Numera
22 Thupene lai, hnene la angetre Isaraela hna tro qa cili, me lapane la itre hnapapa e Moaba, ngöne la ketre götrane la hneopegejë Ioridano, hmekun e Ieriko. 2 Ngo öhn asë hi Balaka nekö i Zipora, lo hna kuca hnene la angetre Isaraela koi angetre Amora, 3 matre hnene la angetre Moaba hna xouene la angetre Isaraela, ke ala nyimu catr angatr; eje hi, angetre Moaba a xou me methinëne la angetre Isaraela. 4 Ame hnene la angetre Moaba hna qaja kowe la itre qatr ne Midiana ka hape: “Tro la nöje ce a xeni asë xötreithi së, tune la kau ka xeni la hnënge haö ngöne la itre hlapa.”
Ngöne la ijine cili, Balaka nekö i Zipora la joxu ne Moaba. 5 Hnei nyidrëti hna upe la itre ka tro fë maca koi Balama nekö i Beora, e Pethora, ngöne la ketre götran ne la Hneopegejë,* ngöne lo zi i nyidrë. Öni nyidrëti jë hi: “Dreng! Lö hë la ketre nöj qa Aigupito. Ase hë angatr haöthe la nöj, nge angatre hi la qëmekeng! 6 Haawe, eni a sipo eö, pane trohemi troa ejine koi ni la nöje cili, ke ka catre kö angatre hung. Nge maine jë, tro hë ni a atreine lepi angatr me helë angatr qa la, ke atre hi ni laka, tro ha manathith la atr hnei ö hna amanathithin, ngo tro ha hnëjin la atr hnei ö hna ejin.”
7 Ame hna mejë hnene la itre qatr ne Moaba me Midiana, troa nyithupen la atre ieji. Hnei angatr hna tro koi Balama, me qaja la maca i Balaka. 8 Matre öni Balama jë hi: “Pane meköle ju e ce, nge tro pë hë ni a thuemacanyi epun la hnei Iehova hna troa qaja koi ni.” Ame hnene la itre he ne nöj ne Moaba hna lapa thei Balama.
9 Matre öni Akötresieti jë hi koi Balama: “Drei la itre atr ka lapa thei ö?” 10 Nge sa jë hi Balama kowe la nyipi Akötresie ka hape: “Hnei Balaka joxu ne Moaba, lo nekö i Zipora hna upe la itre atre cili koi ni memine la maca celë: 11 ‘Dreng! Ame lo nöj ka lö qa Aigupito, ke ase hë ej haöthe la nöj. Ngo pane traqa pi troa eji angatr, nge maine jë, tro hë ni a atrene lepi angatr me helë angatre qa la.’” 12 Ngo öni Akötresieti jë hi koi Balama: “Tha tro kö eö a ce tro me angatr. Tha tro kö eö a ejine la nöje cili, ke nöj hna amanathithin.”
13 Matre ame hë e hmakany, hnei Balama hna mejë me qaja kowe la itre he ne nöj hna upe hnei Balaka ka hape: “Bëeke hmaca jë kowe la nöje i epun, ke xele Iehova tro ni a ce tro me epun.” 14 Ame hnene la itre he ne nöj ne Moaba hna bëeke hmaca koi Balaka me hape: “Xele kö Balama troa ce tro me eahun.”
15 Ngo hnei Balaka hna upe hmaca la itre xaa he ne nöj, ka ala nyimu kö nge ka hlemu kö hune lo itre hna upe panën. 16 Nge hnei angatr hna tro koi Balama me hape: “Hane hi la maca i Balaka nekö i Zipora: ‘Eni a sipo eö, the tro kö la ketre ewekë a sewe eö troa traqa koi ni, 17 ke tro hë ni a atrunyi ö, me kuca la nöjei ewekë hnei ö hna ajan. Ngo pane traqa pi pe troa eji angatr koi ni.’” 18 Matre öni Balama jë hi kowe la itre hlue i Balaka: “Maine tro ju hë Balaka a hamë ni la uma i nyidrë ka catr hnei sileva me gool, ngo thatreine kö ni troa cil kowe la hna amekötin hnei Iehova Akötresie, ka co ju hë maine ka tru. 19 Ngo goeën, pane meköle ju la jidre celë me eni, matre atre jë ni la itre xaa hna amekötin hnei Iehova.”
20 Nge ngöne la jidri cili, hnei Iehova hna qaja koi Balama ka hape: “Pine laka angatre hë la troa thei ö, ce tro jë hë me angatr. Ngo casi hi, tro hmekuje hi ö a qaja la hnenge hna troa amekötin.” 21 Matre ame hë e hmakany, hnei Balama hna mejë me ati biritin la boliko föe, me xötrethenge la itre he ne nöj ne Moaba.
22 Ngo hnei Akötresie hna elëhni, ke koilo hë Balama; ame hnene la angela i Iehova hna cil e kuhu gojeny troa sewe angeic. Ame pena Balama, angeic a tithe la boliko föe, nge ce angeic me itre hlue i angeic. 23 Ame hë la kola öhn hnene la si i Balama laka, kola cile fë taua hnene la angela i Iehova nyipine la gojeny, hnen ej hna kötre jea kowe la itre hlapa. Ngo hnei Balama hna lep la si i angeic matre tro ej a bëeke hmaca kowe la gojeny. 24 Ame hnene la angela i Iehova hna cil ngöne la ketre mene gojeny ka ilitr, nyipine la lue ivin me itra etë ngöne la lue pala. 25 Ngo ame hë la kola öhne la angela Iehova hnene la si i Balama, ej a qalëne jë la itra etë, nge catre ju hi la waca i Balama; ame hnei angeic hna lepi nyëne hmaca ju.
26 Nge hnene la angela i Iehova hna tro hmaca qëmekei nyidro, me cil ngöne la ketre mene gojenyi ka ilitre catr, matre thatreine kö troa jea kowe la götrane maca me mi. 27 Nge ame hë la kola öhne la angela i Iehova hnene la si i Balama, ej a meköle pi e kuhu hnadro; Balama a elëhni jë me lepi nyëne hmaca memine la sine tö. 28 Ame hnei Iehova hna kuca matre ithanata jë* la boliko föe, nge öni nyëne jë hi koi Balama: “Hnenge hna uë nyipë matre nyipëti a akönia lepi ni?” 29 Nge sa jë hi Balama ka hape: “Eö a qenahmo ni. Maine hetre helenge ju, tro hë ni a humuthi ö!” 30 Matre önine jë hi la boliko föe koi angeic: “Tha eni kö lo si i nyipë, lo hnei nyipëti hna tith qaan ekö uti hë enehila? Hnenge kö hna hane qanangazo nyipë?” Öni Balama jë hi: “Waea!” 31 Ame hnei Iehova hna fe la luemeke i Balama, nge mama pi hi lo angela i Iehova ka cile fë taua nyipine la gojeny. Matre Balama a canga thili ju me kei qe ipië.
32 Nge önine la angela i Iehova ka hape: “Hnauëne la eö a akönia lepe la si i ö? Pane dreng! Eni la ka ut troa cile koi ö, ke xele catre ni ma wange la tronge i ö. 33 Ngo hnene la si i ö hna öhnyi ni me akönia neë ni. Ngo maine tha jea ju kö lo si i ö, ke atre ka meci hë eö! Ngo ame kö nyën, tro ni a nuamele nyën.” 34 Matre sa jë hi Balama kowe la angela i Iehova ka hape: “Ngazo catre la thiinang, ke thatre kö ni laka, nyipëti la ka traqa troa ixelë me eni. Ngo maine ka ngazo la trongenge koi nyipë, eni hmaca a bëek.” 35 Önine hmaca jë hi la angela i Iehova koi Balama ka hape: “Ce tro jë me angatr, ngo tro hi ö a qaja la hnenge hna troa amekötin koi ö.” Ame hnei Balama hna ce tro memine la itre he ne nöj hna upe hnei Balaka.
36 Nge ame hë la Balaka a drenge laka, calemi hë Balama, hnei nyidrë hna canga tro troa ixelë me angeic ngöne la traon e Moaba, ngöne la ketre götrane la nöj e Arenona, hmekune la ifego ne la nöj. 37 Nge öni Balaka jë hi koi Balama: “Tha hnenge kö lo hna upi angatr troa thei ö? Hnauëne laka, tha traqa kö eö? Mekuna i ö ka hape, tha ijijinge kö troa atrunyi ö?” 38 Matre sa jë hi Balama ka hape: “Eni hë la. Ngo nyine u la tro ni a ithanata? Ke tro hi ni a qaja la hnei Akötresie hna troa amë ngöne la qëng.”
39 Ame hnei Balama me Balaka hna ce tro, me traqa e Kiriatha-Houzoth. 40 Nge hnei Balaka hna huujëne la itre kau, me itre mamoe, me iupi fë koi Balama me itre he ne nöj ka ce me angeic. 41 Matre ame hë e hmakany, hnei Balaka hna elë sai Balama a tro Bamotha-Baal; nge qa cili, ijiji nyidroti hi troa goeën asë la nöje Isaraela.