Deuteronomi

3 “Thupene lai, hne së hna kano me elë kowe la gojenyi ne tro kowe la nöje Basana. Nge hnei Oga joxu ne Basana, hna ce uti memine la trongene isi i nyidrë troa isi me easë e Ederei. 2 Matre öni Iehova koi ni: ‘The xoue angeice kö, ke tro ni a nue angeic kowe la ime i ö, me trongene isi i angeic asë, me nöje i angeic. Nge tro hë eö a kuca koi angeic, tune lo hnei ö hna kuca koi Sihona joxu i angetre Amora, ka lapa e Hesebona.’ 3 Matre hnei Iehova Akötresi së hna nue Oga koi së joxu ne Basana, memine la trongene isi i angeic. Nge hne së hna lepi angatr uti hnyawa la kola pë atr ka mel. 4 Thupene lai, hne së hna thapa asë la itre traone i angeic. Nge pëkö ca hna nue pe: traqa koi 60 lao traon ngöne la nöje Aregoba, ene la baselaia i Oga ngöne la nöje Basana. 5 Nge ame la itre traone cili, ke itre hna eköhagen asë, nge atraqatr la itre ihag, me itre qëhnelön, me itre agö. Nge tru fe hnei traon hna tha eköhagen hne së hna thapa. 6 Nge tune lo hne së hna kuca koi Sihona joxu ne Hesebona, hne së fe hna lep apatren la itre traone cili. Hne së hna lep apatren la nöjei traon: ene la itre trahmany, me itre föe, me itre nekönatr. 7 Nge hne së fe hna thapa la itre öni angatr, me nöjei ewekë ngöne la itre traon.

8 “Matre ngöne la ijine cili, hne së hna thapa la nöje ne la lue joxu ne Amora, ka lapa ngöne la götrane celë ne la hneopegejë Ioridrano, qaane la hnathup e Arenona uti hë la wetr e Heremona, 9 (kolo wetr hna hën hnene la angetre Sidona ka hape, Siriona, nge hna hën hnene la angetre Amora ka hape, Senira) 10 memine la nöjei traon ka lapa ngöne la gaa draië, memine la nöje Gileada asë, memine la nöje Basana asë, uti hë e Seleka me Ederei, itre traon ne la baselaia i Oga ngöne la nöje Basana. 11 Nge ame Oga joxu ne Basana, nyidrëti pe hi lo atre Refaima ka mele pe. Ame la hua* i nyidrë, ke hna kuca hnei fao,* nge traqa koi 9 kubit* la eqean, nge 4 kubit la eisaisan, thenge la tulu ne kubit. Nge eje pala kö e Raba thene la angetre Amona. 12 Ngöne la ijine cili, hne së hna thapa la nöje cili. Ej a tro qa Aroera, ezine la hnathup e Arenona, uti hë la sine la itre wetr ngöne la nöje Gileada. Nge hnenge hna hamëne la itre traon cili kowe la angetre Reubena, me kowe la angetre Gada. 13 Ame pë hë la munëne la nöje Gileada me Basana asë, ene lo baselaia i Oga, ke hnenge hna hamëne kowe la sine la tribu i Manase. Nge ame la nöje Aregoba, ngöne la nöje Basana, ke hna majemine hën ka hape, nöje ne la angetre Refai.

14 “Hnei Iaira nekö i Manase, hna xome la nöje Aregoba ngöne la nöje Basana, uti hë la ifego ne la angetre Gesuri me angetre Maaka. Nge hnei angeic hna hëne la itre neköi traone cili ka hape, Havoth-Iaira,* thenge la ëje i angeic. Celë pala hi la aqane hëne la itre traone cili enehila. 15 Nge hnenge hna hamë Gileada koi Makiri. 16 Ame kowe la angetre Reubena me angetre Gada, ke hnenge hna hamëne la götran ka tro qa Gileada uti hë la hnathup ne Arenona (ame la ifego ne la götrane i angatr, ke ej e nyipine lai hnathup), uti hë e Iaboka (lo hnathup ka nyi ifego ne la nöje i angetre Amona), 17 memine la Araba, memine la hneopegejë Ioridrano me itre ngönëtë trootro, qa Kinereth uti hë la hnagejë ne la Araba (ene la Hnagejë Sotr*), fene la itre wetre Pisega e koië.

18 “Matre öninge jë hi koi angatr ka hape: ‘Ase hë Iehova Akötresi epun hamëne la nöje ce nyine zi i epun. Haawe, loi e tro la itre trahmanyi ka catr thei epun a isa ajö jia ne isi, me sasaithe la hneopegejë Ioridrano qëmeken la itre trejin me epun, ene la angetre Isaraela. 19 Ngo tro hmekuje hi a lapane la itre traon hnenge hna hamë epun, hnene la itre föi epun, me ha nekö i epun me itre si i epun (atre hi ni laka, tru catr la itre si i epun). 20 Nge aqane trongene hë lai, uti hë la tro Iehova a hamëne la tingeting kowe la itre trejin me epun, tune lo hnei nyidrëti hna kuca koi epun, nge uti hë la tro angatr a thapa la nöj hnei Iehova Akötresi epun hna troa hamë angatr, ngöne la ketre götran ne la hneopegejë Ioridrano. Thupene lai, tro hë epuni a isa bëeke kowe la itre zi i epun, lo hnenge hna hamë epun.’

21 “Ngöne la ijine cili, öning koi Iosua ka hape: ‘Hnei ö hna öhn memine la sipu luemeke i ö, la hna kuca hnei Iehova Akötresi epun kowe la lue joxu celë. Nge tro fe Iehova a kuca tun kowe la itre xaa Baselaia hnei ö hna tro kow, ngöne la ketre götran ne la hneopegejë Ioridrano. 22 Haawe, the xoue angatre kö, ke Iehova Akötresi epun la ka isigöli epun.’

23 “Ngöne la ijine cili, hnenge hna treije fë koi Iehova ka hape: 24 ‘Iehova fe joxu,* ase hë nyipëti amamane kowe la hlue i nyipë la edraiën me ecatrene la mene i nyipë. Matre drei Akötresie e koho hnengödrai me e celë fen, ka atreine wej la etrune la itre huliwa ka mene i nyipë? 25 Haawe, pane nue ni pi troa sasaithe la hneopegejë Ioridrano, me goeën la nöje ka lolo ngöne la ketre götran, lo itre wetre ka mingöming, memine la nöje Lebanona.’ 26 Ngo Iehova pala hi a elëhni koi ni pi epun, nge xele kö nyidrëti ma drei ni. Matre öni nyidrëti ka hape: ‘Loi ju hë! The ithanatane hmaca kö la jole cili. 27 Elë jë hë eö kowe la wetre Pisega, nge goeëne jë e kuë, me e kolopi, me e kolojë, me e koië, nge goeëne hnyawane jë la nöj, ke tha tro kö eö a sasaithe la hneopegejë Ioridrano. 28 Thupene lai, acili Iosua jë troa tan, nge thuecatre jë koi angeic, nge aegöcatrenyi angeice jë, ke angeice hi la ka troa elemekene la nöj, me tro sai angatr troa thapa la nöj hnei ö hna troa goeën.’ 29 Nge hna traqa asë la itre ewekë cili, ngöne lo easa lapa ngöne la hnathup qëmekene Bethe-Peora.