ZANNOO 38
Nyɔvore Eɛ Kyɔɔtaa Naŋ Yi Naaŋmen Zie—Wuli Ka Ho Niŋe Paalɛɛ A Kyɔɔtaa Ŋa
Te naŋ taa nyɔvore zuŋ, yɛlɛ yaga bebeŋ teŋ na baŋ e, te na baŋ lɛ woŋ la zemmo noɔ̃ meŋ yaga zaa. Yelmeŋɛ la, saŋa kaŋa te maŋ tuoree yelkpeɛne ka lɛ vɛŋ teŋ dire dɔgɛɛ yaga, kyɛ yɛlɛ mine bebeŋ a maŋ korɔ te popeɛloŋ yaga zaa te zemmo poɔŋ. Wala teŋ na baŋ e a wuli ka te niŋe paalɛɛ nyɔvore na Naaŋmen naŋ ko te na? Bonso aŋ e nimizeɛ yaga zaa ka te taa nimipa a ko a kyɔɔtaa ŋa?
1. Bonso aŋ seŋ ka te de nyɔvore ka o e tegroŋ yaga zaa?
Aseŋ ka te de nyɔvore ka o e tegroŋ yaga zaa, bonso, nyɔvore eɛ kyɔɔtaa naŋ yi te Saa Jehoova naŋ taa nɔmmo yaga zaa na zie. Jehoova la maale nyɔvore zaa, azuŋ, “o zie ka nyɔvore koɔ̃bulee be.” (Yieme 36:9) “Ona la korɔ nensaaleba zaa nyɔvore ane vooroŋ ane bonzaa.” (Toma 17:25, 28) Jehoova ko teŋ boma naŋ na toɔ̃ vɛŋ ka te zeŋ a teŋɛzuŋ a taa nyɔvore. Kyɛ, lɛ yoŋ naane, o lɛ ko teŋ boma naŋ na toɔ̃ vɛŋ ka te wono zemmo noɔ̃ yaga.—Kanne Toma 14:17.
2. Wala teŋ na baŋ e a wuli Jehoova ka te de la nyɔvore tegroŋ yaga zaa?
A piili bebiri na ho ma naŋ wa taa ho poɔ na, Jehoova taaɛ ho yɛlɛŋ. Vooroŋ soŋ da soŋɛɛ Naaŋmen puorebie kaŋa baŋ boɔlɔ Deevid oŋ yelko Naaŋmen ka: “Ho nimmie daaŋ nyɛ la N eŋgane ka o naŋ ba maale.” (Yieme 139:16) Lɛ wuleeŋ ka ho nyɔvore eɛ tegroŋ yaga zaa a ko Jehoova. (Kanne Matio 10:29-31.) Azuŋ, ka neɛŋ baŋ perɛ kyɛ ko neɛ, bee a iri o meŋɛ nyɔvore, a maŋ beɛrɛɛ Jehoova yaga zaa.a (Yiibu 20:13) Jehoova poɔ koŋ pɛle ka teneeŋ maŋ erɛ yɛlɛ naŋ na vɛŋ ka te pere, bee a kɔŋ te nyɔvore, kyɛbee ka te erɛ yɛlɛ naŋ na vɛŋ ka noba mine kɔŋ ba nyɔvore. Ka teneeŋ kaara te menne zieŋ soŋ a kyɛ lɛ de te taaba meŋ nyɔvore tegroŋ yaga zaa, lɛ na wuliŋ ka te niŋe paalɛɛ nyɔvore na Naaŋmen naŋ ko te na.
ZANNE YƐLƐ YAGA POƆ
Ho na zanne nyɛɛ lɛ hoŋ na toɔ̃ e a wuli Jehoova ka ho deɛ nyɔvore tegroŋ yaga zaa.
3. Ta de ho laafeeloŋ yɛlɛ deɛnɛ neŋ
Te naŋ e Kristabiiri naŋ de te nyɔvore ko Jehoova na zuŋ, te boɔrɔŋ ka te puoruu te nyɔvore zemmo zaa poɔŋ. A waa ŋa te naŋ de te eŋgama a ire sareka korɔ Naaŋmen. Kanne Urom 12:1, 2, a kyɛ gyieli a soorebie naŋ tu na yɛlɛ:
Bonso aŋ seŋ ka ho kaara ho laafeeloŋ zieŋ soŋ zaa?
Sobobo hoŋ na baŋ tu kyɛ e lɛ?
4. Ka hooŋ wa erɛ yelzaa, kaara soŋ a ta wa vɛŋ ka neɛ kaŋa pere bee a kɔŋ o nyɔvore
A Baabole ko teŋ kawane ka, a ba seŋ ka te e yelzaa naŋ na vɛŋ ka noba mine pere bee a kɔŋ ba nyɔvore. Ŋmɛ a VIDIO a nyɛ yɛlɛ na mine hoŋ na baŋ e a toɔ̃ go ho meŋɛ.
Kanne Yeng Yelibie 22:3, ka yɛ naŋ wa kanne a sɛgre baare, yɛ di dama a kyaare lɛ hooŋ ane ho taaba naŋ na toɔ̃ e a go yɛ menne . . .
dieŋ.
saŋa na yɛŋ tonɔ toma.
saŋa na yɛŋ dɛnnɛ yɛ kɔbɔ na.
saŋa na hoŋ kpɛ lɔɔre, bee a zɔŋ moto, kyɛbee ka hooŋ mɔnɔ lɔɔre.
5. Wuli ka ho de la bilɛɛ naŋ be o ma poɔŋ nyɔvore tegroŋ
Deevid da yeleeŋ ka, Jehoova baŋɛɛ yelzaa naŋ erɛ saŋa na bilɛɛ naŋ be o ma poɔŋ na. Kanne Yieme 139:13-17, a kyɛ gyieli a soorebiri ŋa yɛlɛ:
Jehoova nimitɔɔreŋ, bo saŋa ka neɛ nyɔvore maŋ piili, saŋa na oŋ be o ma poɔŋ, bee saŋa na baŋ wa dɔge o soba?
Bege na Jehoova naŋ da de ko a takoreŋ saŋa Izerayɛl biiri na da go la pɔgepoore ane bileere naŋ be ba ma pooreŋ na nyɔvoɛ. Kanne Yiibu 21:22, 23, a kyɛ gyieli a soorebie naŋ tu na yɛlɛ:
Ka neɛŋ ba baŋ kyɛ e yelkaŋa ka lɛ vɛŋ ka bilɛɛ naŋ be o ma poɔŋ kɔŋ o nyɔvore, bo teɛroŋ ka Jehoova taa kyaare o soba?
Ka neɛŋ baŋ perɛ kyɛ iri neɛ kaŋa nyɔvore, bo teɛroŋ ka Jehoova taa kyaare o soba?b
Naaŋmen yeleeŋ ka bilɛɛ naŋ be o ma poɔŋ nyɔvore eɛ tegroŋ yaga zaa a ko o, wala hoŋ teɛre a kyaare lɛ?
Saŋa kaŋa ka pɔge naŋ de nyɔvore tegroŋ yaga zaaŋ wa taa poɔ, yɛlɛ mine na toɔ̃ eŋ ka lɛ vɛŋ ka a pɔgepoɔ teɛre ka lɛ na yɛlɛ naŋ kyɛnɛ na zuŋ aseŋ ka o iri a poɔ bare. Ka lɛŋ wa e, wala aŋ seŋ ka o e? Kanne Aizeeya 41:10, a kyɛ gyieli a soorebie naŋ tu na yɛlɛ:
Ka nobaŋ korɔ pɔgepoɔ kawane ka o iri a poɔ bare, nembuo zie oŋ seŋ ka o gaa a te bɔ sommo? Bonso hoŋ yel lɛ?
NOBA MINE MAŊ YELEŊ KA: “Ka pɔgepoɔŋ boɔrɔ o na baŋ iree poɔ na oŋ taa na bare, bonso, o poɔŋ la ka a bie be.”
Boŋ vɛŋ hoŋ sagedi ka Jehoova de la pɔgepoɔ ane a bilɛɛ naŋ be o poɔŋ na nyɔvore tegroŋ yaga zaa?
A ZANNOO YELNIMIZEERE
Nyɔvore eɛ kyɔɔtaa Jehoova naŋ de ko te, azuŋ, a Baabole wuleeŋ ka aseŋ ka te de nyɔvore tegroŋ yaga zaa a kyɛ kaara te menne zieŋ soŋ. A ba seŋ ka te e yelzaa naŋ na vɛŋ ka te kɔŋ te nyɔvore, bee a vɛŋ ka te taaba kɔŋ ba nyɔvore.
Bo Hoŋ Zanne
Bonso ka nensaalaa nyɔvore e tegroŋ yaga zaa a ko Jehoova?
Ka neɛŋ baŋ perɛ kyɛ ko neɛ, wala ka Jehoova maŋ teɛre a kyaare o soba?
Bonso ka ho poɔ pɛle yaga zaa Jehoova naŋ ko bo nyɔvore?
YƐLƐ MINE NAŊ LƐ BEBE
Wala teŋ na baŋ e a puore Jehoova bareka, o naŋ ko te nyɔvore na zuŋ?
Ka pɔge kaŋaŋ iri poɔ o naŋ taa bare, Naaŋmen na vɛŋ kooŋ bee? Kanne a yɛlɛ ŋa a nyɛ a noɔre iribo.
“Ka Pɔgeŋ Taa Poɔ A Nyɔge Iri Bare, Wala Ka A Baabole Yel Kyaare Lɛ?” (Intanɛt zu gane)
Ka teneeŋ taa teɛroŋ na Naaŋmen naŋ taa kyaare nyɔvore na, nimipɛle yɛlɛ zaa naane teŋ na maŋ de te menne eŋ a poɔŋ. Kanne a yɛlɛ ŋa a nyɛ bon naŋso te naŋ yel lɛ.
“‘Nimipɛle Yɛlɛ Naŋ Eŋnɛ Dabeɛ̃’—Aseŋ Ka Ho De Ho Meŋɛ Eŋ A Poɔŋ Bee?” (Awake!, October 8, 2000)
Ka neɛŋ piili teɛrɛ ka o boɔrɔŋ ka o ko o meŋɛ, a Baabole na toɔ̃ soŋɛɛ o soba bee? Kanne a yɛlɛ ŋa a nyɛ a noɔre iribo.
“A Baabole Na Toɔ̃ Soŋ Maŋ Ka Maaŋ Teɛrɛ N Nyɔvore Iribo Yɛlɛ Bee?” (Intanɛt zu gane)
a Noba naŋ tuoro yelkpeɛne ka lɛ vɛŋ ka ba sukyie kyɛre na yɛlɛ fɛrɛɛ Jehoova yaga zaa. (Yieme 34:18) Saŋa kaŋa yɛlɛ maŋ pɔgɛɛ neɛ ka lɛ vɛŋ oŋ piili teɛrɛ o meŋɛ nyɔvore iribo yɛlɛ, ka lɛŋ pɔge bo, baŋ ka Jehoova baŋɛɛ lɛ a yɛlɛ naŋ beɛrɛ bo a seŋ, o boɔrɔŋ ka o soŋ bo meŋ. Ka hooŋ boɔrɔ ka ho nyɛ a sommo ŋa Jehoova naŋ boɔrɔ ka o ko bo na, kanne a yelzu ŋa “A Baabole Na Toɔ̃ Soŋ Maŋ Ka Maaŋ Teɛrɛ N Nyɔvore Iribo Yɛlɛ Bee?” naŋ be a Yɛlɛ Mine Naŋ Lɛ Bebe zie naŋ be a zannoo ŋa poɔŋ na.
b Noba naŋ daaŋ iri poɔ bare saŋa kaŋa naŋ pare ba seŋ ka ba vɛŋ ka a yɛlɛ dɔɔnɔ ba yaga zaa, bonso, Jehoova na toɔ̃ vɛŋ ko baŋ. Ka hooŋ boɔrɔ ka ho zanne yɛlɛ yaga, kanne a yelzu ŋa “Ka Pɔgeŋ Taa Poɔ A Nyɔge Iri Bare, Wala Ka A Baabole Yel Kyaare Lɛ?” naŋ be Yɛlɛ Mine Naŋ Lɛ Bebe zie naŋ be a zannoo ŋa poɔŋ na.