Yɛlɛ Noba Naŋ Kanna Te Gama Naŋ Maŋ Soorɔ

Bo saŋa ka a naaŋ moɔloo toma na teŋ tonɔ pampana na na baare?

Yezu yeleeŋ ka: “Ba na moɔlɛɛ a Naaloŋ duorisoŋ ŋa a tendaa lombori zaa ka a e sieree ko a paalonne noba zaa, kyɛ ka a baaraa saŋa pãã ta.” (Mat. 24:14) A Giriki yelbiri na baŋ leɛre waneŋ ka “baaraa saŋa” o wɛlbo 6, 13 ane 14 la teʹlos. A yelbiri ŋa wulee Setaana donɛɛ ŋa naŋ na wa o baaroo kpɛlɛŋkpɛlɛŋ Hammagedon zɔɔre na saŋa. (Yel. 16:​14, 16) Lɛ wuleeŋ ka te na moɔlɛɛ a duorisoŋ lɛɛŋ a te ta saŋa na Hammagedon zɔɔre na naŋ na piili. A wuluu ŋa leɛrɛɛ yɛlɛ na teŋ da sagedi saŋa kaŋa naŋ pare na.

Saŋa kaŋa naŋ pare, te da sagedieŋ ka ka a dɔgroŋ kpoŋ wa piili ka ba sãã Baabilɔŋ Kpoŋ, te na barɛɛ a duorisoŋ moɔloo toma. (Yel. 17:​3, 5, 15, 16) Te da sagedieŋ ka ka a dɔgroŋ kpoŋ wa piili, Jehoova koŋ lɛ ko noba vuo ka ba sagede a duorisoŋ. (Aiz. 61:2) Te da lɛ teɛrɛɛŋ ka noba naŋ de ba yel-eree wuli ka ba taaɛ sagediibu Jehoova eŋɛŋ sɛre ka a dɔgroŋ kpoŋ piili la na nyɛ nyɔvore a dɔgroŋ kpoŋ saŋa. Te da de la a noba ŋa manne neŋ a Gyuu noba naŋ da nyɛ nyɔvore saŋa na baŋ da sãã Gyɛruzɛlɛm yuoni 607 B.C.E. na. A noba naŋ da puoro Jehoova a kyɛ kyiiri faaloŋ zuŋ, ba da toɔ̃ la ŋmaaroŋ eŋ ba gbieŋ a de wuli ka ba na nyɛɛ nyɔvore ana saŋa. (Izik. 5:11; 9:4) Kyɛ, te wa nyɛɛŋ ka yɛlɛ na teŋ da wulo saŋa kaŋa naŋ pare na neŋ yɛlɛ na Yezu naŋ yeli aŋ be Matio 24:14 na ba tutaa velaa. Bonso yɛlɛ na Yezu naŋ yeli na wuleeŋ ka vuo naŋ na yuo ko la noba ka ba sagede a duorisoŋ a te ta saŋa na a baaraa meŋɛ naŋ na ta Hammagedon zɔɔre na saŋa.

Yɛlɛ muni wommu paalaa na teŋ taa kyaare yɛlɛ naŋ be Matio 24:14 wuleeŋ ka aseŋ ka te leɛre wuluu na teŋ da maŋ wulo a kyaare a sakubo duoro yɛlɛ naŋ be Yel-iriwulaa 16:21 na. Saŋa na teŋ peɛre a sɛgre ayi ama yɛlɛ velaa na, te wa nyɛɛŋ ka yelyenaa ka a sɛgre ama manna a yɛlɛ. Bonso teŋ yeli lɛ? Ananso la ka, lɛ na noba naŋ na e ba yɛlɛ a kyaare a duorisoŋ la na wuli ka a duorisoŋ na eɛ sakubo duoro kyɛbee ka a koŋ e sakubo duoro. Bitontona Pɔɔl da sɛgɛɛŋ a kyaare a duorisoŋ ka, noba naŋ na “nyɛ faabo,” a duorisoŋ waa ŋa ‘turaali nyuu naŋ waana neŋ nyɔvore.’ Kyɛ, Naaŋmen dɔndɔnne na yɛŋ, a eɛ duorifaa ko ba, a e ‘turaali nyuu naŋ waana neŋ kũũ.’ (2 Kor. 2:​15, 16) Ba na kyiiree a Naaloŋ duorisoŋ, bonso a duorisoŋ na vɛŋeŋ ka a pɛle ka a donfaa ŋa ba naŋ nɔŋ na be la Setaana kpeɛ̃o puliŋ a gɛrɛ sããmmo poɔŋ.—Gyn. 7:7; 1 Gyn. 2:17; 5:19.

Ka hooŋ kaa Yel-iriwulaa 16:21 soŋ, ho na nyɛŋ ka be yeleeŋ ka a sakubo yɛlɛ da “taa la dabeɛ̃ yaga.” Lɛ wuleeŋ ka a dɔgroŋ kpoŋ saŋa a duoro na teŋ na moɔlɔ na na maaleŋ eɛ kpeɛŋaa yaga zaa. A na vɛŋeŋ ka noba baŋ Jehoova yɛlɛ a gaŋ saŋa zaa naŋ pare. (Izik. 39:7) Ka ba naŋ wa sãã Baabilɔŋ Kpoŋ baare, noba naŋ na sagede la a duorisoŋ aŋa turaali nyuu naŋ soma bee? Te na baŋ yeliŋ ka ɛɛ. Aminekaŋaŋ, ba na leɛteɛreŋ ka yuomo naŋ pare Jehoova Sieree Deme moɔlɔ korɛɛ noba ka ba na sããŋɛɛ zirii puoruu zaa kpɛlɛŋkpɛlɛŋ.

Te na baŋ de la a yɛlɛ ŋa manne neŋ yɛlɛ na naŋ da e takoreŋ saŋa Igyipiti paaloŋ, saŋa na a Toɔrɔ Pie naŋ wa baare na. Saŋa na Jehoova ‘naŋ wa di a Igyipiti ŋmemɛ zaa sɛrɛɛ baare’ na, “nemboore gyamaa” naŋ ba e Izerayɛl biiri da poɔ la Jehoova puorebiiri na eŋɛŋ a yi a paaloŋ. (Yiib. 12:​12, 37, 38) Aminekaŋaŋ, a nemboore gyamaa ŋa da taaɛ sagediibu Jehoova eŋɛŋ saŋa na baŋ wa nyɛ yɛlɛ na zaa Jehoova naŋ tu Moosis zie a yeli kyaare a Toɔrɔ Pie naŋ nyɛ eebo na.

Noba na zaa naŋ taa sagediibu Jehoova eŋɛŋ Baabilɔŋ Kpoŋ sããmmo puoriŋ na nyɛɛ apoɔsori ka ba sonnɔ Krista yɔɔmine aŋ naŋ be a teŋɛzuŋ ana saŋa na. (Mat. 25:​34-36, 40) Kyɛ, ka ba naŋ wa de Krista yɔɔmine na zaa a do neŋ sazu sɛre ka Hammagedon zɔɔre na piili, vuo koŋ lɛ bebe a ko neɛzaa ka o e yɛlɛ ka ba ŋmaa o sɛrɛɛ ka o eɛ pere.

A wuli paalaa ŋa vɛŋɛɛŋ teŋ sereŋ baŋ ka Jehoova nɔmmo ane o nembaalonzoe na eɛ zuluŋ. Yelmeŋɛ zaa, “a ba e [Jehoova] boɔbo ka neɛzaa nyɛ sããmmo, kyɛ o boɔrɔŋ ka neɛzaa toɔ̃ leɛre o eebo.”—2 Pit. 3:9.