Esodro

26 “Tro eö a kuca la uma maano hnene la 10 lao nyipi maano lino hna el, me theny ka bulu, me drela ka madra, me theiny ka madra palulu. Nge tro fe eö a sil hune la itre imaano la itre kerubi. 2 Nge tro la itre imaano a 28 kubit* la eqean, nge troa 4 kubit la eisaisan. Casi hi la tulun itre ej. 3 Nge troa icanekeune la 5 lao maano, ketre koi ketre, matre ca götran. Nge ame la 5 lao xa maano, tro fe a icanekeun, matre thatraqane la ketre götran. 4 Tro eö a kuci otru hnei theny ka bulu ngöne la xötr ezin ne la imaano ka nyipun lo ca götran, troa tune fe ngöne la xötr ezin ne la imaano ka nyipun lo ketre götran, hmekune la hnë isil ne la lue götran. 5 Tro eö a kuca la 50 lao otru ngöne la ketre imaano, nge 50 ngöne la pune la ketre imaano, matre tro itre ej a iqëmekekeu, hmekune la hna isili ne la lue götran. 6 Tro eö a kuca la 50 lao nyine acatrene gool, me iacatrenekeune la lue götran, matre acasin asë la uma maano.

7 Nge tro eö a kuca la itre xa imaano hnei pene nani nyine itat, matre petrëne la uma maano. Nge tro fe eö a kuca la 11 lao imaano. 8 Nge tro la itre imaano a 30 lao kubit la eqean, nge 4 kubit la eisaisan. Nge casi hi la tulu ne la 11 lao imaano. 9 Nge tro eö a icanekeune la 5 lao imaano, ketre tune fe kowe la 6 lao xan. Nge tro eö a sa la pun ka thipi pe qëmekene la uma maano. 10 Tro eö a kuca la 50 lao otru ngöne la pune la ketre imaano, nge 50 lao otru ngöne la pune la ketre imaano, hmekune la hna itö ne la lue götran. 11 Nge tro eö a kuca la 50 lao nyine jele kopa, me ijelekeune memine la itre otru, me acasin ej matre pexeje pi la uma maano. 12 Nge ame lai ka lapa pe qa ngöne lai imaano, tro pë hë ej a thip. Ame la sine lai imaano, ene la ka lapa pe, tro ej a thip tröne la uma maano. 13 Nge tro la lue imaano ka thip ngöne la lue götran, a isa ca kubit la eqean, matre heetrën ej.

14 “Tro eö a kuca la ketre isitr hnei kupeine mamoe hna amadran. Nge troa heetrën ej hnene la ketre isitr hna kuca hnei kupeine fok.*

15 “Tro eö a cai inehe* akasia kowe la uma maano, me acilën. 16 Ame la itre inehe, tro itre ej a 10 kubit la edraiën, nge ca kubit nge sin la eisaisan. 17 Nge ame la itre inehe, isa hetre lue can ej, nge itre ej a cile ihmeku. Tro eö a kuca tun kowe la itre inehe ne la uma maano asë. 18 Nge tro eö a kuca la 20 lao inehe, kowe la götrane kolojë ne la uma maano.

19 “Tro eö a xupe la 40 lao trepene sileva hna kuj, fene la 20 lao inehe: lue trepene hna kuj fene la pane inehe, nyine alöne la lue can ej. Nge lue trepene hna kuj fene la itre xa inehe, göne la lue can ej. 20 Nge ame göne la ketre götrane lai uma maano e kolopi, kuca jë la 20 lao inehe, 21 memine la 40 lao trepene sileva hna kuj: lue trepene hna kuj fene la pane inehe, me lue trepene hna kuj, fene la itre xa inehe thupen. 22 Nge ngöne la götrane kuë tröne la uma maano, tro eö a acil la 6 lao inehe. 23 Tro eö a cane la lue inehe, nyine sine feni ne la lue koona hutrö ne la uma maano. 24 Tro la lue inehe a ce tro qa kuhu, a tro draië kowe lo pane otru. Nge tro lue ej a nyi sine feni ne koona. 25 Nge tro ha 8 lao inehe nge 16 lao trepene sileva hna kuj: lue trepene hna kuj fene la pane inehe, nge lue trepene hna kuj, fene la itre inehe thupen.

26 “Tro eö a kuca la itre agö akasia: 5 lao agö göne la itre inehe ne la ketre götrane la uma maano. 27 Nge 5 lao agö, göne la itre inehe ne la ketre götrane la uma maano. Nge 5 lao agö, göne la itre inehe ne la götrane kuë tröne la uma maano. 28 Nge tro la agö ka he nyipin, lo ka lapa nyipine la itre inehe, a tro qa ngöne la ketre pun kowe la ketre pun.

29 “Tro eö a pele goolëne la itre inehe, me acatrei otru gool hun itre ej, nyine tane la itre agö. Nge tro fe eö a pele goolëne la itre agö. 30 Hnëqa i eö troa acile la uma maano, thenge la tulu hna amamane koi eö hune la wetr.

31 “Tro eö a cane la imaano ne thewe hnahag hnei theny ka bulu, me drela ka madra, me theny ka madra palulu, me nyipi lino hna el. Nge tro fe a sili itre kerubi hune lai imaano ne thewe hnahag. 32 Tro eö a athip ej ngöne la 4 lao sine feni akasia hna pele goolën, nge troa kuca hnei gool la itre nyine jel. Nge tro la itre sine feni a të hune la 4 lao trepene sileva hna kuj. 33 Tro eö a athipe la imaano ne thewe hnahag fene la itre nyine acatren. Nge tröne lai imaano ne thewe hnahag, tro eö a alöne la pua ne Anyipicin. Nge ame lai imaano ne thewe hnahag, tro ej a nyi ifegone la Gaa Hmitrötr, me Gaa Nyipi Hmitrötr. 34 Tro eö a thinge la pua ne Anyipicin hnine la Gaa Nyipi Hmitrötr.

35 “Tro eö a amë la laulau ngöne la hnahag qëmekene lai imaano ne thewe hnahag, memine la ita ne laam qëmekene la laulau, ngöne la götrane kolojë ne la uma maano. Nge tro eö a amë la laulau ngöne la götrane kolopi. 36 Nge ame kowe la hnë lö ne la uma maano, tro eö a cane la rido ka hmelele hnei theny ka bulu, me drela ka madra, me theny ka madra palulu, me nyipi lino hna el, nge troa ielekeun itre ej. 37 Tro eö a acil la 5 lao sine feni akasia thatraqane la rido ka hmelele, me pelethe hnei gool. Nge troa kuca hnei gool la itre nyine jel, nge tro eö a ahmun la 5 lao trepene kopa hna kuj kow itre ej.