Itre Edromë
16 Ame la atr, angeic a hnëkën la itre mekuna ne la hni i angeic,*
Ngo qaathei Iehova la hnei angeic hna sa.*
2 Ame kowe la atr, ka meköt* asë hi la itre aqane ujë i angeic,
Ngo Iehova kö la ka waipengöne la itre aliene hni.*
3 Nu asë pi koi Iehova la itre hnei ö hna kuca,*
Nge tro ha eatr la itre mekuna i ö.
4 Hnei Iehova hna huliwane la nöjei ewekë, matre aejëne la mekuna* i nyidrë,
Tune fe la atr ka ngazo thatraqane la drai ne elëhni.
5 Methi Iehova la itre ka hetre hni ka pi tru.
Lapa atre ju laka, tha tro kö a pë pun koi angatr.
6 Jëne la ihnimi nyipici me nyipici, hna nue la ngazo,
Nge pine laka, kola xoue Iehova, kolo fe a ananyine la ngazo.
7 Ame la Iehova a madrin kowe la aqane ujë ne la ketre atr,
Ke nyidrëti a kuca matre tro la itre ithupëjia me angeic, a tingeting me angeic.
8 Ka loi ju kö la troa melën la ka ijij me meköt
Hune la troa kepe mani atrun, me huliwa qenatrekënö.
9 Ngacama tro la ketre atr a hnëkën e kuhu hni la gojenyi angeic,
Ngo Iehova kö la ka iujine la itre thupaca i angeic.
10 Loi e eje hune la që ne la ketre joxu, la mekuna i Akötresie;
Tha tro pi kö angeic a atriane la meköt.
11 Ame la tulu ne athip me itulu ka meköt, ke qaathei Iehova;
Ame asë hi la itre wene tulu hnine la watreng, ke huliwa ne la lue ime i nyidrë.
12 Methi ne la itre joxu la itre huliwa ka iakötrë,
Ke jëne la meköt, ka cile huti la theron.
13 Aja ne la itre joxu troa dreng la itre trengewekë ka meköt.
Angatr a hnime la itre atr ka qaja la nyipici.
14 Ame la elëhni ne la joxu, ke ceitu me atre hna up troa ihumuth,
Ngo ame la atr ka inamacan, ke ka apujen* la elëhni i nyidrë.
15 Maine tro la joxu a kapa la ketre atr, tro ha manathith la atre cili;
Ame la nyidrëti a kepe së, ke ceitu me iaw ka traqa fë mani ngöne la kola nyiqaane la macatre.
16 Ka loi ju kö la troa thele la inamacan hune la gool!
Ka loi ju kö la troa hetrenyi la trotrohnin hune la sileva.
17 Kola neëne la ngazo, hnene la gojenyi ka tru ne la itre atr ka meköt.
Ame la atr ka hmekëne la gojenyi angeic, ke ka thupëne la mele i angeic.
18 Qëmekene troa kei, hetre pi tru,
Nge qëmekene troa tria, hetre pi draië.
19 Ka loi ju kö la tro sa co* nyipine la itre ka ipië
Hune la troa ce thawa la itre ewekë hna thapa hnene la itre ka pi tru.
20 Ame la atr ka pane thel troa atrepengön la ketre jol, ke tro angeic a kepe thangan ka loi,
Nge ka madrine la atre mejiune koi Iehova.
21 Troa hëne la atr ka hetre hni ka inamacan ka hape, atre trotrohnin,
Nge hna pi drenge la itre ka hetre trengewekë ka menyik.*
22 Ame la itre ka hetrenyi la atreine thelewekë, ke jëne mele lai,
Ngo itre hmo a xeni pune la aqane huliwa menu i angatr.
23 Ame la hni ka inamacan, ke ka hamë inamacan kowe la që
Nge tro ha canga kapa la itre trengewekën ej.
24 Ceitune la itre trengewekë ka lolo me miel ka neni,
Ka menyik kowe la ngönetrei, nge ka ameun la itre ijun.
25 Hetre gojeny hna mekun hnene la atr laka, ka loi hi,
Ngo ame pe, meci la pun.
26 Hnei pi xen, matre kola huliwa catr hnene la atr
Ke mecijiin* la ka uku angeic troa nue trengecatr.
27 Kola jele hmaca la ewekë ka ngazo hnene la ka pë hnënyöngön;
Ceitune hi la itre trengewekë i angeic, memine la eë ka catrehnin.
28 Ame la atr ka iaö,* ke ka aciane la iwesitrë,
Nge ame la ka silitrengathoi, ke ka aisane la lue treme sineen.
29 Ame la atr ka isi, ke angeic a hëne thoine la atre lapa easenyi angeic
Me tro sai angeic kowe la gojenyi ka ngazo.
30 Ame la angeic a mekun troa kuca la ngazo, ke angeic a isamekë.
Angeic a hnyima thoi la angeic a kuca la ewekë ka ngazo.
31 Korona ka mingöming* la iqia
La angatr a lapa ngöne la gojenyi ne la meköt.
32 Ka loi ju kö la atr ka hmitr troa elëhni hune la atr ka catr,
Nge ka loi ju kö la atr ka atreine xomihnine la elëhni* i angeic, hune la atr ka thapa la ketre traon.
33 Qa ne la atr troa uthidrönegöti,
Ngo ame asë hi la itre mekun ka mama qa ngön, ke qaathei Iehova.