kanne a intanɛt zu gane ŋa a nyɛ lɛ na a Baabole naŋ yel a kyaare a noba 144,000 na Jehoova naŋ kaa iri ka ba te poɔ Yezu eŋɛŋ ka ba di naaloŋ na.
Ba da nyɔgɛɛ pɔge kaŋa te eŋ nempɔgedieŋ. Kanne a nyɛ boŋ naŋ somoo oŋ wa nyɛ ka Naaŋmen yoŋ la na baŋ waaneŋ dantorii a teŋɛzuŋ.
“N Wa Baŋɛɛ Neɛ Naŋ Na Toɔ̃ Waaneŋ Dantorii A Teŋɛzuŋ” (Awake!, November 2011)
-
-
Naaŋmen Naaloŋ Na Piili Diree Naaŋ Pampana!Nyɛ Zeŋ Laafeɛ Tegitegilɛ!—Lɛ A Baabole Zannoo Naŋ Na Toɔ̃ Soŋ Bo
-
-
ZANNOO 32
Naaŋmen Naaloŋ Na Piili Diree Naaŋ Pampana!
Yuoni 1914 ka Naaŋmen Naaloŋ na piili dire naaŋ. Ana saŋa na la ka nensaaleba naaloŋ diibu na kpɛ a bebibaaree poɔ. Wala teŋ e baŋ lɛ? A yi yuoni 1914 a waana, yɛlɛ na zaa a Baabole naŋ yelka a na erɛŋ, ane gyogri na zaa a Baabole naŋ yelka noba na taaŋ a bebibaaree saŋa na zaaŋ da piili nyɛrɛ eebo. Yɛ vɛŋ ka te nyɛ lɛ a Baabole naŋ yel.
1. Baabole daŋyelbo buo soba la wuli ka Naaŋmen Naaloŋ na piili diree naaŋ yuoni 1914?
A Daaniel gane na wuli teŋ ka Naaŋmen Naaloŋ na na piili diree naaŋ saŋa na “wagre ayɔpoi” mine naŋ na wa pare gaa. (Daaniel 4:16, 17) Daaniel naŋ sɛge a yɛlɛ ŋa yuomo yaga puoreŋ, Yezu da wa la a teŋɛzu, o da yelee a wagre ayɔpoi ŋa yɛlɛ. O da yeleeŋ ka a wagre ayɔpoi ŋa la “saŋa na a nemboore-yobo naaloŋ naŋ na baare.” Yezu da lɛ yeleeŋ ka ana wagre na da naŋ ba baare o saŋa naŋ. (Luka 21:24) A zannoo ŋa na soŋ teŋ ka te nyɛ ka a wagre ayɔpoi ŋa baarɛɛ yuoni 1914 poɔŋ.
2. Bo yɛlɛŋ da piili erɛ a donɛɛ poɔŋ yuoni 1914, ka bo gyogri ka noba meŋ da taa?
Yezu potuuribo da soorooŋ ka: “Boŋ la na wuli ka a ho leɛ-waabo ane a teŋɛ baaroo saŋa taɛ la?” (Matio 24:3) Yezu da wuli baŋ yɛlɛ naŋ na erɛ a donɛɛ zuŋ saŋa na oŋ na wa e Naa a piili dire Naaloŋ na. A yɛlɛ na mine oŋ da yelka a na erɛŋ la zɔɔre, kɔŋkpoŋ, ane teŋ-gbire. (Kanne Matio 24:7.) A Baabole lɛ wulee gyogri noba naŋ na taa “a bebibaaree” saŋa. A Baabole yeleeŋ ka “zie na e la kpeɛŋaa yaga.” (2 Timoti 3:1-5) A piili yuoni 1914 ka noba taa a gyogri ŋa, ka a yɛlɛ ŋa zaa meŋ piili nyɛrɛ eebo yaga zaa.
3. Bonso ka yelfaare erɛ yaga zaa a donɛɛ zuŋ saŋa na Naaŋmen Naaloŋ naŋ piili dire naaŋ na?
Saŋa na Yezu naŋ wa e Naaŋmen Naaloŋ Naa na, a ba kɔɔre kyɛ ka o neŋ Setaana neŋ o malekefaare na zɔɔ taa sazuŋ. Yezu da zɔɔtoɔ̃ la Setaana. A Baabole yelka, “ba da lɔɔ la [Setaana] bare ka o sigi wa a teŋɛzu, a lɔɔ a o malekere meŋ poɔ o eŋɛ.” (Yel-iriwulaa 12:9, 10, 12) Setaana naŋ baŋ ka ba na sãã o la bare na zuŋ, o suuri ireeŋ yaga zaa. Azuŋ ka Setaana vɛŋ ka dɔgɛɛ ane woore be a donɛɛ zuŋ lɛ. A yɛlɛ ŋa soŋ teŋ teŋ baŋ bon naŋso ka yelfaare paale a donɛɛ zu zaa lɛ! Naaŋmen Naaloŋ na na iree a yelfaare ŋa zaa bare.
ZANNE YƐLƐ YAGA POƆ
Ho na zanne nyɛɛ sieree naŋ wuli ka Naaŋmen Naaloŋ na piili diree naaŋ yuoni 1914, a kyɛ lɛ zanne nyɛ bon na a yɛlɛ ŋa naŋ wulo te.
4. A Baabole soŋ teŋ teŋ sɔre yuomo mine a nyɛ ka Naaŋmen Naaloŋ na piili diree naaŋ yuoni 1914
Naaŋmen da vɛŋɛɛŋ ka Nebukadineezer naŋ da e takoreŋ saŋa Baabilɔŋ teŋɛ na Naa da gaŋ-zanne a nyɛ yɛlɛ naŋ na e nendaare kaŋa. Daaniel da wuleeŋ ka a gaŋ-zannoo da kyaarɛɛ yɛlɛ ayi mine. O da yelka a gaŋ-zannoo kyaarɛɛ Nebukadineezer naaloŋ na ane Naaŋmen Naaloŋ na.—Kanne Daaniel 4:17.a
Kanne Daaniel 4:20-26, a kyɛ pãã de yɛlɛ naŋ be a daga poɔŋ na iri a soorebie ŋa nɔɛ:
(A) Bo ka Nebukadineezer da nyɛ o gaŋ-zannoo na poɔŋ?—Kaa o wɛlbo 20 ane 21.
(B) Wala baŋ da e a teɛ?—Kaa o wɛlbo 23.
(D) Ka a “wagre ayɔpoi” naŋ wa baare, bo yɛlɛŋ na e?—Kaa o wɛlbo 26.
Sobuo Ka A Teɛ Na Nebukadineezer Naŋ Nyɛ Na Neŋ Naaŋmen Naaloŋ Na Yɛlɛ Kyaare Taa
A DAŊYELBO (Daaniel 4:20-36)
Naaloŋ
(A) Teɛ naŋ e wogi yaga zaa
Ba da ŋmaa la a naaloŋ diibu bare
(B) “Ŋmaa a teɛ lɔɔ,” ane meŋ vɛŋ ka “wagre ayɔpoi wa paroo”
A naaloŋ na leɛ wa bebeŋ
(D) “Ba na leɛ de la a naaloŋ leɛ ko bo”
A dɛndɛŋ saŋa a daŋyelbo naŋ nyɛ eebo na, . . .
(E) Nembuo ka a teɛ da are ko?—Kaa o wɛlbo 22.
(Ɛ) Sobuo baŋ da tu kyɛ ŋmaa o naaloŋ na bare?—Kanne Daaniel 4:29-33.
(F) Saŋa na a “wagre ayɔpoi” naŋ wa baare na, bo yɛlɛŋ da pɔge Nebukadineezer?—Kanne Daaniel 4:34-36.
A DƐNDƐŊ SAŊA A DAŊYELBO NAŊ NYƐ EEBO
Naaloŋ
(E) Baabilɔŋ Naa Nebukadineezer
Ba da ŋmaa la a naaloŋ diibu bare
(Ɛ) Yuoni 606 B.C.E. puoreŋ, Nebukadineezer da leɛ la yɛŋ-yaa, azuŋ o da ba toɔ̃ lɛ di o naaloŋ na yuomo ayɔpoi
A naaloŋ na leɛ wa bebeŋ
(F) Nebukadineezer da ba lɛ e yɛŋ-yaa, azuŋ o da leɛ piili diree o naaloŋ na
A yiiloŋ saŋa a daŋyelbo naŋ nyɛ eebo na, . . .
(G) Aŋ mine ka a teɛ da are ko?—Kanne 1 Tungkori 29:23.
(H) Sobuo baŋ da tu kyɛ ŋmaa ba naaloŋ na bare? Wala teŋ e baŋ ka saŋa na Yezu naŋ da be a teŋɛzuŋ na, a noba ŋa da naŋ ba leɛ piili ba naaŋ diibu na?—Kanne Luka 21:24.
(I) Bo saŋa ka a naaloŋ da leɛ wa bebe, yeŋ ka a naaloŋ da leɛ be?
A YIILOŊ SAŊA A DAŊYELBO NAŊ NYƐ EEBO
Naaloŋ
(G) A Izerayɛl namine na da maŋ arɛɛ Naaŋmen gbɛbɔgriŋ kyɛ dire ba naaloŋ na
Ba da ŋmaa la a naaloŋ diibu bare
(H) Saŋa na baŋ wa sãã Gyɛruzɛlɛm na, Izerayɛl naa zaa da ba lɛ are Jehoova gbɛbɔgriŋ kyɛ dire naaloŋ yuomo 2,520
A naaloŋ na leɛ wa bebeŋ
(I) Yezu wa eɛ Naaŋmen Naaloŋ na Naa. O be la sazuŋ kyɛ dire o naaloŋ na
Wala ka a wagre ayɔpoi na kɔɔre seŋ?
Ka hooŋ kanne a Baabole lombori zie kaŋa a ba woŋ a muni soŋ, a Baabole lombozaala kaŋa na toɔ̃ soŋ boŋ ka ho woŋ ana sɛgre na muni. Aŋa mannoo poɔŋ, a Yel-iriwulaa gane yeleeŋ ka wagre ata neŋ kyɛlee are ko la bebie 1,260. (Yel-iriwulaa 12:6, 14) Azuŋ, wagre ayɔpoi na e la bebie 2,520. Ka hooŋ kaa a Baabole poɔŋ, saŋa kaŋa bebiri bonyeni maŋ are ko la yuoni gbuli. (Iziikiel 4:6) Lɛ ka yɛlɛ waa a Daaniel daŋyelbo ŋa poɔŋ, a wagre ayɔpoi na are ko la yuomo 2,520.
5. Ayi yuoni 1914 a waana zenɛ, a donɛɛ leɛrɛɛŋ yaga zaa
Yezu da yelee yɛlɛ naŋ na erɛ a donɛɛ poɔŋ saŋa na oŋ na wa e Naa a piili dire naaŋ sazuŋ na. Kanne Luka 21:9-11, a kyɛ gyieli a soorebiri naŋ tu na yɛlɛ:
A yɛlɛ ŋa a bobo la hoŋ de ho nimie nyɛ bee a woŋ a yɛlɛ?
Bitontona Pɔɔl da wulee gyogri noba naŋ na taa nensaaleba naaloŋ diibu baaraa saŋa. Kanne 2 Timoti 3:1-5, a kyɛ gyieli a soorebiri naŋ tu na yɛlɛ:
Ho nyɛɛ noba naŋ taa a gyogri ŋa zenɛ ŋa bee?
6. E yelkaŋa a wuli ka ho sereŋ sagedieŋ ka Naaŋmen Naaloŋ na diree naaŋ
Kanne Matio 24:3, 14, a kyɛ gyieli a soorebie ŋa yɛlɛ:
Bo toŋ nimizeɛ la wuli ka Naaŋmen Naaloŋ na diree naaŋ pampana ŋa?
Wala hoŋ meŋ na toɔ̃ e a de ho meŋɛ poɔ a toma tommo poɔŋ?
Naaŋmen Naaloŋ na diree naaŋ pampana, a koŋ kɔɔre a Naaloŋ na diree naaŋ a kaara a teŋɛzu zaa. Kanne Hiburu 10:24, 25, a kyɛ gyieli a soorebiri ŋa yɛlɛ:
Saŋa na teŋ “nyɛ ka a Daana waabo bebiri” taraŋ na, bo yɛlɛ aŋ seŋ ka te e?
Ka hooŋ baŋ yelkaŋa naŋ na toɔ̃ soŋ noba, bee a soŋ ba ka ba nyɛ nyɔvore, wala aŋ seŋ ka ho e?
AMINEKAŊAŊ NEƐ KAŊA NA SOOREŊ KA: “Bonso ka Jehoova Sieree Deme maŋ yelka 1914 e la yuoni naŋ e tegroŋ yaga zaa?”
Wala hoŋ na iri a noɔre ko o soba?
A ZANNOO YELNIMIZEERE
A Baabole daŋyelbo, ane lɛ a Baabole naŋ soŋ te teŋ sɔre yuomo mine na, ane yɛlɛ naŋ erɛ a donɛɛ zuŋ wuleeŋ ka Naaŋmen Naaloŋ piili diree naaŋ. Ka teneeŋ moɔ̃ nimiri moɔlɔ a Naaloŋ duorisoŋ, a kyɛ gɛrɛ a lammore meŋ zaa, lɛ na wuliŋ ka te sagedieŋ ka a Naaloŋ sereŋ diree naaŋ pampana.
Bo Hoŋ Zanne
Daaniel gane na yelee wagre ayɔpoi kaŋa yɛlɛ. Bo yɛlɛŋ da e saŋa na a wagre ayɔpoi naŋ wa baare na?
Boŋ vɛŋ hoŋ sagedi peɛlaaŋ ka Naaŋmen Naaloŋ na piili diree naaŋ yuoni 1914?
Wala hoŋ na baŋ e a wuli ka ho sereŋ sagedieŋ ka a Naaloŋ diree naaŋ pampana?
YƐLƐ MINE NAŊ LƐ BEBE
Noba naŋ sɛgrɛ takoreŋ yɛlɛ ane noba mine yeleeŋ ka, a piili yuoni 1914 a waana zenɛ a donɛɛ leɛrɛɛŋ yaga zaa. Kanne a nyɛ yɛlɛ na baŋ yel.
“Bo Saŋa Ka Noba Gyogri Maaleŋ Sãã Yaga Zaa?” (Awake!, April 2007)
Kanne nyɛ lɛ daŋyelbo naŋ be Matio 24:14 naŋ da toɔ̃ soŋ dɔɔ kaŋa o zemmo poɔŋ.
“N Da Nɔŋ La Baseball Ŋmeɛbo A Gaŋ Yelzaa!” (A Watchtower No. 3 2017)
Wala teŋ e baŋ ka daŋyelbo naŋ be Daaniel zuri 4 na kyaarɛɛ Naaŋmen Naaloŋ na?
“Bo Saŋa Ka Naaŋmen Naaloŋ Na Piili Dire Naaŋ? (Kyɛlee 1)” (A Watchtower, October 1, 2014)
Bo siereeŋ bebe a wuli ka a “wagre ayɔpoi” na Daaniel zuri 4 naŋ yel o yɛlɛ na baarɛɛ yuoni 1914?
“Bo Saŋa Ka Naaŋmen Naaloŋ Na Piili Dire Naaŋ? (Kyɛlee 2)” (A Watchtower, November 1, 2014)
a Kanne a Watchtower ayi naŋ be a Yɛlɛ Mine Naŋ Lɛ Bebe zie naŋ be a zannoo ŋa poɔŋ na, a zanne yɛlɛ yaga a kyaare a yɛlɛ ŋa.
-
-
Bo Yɛlɛ Ka Naaŋmen Naaloŋ Na Na E?Nyɛ Zeŋ Laafeɛ Tegitegilɛ!—Lɛ A Baabole Zannoo Naŋ Na Toɔ̃ Soŋ Bo
-
-
ZANNOO 33
Bo Yɛlɛ Ka Naaŋmen Naaloŋ Na Na E?
Naaŋmen Naaloŋ na piili diree naaŋ. A koŋ kɔɔre, a Naaloŋ na leɛrɛɛ yɛlɛ a teŋɛzuŋ. Yelsonne na a Naaloŋ naŋ na waaneŋ na yɛlɛ teŋ waana ka te zanne a zannoo ŋa poɔŋ.
1. Wala ka Naaŋmen Naaloŋ na na e a vɛŋ ka emmaaroŋ ane dantorii be a teŋɛzuŋ?
Yezu la Naaŋmen Naaloŋ na Naa, azuŋ, o na sãã la neŋfaare zaa ane gɔmenantere zaa Hammagedon zɔɔre na saŋa. (Yel-iriwulaa 16:14, 16) Ana saŋa na a Baabole sɛgre ŋa na nyɛɛ eebo: “A koŋ kɔɔre kyɛ ka neŋfaa koŋ la bebe.” (Yieme 37:10) Yezu na tu la a Naaloŋ eŋɛŋ a kyɛ vɛŋ ka emmaaroŋ ane dantorii be a teŋɛzu zaa.—Kanne Aizeeya 11:4.
2. Ka Naaŋmen boɔboŋ wa nyɛrɛ eebo a teŋɛzuŋ, wala ka zemmo na waa?
Ka Naaŋmen Naaloŋ naŋ wa dire naaŋ a kaara a teŋɛzu, “sontuuribo na di la a paaloŋ kyɛŋ, a kpeɛrɛ be wagre zaa.” (Yieme 37:29) Hooŋ teɛre a yɛlɛ ŋa nyɛ, teɛre ka ho be la donɛɛ kaŋa poɔŋ ka neɛzaa erɛ yɛlɛ naŋ soma, ka neɛzaa nɔŋ Jehoova a kyɛ lɛ taa nɔmmo ko taa meŋ! Neɛzaa koŋ beɛrɛ, neɛzaa na zeŋ la a teŋɛzu kyɛ tegitegilɛ.
3. Ka Naaŋmen Naaloŋ naŋ wa sãã neŋfaare zaa baare, bo ka a Naaloŋ na lɛ e?
Ka Yezuŋ wa sãã a neŋfaare zaa baare, o na di la Naaloŋ yuomo 1,000. A yuoŋ turi saŋa na, Yezu neŋ a noba 144,000 na soŋɛɛ nensaaleba naŋ be a teŋɛzuŋ ka ba wa e noba naŋ na pɛgi ba menne yi faaloŋ zaa poɔŋ. Ka a yuoŋ turiŋ wa baare, a teŋɛzu zaa na leɛ la paradiisi naŋ veɛlɛ yaga zaa. Neɛzaa na taaɛ popeɛloŋ, bonso ba zaa na tuuree Jehoova bege na. A lɛ puoreŋ, Yezu na leɛ de la a naaloŋ ko o Saa Jehoova. Ana saŋa na, Jehoova “yuori [na] pɛgiyiŋ” yaga zaa. (Matio 6:9, 10) Neɛzaa na wa nyɛŋ ka, Jehoova e la Naa naŋ soma yaga, a maŋ teɛrɛ o puorebiiri meŋ yɛlɛ. Jehoova pãã na sãã la Setaana, o malekefaare na, ane neɛzaa naŋ zagre ka ba sigri ba menne ko O naaloŋ na. (Yel-iriwulaa 20:7-10) Maaloo na zaa Naaŋmen Naaloŋ naŋ na waaneŋ na na bebeŋ tegitegilɛ.
ZANNE YƐLƐ YAGA POƆ
Ho na zanne nyɛɛ bon naŋso hoŋ na baŋ sagedi peɛlaaŋ ka Naaŋmen na tu la o Naaloŋ na eŋɛŋ a kyɛ vɛŋ ka nɔɛ zaa o naŋ eŋ a kyaare te nendaare kaŋa yɛlɛ nyɛ eebo.
4. Naaŋmen Naaloŋ na sãã la nensaaleba gɔmenantere ŋa zaa
A Baabole yeleeŋ ka: “Neɛ maŋ di la neŋbɛree o tɔ eŋɛŋ a emoo dɔgɛɛ.” (Ikilisiasitiz 8:9) Jehoova na tu la o Naaloŋ na eŋɛŋ a kyɛ iri a daŋkyagre ŋa zaa bare.
Kanne Daaniel 2:44 ane 2 Tɛsalonika 1:6-8, a kyɛ gyieli a soorebie naŋ tu na yɛlɛ:
Wala ka Jehoova ane o Bidɔɔ Yezu na e nensaaleba gɔmenantere ŋa ane noba na zaa naŋ are ba puoreŋ na?
Te zannɛɛ Jehoova ane Yezu yɛlɛ yaga. Azuŋ, wala hoŋ e baŋ ka ba na tu la dantorii sori kyɛ e a yɛlɛ ŋa?
5. Yezu e la Naa naŋ soma yaga
Yezu la Naaŋmen Naaloŋ na Naa, azuŋ, o na mɔɔ la o mɔɔbo zaa a de sommo a ko noba naŋ be a teŋɛzuŋ. Ŋmɛ a VIDIO a nyɛ sieree naŋ wuli ka Yezu taaɛ a boɔbo ane a kpeɛ̃o ka o soŋ noba.
Yɛlɛ na Yezu naŋ da e saŋa na oŋ be a teŋɛzuŋ na vɛŋɛɛŋ teŋ baŋ yɛlɛ na Naaŋmen Naaloŋ naŋ na e ko te. A maaloo naŋ be a daga poɔŋ buo soba la hoŋ kaara soriŋ yaga zaa ka ho nyɛ? Ka yɛ naŋ wa gyieli a maaloo kaŋa zaa yɛlɛ, yɛ maŋ kanne a Baabole kannoo zie naŋ bebe na.
SAŊA NA YEZU NAŊ DA BE A TEŊƐZUŊ NA . . .
PAMPANA ŊA YEZU NAŊ BE SAZUŊ NA, O NA . . .
o da vɛŋɛɛŋ ka sasekpeɛŋaa kaŋa mãã.—Marko 4:36-41.
maalɛɛ a teŋgane ka o leɛ soma soŋ zaa.—Aizeeya 35:1, 2.
o da ko la noba turituri yaga bondirii baŋ di.—Matio 14:17-21.
iree kɔŋ bare.—Yieme 72:16.
o da saŋ la noba yaga baaloŋ.—Luka 18:35-43.
vɛmeŋ ka neɛzaa taa laafeeloŋ naŋ paale.—Aizeeya 33:24.
o da seŋɛɛ noba naŋ kpi.—Luka 8:49-55.
seŋɛɛ noba naŋ kpi na, a kyɛ lɛ iri kũũ meŋ bare.—Yel-iriwulaa 21:3, 4.
6. Naaŋmen Naaloŋ na wanɛɛ zeŋ laafeɛ naŋ soma yaga zaa nendaare kaŋa
A Naaloŋ na vɛmeŋ ka Jehoova poboɔbo na oŋ da taa ko nensaaleba a piilee saŋa na nyɛ eebo. Nensaaleba na zeŋ la a teŋɛzu paradiisi poɔŋ tegitegilɛ. Ŋmɛ a VIDIO a nyɛ lɛ Jehoova naŋ na tu o Bidɔɔ Yezu eŋɛŋ a kyɛ vɛŋ ka O poboɔbo na nyɛ eebo.
Kanne Yieme 145:16, a kyɛ gyieli a soorebiri ŋa yɛlɛ:
A Baabole yeleeŋ ka, Jehoova na “yuo la o nu a paale bon-vori zaa boɔbo.” Wala hoŋ teɛre kyaare a yɛlɛ ŋa?
NOBA MINE MAŊ YELEŊ KA: “Ka teneeŋ taa noɔreyeni, te na toɔ̃ iree yelfaare zaa yi a donɛɛ poɔŋ.”
Bo yɛlɛ ka Naaŋmen Naaloŋ na toɔ̃ iri bare kyɛ ka nensaaleba gɔmenantere yɛŋ koŋ toɔ̃ iri bare?
A ZANNOO YELNIMIZEERE
Naaŋmen na tu la o Naaloŋ na eŋɛŋ a kyɛ vɛŋ ka o boɔbo nyɛ eebo. A Naaloŋ na vɛmeŋ ka a teŋɛzu zaa leɛ paradiisi, neŋsonne na zeŋ la a teŋɛzu kyɛ a puoro Jehoova tegitegilɛ.
Bo Hoŋ Zanne
Sobuo ka Jehoova na tu o Naaloŋ na eŋɛŋ kyɛ pɛgi o yuori na?
Bonso teŋ na baŋ sagedi peɛlaaŋ ka Naaŋmen Naaloŋ na vɛmeŋ ka nɔ-ennee na zaa naŋ be a Baabole poɔŋ na nyɛ eebo?
Naaŋmen Naaloŋ na wanɛɛ maaloo yaga, a maaloo buo soba la hoŋ kaara soriŋ ka ho nyɛ?
YƐLƐ MINE NAŊ LƐ BEBE
Hammagedon tɛgɛ la boŋ? Kanne a gane ŋa a nyɛ a noɔre iribo.
Kanne a nyɛ yɛlɛ naŋ na erɛ a “dɔgroŋ kpoŋ” na Yezu naŋ manne o yɛlɛ na saŋa.—Matio 24:21.
Ka Naaŋmen Naaloŋ naŋ wa kaara a teŋɛzu te na nyɛɛ maaloo yaga zaa. Kaa a vidio ŋa a nyɛ lɛ booree deme naŋ na toɔ̃ zeŋ teɛre a maaloo ŋa yɛlɛ gaa tɔɔre.
Dɔɔ kaŋa da ba taa gyeremɛ ko noba naŋ erɛ politics yɛlɛ fẽẽ zaa. Kanne o zemmo yɛlɛ yelzu naŋ la “Soorebie Yaga Yɛlɛ Da Dɔɔnɔ Maŋ,” a nyɛ yɛlɛ naŋ da somoo oŋ wa nyɛ boŋ na oŋ da boɔrɔ na.
“A Baabole Soŋ Baŋ Baŋ Leɛre Ba Zemmo Yɛlɛ” (A Watchtower, January 1, 2012)
-