Deuteronomi

14 “Epuni la itre nekö i Iehova Akötresi epun. The tro kö epuni a sijasija la ngönetrei i epun, maine cine la itre sursil* i epun thatraqane la itre ka mec. 2 Ke nöje ka hmitrötr epuni koi Iehova Akötresi epun. Nge hnei Iehova hna ië epun qa ngöne la nöjei nöj e cailo fen, troa nöje i nyidrë, me atu ka co* i nyidrë.

3 “Tha tro kö epuni a öni la ketre öni ka sis. 4 Hane hi la itre öni nyine tro epuni a öni: ene la kau, me mamoe, me nani, 5 me nöjei pengöne drube,* me nani wael, me mamoe wael, me mamoe ne wetr. 6 Ijiji epuni hi troa öni la nöjei öni ka hetre itine wanakoca hna kuie luën, nge ka hutre hmaca la hna xen. 7 Ngo thene la itre öni ka hutre hmaca la hna xen, maine ka hetre itine wanakoca hna kuie luën, hane hi la hna wathebon koi epun: ene la kamela, me lapë, me shefani, ke itre ej a hutre hmaca la hna xen, ngo ka pë itine wanakoca hna kuie luën. Tro itre ej a pui ngazo koi epun, 8 memine fe la puaka, ke hetre itine wanakocan ej hna kuie luën, ngo tha ka hutre hmaca kö la hna xen. Ka pui ngazo lai koi epun. Tha tro kö epuni a öni la itre öni cili, maine ketr pena la ngönetrei i angatr ka mec.

9 “Qa ngöne la itre öni ka mel ngöne la itre tim, hane hi la itre öni nyine tro epuni a öni: ene la nöjei öni ka hetre fëthin me enienin, ijiji epuni hi troa öni. 10 Ngo tha tro kö epuni a öni la itre öni ka pë fëthin me enienin. Ka pui ngazo lai koi epun.

11 “Ijiji epuni hi troa öni la nöjei waco asë ka pui loi. 12 Ngo hane hi la itre waco hna wathebon koi epun: ene la aeto, me perese, me ozeni, 13 me aia ka madra, me aia ka wetrewetr, me nöjei pengöne aia, 14 me nöjei pengöne halo, 15 me iaena,* me men, me sahafe, me nöjei pengöne huzu, 16 me neköi men, me men ne hnagejë, me tinesemeth, 17 me kati, me rama, me salak, 18 me sigony, me nöjei pengöne anafa, me dukifath, me xeti iap. 19 Ame asë hi la nöjei öni ka mana nge ka hetre iapen, ke ka sisi koi epun. Tha tro kö epuni a öni. 20 Ngo ijiji epuni hi troa öni la nöjei öni ka sesë nge ka pui loi.

21 “Tha tro kö epuni a öni la ketre öni ka mec. Ngo ijiji epuni hi troa hamëne kowe la trenyiwa ka lapa ngöne la itre traone* i epun, nge tro pë hë angeic a öni. Ijiji epuni fe troa salemën kowe la trenyiwa, ke epuni la nöje ka hmitrötr thatraqai Iehova Akötresi epun.

“Tha tro kö epuni a atrone la neköi nani ngöne la zane thi ne la thine i nyën.

22 “Qa i ö troa hamën e nöjei macatre, la hna 10 ne la itre xen hnei ö hna menuëne ngöne la hlapa. 23 Tro hë eö a xen la hna 10 ne la itre wene feja i ö, me waina i ö ka hnyipixe, me oele i ö, me itre öni hna pane hnahon qa ngöne itre öni ka tru me itre öni ka co i ö qëmekei Iehova Akötresi ö, ngöne la götran hnei Iehova hna iën troa acile la ëje i nyidrë, matre tro pala hi ö a inin troa xoue Iehova Akötresi ö.

24 “Maine thatreine kö eö traqa fë la itre ewekë cili* ngöne la götrane hnei Iehova Akötresi ö hna iëne troa acile la ëje i nyidrë, ke nanyi la gojeny (tro kö Iehova Akötresi ö a amanathithi ö), 25 ijiji ö hi troa nyihnan hnei mani. Xome jë la mani cili, nge tro jë kowe la götran hnei Iehova Akötresi ö hna iën. 26 Itöne jë hë la nöjei ewekë hnei ö hna ajan: ene la itre kau, me itre mamoe, me itre nani, me waina, me kahaitr, me nöjei ewekë hnei ö hna ajan; tro hë eö a xen e cili qëmekei Iehova Akötresi ö, nge tro hë eö me fami i ö* a madrin. 27 Ngo the nuetrije kö la angetre Levi ka lapa ngöne la itre traone i ö, ke pëkö edrö i angatr me zi i angatr thei ö.

28 “E nöjei köni macatre, tro eö a xome la hna 10 ne la itre xen hnei ö hna menuën ngöne la macatre cili, me amë acon ngöne la itre traone i ö. 29 Nge tro pë hë la atre Levi (lo ka pë edrö me zi i angeic thei ö), memine la trenyiwa ka lapa thei ö, me nekön hna mecitrij hnei kem, me sine föe ka lapa ngöne la itre traone i ö, a traqa me xeni mej, matre tro Iehova Akötresi ö a amanathithi ö ngöne la nöjei huliwa i ö asë.