Pane Tus i Aqane Lapa Itre Joxu
19 E thupen, meci pi hi Nahasa, joxu i angetre Amona, matre hna acile pë hë la nekö i angeic troa nyihna i angeic. 2 Nge öni Dravita jë hi: “Tro ni a hnimi* Hanuna nekö i Nahasa, ke hna hnimi ni hnene lo keme i angeic.” Haawe, Dravita a upe pi la itre ka tro fë maca troa fetra koi angeic. Ngo ame lo itre ka tro fë maca a traqa ngöne la nöj i angetre Amona, me fetra koi Hanuna, 3 önine jë hi la itre xa tan koi Hanuna ka hape: “Ame koi nyipë, Dravita kö lai a upe la itre atre i angeic troa fetra matre atrune la keme i nyipë? Tha angeice kö a upi angatre troa thele ewekë me goeëne juetrëne la traon, matre apatrenyi nyipë?” 4 Qa ngöne lai, hnei Hanuna hna acilëne la itre ka tro fë maca i Dravita, me cine la sine la ienaje i angatr, me thupa la itre iheetre i angatr uti hë ngöne la hune itrepë, me upi angatre hmaca. 5 Nge ame hë la Dravita a drenge la ewekë ka traqa kowe la itre atre i nyidrë, nyidrëti a canga upe pi la itre xane koi angatr, ke tru la aqane ahmahmanyi angatr. Dravita a upe jë la maca celë me hape: “Pane lapa ju e Ieriko uti hë la kola cia hmaca la enaje i epun. Nge e ase hë, bëeke hmaca jë.”
6 Nge trotrohnine hë angetre Amona laka, pui ngazo hë angatr koi Dravita. Matre hnei Hanuna me angetre Amona hna upe la itre ka tro fë maca, memine la 1000 lao talane* sileva, troa xomi ikatr, me itre ka ti hos qa Mesopotamia,* me Suria-maaka, me Zoba. 7 Angatr a nyithupene jë la 32000 lao ikatr, memine la joxu ne Maaka me itre soc* i angeic. Angatr a tro ju troa acile la lapa ne soc i angatr, qëmekene la traon ne Medeba. Matre hnei angetre Amona hna lö pi qa hnine la traone i angatr, me icasikeu, me ce ut troa isi me Isaraela.
8 Nge ame hë la Dravita a drenge lai, hnei nyidrëti hna upi Ioaba koi angatr, me itre soc ka catr i nyidrë, memine la trongene isi asë. 9 Ame hnei angetre Amona hna cile xötrë qëmekene la qëhnelö ne la traon. Nge ame lo itre joxu ka traqa troa xatua angatr, hnei angatr hna cil e gaa nany ngöne la itre hlapa.
10 Ame hë la Ioaba a öhne laka, itre ithupëjia a traqa qa qëmek me hutrö, angeic a iëne jë la itre xa soc ka catr thei angetre Isaraela, me acile xötrë angatr troa isi me angetre Suria. 11 Nge angeic a upe jë la itre xa soc* koi Abisai trejin me angeic, me sipo Abisai troa acile xötrë angatr troa isi me angetre Amona. 12 Thupene lai, öni angeic: “E lepi ni hë hnei angetre Suria, qa i eö troa xatua ni. Ngo e tro angetre Amona a lepi ö, tro hë ni a xatua eö. 13 Loi e tro sa catr me isigöline la nöje së, me itre traon ne la Akötresi së, nge qanyi Iehova kö apexejen.”
14 Ame hnei Ioaba me itre soc hna tro troa isi me angetre Suria, ngo kötre pi hi angetre Suria. 15 Matre ame hë la angetre Amona a öhne laka, kötre hë angetre Suria, angatr a ananyi Abisai jë trejin me Ioaba, me zae hnine la traon. Thupene lai, hnei Ioaba hna tro Ierusalema.
16 Thupene la hna lepe la angetre Suria hnei angetre Isaraela, hnei angetre Suria hna upe la ka tro fë maca troa hëne la itre xa atre Suria, lo itre ka mel ezine la hneopegejë.* Nge Sobaka tane la itre soce i Hadadeza, la ka wejemekene la tronge i angatr.
17 Ame hë la Dravita a drei mejene lai, nyidrëti a canga acasine jë la trongene isi Isaraela, me sasaithe la Ioridrano, me tro kowe la angetre Suria, me acile xötrëne la itre soc i nyidrë troa isi me angatr. Dravita a acile xötrëne jë la itre soc i nyidrë troa isi me angatr, nge angetre Suria a isi jë me nyidrë. 18 Ngo angatr a kötre hmaca pi qëmekei Isaraela. Nge ame thei angetre Suria, hnei Dravita hna humuthe la 7000 lao soc ka ti ikatr, me 40000 lao soc ka trongë ihnadro, me Sobaka, tane la itre soce i angatr. 19 Nge ame hë la itre atr ka huliwa koi Hadadeza a öhne laka, hna ngae angatr hnei angetre Isaraela, angatr a canga thele tingetinge ju me Dravita, me drei nyidrë. Qane ju hi lai, tha xatua angetre Amona hmaca kö hnei angetre Suria.