Isaia
45 Hane hi la hnei Iehova hna qaja koi Koreso, lo hnei nyidrëti hna iën,*
Lo hnei nyidrëti hna ea la ime maca
Matre tro angeic a musinëne la itre nöj,
Me thapa* la itre jia ne isi ne la itre joxu,
Me fe la itre qëhnelö ka lue qenön,
Matre tha tro kö a thing la itre qëhnelö ne la traon:
2 “Tro ni a tro pa qëmekei ö,
Me thaipiëne la itre sasala.
Tro ni a thëtrij la itre qëhnelö kopa,
Nge tro ni a thöne la itre fao.
3 Tro ni a hamë eö la itre mo ka lapa ngöne la gaa sihngödr
Me itre trengamo hna amë ngöne la itre hnë juetrën,
Matre tro eö a atre laka, Iehova ni,
Akötresi Isaraela, atre hëne la ëje i ö.
4 Eni a hëne la ëje i ö,
Nyine loi koi Iakobo hlueng me Isaraela, lo hnenge hna iën.
Eni a atrune la ëje i ö, ngacama thatre ni pala kö hnei ö.
5 Iehova ni, nge pëkö ketre.
Eni hmekuje hi, nge pëkö ketre Akötresie.
Tro ni a aegöcatrenyi* ö, ngacama thatre ni pala kö hnei ö,
6 Matre troa atre laka
Qaane la hna fetra hnei jö uti hë la hna lö hnei jö*
Pëkö ketre, ngo eni hmekuje hi.
Iehova ni, nge pëkö ketre.
7 Eni la ka kuca la lai me xupe la melöhlem,
Eni la ka hamë tingeting me axulune la akötr;
Iehova ni, atre kuca la nöjei ewekë cili.
8 Hnengödrai fe, amalane pi la mani qa koho;
Epi tro la itre iaw a axulune la meköt.
Epi nganga pi la ihnadro matre hamëne la iamele,*
Me aciane la meköt.
Iehova ni, atre xup itre ej.”
9 Hnëjinë hë la atre qajangazone* la Atre Xupi* angeic,
Ke ceitu i angeic memine la sine inege
Ka kaqa e kuhu hnadro memine la itre xaa sine inege!
Hapeu, tro kö la dro ka fedr a qaja kowe la Atre Xupi Inege* ka hape: “Nyipëti a kuci nemen?”
Tro kö la huliwa ne la ime i ö a qaja ka hape: “Pëkö iwanakoime* i ö”?
10 Hnëjinë hë la atre qaja kowe la kem: “Nemene la hnei ö hna nyi kemen?”
Me hape kowe la föe: “Nemene la hnei ö hna hnahon*?”
11 Hane hi la hna qaja hnei Iehova, lo Atre Ka Hmitrötr e Isaraela, lo atre xup ej:
“Tro kö epuni a hnyingë ni la itre ewekë ka troa traqa elany
Me musinë ni göne la itre neköng memine la itre huliwang?
12 Hnenge hna xupe la ihnadro, me xup la atr hun ej.
Hnenge hna seluthe la hnengödrai hnene la lue imeng,
Me amekötine la itre trongene isi e caha.”
13 “Ngöne la meköting, hnenge hna axulune la ketre atr,
Nge tro ni a amekötine la itre jë i angeic.
Tro angeic a xupe la traoneng, me nue la itre hlueng hna kötre fë
Ngo tha tro kö angeic a sipo mani maine kapa la mani hna hamën juetrën,” öni Iehova joxu ne la itre trongene isi e hnengödrai.
14 Hane hi la hna qaja hnei Iehova:
“Ame la itre mo* ne Aigupito, me itre ewekë i Aithiope nyine itön,* me angetre Seba, lo itre trahmanyi ka tru matran,
Ke tro ha traqa fë koi ö, nge itre ewekë i ö pë hë.
Tro ha othi angatr, nge tro angatr a xötrethenge eö.
Tro hë angatr a thil qëmekei ö.
Tro hë angatr a qaja koi ö cememine la metrötr ka hape: ‘Ce Akötresie me nyipë,
Nge pëkö ketre, pëkö xaa Akötresie.’”
15 Nyipici, nyipëti la Akötresie ka zae,
Akötresi Isaraela, lo Atre Iamele.
16 Tro ha ahmahmanyi angatr asë me thaipiën;
Tro la itre ka xupe la itre idrola a hmahma me isa tro.
17 Ngo tro Iehova a amele Isaraela hnene la iamele ka epine palua.
Tha tro kö a ahmahmanyi epun me thaipiën.
18 Ke hane hi la hna qaja hnei Iehova,
Atre Xupe la hnengödrai, lo nyipi Akötresie,
Atre xupe la ihnadro, me acile hutin ej,
Nge tha hna xupe menune* kö, ngo matre troa lapan:
“Iehova ni, nge pëkö ketre.
19 Tha hnenge kö hna ithanata ngöne la gaa co, ngöne la ketre nöj ka sihngödr;
Tha hnenge kö hna qaja kowe la itre matra i Iakobo ka hape,
‘Thele ni jë, ngo ka gufa la itre trengecatre i epun.’
Iehova ni, atre qaja la meköt me amamane la nyipici.
20 Trohemi nge icasikeu jë së.
Easenyi jë epun, itre ka mele pe qa ngöne la itre nöj.
Ame la itre ka xututhe la itre idrola hna tratraun, ke pëkö hnei angatr hna atre
Nge angatr a thithi kowe la haze ka thatrein amele angatr.
21 Ithanata jë, nge qaja jë la mekuna i epun.
Ce ithanatane jë.
Drei la ka perofetane lai qaan ekö
Me thuemacan qaane lo itre drai hnapan?
Hapeu, tha eni kö Iehova?
Pëkö xaa Akötresie, ngo eni hmekuje hi;
Akötresieti ka meköt nge Atre Iamele, pëkö ketre, ngo eni hmekuje hi.
22 Ujë jë koi ni matre mele pi epun, epuni asë, qa ngöne la itre cane la fene hnengödrai,
Ke Akötresieti ni, nge pëkö ketre.
23 Ase hë ni sisiny ngöne la ëjeng;
Ame la trengewekë ka tro pi qa ngöne la qëng, ke ka nyipici*
Nge tro hë ej a eatr:*
Tro la nöjei iwatingöne ca a töt qëmekeng,
Tro la nöjei thinem asë a sisinyi troa mele nyipici koi ni
24 Me hape: ‘Nyipici, ame la nyipi meköt memine la egöcatr, ke qaathei Iehova.
Tro la itre ka elëhni koi nyidrë a hmahma qëmekei nyidrë.
25 Tro ha jele mekötin asë la itre matra i Isaraela pi Iehova,
Nge tro hë angatr a sipu atrunyi angatr.’”