Angetre Amekötin
9 Thupene lai, hnei Abimelek nekö i Ierubaala hna tro troa qaja kowe la itre mathine i angeic e Sekema, me itre atrene la fami ne la qaaqaa* i angeic, ka hape: 2 “Eni a sipo epun, pane hnyingëne jë kowe la itre tan* ne Sekema ka hape: ‘Nemene la ka loi koi epun, tro la 70 lao nekö i Ierubaala a musi koi epun, maine tro hi a mus hnene la ala cas? The thëthëhmine kö laka, casi hi la madra* së.’”
3 Matre hnene la itre mathine i angeic hna nyi trengewekë i angeic kowe la nöjei tan e Sekema. Nge hnei angatr hna axeciën troa xötrethenge* Abimelek, ke öni angatr: “Trejine me easë lai.” 4 Ame hnei angatr hna hamëne la 70 lao pies sileva qa ngöne la uma ne hmi Baala-Berith. Nge hnei Abimelek hna xome la mani cili, nyine nyithupene la itre atr ka pë jol me ka pi tru, matre tro angatr a xötrethenge angeic. 5 Ase jë hi lai, hnei angeic hna tro kowe la hnalapa ne la keme i angeic e Ofera, me humuth ngöne la ca etë, la 70 lao trejin me angeic, lo itre nekö i Ierubaala. Ngo mele ju pe kö Iotham, lo wene puhnen ne la itre nekö i Ierubaala, ke hnei nyën hna zae.
6 Thupene lai, hnene la itre tan asë ne Sekema memine la angetre Bethe-Milo hna icasikeu, me acili Abimelek troa joxu, ezine la sinöe ka tru, ezine la ikapa e Sekema.
7 Matre ame hë la kola thuemacanyi Iotham, hnei angeic hna canga tro troa cile hune la wetre Gerizim, me ewekë catr koi angatr ka hape: “Pane drei ni ju epun itre tan ne Sekema, matre tro Akötresie a hane drei epun:
8 “Ngöne la ketre drai, hnene la itre isinöe hna tro troa acil la ketre joxu koi angatr. Matre öni angatr kowe la ioliv* ka hape: ‘Musi jë koi hun.’ 9 Ngo önine jë hi la ioliv:* ‘Tha tro kö ni a nuetrije la oeleng,* lo hna huliwane nyine atrunyi Akötresie me itre atr, matre enijën la itre wapicineng hune la itre xaa isinöe!’ 10 Thupene lai, önine la itre isinöe kowe la iwacua ka hape: ‘Trohemi, nge musi jë koi hun.’ 11 Ngo sa jë hi la iwacua ka hape: ‘Tha tro kö ni a nuetrije la ehnyapang me itre weneng ka lolo, matre enijën la itre wapicineng hune la itre xaa isinöe!’ 12 Matre önine pena la itre isinöe kowe la ivin ka hape: ‘Trohemi, nge musi jë koi hun.’ 13 Ngo sa jë hi la ivin ka hape: ‘Tha tro kö ni a nuetrij la wainang ka hnyipixe, lo ka amadrinë Akötresie me itre atr, matre enijën la itre wapicineng hune la itre xaa isinöe!’ 14 Matre hnene pë hë la itre xaa isinöe hna qaja kowe la sinöe ka ithinyi ka hape: ‘Trohemi, nge musi jë koi hun.’ 15 Nge önine jë hi la isinöe ka ithinyi ka hape: ‘Maine epuni a ajan troa acili joxu ni, trohemi hö ma zae fene la gaa xapong. Ngo maine xele kö epun, loi e tro la ketre eë a tro qa ngöne la sinöe ka ithiny, me dreuthetrij la itre arasi ne Lebanona.’
16 “Ame enehila, pane mekune jë: Ka nyipici kö me meköt la aqane ujë i epun, ngöne la epuni a acili joxu Abimelek? Hnei epuni kö hna kuca la loi koi Ierubaala me fami i angeic? Hnei epuni kö hna metrötrë angeic pine la itre huliwa hnei angeic hna kuca? 17 Ame lo kaka a isigöli epun, hnei nyidrëti hna nue mele koi epun, matre amele epun qaathene la angetre Midiana. 18 Ngo ame hë enehila, epun pena a cil kowe la fami i kaka, me humuth la 70 lao nekö i nyidrë hune la ca etë. Thupene lai, hnei epuni hna acili Abimelek troa joxu hune la itre tan ne Sekema, lo nekön ne la hlue i nyidrë pine hi laka, ketre trejin me epun. 19 Haawe, maine ka nyipici me meköt la hnei epuni hna kuca enehila koi Ierubaala me fami i nyidrë, nga madrine jë koi Abimelek, nge epi tro fe angeic a madrin koi epun. 20 Ngo maine tha eje kö, nga epi tro la eë a tro qaathei Abimelek, matre dreuthetrij la itre tan ne Sekema me Bethe-Milo. Nge epi tro la eë a tro qaathene la itre tan ne Sekema me Bethe-Milo, matre dreuthetriji Abimelek.”
21 Thupene lai, hnei Iotham hna kötr a tro Bere. Hnei angeic hna lapa e cili pi Abimelek mama i angeic.
22 Nge hnei Abimelek hna mus* e Isaraela koi köni macatre. 23 Ame hnei Akötresieti hna nue troa cia la imethinë thei Abimelek me itre tan ne Sekema. Matre hnei angatr hna iaö Abimelek. 24 Eje hi, loi e troa të la ngazo hna kuca kowe lo 70 lao nekö i Ierubaala, nge tro la itre ka ihumuth a xeni pun la ngazo i angatr: ene Abimelek pine angeic humuth la itre trejin me angeic, me itre tan ne Sekema pine angatr xatua angeic. 25 Matre hnene la itre tan ne Sekema hna acil la itre trahmanyi troa tra thethi angeic hune la itre wetr. Hnene la itre trahmanyi cili hna thapa asë la itre ewekë ne la itre atr ka tro ezi angatr, nge hna thuemacanyi Abimelek.
26 Ngöne la ketre drai, hnei Gaala nekö i Ebed me itre trejin me angeic hna Sekema thenge. Nge hnene la itre tan ne Sekema hna mejiun koi angeic. 27 Hnene la itre trahmanyi ne Sekema hna tro kowe la itre hlapa i angatr matre menuën la itre vin, me wejeweje wene rezë, me kuca la ketre feet. Thupene lai, hnei angatr hna lö hnine la uma ne la haze i angatr, me xeni me ij, me eji Abimelek. 28 Ame hnei Gaala nekö i Ebed hna qaja ka hape: “Drei lae Abimelek, nge drei lae Sekema,* matre tro huni a nyihlue i nyidro? Hapeu, tha nekö i Ierubaala kö angeic, nge tha Zebula kö lo ka xatua angeic? Ame epun, nyihluene jë kö epun la itre trahmanyi ne Hamora, lo keme i Sekema! Ngo tro pena huni a nyihlue i angeic fë nemen? 29 Maine eni ju la ka mus kowe la nöje ce, ke tro hë ni a akeinyi Abimelek.” Ase jë hi lai, öni angeic koi Abimelek: “Nyixane jë la trongene isi i ö, nge trohemi ma isi.”
30 Ame ju hi la kola dreng hnei Zebula, lo joxu ne la traon, la trengewekë i Gaala nekö i Ebed, ke hnei nyidrë hna elëhni. 31 Matre hnei nyidrëti hna upe juetrën* la itre ka tro fë maca troa qaja koi Abimelek ka hape: “Dreng: traqa ha Gaala nekö i Ebed memine la itre trejin me angeic e Sekema, nge angatr a ukune la traon troa icilekeu me eö. 32 Haawe, traqa pi e jidr memine la itre atre i ö, nge zae ju ngöne la hlapa. 33 Nge ame hë la kola fetra la jö, tro hë eö a canga ilë me lep la traon. Nge maine tro angeic me itre atre i angeic a isi me eö, ke isine* jë troa ngaa angeic.”
34 Ame hnei Abimelek me itre atre i angeic hna mejë e hnenyipajidr. Hnei angatr hna kuca la 4 lao gurup, me zae ezin e Sekema. 35 Matre ame ju hi la Gaala nekö i Ebed a lö me cil ngöne la qëhnelö ne la traon, ke utraxulu pi hi Abimelek me itre atre i angeic qa ngöne la hnë zae i angatr. 36 Matre ame la Gaala a öhne la itre trahmany, öni angeic ju hi koi Zebula: “Goeën! Hetre itre atr ka ut qa ngöne la itre wetr.” Ngo öni Zebula koi angeic: “Tha itre atr kö lai, ngo ahnuene la itre wetr.”
37 Ngo qea ha e thupen, öni Gaala jë hi: “Goeën! Itre atr a ut nyipine la nöj, nge hetre ketre gurup ka fetra qa ngöne la gojeny ne la sinöe ka tru ne la angetre Meoneni.” 38 Matre öni Zebula jë hi: “Haawe, selë eö jë kö! Tha eö kö lo ka qaja ka hape: ‘Drei lae Abimelek matre tro huni a nyihluen?’ Hapeu, tha kolo kö lo itre atre lai hnei ö hna methinën? Enehila, tro jë hë eö troa isi me angatr.”
39 Ame hnei Gaala hna elemekene la itre tan ne Sekema, me tro troa isi me Abimelek. 40 Thupene lai, hnei Gaala hna kötr, nge hna weje huzu angeic hnei Abimelek; ala nyimu la itre atr hna humuth uti hë la qëhnelö ne la traon.
41 Nge hnei Abimelek pala hi hna lapa e Aruma. Ame pena Zebula, hnei nyidrë hna helë Gaala me itre trejin me angeic qa Sekema. 42 Nge ngöne la drai thupen, hnene la itre atrene la traon hna tro kowe la hlapa, nge hna thuemacanyi Abimelek. 43 Matre hnei angeic hna hëne la itre soce i angeic me thawa könin, me upi angatr troa zae ngöne la hlapa. Nge ame la angatr a öhne la itre atr a tro qa ngöne la traon, ke angatr a canga tro troa lep me humuth. 44 Hnei Abimelek me itre atre i angeic hna canga nyinyap kowe la qëhnelö ne la traon. Nge hnene pë hë la lue xaa gurup, hna lepe humuth asë la itre ka lapa ngöne la hlapa. 45 Hnei Abimelek hna isi memine la traon ngöne la drai ka pexej. Ame hnei angeice hna thapa la traon me humuth la itre atren, me apatrenetrij la traon, me jumi sotrën asë.
46 Matre ame hë la kola drenge lai hnene la itre tan ne la ita ne thup e Sekema, hnei angatr hna canga kötr troa zae hnine la kav* ne la uma ne hmi e El-Berith. 47 Nge ame ju hi la kola thuemacanyi Abimelek ka hape, itre tan ne la ita ne thup e Sekema a icasikeu, 48 hnei Abimelek me itre atre i angeic hna elë kowe la wetre Zalemon. Hnei angeic hna xom la ze, me thupa la ketre wapicine sinöe, me atë hune la iape i angeic. Thupene lai, öni angeic kowe la itre atre i angeic: “Öhne hi epun la hnenge hna kuca, kuca tune jë fe. Nyimenyime jë!” 49 E cili, hnene asë hi la itre trahmanyi hna sa la itre picin ne sinöe me xötrethenge Abimelek. Nge hnei angatr hna agön itre picine sinöe kowe la kav, me dreuthetrij. Celë hi la aqane meci ne la itre atr ngöne la ita ne thup e Sekema, matre traqa koi 1 000 lao trahmanyi me föe.
50 Thupene lai, hnei Abimelek hna tro Tebez. Hnei angeic hna lep me thapa la traon. 51 Ngo hetre ita ne thup ka catr nyipine la traon, matre hnene la itre trahmanyi me föe, me itre tan ne la traon hna kötre zae e cili. Hnei angatr hna thingi qëhnelö angatr e koho hnin, me elë e koho hune la ita ne thup. 52 Ngo hnei Abimelek hna traqa kowe la ita ne thup me isi e cili. Nge hnei angeic hna easenyine la qëhnelö matre troa dreuthetrij. 53 Ame hnene la ketre föe hna kuiën la etë nyine amudromudron* hune la he i Abimelek, nge hna kaqa la inenatr i angeic. 54 Matre hnei angeic hna canga hën la ka ajön la itre jia ne isi i angeic me hape: “Uthe pi la taua i ö matre humuthi ni, ke wanga qaja jë ka hape: ‘Hna humuthi angeic hnei föe.’” Ame hna thinyi Abimelek hnei taua hnene la ka ajö jia ne isi, nge meci pi hi angeic.
55 Ame hë la angetre Isaraela a öhne laka, meci hë Abimelek, angatr a isa bëeke jë kowe la itre hnalapa i angatr. 56 Celë hi aqane nyithupene Akötresie la ngazo hna kuca hnei Abimelek kowe la keme i angeic, lo angeic a humuth la 70 lao trejin me angeic. 57 Nge hnei Akötresieti fe hna nyithupen la ngazo hna kuca hnene la itre trahmanyi ne Sekema. Hane hi la aqane eatr la ieji i Iotham, nekö i Ierubaala.