Salamo

83 Akötresieti fe, the lapa thaupe kö;

The cile kö troa ithanata,* nge Akötresieti Ka Hmitrötre fe, the lapa kö tune hi lai.

 2 Ke goeën! Itre ithupëjia me nyipëti a enienij;

Itre ka methinë nyipëti a pi tru.*

 3 Angatr a nyinyithiina me ce thë troa akötrëne la nöje i nyipë;

Angatr a thele troa trathethine la itre hnimina* i nyipë.

 4 Öni angatr ka hape: “Traqa pi matre lep apatrene pi së la nöje i angatr,

Matre tha tro hmaca kö së a mekun la ëje i Isaraela.”

 5 Angatr a thel* la aqane troa apatrenyi ö;

Hnei angatr hna isisinyikeu matre cile koi ö

 6 Ene la itre itate i Edroma me angetre Isamaela, me Moaba, me angetre Hagara,

 7 Me Gebala, me Amona, me Amaleka,

Me Filisiti, me angetre Turo.

 8 Hnei Asuria fe hna ce xöl* me angatr;

Angatr a sajuëne la itre nekö i Lota. (Sela)

 9 Kuca jë koi angatr la aqane kuca i nyipëti koi Midiana,

Me aqane kuca i nyipëti koi Sisera, me Iabin, ngöne la hneopegejë* Kisona.

10 Hna apatrenyi angatr e Eni-Dora;

Ceitu i angatr pë hë me agetrin e kuhu hnadro.

11 Kuca jë matre tro la itre joxu* i angatr a tui Oreba me Zeeba

Nge itre tane i angatr tui Zeba me Zalemuna,

12 Ke öni angatr ka hape: “Tro sa thapa la nöj hnei Akötresieti hna lapan.”

13 Akötresinge fe, aceitunë angatre jë memine la ketre feja ka qaqacil hna uf agön,

Me tune la jez hna uf agöne hnei eny.

14 Tune la eë ka manithe la hnënge hnitr,

Me tune la ukahlokin eë ka dreuthe la itre wetr,

15 Epi tro nyipëti a weji angatr hnene la wene atraqatr i nyipë

Me axouenyi angatr hnene la udreli i nyipë.

16 Iehova fe, heetrëne* ju la qëmeke i angatr hnene la hmahma,

Matre tro angatr a thel la ëje i nyipë.

17 Epi troa thaipië angatr me axouenyi angatr uti hë epine palua;

Epi tro angatr a hmahma me patr;

18 Loi e tro la nöjei atr a atre laka, Iehova la ëje i nyipë,

Nge nyipëti hmekuje hi la Ka Draië Catr e celë fen.