Ezera
4 Ame hë la itre ithupëjia me Iudra me Beniamina a drenge laka, itre ka bëeke qa ngöne la nöje trenyiwa a xupe la uma ne hmi Iehova, Akötresi Isaraela, 2 angatr a canga tro ju koi Zerubabela me itre tixe ne lapa, me hape: “Tro fe huni a xatua epun troa xupe la uma, ke eahuni fe a nyihluene* la Akötresi epun. Hne huni hna nyiqaane huuje koi nyidrë qane lo kola mus hnei Esar-adona joxu ne Asuria, lo ka xomi hun a tro ce.” 3 Ngo öni Zerubabela, me Iesua, me itre tixe ne lapa ka hape: “Waea, tha tro kö epuni a ce xupi uma me eahun kowe la Akötresi hun. Eahuni hi la ka troa xup koi Iehova Akötresi Isaraela, tune lo hna amekötin hnei Koreso joxu ne Peresi.”
4 Ame hnene la itre atrene la nöj hna thele lapaane troa ananazijëne* me axouen la angetre Iudra, matre tha tro hmaca kö angatr a xupi uma. 5 Qane lo kola mus hnei Koreso joxu ne Peresi, uti hë la musi Dariu joxu ne Peresi, hnene la itre atrene la nöj hna hamë mani kowe la itre atresi joxu, matre tro angatr a acilëne la huliwa i angetre Iudra. 6 Nge ngöne la kola nyiqaane mus hnei Asueru, hnei angatr hna cinyianyi tus nyine nyizö angetre Iudra me Ierusalema. 7 Nge ngöne la ijine mus i Aretaseta joxu ne Peresi, hnei Biselama, me Mitheredath, me Tabeela, me itre xa sine huliwa i angatr, hna cinyianyi tus koi Aretaseta joxu. Angatr a ujëne jë la tus ngöne la qene Arama, me cinyianyin thenge la mataitus qene Arama.*
8 Matre hnei Rehum,* ketre hene ka tru ne la mus, me Simesai lo atre cinyihan, hna iupi fë la tus koi Aretaseta joxu matre troa nyizöne la angetre Ierusalema. Hna cinyianyine ka hape: 9 (Qaathei Rehum la tus, lo hene ka tru ne la mus, me Simesai lo atre cinyihan, me itre xa sine huliwa i nyidro, me itre atre iameköti, me itre xa gavena, me itre sekreter, me angetre Ereka, me angetre Babulona, me angetre Susana, ene lo itre Elama, 10 me itre xa atr hnei Asenapa, lo atre ka tru, hna oth me alapan ngöne la itre traon ne Samaria, me itre xa atre ka lapa Tröne La Hneopegejë. Nge enehila, 11 hane hi la ketre kopi ne la tus hnei angatr hna iupi fë.)
“Koi Aretaseta joxu; tusi ne la itre hlue i nyipë ka lapa Tröne La Hneopegejë: Enehila, 12 epi tro la joxu a atre laka, hnene lo angetre Iudra ka mejë qaathei nyipë, hna traqa koi hun e Ierusalema. Angatr a xupe hmaca lo traon ka icilekeu nge ka ngazo. Ase hë angatr xupe la itre ihag, me kuca hnyawane la itre trepen. 13 Ngo enehila, epi tro la joxu a atre laka, e xupe hmaca ha angatre la traone cili, nge e pexeje hë la itre ihag, tha tro hmaca kö angatre lai a kuiën lo mani hna athip, me itre ewekë hna sipon hnei joxu, me thupene gojeny, nge tro ha luzi la itre xa manie i joxu. 14 Nge pine laka, eahuni a kepe mani* qaathene la hnalapa i joxu, nge tha meköti kö koi hun troa luzi la joxu, hne huni hna iupi fë la tusi celë koi joxu, matre atre jë joxu la jol, 15 nge matre troa thel ngöne la itus ne la itre qaaqaa i nyipë. Nge ngöne la itusi cili, tro hë nyipëti a öhne la itre ithuemacany, nge tro hë nyipëti a atre laka, traone ka icilekeu la traone cili, traon ka axulune la gomegom kowe la itre joxu me itre provës. Nge qaane hë ekö, hetrenyi pala hi e cili la itre trahmanyi ka thele gomegom. Hane hi lai kepin matre apatrene pi lai traone cili. 16 Eahuni a pi qaja koi joxu ka hape, e cile hmaca ha lai traon, nge e pexeje hë la itre ihag, pëhë musi* nyipë kowe la götran Tröne La Hneopegejë.”
17 Hane hi la aqane sa i joxu jëne la tusi hna iupi fë koi Rehum, lo hene ka tru ne la mus, me Simesai lo atre cinyihan, me itre xa sine huliwa i nyidro ka lapa e Samaria, me itre xa atre ka lapa Tröne La Hneopegejë. Kola hape:
“Bozu! Enehila loi e tro epuni a atre laka, 18 ase hë e hnyawane* qëmekeng lo tusi hnei epuni hna iupi fë. 19 Hnenge hna amekötin troa ithel, nge öhne hë huni laka, qaane hë ekö, hna lapaa icilekeu me itre joxu hnene la traone cili, nge e cili fe la göhnene la itre jol me icilekeu. 20 Hna musinë Ierusalema ekö hnei itre joxu ka catr, itre ka musi kowe la götran Tröne La Hneopegejë. Nge hna kuiën kowe la itre joxu cili, la mani hna athip, me itre ewekë hna sipon, me thupene gojeny. 21 Haawe enehila, amekötine jë troa acilëne la huliwa, matre tha tro kö a xupe hmaca la traon cili, e pëkö hna amekötin qaatheng. 22 Nge canga trongëne jë, matre tha tro hmaca kö a luzi la itre lolo ne la joxu.”
23 Ame hna e la kopi ne la tusi Aretaseta joxu qëmekei Rehum, me Simesai atre cinyihan, me itre sine huliwa i nyidro. Nge angatr a canga tro ju a tro Ierusalema troa wai angetre Iudra, me musinë angatr troa acilëne la huliwa. 24 Celë hi matre, cile ju hi la huliwa ne xupi uma ne hmi i Akötresie e Ierusalema. Nge hna cil uti hë la hnaaluene macatre ne mus i Dariu, joxu ne Peresi.